1. ¿Alqiʼj mas in che ximen xjal toj ambʼil jaʼlo?

 TOJ ambʼil jaʼlo in nok qkeʼyin chʼixmi kykyaqil xjal oʼkx in che ximen kyiʼjx. Jun techel, ateʼ nim xjal in najbʼen redes sociales kyuʼn tuʼn tok kyqʼoʼn kywitz txqantl kyiʼj ex kyiʼj tiʼchaq in bʼant kyuʼn. Pero oʼkx junjun xjal in jaw kynimsaʼn Jehová. Toj xnaqʼtzbʼil lu, kʼelel qnikʼ tiʼj tiʼ t-xilen tuʼn tjaw qnimsaʼn Jehová ex tiquʼn nim toklen tuʼn tbʼant quʼn. Ax ikx kʼelel qnikʼ tiʼj tzeʼn jaku jaw qnimsaʼn Jehová ex tzeʼn kjawil tnimsaʼn tbʼi toj chʼintl ambʼil.

¿TIʼ T-XILEN TUʼN TJAW QNIMSAʼN JEHOVÁ?

 2. ¿Tzeʼn kubʼ tyekʼin Jehová tajwalil t-xeʼ witz Sinaí? (Ax ikx qʼonka twitza tiʼj tilbʼilal).

² Aj tyolin Biblia tiʼj txol yol tajwalil, in yolin tiʼj jun xjal nim toklen ex in jaw nimset. Tej tikʼ junjun qʼij kyetzlen israelita toj tnam Egipto, kubʼ tyekʼin Jehová jniʼ tipumal at ex qa at toklen tuʼn tjaw nimset. Qo ximen tiʼjju bʼaj toj ambʼil aju: Otoq tzʼok kychmon kyibʼ nim millón israelita t-xe witz Sinaí, tuʼntzun t-xi kybʼiʼn aju tzul tqʼamaʼn Jehová kye. Noq minabʼen kubʼ jukeʼ  muj tibʼaj witz, tzaj jun kyaqnajnabʼ ex jatz nim sibʼ toj witz akux in qoptzʼaj twitz kyaʼj tuʼn qʼankyoq ex tzaj qʼajt chun moqa cuerno kyuw wen (Éx. 19:​16-18; 24:17; Sal. 68:8). Tej tbʼant jlu tuʼn Jehová, e jaw labʼin qe israelita tej tok kykeʼyin qa nimxix tipumal Jehová.

 3. ¿Alkyeqe tumel jaku jaw qnimsaʼn Jehová?

³ ¿Yajtzun qe? ¿Jakupe jaw qnimsaʼn Jehová? Jaku. Jun tumel tuʼn tbʼant quʼn aju qa ma qo yolin kyukʼil xjal tiʼj tipumal ex kyiʼj qe tbʼanel tmod at. Ax ikx jaku jaw qnimsaʼn kyuʼn qe tiʼchaq in che bʼant quʼn noq tuʼn tipumal (Is. 26:12). Kubʼ tqʼoʼn rey David jun tbʼanel techel qwitz tuʼnju jaw tnimsaʼn Jehová. Tej tok ten naʼl Dios kyxol aj Israel xi tqʼamaʼn jlu: «Nman, nimxix toklena, nim tipumala, nim tajwalila, teya ju kawbʼil ex aya rey. Ex tkyaqilju at twitz kyaʼj ex twitz txʼotxʼ teya tkyaqil». Tej tbʼaj naʼn Dios «kykyaqiltzun tnam xjal jaw kynimsaʼn tbʼi Qman» (1 Crón. 29:​11, 20).

 4. ¿Tzeʼn jaw tnimsaʼn Jesús Jehová?

⁴ Tej tten Jesús tzalu twitz Txʼotxʼ jaw tnimsaʼn Jehová toj junxichaq tten. Jun techel, tkyaqil maj xi tqʼamaʼn kye xjal qa tuʼn tipumal Jehová in che bʼanttoq milagro tuʼn (Mar. 5:​18-20). Ax ikx jaw tnimsaʼn Jehová kyukʼil tyol ex tukʼil tmod kubʼ tyekʼin kyukʼil txqantl. Toj jun maj, in qʼontoq Jesús xnaqʼtzbʼil toj jun ja te kʼulbʼil, kyxol xjal lu attoq jun xuʼj qʼiʼntoq 18 abʼqʼi tokxlen jun demonio toj t-xmilal. Tuʼn jlu mlaytoq bʼant tuʼn tkubʼ weʼ rekt. ¡Kwest-xixlo anqʼibʼil lu! Tej tok tkeʼyin Jesús jlu tzaj qʼaqʼan tkʼuʼj tiʼj ex xi tqʼamaʼn jlu te xuʼj tukʼil kʼujlabʼil: «Aya xuʼj, ma tzoqpeta, ma tzʼel tyabʼila». Kubʼtzun tqʼoʼn Jesús tqʼabʼ tibʼaj ex jurat kubʼ weʼ rekt ex «jaw tnimsaʼn tbʼi Dios» (Luc. 13:​10-13). Tuʼnju otoq bʼanix xuʼj lu, attoq nim tiquʼn tuʼn tjaw tnimsaʼn Jehová. Ax ikx qe at nim tiquʼn tuʼn tjaw qnimsaʼn.

¿TIQUʼN NIM TOKLEN TUʼN TJAW QNIMSAʼN JEHOVÁ?

 5. ¿Tiquʼn il tiʼj tuʼn qrespetarin te Jehová?

⁵ In jaw qnimsaʼn Jehová tuʼnju in qo respetarin te. At nim tiquʼn tuʼn qrespetarin te. At nim tipumal Jehová tuʼn tbʼant tkyaqilju taj ex mintiʼ in sikt (Sal. 96:​4-7). Kyiʼj qe tbʼinchbʼen Jehová, qʼanchaʼlxix qa at nimxix tnabʼil. O tzaj tqʼoʼn qchwinqlal ex tkyaqilju at tajbʼen qe tuʼn kukx qanqʼin (Apoc. 4:11). Tzʼaqlixix te (Apoc. 15:4). Tbʼanel in nela tkyaqilju in bʼant tuʼn ex in japun tkyaqilju in tzaj ttziyen (Jos. 23:14). Tuʼntzunju tqʼama profeta Jeremías jlu: «Kyxol kykyaqil xjal at kynabʼl kyuj kykyaqil kawbʼil tuj tkyaqil twitz txʼotxʼ, mintiʼ juntl ik tzaʼn teya» (Jer. 10:​6, 7). Ojtzqiʼnxix quʼn qa at nim tiquʼn tuʼn qnimen te Qman Jehová. Aj tel qnikʼ tiʼj tkyaqil jlu, nya oʼkx qaj tuʼn qrespetarin te, sino ax ikx in chʼiy qkʼujlabʼil tiʼj.

 6. ¿Tiquʼn kʼujlaʼn Jehová quʼn?

⁶ In jaw qnimsaʼn Jehová tuʼnju kʼujlaʼn quʼn tuʼn tkyaqil qanmi. Ateʼ tbʼanel tmod Jehová tuʼntzunju in nok qkʼujlaʼn. Jun techel, in tzaj qʼaqʼan tkʼuʼj ex in tzaj tzʼeʼy tkʼuʼj qiʼj (Sal. 103:13; Is. 49:15). Aj ttzaj qbʼis kyuʼn nya bʼaʼn, in nel tnikʼ Jehová tiʼjju kʼixkʼoj in kubʼ qnaʼn (Zac. 2:8). In nonin qiʼj tuʼn qok laqʼeʼ ttxlaj ex tuʼn qok te tamiw (Sal. 25:14; Hech. 17:27). Ax ikx in kubʼ tin tibʼ ex «in tzaj mokʼeʼ tuʼn tkuʼtz tkeʼyin kyaʼj ex txʼotxʼ» tuʼntzun tjaw «twabʼan [ . . . ] aju mebʼa tkubʼ twitz txʼotxʼ» (Sal. 113:​6, 7). Tuʼn tkyaqil jlu qaj tuʼn tjaw qnimsaʼn Jehová, aju Qdios nimxix toklen (Sal. 86:12).

 7. ¿Tiʼ qoklen o tzaj qʼoʼn?

⁷ In jaw qnimsaʼn Jehová tuʼnju qaj tuʼn tok ojtzqiʼn kyuʼn xjal. Nimku xjal in ten nya bʼaʼn kyximbʼetz tiʼj Jehová. ¿Tiquʼn? Tuʼnju in tzaj tqʼamaʼn Satanás nya ax tok yol tiʼj ex in xi  kynimen xjal (2 Cor. 4:4). In nok tilil tuʼn tuʼn tkubʼ kyximen xjal qa at nim tqʼoj Jehová, qa mintiʼ in ximen qiʼj ex qa a at tpaj tiʼj tkyaqil nya bʼaʼn in tzaj twitz Txʼotxʼ. Pero atzun qe, ojtzqiʼn quʼn aju axix tok ex o tzaj qʼoʼn qoklen tuʼn qonin kyiʼj xjal tuʼn tel kynikʼ tiʼj tzeʼnxix te Jehová tuʼntzun tjaw kynimsaʼn (Is. 43:10). Toj xnaqʼtzbʼil lu, qo yolil kyiʼj junjun versículo tkuʼx toj Salmo 96 aʼyeju in che yolin tiʼj tuʼn tjaw qnimsaʼn Jehová. Aj qxnaqʼtzan kyiʼj yol tkuʼx toj salmo lu qo ximen tiʼj tzeʼn jaku jaw qnimsaʼn Jehová.

¿TZEʼN JAKU JAW QNIMSAʼN JEHOVÁ?

 8. ¿Alkye tumel jaku jaw qnimsaʼn Jehová? (Salmo 96:​1-3).

⁸ (Kjawil uʼjit Salmo 96:​1-3). Jaku jaw qnimsaʼn Jehová kyukʼil qyol. In tzaj qʼoʼn txokbʼil kyiʼj tmajen Jehová kyoj qe versículo lu tuʼn kybʼitzin te, tuʼn tjaw kynimsaʼn tbʼi ex tuʼn t-xi kyqʼoʼn tbʼanel tqanil tiʼj kolbʼil ex tuʼn t-xi kyqʼamaʼn kye xjal tuʼn tjaw kynimsaʼn Jehová. Atzun junjun tten jlu tzeʼn in jaw qnimsaʼn Jehová. Toj ambʼil ojtxe, o tzʼajbʼen alkyexku ambʼil kyuʼn tmajen Jehová tuʼn kykolin tiʼj tbʼi ex tuʼn kyyolin kyiʼj tbʼanel tiʼchaq otoq bʼant tuʼn kyiʼj (Dan. 3:​16-18; Hech. 4:29). ¿Tiʼ xnaqʼtzbʼil jaku tzʼel qiʼn kyiʼj?

9, 10. ¿Tiʼ xnaqʼtzbʼil jaku tzʼel tiʼna tiʼjju bʼant tuʼn Angelina? (Ax ikx qʼonka twitza tiʼj tilbʼilal).

⁹ Qo yolin tiʼjju bʼaj tiʼj jun ermana te Estados Unidos, aju Angelina tbʼi. a Ten tipumal ex kolin tiʼj tbʼi Jehová toj taqʼun. Xi txkoʼn ermana tuʼn tpon toj jun reunión jatumel che teltoq qeju tzmatoq in xi tzyet tuʼn kyaqʼunan. Toj reunión lu jakutoq txi kyqʼamaʼn junjun tqanil kyiʼj tuʼntzun kyok ojtzqiʼn kyuʼn txqantl aqʼunal. Kubʼ t-ximen ermana tuʼn t-xi tyekʼin junjun foto kye tukʼil tuʼntzun tel kynikʼ tiʼj qa in tzalaj tuʼnju testigo de Jehová te. Naʼmxtoq tpon ambʼil tuʼn tyolin, tqʼama jun kyxol tukʼil qa otoq jaw chʼiysaʼn kyuʼn tman testigo de Jehová, pero ok ten yolil nya bʼaʼn tiʼj qokslabʼil. Tqʼama Angelina jlu: «Nimxix in tzaj xobʼe. Pero kubʼ nxjeline: ‹¿Kxelpe nqʼoʼne ambʼil te xjal lu tuʼn tyolin nya bʼaʼn tiʼj Jehová moqa chin kolile tiʼj?›».

¹⁰ Tej tbʼaj yolin xjal, jurat naj ok ten Angelina naʼl Dios toj tanmi. Yajxitl, tukʼil tbʼanel  tmod xi tqʼamaʼn jlu te: «Ik tzeʼn teya ax ikx weye in jaw chʼiysaʼne kyuʼn nmane testigo de Jehová ex kukx testigo de Jehová qine jaʼlo». Maske kwest ok ambʼil lu, kukx kubʼ tyekʼin Angelina tbʼanel tmod. Xi tyekʼin kye tukʼil toj aqʼuntl qe tfoto jatumel in tzalaj kyukʼil tamiw ex yajxitl xi tchikʼbʼaʼn toj tumel aju nimen tuʼn (1 Ped. 3:15). Tej tbʼaj yolin ermana ya otoq tzʼel tqʼoj xjal, axpe ikx tzaj tqʼamaʼn junjun tbʼanel tiʼchaq e ikʼ toj tanqʼibʼil tej tjaw chʼiysaʼn kyuʼn tman. Tqʼama Angelina jlu: «¡Jun tbʼanelxix oklenj tuʼnju in nkoline tiʼj tbʼi Jehová!». Ax ikx qe, jun tbʼanelxix qoklen tuʼn tjaw qnimsan tbʼi Jehová, axpe ikx aj kyyolin xjal nya bʼaʼn tiʼj.

11. ¿Tzeʼn o txi kynimen tmajen Dios aju in tzaj tqʼamaʼn Salmo 96:8?

¹¹ (Kjawil uʼjit Salmo 96:8). Jaku jaw qnimsaʼn Jehová kyukʼil qe tiʼchaq at qe. Kukx o jaw nimsaʼn Jehová kyuʼn tmajen kyukʼil tiʼchaq at kye (Prov. 3:9). Jun techel, toj ambʼil ojtxe xi kyqʼoʼn israelita oyaj tuʼn tjaw bʼinchet templo ex tuʼn t-xi bʼinchet chʼintl (2 Rey. 12:​4, 5; 1 Crón. 29:​3-9). Ax ikx ateʼ junjun t-xnaqʼtzbʼen Jesús xi kyqʼoʼn aju at tajbʼen te ex kye t-apóstol (Luc. 8:​1-3). Ex toj tnejel syent abʼqʼi, xi kysamaʼn okslal onbʼil kye erman (Hech. 11:​27-29). Ax ikx qe toj ambʼil jaʼlo, jaku jaw qnimsaʼn Jehová aj t-xi qqʼoʼn pwaq te onbʼil.

12. ¿Tzeʼn in jaw qnimsaʼn Jehová aj t-xi qqʼoʼn pwaq te onbʼil? (Ax ikx qʼonka twitza tiʼj tilbʼilal).

¹² Qo yolin tiʼj tzeʼn in jaw qnimsaʼn Jehová aj t-xi qqʼoʼn pwaq te onbʼil. Ik tzeʼn toj 2020, mintiʼxix tzaj jbʼal toj tnam Zimbabue ex tuʼn jlu jakutoq che kyim nim millón xjal tuʼn weʼyaj. Kyxol xjal lu attoq jun ermana Prisca tbʼi. Maske bʼaj jlu, kukx ok tilil tuʼn ermana tuʼn tex pakbʼal tkyaqil miércoles ex viernes, axpe ikx toj ambʼil tej kyxiʼ xjal bʼinchal txʼotxʼ tuʼn tok kyawal. Kukxtoq in che xmayin tvecin ermana tiʼj tuʼnju kukxtoq in nex pakbʼal ex mintiʼ in xiʼ aqʼunal. Xi kyqʼamaʼn jlu te: «¡Kkyimela tuʼn weʼyaj!». Pero qʼuqlitoq tkʼuʼj ermana tiʼj qa kʼokel xqʼuqin tuʼn Jehová, tuʼntzunju in xitoq tqʼamaʼn jlu kye: «Bʼajx che kyaj tkolin Jehová qe tmajen». Noq tuʼn pwaq in xi qqʼoʼn te onbʼil, pon kanin aju at tajbʼen te Prisca tuʼn ttnam Jehová. Tbʼanel ela toj kywitz junjun tvecin ex xi kyqʼamaʼn jlu te: «Bʼajx kyaj kolina tuʼn Dios. Qaje tuʼn tel mas qnikʼe tiʼj». Ex xi tzyet tuʼn kyxiʼ 7 tvecin kyoj chmabʼil.

13. Ik tzeʼn in tzaj qʼamaʼn toj Salmo 96:​9, ¿tiʼ il tiʼj tuʼn tbʼant quʼn tuʼn tjaw qnimsaʼn Jehová?

 ¹³ (Kjawil uʼjit Salmo 96:9). Jaku jaw qnimsaʼn Jehová kyukʼil qbʼinchbʼen. Iltoq tiʼj tuʼn tbʼaj kytxʼjoʼn kyibʼ pal ex tuʼn tbʼaj kysaqin kyibʼ aj kyajbʼen te Jehová toj tabernáculo ex toj templo (Éx. 40:​30-32). Ax ikx qe in bʼaj qsaqin qibʼ, pero aju mas nim toklen aju tuʼn qten bʼaʼn twitz Dios (Sal. 24:​3, 4; 1 Ped. 1:​15, 16). In nok tilil quʼn tuʼn tel qkotpiʼn, moqa tuʼn tel qiʼn aju ojtxe qten ex tuʼn tok qqʼoʼn aju akʼaj qten. Toj juntl yol, in nok tilil quʼn tuʼn tkyaj qkolin qe nya bʼaʼn qmod ex qe nya bʼaʼn qbʼinchbʼen ex in nok tilil quʼn tkubʼ qyekʼin qe tbʼanel tmod Jehová tukʼil qbʼinchbʼen ex qximbʼetz (Col. 3:​9, 10). Axpe ikx qe xjal in che bʼiyen ex in che yaẍin, jaku chʼexpaj kymod ex jaku tzʼok kyqʼoʼn aju akʼaj kyten tukʼil onbʼil in tzaj tqʼoʼn Dios.

14. ¿Tiʼ in tzaj tyekʼin teya aju bʼaj tiʼj Jack? (Ax ikx qʼonka twitza tiʼj tilbʼilal).

¹⁴ Qo ximen tiʼj jun xjal Jack tbʼi. Puro nya bʼaʼntoq tmod, in bʼiyintoq ex in noktoq qʼoʼn t-apodo te Demonio. Aju tsentens kubʼ qʼoʼn aju tuʼn tkyim tuʼn kypaj qe il otoq che bʼant tuʼn. Pero tej naʼmxtoq tpon qʼij tuʼn tkubʼ bʼyoʼn, xi tkʼamoʼn xnaqʼtzbʼil tukʼil jun ermano in pon visitaril kye xjal toj cárcel. Maske kubʼ tbʼinchaʼn Jack nim nya bʼaʼn toj ambʼil ojtxe, chʼexpaj tmod ex bautisarin tuʼn tok te testigo de Jehová. Bʼant nim chʼixpubʼil tuʼn Jack ex tej tpon qʼij tuʼn tkubʼ bʼyoʼn, e pon junjun guardia yolil tukʼil ex e jaw oqʼ. At jun sargento in naqʼunantoq toj cárcel aju tqʼama jlu tiʼj Jack: «Puro nyatoq bʼaʼn tmod Jack ojtxe, pero atzun jaʼlo ate at kyxol qe mas tbʼanel kymod». Tej tikʼ jun seman tkyimlen Jack, e pon juntl maj erman toj cárcel tuʼn tok chmabʼil kyuʼn, aju in nok txolekxi seman, ex pon jun pres aju naʼmxtoq tpon jun maj. ¿Tiquʼn kubʼ t-ximen pres lu tuʼn tpon toj chmabʼil? Tuʼnju tbʼanel ela toj twitz aju chʼixpubʼil otoq bʼant tuʼn Jack ex tajtoq tuʼn tel tnikʼ tiʼj tiʼ iltoq tiʼj tuʼn tbʼant tuʼn tuʼn tajbʼen te Jehová. Tuʼn jlu in nel qnikʼ tiʼj qa jaku jaw qnimsaʼn Qtat at toj kyaʼj tukʼil qbʼinchbʼen (1 Ped. 2:12).

¿TZEʼN KJAWIL TNIMSAʼN JEHOVÁ TBʼI TOJ CHʼINTL AMBʼIL?

15. ¿Tiʼ kbʼantel tuʼn Jehová toj chʼintl ambʼil tuʼn tbʼaj t-xjansaʼn tbʼi? (Salmo 96:​10-13).

¹⁵ (Kjawil uʼjit Salmo 96:​10-13). Aj tkubʼaj Salmo 96 in tzaj qʼamaʼn qa jun Rey te  Jehová ex qa jun Jwes tzʼaqli. ¿Tzeʼn kjawil tnimsaʼn Jehová tbʼi toj chʼintl ambʼil? Aj t-xi tbʼinchaʼn tiʼj nya bʼaʼn. Chʼix tpon ambʼil tuʼn tkubʼ najsaʼn Nintz tnam Babilonia tuʼnju in bʼaj ttzʼilsaʼn tbʼi Jehová aju xjan (Apoc. 17:​5, 16; 19:​1, 2). Aj tkubʼ tnajsaʼn Jehová qe okslabʼil nya ax tok, ateʼlo junjun xjal kbʼel kyximen tuʼn kyajbʼen te Jehová junx qukʼil. Yajxitl kbʼel tnajsaʼn Jehová tkyaqilju tokx tjaqʼ tkawbʼil Satanás toj Armagedón. Kbʼel tnajsaʼn kykyaqil qeju in nel ikʼun kyuʼn ex in bʼaj kytzʼilsaʼn tbʼi. Pero che kletel qeju in che nimen te, in nok kʼujlaʼn kyuʼn ex in che tzalaj tuʼn tjaw kynimsaʼn tbʼi (Mar. 8:38; 2 Tes. 1:​6-10). Aj tkubʼaj Mil Abʼqʼi tuʼn Tkawin Jesús ex aj tkubʼaj mankbʼil prueba, ya otoq kubʼaj tuʼn tbʼaj t-xjansaʼn Jehová tbʼi (Apoc. 20:​7-10). Toj ambʼil aju «kykyaqil xjal twitz txʼotxʼ kʼelel kynikʼ tiʼj tajwalil Qman, ik tzaʼn te mar nojni tuj tuʼn aʼ» (Hab. 2:14).

16. ¿Tiʼ o kubʼ t-ximana tuʼn tbʼant tuʼna? (Ax ikx qʼonka twitza tiʼj tilbʼilal).

¹⁶ ¡Tbʼanelxix kʼokel ambʼil aj tjaw kynimsaʼn kykyaqil xjal tbʼi Jehová tuʼnju at toklen tuʼn t-xi tkʼamoʼn nimbʼil! Akux in pon ambʼil lu, bʼaʼn tuʼn tajbʼen tkyaqil ambʼil quʼn tuʼn tjaw qnimsaʼn Dios. Tuʼn tjapun twi qoklen lu, o jaw tskʼoʼn Kʼloj Xjal Qʼil Twitz Aqʼuntl aju Salmo 96:8 (TNM) tuʼn tok te texto te abʼqʼi 2025 aju in tqʼamaʼn: «Kyqʼonxe nimbʼil te Qman Jehová tuʼnju nim t-xilen tbʼi».