XNAQʼTZBʼIL 5
BʼITZ 108 Aju tkʼujlabʼil tzʼaqli
¿Tiʼ tbʼanel in tzaj qe tuʼn tkʼujlabʼil Jehová?
«Ul aj Jesucrist twitz txʼotxʼ tuʼn kyklet qe xjal aj il tuʼn» (1 TIM. 1:15).
¿TIʼ KʼELEL QNIKʼ TIʼJ?
Kʼelel qnikʼ tiʼj tiʼ in tzaj qe tuʼn chojbʼil ex tzeʼn jaku txi qyekʼin qa in xi qqʼoʼn chjonte te Jehová.
1. ¿Tzeʼn jaku tzalaj Jehová quʼn?
QO XIMEN tiʼj jun xjal kʼujlaʼnxix quʼn ex in xi qqʼoʼn jun tbʼanel oyaj te aju jaku tzʼajbʼen tuʼn. Jakulo tzaj qbʼis qa noq xi tkʼuʼn oyaj in xi qqʼoʼn te ex qa in nel naj tiʼj tkʼuʼj tuʼn tajbʼen tuʼn. Pero nimxixlo jaku qo jaw tzalaj aj tok qkeʼyin qa in najbʼen oyaj tuʼn ex in tzalaj tiʼj. ¿Tiʼ xnaqʼtzbʼil in nel qiʼn tiʼj techel lu? Tzaj tsamaʼn Jehová Tkʼwal tuʼn qpaj. Nimlo in tzalaj Jehová aj tkubʼ qyekʼin qa in qo tzalaj tiʼj chojbʼil ex tiʼj tkʼujlabʼil kubʼ tyekʼin qiʼj (Juan 3:16; Rom. 5:7, 8).
2. ¿Tiʼ kʼelel qnikʼ tiʼj toj xnaqʼtzbʼil lu?
2 Noqtzun tuʼnj, aj tikʼ ambʼil jakulo tzikʼ tnaʼl chojbʼil quʼn. In qo tzalaj tiʼj, pero qa ma tzʼok qqʼoʼn ik tzeʼn oyaj in xi qkʼuʼn, jakulo tzikʼ tnaʼl quʼn. Tuʼn miʼn tbʼaj jlu qiʼj moqa tuʼn kukx t-xi qqʼoʼn chjonte tiʼj, nim toklen tuʼn qximen tiʼjju o bʼant tuʼn Jehová ex tuʼn Jesús qiʼj. Tiʼj jlu kyyolil xnaqʼtzbʼil lu. Qo yolil tiʼj tiʼ in tzaj qe tuʼn chojbʼil toj ambʼil jaʼlo ex tiʼ tzul tqʼoʼn qe toj ambʼil tzul. Ax ikx qo xnaqʼtzal tiʼj tzeʼn jaku kubʼ qyekʼin qa in xi qqʼoʼn chjonte te Jehová tiʼj tkʼujlabʼil ex mas aj tpon ambʼil te Nabʼitz Tkyimlen Jesucristo.
¿TIʼ TBʼANEL IN TZAJ QE TUʼN CHOJBʼIL TOJ AMBʼIL JAʼLO?
3. ¿Alkye jun tbʼanel in tzaj qe tuʼn chojbʼil toj ambʼil jaʼlo?
3 Ax ikx toj ambʼil jaʼlo in tzaj tbʼanel qe tuʼn chojbʼil bʼant tuʼn Jesús. Jun techel, noq tuʼn chojbʼil in kubʼ tnajsaʼn Jehová qil. Pero mintiʼ in bʼant jlu tuʼn Jehová noq tuʼnju obligad taʼ, sino in bʼant tuʼn tuʼnju tajbʼil tuʼn t-xi tbʼinchaʼn. Xi tqʼoʼn salmista David chjonte te Jehová tuʼnju in kubʼ tnajsaʼn il ex tqʼama jlu: «Porke bʼaʼna Nman ex in kubʼ tnajsaʼna kyil xjal» (Sal. 86:5; 103:3, 10-13).
4. ¿Alqiʼj xi tqʼoʼn Jehová chojbʼil? (Lucas 5:32; 1 Timoteo 1:15).
4 At junjun in kubʼ kyximen qa mintiʼ kyoklen tuʼn tkubʼ tnajsaʼn Jehová kyil. Ax tok, mi jun qe at toklen tuʼn tkubʼ najsaʼn til. El tnikʼ apóstol Pablo tiʼj jlu: «Mya bʼaʼn qine tuʼn tok qʼoʼn nbʼiye apóstol». Pero yajxitl tqʼama jlu: «Noq tuʼn t-xtalbʼil Dios ma chin oke apóstol» (1 Cor. 15:9, 10). Ikju, qa ma tzʼajtz tiʼj qanmi in kubʼ tnajsaʼn Jehová qil. ¿Tiquʼn? Nya tuʼnju at qoklen tiʼj, sino tuʼnju kʼujlaʼn qo tuʼn. Tuʼntzunju qa in kubʼ qnaʼn nya bʼaʼn aj tkubʼ qximen qa mintiʼ qoklen tuʼn tkubʼ tnajsaʼn Jehová qil, bʼaʼn tuʼn ttzaj qnaʼn qa mintiʼ tzaj tqʼoʼn Jehová chojbʼil kyiʼj xjal tzʼaqli sino tzaj tqoʼn kyiʼj xjal aj il in najtz tiʼj kyanmi (kjawil uʼjit Lucas 5:32; 1 Timoteo 1:15).
5. ¿Tiquʼn mi aʼl jun jaku txi qʼamante qa at toklen tiʼj qʼaqʼbʼil tkʼuʼj Jehová?
5 Maske ma tzikʼ nim ambʼil in qo ajbʼen te Jehová pero miʼn kubʼ qximen qa noq tuʼn jlu in kubʼ tyekʼin qʼaqʼbʼil tkʼuʼj qiʼj. Ax tok, nim toklen toj twitz tkyaqilju in bʼant quʼn tiʼj (Heb. 6:10). Pero mintiʼ tzaj tqʼoʼn Jehová Tkʼwal tuʼn ttzaj tchjoʼn twiʼ qajbʼebʼil te, sino jun oyaj tzaj tqʼoʼn qe. Nya toj tumel qa ma kubʼ qximen qa il tiʼj tuʼn tkubʼ tnajsaʼn Jehová qil noq tuʼnju in qo ajbʼen te. Qa ma kubʼ qximen jlu, jaku kubʼ qyekʼin qa nyatoq il tiʼj tuʼn tkyim Jesús qiʼj (mojbʼankuya tukʼil Gálatas 2:21).
6. ¿Tiquʼn ok tilil tuʼn Pablo toj tajbʼebʼil te Jehová?
6 Ojtzqintoq tuʼn Pablo qa mintiʼtoq toklen tuʼn tkubʼ najsaʼn til tuʼn Jehová. ¿Tiquʼntzun ok tilil tuʼn toj tajbʼebʼil te? Tuʼnju tajtoq tuʼn tkubʼ tyekʼin qa in tzalajtoq tiʼj qʼaqʼbʼil tkʼuʼj Jehová, maske mintiʼtoq toklen tiʼj (Efes. 3:7). Ax ikx qe, kukx in qo ajbʼen te Jehová tukʼil tzalajbʼil nya tuʼnju qaj tuʼn tkambʼet qʼaqʼbʼil tkʼuʼj, sino tuʼn tkubʼ qyekʼin qa in qo tzalaj tiʼj jlu.
7. ¿Alkye juntl tbʼanel in tzaj qe tuʼn chojbʼil toj ambʼil jaʼlo? (Romanos 5:1; Santiago 2:23).
7 Ax ikx jaku ten jun tbʼanel qamiwbʼil tukʼil Jehová noq tuʼn chojbʼil. a Toj xnaqʼtzbʼil o kyaj el qnikʼ tiʼj qa mintiʼ jun qamiwbʼil tukʼil Dios aj qul itzʼj. Pero noq tuʼnju chojbʼil «ma bʼant qten tukʼil Dios» ex jaku kox laqʼeʼ ttxlaj (kjawil uʼjit Romanos 5:1; Santiago 2:23).
8. ¿Tiquʼn nim toklen tuʼn t-xi qqʼoʼn chjonte te Jehová tiʼj qoklen at tuʼn qnaʼn Dios?
8 Qo ximen tiʼj jun tiʼ nim toklen tiʼj qamiwbʼil at tukʼil Jehová: At qoklen tuʼn qnaʼn Dios te. Nya oʼkx in che tzaj tbʼiʼn naʼj Dios in che bʼant toj chmabʼil, sino ax ikx in tzaj tbʼiʼn tnaʼj Dios teyele junjun qe. Ax tok in chewix qanmi ex qximbʼetz kyuʼn naʼj Dios, pero mas nim toklen aj tonin qiʼj tuʼn tchʼiy qamiwbʼil tukʼil Jehová (Sal. 65:2; Sant. 4:8; 1 Juan 5:14). Tej tten Jesús tzalu twitz Txʼotxʼ, kukx naʼn Dios tuʼnju ojtzqintoq tuʼn qa in bʼiʼntoq Jehová tiʼj ex qa tuʼn jlu jakutoq ten jun tbʼanel tamiwbʼil tukʼil (Luc. 5:16). In qo tzalaj tuʼnju jaku qo ok te tamiw Jehová axpe ikx jaku qo naʼn Dios te noq tuʼnju chojbʼil bʼant tuʼn Jesús.
¿TIʼ TBʼANEL KTZAJEL QE TUʼN CHOJBʼIL TOJ AMBʼIL TZUL?
9. ¿Tiʼ tbʼanel tzul kye tmajen Jehová tuʼn chojbʼil toj ambʼil tzul?
9 ¿Alkye tbʼanel tzul kye tmajen Dios tzʼaqliqe noq tuʼn chojbʼil? Kxel tqʼoʼn Jehová kychwinqlal te jumajx. Nim xjal in kubʼ kyximen qa mlay qo anqʼin te jumajx tuʼnju o tzikʼ nim mil abʼqʼi kukx in che kyim xjal. Noqtzun tuʼnj, e kubʼ tbʼinchaʼn Jehová xjal tuʼn kyanqʼin te jumajx. Maske toj ambʼil jaʼlo kwest tuʼn t-xi qnimen qa jaku qo anqʼin te jumajx, pero jaku tzʼok qeʼ qkʼuʼj tiʼj qa jaku qo anqʼin te jumajx tuʼnju o txi tqʼoʼn Jehová jun chojbʼil nimxix toklen, aju tchwinqlal Tkʼwal (Rom. 8:32).
10. ¿Tiʼ in che ayon skʼoʼn maj tiʼj ex qe txqantl ẍneʼl?
10 Maske tojxi ambʼil tzul ktzajel qʼoʼn kychwinqlal xjal te jumajx, pero taj Jehová tuʼn kyximen jaʼlo tiʼj tzeʼn kychwinqlal ktel toj ambʼil aju. Ik tzeʼn kye okslal skʼoʼn maj, kyajbʼilxix tuʼn kyxiʼ anqʼil toj kyaʼj tuʼntzun kykawin junx tukʼil Jesucristo tibʼaj Txʼotxʼ (Apoc. 20:6). Atzun kye txqantl ẍneʼl, kyajxix tuʼn kyanqʼin toj Tbʼanel Najbʼil tzalu twitz Txʼotxʼ jatumel ya mlay tentl kʼixkʼoj (Apoc. 21:3, 4). ¿Atzpe kʼanqʼil teya tzalu twitz Txʼotxʼ te jumajx? Nya noq alkyexku oyaj jlu, tuʼnju o che kubʼ bʼinchaʼn xjal tuʼn kyanqʼin te jumajx tzalu twitz Txʼotxʼ. ¡Nimxix qo tzalajel tuʼn jlu!
11, 12. ¿Alkye junjun kʼiwlabʼil qaj tuʼn tjapun twiʼ toj Tbʼanel Najbʼil? (Ax ikx qʼonka twitza kyiʼj tilbʼilal).
11 Ximana tiʼj tzeʼn kʼokel tanqʼibʼila toj Tbʼanel Najbʼil. Ya mlay tzaj bʼaj kykʼuʼj xjal tuʼn yabʼil ex tuʼn kamik (Is. 25:8; 33:24). Ktzajel tqʼoʼn Jehová tkyaqil tiʼchaq tajbʼila. ¿Alkye jun tiʼ taja tuʼn tbʼant tuʼna? ¿Taj teya tuʼn t-xnaqʼtzana kyiʼj txkup, tiʼj música moqa tuʼn bʼant tdibujarina? Bʼalo che tel qeju che dibujaril kyiʼj ja, qe bʼinchal ja ex qe aqʼunal tiʼj txʼotxʼ. Ax ikx che tel junjuntl che onil tuʼn tbʼant wabʼj ex tuʼn tbʼant junjun herramientas. Atzun junjuntl, che awal kyiʼj bʼech ex che onil tuʼn tok Txʼotxʼ te jun tbʼanel najbʼil (Is. 35:1; 65:21). Ktel nimxix ambʼil tiʼja tuʼn tbʼant alkyexku tiʼchaq taja.
12 ¡Nimxix qo tzalajel aj kyjaw anqʼin qe kyimni! (Hech. 24:15). Tbʼanelxix tuʼnju kukx kʼokel qojtzqiʼn Jehová ex kukx kʼokel qojtzqiʼn tkyaqilju o bʼant tuʼn (Sal. 104:24; Is. 11:9). Pero aju mas tbʼanel, qo ajbʼel te Jehová ex ya mlaytl kubʼ qbʼinchaʼn jun il aju jaku tzaj qbʼis tuʼn. In nneʼl qnikʼ tiʼj qa nya qaj tuʼn t-xi qnajsaʼn oyaj tzul tqʼoʼn Jehová qe noq tuʼn qtzalaj «tiʼj ju achbʼil in tqʼoʼn il aju noq te kabʼ qʼij» (Heb. 11:25). Tuʼntzunju, tbʼanel tuʼn tok tilil quʼn tuʼn t-xi qbʼinchaʼn alkyexku tiʼ tuʼn qajbʼen te Jehová toj ambʼil jaʼlo. Bʼaʼn tuʼn ttzaj qnaʼn qa nya toj tkyaqil ambʼil qo ayol tiʼj Tbʼanel Najbʼil, sino kpol jun qʼij jatumel qo anqʼil toj te jumajx. Tkyaqil jlu kbʼantel noq tuʼnju ok tkʼujlaʼn Jehová qe xjal ex tzaj tsamaʼn Tkʼwal tuʼn tkyim tuʼn qpaj.
¿Alkye kʼiwlabʼil mas taja tuʼn ttzalaja tiʼj toj Tbʼanel Najbʼil? (Qʼonka twitza kyiʼj parrafo 11 ex 12).
QYEKʼINX TE JEHOVÁ QA IN XI QQʼOʼN CHJONTE TIʼJ TKʼUJLABʼIL
13. ¿Tzeʼn jaku txi qyekʼin te Jehová qa in xi qqʼoʼn chjonte tiʼj tkʼujlabʼil? (2 Corintios 6:1).
13 ¿Tzeʼn jaku txi qyekʼin te Jehová qa in xi qqʼoʼn chjonte tiʼj chojbʼil bʼant tuʼn? Aj tkubʼ qqʼoʼn qajbʼebʼil te tnejel toj qanqʼibʼil (Mat. 6:33). Kyim Jesús kyiʼj xjal «tuʼntzun [ . . . ] qeju itzʼx qe, mya kyexkye tuʼn kyajbʼen, noq oʼkx tuʼn kyajbʼen te Crist aju o kyim te kyxel ex jatz anqʼin» (2 Cor. 5:15). Nya qaj tuʼn tikʼ tnaʼl quʼn tiquʼn o kubʼ tyekʼin Jehová t-xtalbʼil qiʼj (kjawil uʼjit 2 Corintios 6:1).
14. ¿Tzeʼn jaku kubʼ qyekʼin qa in nok qeʼ qkʼuʼj tiʼj tqanil in tzaj tqʼoʼn Jehová?
14 Juntl tten tuʼn t-xi qyekʼin te Jehová qa in xi qqʼoʼn chjonte tiʼj tkʼujlabʼil aju aj t-xi qbʼiʼn ex aj tok qeʼ qkʼuʼj tiʼjju in tzaj tqʼamaʼn. ¿Tzeʼn jaku bʼant jlu? Bʼaʼn tuʼn qximen tiʼj tiʼ taj Jehová tuʼn tbʼant quʼn aj tkubʼ qximen jniʼ qestudio kʼeletz moqa alkye aqʼuntl kxel qtzyuʼn (1 Cor. 10:31; 2 Cor. 5:7). Aj tkubʼ qyekʼin qʼuqbʼil qkʼuʼj tukʼil qbʼinchbʼen mas in nok qeʼ qkʼuʼj tiʼj Jehová ex mas in chʼiy qamiwbʼil tukʼil. Ex mas in nok qeʼ qkʼuʼj tiʼj qa qo anqʼil te jumajx toj ambʼil tzul (Rom. 5:3-5; Sant. 2:21, 22).
15. ¿Tzeʼn jaku kubʼ qyekʼin qa in xi qqʼoʼn chjonte tiʼj chojbʼil aj tpon ambʼil te Nabʼitz Tkyimlen Jesucristo?
15 Juntl tten tuʼn t-xi qyekʼin te Jehová qa in xi qqʼoʼn chjonte tiʼj chojbʼil ex tiʼj tkʼujlabʼil, aju tuʼn tkubʼ qbʼinchaʼn tkyaqilju jaku bʼant quʼn toj ambʼil te Nabʼitz Tkyimlen Jesucristo. Bʼaʼn tuʼn tok tilil quʼn tuʼn qten toj qʼij aju ex tuʼn t-xi qqʼoʼn txokbʼil kye xjal (1 Tim. 2:4). Aj tbʼant jlu quʼn, jaku txi qchikʼbʼaʼn tiʼ in bʼaj toj chmabʼil lu. Ex jaku chex qyekʼin video toj jw.org aju tok tbʼi: ¿Tiquʼn kyim Jesús? ex aju Nabʼitz Tkyimlen Jesucristo. Kʼokel tilil kyuʼn ansyan tuʼn t-xi kyqʼoʼn txokbʼil kye qeju o che chewix toj kyokslabʼil. Nimxixlo tzalajbʼil kbʼel kynaʼn qe tmajen ateʼ toj kyaʼj ex qe ateʼ twitz Txʼotxʼ qa ma che meltzʼaj junjun t-rit Jehová otoq che el tzpet (Luc. 15:4-7). Toj Nabʼitz Tkyimlen Jesucristo qqʼonk tilil tuʼn qqʼolbʼen kye kykyaqil pero mas kye qeju che pol tnejel maj ex kye qeju otoq kyaj kytzaqpiʼn tuʼn kypon. ¡Qqʼonk tilil tuʼn tkubʼ kynaʼn tzalajbʼil kykyaqilx! (Rom. 12:13).
16. ¿Tiquʼn nim toklen tuʼn qximen tiʼj tzeʼn jaku qo ajbʼen mas te Jehová toj ambʼil te Nabʼitz Tkyimlen Jesucristo?
16 ¿Jakupe tzʼok tilil quʼn tuʼn qajbʼen mas te Jehová toj ambʼil te Nabʼitz Tkyimlen Jesucristo? Qa ma bʼant jlu quʼn, in kubʼ qyekʼin qa in xi qqʼoʼn chjonte te Jehová ex te Jesús tiʼj tkyaqilju o bʼant kyuʼn qiʼj. Qa mas xqo pakbʼan mas kʼokel qkeʼyin tzeʼn in nonin Jehová qiʼj ex mas kchʼiyil qʼuqbʼil qkʼuʼj tiʼj (1 Cor. 3:9). Ax ikx bʼaʼn tuʼn ttzaj qnaʼn tuʼn kyjaw quʼjin qe texto tiʼj Nabʼitz Tkyimlen Jesucristo ateʼkux toj folleto Qo xnaqʼtzan tiʼj Tyol Dios tkyaqil qʼij, ex toj jun recuadro tkuʼx toj uʼj Kyanqʼibʼil Okslal. Ax ikx jaku che ajbʼen texto lu quʼn tuʼn qxnaqʼtzan.
17. ¿Tzeʼn jaku tzalaj Jehová quʼn? (Ax ikx qʼonka twitza tiʼj recuadro « Junjun tten tuʼn t-xi qqʼoʼn chjonte te Jehová tiʼj tkʼujlabʼil»).
17 Noqtzun tuʼnj, at maj at junjun qe in nikʼ junjun tiʼchaq toj tanqʼibʼil ex mlay bʼant tuʼn tkubʼ qbʼinchaʼn tkyaqilju in tzaj qʼamaʼn toj xnaqʼtzbʼil lu. Qa a jlu in bʼaj tiʼja, miʼn tzaj bʼaj tkʼuʼja. Bʼaʼn tuʼn ttzaj tnaʼna qa mintiʼ in nok tmojbʼaʼn Jehová aju in bʼant tuʼna tukʼilju in bʼant kyuʼn txqantl. Sino atz in nok tqʼoʼn twitz tiʼjju tkuʼx toj tanmiya ex in tzalaj tiʼja tuʼnju ojtzqiʼn tuʼn qa in nok tqʼoʼna toklen chojbʼil (1 Sam. 16:7; Mar. 12:41-44).
18. ¿Tiquʼn in xi qqʼoʼn nim chjonte te Jehová ex te Jesús?
18 Noq tuʼn chojbʼil jaku kubʼ najsaʼn qil, jaku qo ok te tamiw Jehová ex jaku qo ayon tuʼn ttzaj tqʼoʼn qchwinqlal te jumajx. Kukx qyekʼinx qa in xi qqʼoʼn chjonte tiʼj tkʼujlabʼil Jehová kubʼ tyekʼin qiʼj, ex tiʼj kʼiwlabʼil tzul tqʼoʼn qe (1 Juan 4:19). Ax ikx qyekʼinx qa in qo tzalaj tiʼj nimxix tkʼujlabʼil Jesús kubʼ tyekʼin qiʼj tej t-xi tqʼoʼn tchwinqlal tuʼn qpaj (Juan 15:13).
BʼITZ 154 Mlayx bʼaj kʼujlabʼil at qxol
