1. ¿Tzeʼn in nonin qiʼj aj ttzaj qnaʼn Tkyimlen Jesús tkyaqil abʼqʼi?

 TZAJ tqʼoʼn Jehová jun tbʼanelxix oyaj qe tej ttzaj tqʼoʼn Tkʼwal tuʼn tkyim kyiʼj xjal (2 Cor. 9:15). Tuʼnju xi tqʼoʼn Jesús tchwinqlal tuʼn qpaj, jaku ten jun tbʼanel qamiwbʼil tukʼil Jehová ex jaku qo anqʼin te jumajx. Kubʼ tyekʼin Jehová qa kʼujlaʼnxix qo tuʼn tej ttzaj tqʼoʼn oyaj lu qe, tuʼntzunju, at nim tiquʼn tuʼn t-xi qqʼoʼn chjonte te (Rom. 5:8). Kyaj tqʼamaʼn Jesús tuʼn ttzaj qnaʼn tkyaqil abʼqʼi aju tkyimlen tuʼntzun miʼn tikʼ tnaʼl ambʼil lu quʼn ex tuʼn kukx t-xi qqʼoʼn chjonte tiʼj (Luc. 22:​19, 20).

 2. ¿Tiʼ qo xnaqʼtzal tiʼj toj xnaqʼtzbʼil lu?

² Toj abʼqʼi lu kʼokel Nabʼitz Tkyimlen Jesucristo toj sábado 12 te abril te 2025. Qkyaqil-lo qajbʼil tuʼn qten toj ambʼil lu. Toj ambʼil te Nabʼitz Tkyimlen Jesucristo lu, nim kʼonil qiʼj qa ma tzʼel qpaʼn ambʼil tuʼn qkubʼ ten ximel tiʼj tkyaqilju o bʼant tuʼn Jehová ex tuʼn Tkʼwal qiʼj. Toj xnaqʼtzbʼil lu, kʼelel qnikʼ tiʼj alkyeqe xnaqʼtzbʼil in tzaj tqʼoʼn chojbʼil qe tiʼj Jehová ex tiʼj Jesús. Ex toj juntl xnaqʼtzbʼil, kʼelel qnikʼ tiʼj tzeʼn in nonin chojbʼil qiʼj ex tzeʼn jaku txi qyekʼin qa in xi qqʼoʼn chjonte tiʼj.

¿TIʼ IN TZAJ TYEKʼIN CHOJBʼIL QE TIʼJ JEHOVÁ?

 3. ¿Tzeʼn jakutoq che klet nim millón xjal tuʼn tkyimlen oʼkx jun xjal? (Ax ikx qʼonka twitza kyiʼj tilbʼilal).

³ Tuʼnju tzʼaqli te Jehová, tzaj t-samaʼn Jesús tuʼn tkyim tuʼn qpaj (Deut. 32:4). ¿Tiquʼn in xi qqʼamaʼn jlu? Tuʼnju mintiʼ nimen Adán te Jehová, kykyaqil xjal in che ul itzʼj ya iqin il kyuʼn  ex in che kyim (Rom. 5:12). Tuʼntzunju, tzaj t-samaʼn Jehová Jesús tuʼn qklet tiʼj il ex tiʼj kamik. ¿Pero tzeʼn jakutoq che klet nim millón xjal noq oʼkx tuʼn jun xjal tzʼaqli? Tzaj tchikʼbʼaʼn apóstol Pablo kyjalu: «Porke ik tzaʼn e ok nimku xjal aj il noq tuʼn tlaj jun xinaq [aju Adán] mintiʼ xi tniman tyol Dios, ax ikxtzun nimku xjal ok che okel te tzʼaqlxix tuʼn Dios noq tuʼn jun xinaq [aju Jesús] xi tniman tyol Dios» (Rom. 5:19; 1 Tim. 2:6). Toj juntl yol, qa noq tuʼn jun xjal tzʼaqli ex mintiʼ nimen te Dios o che ok kykyaqil xjal te tmajen il ex te tmajen kamik. Ax ikx oʼkx tuʼn jun xjal tzʼaqli, aju nimen te Dios, o qo tzaqpaj tiʼj il ex tiʼj kamik.

 4. ¿Tiquʼn mintiʼ xi tqʼoʼn Jehová ambʼil kye tkʼwal Adán bʼaʼn che bʼin tuʼn kyanqʼin te jumajx?

⁴ Pero, ¿ilpe tiʼj tuʼn ttzaj t-samaʼn Jehová Jesús tuʼn tkyim tuʼn qpaj? Bʼalo jaku kubʼ qximen qa mastoq fácil tuʼn t-xi tqʼoʼn Jehová ambʼil oʼkx kye tkʼwal Adán bʼaʼn che bʼiʼn tuʼn kyanqʼin te jumajx. Pero mintiʼ bʼant jlu tuʼn tuʼnju tzʼaqli te. Tuʼntzunju, iltoq tiʼj tuʼn tbʼant jun tiʼ tuʼn Jehová, tuʼntzun t-xi tbʼinchaʼn tiʼjju nya bʼaʼn otoq bʼant tuʼn Adán tuʼnju mintiʼ nimen.

 5. ¿Tiquʼn jaku tzʼok qeʼ qkʼuʼj tiʼj qa kukx kxel tbʼinchaʼn Jehová aju tzʼaqli toj tkyaqil ambʼil?

⁵ Noqwit mintiʼ tzaj tqʼoʼn Jehová chojbʼil ex noqwit tzaj tqʼoʼn ambʼil kye tkʼwal Adán tuʼn kyanqʼin te jumajx maske aj il qe, mintiʼwtlo kubʼ tyekʼin qa tzʼaqli te. Tuʼn jlu jakutoq kubʼ kyximen xjal qa mlay che japun tkawbʼil tuʼn ex qa ya mlay japun twiʼ tyol o tzaj ttziyen tiʼj ambʼil tzul. Ya mlaytoq tzʼok qeʼ kykʼuʼj xjal tiʼj. Pero mintiʼ tuʼn ttzaj bʼaj qkʼuʼj tiʼj lu tuʼnju kubʼ tbʼinchaʼn Jehová aju tzʼaqli maske ikʼx nim kʼixkʼoj tuʼn tej ttzaj tqʼoʼn Tkʼwal, aju kʼujlaʼnxix tuʼn. Tuʼntzunju, jaku tzʼok qeʼ qkʼuʼj tiʼj qa kukx kbʼel tbʼinchaʼn aju tzʼaqli toj tkyaqil ambʼil.

 6. ¿Tzeʼn in nonin chojbʼil qiʼj tuʼn tel qnikʼ tiʼj qa at nimxix tkʼujlabʼil Jehová qiʼj? (1 Juan 4:​9, 10).

⁶ In tzaj tyekʼin chojbʼil qa tzʼaqli te Jehová, pero mas in tzaj tyekʼin qa kʼujlaʼnxix qoʼ tuʼn (Juan 3:16; kjawil uʼjit 1 Juan 4:​9, 10). Tzaj t-samaʼn Jehová Tkʼwal tuʼn tkyim tuʼn qpaj tuʼnju taj tuʼn qanqʼin te jumajx ex tuʼnju taj tuʼn qten kyxol tfamilia. Ximana tiʼj jlu: Tej tkubʼ tbʼinchaʼn Adán il, ya mintiʼtl ok te jun kyxol tfamilia Jehová. Tuʼntzunju, ax ikx qe aj qul itzʼj, nya tfamilia Jehová qoʼ. Pero noq tuʼnju chojbʼil o tzaj tqʼoʼn, aqeju xjal in nok qeʼ kykʼuʼj tiʼj Jehová ex in che nimen te, che okel te tfamilia toj ambʼil tzul. Axpe ikx toj ambʼil jaʼlo, jaku kubʼ tnajsaʼn Jehová qil ex jaku ten jun tbʼanel qamiwbʼil tukʼil ex kyukʼil qerman. Nimxix kʼujlaʼn qoʼ tuʼn Jehová (Rom. 5:​10, 11).

 7. ¿Tzeʼn in onin kʼixkʼoj ikʼx tuʼn Jesús tuʼn tel qnikʼ tiʼj jniʼ tkʼujlabʼil Jehová at qiʼj?

 ⁷ Jaku tzʼel qnikʼ tiʼj qa kʼujlaʼnxix qoʼ tuʼn Jehová aj qximen tiʼj nimxix kʼixkʼoj ikʼx tuʼn tej tkubʼ bʼyoʼn Tkʼwal kyuʼn xjal. In tzaj tqʼamaʼn Satanás qa ni jun tmajen Dios jaku ten tzʼaqli twitz aj tok weʼ twitz nya bʼaʼn. Tuʼntzunju, xi tqʼoʼn Jehová ambʼil tuʼn tikʼx nim kʼixkʼoj tuʼn Jesús tej naʼmxtoq tkyim tuʼntzun tel nikʼbʼaj tiʼj qa nya ax tok tyol Satanás (Job 2:​1-5; 1 Ped. 2:21). Ok tkeʼyin Jehová tzmax toj kyaʼj tkyaqilju nya bʼaʼn ok bʼinchaʼn tiʼj Jesús ik tzeʼn tej kyxmayin xjal tiʼj, tej tok jubʼin kyuʼn soldad te Roma ex tej tjaw qʼoʼn twitz tzeʼ. Ax ikx ok tqʼoʼn twitz tiʼj kʼixkʼoj ikʼx tuʼn Tkʼwal tej tkyim (Mat. 27:​28-31, 39). Toj alkyexku ambʼil jakutoq tzʼel tiʼn Jehová tkyaqil nya bʼaʼn in noktoq bʼinchaʼn tiʼj Jesús. Jun techel, jakutoq klet tuʼn tej kyqʼama xjal jlu: «Tklet tuʼn Dios jaʼlo qa axix tok taj Dios tiʼj» (Mat. 27:​42, 43). Pero noqwit bʼant jlu tuʼn Jehová, mintiʼwtlo chjet chojbʼil ex mintiʼwtlo jun qʼuqbʼil kykʼuʼj xjal jaʼlo. Tuʼntzunju, xi tqʼoʼn Jehová ambʼil tuʼn tikʼ Jesús toj kʼixkʼoj ex tuʼn tkyim.

 8. ¿Tiquʼn ojtzqiʼn quʼn qa tzaj nimxix tbʼis Jehová tej tok tqʼoʼn twitz tiʼj kʼixkʼoj ikʼx tuʼn Tkʼwal? (Ax ikx qʼonka twitza tiʼj tilbʼilal).

⁸ Ax tok, mintiʼ el tiʼn Jehová kʼixkʼoj tiʼj Tkʼwal maske at nim tipumal, pero nya t-xilen jlu qa mintiʼ tzaj tbʼis tej tbʼaj jlu. O qo kubʼ tbʼinchaʼn Jehová tuʼn tkubʼ qnaʼn bʼis moqa tzalajbʼil. Ex jaku txi qqʼamaʼn qa ax ikx te Jehová jaku kubʼ tnaʼn jlu tuʼnju o qo kubʼ tbʼinchaʼn tuʼn kyten qmod ik tzeʼn te. In tzaj tqʼamaʼn Biblia qa o che ten junjun xjal aqeju «tzaj tbʼis Dios kyiʼj» ex «tzaj tbʼis Dios kyuʼn» (Sal. 78:​40, 41). Qo ximen tiʼjju bʼaj tiʼj Abrahán ex Isaac. Xi tqʼamaʼn Jehová te Abrahán tuʼn t-xi tqʼoʼn Tkʼwal te jun chojbʼil (Gén. 22:​9-12; Heb. 11:​17-19). Qo ximen tiʼjju kubʼ tnaʼn Abrahán tej tkubʼ tbʼinchaʼn tten tuʼn tkubʼ tbʼyoʼn tkʼwal. Yajtzun te Jehová, ¿tiʼ kubʼ tnaʼn tej tok tqʼoʼn twitz tiʼj tkyaqil nya bʼaʼn ok bʼinchaʼn tiʼj Tkʼwal tejxi tkubʼ bʼyoʼn? Mlay tzʼel qnikʼ tiʼj nimxix bʼis ex nimxix kʼixkʼoj kubʼ tnaʼn Jehová. (Qʼonka twitza tiʼj video Ejemplos de fe: Abrahán [parte 2] toj jw.org).

 9. ¿Tiʼ in tzaj tyekʼin Romanos 8:​32, 38 ex 39 tiʼj tkʼujlabʼil Jehová at tiʼja ex kyiʼj kykyaqil tmajen?

⁹ In tzaj tyekʼin chojbʼil qa mi aʼlx juntl mas kʼujlaʼn qoʼ tuʼn ik tzeʼn te Jehová, nixpe aju mas tbʼanel qamiw nix aju qfamiliar mas kʼujlaʼn qoʼ tuʼn (kjawil uʼjit Romanos 8:​32, 38, 39). In nok qkʼujlaʼn qibʼ, pero mas in qo ok tkʼujlaʼn Jehová. Ximana tiʼj jlu: ¿Taj teya tuʼn tanqʼina te jumajx? Pwes mas tajbʼil te Jehová tuʼn tanqʼina te jumajx. ¿Taj teya tuʼn tkubʼ najsaʼn qe tila? Pwes mas tajxix Jehová tuʼn tkubʼ tnajsaʼn tila. Oʼkx in tzaj tqʼamaʼn Jehová qe tuʼn t-xi qqʼoʼn chjonte te tiʼj chojbʼil,  aj qnimen te ex aj tok qeʼ qkʼuʼj tiʼj. Tbʼanelxix oyaj te chojbʼil, tuʼnju in tzaj tyekʼin qa at nimxix tkʼujlabʼil Dios qiʼj. Ex kʼelel mas qnikʼ tiʼj tkʼujlabʼil Jehová toj akʼaj twitz Txʼotxʼ (Ecl. 3:11).

¿TIʼ IN TZAJ TYEKʼIN CHOJBʼIL QE TIʼJ JESÚS?

10. a) ¿Tiʼ tzaj bʼajxix tkʼuʼj Jesús tiʼj tej chʼixtoq tkyim? b) ¿Alkye tten jaw tnimsaʼn Jesús tbʼi Jehová? (Ax ikx qʼonka twitza tiʼj recuadro « Jaw tnimsaʼn Jesús tbʼi Jehová tej tten tzʼaqli»).

¹⁰ Ximen Jesús tiʼj tiʼ jakutoq kubʼ kyximen xjal tiʼj Jehová (Juan 14:31). Kbʼeltoq bʼyoʼn Jesús kyuʼn xjal tuʼnju in kyqʼamaʼntoq qa nyatoq bʼaʼn tmod ex qa in xmayin moqa tuʼnju mintiʼ in respetarin te Jehová. Tuʼn jlu tzaj bʼajxix tkʼuʼj Jesús tiʼj tiʼtoq kbʼel kyximen xjal tiʼj Tman. Tuʼntzunju, xi tqʼamaʼn jlu te: «Nman, qa at tumel, kuchiwt tuʼn miʼn tikʼx jlu wuʼne» (Mat. 26:39). Tej tten Jesús tzʼaqli tejxi tkyim, kubʼ tyekʼin qa nya ax tok tkyaqil tyol Satanás otoq tqʼama tiʼj Jehová.

11. ¿Tzeʼn kubʼ tyekʼin Jesús qa kʼujlaʼnxixtoq qe xjal tuʼn? (Juan 13:1).

¹¹ In tzaj tyekʼin chojbʼil qa kʼujlaʼn qe xjal tuʼn Jesús, ex mas qeju t-discípulo (Prov. 8:31; kjawil uʼjit Juan 13:1). Ojtzqiʼntoq tuʼn Jesús qa aj tten tzalu twitz Txʼotxʼ, oktoq kʼokel weʼ twitz nim nya bʼaʼn ex twitz kʼixkʼoj aj tkyim. Pero o tzikʼx tkyaqil nya bʼaʼn tuʼn, nya oʼkx tuʼnju tajtoq tuʼn tjapun twi toklen otoq tzaj tqʼoʼn Jehová, sino ax ikx tuʼnju kʼujlaʼntoq qe xjal tuʼn. Kubʼ tyekʼin kʼujlabʼil lu tej tpakbʼan, tej t-xi tqʼoʼn xnaqʼtzbʼil kye xjal ex tej tonin kyiʼj. Axpe ikx toj qʼij tej chʼixtoq tkubʼ bʼyoʼn, el tpaʼn ambʼil tuʼn tel ttxʼajoʼn tiʼj kyqan t-apóstol, tuʼn t-xi tqʼuqbʼaʼn kykʼuʼj ex tuʼn t-xi tyekʼin tbʼanel xnaqʼtzbʼil kye (Juan 13:​12-15). Yajxitl, tej otoq jax qʼoʼn twitz tzeʼ, xi tqʼuqbʼaʼn tkʼuʼj jun eleqʼ attoq ttxlaj ex xi tqʼamaʼn te Juan tuʼn tok t-xqʼuqin ttxuʼ, aju María  tbʼi (Luc. 23:​42, 43; Juan 19:​26, 27). Kubʼ tyekʼin Jesús qa nimxix kʼujlaʼn qe xjal tuʼn tej tpakbʼan kye ex tej t-xi tqʼoʼn tchwinqlal kyiʼj.

12. ¿Alkye junjuntl tiʼchaq kukx in bʼant tuʼn Jesús tuʼn tonin qiʼj?

¹² «Noq junx maj kyim» Jesús tuʼn qpaj, pero kukx in bʼant nim tiʼchaq tuʼn tuʼn tonin qiʼj toj ambʼil jaʼlo (Rom. 6:10). ¿Tiʼ in bʼant tuʼn? Kukx in naqʼunan tuʼn ttzaj tqʼoʼn qe tbʼanel tiʼchaq qe, ex tkyaqil jlu jaku tzaj tqʼoʼn qe noq tuʼnju chojbʼil bʼant tuʼn. Ximana tiʼj tkyaqilju in bʼant tuʼn tuʼnju a Rey, a Nejenel kye Pal ex a nejenel kye okslal (1 Cor. 15:25; Efes. 5:23; Heb. 2:17). In nonin tuʼn kyok chmet skʼoʼn maj ex qeju nimxix kyajlal xjal, ex il tiʼj tuʼn tkubʼaj aqʼuntl lu tuʼn naʼmxtoq tul nimxix yajbʼil (Mat. 25:32; Mar. 13:27). a Ax ikx in nok tilil tuʼn tuʼn t-xi tqʼoʼn xnaqʼtzbʼil kye okslal kyoj qeju bʼajsbʼil qʼij lu (Mat. 24:45). Ex kukx kʼaqʼunal tuʼn tonin qiʼj aj Tkawin toj Mil Abʼqʼi. Ik tzeʼn in nel qnikʼ tiʼj, nya oʼkx xi tqʼoʼn Jehová toklen Tkʼwal tuʼn tkyim tuʼn qpaj, sino ax ikx tuʼn kybʼant nim tiʼchaq tuʼn tuʼn tonin qiʼj.

KUKX XNAQʼTZANA KYIʼJ AKʼAJ XNAQʼTZBʼIL

13. ¿Tzeʼn jaku tzʼel mas qnikʼ tiʼj tkʼujlabʼil Dios ex tiʼj tkʼujlabʼil Jesucristo?

¹³ Jaku tzʼel mas tnikʼa tiʼj tkʼujlabʼil Jehová ex Jesucristo qa ma tzeʼl tpaʼna ambʼil tuʼn t-ximana tiʼjju o bʼant kyuʼn qiʼj. Jun techel, jaku jaw tuʼjina jun moqa mas te jun libro tkuʼx toj Biblia, aju in yolin tiʼj tanqʼibʼil Jesús toj ambʼil te Nabʼitz Tkyimlen Jesucristo te abʼqʼi lu. Qʼonka tilil tuʼn miʼn tjaw tuʼjina nim capítulo, sino tuʼn tel tnikʼa tiʼj tiquʼn bʼaʼn tuʼn tok tkʼujlaʼna Jehová ex Jesucristo. Ex tbʼanel qa ma txi tqʼamaʼna kye txqantl aju in nel tnikʼa tiʼj.

14. Ik tzeʼn in tzaj tqʼamaʼn Salmo 119:​97, ¿tiʼ il tiʼj tuʼn tbʼant quʼn tuʼn kukx qxnaqʼtzan tiʼj chojbʼil ex kyiʼj junjuntl xnaqʼtzbʼil? (Ax ikx qʼonka twitza tiʼj tilbʼilal).

¹⁴ Qa atxix ojtxe tbautisarina, jakulo kubʼ t-ximana qa ya ojtzqiʼn tkyaqil tqanil tuʼna kyiʼj junjun xnaqʼtzbʼil ik tzeʼn tiʼj tkʼujlabʼil Dios, tiʼj chojbʼil ex tiʼj qa tzʼaqli te Dios. Pero mlayx tzʼel bʼaj qnikʼ kyiʼj xnaqʼtzbʼil lu tuʼnju jaku tzʼel qnikʼ kyiʼj akʼaj tqanil. ¿Alkye tten jaku tzeʼl tnikʼa kyiʼj akʼaj tqanil? Bʼaʼn tuʼn tuʼjina ex tuʼn t-xnaqʼtzana kyiʼj uʼj o che etz tuʼn ttnam Jehová. Qa mintiʼ ma tzʼel tnikʼa tiʼj jun texto, bʼaʼn tuʼn t-xi tjyoʼna mas tqanil. Ex aj tex qʼij bʼaʼn tuʼn t-ximana tiʼj tiʼ saj tyekʼin xnaqʼtzbʼil teya tiʼj Jehová, tiʼj Tkʼwal ex tiʼj tkʼujlabʼil at tiʼja (kjawil uʼjit Salmo 119:97).

15. ¿Tiquʼn il tiʼj tuʼn kukx qjyon kyiʼj qʼinumabʼil moqa xnaqʼtzbʼil toj Tyol Dios?

 ¹⁵ Qa mintiʼ sel tnikʼa tiʼj jun akʼaj xnaqʼtzbʼil aj tuʼjina moqa aj t-xnaqʼtzana tiʼj Biblia, miʼn tzaj bʼaj tkʼuʼja. Jaku txi qqʼamaʼn qa aj qxnaqʼtzan tiʼj Biblia ik tten ik tzeʼn aj qjyoʼn oro. At maj, in xi tiʼn nim or moqa in xi tiʼn nim qʼij tuʼn tkanet oro kyuʼn xjal. Pero kukx in ten kypasens ex kukx in che jyon tiʼj, tuʼnju maske tal chʼin oro in kanet kyuʼn, nim toklen toj kywitz. Ex aqeju xnaqʼtzbʼil ateʼ toj Tyol Dios, mas nim kyoklen twitz oro (Sal. 119:127; Prov. 8:10). Tuʼntzunju, bʼaʼn tuʼn tten tpasensa ex tuʼn kukx tuʼjina ex tuʼn kukx t-xnaqʼtzana tiʼj Biblia (Sal. 1:2).

16. ¿Tzeʼn jaku tzʼel qkanoʼn tiʼj Jehová ex tiʼj Jesús?

¹⁶ Akux in xnaqʼtzana, ximana tiʼj tzeʼn jaku txi tbʼinchaʼna aju in nel tnikʼa tiʼj. Jun techel, tzʼaqli te Jehová ex jaku tzʼel tkanoʼna tiʼj aj tten tbʼanel tmoda kyukʼil kykyaqil. Jaku tzʼel tkanoʼna tiʼj kʼujlabʼil in kubʼ tnaʼn Jesús tiʼj Tman ex kyiʼj xjal. ¿Tzeʼn? Aj tikʼx nya bʼaʼn tuʼna tuʼn tpaj tbʼi Dios, aj tonina kyiʼj erman maske at maj kwest ex aj tpakbʼana kye xjal tuʼntzun tonin chojbʼil kyiʼj.

17. ¿Tiʼ qo xnaqʼtzal tiʼj toj juntl xnaqʼtzbʼil?

¹⁷ Qa mas ma tzʼel qnikʼ tiʼj chojbʼil ex qa mas ma tzʼok qqʼoʼn toklen, mas kʼokel qkʼujlaʼn Jehová ex Tkʼwal. Ax ikx mas qo okel kʼujlaʼn kyuʼn (Juan 14:21; Sant. 4:8). Tuʼntzunju, kukx qqʼonk tilil tuʼn tajbʼen tkyaqilju in tzaj tqʼoʼn Jehová qe tuʼn kukx qxnaqʼtzan tiʼj chojbʼil. Toj juntl xnaqʼtzbʼil kʼelel qnikʼ tiʼj tzeʼn in nonin chojbʼil qiʼj ex tiʼ jaku bʼant quʼn tuʼn t-xi qyekʼin qa in xi qqʼoʼn chjonte tiʼj tkʼujlabʼil Jehová.