1. ¿Tiquʼn jaku tzaj bʼaj qkʼuʼj ex tiʼ jaku tzaj qiʼj tuʼn jlu?

¿OPE tzaj bʼaj qkʼuʼj jun maj? * Bʼalo bʼaj jlu qiʼj tuʼnju tqʼama jun xjal jun tiʼ moqa kubʼ tbʼinchaʼn jun tiʼ aju kux choʼn toj qanmi tuʼn. Ax ikx, jaku tzaj bʼaj qkʼuʼj tuʼnju o txi qqʼamaʼn moqa o kubʼ qbʼinchaʼn jun tiʼ nya toj tumel. Ex in tzajlo qbʼis tuʼnju o kubʼ qbʼinchaʼn jun il ex in kubʼ qximen qa mlayx kubʼ tnajsaʼn Jehová qil. Nya oʼkxju, ax ikx jaku tzaj qbʼis tuʼnju in kubʼ qximen qa mintiʼ qʼuqbʼil qkʼuʼj ex qa nya bʼaʼn xjal qoʼ. Noqtzun tuʼnj, ¿axpe tok jlu?

2. Qa in tzaj bʼaj qkʼuʼj, ¿ape t-xilen jlu qa mintiʼ qʼuqbʼil qkʼuʼj?

² Qo xnaqʼtzan kyiʼj junjun techel toj Tyol Dios. Attoq nim qʼuqbʼil tkʼuʼj Ana, aju ok te ttxuʼ profeta Samuel. Maske ikju, tzaj bʼaj tkʼuʼj tuʼnju ok bʼinchaʼn nya bʼaʼn tiʼj tuʼn jun toj tja (1 Sam. 1:7). Ax ikx te apóstol Pablo attoq nim qʼuqbʼil tkʼuʼj, pero tzaj bʼaj tkʼuʼj tuʼnju in ximentoq kyiʼj okslal (2 Cor. 11:28). Ex ok kʼujlaʼn David tuʼn Jehová tuʼnju ten nim qʼuqbʼil tkʼuʼj tiʼj (Hech. 13:22). Maske ikju, kubʼ tbʼinchaʼn junjun il ex tzaj nim tbʼis tuʼn jlu (Sal. 38:4). ¿Tzeʼn onin Jehová kyiʼj? Xi tqʼuqbʼaʼn kykʼuʼj ex chewix kyanmi tuʼn. Qo xnaqʼtzan tiʼj tiʼ jaku tzʼel qkanoʼn tiʼj techel kyaj kyqʼoʼn.

3. ¿Tiquʼn jaku tzaj bʼaj qkʼuʼj tuʼn kyyol txqantl?

³ Jaku tzaj bʼaj qkʼuʼj aj tkubʼ tyekʼin jun xjal nya bʼaʼn tmod qukʼil moqa aj ttzaj tqʼamaʼn jun tiʼ nya toj tumel qe, mas qa jun qamiw moqa jun toj qja. Jakulo tzaj qbʼis tuʼnju jaku naj qamiwbʼil tukʼil xjal. At maj, nya ximen tuʼn jun xjal aj ttzaj tqʼamaʼn jun tiʼ qe ex in kux choʼn tiʼj qanmi tuʼn ik tzeʼn aj qok kʼixbʼisaʼn tuʼn jun kuchiy (Prov. 12:18). Pero toj junjuntl maj, jaku tzaj tqʼamaʼn jun xjal jun tiʼ qe noq tuʼn ttzaj qbʼis tuʼn. Atzun jlu bʼaj tiʼj jun ermana tzma txin. In tzaj tnaʼn jlu: «Kyoj qe abʼqʼi o che ikʼ, ok nqʼoʼne jun txin te tbʼanel wamiwe, pero ok ten sputil nya bʼaʼn yol wiʼje kyoj redes sociales. Tzaj nbʼise tuʼn jlu ex tzaj bʼaj nkʼuʼje. Mintiʼ el nnikʼe tiʼj tiquʼn ok ten yolil nya bʼaʼn wiʼje». Qa o tzʼok bʼinchaʼn jun nya bʼaʼn qiʼj tuʼn jun qamiw moqa tuʼn jun toj qja, jaku tzʼonin qiʼj aju bʼaj tiʼj Ana.

4. ¿Alkyeqe nya bʼaʼn ikʼx tuʼn Ana?

⁴ Ikʼx nim nya bʼaʼn tuʼn Ana toj nimku abʼqʼi tuʼnju mintiʼ ul itzʼj jun tal (1 Sam. 1:2). Toj ojtxe tnam Israel, chʼixbʼajiltoq te jun xuʼj qa mintiʼ in nul itzʼj jun tal. Tuʼntzunju kubʼ tnaʼn Ana qa mintiʼtoq toklen (Gén. 30:1, 2). Ex mas kwest ok te Ana tuʼnju attoq juntl t-xuʼjil tchmil aju Peniná tbʼi, ex otoq che ul tal. Kubʼ t-ximen Peniná qa jun aj qʼoj Ana tiʼj, tuʼntzunju ok ten xmayil tiʼj (1 Sam. 1:6). Tzaj nim tbʼis Ana tuʼn jlu. Kubʼ tnaʼn nim nya bʼaʼn, ok ten «oqʼel ex mintiʼ in waʼn». Nya oʼkxju, ax ikx tzaj «nim taʼw tuj tanmi» (1 Sam. 1:7, 10). ¿Tzeʼn kanet qʼuqbʼil tkʼuʼj Ana?

5. ¿Tzeʼn onin naʼj Dios tiʼj Ana?

⁵ Xi tqʼamaʼn Ana te Jehová tkyaqilju tkuʼx toj tanmi. Tej tbʼaj naʼn Dios, xi tqʼamaʼn te tnejel pal Elí aju in bʼajtoq tiʼj, atzunte Elí tqʼama jlu te: «Bʼaʼn tuʼn taj meltzʼaja tukʼil tzalajbʼil, ex awt ju Qdios aj Israel qoʼ tzaj qʼonte teya aju ma txi tqanina te». ¿Tiʼ tbʼanel tzaj tuʼn jlu? «Ajtzun meltzʼaj Ana jatum otoq tzaj nej, ex ok ten waʼl ex mintiʼtl o bʼisun» (1 Sam. 1:17, 18). Onin naʼj Dios tiʼj tuʼn tchewix tkʼuʼj.

6. ¿Tiʼ xnaqʼtzbʼil jaku tzʼel qiʼn tiʼj techel kyaj tqʼoʼn Ana tiʼj naʼj Dios ex kyiʼj yol tkuʼx toj Filipenses 4:6 ex 7?

 ⁶ Jaku tzʼonin naʼj Dios qiʼj tuʼn miʼn ttzaj bʼaj qkʼuʼj. El tpaʼn Ana nim ambʼil tuʼn tnaʼn Dios te Jehová (1 Sam. 1:12). Ax ikx qe jaku tzʼel qpaʼn nim ambʼil tuʼn qnaʼn Dios te Jehová tuʼntzun qyolin tukʼil tiʼjju in tzaj bʼaj qkʼuʼj tiʼj, tiʼjju in qo tzaj xobʼ tuʼn ex tiʼjju in qo el txalpaj tiʼj. Mintiʼ tuʼn kyok qnaʼj Dios ik tzeʼn jun poema nix tuʼn kyok qyol te tzʼaqli. Jakulo qo naʼn Dios tukʼil nim bʼis moqa tukʼil oqʼel. Bʼaʼn tuʼn ttzaj qnaʼn qa mlayx sikt Jehová tuʼn qok tbʼiʼn. Nya oʼkx jaku txi qqʼamaʼn qe nya bʼaʼn te, sino bʼaʼn tuʼn ttzaj qnaʼn qe yol tkuʼx toj Filipenses 4:6 ex 7 (uʼjinktza). Tqʼama apóstol Pablo qa nim toklen tuʼn t-xi qqʼoʼn chjonte te Jehová aj qnaʼn Dios te. At nim tiquʼn tuʼn tbʼant jlu quʼn, tuʼnju o tzaj tqʼoʼn qchwinqlal, o che kubʼ tbʼinchaʼn qe tiʼchaq, mlayx bʼaj tkʼujlabʼil qiʼj ex o tzaj tqʼoʼn jun qʼuqbʼil qkʼuʼj tiʼj ambʼil tzul. ¿Alkye juntl xnaqʼtzbʼil jaku tzʼel qiʼn tiʼj techel kyaj tqʼoʼn Ana?

7. ¿Tiʼ kukx bʼant tuʼn Ana ex tchmil?

⁷ Maske tzaj nim tbʼis Ana, kukx xiʼ tukʼil tchmil toj tnam Siló tuʼntzun kykʼulin te Jehová (1 Sam. 1:1-5). Atztzun taʼtoq ja xbʼalun jatumel xi tqʼamaʼn Elí te tuʼn tayon tiʼjju otoq txi tqanin te Jehová (1 Sam. 1:9, 17).

8. Chikʼbʼantza tzeʼn jaku che onin chmabʼil qiʼj.

⁸ Jaku chewix qkʼuʼj qa kukx ma qoʼx kyoj chmabʼil. Aj t-xi tzyet chmabʼil, chʼixme tkyaqil maj in xi qqanin xewbʼaj te Jehová toj naʼj Dios tuʼntzun tonin qiʼj, ex tuʼn jlu in ten mujbʼabʼil qxol (Gál. 5:22). Maske in qo bʼisun aj qxiʼ kyoj chmabʼil, in xi qqʼoʼn ambʼil te Jehová ex kye erman tuʼn ttzaj kyqʼuqbʼaʼn qkʼuʼj ex tuʼn tkubʼ qnaʼn bʼaʼn. In najbʼen naʼj Dios ex qe chmabʼil tuʼn Jehová tuʼntzun tchewix qanmi tuʼn (Heb. 10:24, 25). Qo yolin tiʼj juntl xnaqʼtzbʼil jaku tzʼel qiʼn tiʼjju bʼaj tiʼj Ana.

9. ¿Tiʼ kukx ikʼx tuʼn Ana, pero tiʼ chʼexpaj toj tanqʼibʼil?

⁹ Nya jun rat el bʼis tiʼj Ana. Tej otoqxi meltzʼaj kʼulil te Dios toj ja xbʼalun, kukx anqʼin tukʼil Peniná. Ex mintiʼ in tzaj tqʼamaʼn Tyol Dios qa chʼexpaj tmod Peniná. Tuʼntzunju, kukxlo ok tbʼinchaʼn xuʼj lu nya bʼaʼn tiʼj Ana ex kukx ikʼx tuʼn. Pero chewix tkʼuʼj Ana juntl maj. Bʼaʼn tuʼn ttzaj qnaʼn qa ya mintiʼ kubʼ tnaʼn Ana bʼis tej otoqxi kyaj tqʼoʼn qe nya bʼaʼn toj tqʼabʼ Jehová. Xi tqʼoʼn ambʼil te Jehová tuʼn ttzaj tqʼuqbʼaʼn tkʼuʼj ex tuʼn kyel tiʼn tbʼis. Ex tej tikʼ jun ambʼil, tzaj ttzaqʼweʼn Jehová tnaʼj Dios ex e ul itzʼj tal (1 Sam. 1:19, 20; 2:21).

10. ¿Tiʼ in tzaj t-xnaqʼtzaʼn qe aju bʼaj tiʼj Ana?

¹⁰ Jaku chewix qanmi maske kukx in che tzaj nya bʼaʼn qiʼj. Ateʼ junjun nya bʼaʼn kukx jaku che ten maske kukx in qo bʼet kyoj chmabʼil ex in qo naʼn Dios. Noqtzun tuʼnj, aju bʼaj tiʼj Ana in tzaj tyekʼin qe qa mintiʼ jun tiʼ jaku tzʼel tiʼn ambʼil te Jehová tuʼn ttzaj tqʼuqbʼaʼn qkʼuʼj. Mlayx qo el naj tiʼj tkʼuʼj Jehová, ex qa kukx ma qo ten tzʼaqli twitz, tzul tkʼiwlaʼn qoʼ (Heb. 11:6).

11. ¿Tiquʼn jakutoq tzaj bʼaj tkʼuʼj apóstol Pablo?

¹¹ Attoq nim tiquʼn tuʼn ttzaj bʼaj tkʼuʼj Pablo. Jun techel, attoq nim tkʼujlabʼil  kyiʼj erman, tuʼntzunju tzaj tbʼis kyiʼj tej kyok weʼ twitz nya bʼaʼn (2 Cor. 2:4; 11:28). Tej tpakbʼan, ok kʼixbʼisaʼn kyuʼn aj qʼoj ex okx kyqʼoʼn toj cárcel. Ax ikx tzaj bʼaj tkʼuʼj tuʼnju anqʼin kyukʼil nya nim tiʼchaq (Filip. 4:12). Ex bʼaʼn tuʼn ttzaj qnaʼn qa xi mulqʼaj oxe maj toj aʼ, tuʼnlo jlu tzaj xobʼ tej tbʼet toj bark (2 Cor. 11:23-27). ¿Tiʼtzun onin tiʼj?

12. ¿Tiʼ onin tiʼj Pablo tuʼn miʼn ttzaj bʼajxix tkʼuʼj?

¹² Kukx ximen apóstol Pablo tiʼj nya bʼaʼn e ok weʼ erman twitz, noqtzun tuʼnj, el tnikʼ tiʼj qa mlaytoq t-xi tbʼinchaʼn tiʼj tkyaqil jlu tjunalx. Tuʼntzunju, xi tqanin onbʼil kye junjuntl erman tuʼn kyxqʼuqin kyiʼj okslal. Jun techel, ok qeʼ tkʼuʼj kyiʼj junjun erman ex xi tqʼoʼn kyoklen, ik tzeʼn te Timoteo ex Tito. Qʼuqli qkʼuʼj tiʼj qa qeʼ tkʼuʼj apóstol Pablo tuʼnju bʼant tbʼanel aqʼuntl kyuʼn erman lu (Filip. 2:19, 20; Tito 1:1, 4, 5).

13. ¿Tzeʼn jaku tzʼel kykanoʼn ansyan tiʼj apóstol Pablo?

¹³ Qqaninx onbʼil. Ik tzeʼn bʼaj tiʼj apóstol Pablo, ax ikx kʼujlaʼn qe erman kyuʼn ansyan, tuʼntzunju in che ximen kyiʼj aj kyok weʼ twitz nya bʼaʼn. Noqtzun tuʼnj, bʼaʼn tuʼn tel tnikʼ jun ansyan tiʼj qa mlayx tzʼonin kyiʼj kykyaqil erman tjunalx. Tuʼntzunju kxel tqanin onbʼil kye junjuntl erman at kyojtzqibʼil ex bʼaʼn tuʼn t-xi tqʼoʼn xnaqʼtzbʼil kye kuʼxun tuʼntzun kyonin tiʼj tuʼn kyok xqʼuqit erman (2 Tim. 2:2).

14. ¿Tiʼ mintiʼ tzaj tbʼis Pablo tiʼj ex tiʼ xnaqʼtzbʼil in tzaj tqʼoʼn qe?

¹⁴ Bʼaʼn tuʼn tel qnikʼ tiʼj qa qaj onbʼil. Kubʼ tin tibʼ apóstol Pablo ex jyon onbʼil kyukʼil txqantl tamiw. Mintiʼ tzaj tbʼis tuʼnju jakutoq kubʼ kyximen txqantl qa mintiʼ tipumal noq tuʼnju xi qʼuqbʼaʼn tkʼuʼj kyuʼn tamiw. Toj uʼj xi ttzʼibʼin te Filemón, tqʼama jlu: «Porke tuʼnju tkʼujlalila erman, ma qo tzalaje nim ex ma qeʼxix qkʼuʼje» (Filem. 7). Toj juntl ambʼil, yolin kyiʼj nimku erman xi kyqʼuqbʼaʼn tkʼuʼj toj ambʼil kwest (Col. 4:7-11). Qa ma kubʼ qin qibʼ ex in xi qqanin onbʼil kye erman, che onil qiʼj tuʼn tkyaqil kykʼuʼj.

15. ¿Tiʼ onin tiʼj apóstol Pablo kyoj ambʼil kwest?

¹⁵ Qeʼk qkʼuʼj tiʼj Tyol Dios. El tnikʼ Pablo tiʼj qa jakutoq kanet qʼuqbʼil tkʼuʼj toj Xjan Uʼj ex qa jakutoq txi tqʼoʼn tnabʼil  tuʼn tex twitz nya bʼaʼn (Rom. 15:4; 2 Tim. 3:15, 16). Tej tokx qʼoʼn tkabʼin maj pres atz Roma, el tnikʼ tiʼj qa ya chʼixtoq tkyim. ¿Tiʼ bʼant tuʼn toj ambʼil aju? Xi tqʼamaʼn te Timoteo tuʼn tok tilil tuʼn tuʼn t-xi keʼyilte ex tuʼn t-xi tiʼn qe rollo (2 Tim. 4:6, 7, 9, 13). ¿Tiquʼn xi tqanin qe rollo? Bʼalo tuʼnju tkuʼx junjun plaj Tyol Dios toj, aqeju kubʼ tzʼibʼin toj yol Hebreo ex jakutoq che ajbʼen tuʼn tuʼn t-xnaqʼtzan tjunalx. Qa kukx ma qo xnaqʼtzan tiʼj Xjan Uʼj ik tzeʼn te Pablo, kʼajbʼel tuʼn Jehová tuʼn ttzaj tqʼuqbʼaʼn qkʼuʼj aj qok weʼ twitz alkyexku nya bʼaʼn.

16. ¿Tiʼ kubʼ tnaʼn David tej otoq kubʼ tbʼinchaʼn jun matij il?

¹⁶ Tzaj nimxix tbʼis David tuʼnju otoq kubʼ tbʼinchaʼn il. Yaẍin tukʼil Bat-Seba, kubʼ t-ximen tuʼn tkubʼ bʼyoʼn tchmil xuʼj lu ex kubʼ tewin til toj jun ambʼil (2 Sam. 12:9). Tnejel mintiʼ xi tbʼiʼn t-ximbʼetz, tuʼn jlu nya oʼkx tzaj nya bʼaʼn tiʼj tamiwbʼil tukʼil Jehová, sino ax ikx tzaj nya bʼaʼn tiʼj t-xmilal ex tzaj bʼaj tkʼuʼj (Sal. 32:3, 4). Maske ax tzaj qʼinte nya bʼaʼn tiʼj, ¿tiʼ bʼant tuʼn tuʼn miʼn ttzaj bʼaj tkʼuʼj? Ex, ¿tiʼ jaku tzʼonin qiʼj qa ma kubʼ qbʼinchaʼn jun matij il?

17. ¿Alkye tten in tzaj tyekʼin Salmo 51:1 a 4 qa otoq tzʼajtz tiʼj tanmi David?

¹⁷ Qqaninx te Jehová tuʼn tkubʼ tnajsaʼn qil. Kubʼ t-ximen David tuʼn tnaʼn Dios te Jehová, ajtz tiʼj tanmi ex xi tqʼamaʼn qe il otoq kubʼ tbʼinchaʼn (kjawil uʼjit Salmo 51:1-4). Onin jlu tiʼj tuʼn tqeʼ tkʼuʼj ex tuʼn ttzalaj juntl maj (Sal. 32:1, 2, 4, 5). Qa ma kubʼ qbʼinchaʼn jun matij il, miʼn kubʼ qewin. Bʼaʼn tuʼn qnaʼn Dios te Jehová ex qqʼamanx te aju ma kubʼ qbʼinchaʼn. Toj ambʼil lu, kbʼel qnaʼn qa in nel qʼiʼn jun matij iqtz qibʼaj. Noqtzun tuʼnj, qa qaj tuʼn tten juntl maj qamiwbʼil tukʼil Jehová, il tiʼj tuʼn tbʼant juntl tiʼ quʼn.

18. ¿Tiʼ tmod David kubʼ tyekʼin tej t-xi kawin tuʼn Jehová?

¹⁸ Qkʼamontz kawbʼil. Tej t-xi tsamaʼn Jehová profeta Natán tuʼn t-xi tqʼamaʼn te David qa otoq kubʼ tbʼinchaʼn il, mintiʼ el tikʼun kawbʼil xi tqʼoʼn profeta te ex mintiʼ el tiʼn toklen. Jun rat naj el tnikʼ  tiʼj qa nya oʼkx ok tbʼinchaʼn nya bʼaʼn tiʼj tchmil Bat-seba, sino ax ikx kubʼ tbʼinchaʼn il twitz Dios. Xi tkʼamoʼn kawbʼil xi tqʼoʼn Jehová te ex kubʼ najsaʼn til (2 Sam. 12:10-14). Qa o kubʼ qbʼinchaʼn jun matij il, nim toklen tuʼn qyolin kyukʼil qeju o txi tqʼoʼn Jehová kyoklen tuʼn kyxqʼuqin qiʼj (Sant. 5:14, 15). Ex mintiʼ tuʼn tel qikʼun kawbʼil in tzaj kyqʼoʼn qe. Qa ma tzaj qkʼamoʼn naj kawbʼil ex qa ma che bʼant chʼixpubʼil quʼn, ya mlay tzaj bʼaj qkʼuʼj ex qo tzalajel juntl maj.

19. ¿Tiʼ qaj tuʼn tbʼant quʼn?

¹⁹ Qqʼonk tilil tuʼn miʼn qel txalpaj kyiʼj aʼyex tiʼchaq. El tnikʼ David tiʼj qa nimtoq toklen tuʼn tonin Jehová tiʼj tuʼntzun miʼn tkubʼ tbʼinchaʼn juntl maj qe il otoq bʼant tuʼn (Sal. 51:7, 10, 12). Tej tkubʼ tnajsaʼn Jehová til, kubʼ t-ximen tuʼn kyel tikʼun nya bʼaʼn t-ximbʼetz. Tuʼn jlu, kubʼ tnaʼn bʼaʼn.

20. ¿Tzeʼn in kubʼ qyekʼin te Jehová qa in xi qqʼoʼn chjonte te aj tkubʼ tnajsaʼn qil?

²⁰ Jaku kubʼ qyekʼin te Jehová qa in xi qqʼoʼn chjonte te aj tkubʼ tnajsaʼn qil. ¿Alkye tten? Aj qnaʼn Dios te, aj ttzaj qkʼamoʼn tkawbʼil ex aj tok tilil quʼn tuʼn miʼn qkubʼ tzʼaq juntl maj kyoj aʼyex il. Aj tbʼant jlu quʼn, in qo tzalaj juntl maj. Atzun jlu bʼaj tiʼj ermano James, aju kubʼ tbʼinchaʼn jun matij il toj ambʼil ojtxe. Tqʼama jlu: «Tej t-xi nqʼamaʼne kye ansyan qa otoq kubʼ nbʼinchaʼne jun matij il, ok jlu ik tzeʼn el qʼiʼn jun matij iqtz wibʼaje. Chebʼe chebʼe chewix wanmiye». Nimxix in tzaj qʼuqbʼaʼn qkʼuʼj aj tel qnikʼ tiʼj qa «niqayin taʼ Qman tuʼn kyklet qe xjal ma tzʼok taʼw bʼis tiʼj kykʼuʼj» ex qa in nonin kyiʼj qeju ya mintiʼ jatumel «tuʼn tok qeʼ kykʼuʼj» (Sal. 34:18).

21. ¿Tzeʼn jaku txi qqʼoʼn ambʼil te Jehová tuʼn ttzaj tqʼuqbʼaʼn qkʼuʼj?

²¹ Maslo tzul bʼaj qkʼuʼj akux in nul kanin qiʼj tuʼn tkubʼ xiten tkyaqil nya bʼaʼn. Aj ttzaj qbʼis, bʼaʼn tuʼn qjyon naj onbʼil tukʼil Jehová. Bʼaʼn tuʼn tel qpaʼn ambʼil tuʼn qxnaqʼtzanxix tiʼj Xjan Uʼj. Nim toklen tuʼn tel qkanoʼn tiʼj techel kyaj tqʼoʼn Ana, Pablo ex David. Qqaninx onbʼil te Jehová tuʼn tel qnikʼ tiʼj tiquʼn in tzaj bʼaj qkʼuʼj (Sal. 139:23). Ex qqʼonx ambʼil te tuʼn kyxi tiʼn qe qiqetz, mas qeju mlay kanet jun tumel quʼn tzeʼn tuʼn qex kywitz. Qa ma bʼant jlu quʼn, kbʼel qnaʼn ik tzeʼn te aj bʼitzil tej t-xi tbʼitzin jlu te Jehová: «Ok in tzaj nximbʼetze ex in bʼaj nkʼuʼje, in tzaj tqʼuqbʼaʼna nkʼuʼje ex in tzaj tqʼoʼna tzalajbʼil» (Sal. 94:19).