1, 2. ¿Tiquʼn tzaj tqʼoʼn Jehová ambʼil qe tuʼn qten kyxol qe toj tja ex tzeʼn bʼant tuʼn?

O TZAJ tqʼoʼn Jehová jun tbʼanelxix txokbʼil qiʼj tuʼn qten kyxol qe toj tja. ¿Alkyeqe in che ok te toj tja? Aqeju o txi kyqʼamaʼn te tuʼn kyajbʼen te ex in nok qeʼ kykʼuʼj tiʼj chojbʼil bʼant tuʼn Jesús. In qo tzalaj tuʼnju ax ikx qe atoʼ kyxol qe toj tja Jehová. Toj ambʼil jaʼlo, at ttxolil qanqʼibʼil ex in qo ayon tuʼn qanqʼin te jumajx toj kyaʼj moqa toj Tbʼanel Najbʼil tzalu twitz Txʼotxʼ.

² O tzaj tqʼoʼn Jehová jun matij chojbʼil qiʼj tuʼntzun qten kyxol qe toj tja tuʼnju at nim tkʼujlabʼil qiʼj (Juan 3:16). In tzaj tqʼamaʼn Tyol qa o qo laqʼet tuʼn (1 Cor. 6:20). Noq tuʼn chojbʼil bʼant tuʼn Jesús, jaku ten jun tbʼanel qamiwbʼil tukʼil Jehová. In qo tzalaj tuʼnju jaku txi qqʼamaʼn Tat te, maske a mas nim toklen twitz alkyexku juntl. Ex ik tzeʼn el qnikʼ tiʼj toj xnaqʼtzbʼil kyaj, atzun mas tbʼanel Qtat jaku ten.

3. Aj qximen tiʼj tkyaqilju o bʼant tuʼn Jehová qiʼj, ¿alkyeqe xjel jaku qo ximen kyiʼj? (Qʼonka twitza tiʼj recuadro « ¿In nokpe tqʼoʼn Jehová twitz wiʼje?»).

³ Bʼalo jaku kubʼ qxjelin ik tzeʼn kubʼ t-xjelin jun aj tzʼibʼil tiʼj Tyol Dios: «¿Tzaʼn tten tuʼn tchjet wuʼne te Qman tkyaqilju bʼaʼn o tbʼincha wiʼje?» (Sal. 116:12). Mlayx kanet jun tiʼ quʼn tuʼn t-xi qchjoʼn tkyaqilju in tzaj tqʼoʼn Jehová qe. Pero tuʼnju kʼujlaʼn qoʼ tuʼn, ax ikx qe qaj tuʼn tok qkʼujlaʼn. Kubʼ ttzʼibʼin apóstol Juan jlu: «In qkʼujlaʼn  Dios, porke tnejel ma qo kʼujlanjtz tuʼn» (1 Juan 4:19). Qa ikju, ¿tzeʼn jaku kubʼ qyekʼin te Jehová qa kʼujlaʼn quʼn?

4. Ik tzeʼn in tzaj tqʼamaʼn Santiago 4:8, ¿tiquʼn il tiʼj tuʼn tok tilil quʼn tuʼn qok laqʼeʼ ttxlaj Jehová?

⁴ Taj Jehová tuʼn qxi laqʼeʼ ttxlaj ex tuʼn kukx qyolin tukʼil (kjawil uʼjit Santiago 4:8). In tzaj tqʼoʼn txokbʼil qiʼj tuʼn kukx qnaʼn Dios te ex taj tuʼn qtzaj tbʼiʼn (Rom. 12:12). Kukx kbʼantel jlu tuʼn, tuʼnju at ambʼil tiʼj ex mintiʼ in sikt. Yajtzun qe, ¿tzeʼn jaku qo bʼin tiʼj Jehová? Jaku bʼant jlu quʼn aj quʼjin tiʼj Tyol ex kyiʼj qe uʼj in che onin qiʼj tuʼn tel qnikʼ tiʼjju tkuʼx toj. Ax ikx in qo bʼin tiʼj aj tok qqʼoʼn qwiʼ kyiʼj chmabʼil. Ik tzeʼn in bʼaj txol jun mambʼaj tukʼil tkʼwal, kukx che tel junx qa kukx ma che yolin kyxolx. Ax ikx qe, kukx qo tel ttxlaj Jehová qa kukx in qo yolin tukʼil.

5. ¿Tiʼ jaku bʼant quʼn tuʼn kyok qnaʼj Dios te mas tbʼanel?

⁵ Bʼaʼn tuʼn qximen tiʼj tzeʼn qe qnaʼj Dios in che bʼant te Jehová. ¿Tiquʼn? Tuʼnju taj tuʼn t-xi qqʼamaʼn tkyaqilju tkuʼx toj qanmi (Sal. 62:8). Tuʼntzunju, bʼaʼn tuʼn tkubʼ qxjelin jlu: «¿Aʼyexpe yol in xi nqʼamaʼne te Jehová toj nnaʼj Diose? ¿Moqa in che ok nnaʼj Diose ik tzeʼn aj nyoline tukʼil jun tbʼanel wamiwe?». Nimlo kʼujlaʼn Jehová quʼn ex qaj tuʼn kukx qten ttxlaj. Tuʼn tbʼant jlu quʼn, nim toklen tuʼn kukx qyolin tukʼil Jehová. Qqʼamanx tkyaqilju tkuʼx toj qanmi te, ik tzeʼn kyiʼj tiʼchaq in qo tzalaj kyiʼj ex kyiʼj tiʼchaq in tzaj bʼaj qkʼuʼj kyuʼn. Qeʼk qkʼuʼj tiʼj qa jaku txi qqanin onbʼil te Jehová.

6. ¿Tiʼ kbʼantel quʼn tuʼn kukx qten ttxlaj Jehová?

⁶ Tuʼn kukx qten ttxlaj Jehová, ax ikx nim toklen tuʼn kukx txi qqʼoʼn chjonte te. Ax qximbʼetz at ik tzeʼn te jun aj tzʼibʼil tiʼj jun salmo tej tqʼama: «Nman Dios, nimku tbʼinchbʼena tbʼanilxix ma bʼant, aju t-ximbʼetza qiʼje puro bʼaʼn, mi aʼl juntl jaku pon ik tzaʼn teya. Jaku wajbʼeye tuʼn t-xi nchikʼbʼaʼne tkyaqil jlu ex tuʼn nyoline kyiʼj, pero noq chʼin jaku chikʼbʼet wuʼne, porke nim jlu» (Sal. 40:5). Pero nya oʼkx in kubʼ qnaʼn tuʼn t-xi qqʼoʼn chjonte, sino in xi qqʼamaʼn te Jehová tukʼil qyol ex qbʼinchbʼen. Tuʼn jlu junxitl qoʼ kywitz xjal toj ambʼil jaʼlo. ¿Tiquʼn? Tuʼnju mintiʼ in xi kyqʼoʼn chjonte tiʼjju in bʼant tuʼn Dios kyiʼj. Axpe ikx in nok jlu te jun techel qa in qo anqʼin kyoj «mankbʼil tqʼijlalil» (2 Tim. 3:1, 2). Miʼn txi qqʼoʼn ambʼil tuʼn tel qkanoʼn kyiʼj.

7. ¿Tiʼ taj Jehová tuʼn tbʼant quʼn ex tiquʼn?

⁷ Nya kyaj mambʼaj tuʼn ttzaj kyqʼoj kykʼwal kyxolx, sino kyaj tuʼn kytzalaj. Ax jlu taj Jehová tuʼn tbʼant quʼn. Axpe ikx, in nel nikʼbʼaj qiʼj qa axix tok okslal qoʼ tuʼnju kʼujlabʼil at qxol (Juan 13:35). Ax qximbʼetz at ik tzeʼn jun aj bʼitzil tej tqʼama jlu: «Puro bʼaʼn ex tzalajbʼil kye qe xjal kyerman kyibʼ in che anqʼin junx ex junx kynabʼl» (Sal. 133:1). Aj kyok qkʼujlaʼn erman, ax ikx in kubʼ qyekʼin te Jehová qa kʼujlaʼn quʼn (1 Juan 4:20). Tbʼanelxix tuʼnju atoʼ kyxol erman in kubʼ kyyekʼin qʼaqʼbʼil kykʼuʼj ex kykʼujlabʼil qiʼj (Efes. 4:32).

8. Ik tzeʼn in tzaj tqʼamaʼn 1 Juan 5:3, ¿tiquʼn in qo nimen te Jehová?

⁸ Taj Jehová tuʼn kynimen kʼwal kye kytat, ax ikx taj tuʼn qnimen te (Efes.  6:1). Bʼaʼn tuʼn tbʼant jlu quʼn tuʼnju a Bʼinchal qe, a in tzaj qʼonte qchwinqlal ex tuʼnju a Qtat mas at tnabʼil. Pero aju mas nim toklen, in qo nimen te Jehová tuʼnju kʼujlaʼn quʼn (kjawil uʼjit 1 Juan 5:3). Maske at nim tiquʼn tuʼn qnimen te Jehová, mintiʼ in qo ok tchqʼoʼn. O tzaj tqʼoʼn ambʼil qe tuʼn tkubʼ qximen qa qo nimel te moqa miʼn, tuʼntzunju in tzalaj qa ma qo nimen te tuʼnju kʼujlaʼn quʼn.

9, 10. ¿Tiquʼn nim toklen tuʼn kyok qojtzqiʼn qe tley Jehová ex tuʼn kyjapun quʼn?

⁹ Kyaj tatbʼaj tuʼn kyanqʼin kykʼwal toj tbʼanel. Tuʼntzunju in kubʼ kyqʼoʼn junjun kawbʼil kyibʼaj. Aʼyeju kʼwal in xi kybʼiʼn qe kawbʼil lu, in kubʼ kyyekʼin qa in nok qeʼ kykʼuʼj kyiʼj kytat ex qa in nok kyqʼoʼn kyoklen. Ax ikx te Jehová taj tuʼn qtzalaj, tuʼntzunju nim toklen tuʼn tok qojtzqiʼn qe tkawbʼil ex tuʼn kyjapun quʼn. Iktzun tten kbʼel qyekʼin te Jehová qa kʼujlaʼn quʼn ex qa in nok qqʼoʼn toklen. Ex tuʼn jlu in qo tzalaj toj qanqʼibʼil (Is. 48:17, 18). Qatzun ma tzʼel qikʼun Jehová ex qe tkawbʼil, tzul nya bʼaʼn qiʼj (Gál. 6:7, 8).

¹⁰ Qa in qo anqʼin ik tzeʼn taj Jehová, in qo tzalaj tiʼj qanqʼibʼil ex at jun tbʼanel qamiwbʼil tukʼil. Ojtzqiʼn tuʼn alkye mas bʼaʼn te qe. Jun ermana te Estados Unidos aju Aurora tbʼi, tqʼama jlu: «Bʼiʼn wuʼne qa mas in qo tzalaj toj qanqʼibʼil qa ma qo nimen te Jehová». Ex ax tok jlu,  tuʼntzunju, qo ximen tiʼj xjel lu: «¿Tzeʼn o tzʼonin wiʼje tuʼnju in xi nbʼiʼne aju in tzaj tqʼamaʼn Jehová?».

11. ¿Tzeʼn in nonin naʼj Dios qiʼj?

¹¹ Tuʼnju qkyaqilx aj il qoʼ, at maj kwest in nela toj qwitz tuʼn qnimen te Jehová. Pero in nonin naʼj Dios qiʼj tuʼn kukx qnimen te. Xi tqanin jun aj bʼitzil jlu te Jehová: «Bʼinchama wanmiye tuʼntzun nbʼinchanteya aju tajbʼila» (Sal. 51:12). Tqʼama jun precursora regular Denise tbʼi: «Qa kwest in nela toj nwitze tuʼn t-xi nbʼiʼne jun tley Jehová, in chin naʼne Dios te tuʼntzun ttzaj tqʼoʼn wipune tuʼn tkubʼ nbʼinchaʼne aju bʼaʼn». Qeʼk qkʼuʼj tiʼj qa kukx ktzajel ttzaqʼweʼn Jehová qe qnaʼj Dios ik tzeʼn jlu (Luc. 11:9-13).

12. Ik tzeʼn in tzaj tqʼamaʼn Efesios 5:1, ¿tiʼ qaj tuʼn tbʼant quʼn?

¹² (Kjawil uʼjit Efesios 5:1). In nok tilil quʼn tuʼn tel qkanoʼn tiʼj Jehová tuʼnju tkʼwal qoʼ ex kʼujlaʼn qoʼ tuʼn. In nel qkanoʼn qe tbʼanel tmod aj tkubʼ qyekʼin qkʼujlabʼil kyiʼj txqantl ex aj tkubʼ qnajsaʼn kyil. Aj tok kykeʼyin xjal qe tbʼanel qmod, jakulo kubʼ kyximen tuʼn tel mas kynikʼ tiʼj Jehová (1 Ped. 2:12). In kubʼ kyyekʼin mambʼaj ax kymod kyiʼj kykʼwal ik tzeʼn tmod Jehová at qukʼil. Qa ma bʼant jlu kyuʼn, jakulo kubʼ kyximen kykʼwal tuʼn kyok te tamiw Jehová.

13. ¿Tiʼ jaku tzʼonin qiʼj tuʼn miʼn qtzaj xobʼ tuʼn qyolin tiʼj Jehová kyukʼil txqantl?

 ¹³ Chʼixmi tkyaqil maj in che tzalaj kʼwal kyiʼj kytat ex in che yolin kyiʼj kyukʼil txqantl. Chʼixmi ax jlu in bʼaj qiʼj, nim in qo tzalaj tiʼj Qtat at toj kyaʼj ex qaj tuʼn tel kynikʼ txqantl tiʼj. In kubʼ qnaʼn ik tzeʼn te aj kawil David tej tkubʼ ttzʼibʼin jlu: «Nim in chin tzalaje tiʼj Qman» (Sal. 34:2). Pero atlo junjun in che tzaj xobʼ ex tuʼn jlu kwest tuʼn kyyolin tiʼj Jehová kye txqantl. Qa a jlu in bʼaj qiʼj, ¿tiʼ jaku tzʼonin qiʼj? Tbʼanel tuʼn qximen tiʼj tzalajbʼil in kubʼ tnaʼn Jehová aj qyolin tiʼj ex alkye tten jaku tzʼonin kyiʼj txqantl. Jaku tzaj tqʼoʼn Jehová qipumal ik tzeʼn bʼant tuʼn kyukʼil okslal te tnejel syent abʼqʼi (1 Tes. 2:2).

14. ¿Tiquʼn nim toklen tuʼn qonin kyiʼj xjal tuʼn kyok te t-xnaqʼtzbʼen Jesús?

¹⁴ In chex tkʼamoʼn Jehová kykyaqil xjal, ex in tzalaj aj tok tkeʼyin qa in che ok qkʼujlaʼn xjal te junxichaq kyyajil (Hech. 10:34, 35). Jun tumel tzeʼn tuʼn tkubʼ qyekʼin qkʼujlabʼil kyiʼj xjal, aju qa ma qo pakbʼan tiʼj tbʼanel tqanil kye (Mat. 28:19, 20). ¿Tiʼ tbʼanel jaku tzaj qa ma bʼant jlu quʼn? Jaku ten jun tbʼanel kyanqʼibʼil toj ambʼil jaʼlo qa ma tzʼok kybʼiʼn tbʼanel tqanil ex jaku che anqʼin te jumajx toj ambʼil tzul (1 Tim. 4:16).

15, 16. ¿Tiquʼn in qo tzalaj?

¹⁵ Jun tbʼanel Tatbʼaj te Jehová ex taj tuʼn kytzalaj qe toj tja (Is. 65:14). Maske in tzaj nya bʼaʼn qiʼj toj ambʼil jaʼlo, at nim tiquʼn tuʼn qtzalaj. Jun techel, qʼuqlixix qkʼuʼj tiʼj qa kʼujlaʼnxix qoʼ tuʼn Qtat Jehová. Ax ikx o tzʼel qnikʼ tiʼj axix tok toj Tyol (Jer. 15:16). Ex atoʼ kyxol xjal kʼujlaʼn Jehová kyuʼn, kʼujlaʼn qe tley kyuʼn ex in nok kykʼujlaʼn kyibʼ kyxolx (Sal. 106:4, 5).

¹⁶ Ax ikx nim in qo tzalaj tuʼnju qʼuqli qkʼuʼj tiʼj qa ktel jun tbʼanel qanqʼibʼil toj ambʼil tzul. O tzʼel qnikʼ tiʼj qa chʼix tkubʼ tnajsaʼn Jehová qe nya bʼaʼn xjal ex qa kʼokel Txʼotxʼ tuʼn te jun tbʼanel najbʼil tjaqʼ Tkawbʼil. Ax ikx, qʼuqli qkʼuʼj tiʼj qa che jawil anqʼin kyimni ex qa che tel kyukʼil qe toj kyja (Juan 5:28, 29). ¡Tbʼanelxix aj tpon ambʼil lu! Ex aju mas nim toklen, qʼuqli qkʼuʼj tiʼj qa toj chʼintl ambʼil kykyaqil qeju ateʼ toj kyaʼj ex twitz Txʼotxʼ, kxel kyqʼoʼn nimsabʼil te Jehová ex che kʼulil oʼkx te te jumajx.