In nul itzʼje toj 1941 atz París toj tnam Francia ex nyatoq qʼinun qe nmane. Ngantoqe tuʼn nxnaqʼtzane, pero kubʼ nnaʼne nim bʼis tej ya mintiʼ bʼant tuʼn nxiʼye toj escuela tuʼnju tzaj tuberculosis wiʼje tej qʼiʼntoq 10 abʼqʼi wuʼne. Tzaj kyqʼamaʼn doctor weye tuʼn wojlane tuʼnju yabʼtoq ateʼ npulmone. Tuʼntzunju, in tene nim ambʼil njaye ex in chin uʼjintoqe tiʼj jun diccionario, ex in chin bʼintoqe tiʼj jun programa te Radio Sorbona te Universidad te París. Tej ttzaj kyqʼamaʼn doctor weye qa ya otoq chin bʼanixe ex qa jakutoq chinxe juntl maj toj escuela, kubʼ nnaʼne nim tzalajbʼil. Kubʼ nximane jlu: «Tbʼanel aqʼuntl in bʼant kyuʼn doctor». Atxix toj ambʼil aju, kubʼ nximane tuʼn wonine kyiʼj xjal yabʼ. Ajtoq ttzaj tqanin nmane weye tiʼ wajtoqe tuʼn tbʼant wuʼne aj nchʼiye, kukxtoq in xi nqʼamaʼne te qa wajtoqe tuʼn woke te doctor. Tuʼntzunju, ok tilil wuʼne tuʼn woke te doctor.

Católico qe toj njaye, pero mintiʼtoq wojtzqibʼile tiʼj Dios. Ax ikx, mintiʼtoq in kanet tzaqʼwebʼil wuʼne kyiʼj junjun nxjele. Tzmaxi ok qeʼ nkʼuʼje tiʼj qa at jun Bʼinchal qe tej nxnaqʼtzane tiʼj Medicina toj universidad.

Naʼnx wuʼne tej tok nkeʼyine tcélula jun tulipán toj microscopio. In jaw labʼine tiʼjju in bʼant tuʼn célula qa at cheʼw moqa kyaq. Ax ikx, ok nkeʼyine citoplasma, jun kyxol qe tiʼ in che kanet quʼn toj célula. Tej tok nkeʼyine citoplasma, ok nqʼoʼn nwitze tiʼj qa in nok yutzʼj aj tkuʼx toj atzʼin ex qa in nel mal aj tkuʼx toj aʼ. Aj tbʼant jlu ex junjuntl tiʼchaq kyuʼn célula, in nonin kyiʼj qeju in che anqʼin aj ttzaj jun chʼixpubʼil. Tej tel nnikʼe tiʼj  qa tbʼanel bʼinchaʼn qe célula, el nnikʼe tiʼj qa nya noq kukx bʼant chwinqlal.

Tej tikʼ kabʼe abʼqʼi in chin xnaqʼtzane tiʼj Medicina, mas el nnikʼe tiʼj qa ax tok at Dios. Jun techel, tej nxnaqʼtzane tiʼj qxmilal, el nnikʼe tiʼj qa in nonin tkyaqil qqʼabʼ tuʼn tel qnuqpiʼn qe twiʼ qqʼabʼ ex tuʼn kyyukch. Tbʼanelxix tzeʼn in che aqʼunan qe músculo, ligamento ex qe tendón. Jun techel, el nnikʼe tiʼj qa in kubʼ tpan tibʼ qtendón te kabʼe toj tmij twiʼ qqʼabʼ. Ex in nok tendón jlu ik tzeʼn jun túnel tuʼnju in netz juntl tendón toj aju in kuʼpin bʼaj toj twiʼ qqʼabʼ. Tuʼn jlu, kukx in kyaj ten tkabʼin tendón toj tlugar. Ax ikx, mintiʼ in che el despegarin qtendón kyiʼj bʼaq tuʼnju tzyun ateʼ kyuʼn junjun tejido. Noqwit mintiʼ qe tejido lu, junxwitlo ateʼ tendón ex mintiʼwtlo in che aqʼunan twiʼ qqʼabʼ toj tumel. Tuʼn jlu, el nnikʼe tiʼj qa aju kubʼ bʼinchaʼn qe at nimxix tnabʼil.

Mas in jaw labʼine tiʼj taqʼun Bʼinchal qe tej nxnaqʼtzane tiʼjju tzeʼn in che ul itzʼj tal neʼẍ. El nnikʼe tiʼj qa in che xewin tal neʼẍ toj talbʼil kytxuʼ tuʼn taqʼil kymux. Tuʼntzunju, mintiʼ in nokx kyqʼiqʼ kyoj alvéolos, jun part kyxmilal tal neʼ tokx toj kypulmón ex ik keʼyin ik tzeʼn jun globo. Qa chʼixtoq tul itzʼj tal neʼ, in bʼaj noj alvéolos tuʼn jun tiʼ surfactante tbʼi. Ajtzun tul itzʼj ex aj t-xi tjukʼuʼn kyqʼiqʼ tnejel maj, in bʼaj junjuntl tiʼchaq jaku qo jaw labʼin tiʼj. In kubʼ tjupun tibʼ jun toy moqa jun jul tokx toj tanmi tal neʼ tuʼntzun tbʼet chikʼ kyoj qe tpulmón. Toj ambʼil lu, in nonin surfactante kyiʼj alvéolos tuʼn tel kypan kyibʼ ex tuʼn kynoj tuʼn kyqʼiqʼ. Mintiʼ in xi tiʼn nim ambʼil tuʼn tbʼant tten tal neʼ tuʼn t-xewin tjunalx.

Tuʼnju wajtoqe tuʼn tel nnikʼe tiʼjju kubʼ bʼinchante tkyaqil tiʼchaq lu, in nok tene xnaqʼtzal tiʼj Xjan Uʼj. In jaw labʼine kyiʼj ley xi tqʼoʼn Dios kye aj Israel tuʼn tok kyxqʼuqin kyibʼ, aju ma tzikʼ junlo 3 mil abʼqʼi ttzajlen qʼamaʼn kye. Tzaj tqʼamaʼn Dios kye aj Israel tuʼn tkux kymaquʼn kytxaʼ, tuʼn kukx tel kytxʼjoʼn kyqʼabʼ ex tuʼn tkubʼ kyqʼoʼn jun xjal toj cuarentena qa jaku tzʼel kyiqen txqantl jun yabʼil tiʼj (Lev. 13:50; 15:11; Deut. 23:13). Ma tzikʼ nim ambʼil tkyajlen qʼamaʼn jlu toj Tyol Dios, pero tzma o tzikʼ 150 abʼqʼi tel-len kynikʼ científico tiʼj tzeʼn in nel kyiqen txqantl yabʼil. Ax ikx, e onin ley in yolin tiʼj higiene sexual kyiʼj aj Israel tuʼn miʼn ttzaj yabʼil kyiʼj ex atz in che kanet ley lu toj uʼj te Levítico (Lev. 12:1-6; 15:16-24). El nnikʼe tiʼj qa tzaj tqʼoʼn Dios qe ley lu kye aj Israel tuʼn miʼn ttzaj nya bʼaʼn kyiʼj ex e tzaj tkʼiwlaʼn qeju e niman te. Ok qeʼ nkʼuʼje tiʼj qa t-ximbʼetz Dios tkuʼx toj Biblia. Pero mintiʼtoq ojtzqiʼn tbʼi wuʼne.

In chin xnaqʼtzantoqe tiʼj Medicina tej tok wojtzqiʼne jun txin Lydie tbʼi. Qgantoq qibʼe ex o kubʼ mojeʼye toj 1965. Tzmatoq in netz bʼaj mij nxnaqʼtzbʼile. Toj abʼqʼi 1971, ya otoq che ul itzʼj oxe kyiʼj qaq qkʼwale e ul itzʼj. Nim o tzʼonin Lydie wiʼje toj waqʼune ex kyiʼj toj njaye.

In naqʼunane oxe abʼqʼi toj jun spital tej naʼmxtoq tjaqet nclínicaye. Tej tikʼ chʼin ambʼil, pon jun mejebʼleʼn wukʼile aju ma chin  yoline tiʼj tnejel. Chʼixtoq txi nqʼamaʼne kye tiʼ tuʼn t-xi kybʼinchaʼn tej ttzaj tqʼamaʼn xuʼjilbʼaj jlu weye: «Najsama doctor, mintiʼ in xi qkʼamoʼne qʼanbʼil at chikʼ toj». In jaw labʼine ex xi nqanine te: «¿Ax tok tuʼna? ¿Tiquʼn?». Tzaj ttzaqʼweʼn jlu weye: «Testigo de Jehová qoʼye». Naʼmxtoq kyok wojtzqiʼne testigos de Jehová ex tiquʼn mintiʼ in nok chikʼ kyiʼj. Tzaj tyekʼin xuʼj weye tukʼil Tyol Dios tiquʼn mintiʼ in nok chikʼ kyiʼj (Hech. 15:28, 29). Yajxitl, tzaj tchikʼbʼaʼn mejebʼleʼn weye qa kʼelel tiʼn Tkawbʼil Dios yajbʼil, qe yabʼil ex aju kamik (Apoc. 21:3, 4). Tukʼil tzalajbʼil xi nqʼamaʼne kye: «Aju in tzaj kyqʼamaʼne weye atzun waje tuʼn tjapun twi atxix tej kʼwalx qine. Tuʼntzunju, kubʼ nximane tuʼn woke te doctor tuʼn wonine kyiʼj xjal». Ngantoqe aju in nok nbʼiʼne ex o yoline mas te hora y media. Tej tikʼ bʼet mejebʼleʼn, ya nya wajtoqe tuʼn woke te católico. Ax ikx, otoq tzʼel nnikʼe tiʼj qa Jehová tbʼi aju kubʼ Bʼinchante tkyaqil.

Pon mejebʼleʼn juntl oxe maj toj nclínicaye ex o yoline mas te jun or kyukʼil. Xi nqʼamaʼne kye tuʼn kypon njaye tuʼntzun qyoline mas ambʼil tiʼj Tyol Dios. Bʼaʼn ela toj twitz Lydie tuʼn t-xnaqʼtzan tiʼj Tyol Dios qukʼile, pero kwest ela toj twitz tuʼn t-xi tnimen qa nya ax tok junjun xnaqʼtzbʼil otoq tzaj yekʼin qeye toj iglesia Católica. Tuʼntzunju, xi nqʼoʼne txokbʼil tiʼj pal tuʼn tpon qjaye ex tuʼn qyoline tiʼj t-xnaqʼtzbʼil iglesia. Oʼkx ajbʼen Tyol Dios quʼne ex ya otoq tzʼok qonikʼen tej qbʼaj yoline. Onin jlu tiʼj Lydie tuʼn tok qeʼ tkʼuʼj tiʼj qa in tzaj kyxnaqʼtzaʼn testigo de Jehová axix tok. Tuʼntzunju, ok tilil quʼne tuʼn tok qkʼujlaʼne Jehová ex o bautisarine toj 1974.

Chʼexpaj nximbʼetze tej tel nnikʼe tiʼjju ximen tuʼn Dios tuʼn tbʼant tuʼn kyiʼj xjal. Tuʼntzunju, kubʼ qqʼoʼne qajbʼebʼile te Jehová tnejel toj qanqʼibʼile tukʼil Lydie. Ax ikx, qajtoqe tuʼn qonine kyiʼj qkʼwale tuʼn tel kynikʼ tiʼj Dios. El qnikʼe tiʼj qa jakutoq qo tzalaje kyukʼil qkʼwale qa ma tzʼok qkʼujlaʼne Dios ex qe xjal (Mat. 22:37-39).

Ojtzqiʼntoq kyuʼn qkʼwale qa junx qximbʼetze tukʼil Lydie. Nim maj in qo jaw tzeʼne aj ttzaj qnaʼne jlu. Ojtzqiʼntoq kyuʼn qa in qo oktoq lepeʼye tiʼj kawbʼil lu tqʼama Jesús: «Noq oʼkx tuʼn t-xi kymaʼne ok ex qa miʼn» (Mat. 5:37). Jun techel, tej qʼiʼntoq 17 abʼqʼi tuʼn jun nmeʼjele xi tqanin tpermis te ttxuʼ  tuʼn tex kyukʼil tamiw, pero mintiʼ xi qʼoʼn permis te. Tuʼntzunju, xi tqʼamaʼn jun txin jlu te: «Qa mintiʼ in tzaj qʼoʼn permis teya tuʼn ttxuʼya qaninxa te tmana». Atzun te nmeʼjele xi ttzaqʼweʼn te: «Noqx gan porke axju tzul tqʼamaʼn». El kynikʼ qaq qkʼwale tiʼj qa in qo oktoq lepeʼye kyiʼj nabʼil toj Tyol Dios. In xi qqʼoʼne chjonte te Jehová tuʼnju ateʼ nim toj qjaye in che ajbʼen te.

Tej tel nnikʼe tiʼj axix tok, chʼexpaj aju wajbʼile tuʼn tbʼant wuʼne toj wanqʼibʼile. Pero wajtoqe tuʼn wonine kyiʼj erman tukʼilju otoq tzʼel nnikʼe tiʼj. Tuʼntzunju, xi nqʼamaʼne kye erman te Betel qa jakutoq chin onine kyiʼj qa kyajtoq jun doctor. In nonine kyiʼj erman toj Betel te París ex in chin onine toj akʼaj Betel atz Louviers. Ma tzikʼ junlo 50 abʼqʼi in bʼant jlu wuʼne ex o tzʼok wamiwen wibʼe kyukʼil nim betelita. Ateʼ junjun ya o che ikʼ twi 90 abʼqʼi. Axpe ikx, in jaw labʼine tej ttzaj tqʼamaʼn jun akʼaj betelita weye qa in nonine tiʼj ttxuʼ tej tul itzʼj ex malo tzikʼ 20 abʼqʼi.

Aj tok nqʼoʼne nwitze tiʼj tzeʼn in kubʼ nej Jehová twitz ttnam ex tzeʼn in xqʼuqin tiʼj, o tzʼonin wiʼje tuʼn tchʼiy nkʼujlabʼile tiʼj. Jun techel, kyoj abʼqʼi 1980 etz jun programa tuʼn Kʼloj Xjal Qʼil Twitz Aqʼuntl atz Estados Unidos tuʼn tonin kyiʼj doctor tuʼn tel kynikʼ tiʼj tiquʼn mintiʼ in nok kyqʼoʼn testigos de Jehová chikʼ kyiʼj.

Toj abʼqʼi 1988, kubʼ tqʼoʼn Kʼloj Xjal Qʼil Twitz Aqʼuntl juntl akʼaj departamento toj Betel aju ok qʼoʼn tbʼi te Kʼloj Qʼol Tqanil tiʼjju in bʼant kyuʼn Qʼanil. Tnejel, ok tkeʼyin departamento lu aju aqʼuntl in bʼant tuʼn Kʼloj Yolil kyukʼil aj Qʼanil atz Estados Unidos, aju onin kyiʼj erman tuʼn tkanet jun tbʼanel qʼanbʼil kyuʼn. Tej tkubʼ qʼoʼn Kʼloj Yolil kyukʼil aj Qʼanil kyoj junjuntl tnam, ax ikx kubʼ qʼoʼn toj tnam Francia. In chin jaw labʼine tiʼj tzeʼn in xqʼuqin ttnam Jehová kyiʼj erman aj ttzaj yabʼil kyiʼj.

Tnejel, mastoq nim toklen qʼanbʼil toj nwitze. Pero tej tel nnikʼe tiʼj qa attoq jun tiʼ mas nim toklen twitzju tuʼn kyqʼanit xjal, chʼexpaj nximbʼetze. Tuʼntzunju, kubʼ nximane tuʼn wonine kyiʼj xjal tuʼn kyok laqʼeʼ ttxlaj Dios tuʼnju a in tzaj qʼonte qchwinqlal. Tej njubilarine, xi tzyet tuʼn qajbʼene te precursor regular tukʼil Lydie ex el qpaʼne nim ambʼil tuʼn qpakbʼane tiʼj Tkawbʼil Dios. Kukx in nok tilil quʼne tuʼn qonine kyiʼj xjal tuʼn kyklet.

Ax ikx, kukx in chin onine kyiʼj xjal tuʼn kyqʼanit tiʼj jun yabʼil, pero o tzʼel nnikʼe tiʼj qa ni jun doctor jaku tzʼel qʼinte yabʼil ex kamik. Tuʼntzunju, waje tuʼn tpon qʼij jatumel mlay tentl kʼixkʼoj, yabʼil ex kamik. Toj akʼaj twitz Txʼotxʼ, ktel nim ambʼil wiʼje tuʼn nxnaqʼtzane kyiʼj tbʼinchbʼen Dios, axpe ikx tiʼjju alkye tten bʼinchaʼn qxmilal. Noq chʼin twi nximbʼetze o japun, pero aju mas tbʼanel kbʼajel toj ambʼil tzul.