TOJ ambʼil ojtxe, ajtoq kykubʼ mojeʼ kabʼe xjal, in xitoq tchjoʼn xinaq twiʼ xuʼj. Tuʼn tchjet tuʼn, jakutoq txi tqʼoʼn junjun tiʼchaq wiʼyilxix, qa aluʼmj moqa pwaq. Ax ikx, jakutoq tzʼaqʼunan tuʼn tchjet twiʼ xuʼj ik tzeʼn bʼant tuʼn Jacob tej tkubʼ mojeʼ tukʼil Raquel. Xi tqʼamaʼn Jacob te tjiʼ qa jakutoq tzʼaqʼunan wuq abʼqʼi tuʼn tchej twiʼ Raquel (Gén. 29:17, 18, 20). ¿Tiquʼn in xitoq kychjoʼn aj Israel kywiʼ xuʼj?

In tzaj tqʼamaʼn Carol Meyers jlu, jun xuʼj in xnaqʼtzan tiʼj Tyol Dios: «In xitoq chjoʼn twiʼ xuʼj tuʼnju ya mlay tzʼaqʼunan kyukʼil toj tja. Ex nimtoq toklen jlu kye xjal in che aqʼunan tiʼj txʼotxʼ». Ax ikx, onin jlu tuʼn tten mujbʼabʼil kyxol kabʼe familia. Tuʼntzunju, ajtoq ttzaj jun nya bʼaʼn, jakutoq bʼaj kyonin kyibʼ kyxolx. Ajtoq t-xi chjoʼn twiʼ jun xuʼj, in neltoq toj qʼanchaʼl qa ya chʼixtoq tkubʼ mojeʼ ex qa ya mlay tzʼanqʼin kyukʼil tman.

Ajtoq t-xi tchjoʼn jun xinaq twiʼ jun xuʼj, nya a t-xilen jlu qa jakutoq txi kʼayin moqa jaku txi laqʼoʼn. In tzaj tqʼamaʼn libro Instituciones del Antiguo Testamento jlu: «Jaku kubʼ kyximen xjal qa in tzajtoq tlaqʼoʼn jun aj Israel xuʼj ajtoq t-xi tchjoʼn twiʼ kye toj tja. Pero [...] in kubʼtoq kyximen xjal qa nya ikju, sino in noktoq ik tzeʼn jun oyaj in xi qʼoʼn kye toj tja xuʼj». *

Toj ambʼil jaʼlo, kukx at kykostumbr xjal lu kyoj junjun tnam. Qa ma tzʼok tilil kyuʼn erman in che anqʼin kyoj tnam lu tuʼn miʼn txi kyqanin nim pwaq tiʼj kymeʼjel, kʼelel kynikʼ xjal tiʼj qa tbʼanel kymod (Filip. 4:5; 1 Cor. 10:32, 33). Qa ma bʼant jlu kyuʼn, kbʼel kyyekʼin qa mintiʼ «tok kykʼuʼj tiʼj pwaq» (2 Tim. 3:2). Ax ikx, qa mintiʼ ma txi kyqanin nim pwaq te tnovio kymeʼjel, mlay che ayon nim ambʼil tuʼn kykubʼ mojeʼ tuʼnju mlay tzʼaqʼunan qʼa nim ambʼil tuʼn tkambʼet pwaq. Ex qa precursor tnovio kymeʼjel, mlay kyaj ttzaqpiʼn tajbʼebʼil te Jehová tuʼn tkambʼet pwaq tuʼn.

Kyoj junjun lugar, in tzaj kyqʼamaʼn aj kawil jteʼ twiʼ jun xuʼj il tiʼj tuʼn t-xi chjet. Aqeju erman in che anqʼin kyoj lugar lu, in nok kyqʼoʼn toklen ley. In bʼant jlu kyuʼn tuʼnju taj Jehová tuʼn kynimen okslal kye «aj sanjelal te gobierni». Ax ikx, taj tuʼn t-xi kynimen qe ley qa mintiʼ in che ikʼ kyibʼaj tkawbʼil (Rom. 13:1; Hech. 5:29).