¿O tzʼok tbʼiʼna?
¿Tiquʼn bʼaʼn ela kye aj israel tej ttzaj tqʼoʼn jehová ambʼil kye tuʼn t-xi kyqʼoʼn qe palom te chojbʼil?
TZAJ qʼamaʼn toj Tley Moisés qa xi tkʼamoʼn Jehová qe palom ex qe tórtola te oyaj. In yolin ley tzaj qʼoʼn tiʼj chojbʼil kyiʼj kabʼe tal chyuʼj lu. Iktzun tten jaku txi kyqʼoʼn aj Israel jun palom moqa jun tórtola te chojbʼil (Lev. 1:14; 12:8; 14:30). Tbʼanel ela jlu toj kywitz aj Israel tuʼnju mintiʼ in che kanet tórtola toj tkyaqil ambʼil. Qo xnaqʼtzan tiʼj tiquʼn.
Jun tórtola
In cheʼx tórtola jyol kywa toj juntl lugar tkyaqil abʼqʼi, pero in che pon toj tnam Israel toj ambʼil te kyaq. Toj xjaw te octubre in cheʼx qe chyuʼj lu toj juntl tnam, jatumel at kyaq ex yajxitl, in che meltzʼaj juntl maj toj tnam Israel (Cant. 2:11, 12; Jer. 8:7). Tuʼntzunju, aj tetz jbʼal, kwest in nela kye aj Israel tuʼn kykanet qe tórtola kyuʼn tuʼn t-xi kyqʼoʼn te chojbʼil.
Jun palom brava
Atzun kye palom mintiʼ in cheʼx toj juntl lugar, ex nya kwest tuʼn kykanet kyuʼn aj Israel. Axpe ikx, jaku che ten palom kyja xjal (jaku tzʼok tmojbʼaʼna tukʼil Juan 2:14, 16). In tzaj tqʼamaʼn jun uʼj qa «kyoj qe aldea ex kyoj tnam te Palestina, e ten palom te kyalun xjal. Kyaj bʼinchaʼn jun jul twitz pared kyiʼj kykyaqil ja tuʼntzun kyanqʼin palom toj» (jaku tzʼok tmojbʼaʼna tukʼil Isaías 60:8).
At jun palom toj tja
¿Tiʼ in tzaj t-xnaqʼtzaʼn jlu qe tiʼj Jehová? In tzaj tyekʼin qe qa jun Dios at nim tkʼujlabʼil ex qa in ximen qiʼj, tuʼnju tzaj tqʼoʼn ambʼil kye aj Israel tuʼn t-xi kyqʼoʼn noq alkyexku jun kyxol kabʼe tal chyuʼj lu te chojbʼil akux in nex abʼqʼi.
