1. ¿Tiquʼn in xi qqʼoʼn chjonte te Jehová tuʼnju o tzaj tqʼoʼn Biblia qe?

 IN XI qqʼoʼn nim chjonte te Jehová tuʼnju o tzaj tqʼoʼn Biblia te oyaj qe. ¿Tiquʼn? Tuʼnju in che tzaj tqʼoʼn tbʼanel consej qe toj ex jaku che onin qiʼj tuʼn tel qnikʼ tiʼj tiʼ jaku bʼant quʼn aj qok weʼ kywitz nya bʼaʼn. Ax ikx, in tzaj tqʼoʼn jun tbʼanel qʼuqbʼil qkʼuʼj tiʼj ambʼil tzul. Ex aju mas nim toklen, in tzaj tqʼamaʼn Biblia tzeʼnxix tmod Jehová. Aj qximen kyiʼj tbʼanel tmod Jehová, in nonin qiʼj tuʼn qok laqʼeʼ ttxlaj ex tuʼn qok te tamiw (Sal. 25:14).

2. ¿Tiʼ bʼant tuʼn Jehová tuʼn ttzaj tqʼoʼn tqanil kyiʼj tmod?

² Taj Jehová tuʼn tel kynikʼ xjal tiʼj. Toj ambʼil ojtxe, tzaj tyekʼin junjun tiʼ kye junjun xjal, e ajbʼen witzikʼ tuʼn ex qe anjel tuʼntzun ttzaj tqʼoʼn tqanil kyiʼj tmod (Núm. 12:6; Hech. 10:3, 4). Noqwit mintiʼ e kyaj tzʼibʼin qe tqanil lu, mintiʼwtlo in che jaw quʼjin toj ambʼil jaʼlo. Tuʼntzunju, xi tqʼamaʼn Jehová kye junjun xjal tuʼn tkubʼ kytzʼibʼin «tuj jun libro» aju tajtoq tuʼn tok qbʼiʼn (Jer. 30:2). Jaku tzʼok qeʼ qkʼuʼj tiʼj qa tzaj tqʼoʼn Jehová tkyaqil tqanil qe tuʼnju «puro tzʼaqlxix» qe tbʼe (Sal. 18:30).

3. ¿Tiʼ bʼant tuʼn Jehová tuʼn kukx tten Biblia? (Isaías 40:8).

³ (Kjawil uʼjit Isaías 40:8). O tzaj tyekʼin Biblia kybʼe tmajen Jehová toj nim mil abʼqʼi. Pero, ¿tzeʼn o bʼant jlu tuʼnju kubʼ tzʼibʼin Biblia kywitz junjun tiʼchaq jun rat e naj? Ax ikx, o tzʼel kynikʼ xjal tiʼj qa ya mintiʼ jun documento original at. Maske ikju, ok tilil tuʼn Jehová tuʼn kybʼant copia tiʼj Tyol ik tzeʼnx otoq kubʼ tzʼibʼin. Nya tzʼaqli qe xjal kubʼ bʼinchante qe copia tiʼj Biblia, pero ok tilil kyuʼn tuʼn tbʼant jun tbʼanel aqʼuntl kyuʼn. Tej tyolin  jun xjal at tojtzqibʼil kyiʼj uʼj e kubʼ tzʼibʼin toj yol hebreo, tqʼama jlu: «Tuʼn tkyaqil qkʼuʼj jaku txi qqʼamaʼn qa mintiʼ juntl ojtxe uʼj o tzʼel copiarit toj jun tumel tzʼaqli ik tzeʼn Biblia». Nya tzʼaqli qe xjal kubʼ tzʼibʼinte Tyol Dios ex e ajbʼen junjun tiʼchaq kyuʼn aʼyeju jun rat e naj, pero qʼanchaʼlxix qa tzajni tukʼil Dios aju in jaw quʼjin toj Biblia toj ambʼil jaʼlo.

4. ¿Tiʼ kʼelel qnikʼ tiʼj toj xnaqʼtzbʼil lu?

⁴ «Tkyaqil oyaj bʼaʼn ex tkyaqil oyaj tbʼanilxix» tzajni tukʼil Jehová (Sant. 1:17). Kyxol qe oyaj mas tbʼanel o tzaj tqʼoʼn Jehová qe, at Biblia. Aj ttzaj tqʼoʼn jun xjal jun oyaj qe, in kubʼ tyekʼin qa in ximen qiʼj ex qa ojtzqiʼn tuʼn tiʼ at tajbʼen qe. Ax jlu in bʼaj tukʼil Biblia, in nok qojtzqiʼn Jehová aj qxnaqʼtzan tiʼj. Ex in nel qnikʼ tiʼj qa ojtzqiʼn qoʼ tuʼn ex qa in el tnikʼ tiʼjju at tajbʼen qe. Toj xnaqʼtzbʼil lu, kʼelel qnikʼ kyiʼj oxe tmod Jehová in yolin Biblia tiʼj. In tzaj tyekʼin qa at tnabʼil, qa at tkʼujlabʼil ex qa tzʼaqli. Tnejel, qo yolin tiʼjju in tzaj tqʼamaʼn Biblia tiʼj tnabʼil Jehová.

5. ¿Tiquʼn in xi qqʼamaʼn qa te Dios tnabʼil tkuʼx toj Biblia?

⁵ Ojtzqiʼn tuʼn Jehová qa at kyajbʼen tbʼanel consej qe. Tuʼntzunju, tzaj tqʼoʼn Biblia te oyaj qe tuʼnju atz tkuʼx tnabʼil toj. Nim jaku che onin tconsej kyiʼj xjal ex jaku chʼexpaj kyanqʼibʼil tuʼn. Tej tkubʼ ttzʼibʼin Moisés qe tnejel uʼj tiʼj Biblia, xi tqʼamaʼn jlu kye israelita: «Porke aju ley lu mya noq chʼin t-xilen te kyeye; aju ley lu qʼol kychwinqlale» (Deut. 32:47). Kykyaqil qeju xi kynimen aju tzaj qʼamaʼn te Moisés, e tzalaj ex tbʼanel ela tkyaqil te kye (Sal. 1:2, 3). Maske ma tzikʼ nim ambʼil tkubʼlen tzʼibʼin Biblia, kukx in nonin kyiʼj xjal tuʼn tchʼexpaj kyanqʼibʼil. Jun techel, in che kanet mas te 50 biografía quʼn toj jw.org, jatumel in tzaj tqʼamaʼn «Chʼexpaj kyanqʼibʼil tuʼn Tyol Dios». Kyoj biografía lu, in tzaj qʼamaʼn qa bʼant nim chʼixpubʼil kyuʼn xjal ex onin kyiʼj tej kyok lepeʼ kyiʼj consej tkuʼx toj Biblia (1 Tes. 2:13).

6. ¿Tiquʼn in xi qqʼamaʼn qa mintiʼ juntl libro at ik tzeʼn Biblia?

⁶ Mintiʼ juntl libro ik tzeʼn te Biblia. ¿Tiquʼn? Tuʼnju at Nim Tipumal aju Bʼinchalte, kukx at ex mlay tzʼok mojbʼet tojtzqibʼil tukʼil jun xjal. Ateʼ nim libro kukx in jaw kyuʼjin xjal maske o kyim aju bʼinchal kye. Pero chʼixme tkyaqil maj ya mintiʼ in che ajbʼen qe consej tkuʼx kyoj. Atzun qe consej ateʼ toj Biblia, kukx at kyajbʼen ex o che onin kyiʼj xjal te junxichaq ambʼil. Aj tjaw quʼjin Biblia ex aj qximen kyiʼj consej tkuʼx toj, in najbʼen xewbʼaj xjan tuʼn Jehová tuʼn tonin qiʼj tuʼn tkubʼ qbʼinchaʼn aju in tzaj tqʼamaʼn qe (Sal. 119:27; Mal. 3:16; Heb. 4:12). Taj Jehová tuʼn tonin qiʼj tuʼn tkyaqil tanmi. Aj qximen tiʼj jlu, in nonin qiʼj tuʼn tok tilil quʼn tuʼn quʼjin tiʼj Biblia tkyaqil qʼij.

7. ¿Tzeʼn onin Biblia kyiʼj tmajen Jehová tuʼn tten mujbʼabʼil kyxol?

⁷ Ax ikx in xi qqʼamaʼn qa tnabʼil Dios tkuʼx toj Biblia, tuʼnju in nonin tiʼj ttnam tuʼn tten toj mujbʼabʼil. Tej kyokx israelita toj txʼotxʼ tzaj tziyen kye, e anqʼin kyoj junxichaq lugar. Ateʼ junjun e aqʼunan te tzyul pescad, te aqʼunal tiʼj txʼotxʼ ex te xqʼuqil kyiʼj txkup. Tuʼntzunju, mintiʼ e anqʼin toj junx lugar ex tuʼn jlu mlaytoq  che ximen kyiʼj txqantl. Pero xi tjyoʼn Jehová tumel tzeʼn tuʼn tok kychmon kyibʼ tuʼntzun tok kybʼiʼn tyol ex tuʼn tel kynikʼ tiʼj (Deut. 31:10-13; Neh. 8:2, 8, 18). Qo ximen tiʼj tiʼ kubʼ tnaʼn jun israelita kukx in najbʼen te Jehová tej tpon toj tnam Jerusalén. Bʼalo in noktoq tchmon tibʼ kyukʼil nim millón israelita te junxichaq lugar tuʼntzun kykʼulin junx te Jehová. Iktzun tten onin Jehová kyiʼj tuʼn kukx tten mujbʼabʼil kyxol. Tej tikʼ chʼintl ambʼil, tzaj tzyet tuʼn tten congregación toj tnejel syent abʼqʼi, ex e ten xinaq ex xuʼj te junxichaq lugar toj. Ax ikx, e ten junjun at kypwaq, junjuntl mintiʼ, junxitl kykostumbr ex kyyol. Pero tuʼnju kʼujlaʼn Tyol Dios kyuʼn, junx e ajbʼen te Jehová. Tej kyokx junjuntl toj ttnam Jehová, el kynikʼ tiʼj Tyol tuʼnju xi chikʼbʼaʼn kye kyuʼn txqantl okslal ex el kypaʼn ambʼil tuʼn tok kychmon kyibʼ (Hech. 2:42; 8:30, 31).

8. ¿Tzeʼn in najbʼen Biblia tuʼn Jehová tuʼn tten mujbʼabʼil kyxol tmajen toj ambʼil jaʼlo?

⁸ Toj ambʼil jaʼlo, kukx in najbʼen Biblia tuʼn Jehová tuʼn ttzaj tqʼoʼn xnaqʼtzbʼil kye tmajen ex tuʼn tonin kyiʼj tuʼn tten mujbʼabʼil kyxol. Ax ikx, in nok tilil quʼn tuʼn qten kyoj chmabʼil ex kyoj asamblea tuʼnju in qo uʼjin ex in qo xnaqʼtzan tiʼj Tyol Dios. Tuʼn jlu, in nel qnikʼ tiʼj qa in najbʼen Biblia tuʼn Jehová tuʼn kukx  kyajbʼen tmajen te ex tuʼn tten mujbʼabʼil kyxol (Sof. 3:9).

9. ¿Alkye qmod il tiʼj tuʼn tten tuʼntzun tel qnikʼ tiʼj Biblia? (Lucas 10:21).

⁹ Qo xnaqʼtzan tiʼj juntl tumel in tzaj tyekʼin qa at tnabʼil Jehová. Ateʼ junjun txʼolbʼabʼil toj Tyol Dios ex oʼkx qe xjal in kubʼ kyin kyibʼ in nel kynikʼ tiʼj (kjawil uʼjit Lucas 10:21). Twitz tkyaqil Txʼotxʼ jaku jaw kyuʼjin xjal Biblia. Tqʼama jun xjal at tnabʼil qa «nya oʼkx in jaw kyuʼjin xjal Biblia sino mas in nok kyqʼoʼn kywiʼ tiʼj», toj juntl yol, mas in che xnaqʼtzan tiʼj. Pero oʼkx qe xjal in kubʼ kyin kyibʼ jaku tzʼel kynikʼ tiʼj ex in kubʼ kybʼinchaʼn aju in tzaj tqʼamaʼn (2 Cor. 3:15, 16).

10. ¿Toj alkye juntl tten jaku tzʼok qqʼoʼn qwitz tiʼj tnabʼil Jehová toj Biblia?

¹⁰ Qo xnaqʼtzan tiʼj juntl tumel tzeʼn in tzaj tyekʼin Biblia qa at tnabʼil Jehová. Nya oʼkx in najbʼen Tyol tuʼn tuʼn ttzaj tqʼoʼn xnaqʼtzbʼil te ttnam, sino ax ikx in najbʼen tuʼn tuʼn ttzaj t-xnaqʼtzaʼn ex tuʼn ttzaj tqʼuqbʼaʼn tkʼuʼj teyele junjun qe. Aj tjaw quʼjin Biblia, in nel qnikʼ tiʼj qa in ximen Jehová tiʼj teyele junjun qe (Is. 30:21). ¿Atpe jun texto o tzʼonin qiʼj tej qok weʼ twitz jun nya bʼaʼn? Jaku txi qqʼamaʼn qa qkyaqilx o bʼaj jlu qiʼj. Kyaj tzʼibʼin Biblia kye nimku xjal ex jaku tzʼonin tiʼj teyele junjun qe toj tkyaqil ambʼil. ¿Tiquʼn? Tuʼnju at nim tnabʼil aju Bʼinchal te (2 Tim. 3:16, 17).

11. ¿Tzeʼn kubʼ tyekʼin Jehová qa mintiʼ ok tqʼoʼn twitz tiʼj kyyajil xjal tej tkubʼ tzʼibʼin Biblia?

¹¹ Tzʼaqli te Jehová ex atzun juntl tmod mas nim toklen (Deut. 32:4). At toklen mod lu tukʼilju qa mintiʼ in nok tqʼoʼn Jehová twitz tiʼj kyyajil xjal (Hech. 10:34, 35; Rom. 2:11). Jun techel tiʼj jlu, kubʼ tzʼibʼin Biblia toj yol mas in che yolin xjal tiʼj. E kubʼ tzʼibʼin tnejel 39 libro toj yol hebreo tuʼnju atzun yol mas in nel kynikʼ tmajen Jehová tiʼj toj ambʼil aju. Pero toj ambʼil tej kyten tnejel okslal, chʼixme kykyaqil xjal in che yolintoq toj yol griego. Tuʼntzunju, e kubʼ tzʼibʼin qe mankbʼil 27 libro tiʼj Biblia toj yol griego. Tbʼanel ela toj twitz Jehová tej tkubʼ tzʼibʼin Tyol toj mas te jun yol. Toj ambʼil jaʼlo, at chʼixme 8 mil millón xjal twitz tkyaqil Txʼotxʼ ex in che yolin kyiʼj junxichaq yol. ¿Tiʼ in nonin qiʼj qkyaqilx tuʼn tok qojtzqiʼn Jehová?

12. ¿Tzeʼn o japun kywi yol tkuʼx toj Daniel 12:4 toj mankbʼil tqʼijlalil?

¹² Tzaj ttziyen Jehová te profeta Daniel qa kchʼiyil «kynabʼl xjal» toj mankbʼil tqʼijlalil, toj juntl yol, chʼixmi kykyaqil xjal kʼelel kynikʼ tiʼj Biblia (kjawil uʼjit Daniel 12:4). Tuʼn tbʼant jlu, o che etz imprimirit, o che bʼaj traducirit ex o chex sipet nim Biblia ex junjuntl uʼj. Ex oʼkx Biblia mas o bʼaj traducirit ex o txi sipet twitz alkyexku juntl uʼj. Ateʼ junjun Biblia o che bʼaj traducirit kyoj junjuntl yol, pero nim kywiʼ aj kytzaj laqʼet. Atzunte ttnam Jehová o bʼaj ttraducirin tkyaqil Biblia moqa jun plaj toj mas te 240 yol ex nya chjoʼn twiʼ aj t-xi qʼet te alkyexku xjal. ¿Tzeʼn o tzʼonin jlu kyiʼj xjal? O tzʼonin kyiʼj tuʼn tok kyojtzqiʼn axix tok tiʼj «tqanil bʼaʼn [...] tiʼj tkawbʼil Dios» naʼmxtoq tul xitbʼil (Mat. 24:14). Tzʼaqli te Jehová ex taj tuʼn tok ojtzqiʼn kyuʼn kykyaqil xjal aj kyuʼjin tiʼj Tyol. ¿Tiquʼn in bʼant jlu tuʼn? Tuʼnju kʼujlaʼn qe xjal tuʼn.

13. ¿Tiquʼn in xi qqʼamaʼn qa in tzaj tyekʼin Biblia qa at tkʼujlabʼil Jehová? (Juan 21:25).

¹³ Ax ikx in tzaj tyekʼin Biblia qa aju tmod Jehová mas nim toklen, aju kʼujlabʼil (1 Juan 4:8). Jun techel, qo ximen tiʼj alkye tqanil kux tzʼibʼin toj Biblia ex alkye mintiʼ. Kyxol tqanil kux tzʼibʼin, tzaj tqʼamaʼn Jehová tiʼ jaku bʼant quʼn tuʼn qok te tamiw, tuʼn qtzalaj ex tuʼn qanqʼin te jumajx. Pero tuʼnju kʼujlaʼn qoʼ tuʼn, oʼkx tzaj tqʼoʼn tqanil at tajbʼen qe (kjawil uʼjit Juan 21:25).

14. ¿Toj alkye juntl tten in tzaj tyekʼin Biblia qa at tkʼujlabʼil Jehová?

¹⁴ In tzaj tyekʼin Jehová qa kʼujlaʼn qoʼ tuʼn aj tok tqʼoʼn qoklen aj tyolin qukʼil. Ex mintiʼ o tzaj tqʼoʼn nim kawbʼil tiʼj tkyaqilju jaku bʼant quʼn ex tiʼjju mintiʼ tuʼn tbʼant quʼn. Sino o tzaj tqʼoʼn ambʼil tuʼn tkubʼ tzʼibʼin aju o tzikʼ kyiʼj junjun tmajen. Ax ikx, o kyaj tqʼamaʼn qe tbʼanel profecía ex qe tbʼanel consej tuʼntzun tel qnikʼ tiʼj tiʼ jaku bʼant quʼn. Iktzun tten in nonin Biblia qiʼj tuʼn tok qkʼujlaʼn Dios ex tuʼn qnimen te tuʼn tkyaqil qanmi.

15. a) ¿Tzeʼn in tzaj tyekʼin Biblia qa in ximen Jehová qiʼj? b) Ik tzeʼn in tzaj yekʼin kyoj dibujo, ¿alkyeqe txʼolbʼabʼil in ximen jun txin, jun kuʼxun ex jun ermana ma tijen tiʼj? (Gén. 39:1, 10-12; 2 Rey. 5:1-3; Luc. 2:25-38).

¹⁵ In tzaj tyekʼin Biblia qa in ximen Jehová qiʼj. In nel qnikʼ tiʼj jlu tuʼnju ateʼ txʼolbʼabʼil toj Biblia jatumel in tzaj kyyekʼin tiʼ kubʼ kynaʼn xjal. Jaku tzʼel qnikʼ tiʼjju kubʼ kynaʼn tmajen Jehová, tuʼnju ax kubʼ kynaʼn ik tzeʼn qe (Sant. 5:17). Ex aj qximen tiʼj tmod Jehová kubʼ tyekʼin kyukʼil  tmajen ik tzeʼn qe, in nonin qiʼj tuʼn tel qnikʼ tiʼj qa «in qʼaqʼan tkʼuʼj ex in tzʼeʼy tkʼuʼj qiʼj» (Sant. 5:11).

16. Aj tjaw quʼjin qe txʼolbʼabʼil kyiʼj xjal i el txalpaj, ¿tiʼ in tzaj tyekʼin jlu qe tiʼj Jehová? (Isaías 55:7).

¹⁶ Ax ikx in tzaj tyekʼin Biblia qa kʼujlaʼn qoʼ tuʼn Jehová tuʼnju mintiʼ in qo kyaj tkolin aj qel txalpaj. Toj ambʼil ojtxe, nim maj kubʼ kybʼinchaʼn israelita il twitz Jehová, pero tej tajtz tiʼj kyanmi kubʼ tnajsaʼn kyil (kjawil uʼjit Isaías 55:7). Ax ikx el kynikʼ tnejel okslal tiʼj jniʼ kʼujlaʼn qe tuʼn Jehová. Jun techel, onin Jehová tiʼj apóstol Pablo tuʼn t-xi tqʼamaʼn kye okslal tuʼn tkubʼ kynajsaʼn til jun xjal otoq tzʼajtz tiʼj tanmi ex tuʼn t-xi kyqʼuqbʼaʼn tkʼuʼj (1 Cor. 5:1-5; 2 Cor. 2:6, 7). In qo jaw labʼin tiʼj tej mintiʼ el tpan tibʼ Jehová kyiʼj tmajen tej kyel txalpaj. Aju bʼant tuʼn, onin kyiʼj tukʼil kʼujlabʼil, i ex tkawin ex xi tqʼoʼn txokbʼil kyiʼj tuʼn kymeltzʼaj tukʼil. Ex in tzaj ttziyen Jehová qa ax jlu kbʼantel tuʼn tukʼil jun xjal in najtz tiʼj tanmi (Sant. 4:8-10).

17. ¿Tiquʼn jun tbʼanel oyaj Biblia?

¹⁷ O tzaj tqʼoʼn Jehová Biblia te jun tbʼanel oyaj qe. ¿Tiquʼn nim toklen? Ik tzeʼn ma tzʼel qnikʼ tiʼj, tuʼnju in tzaj tyekʼin Biblia qe qa tzʼaqli Jehová, qa at tnabʼil ex qa kʼujlaʼn qoʼ tuʼn. Ax ikx in tzaj tyekʼin qa taj Jehová tuʼn tok qojtzqiʼn ex tuʼn qok te tamiw.

18. ¿Tzeʼn jaku kubʼ qyekʼin qa in xi qqʼoʼn chjonte tiʼj Biblia?

¹⁸ Miʼn tzikʼ tnaʼl quʼn qa nim toklen Biblia (Sant. 1:17). Tuʼntzunju, bʼaʼn tuʼn kukx txi qqʼoʼn chjonte te Jehová tiʼj oyaj lu. ¿Tzeʼn jaku bʼant jlu quʼn? Jaku bʼant quʼn aj qnaʼn Dios naʼmxtoq tjaw quʼjin Biblia ex aj qximen tiʼj. Ex jaku tzʼok qeʼ qkʼuʼj tiʼj qa kkanetel axix tok tojtzqibʼil Jehová quʼn ex qo ktzajel tkʼiwlaʼn (Prov. 2:5).