1. ¿Tiʼ yekʼbʼil at qa nimtoq toklen Tyol Dios toj twitz Jesús?

 NOQWIT ok tbʼiʼna Jesús tej t-xi tqʼoʼn xnaqʼtzbʼil, ¿tiʼwtlo kubʼ tnaʼna? Tej tyolin Jesús, tkyaqil maj ajbʼen Tyol Dios tuʼn ex nimku maj xi tqʼamaʼn qe texto otoq che kyaj toj twiʼ. Jun techel tiʼj jlu, aju tqʼama tej tbautisarin ex aju tqʼama tej chʼixtoq tkyim (Deut. 8:3; Sal. 31:5; Luc. 4:4; 23:46). b Ex tej tpakbʼan Jesús toj mas te oxe abʼqʼi, kukx ajbʼen Tyol Dios tuʼn, jaw tuʼjin ex xi tqʼamaʼn tiʼ t-xilen (Mat. 5:17, 18, 21, 22, 27, 28; Luc. 4:16-20).

2. ¿Tiʼ onin tiʼj Jesús tuʼn tok tojtzqiʼnxix Tyol Dios akux in chʼiy? (Qʼonka twitza tiʼj dibujo tok tiʼj revista).

² Tej naʼmxtoq t-xi tzyet tuʼn tpakbʼan Jesús, naqʼlitoq tuʼn tjaw tuʼjin Tyol Dios ex tuʼn tok tbʼiʼn nim maj. Ax ikx, bʼalo ok tbʼiʼn Jesús María ex José tej kyyolin tiʼj Tyol Dios kyukʼil toj tja (Deut. 6:6, 7). c Qʼuqli qkʼuʼj tiʼj qa in xiʼtoq Jesús tkyaqil sábado toj tja Dios kyukʼil toj tja ex in noktoq tqʼoʼn twiʼ tiʼj Tyol Dios aj tjaw uʼjit (Luc. 4:16). Tej tikʼ ambʼil, ok tilil tuʼn Jesús tuʼn tjaw tuʼjin Tyol Dios tjunalx. Tej tbʼant jlu tuʼn, ok tojtzqiʼn tiʼ in tzaj tqʼamaʼn, ok tkʼujlaʼn ex kubʼ tbʼinchaʼn aju jaw tuʼjin. Jun techel tiʼj lu, aju bʼaj toj templo tej tzmatoq qʼiʼn 12 abʼqʼi tuʼn. Tej tok kybʼiʼn aj xnaqʼtzal te, e jaw «labʼin tiʼj ju tnabʼl ex tiʼj ju tzaqʼwebʼil» xi tqʼoʼn (Luc. 2:46, 47, 52).

3. ¿Tiʼ kʼelel qnikʼ tiʼj toj xnaqʼtzbʼil lu?

 ³ Ax ikx qe jaku tzʼok qojtzqiʼn Tyol Dios ex jaku tzʼok qkʼujlaʼn qa kukx ma qo uʼjin tiʼj. ¿Pero tiʼ jaku bʼant quʼn tuʼn tjatz qiʼn tbʼanel xnaqʼtzbʼil toj Biblia aj tjaw quʼjin? Tuʼn tel qnikʼ tiʼj tiʼ jaku bʼant quʼn, qo xnaqʼtzan tiʼjju tqʼama Jesús kye qeju ojtzqintoq Ley kyuʼn, ik tzeʼn qe escriba, qe fariseo ex qe saduceo. Maske naqʼli qe nejenel kye okslabʼil tuʼn tjaw kyuʼjin Tyol Dios, mintiʼtoq in jatz kyiʼn tbʼanel xnaqʼtzbʼil toj. Tuʼn tbʼant jlu, iltoq tiʼj tuʼn tbʼant oxe tiʼ kyuʼn aju kyaj tqʼamaʼn Jesús. ¿Alkyeqe? Tnejel, tuʼn tel kynikʼ tiʼjju in jaw kyuʼjin. Tkabʼin, tuʼn kykanet mas qʼinumabʼil kyuʼn toj Biblia. Ex toxin, tuʼn t-xi kyqʼoʼn ambʼil te Biblia tuʼn tonin kyiʼj. Ax ikx qe, jaku tzʼonin qiʼj aju kyaj tqʼamaʼn Jesús.

4. Ik tzeʼn in tzaj tqʼamaʼn Lucas 10:25 a 29, ¿tiʼ jaku bʼant quʼn aj quʼjin tiʼj Biblia?

⁴ Qaj tuʼn tel qnikʼ tiʼjju in jaw quʼjin toj Biblia, tuʼnju qa mintiʼ ma bʼant quʼn, mlay jatz qiʼn tbʼanel xnaqʼtzbʼil toj. Qo ximen tiʼj ambʼil tej tyolin Jesús tukʼil «jun chikʼbʼal tiʼj ley» (kjawil uʼjit Lucas 10:25-29). Tajtoq xjal tuʼn tok tbʼiʼn tiʼ tuʼn tbʼant tuʼn tuʼntzun tten tchwinqlal te jumajx. Tuʼn t-xi tqʼoʼn Jesús tzaqʼwebʼil tiʼj t-xjel, onin tiʼj tuʼn t-ximen tiʼj Tyol Dios. Xi tqʼamaʼn jlu te: «¿Alkye tzʼibʼan tuj ley? ¿Chi tok tuʼn ok in jaw t-schʼina?». Ajbʼen Tyol Dios tuʼn xjal tej t-xi ttzaqʼweʼn te Jesús tuʼnju xi tqʼamaʼn qa iltoq tiʼj tuʼn tok tkʼujlaʼn Dios ex qe xjal (Lev. 19:18; Deut. 6:5). Yajxitl xi tqanin xjal jlu te Jesús: «¿Alkyetzun ju wukʼile?». Kyuʼn yol lu jaku txi qqʼamaʼn qa mintiʼ el tnikʼ xjal tiʼjju otoq jaw tuʼjin. Tuʼntzunju, mintiʼtoq ojtzqiʼn tuʼn tzeʼn tuʼn tkubʼ tanqʼiʼn.

5. Qa nya jun rat ma jaw quʼjin Biblia ex qa ma qo naʼn Dios, ¿tzeʼn in nonin jlu qiʼj?

⁵ Tuʼn tel qnikʼ tiʼj Tyol Dios, il tiʼj tuʼn t-xi qbʼinchaʼn junjun tiʼchaq. Tnejel, bʼaʼn tuʼn qnaʼn Dios naʼmxtoq t-xi tzyet tuʼn quʼjin. ¿Tiquʼn? Tuʼnju mlay tzʼel qnikʼ tiʼj Biblia qa mintiʼ ma tzʼonin Jehová qiʼj, tuʼntzunju in xi qqanin xewbʼaj xjan te tuʼn tonin qiʼj tuʼn tok qqʼoʼn qwiʼ tiʼjju in jaw quʼjin. Tibʼajxi jlu in xi tzyet tuʼn quʼjin, pero nya jun rat tuʼn tjaw quʼjin, sino bʼaʼn tuʼn tjaw quʼjin chebʼe tuʼntzun tel qnikʼ tiʼj xnaqʼtzbʼil. Ax ikx, jaku tzʼonin qiʼj tuʼn tjaw quʼjin tukʼil tqʼajqʼajel qwiʼ moqa tuʼn tok qqʼoʼn audio akux in qo uʼjin. Kʼonil jlu qiʼj tuʼn tel qnikʼ tiʼj txʼolbʼabʼil, mas kjel toj qwiʼ ex kpol toj qanmi (Jos. 1:8). Aj qbʼaj uʼjin, bʼaʼn tuʼn qnaʼn Dios te Jehová tuʼn t-xi qqʼoʼn chjonte te tiʼj Tyol ex bʼaʼn tuʼn t-xi qqanin onbʼil te tuʼn tkubʼ qbʼinchaʼn aju otoq jaw quʼjin.

6. Aj quʼjin tiʼj Biblia, ¿tzeʼn in onin qiʼj aj qximin kyiʼj junjun xjel ex qa ma kubʼ qtzʼibʼin junjun tqanil? (Qʼonka twitza kyiʼj foto).

⁶ ¿Tiʼ mas jaku bʼant quʼn tuʼn tel qnikʼ tiʼjju in jaw quʼjin toj Biblia? Bʼaʼn tuʼn qximin kyiʼj junjun xjel at kyoklen tukʼil txʼolbʼabʼil. Jun techel, ¿alkyeqe xjal in yolin txʼolbʼabʼil tiʼj?, ¿alkye in yolin?, ¿alqukʼil in yolin ex tiquʼn?, ¿jatumel ex toj alkye ambʼil bʼaj tkyaqil jlu? In che onin xjel lu qiʼj tuʼn qximen ex tuʼn tok qʼoʼn qwiʼ kyiʼj xnaqʼtzbʼil mas nim kyoklen. Ax ikx jaku kubʼ qtzʼibʼen junjun tqanil chʼin kyqan. Qa ma bʼant jlu quʼn, in nonin qiʼj tuʼn tkanet ttxolil qe xnaqʼtzbʼil nim kyoklen quʼn. Ex kʼonil qiʼj tuʼn tel qnikʼ tiʼjju in jaw quʼjin ex tuʼn tkyaj toj qwiʼ. ¿Tiʼ jaku kubʼ qtzʼibʼin?  Jaku kubʼ qtzʼibʼen qe xjel, aju ma tzʼel qnikʼ tiʼj, qe xnaqʼtzbʼil mas nim kyoklen, tzeʼn jaku tzʼajbʼen quʼn aju ma jaw quʼjin moqa aju xkubʼ qnaʼn tiʼjju xjaw quʼjin. Qa ma txi qbʼinchaʼn qe tiʼchaq lu aj tjaw quʼjin Biblia, kbʼel qnaʼn qa a Jehová in yolin qukʼil.

7. ¿Tiʼ tqʼama Jesús tiʼjju tuʼn tjaw quʼjin Biblia ex tzeʼn jaku bʼant jlu quʼn? (Mateo 24:15).

⁷ Tqʼama Jesús qa nim toklen tuʼn tel qnikʼ tiʼj Biblia (kjawil uʼjit Mateo 24:15). Atz in yolin jlu tiʼjju tuʼn tel qnikʼ tiʼj tiʼ toklen jun xnaqʼtzbʼil tukʼil juntl ex tiquʼn junxitl jun twitz juntl. Ax ikx, at toklen jlu tukʼilju tuʼn qximin kyiʼj xnaqʼtzbʼil kwest tuʼn tel qnikʼ kyiʼj. Ex ik tzeʼn tqʼama Jesús, aj tel qnikʼ tiʼj jun xnaqʼtzbʼil, kʼonil jlu qiʼj tuʼn tel qnikʼ tiʼj qa in che japun kywi profecía tkuʼx toj Tyol Dios. Nim toklen tuʼn tbʼant jlu quʼn tuʼntzun tel qnikʼ tiʼj tkyaqilju in jaw quʼjin toj Biblia.

8. ¿Tiʼ jaku bʼant quʼn tuʼn tel qnikʼ tiʼj Biblia?

⁸ In nonin Jehová kyiʼj tmajen tuʼn tel kynikʼ kyiʼj xnaqʼtzbʼil. Tuʼntzunju, bʼaʼn tuʼn qnaʼn Dios ex qqaninx te tuʼn tonin qiʼj tuʼn tel qnikʼ kyiʼj xnaqʼtzbʼil (Prov. 2:6). Pero nya oʼkx qo naʼl Dios, sino il tiʼj tuʼn tok tilil quʼn tuʼn quʼjin chebʼe ex tuʼn qximen tiʼj tiʼ toklen aju in jaw quʼjin tukʼilju ya ojtzqiʼn quʼn. Ateʼ nim uʼj jaku che onin qiʼj tuʼn tbʼant jlu quʼn ik tzeʼn Onbʼil tuʼn kyxnaqʼtzan testigos de Jehová. Qa ma txi qjyoʼn tqanil kyoj uʼj lu, kʼelel qnikʼ kyiʼj txʼolbʼabʼil ex tzeʼn kxel qbʼinchaʼn aju in nel qnikʼ tiʼj (Heb. 5:14). Qa ma qo ximen tiʼjju in jaw quʼjin toj Biblia, kʼelel mas qnikʼ tiʼj.

9. ¿Alkye xnaqʼtzbʼil mintiʼ ok qeʼ kykʼuʼj saduceo tiʼj?

⁹ Maske ojtzqiʼntoq kyuʼn saduceo qe tnejel jweʼ libro kubʼ tzʼibʼin toj Tyol Dios  toj yol hebreo, mintiʼ japun qe xnaqʼtzbʼil nim kyoklen kyuʼn. Jun techel, ximana tiʼjju xi tqʼamaʼn Jesús kye saduceo tej t-xi kyqanin xjel te tiʼjju qa che kjawil anqʼin kyimni. Xi tqanin Jesús jlu kye: «¿Bʼajxpe jaw kyschʼiʼne tuj tuʼjil Moisés tzaʼn tten kubʼ tyekʼun tibʼ Dios tiʼj jun chʼiʼx in kʼant, tuʼn tyolin tukʼil Moisés? Chi Dios: Aqine Tdios Abraham ex Tdios Isaac ex Tdios Jacob» (Mar. 12:18, 26). Nimlo maj jaw kyuʼjin saduceo txʼolbʼabʼil lu, pero tej t-xi tqanin Jesús xjel kye, el nikʼbʼaj tiʼj qa mintiʼ ok qeʼ kykʼuʼj tiʼj xnaqʼtzbʼil qa che jawil anqʼin kyimni (Mar. 12:27; Luc. 20:38). d

10. ¿Alqiʼj bʼaʼn tuʼn tok qqʼoʼn qwiʼ aj quʼjin tiʼj Tyol Dios?

¹⁰ ¿Tiʼ xnaqʼtzbʼil jaku tzʼel qiʼn tiʼj? Aj tjaw quʼjin Tyol Dios, bʼaʼn tuʼn tok qqʼoʼn qwiʼ kyiʼj xnaqʼtzbʼil jaku tzʼel qiʼn tiʼj jun versículo moqa tiʼj jun txʼolbʼabʼil. Nya oʼkx tuʼn t-xi qjyoʼn qe xnaqʼtzbʼil jun rat jaku tzʼel qnikʼ kyiʼj, sino nim toklen tuʼn tel qnikʼ kyiʼj xnaqʼtzbʼil kwest. Ex in che ok ik tzeʼn jun qʼinumabʼil tuʼnju nya fácil tuʼn tel qnikʼ kyiʼj.

11. Ik tzeʼn in tzaj tqʼamaʼn 2 Timoteo 3:16 ex 17, ¿tzeʼn jaku che kanet mas qʼinumabʼil quʼn toj Tyol Dios?

¹¹ ¿Tzeʼn jaku che kanet qʼinumabʼil toj Biblia quʼn? Qo xnaqʼtzan tiʼjju in tzaj qʼamaʼn toj 2 Timoteo 3:16 ex 17 (uʼjinktza). Jatumel in tzaj qʼamaʼn qa «tkyaqil aju tzʼibʼan tuj Tuʼjil, […] at tajbʼen» tuʼn qtzaj xnaqʼtzaʼn, tuʼn qtzaj kawin, tuʼn t-xi tjikumaʼn tiʼj qnabʼil ex tuʼn ttzaj yekʼin qbʼe. Axpe ikx kyoj qe libro te Biblia mintiʼxix in che ajbʼen quʼn, jaku che onin qiʼj kyoj kyaje tumel ma qo yolin tiʼj. Qo ximen tiʼjju in jaw quʼjin tuʼntzun tel qnikʼ tiʼj tiʼ in tzaj t-xnaqʼtzaʼn qe tiʼj Jehová, tiʼj t-ximbʼetz moqa kyiʼj nabʼil ateʼ toj Biblia. Tuʼn qtzaj kawin tuʼn jun txʼolbʼabʼil, ¿tiʼ jaku bʼant quʼn? Bʼaʼn tuʼn qximin tiʼj qa at jun tiʼ o qo naqʼet tiʼj, qa at jun nya bʼaʼn qmod moqa tuʼn qximin tiʼj tzeʼn jaku tzʼonin qiʼj tuʼn kukx qajbʼen te Jehová. Ax ikx, bʼaʼn tuʼn qximan tiʼj alkye tten jaku tzaj jikumaʼn tiʼj qnabʼil tuʼn jun txʼolbʼabʼil, bʼalo at toklen lu tukʼil jun tiʼ in tzaj qʼamaʼn qe toj pakbʼabʼil. ¿Ex tiʼ jaku bʼant quʼn tuʼn ttzaj yekʼin qbʼe tuʼn jun txʼolbʼabʼil? Bʼaʼn tuʼn qjyon tiʼj jun tiʼ jaku tzʼonin qiʼj tuʼn tten qximbʼetz ik tzeʼn te Jehová. Qa ma txi qbʼinchaʼn qe kyaje tiʼchaq lu, jaku che kanet mas qʼinumabʼil quʼn toj Tyol Dios.

12. ¿Tiquʼn xi tqanin Jesús kye fariseo qa naʼmxtoq tjaw kyuʼjin aju in tzaj tqʼamaʼn Tyol Dios?

¹² In kubʼtoq kyyekʼin fariseo nya bʼaʼn kymod tej tjaw kyuʼjin Tyol Dios. El  nikʼbʼaj tiʼj jlu tej t-xi tqanin Jesús kye qa naʼmxtoq tjaw kyuʼjin aju in tzaj tqʼamaʼn (Mat. 12:1-7). e Toj ambʼil aju, xi kyqʼamaʼn fariseo te Jesús qa mintiʼtoq in xi kybʼiʼn t-xnaqʼtzbʼen aju ley tiʼj qʼij sábado. Tuʼn t-xi ttzaqʼweʼn Jesús aju tzaj kyqʼamaʼn, ajbʼen kabʼe techel tuʼn ex xi tqʼamaʼn jun versículo tkuʼx toj uʼj te Oseas kye. Iktzun tten kubʼ tyekʼin qa mintiʼtoq in nel kynikʼ tiʼjju in tzaj qʼamaʼn toj ley ex qa mintiʼ kubʼ kyyekʼin qʼaqʼbʼil kykʼuʼj. In jawtoq kyuʼjin fariseo Tyol Dios, pero mintiʼtoq in nonin kyiʼj. ¿Tiquʼn? Tuʼnju in jawtoq kyniman kyibʼ ex oʼkxtoq in najbʼen Tyol Dios kyuʼn tuʼn kyyolin nya bʼaʼn kyiʼj txqantl. Tuʼntzunju, mintiʼ el kynikʼ tiʼjju jaw kyuʼjin (Mat. 23:23; Juan 5:39, 40).

13. ¿Tiʼ qmod ktel aj tjaw quʼjin Biblia ex tiquʼn?

¹³ Aju xi tqʼamaʼn Jesús kye fariseo, in tzaj tyekʼin qe qa il tiʼj tuʼn tjaw quʼjin Biblia tukʼil tbʼanel qmod. Miʼn qo ok ik tzeʼn kye fariseo, sino bʼaʼn tuʼn tkubʼ qin qibʼ ex qqʼonx ambʼil te Jehová tuʼn qtzaj t-xnaqʼtzaʼn. In tzaj tqʼamaʼn Santiago 1:21 jlu: «Che oke mans, tuʼn kykʼmonteye ju yol [...] porke at tipumal ju yol lu tuʼn tklet kyanmiye». Qa mans qoʼ, kxel qqʼoʼn ambʼil tuʼn qchʼexpaj tuʼn Tyol Dios. Aj tjaw quʼjin Biblia, mintiʼ tuʼn tjaw qnimsan qibʼ nix tuʼn qximin tiʼj kypaltil txqantl. Qa ma bʼant jlu quʼn, kxel qqʼoʼn ambʼil te Biblia tuʼn tonin qiʼj tuʼn tkubʼ qyekʼin qʼaqʼbʼil qkʼuʼj ex qkʼujlabʼil.

14. ¿Tzeʼn jaku tzʼel qnikʼ tiʼj qa in xi qqʼoʼn ambʼil te Biblia tuʼn tonin qiʼj? (Qʼonka twitza kyiʼj foto).

¹⁴ In kubʼ qyekʼin tukʼil qmod qa in xi qqʼoʼn ambʼil te Tyol Dios tuʼn tonin qiʼj. Tuʼnju mintiʼ xi kyqʼoʼn fariseo ambʼil te Tyol Dios, kubʼ kyqʼoʼn kysentens qeju  mintiʼ kyil (Mat. 12:7). Tuʼntzunju, bʼaʼn tuʼn tel qnikʼ tiʼj tiʼ qximbʼetz ex tiʼ qmod in kubʼ qyekʼin kyiʼj txqantl. Jun techel, ¿in nokpe tilil quʼn tuʼn qyolin tiʼj tbʼanel kymod txqantl moqa mas in qo yolin tiʼj nya bʼaʼn kymod? ¿In kubʼpe qnajsaʼn kyil txqantl moqa in qo yolin nya bʼaʼn kyiʼj ex in xi qkʼuʼn qʼoj? Kyukʼil tzaqʼwebʼil kxel qqʼoʼn kyiʼj xjel lu, kʼelel qnikʼ tiʼj qa in xi qqʼoʼn ambʼil te Tyol Dios tuʼn tonin tiʼj qximbʼetz, tiʼjju in kubʼ qnaʼn ex tiʼjju in bʼant quʼn (1 Tim. 4:12, 15; Heb. 4:12).

15. ¿Tiʼ kubʼ tnaʼn Jesús tiʼj Tyol Dios?

¹⁵ Ok tkʼujlaʼn Jesús Tyol Dios. Kyaj qʼamaʼn toj Salmo 40:8 jniʼ tkʼujlalil Jesús tuʼn tten tiʼj Biblia, kyaj qʼamaʼn jlu: «Nman Dios, in chin tzalaje tuʼn tbʼant tajbʼila; aju t-xnaqʼtzbʼila kʼuʼn wuʼne tuj wanmiye». Tuʼnju ok tkʼujlaʼn Jesús Tyol Dios, tzalaj toj tanqʼibʼil ex onin tiʼj tuʼn kukx tajbʼen te Jehová. Ax jlu kbʼajel qiʼj qa ma tzʼok tilil quʼn tuʼn tjaw quʼjin Biblia ex qa ma tzʼok qkʼujlaʼn (Sal. 1:1-3).

16. ¿Tiʼ taja tuʼn tbʼant tuʼna tuʼntzun tonin Biblia tiʼja aj tjaw tuʼjina? (Qʼonka twitza tiʼj recuadro « In che onin tyol Jesús qiʼj tuʼn tel qnikʼ tiʼjju in jaw quʼjin»).

¹⁶ In che onin tyol Jesús ex techel kyaj tqʼoʼn tuʼn tok tilil quʼn tuʼn tjaw quʼjin Tyol Dios toj tumel ex tuʼn qxnaqʼtzan tiʼj. Tuʼn telxix qnikʼ tiʼjju in jaw quʼjin, qo naʼn Dios te Jehová, chebʼe qo uʼjin, qo ximen kyiʼj junjun xjel ex bʼaʼn tuʼn tkubʼ qtzʼibʼin junjun tqanil. Ax ikx, bʼaʼn tuʼn qximin kyiʼj txʼolbʼabʼil ex bʼaʼn tuʼn t-xi qjyoʼn mas tqanil kyoj uʼj o che etz tuʼn ttnam Jehová. Ex tuʼn tok qojtzqiʼn mas Tyol Dios, bʼaʼn tuʼn t-xi qjyoʼn qe qʼinumabʼil ewin ateʼ, axpe ikx kyoj txʼolbʼabʼil mintiʼxix ojtzqiʼn quʼn. Bʼaʼn tuʼn tten tbʼanel qmod aj tjaw quʼjin Tyol Dios tuʼntzun tonin qiʼj. Qa ma bʼant jlu quʼn, kʼonil Tyol Dios qiʼj ex qo okel laqʼeʼ mas ttxlaj Jehová (Sal. 119:17, 18; Sant. 4:8).