1. ¿Tiʼ xi tqʼamaʼn Jesús kye t-xnaqʼtzbʼen tiʼj ambʼil tuʼn tul xitbʼil ex alkye consej xi tqʼoʼn kye?

 TEJ atxtoq junjun qʼij tuʼn tkyim Jesús, xi kyqanin t-xnaqʼtzbʼen te alkyeqe señ tuʼn kyul «chʼixtoq tjapun bʼaj tqʼijlalil» (Mat. 24:3). Kubʼlo kyximen t-xnaqʼtzbʼen Jesús tzeʼn jakutoq tzʼel kynikʼ tiʼj qa otoq pon ambʼil tuʼn tkubʼ xiten tnam Jerusalén. Tej t-xi ttzaqʼweʼn Jesús kye, nya oʼkx yolin tiʼj ambʼil tuʼn tkubʼ xiten tnam Jerusalén, sino ax ikx yolin tiʼj ambʼil «chʼixtoq tjapun bʼaj tqʼijlalil». Tej tyolin Jesús tiʼj ambʼil tuʼn tul xitbʼil, tqʼama jlu: «Ex mi aʼl jun bʼilte alkye qʼij ex alkye or tuʼn wule; mi qe anjel ateʼ tuj kyaʼj mintiʼ bʼiʼn kyuʼn, ax ikx weye Tkʼwaʼl Dios qine mintiʼ bʼiʼn wuʼne. Oʼkx te Dios Mambʼaj bʼaʼn tuʼn». Yajxitl, xi tqʼoʼn consej lu kye: «Che xqʼuqine» (Mar. 13:32-37).

2. ¿Tiquʼn iltoq tiʼj tuʼn tok kyqʼoʼn okslal te tnejel syent abʼqʼi kywitz tiʼj tkyaqilju bʼaj kyxol judiy?

² Toj tnejel syent abʼqʼi, iltoq tiʼj tuʼn tok tilil kyuʼn tnejel okslal judiy tuʼn tok kyqʼoʼn kywiʼ tiʼj tkyaqilju in bʼaj. Jakutoq che klet qa ma bʼant jlu kyuʼn. Xi tqʼamaʼn Jesús kye t-xnaqʼtzbʼen alqiʼj tuʼn tok kyqʼoʼn kywitz tuʼntzun tel kynikʼ tiʼj qa chʼinxtoq tkubʼ xiten tnam Jerusalén. Xi tqʼamaʼn jlu kye: «Ok kylonteye ok t-xi kytxolbʼan kyibʼ soldad tiʼjele tnam Jerusalén, tzʼelxtzun kynikʼe tiʼj ya ma pon qʼij tuʼn tkubʼ xitj tnam». Ex toj ambʼil aju, iltoq tiʼj tuʼn kyxi oq twi witz ik tzeʼn otoq kyaj tqʼamaʼn Jesús kye (Luc. 21:20, 21). Kykyaqil qeju i ex oq ik tzeʼn otoq tqʼama Jesús, e klet tej naʼmxtoq tok kytxolbʼan kyibʼ soldad tiʼj tnam Jerusalén.

3. ¿Tiʼ kʼelel qnikʼ tiʼj toj xnaqʼtzbʼil lu?

 ³ Ax ikx qe, in qo anqʼin kyoj bʼajsbʼil tqʼijlalil. Tuʼntzunju, nim toklen tuʼn tten qnabʼil ex bʼaʼn tuʼn tok qqʼoʼn qwitz tiʼjju in bʼaj ik tzeʼn bʼant kyuʼn tnejel okslal. Toj xnaqʼtzbʼil lu, kʼelel qnikʼ tiʼj tiʼ jaku bʼant quʼn tuʼn tten qximbʼetz toj tumel tiʼj tkyaqilju in bʼaj twitz Txʼotxʼ. Ex qo yolil tiʼj tzeʼn tuʼn tok qxqʼuqin qibʼ ex tzeʼn jaku tzʼajbʼen ambʼil quʼn toj tumel.

4. ¿Tiquʼn bʼaʼn tuʼn tok qqʼoʼn qwiʼ tiʼj tkyaqilju in bʼaj?

⁴ At nim tiquʼn tuʼn tok qqʼoʼn qwiʼ tiʼj alkye tten in japun kywi profecía kyuʼn tiʼchaq in che bʼaj. Jun techel, yolin Jesús kyiʼj nim tiʼchaq ex in che onin qiʼj tuʼn tel qnikʼ tiʼj qa chʼinx tkubʼ najsaʼn tkyaqilju tokx tjaqʼ tkawbʼil Satanás (Mat. 24:3-14). Ax ikx, tqʼama apóstol Pedro tuʼn tok qqʼoʼn qwiʼ tiʼj alkye tten in japun kywi profecía tuʼntzun miʼn tnaj qʼuqbʼil qkʼuʼj (2 Ped. 1:19-21). Ex in xi tzyet mankbʼil libro tkuʼx toj Biblia kyukʼil yol lu: «Aju tzʼibʼan tuj uʼj lu, atzunju tzaj tchikʼbʼaʼn Jesucrist. Tkyaqil jlu tzaj tmaʼn Dios te tuʼn t-xi tchikʼbʼaʼn kye tmajen tkyaqilju at tuʼn tul naj» (Apoc. 1:1). Tuʼntzunju, qaj tuʼn tel qnikʼ tiʼj tkyaqilju in bʼaj twitz Txʼotxʼ ex tzeʼn in japun kywi profecía kyuʼn. Axlo ikx, qgan tuʼn qyolin tiʼj jlu kyukʼil erman.

5. ¿Tiʼ il tiʼj tuʼn tok qxqʼuqin qibʼ tiʼj aj qyolin kyiʼj profecía ex tiʼ il tiʼj tuʼn tbʼant quʼn? (Qʼonka twitza kyiʼj foto).

⁵ Aj qyolin tiʼj tzeʼn in japun kywi profecía, nim toklen tuʼn tok qxqʼuqin qibʼ. ¿Tiquʼn? Tuʼnju nya qaj tuʼn t-xi qqʼamaʼn qex qximbʼetz ex nya qaj tuʼn tnaj mujbʼabʼil qxol toj congregación. Jun techel, jakulo tzʼok qbʼiʼn aj ttzaj kyqʼamaʼn gobierno tiʼ kbʼantel kyuʼn tuʼn t-xi kybʼinchaʼn tiʼj jun nya bʼaʼn tuʼntzun tten mujbʼabʼil ex tuʼn kytzalaj xjal. Toj ambʼil lu, mintiʼ tuʼn qok ten ximel tiʼj qa ya in japun twi profecía tkuʼx toj 1 Tesalonicenses 5:3, sino mas bʼaʼn tuʼn tok qqʼoʼn qwiʼ tiʼj akʼaj tqanil in netz qʼamaʼn tuʼn ttnam Jehová. Qa atz in jatz tkyaqilju in xi qqʼamaʼn kyoj uʼj in che etz tuʼn ttnam Jehová, kʼonil qiʼj tuʼn tten mujbʼabʼil qxol ex tuʼn tten junx qximbʼetz (1 Cor. 1:10; 4:6).

6. ¿Tiʼ xnaqʼtzbʼil jaku tzʼel qiʼn tiʼjju in tzaj qʼamaʼn toj 2 Pedro 3:11 a 13?

⁶ (Kjawil uʼjit 2 Pedro 3:11-13). In nonin apóstol Pedro qiʼj tuʼn tten qximbʼetz toj tumel aj qxnaqʼtzan kyiʼj profecía ateʼ toj Biblia. Ax ikx, tqʼama qa bʼaʼn tuʼn qayon «tiʼj tqʼijlalil ok tul Dios». ¿Tiquʼn? Nya tuʼnju qaj tuʼn tel qnikʼ tiʼj «alkye qʼij ex alkye or» tzul Armagedón tuʼn Jehová. Sino qaj tuʼn tajbʼen ambʼil quʼn toj tumel ex tuʼn qnimen te (Mat. 24:36; Luc. 12:40). Toj juntl yol, qaj tuʼn qanqʼin ex qaj tuʼn t-xi qbʼinchaʼn qe tiʼchaq toj tumel tuʼnju kʼujlaʼn Jehová quʼn. Tuʼn tbʼant jlu quʼn, il tiʼj tuʼn tok qxqʼuqin qibʼ.

7. ¿Tiʼ kbʼantel quʼn tuʼn tok qxqʼuqin qibʼ? (Lucas 21:34).

⁷ Nya oʼkx xi tqʼamaʼn Jesús kye t-xnaqʼtzbʼen tuʼn tok kyqʼoʼn kywiʼ tiʼjju in bʼaj twitz Txʼotxʼ, sino ax ikx tuʼn tok kyxqʼuqin kyibʼ. Atzun jlu tqʼama tej t-xi tqʼoʼn kawbʼil kye toj Lucas 21:34 (uʼjinktza). Qo ximen tiʼj tej tqʼama  Jesús jlu: «Ten kykwente kyiʼje». ¿Tiʼ t-xilen jlu? Atz in yolin tiʼjju tuʼn qximen tiʼj alkyeqe tiʼchaq jaku naj qamiwbʼil tukʼil Jehová kyuʼn ex tuʼn qel oq kyiʼj. Iktzun tten kukx qo tel toj tkʼujlabʼil Dios (Prov. 22:3; Jud. 20, 21).

8. ¿Alkye consej xi tqʼoʼn Pablo kye okslal?

⁸ Xi tqʼamaʼn apóstol Pablo kye okslal tuʼn tok kyxqʼuqin kyibʼ. Jun techel, xi tqʼamaʼn jlu kye okslal te Éfeso: «Miʼn che bʼete mintiʼ kynabʼle, noq oʼkx tuʼn tten kynabʼle» (Efes. 5:15, 16). In nok tilil tuʼn Satanás tuʼn tnaj qamiwbʼil tukʼil Jehová. Tuʼntzunju, in tzaj tqʼamaʼn Tyol Dios qe tuʼn kukx tok tilil quʼn tuʼn tel qnikʼ tiʼj «alkyeju tajbʼil Qajaw» ex iktzun tten mlay kubʼ qiʼj tuʼn Satanás (Efes. 5:17).

9. ¿Tzeʼn jaku tzʼel qnikʼ tiʼj alkye tajbʼil Jehová?

⁹ Mintiʼ in tzaj tqʼamaʼn Biblia tkyaqil tiʼchaq jaku tzaj tiʼn nya bʼaʼn tiʼj qamiwbʼil tukʼil Jehová. Nya tkyaqil maj in tzaj tqʼoʼn Biblia jun kawbʼil tiʼjju in kubʼ qximen tuʼn tbʼant quʼn. Tuʼntzunju, il tiʼj tuʼn tel qnikʼ tiʼj alkye tajbʼil Jehová. ¿Tzeʼn jaku bʼant jlu quʼn? Kbʼantel quʼn aj quʼjin tiʼj Tyol ex aj tel qpaʼn ambʼil tuʼn qximen tiʼj tkyaqil qʼij. Qa mas ma tzʼel qnikʼ tiʼj alkye tajbʼil Jehová ex qa ma ten qximbʼetz ik tzeʼn te Cristo, kʼonil qiʼj tuʼn tten qnabʼil, axpe ikx qa mintiʼ in tzaj qʼamaʼn jun kawbʼil tiʼjju kbʼantel quʼn (1 Cor. 2:14-16). Noqtzun tuʼnj, ateʼ junjun nya bʼaʼn jun rat in nel qnikʼ kyiʼj, atzun junjuntl mas kwest in nel qnikʼ kyiʼj.

10. ¿Alkye junjun nya bʼaʼn il tiʼj tuʼn tel qikʼun?

¹⁰ Kyxol qe tiʼchaq il tiʼj tuʼn tel qikʼun ateʼ qe jlu: mintiʼ tuʼn t-xi qkʼaʼn nim qʼeʼn nix tuʼn t-xi qwaʼn nim wabʼj, mintiʼ tuʼn t-xi qqʼamaʼn jun yol jaku tzaj kybʼis txqantl tuʼn, mintiʼ tuʼn tok qkeʼyin qe tiʼchaq at bʼiybʼel kyoj moqa pornografía ex mintiʼ tuʼn qcoquetearin (Sal. 101:3). Kukx in nok tilil tuʼn Satanás tuʼn tnaj qamiwbʼil tukʼil Jehová tuʼnju in qʼojin qiʼj (1 Ped. 5:8). Qa mintiʼ ma tzʼok qxqʼuqin qibʼ, jaku tzaj txʼaʼl tiʼj qkʼuʼj, jaku qo sbʼun, jaku pon qkʼuʼj kyiʼj nim tiʼchaq, jaku jaw qnimsan qibʼ ex jaku txi qkʼuʼn qʼoj (Gál. 5:19-21). Tnejel, nyalo qʼanchaʼl qa at jun nya bʼaʼn qmod, pero qa mintiʼ ma jatz qxbʼoqin toj qanmi, jaku tzʼok ik tzeʼn jun kʼul qʼiʼn veneno tuʼn (Sant. 1:14, 15).

11. ¿Alkye jun nya bʼaʼn kwest tuʼn tel qnikʼ tiʼj ex tiquʼn il tiʼj tuʼn qel oq tiʼj?

¹¹ Qo yolin tiʼj jun nya bʼaʼn kwest tuʼn tel qnikʼ tiʼj ik tzeʼn aj tok qamiwen qibʼ kyukʼil nya bʼaʼn amiw. Qo ximen tiʼj qa at jun qukʼil toj aqʼuntl nya testigo de Jehová. Tuʼnju qaj tuʼn miʼn tyolin nya bʼaʼn kyiʼj testigo de Jehová, in kubʼ qyekʼin tbʼanel qmod tukʼil ex in xi qbʼinchaʼn xtalbʼil te. Bʼalo jaku qo wan tukʼil xjal junjun maj, pero aj tikʼ ambʼil in bʼant quʼn tkyaqil qʼij. At maj in yolin tiʼj yaẍbʼil ex in kubʼ qnaʼn nya bʼaʼn tuʼn jlu ex in nok qxqʼuqin qibʼ. Ajtzun tikʼ mas ambʼil, ya mintiʼ in kubʼ qnaʼn nya bʼaʼn aj qyolin tukʼil. Jun qʼij, in tzaj tqʼamaʼn qe tuʼn qxiʼ wal tukʼil aj qel toj aqʼuntl ex in xi qqʼamaʼn qa bʼaʼn. Toj ambʼil lu, ya in qo ximen ik tzeʼn te. Ax tok, in kubʼ qyekʼin tbʼanel qmod kyukʼil txqantl ex in qo respetarin kye. Pero bʼaʼn tuʼn ttzaj qnaʼn qa jaku tzʼel qkanoʼn kymod xjal in nok qmojbʼan qibʼ kyukʼil (1 Cor. 15:33). Qa ma txi qbʼiʼn aju tqʼama Jesús ex qa ma tzʼok qxqʼuqin qibʼ, mlay qo ten nim  ambʼil kyukʼil xjal mintiʼ in che ajbʼen te Jehová (2 Cor. 6:15). Ex kʼonil jlu qiʼj tuʼn tel qnikʼ tiʼj alkye nya bʼaʼn jaku qo ok weʼ twitz ex qo elel oq tiʼj.

12. ¿Tiʼtoq tuʼn tbʼant kyuʼn t-xnaqʼtzbʼen Jesús akux in che ayon tiʼj ambʼil tuʼn tkubʼ xiten tnam Jerusalén?

¹² Akux in che ayon t-xnaqʼtzbʼen Jesús tiʼj ambʼil tuʼn tkubʼ xiten tnam Jerusalén, ¿noqpe e kubʼ qeʼ? Miʼn, tuʼnju xi qʼoʼn jun kyaqʼun tuʼn Jesús ex xi tqʼamaʼn kye tuʼn kypakbʼan «tuj tnam Jerusalén, tuj tkyaqil txʼotxʼ Judea, tuj txʼotxʼ Samaria, ex tuj tkyaqil twitz txʼotxʼ» (Hech. 1:6-8). Attoq nim aqʼuntl tuʼn tbʼant kyuʼn. Pero qa ma tzʼok kyqʼoʼn kywiʼ tiʼj pakbʼabʼil, kʼajbʼel ambʼil kyuʼn toj tumel.

13. ¿Tiquʼn il tiʼj tuʼn tajbʼen ambʼil quʼn toj tumel? (Colosenses 4:5).

¹³ (Kjawil uʼjit Colosenses 4:5). Tuʼn tok qxqʼuqin qibʼ, bʼaʼn tuʼn qximen tiʼj tzeʼn in najbʼen ambʼil quʼn. Ex ik tzeʼn in tzaj tqʼamaʼn Eclesiastés 9:12, «noq minabʼen in tzaj mya bʼaʼn» qiʼj. Axpe ikx, noq minabʼen jaku qo kyim.

14, 15. ¿Tiʼ jaku bʼant quʼn tuʼn tajbʼen ambʼil quʼn toj tumel? (Hebreos 6:11, 12; qʼonka twitza tiʼj foto).

¹⁴ Jaku tzʼajbʼen ambʼil quʼn toj tumel qa ma txi qbʼinchaʼn tajbʼil Jehová ex qa ma  tzʼok tilil quʼn tuʼn tchʼiy qamiwbʼil tukʼil (Juan 14:21). Bʼaʼn tuʼn t-xi qbʼiʼn consej lu: «Che weʼxixe, miʼn che yukche, kukx che aqʼnane tuj taqʼun Qajaw» (1 Cor. 15:58). Qa ma bʼant jlu quʼn, mlay tzaj qbʼis aj tul xitbʼil moqa aj qok weʼ twitz kamik tuʼnju otoq tzʼok tilil quʼn tuʼn qajbʼen te Jehová (Mat. 24:13; Rom. 14:8).

¹⁵ Ik tzeʼn kyaj tqʼamaʼn Jesús, kukx in nonin kyiʼj t-xnaqʼtzbʼen tuʼn kypakbʼan tbʼanel tqanil tiʼj Tkawbʼil Dios twitz tkyaqil Txʼotxʼ. In najbʼen ttnam Jehová tuʼn Jesús tuʼn ttzaj tyekʼin qe tzeʼn tuʼn qpakbʼan tiʼj tbʼanel tqanil ex in che tzaj tqʼoʼn onbʼil qe (Mat. 28:18-20). Atzun qe bʼaʼn tuʼn qpakbʼan, bʼaʼn tuʼn tok tilil quʼn tuʼn qqʼon xnaqʼtzbʼil ex bʼaʼn tuʼn tok qxqʼuqin qibʼ akux in qo ayon tiʼj ambʼil tuʼn tkubʼ t-xiten Jehová tkyaqil nya bʼaʼn. Qa ma txi qbʼiʼn consej tkuʼx toj Hebreos 6:11 ex 12 (uʼjinktza), kʼonil qiʼj tuʼn miʼn tnaj qʼuqbʼil qkʼuʼj akux in pon ambʼil tuʼn tul xitbʼil.

16. ¿Tiʼ qaj tuʼn tbʼant quʼn?

¹⁶ Ya o bʼaj t-ximen Jehová toj alkye ambʼil kbʼel t-xiten tkyaqilju tokx tjaqʼ tkawbʼil Satanás. Aj tpon qʼij lu, kjapunel kywi kykyaqil profecía in kanet quʼn toj Biblia. Atlo maj jaku kubʼ qximen qa kxel tiʼn mas ambʼil tuʼn tul xitbʼil, pero «mlay tzikʼx tiʼj» (Hab. 2:3). Akux in pon ambʼil lu, qaj tuʼn t-xi qbʼiʼn aju in tzaj tqʼamaʼn Miqueas 7:7: «Chin ayole tiʼj Qman; kʼokel qeʼ nkʼuʼje tiʼj Dios aju Klol weye».