Maske ikju, taj Jehová tuʼn tten qpasens ex tuʼn qayon tiʼj or o kubʼ t-ximen tuʼn tel tiʼn tkyaqil nya bʼaʼn. ¿Tiquʼn taj Jehová tuʼn kukx qayon? ¿Ex tiʼ jaku tzʼonin qiʼj tuʼn kukx qtzalaj akux in qo ayon?

¿TIQUʼN TAJ JEHOVÁ TUʼN KUKX QAYON?

In tzaj tqʼamaʼn Biblia jlu: «Kyjaʼtzun in ayon Qman kyiʼje tuʼn ttzaj qʼaqʼan tkʼuʼj kyiʼje, ex nimxix tajbʼil tuʼn t-xi tyekʼin tkʼujlalil kyeye, porke ate Qman jun Dios tzʼaqlxix. At nim tzalajbʼil kye kykyaqil qeju in qeʼ kykʼuʼj tiʼj» (Is. 30:18). Xi ttzʼibʼin Isaías qe yol lu kye xjal judiy mintiʼ xi kybʼiʼn tyol Jehová (Is. 30:1). Pero toj ambʼil aju, ateʼtoq junjun xjal judiy kukx e nimen te Jehová. Kyuʼn tyol Isaías, xi tqʼoʼn jun qʼuqbʼil kykʼuʼj xjal lu. Ax ikx qe, jaku tzaj qʼuqbʼaʼn qkʼuʼj tuʼn.

Qa ikju, ¿tiquʼntzun il tiʼj tuʼn tten qpasens? Tuʼnju ax ikx te Jehová kukx in kubʼ tyekʼin tpasens. Ya ximen tuʼn Jehová alkye qʼij ex or tuʼn tel tiʼn tkyaqil nya bʼaʼn ex in nayon tuʼn tpon ambʼil lu (Mat. 24:36). Aj tpon qʼij aju, kʼelel toj qʼanchaʼl qa nya ax tok aju o tqʼama Satanás tiʼj Jehová ex kyiʼj tmajen. Ex toj ambʼil lu, kbʼel tnajsaʼn Jehová Satanás ex kykyaqil qeju in che ok lepeʼ tiʼj. Pero o tzaj ttziyen Jehová kye tmajen qa tzul qʼaqʼin tkʼuʼj kyiʼj.

Mlaylo tzʼel tiʼn Jehová qe nya bʼaʼn in che tzaj qiʼj akux in qo ayon tuʼn t-xi tbʼinchaʼn kyiʼj. Pero in tzaj ttziyen qe qa jaku qo tzalaj. Tuʼntzunju, jaku qo tzalaj akux in qo ayon kyiʼj tbʼanel tiʼchaq, ik tzeʼn tqʼama Isaías (Is. 30:18). a ¿Tiʼ jaku tzʼonin qiʼj tuʼn qtzalaj? Qo xnaqʼtzan tiʼj kyaje tiʼ jaku bʼant quʼn.

¿TZEʼN JAKU QO TZALAJ AKUX IN QO AYON?

Qqʼonk qwiʼ kyiʼj tbʼanel tiʼchaq. Akux in nanqʼin David, ok tqʼoʼn twitz tiʼj nim nya bʼaʼn (Sal. 37:35). Maske ikju, kubʼ ttzʼibʼin jlu: «Txulekuya twitz Qman ex noq ayona tiʼj ok tul onil teya. Miʼn tzaj txʼaʼl tkʼuʼja tiʼj ju xjal jurat in jaw tiʼn naj tipun, ex mi tiʼj ju xjal in kubʼ t-ximan tuʼn tbʼinchante mya bʼaʼn» (Sal. 37:7). Ax David xi bʼinte consej lu. ¿Tzeʼn bʼant jlu tuʼn? Tnejel, ok tqʼoʼn twiʼ tiʼjju xi ttziyen Jehová te qa kkletel tuʼn. Tkabʼin, ok tqʼoʼn toklen tkyaqilju tbʼanel tiʼchaq xi tqʼoʼn Jehová te (Sal. 40:5). Ax ikx  qe, qa ma tzʼok qqʼoʼn qwiʼ kyiʼj tbʼanel tiʼchaq in che ikʼ toj qchwinqlal ex nya kyiʼj nya bʼaʼn, mas nya kwest kʼelel toj qwitz tuʼn kukx qayon tiʼj ambʼil tuʼn tel tiʼn Jehová tkyaqil nya bʼaʼn.

Tzʼajbʼenx tkyaqil ambʼil quʼn tuʼn tjaw qnimsaʼn Jehová. Xi tqʼamaʼn aj tzʼibʼil tiʼj Salmo 71 jlu te Jehová ex bʼalo a David kubʼ tzʼibinte: «Atzun weye kukx chin ayole tiʼja, ex kukx kjawil nnimsaʼna» (Sal. 71:14). ¿Tiʼ bʼant tuʼn David tuʼn tjaw tnimsaʼn Jehová? Yolin tiʼj Jehová kyukʼil txqantl ex jaw tnimsaʼn tbʼi kyukʼil bʼitz (Sal. 71:​16, 23). Ax ikx qe, jaku jaw qnimsaʼn Jehová ik tzeʼn bʼant tuʼn David. Jaku bʼant jlu quʼn aj qpakbʼan, aj qyolin tiʼj Jehová kyukʼil toj qja ex qe qamiw ex aj qbʼitzin. Tuʼntzunju, toj juntl maj aj tbʼitzina kyiʼj bʼitz in che etz tuʼn ttnam Jehová, qʼonk twiʼya tiʼj tbʼanel tqanil in tzaj qʼamaʼn toj. Tkyaqil jlu, kʼonil qʼij tuʼn kukx qtzalaj akux in qo ayon tuʼn tel tiʼn Jehová tkyaqil nya bʼaʼn.

Qpaʼmil ambʼil tuʼn qten kyukʼil erman. Tej tok weʼ David kywitz nya bʼaʼn, xi tqʼamaʼn jlu te Jehová: «Kqebʼel nkʼuʼje tiʼja kywitz qe nimal teya» (Sal. 52:9). El tpaʼn David ambʼil tuʼn tten kyukʼil junjuntl tmajen Jehová ex xi qʼuqbʼaʼn tkʼuʼj kyuʼn. Ax ikx qe jaku tzaj qʼuqbʼaʼn qkʼuʼj kyuʼn erman aj qten kyukʼil kyoj chmabʼil, toj pakbʼabʼil moqa toj alkyexku juntl ambʼil (Rom. 1:​11, 12).

Qchʼiysam qʼuqbʼil qkʼuʼj tiʼjju in qo ayon tiʼj. In tzaj tqʼamaʼn Salmo 62:5 jlu: «Oʼkx tuʼn Dios in kubʼ txuleʼ wanmiye, ex tukʼil in tzaj aju in chin ayone tiʼj». Nim toklen tuʼn tok qeʼxix qkʼuʼj kyiʼj tpromesa Jehová, mas qa mintiʼ ma tzul xitbʼil toj ambʼil ik tzeʼn kubʼ qximen. Noq jteʼxku ambʼil qo ayol tiʼj, bʼaʼn tuʼn tok qeʼ qkʼuʼj tiʼj qa ax tok kjapunel twi tyol Jehová. ¿Tiʼ jaku bʼant quʼn tuʼn tchʼiy qʼuqbʼil qkʼuʼj tiʼjju in qo ayon tiʼj? Bʼaʼn tuʼn qxnaqʼtzan tiʼj Biblia, tuʼn tok qqʼoʼn qwiʼ tiʼj tzeʼn in japun kywi profecía tkuʼx toj, tuʼn qximen kyiʼj xnaqʼtzbʼil in tzaj tqʼoʼn qe tiʼj Jehová ex qa at tmojbʼabʼil tibʼ jun libro tukʼil juntl (Sal. 1:​2, 3). Ax ikx, qqʼonk tilil tuʼn kukx qnaʼn Dios ex tuʼn t-xi qqanin xewbʼaj xjan te Jehová tuʼn tonin qiʼj tuʼn tten jun tbʼanel qamiwbʼil tukʼil, akux in pon ambʼil tuʼn ttzaj tqʼoʼn qchwinqlal te jumajx (Jud. 20, 21).

Ik tzeʼn te rey David, jaku tzʼok qeʼ qkʼuʼj tiʼj qa in nok tkeʼyin Jehová qe xjal in che ayon tiʼj tuʼn tel tiʼn tkyaqil nya bʼaʼn ex qa in kubʼ tyekʼin tkʼujlabʼil tzʼaqli kyiʼj (Sal. 33:​18, 22). Tuʼntzunju, tuʼn kukx qtzalaj akux in qo ayon tukʼil pasens tuʼn t-xi tbʼinchaʼn Jehová kyiʼj nya bʼaʼn, qqʼonk qwiʼ kyiʼj tbʼanel tiʼchaq, qnimsanktz tbʼi Jehová, qpaʼmil ambʼil tuʼn qten kyukʼil erman ex qchʼiysam qʼuqbʼil qkʼuʼj kyiʼj tpromesa Jehová.