1. Qʼamantza tukʼil jun techel tiquʼn tbʼanel tuʼn t-xi qbʼiʼn aju in tzaj tqʼamaʼn Jehová.

 XIMANA tiʼj qa otoq txi tzpeta toj jun lugar jatumel at nim tzeʼ. Toj lugar lu ateʼ txkup, qe kʼul qʼiʼn veneno kyuʼn ex junxichaq clase insecto. Ax ikx, jaku jaw tzʼaqa tiʼj jun abʼj. Tuʼntzunju, jaku tzalaja aj t-xi yekʼin tbʼeya tuʼn jun xjal tuʼn miʼn ttzaj nya bʼaʼn tiʼja. Chʼixmi ik twitz txʼotxʼ toj ambʼil jaʼlo ik tzeʼn jun lugar jatumel at nim tzeʼ. ¿Tiquʼn? Tuʼnju jaku tzaj tiʼn nya bʼaʼn tiʼj qamiwbʼil tukʼil Jehová. Noqtzun tuʼnj, in tzaj tyekʼin Jehová qbʼe ex in tzaj tqʼamaʼn alkyeqe nya bʼaʼn jaku qo ok weʼ twitz ex tiʼ il tiʼj tuʼn tbʼant quʼn tuʼn qten toj akʼaj twitz Txʼotxʼ.

2. ¿Tzeʼn in tzaj tyekʼin Jehová qbʼe?

² ¿Tzeʼn in tzaj tyekʼin Jehová qbʼe? Tnejel, in najbʼen Tyol tuʼn. Ax ikx in che ajbʼen xjal tuʼn tuʼn kyonin qiʼj. Jun techel, in najbʼen «aju majen in bʼant taqʼun tuʼn ex at tnabʼl» tuʼn ttzaj tqʼoʼn xnaqʼtzbʼil qe tuʼn tjaw qjyoʼn aju mas tbʼanel (Mat. 24:45). Pero nya oʼkx qe xinaq moqa ichan lu in che ajbʼen tuʼn Jehová, sino ax ikx in che ajbʼen superintendente te circuito ex qe ansyan ateʼ kyoj congregación tuʼn ttzaj kyqʼuqbʼaʼn qkʼuʼj ex tuʼn ttzaj kyqʼoʼn consej qe aj qok weʼ kywitz ambʼil kwest. In xi qqʼoʼn chjonte te Jehová tuʼnju in che ajbʼen xinaq lu tuʼn tuʼn tzaj tyekʼin qbʼe kyoj ambʼil kwest. Iktzun tten kukx jaku qo bʼet toj bʼe te chwinqlal.

3. ¿Tiʼ kʼelel qnikʼ tiʼj toj xnaqʼtzbʼil lu?

³ Noqtzun tuʼnj, at maj kwest jaku tzʼela qe tuʼn t-xi qbʼiʼn aju in tzaj tqʼamaʼn Jehová, mas tuʼnju in che ajbʼen xjal nya tzʼaqli tuʼn. Bʼalo jaku tzaj kyqʼoʼn jun consej qe aju nya qaj tuʼn tok qbʼiʼn moqa jaku kubʼ qximen qa mlayx che onin qiʼj moqa nya toj tumel. Ex tuʼn jlu, jaku kubʼ qximen qa nya atz  tzajni consej tukʼil Jehová. Pero toj ambʼil lu, bʼaʼn tuʼn tok qeʼ mas qkʼuʼj tiʼj qa a Jehová in kubʼ nej twitz ttnam ex qa tbʼanel tuʼn qok lepeʼ tiʼjju in tzaj tqʼamaʼn. Tuʼn tok qeʼ mas qkʼuʼj tiʼj, qo yolin tiʼj oxe xnaqʼtzbʼil. Tnejel, ¿tzeʼn kubʼ nej Jehová twitz ttnam toj ambʼil ojtxe? Tkabʼin, ¿tzeʼn in kubʼ nej Jehová twitz ttnam toj ambʼil jaʼlo? Ex toxin, ¿alkyeqe kʼiwlabʼil in che tzaj qkʼamoʼn qa kukx ma qo ok lepeʼ tiʼjju in tzaj tqʼamaʼn Jehová?

¿TZEʼN KUBʼ NEJ JEHOVÁ TWITZ TNAM ISRAEL?

4, 5. ¿Tzeʼn kubʼ tyekʼin Jehová qa ajbʼen Moisés tuʼn tuʼn tkubʼ nej twitz ttnam? (Qʼonka twitza tiʼj dibujo tok tiʼj revista).

⁴ Ajbʼen Moisés tuʼn Jehová tuʼn tetz tiʼn qe israelita toj tnam Egipto ex xi tyekʼin kye qa ajbʼen Moisés tuʼn tuʼn tkubʼ nej kywitz. Jun kyxol qe techel lu, aju muj ok kykeʼyin qʼij ex aju tqan qʼaqʼ ok kykeʼyin qonikʼen (Éx. 13:21). Ok lepeʼ Moisés tiʼj techel lu, iktzun tten pon junx kyukʼil israelita toj mar Rojo. Tej kypon, e pon kanin qe soldad te Egipto kyiʼj, e tzaj xobʼ ex kubʼ kyximen qa jakutoq che kubʼ bʼyoʼn. Toj ambʼil aju, kubʼ kyximen qa nya toj tumel tej kyxi qʼiʼn tuʼn Moisés toj mar Rojo. Pero nya ikju, tuʼnju a Jehová xi yekʼin te Moisés tuʼn t-xi tiʼn kye atz (Éx. 14:2). Yajxitl, e klet tuʼn tuʼn jun tbʼanelxix milagro (Éx. 14:​26-28).

⁵ Toj 40 abʼqʼi ok lepeʼ Moisés tiʼj muj tuʼn tkubʼ nej twitz ttnam Jehová toj desierto. a At maj kubʼ tqʼoʼn Jehová muj tibʼaj ja xbʼalun jatumel attoq Moisés ex jakutoq qʼanchaʼlix toj kywitz txqantl (Éx. 33:​7, 9, 10). Ax ikx ajbʼen muj lu tuʼn Jehová tuʼn ttzaj yolin tukʼil Moisés ex yajxitl xi tqʼamaʼn qe tqanil kye israelita (Sal. 99:7). Iktzun tten, kubʼ tyekʼin Jehová qa ajbʼen Moisés tuʼn tuʼn tkubʼ nej twitz ttnam.

6. ¿Tiʼ kymod israelita kubʼ kyyekʼin tej tajbʼen Moisés tuʼn Jehová tuʼn tkubʼ nej kywitz? (Números 14:​2, 10, 11).

⁶ Bʼisbʼajilxix tuʼnju chʼixmi kykyaqil israelita mintiʼ xi kynimen qa a Moisés otoq jaw tjyoʼn Jehová tuʼn tkubʼ nej kywitz (kjawil uʼjit Números 14:​2, 10, 11). Tuʼnju mintiʼ ok qeʼ kykʼuʼj tiʼj qa ajbʼen Moisés tuʼn Jehová, mintiʼ xi tqʼoʼn ambʼil kye tuʼn kyokx toj Txʼotxʼ Tziyen maj (Núm. 14:30).

7. ¿Alkyeqe xi kybʼiʼn aju tzaj tqʼamaʼn Jehová? (Números 14:24; ax ikx qʼonka twitza tiʼj foto).

⁷ Pero e ten junjun israelita e ok lepeʼ tiʼjju tzaj tqʼamaʼn Jehová. Jun techel, tqʼama Jehová jlu: «Atzunte nmajene Caleb, [ . . . ] ma chinx tniman tuj tkyaqil» (kjawil uʼjit Números 14:24). Tzaj tkʼiwlaʼn Jehová Caleb ex xi tqʼoʼn ambʼil te tuʼn tjaw tjyoʼn alkye lugar te Canaán tajtoq tuʼn tanqʼin (Jos. 14:​12-14). Ax ikx e ten junjuntl israelita e ok lepeʼ tiʼjju tzaj tqʼamaʼn Jehová. Axpe ikx «o che nimante te [Josué] tuj tkyaqil tanqʼibʼl», aju xinaq jaw tjyoʼn Jehová tuʼn tkyaj te t-xel Moisés tuʼn tkubʼ nej twitz tnam Israel (Jos. 4:14). Tuʼntzunju, e tzaj kʼiwlaʼn tuʼn Jehová ex xi tqʼoʼn ambʼil kye tuʼn kyokx toj Txʼotxʼ Tziyen maj (Jos. 21:​43, 44).

8. ¿Alkyeqe e ajbʼen tuʼn Jehová tuʼn kykubʼ nej twitz ttnam toj ambʼil tej kyten rey? (Ax ikx qʼonka twitza tiʼj foto).

⁸ Tej tikʼ junjun abʼqʼi, e ajbʼen jwes tuʼn Jehová tuʼn kykubʼ nej twitz ttnam. Yajxitl, toj ambʼil tej kyten rey e ajbʼen profeta tuʼn. Aʼye rey e ten tzʼaqli twitz Jehová, xi kybʼiʼn consej xi qʼoʼn kye kyuʼn profeta.  Jun techel, kubʼ tiʼn tibʼ rey David ex xi tkʼamoʼn kawbʼil xi tqʼoʼn profeta Natán te (2 Sam. 12:​7, 13; 1 Crón. 17:​3, 4). Atzunte rey Jehosafat, xi tbʼiʼn aju xi tqʼamaʼn profeta Jahaziel te ex onin kyiʼj xjal te Judá tuʼn tok qeʼ kykʼuʼj kyiʼj profeta tzaj tsamaʼn Jehová (2 Crón. 20:​14, 15, 20). Ex tej ttzaj bʼaj tkʼuʼj rey Ezequías, xi tqanin onbʼil te profeta Isaías (Is. 37:​1-6). Tej t-xi kybʼiʼn rey aju tzaj tqʼamaʼn Jehová, e tzaj tkʼiwlaʼn ex xqʼuqin tiʼj ttnam (2 Crón. 20:​29, 30; 32:22). Tuʼn jlu, in nel qnikʼ tiʼj qa e ajbʼen profeta tuʼn Jehová tuʼn kykubʼ nej twitz ttnam. Pero chʼixmi kykyaqil rey ex israelita mintiʼ e nimen kye (Jer. 35:​12-15).

¿TZEʼN KUBʼ NEJ JEHOVÁ KYWITZ TNEJEL OKSLAL?

9. ¿Tzeʼn kubʼ nej Jehová kywitz okslal toj tnejel syent abʼqʼi? (Ax ikx qʼonka twitza tiʼj foto).

⁹ Xi tzyet tuʼn tten tnejel congregación toj tnejel syent abʼqʼi. ¿Tzeʼn kubʼ nej Jehová twitz ttnam toj ambʼil aju? Ok tqʼoʼn toklen Jesús te wibʼaj te congregación (Efes. 5:23). Ax tok, mintiʼ tzaj yolin Jesús tukʼil teyele junjun okslal tuʼn ttzaj tqʼamaʼn tiʼ tuʼn tbʼant kyuʼn, sino e ajbʼen apóstol ex qe ansyan te tnam Jerusalén tuʼn tuʼn kykubʼ nej twitz aqʼuntl (Hech. 15:​1, 2). Ax ikx, toj teyele junjun congregación xi tqʼoʼn kyoklen ansyan tuʼn kyonin kyiʼj erman (1 Tes. 5:12; Tito 1:5).

10. a) ¿Tzeʼn kymod okslal kubʼ kyyekʼin kyiʼj tqanil xi qʼoʼn kye? (Hechos 15:​30, 31). b) ¿Tiquʼn ateʼ junjun mintiʼ e nimen kye qeju tzaj tqʼoʼn Jehová kyoklen toj ambʼil ojtxe? (Qʼonka twitza tiʼj recuadro « ¿Tiquʼn ateʼ junjun mintiʼ in xi kynimen qa in che ajbʼen xjal tuʼn Jehová tuʼn kykubʼ nej twitz ttnam?»).

¹⁰ ¿Tiʼ kymod okslal toj tnejel syent abʼqʼi kubʼ kyyekʼin tej t-xi qʼoʼn tqanil kye? Chʼixmi kykyaqil xi kykʼamoʼn tukʼil tzalajbʼil, ax ikx «e jaw tzalajxix tuʼnju qʼuqbʼabʼl kykʼuʼj» (kjawil uʼjit Hechos 15:​30, 31). Pero, ¿tzeʼn in kubʼ nej Jehová twitz ttnam toj ambʼil jaʼlo?

¿TZEʼN IN KUBʼ NEJ JEHOVÁ TWITZ TTNAM TOJ AMBʼIL JAʼLO?

11. Qʼamantza tukʼil jun techel tzeʼn in nonin Jehová kyiʼj qeju in che kubʼ nej twitz ttnam toj ambʼil jaʼlo.

¹¹ Toj ambʼil jaʼlo, in kubʼ nej Jehová twitz ttnam tuʼn tonbʼil Tyol ex Jesús, aju  wibʼaj te congregación. ¿Atpe yekʼbʼil tiʼj qa kukx in che ajbʼen xjal tuʼn Jehová tuʼn kykubʼ nej twitz ttnam? At. Qo ximen tiʼjju bʼaj nqayin tiʼj abʼqʼi 1870. El tnikʼ Charles Russell ex qe onil tiʼj qa kbʼajeltoq jun tiʼ nim toklen tukʼil Tkawbʼil Dios toj abʼqʼi 1914 (Dan. 4:​25, 26). ¿Tiquʼn kubʼ kyximen jlu? Tuʼnju e xnaqʼtzan kyiʼj profecía ateʼ toj Biblia ex onin Jehová tuʼn tel kynikʼ tiʼj. Tuʼn tkyaqilju bʼaj twitz Txʼotxʼ toj 1914, el nikʼbʼaj tiʼj qa xi tzyet tuʼn tkawin Tkawbʼil Dios. Toj abʼqʼi lu, ok Tnejel Nimaq Qʼoj twitz Tkyaqil Txʼotxʼ, e tzaj epidemia, terremoto ex weyaj (Luc. 21:​10, 11). Qʼanchaʼlxix qa e ajbʼen xinaq aju tuʼn Jehová tuʼn kyonin tiʼj ttnam.

12, 13. Tej tok Tkabʼ Nimaq Qʼoj twitz Tkyaqil Txʼotxʼ, ¿tiʼ bʼant tuʼn ttnam Jehová tuʼn kukx kypakbʼan erman ex tuʼn t-xi kyqʼoʼn xnaqʼtzbʼil?

¹² Ax ikx, qo ximen tiʼj jun tiʼ bʼaj tej tok Tkabʼ Nimaq Qʼoj twitz Tkyaqil Txʼotxʼ. E xnaqʼtzan erman xi qʼoʼn kyoklen toj kytxuylal ninja qʼil twitz aqʼuntl tiʼj jun tiʼ in tzaj qʼamaʼn toj Apocalipsis 17:8. El kynikʼ tiʼj qa mlaytoq txi tzyet qʼoj te Armagedón aj tkubʼaj Tkabʼ Nimaq Qʼoj twitz Tkyaqil Txʼotxʼ, sino ktel jun ambʼil te mujbʼabʼil ex toj ambʼil lu jakutoq txi pakbʼet kye mas xjal. Jakulo kubʼ kyximen qa nya toj tumel tej tkubʼ t-ximen ttnam Jehová toj ambʼil aju tuʼn tten jun escuela tok tbʼi Colegio Superior Bíblico de la Watchtower de Galaad. b Kubʼ ximen jlu tuʼntzun tbʼaj bʼinchaʼn kyten misionero tuʼn kyxiʼ pakbʼal ex tuʼn t-xi kyqʼoʼn xnaqʼtzbʼil kyoj junxichaq lugar twitz tkyaqil Txʼotxʼ. Axpe ikx tej atxtoq qʼoj e xi samaʼn erman kyoj junxichaq tnam. Ax ikx, kubʼ t-ximen majen tuʼn tten Curso en el Ministerio Teocrático tuʼn tonin kyiʼj pakbʼal tuʼn kyok te mas tbʼanel aj xnaqʼtzal. c Onin tkyaqil jlu kyiʼj tmajen Jehová tuʼn tbʼaj kybʼinchaʼn kyten tiʼj aqʼuntl kbʼanteltoq kyuʼn.

¹³ Qʼanchaʼlxix qa kubʼ nej Jehová twitz ttnam toj ambʼil aju. Atxix tej tkubʼaj Tkabʼ Nimaq Qʼoj twitz Tkyaqil Txʼotxʼ, o che pakbʼan tmajen Jehová kyoj nimku  lugar. Axpe ikx, ateʼ nim xjal o tzʼok kyojtzqiʼn Jehová ex toj ambʼil jaʼlo in xi pakbʼet twitz tkyaqil Txʼotxʼ.

14. ¿Tiquʼn jaku tzʼok qeʼ qkʼuʼj kyiʼj tqanil in tzaj tqʼoʼn ttnam Jehová ex qe ansyan? (Apocalipsis 2:1; ax ikx qʼonka twitza tiʼj foto).

¹⁴ Toj ambʼil jaʼlo, kukx in nok lepeʼ Kʼloj Xjal Qʼil Twitz Aqʼuntl tiʼj tqanil kyaj tqʼoʼn Jesús. In nok tilil kyuʼn tuʼn t-xi kyqʼoʼn tqanil kye erman, aju at toklen tukʼil t-ximbʼetz Jehová ex Jesús. In che ajbʼen superintendente te circuito ex qe ansyan kyuʼn tuʼn t-xi kyqʼoʼn tqanil lu kyoj congregación. d Ateʼ qe ansyan skʼoʼn maj ex qe txqantl ansyan «tuj tbʼanqʼab» Jesucristo (kjawil uʼjit Apocalipsis 2:1). Tuʼnju aj il qe, at maj in che el txalpaj ik tzeʼn Moisés, Josué ex qe apóstol (Núm. 20:12; Jos. 9:​14, 15; Rom. 3:23). Noqtzun tuʼnj, ojtzqiʼn quʼn qa a Jesús in kubʼ nej kywitz majen ex qe ansyan ex kukx kbʼantel jlu tuʼn toj «tkyaqil qʼij akutzun in japun bʼaj mankbʼil tqʼijlalil» (Mat. 28:20). Tuʼntzunju, bʼaʼn tuʼn tok qeʼ qkʼuʼj kyiʼj tqanil in tzaj qʼoʼn qe.

¿TIʼ TBʼANEL IN TZAJ QE AJ QOK LEPEʼ KYIʼJ TQANIL IN TZAJ TQʼOʼN JEHOVÁ?

15, 16. ¿Tiʼ xnaqʼtzbʼil jaku tzʼel qiʼn kyiʼj qeju o txi kybʼiʼn aju in tzaj tqʼamaʼn Jehová?

¹⁵ In tzaj tbʼanel qe toj ambʼil jaʼlo aj t-xi qbʼiʼn tqanil in tzaj tqʼoʼn Jehová. Jun techel, xi tbʼiʼn Andy ex Rose aju consej tuʼn miʼn tten nim tiʼchaq kye (Heb. 13:5). e Tej tbʼant jlu kyuʼn, e onin kyiʼj aqʼuntl tiʼj construcción toj ttnam Jehová. Tqʼama Rose jlu: «O qo anqʼine kyoj lugar tal chʼin ex at maj mintiʼ jatumel tuʼn qkocinarine. Ngane tuʼn tel wiʼne qe foto, pero xi nkʼayine chʼixmi kykyaqil qe cámara ex junjuntl tiʼchaq in che ajbʼen wuʼne. In jaw oqʼe tej tbʼant jlu wuʼne, pero kubʼ nximane tuʼn miʼn ttzaj nbʼise tiʼjju otoq bʼant wuʼne ik tzeʼn te Sara, aju t-xuʼjil Abrahán ex tuʼn ntzalaje tiʼjju kxeltoq nbʼinchaʼne» (Heb. 11:15). ¿In che tzalaj tiʼjju kubʼ kyximen? In tzaj tqʼamaʼn Rose jlu: «In kubʼ qnaʼne nim tzalajbʼil tuʼnju ojtzqiʼn quʼne qa in xi qqʼoʼne aju mas tbʼanel te Jehová. Aj t-xi qbʼinchaʼne junjun aqʼuntl, in tzaj tnaʼn qeye tzeʼn kʼokel qanqʼibʼil toj akʼaj twitz Txʼotxʼ». Yajtzun te Andy, ¿tiʼ t-ximbʼetz tiʼj jlu? In tzaj tqʼamaʼn: «In kubʼ qnaʼne nim tzalajbʼil tuʼnju in najbʼen ambʼil ex qipumale quʼne tuʼn qonine tiʼj Tkawbʼil Jehová».

 ¹⁶ ¿Tiʼ mas tbʼanel in tzaj qe aj t-xi qbʼiʼn qe tqanil in tzaj tqʼoʼn Jehová? Qo yolin tiʼjju bʼaj tiʼj jun ermana Marcia tbʼi. Tej tetz bʼaj t-xnaqʼtzbʼil, kubʼ t-ximen tuʼn t-xi tzyet tuʼn tajbʼen te precursora (Mat. 6:33; Rom. 12:11). In tzaj tqʼamaʼn jlu: «Tzaj toʼyin jun universidad jun beca te kyaje abʼqʼi weye, pero wajtoqe tuʼn wajbʼene mas te Jehová. Tuʼntzunju, kubʼ nximane tuʼn tbʼant jun aqʼuntl wuʼne aju jaku tzʼonin wiʼje tuʼn nkambʼane npwaqe tuʼntzun wajbʼene te precursora. Atzun jlu mas tbʼanel kubʼ nximane tuʼn tbʼant wuʼne. Toj ambʼil jaʼlo, in chin ajbʼene te precursora regular. Tuʼnju aʼyine in kubʼ ximante toj alkye ambʼil chin aqʼunale, jaku bʼant tuʼn wonine toj Betel ex jaku txi nbʼinchaʼne junjuntl tiʼchaq toj wajbʼebʼile te Jehová».

17. ¿Alkye juntl tten in nonin qiʼj aj t-xi qbʼiʼn aju in tzaj tqʼamaʼn Jehová? (Isaías 48:​17, 18).

¹⁷ At maj in tzaj tqʼoʼn ttnam Jehová consej qe tuʼn tok qxqʼuqin qibʼ. Jun techel, in tzaj tqʼamaʼn tuʼn miʼn tok qkʼujlaʼn pwaq ex tuʼn miʼn t-xi qbʼinchaʼn junjun tiʼchaq jaku tzaj tiʼn nya bʼaʼn qiʼj. Tbʼanel qa ma txi qbʼiʼn qe consej lu tuʼnju in che onin tuʼn tten jun tbʼanel qconciencia ex tuʼn miʼn ttzaj nim nya bʼaʼn qiʼj (1 Tim. 6:​9, 10). Qa ma bʼant jlu quʼn, jaku qo ajbʼen te Jehová tuʼn tkyaqil qanmi. Oʼkx jlu jaku tzaj qʼonte axix tok tzalajbʼil qe ex mujbʼabʼil (kjawil uʼjit Isaías 48:​17, 18).

18. ¿Tiquʼn taj teya tuʼn kukx txi tbʼiʼna aju in tzaj tqʼamaʼn Jehová?

¹⁸ Kukx che ajbʼel xjal tuʼn Jehová tuʼn kykubʼ nej twitz ttnam toj nimxix yajbʼil ex aj tkawin Tkawbʼil toj Mil Abʼqʼi (Sal. 45:16). Toj ambʼil lu, ¿kukxpe kxel qbʼiʼn qe tqanil ktzajel tqʼoʼn qe maske qaj tuʼn tkubʼ qbʼinchaʼn junjuntl tiʼ? Qa bʼaʼn qo nimen toj ambʼil jaʼlo, mas fácil kʼelel qe toj ambʼil tzul. Tuʼntzunju, tbʼanel tuʼn t-xi qbʼiʼn qe tqanil in tzaj tqʼoʼn Jehová, axpe ikx qeju in tzaj kyqʼoʼn qe xinaq o txi tqʼoʼn kyoklen tuʼn kyxqʼuqin qiʼj (Is. 32:​1, 2; Heb. 13:17). At nim tiquʼn tuʼn tok qeʼ qkʼuʼj tiʼj Jehová tuʼnju in tzaj tyekʼin qbʼe ex in nonin qiʼj tuʼn miʼn ttzaj nya bʼaʼn tiʼj qamiwbʼil tukʼil. Iktzun tten jaku qo anqʼin te jumajx toj akʼaj twitz Txʼotxʼ.