In tzaj tqʼamaʼn Tyol Dios qa jaku tzaj tqʼamaʼn Jehová tiʼ kbʼajel toj ambʼil tzul (Is. 45:21). Pero mintiʼ in tzaj tqʼamaʼn tzeʼn in bʼant tuʼn, toj alkye ambʼil in bʼant tuʼn ex jniʼ tqanil taj tuʼn tok tojtzqiʼn. Ax tok, mlay tzʼel qnikʼ tiʼj tkyaqil tqanil lu, pero ateʼ junjun ojtzqiʼn quʼn.

Jaku bʼant tkyaqil tuʼn Jehová pero at maj mintiʼ in xi tbʼinchaʼn junjun tiʼchaq. Tuʼnju mintiʼ bʼajsbʼil tiʼj tnabʼil jaku tzaj tqʼamaʼn alkyexku tiʼ taj (Rom. 11:33). Pero in bʼant tjakʼunte tibʼ toj jun tten tzʼaqli, tuʼntzunju jaku bʼant tuʼn miʼn tok tojtzqiʼn junjun tiʼ che kbʼajel (mojbʼankuya tukʼil Isaías 42:14).

In japun twi tajbʼil Jehová tuʼn. ¿Tiʼtzun toklen jlu tukʼilju tuʼn ttzaj tqʼamaʼn Jehová tiʼ kbʼajel toj ambʼil tzul? In tzaj qʼamaʼn jlu toj Isaías 46:10: «In nqʼoʼne tqanil atxix t-xe tnejel tiʼj ju tzul te bʼajsbʼil; in nqʼoʼne tqanil atxix ojtxi tiʼj ju kbʼajel tuj tqʼijlalil tzul. In xi nmaʼne kyjaʼ: Aju o kubʼ nximane tuʼn tbʼant, wuʼne kbʼantel; kbʼantel wuʼne tkyaqilju wajbʼile».

Jaku tzaj tqʼamaʼn Jehová tiʼ kbʼajel toj ambʼil tzul tuʼnju at tipumal tuʼn kybʼaj qe tiʼchaq. Pero nya il tiʼj tuʼn tok tqʼoʼn twitz tiʼjju kbʼajel toj ambʼil tzul ik tzeʼn jun xjal jaku tzʼok tkeʼyin tiʼ kbʼajel aj tkubʼaj jun película. ¿Tiquʼn? Tuʼnju jaku kubʼ t-ximen tuʼn tbʼaj jun tiʼ toj jun fecha ex aj tpon ambʼil lu, in xi tbʼinchaʼn (Éx. 9:​5, 6; Mat. 24:36; Hech. 17:31).

Tuʼntzunju, e ajbʼen qe yol lu tuʼn Jehová, «bʼaj nnakʼuʼne tiʼj» ex «o kubʼ nximane». Kyukʼil yol lu tzaj tqʼamaʼn tiʼ kbʼantel tuʼn kyukʼil junjun tiʼ che kbʼajel yajxitl (2 Rey. 19:25; Is. 46:11). Toj yol hebreo in najbʼen jun yol at toklen tukʼil jun xjal in bʼinchan kyiʼj xar (Jer. 18:4). Ik tzeʼn jun xjal jaku kubʼ tbʼinchaʼn jun tbʼanel xar toj jun tten ik tzeʼn te taj, ax ikx te Jehová jaku txi tbʼinchaʼn kyiʼj junjun tiʼchaq ik tzeʼn taj noq tuʼn tjapun twi tyol (Efes. 1:11).

In tzaj tqʼoʼn Jehová ambʼil tuʼn tkubʼ qximen tiʼ tuʼn tbʼant quʼn. Mintiʼ o tzaj tqʼamaʼn Jehová tiʼ kbʼajel tiʼj teyele junjun qe ex mlay tzʼok t-obligarin jun tbʼanel xjal tuʼn t-xi tbʼinchaʼn jun tiʼ jaku tzaj tiʼn nya bʼaʼn tiʼj. Sino in tzaj tyekʼin qe alkye mas tbʼanel jaku bʼant quʼn ex yajxitl in tzaj tqʼoʼn ambʼil qe tuʼn tjaw qjyoʼn tiʼ kbʼantel quʼn.

Qo xnaqʼtzan tiʼj kabʼe techel. Aju tnejel techel at toklen kyukʼil xjal e anqʼin toj tnam Nínive. Kubʼ kybʼinchaʼn xjal nim nya bʼaʼn toj tnam aju ex tqʼama Jehová tuʼn tkubʼ xiten. Pero tuʼnju ajtz tiʼj kyanmi, «kubʼ t-ximan Dios tuʼn miʼn tbʼinchante mya bʼaʼn kyiʼj, ex mintiʼ tzaj tqʼoʼn castiw kyibʼaj, aju otoq tma nej» (Jon. 3:​1-10). Chʼexpaj t-ximbʼetz Jehová kyiʼj xjal te Nínive. ¿Tiquʼn? Tuʼnju xi kybʼiʼn aju tqanil tzaj tqʼoʼn Jehová ex ajtz tiʼj kyanmi.

At toklen tkabʼin techel tukʼil profecía kyaj qʼamaʼn tiʼj rey Ciro. Onin tuʼn kyetz tzaqpiʼn judiy ex tqʼama tuʼn tjaw bʼinchaʼn juntl maj templo (Is. 44:​26–45:4). Japun twi profecía lu tiʼj rey Ciro te Persia (Esd. 1:​1-4). Ax tok, mintiʼ ajbʼen Ciro te Jehová, pero ajbʼen tuʼn tuʼn tjapun twi t-ximbʼetz ex mintiʼ ok t-obligarin tuʼn tajbʼen te (Prov. 21:1).

Noq oʼkx ma qo yolin kyiʼj junjun tiʼchaq in nok tqʼoʼn Jehová toklen aj ttzaj tqʼamaʼn tiʼ kbʼajel toj ambʼil tzul. Ax tok, mintiʼ jun xjal jaku tzʼel tnikʼ tiʼj t-ximbʼetz Jehová, tiʼjju in bʼant tuʼn ex tiʼj tipumal tuʼn ttzaj tqʼamaʼn tiʼ kbʼajel toj ambʼil tzul (Is. 55:​8, 9). Maske ikju, in nok qeʼ qkʼuʼj tiʼj qa tzʼaqli tkyaqilju in xi tbʼinchaʼn Jehová, axpe ikx aj ttzaj tqʼamaʼn tiʼ kbʼajel toj ambʼil tzul.