1. ¿Toj alkye ambʼil che kxel qʼiʼn kykyaqil okslal skʼoʼn mas toj kyaʼj?

 MA TZIKʼ nim ambʼil o kubʼ kyxjelin tmajen Jehová jlu: «¿Jtoje che kxel qʼiʼn mankbʼil skʼoʼn maj toj kyaʼj?». Kubʼ qximan toj jun ambʼil qa bʼalo ateʼ junjun skʼoʼn maj che kjel anqʼin aj ttzaj Armagedón ex qa che anqʼil toj Paraíso toj jun ambʼil. Pero toj Atalaya te 15 te julio te 2013, el qnikʼ tiʼj qa kykyaqil qe okslal skʼoʼn maj ateʼ twitz Txʼotxʼ che xel qʼiʼn toj kyaʼj naʼmxtoq txi tzyet qʼoj te Armagedón (Mat. 24:31).

2. ¿Tiʼ jaku kubʼ qxjelin ex tiʼ kʼelel qnikʼ tiʼj toj xnaqʼtzbʼil lu?

² Jakulo kubʼ qxjelin: ¿Tiʼ kbʼajel kyiʼj txqantl tmajen Jehová ateʼ twitz Txʼotxʼ aj t-xi tzyet «kʼixbʼisabʼl maʼxix»? (Mat. 24:21; Juan 10:16). Bʼalo ateʼ junjun in che tzaj xobʼ tuʼnju jaku kubʼ kynaʼn qa mintiʼ jun jaku tzʼonin kyiʼj moqa jaku che kyaj kolin aj kyxi qʼiʼn kykyaqil okslal skʼoʼn maj toj kyaʼj. Qo yolin tiʼj kabʼe txʼolbʼabʼil tzul kyyekʼin qe tiquʼn in kubʼ qximen jlu. Ax ikx, kʼelel qnikʼ tiʼj tiquʼn mintiʼ tuʼn ttzaj bʼaj qkʼuʼj.

AJU MLAY BʼAJ

3, 4. ¿Tiʼ jaku kubʼ kyximen junjun ex tiquʼn?

³ Aj tpon ambʼil jatumel ya miʼn ten jun kyxol qe Kʼloj Xjal Qʼil Twitz Aqʼuntl, jaku kubʼ kyximen junjun qa jaku che el laqʼeʼ t-ẍneʼl Jehová tiʼj axix tok. ¿Tiquʼntzun in  kubʼ kyximen jlu? Qo yolin tiʼj kabʼe txʼolbʼabʼil tzul kyyekʼin tiquʼn jaku kubʼ kyximen jlu. Tnejel, qo yolin tiʼj Jehoiadá, jun tbʼanel tmajen Jehová ex nejenel kye pal. Junx tukʼil Jehosabeat, aju t-xuʼjil e xqʼuqin tiʼj jun kʼwal Jehoás tbʼi ex e onin tiʼj tuʼn tok te jun tbʼanel rey. Ten Jehoás nqayin ttxlaj Jehová tej itzʼtoq Jehoiadá. Pero tej tkyim Jehoiadá, kubʼ tbʼinchaʼn Jehoás nya bʼaʼn, xi tbʼiʼn kyconsej qe nejenel nya bʼaʼn ex kyaj ttzaqpiʼn Jehová (2 Crón. 24:​2, 15-19).

⁴ In yolin tkabʼin techel kyiʼj qe okslal te tkabʼin syent abʼqʼi. A Juan aju mankbʼil apóstol kyim, tej akux itzʼtoq onin kyiʼj okslal tuʼn kyten tzʼaqli twitz Jehová (3 Juan 4). Ok tilil tuʼn Juan ik tzeʼn qe txqantl apóstol tuʼn tok t-xqʼuqin congregación tiʼj kyxnaqʼtzbʼil apóstata (1 Juan 2:18). Pero tej tkyim Juan, e ok lepeʼ okslal tiʼj kyxnaqʼtzbʼil apóstata ex tej tikʼ junjun abʼqʼi e ten apóstata kyoj kykyaqil congregación.

5. ¿Tiʼ mintiʼ tuʼn tkubʼ qximen?

⁵ ¿Axpe jlu kbʼajel kyiʼj txqantl t-ẍneʼl Jesús aj kyxi qʼiʼn kykyaqil okslal skʼoʼn maj toj kyaʼj? ¿Che okel ik tzeʼn Jehoás ex kjel kytzaqpin Jehová? ¿Axpe kbʼajel kyiʼj ik tzeʼn kye okslal toj tkabʼin syent abʼqʼi ex che okel lepeʼ kyiʼj apóstata? ¡Mlayx bʼaj jlu! Qʼuqli qkʼuʼj tiʼj qa kukx che ktel tmajen Jehová tzʼaqli twitz ex che okel xqʼuqin maske mintiʼ juntl skʼoʼn maj tzalu twitz Txʼotxʼ. ¿Tiquʼn in xi qqʼamaʼn jlu?

MLAYX BʼAJ TZʼILSAʼN KʼULBʼIL AXIX TOK

6. ¿Alkye oxe ambʼil qo xnaqʼtzal tiʼj?

⁶ ¿Tiquʼn qʼuqli qkʼuʼj tiʼj qa mlay bʼaj tzʼilsaʼn kʼulbʼil axix tok maske qo okel weʼ kywitz ambʼil kwest? Tuʼnju in tzaj t-xnaqʼtzaʼn Tyol Dios qa junxitl ambʼil in qo anqʼin jaʼlo ik tzeʼn tej kyanqʼin israelita ex qe okslal te tkabʼin syent abʼqʼi. Tuʼntzunju, qo xnaqʼtzal tiʼj oxe ambʼil. Tnejel, tej kyanqʼin israelita. Tkabʼin, tej kykyim kykyaqil apóstol. Ex toxin, aju «tqʼijlalil tuʼn tbʼinchet tkyaqil juntl maj te akʼaj» moqa toj ambʼil jaʼlo (Hech. 3:21).

7. ¿Tzeʼn onin kyiʼj israelita e ten tzʼaqli aju bʼaj kyiʼj qeju mintiʼ e nimen?

⁷ Aju ambʼil tej kyanqʼin israelita. Tej chʼixtoq tkyim Moisés, tqʼama qe yol lu kyiʼj: «Bʼaʼn wuʼne, nkyimlenxiye che elel txalpuje ex kyjel kykoline bʼe otoq txi nmaʼne kyeye» (Deut. 31:29). Ax ikx xi tqʼamaʼn kye israelita qa che elex lajoʼn toj tnam qa mintiʼ ma che nimen (Deut. 28:​35, 36). ¿Japun twi yol tqʼama Moisés? Japun. Toj nim ambʼil mintiʼ e nimen rey ex e ok lepeʼ israelita kyiʼj, tuʼntzunju kubʼ tqʼoʼn Jehová kykastiw ex ya mintiʼ xi tqʼoʼn ambʼil tuʼn kyten rey tzajni kyxol israelita (Ezeq. 21:​25-27). Pero onin kyiʼj israelita e ten tzʼaqli twitz Jehová tej tjapun kywi yol lu (Is. 55:​10, 11).

8. ¿Tiquʼn mintiʼ tuʼn qjaw labʼin tiʼj tej ttzaj nya bʼaʼn kyxol okslal te tkabʼin syent abʼqʼi?

⁸ Aju ambʼil tej otoq che kyim kykyaqil apóstol. Mintiʼ tuʼn qjaw labʼin tiʼj tiquʼn tzaj nya bʼaʼn kyxol okslal toj tkabʼin syent abʼqʼi. ¿Tiquʼn? Tuʼnju otoq kyaj tqʼamaʼn Jesús qa ktel nim kyxnaqʼtzbʼil apóstata (Mat. 7:​21-23; 13:​24-30, 36-43). Ex toj tnejel syent abʼqʼi, tqʼama apóstol Pablo, Pedro ex Juan qa otoq txi tzyet tuʼn tten kyxnaqʼtzbʼil apóstata ik tzeʼn otoq kyaj tqʼamaʼn Jesús (2 Tes. 2:​3, 7; 2 Ped. 2:1; 1 Juan 2:18). Tej tikʼ  chʼin ambʼil tkyimlen mankbʼil apóstol, xi tzyet tuʼn tok kymojbʼan kyibʼ okslal apóstata tukʼil nintz tnam Babilonia, aju in kubʼ techlaʼn kykyaqil okslabʼil nya axix tok. Iktzun tten japun twi yol kyaj tqʼamaʼn Jesús.

9. ¿Tiquʼn junxitl ambʼil jaʼlo ik tzeʼn qe kabʼe ambʼil ma qo yolin tiʼj?

⁹ Aju «tqʼijlalil tuʼn tbʼinchet tkyaqil juntl maj te akʼaj». Junxitl ambʼil jaʼlo ik tzeʼn tej kyanqʼin israelita ex tej kyten nim apóstata toj tkabʼ syent abʼqʼi. In nok qʼoʼn tbʼi ambʼil jaʼlo te «mankbʼil tqʼijlalil» kyiʼj kykyaqil tiʼchaq nya bʼaʼn (2 Tim. 3:1). Pero in tzaj tyekʼin Tyol Dios qa toj ax ambʼil lu xi tzyet juntl ambʼil mas nim toklen. In nok qʼoʼn tbʼi te «tqʼijlalil tuʼn tbʼinchet tkyaqil juntl maj te akʼaj» (Hech. 3:21). Xi tzyet ambʼil lu toj 1914 ex kpol bʼaj aj kyok kykyaqil xjal te tzʼaqli ex aj tok Txʼotxʼ te jun Paraíso tjaqʼ Tkawbʼil Jesús. ¿Tiʼtzun ok te akʼaj tuʼn Jehová toj 1914? Toj abʼqʼi lu, xi tzyet tuʼn tkawin Jesús toj kyaʼj. Iktzun tten ten juntl aj kawil kubʼ techlaʼn Tkawbʼil Jehová ex atz tzajni tiʼj rey David. Ax ikx, tej tikʼ chʼin ambʼil xi tzyet tuʼn tok kʼulbʼil axix tok te akʼaj (Is. 2:​2-4; Ezeq. 11:​17-20). ¿Okpe kbʼajel tzʼilsaʼn juntl maj kʼulbʼil axix tok?

10. a) ¿Tiʼ kyaj qʼamaʼn toj Biblia tiʼj kʼulbʼil axix tok toj ambʼil jaʼlo? (Isaías 54:17). b) ¿Tiquʼn in tzaj qʼuqbʼaʼn qkʼuʼj kyuʼn yol kyaj qʼamaʼn toj Isaías?

¹⁰ (Kjawil uʼjit Isaías 54:17). In tzaj tqʼamaʼn profecía lu: «Mi jun xjal jaku bʼant jun ubʼl tuʼn tuʼn tnaja tuʼn». In japun kywi yol lu toj ambʼil jaʼlo. Nya oʼkxju, ax ikx qe yol lu: «Kxel nqʼoʼne xnaqʼtzbʼil kye xjal che najal tuja ex kykyaqil che tel tuj txubʼtxaj. Kʼokel nimxix tipuna ok tbʼinchet aju tzʼaqlxix tuʼna; [ . . . ] mlay xobʼa, ex mlay tzaj juntl maj xobʼajil tiʼja» (Is. 54:​13, 14). Axpe ikx te Satanás, aju «kydios xjal at tuj tqʼijlalil jaʼlo», mlay bʼant jun tiʼ tuʼn tuʼn ya miʼn txi tqʼoʼn ttnam Jehová xnaqʼtzbʼil tiʼj Biblia (2 Cor. 4:4). O ten juntl maj kʼulbʼil axix tok ex mlay bʼaj tzʼilsaʼn juntl maj. ¡Mlay kubʼ qiʼj tuʼn ni jun aj qʼoj!

AJU KBʼAJEL

11. ¿Tiquʼn jaku txi qqʼamaʼn qa mlay che kyaj kolin tmajen Jehová aj kyxi qʼiʼn okslal skʼoʼn maj toj kyaʼj?

¹¹ ¿Tiʼ kbʼajel aj kyxi qʼiʼn kykyaqil okslal skʼoʼn maj toj kyaʼj? Bʼaʼn tuʼn tzaj qnaʼn qa a Jesús Pastoril qe, a wibʼaj te congregación  ex tqʼama qe yol lu: «Junx nejenel kyeye at, atzun qine aju Crist» (Mat. 23:10). Ya in kawin Jesús toj kyaʼj ex kukx qo okel t-xqʼuqin. Ax ikx, tuʼnju a nejenel kywitz tmajen Jehová ateʼ tzalu twitz Txʼotxʼ, mintiʼ tuʼn kytzaj xobʼ te jun tiʼ. Ax tok, mintiʼ ojtzqiʼn quʼn tiʼ kbʼantel tuʼn Jesús tiʼj ttnam Jehová toj ambʼil aju. Pero qo xnaqʼtzan kyiʼj junjun techel ateʼ toj Biblia jaku che onin qiʼj.

12. a) ¿Tzeʼn xqʼuqin Jehová kyiʼj tmajen tej tkyim Moisés? b) ¿Tzeʼn xqʼuqin kyiʼj tej t-xi tsamaʼn Elías toj juntl lugar? (Ax ikx qʼonka twitza tiʼj dibujo).

¹² Kyim Moisés tej naʼmxtoq kyokx israelita toj Txʼotxʼ Tziyen maj. ¿Tiʼtzun bʼaj kyiʼj? ¿E kyajpe kolin tuʼn Jehová tuʼnju otoq kyim Moisés? Mintiʼ. Kukx ten Jehová kyukʼil tej kyten tzʼaqli twitz. Jun techel, tej naʼmxtoq tkyim Moisés tqʼama Jehová qa atoq Josué kbʼel nej twitz ttnam ex otoq txi xnaqʼtzaʼn tuʼn Moisés toj nimku abʼqʼi (Éx. 33:11; Deut. 34:9). Ax ikx, ateʼtoq xinaq nim kyojtzqibʼil e kubʼ nej kywitz israelita, ateʼ qe e kubʼ nej kywitz 1,000, kywitz 100, kywitz 50 ex kywitz 10 (Deut. 1:15). Iktzun tten ok xqʼuqin ttnam Jehová. Atzun jaʼlo, qo yolin tiʼj Elías. Toj nimku ambʼil onin kyiʼj israelita tuʼn kukx kykʼulin te Jehová. Noqtzun tuʼnj, xi samaʼn tuʼn Jehová atz Sur tuj Judá (2 Rey. 2:1; 2 Crón. 21:12). ¿E kyajpe kolin tmajen Jehová ateʼtoq toj 10 tribu te Israel? Mintiʼ. Tuʼnju xi tqʼoʼn Elías xnaqʼtzbʼil te Eliseo toj nimku abʼqʼi. Ax ikx, jakutoq che onin kykʼwal profeta kyiʼj tuʼnju otoq tzaj kykʼamoʼn xnaqʼtzbʼil (2 Rey. 2:7). Ik tzeʼn ma tzʼel qnikʼ tiʼj, ateʼ nim xinaq e onin tuʼn kykubʼ nej twitz ttnam Jehová. Tej tbʼaj jlu, japun twi t-ximbʼetz ex xqʼuqin kyiʼj tmajen e ten tzʼaqli twitz.

13. ¿Tiʼ in tzaj tziyen qe toj Hebreos 13:5b? (Ax ikx qʼonka twitza tiʼj dibujo).

¹³ Aj qximen kyiʼj techel ma qo yolin tiʼj, ¿tiʼtzun kbʼajel kyiʼj tmajen Jehová aj kyxi qʼiʼn kykyaqil skʼoʼn maj toj kyaʼj? Nya il tiʼj tuʼn qximen nim maj tiʼj jlu, tuʼnju in tzaj tqʼamaʼn Tyol Dios qa mlayx qo kyaj kolin tuʼn Jehová (kjawil uʼjit Hebreos 13:5b). Ik tzeʼn bʼant tuʼn Moisés ex Elías, ax ikx ojtzqiʼn kyuʼn erman in che kubʼ nej twitz ttnam Jehová toj ambʼil jaʼlo qa nim toklen tuʼn t-xi kyqʼoʼn xnaqʼtzbʼil kye txqantl. Toj nimku abʼqʼi, o txi tqʼoʼn Kʼloj Xjal Qʼil Twitz Aqʼuntl xnaqʼtzbʼil kye xinaq ateʼ kyxol txqantl  ẍneʼl tuʼn kykubʼ nej twitz aqʼuntl. Jun techel, o che bʼaj bʼinchaʼn escuela tuʼn t-xi qʼet xnaqʼtzbʼil kye ansyan, kye superintendente te circuito, kye erman ateʼ toj Comité te Sucursal, kye superintendente te Betel ex junjuntl. Ax ikx, in xi tqʼoʼn Kʼloj Xjal Qʼil Twitz Aqʼuntl xnaqʼtzbʼil kye erman in che onin kyiʼj Comité ex in bʼant nim aqʼuntl kyuʼn. Qʼuqli qkʼuʼj tiʼj qa bʼantni kyten tuʼn kyxqʼuqin kyiʼj qe t-ẍneʼl Jesús.

14. ¿Alkye tbʼanel xnaqʼtzbʼil ma qo yolin tiʼj?

¹⁴ Tiʼj tkyaqilju ma tzʼel qnikʼ tiʼj, ma qo yolin tiʼj jun tbʼanel xnaqʼtzbʼil. Aj kyxi qʼiʼn mankbʼil skʼoʼn maj toj kyaʼj toj ambʼil aj tkubʼaj nimxix kʼixbʼisabʼil, kukx ktel kʼulbʼil axix tok tzalu twitz Txʼotxʼ. Ex mlay tzaj bʼaj kykʼuʼj tmajen Jehová tuʼnju a Jesús nejni kywitz. Toj ambʼil aju, kʼokel tzoqpaj jun kʼloj tnam kyiʼj aju in nok tqʼoʼn Biblia tbʼi te Gog te Magog (Ezeq. 38:​18-20). Pero noq chʼin ambʼil ktel jlu ex mlay che kambʼan aj qʼoj. Qʼuqli qkʼuʼj tiʼj qa kkolil Jehová kyiʼj tmajen. Toj jun witzikʼ, ok tkeʼyin apóstol Juan «nimxix kyajlal xjal» tzajni kyxol txqantl t-ẍneʼl Jesús. Ax ikx, tzaj qʼamaʼn te qa atz i etz nimxix kyajlal xjal tuj kʼixbʼisabʼil maʼxix. In tzaj tyekʼin jlu qa che kletel qe tmajen Jehová (Apoc. 7:​9, 14).

15, 16. Ik tzeʼn in tzaj tqʼamaʼn Apocalipsis 17:​14, ¿tiʼ kbʼantel kyuʼn okslal skʼoʼn maj toj qʼoj te Armagedón ex tiquʼn in tzaj tqʼuqbʼaʼn jlu qkʼuʼj?

¹⁵ Ax ikx jaku kubʼ qxjelin jlu: ¿Yajtzun qe skʼoʼn maj? ¿Tiʼ kbʼantel kyuʼn aj kyjapun kykyaqil toj kyaʼj? In tzaj tqʼamaʼn Tyol Dios qa «che qʼojel aj kawil tiʼj Tal Ẍneʼl, pero kbʼel kyiʼj tuʼn Tal Ẍneʼl» ¿Alkyeqe che onil tiʼj tuʼn tkambʼan? In tzaj tqʼamaʼn versículo jlu: «Txkoʼn maj qe tuʼn Dios ex skʼoʼn maj qe tuʼn ex in japunxix kyuʼn» moqa aʼyeju okslal skʼoʼn maj otoq che jaw anqʼin (kjawil uʼjit Apocalipsis 17:14). In tzaj tyekʼin jlu qa che qʼojil okslal skʼoʼn maj aj kyjapun bʼaj kykyaqil toj kyaʼj ex atzun tnejel aqʼuntl kbʼantel kyuʼn. ¡Kxel kybʼinchaʼn jun tbʼanel aqʼuntl! Ateʼ junjun kygantoq  tuʼn kyqʼojin tej naʼmxtoq kyok te testigo de Jehová. Axpe ikx ateʼ junjun e ten toj ejército. Pero e okslan ex e anqʼin toj txubʼtxaj kyukʼil txqantl (Gál. 5:22; 2 Tes. 3:16). Noqtzun tuʼnj, aj kyjapun toj kyaʼj che okel tzoqpaj kyiʼj qe aj qʼoj tiʼj Dios junx tukʼil Jesús ex qe t-anjel.

¹⁶ Qo ximen tiʼj jlu, ateʼ junjun okslal skʼoʼn maj twitz Txʼotxʼ ya o che tijen ex mintiʼ nim kyipun. Pero aj kyanqʼin toj kyaʼj, ya mlay che kyim ex ktel nim kyipumal tuʼn kyqʼojin junx tukʼil Jesús, jun Rey tbʼanel qʼojin. Aj tkubʼaj qʼoj te Armagedón, che onil kyiʼj qe xjal tuʼn kyok te tzʼaqli. Qʼuqli qkʼuʼj tiʼj qa mas che onil kyiʼj qe kyerman aj kyten toj kyaʼj twitzju toj ambʼil jaʼlo.

17. ¿Tiquʼn jaku txi qqʼamaʼn qa che kletel qe tmajen Jehová toj qʼoj te Armagedón?

¹⁷ ¿Atpe teya kyxol qe txqantl ẍneʼl? Qa ikju, ¿tiʼtzun kbʼantel tuʼna aj t-xi tzyet qʼoj te Armagedón? Oʼkx jaku tzʼok qeʼ tkʼuʼja tiʼj Jehová ex tuʼn t-xi tnimana qe tqanil che ktzajel qʼoʼn. Axpe ikx, bʼalo kxel qbʼiʼn aju in tzaj qʼamaʼn toj Isaías 26:20: «Kyokxe tuj kyjaye ex kylamoʼn etze qe tlamel ja kywitze. Kyewanx chʼin kyibʼe, akux nnikʼ ttxʼuʼjil Qman». In chewix qanmi aj tel qnikʼ tiʼj qa kykyaqil qe tmajen Dios ateʼ toj kyaʼj ex twitz Txʼotxʼ, che kletel toj ambʼil aju. Qʼuqli qkʼuʼj tiʼj ik tzeʼn te apóstol Pablo qa «mi aʼl jun bʼaʼn tel paʼnte qe tiʼj tkʼujlalil Dios; [ . . . ] mi qeju at kyipumal, mi ju at jaʼlo, mi ju tzul» (Rom. 8:​38, 39). Miʼn tzikʼ tnaʼl tuʼna qa kʼujlaʼna tuʼn Jehová ex mlayx kyaj kolina tuʼn.