AT MAJ ajbʼen mas te jun maj junjun txol yol kyuʼn qe aj tzʼibʼil tiʼj Biblia, axpe ikx junjun yol. ¿Tiquʼn bʼant jlu kyuʼn? Qo xnaqʼtzan tiʼj oxe tiquʼn.

Tej tkubʼ tzʼibʼin. Chʼixmi kykyaqil xjal toj ojtxe tnam Israel mintiʼ ten jun copia tiʼj ley kyukʼil. Oʼkxtoq jaku tzʼok kybʼiʼn tej tok kychmon kyibʼ toj tabernáculo ex toj templo (Deut. 31:​10-12). Qo ximen tiʼj, kwesttoq tuʼn tok kyqʼoʼn kywiʼ tiʼj jun tqanil tuʼnju attoq nim bulla ex waʼltoq qe kyxol nim xjal (Neh. 8:​2, 3, 7). Toj ambʼil lu, nim onin kyiʼj tej tok kybʼiʼn qe yol nimku maj tuʼntzun ttzaj kynaʼn ex tuʼn t-xi kybʼinchaʼn. Ax ikx, nim onin tej kytzaj qʼamaʼn yol nimku maj, ik tzeʼn tej ttzaj qʼoʼn nim tqanil kyiʼj kawbʼil tzaj tqʼoʼn Jehová (Lev. 18:​4-22; Deut. 5:1).

Tzeʼn kubʼ tzʼibʼin. E kubʼ tzʼibʼin junjun plaj Biblia ik tzeʼn bʼitz, ik tzeʼn aju libro te Salmo, El Cantar de los Cantares ex Lamentaciones. Ateʼ junjun bʼitz tkubʼ estribillo kyoj. Xi qʼamaʼn nimku maj qe yol tkubʼ kyoj tuʼn ttzaj naʼn tbʼi bʼitz ex mas fácil jaku kyaj toj kywiʼ xjal. Tuʼn tel qnikʼ tiʼj jlu, qkeʼyink tiʼ in tqʼamaʼn Salmo 115:9 a 11: «Aqeye aj Israel, qeʼk kykʼuʼje tiʼj Qman. A onil qe ex in kolin qiʼj. Aqeye pal, qeʼk kykʼuʼje tiʼj Qman. A onil qe ex in kolin qiʼj. Aqeye in che niman te Qman, qeʼk kykʼuʼje tiʼj. A onil qe ex in kolin qiʼj». Tejlo t-xi tbʼitzen jun xjal bʼitz lu, jun rat kyaj toj twiʼ.

Tiquʼn kubʼ tzʼibʼin. Ateʼ junjun aj tzʼibʼil tiʼj Biblia kubʼ kyqʼoʼn junjun yol nimku maj tuʼnju nim kyoklen. Jun techel, tej t-xi tqʼamaʼn Jehová kye israelita tuʼn miʼn t-xi kychyoʼn chikʼ xi tqʼamaʼn te Moisés tuʼn t-xi tnaʼn kye nimku maj tiquʼn mintiʼ tuʼn tbʼant kyuʼn. Tajtoq Jehová tuʼn tel kynikʼ tiʼj qa atz taʼ qchwinqlal toj chikʼ (Lev. 17:​11, 14). Tej tikʼ ambʼil, tej kyyolin apóstol ex qe ansyan te tnam Jerusalén kyiʼj tiʼchaq il tiʼj tuʼn tel qikʼun tuʼntzun ttzalaj Dios qiʼj, kyqʼama juntl maj qa nim toklen tuʼn miʼn t-xi qchyoʼn chikʼ (Hech. 15:​20, 29).

Maske in che tzaj qʼamaʼn junjun txol yol nimku maj toj Biblia, nya a t-xilen jlu qa taj Jehová tuʼn qnaqʼet tuʼn t-xi qqʼamaʼn aʼyex yol nimku maj. Axpe ikx, tqʼama Jesús jlu: «Miʼn txi kymaʼne elaʼ maj axju yol» (Mat. 6:7). Ax ikx, tqʼama tiʼ jaku txi qqanin toj qnaʼj Dios ex at toklen tukʼil tajbʼil Jehová (Mat. 6:​9-13). Noqtzun tuʼnj, aj qnaʼn Dios te Jehová mintiʼ in xi qqʼamaʼn aʼyex yol nimku maj, pero jaku qo yolin kyiʼj aʼyex tiʼchaq (Mat. 7:​7-11).

Tbʼanel tuʼnju in tzaj qʼamaʼn nimku maj junjun yol ex txol yol toj Biblia. Atzun juntl tumel in tzaj tqʼoʼn Jehová xnaqʼtzbʼil qe tuʼntzun qten toj bʼaʼn (Is. 48:​17, 18).