1. ¿Tiʼ o bʼant tuʼn Jehová tiʼj teyele junjun qe?

QO XIMEN tiʼj tzeʼn el qnikʼ tiʼj Jehová. Tnejel, bʼalo tzaj qʼamaʼn «tqanil kolbʼil» qe kyuʼn qman, tuʼn jun erman akux in pakbʼan ttziyele ja, tuʼn jun qukʼil toj aqʼuntl moqa toj tja xnaqʼtzbʼil (Mar. 13:10). Tibʼajxi jlu, el tpaʼn jun erman ambʼil tuʼn ttzaj tqʼoʼn xnaqʼtzbʼil qe tiʼj Tyol Dios. Tuʼn jlu, ok qkʼujlaʼn Jehová ex el qnikʼ tiʼj qa kʼujlaʼn qoʼ tuʼn. A Jehová tzaj qʼonte txokbʼil qiʼj tuʼn qoktz toj ttnam. Ex o tzaj tqʼoʼn jun qʼuqbʼil qkʼuʼj tiʼj ambʼil tzul noq tuʼnju o qo ok te t-xnaqʼtzbʼen Jesús (Juan 6:44). In xi qqʼoʼn nimxix chjonte te Jehová tuʼnju onin qiʼj tuʼn tel qnikʼ tiʼj axix tok ex tuʼnju in tzaj tqʼoʼn ambʼil qe tuʼn qajbʼen te.

2. ¿Tiʼ kʼelel qnikʼ tiʼj toj xnaqʼtzbʼil lu?

² Tuʼnju o tzʼel qnikʼ tiʼj axix tok, o tzaj tqʼoʼn Jehová qoklen tuʼn qonin kyiʼj txqantl tuʼn tel kynikʼ tiʼj tuʼntzun tten kychwinqlal te jumajx. Ateʼ junjun erman mintiʼ in che xobʼ aj kypakbʼan ttziyele kyja xjal, noqtzun tuʼnj, kwest in nela toj kywitz tuʼn t-xi kyqanin kye xjal qa kyaj tuʼn kyxnaqʼtzan tiʼj Tyol Dios moqa tuʼn t-xi kyqʼoʼn xnaqʼtzbʼil kye. ¿Axpe jlu in bʼaj qiʼj? Qa ikju, che onil nabʼil tkuʼx toj xnaqʼtzbʼil lu qiʼj. Kʼelel qnikʼ tiʼj tiʼ in nonin qiʼj tuʼn qonin kyiʼj xjal tuʼn kyok te t-xnaqʼtzbʼen Jesús. Ax ikx, qo xnaqʼtzal tiʼj tzeʼn jaku qo ex kywitz junjun nya bʼaʼn in nel qʼinte ambʼil qe tuʼn qqʼon xnaqʼtzbʼil. Pero naʼmxtoq tbʼant jlu quʼn, qo xnaqʼtzan tiʼj tiquʼn nya oʼkx tuʼn qpakbʼan, sino ax ikx tuʼn qqʼon xnaqʼtzbʼil.

3. ¿Tiquʼn in qo pakbʼan?

³ Tej tten Jesús tzalu twitz Txʼotxʼ, kyaj tqʼamaʼn kye t-xnaqʼtzbʼen tuʼn tbʼant kabʼe tiʼ kyuʼn. Tnejel, tuʼn kypakbʼan tiʼj tbʼanel tqanil tiʼj Tkawbʼil Dios ex xi tyekʼin kye tzeʼn tuʼn tbʼant kyuʼn (Mat. 10:7; Luc. 8:1). Ax ikx, xi tqʼamaʼn kye tiʼ tuʼn tbʼant kyuʼn qa ma tzʼok kybʼiʼn xjal tbʼanel tqanil ex tiʼ tuʼn tbʼant kyuʼn qa mintiʼ ma tzʼok kybʼiʼn (Luc. 9:2-5). Ex tqʼama Jesús qa che pakbʼaltoq t-xnaqʼtzbʼen «tuj tkyaqil twitz txʼotxʼ» (Mat. 24:14; Hech. 1:8). Noq alkyexku kymod xjal jakutoq kubʼ kyyekʼin, iltoq tiʼj tuʼn kypakbʼan tiʼj Tkawbʼil Dios ex tiʼjju kbʼantel tuʼn.

4. Ik tzeʼn in tzaj tqʼamaʼn Mateo 28:18 a 20, ¿tiʼ juntl tiʼ il tiʼj tuʼn tbʼant quʼn?

⁴ ¿Alkyetzun tkabʼin tiʼ xi tqʼamaʼn Jesús kye t-xnaqʼtzbʼen tuʼn tbʼant kyuʼn? Xi tqʼamaʼn kye qa iltoq tiʼj tuʼn t-xi kyqʼoʼn xnaqʼtzbʼil kye xjal tuʼntzun t-xi kynimen tkyaqilju otoq tqʼama. Pero, ¿oʼkxpe xi tqʼamaʼn Jesús qe yol lu kye t-xnaqʼtzbʼen tej tten tzalu twitz Txʼotxʼ? Miʼn, tuʼnju tqʼama qa ax ikx kxel pakbʼet tbʼanel tqanil «akutzun in japun bʼaj mankbʼil tqʼijlalil» (kjawil uʼjit Mateo 28:18-20). Bʼalo tqʼama Jesús qe yol lu tej tkubʼ tyekʼin tibʼ kywitz mas te 500 t-xnaqʼtzbʼen (1 Cor. 15:6). Ex toj witzikʼ ok tkeʼyin Juan, xi tyekʼin Jesús te qa taj tuʼn kyonin t-xnaqʼtzbʼen kyiʼj xjal tuʼn tel kynikʼ tiʼj Jehová (Apoc. 22:17).

5. ¿Alkye techel ajbʼen tuʼn apóstol Pablo toj 1 Corintios 3:6 a 9 tuʼn ttzaj tyekʼin qe tiquʼn nim toklen tuʼn qpakbʼan ex tuʼn qqʼon xnaqʼtzbʼil?

⁵ Ok tmojbʼaʼn apóstol Pablo aqʼuntl in bʼant quʼn tukʼil jun xjal in aqʼunan tiʼj awal, ex tzaj tyekʼin qe qa nya oʼkx tuʼn tkux qawaʼn iyaj. Xi tnaʼn jlu kye okslal te Corinto: «Wuʼne kuʼx wawaʼne iyaj, atzunte Apolos ok ten aʼlilte, [...] atzun kyeye tawal Dios qeye» (kjawil uʼjit 1 Corintios 3:6-9). Kykyaqilx qeju in che aqʼunan tiʼj «tawal Dios», nya oʼkx in kux kyawaʼn iyaj, sino ax ikx in che «ok ten aʼlilte» ex in nok kyxqʼuqin (Juan 4:35). Noqtzun tuʼnj, in nel kynikʼ tiʼj qa a Dios in chʼiysante awal.

6. ¿Tiʼ il tiʼj tuʼn tbʼant kyuʼn erman in che qʼon xnaqʼtzbʼil?

⁶ In qo jyoʼn kyiʼj «kykyaqil qeju at jun tbʼanel kyanmi tuʼn tten kychwinqlal te jumajx» (Hech. 13:48, TNM). Tuʼn kyok xjal lu te t-xnaqʼtzbʼen Jesús, il tiʼj tuʼn tbʼant oxe tiʼ quʼn. Tnejel, tuʼn qonin kyiʼj tuʼn tel kynikʼ tiʼj xnaqʼtzbʼil, tkabʼin, tuʼn qonin kyiʼj tuʼn t-xi kynimen ex toxin, tuʼn qonin kyiʼj tuʼn t-xi kybʼinchaʼn (Juan 17:3; Col. 2:6, 7; 1 Tes. 2:13). Kykyaqilx erman toj kʼloj okslal jaku che onin tiʼj jun xjal in xnaqʼtzan tiʼj Tyol Dios aj tkubʼ kyyekʼin kykʼujlabʼil tiʼj ex aj t-xi kyqʼoʼn jun bʼaʼn tulen aj tpon kyoj chmabʼil (Juan 13:35). Bʼalo il tiʼj tuʼn tel tpaʼn erman in qʼon xnaqʼtzbʼil nim ambʼil tuʼn tonin tiʼj xjal tuʼntzun tel tnikʼ tiʼjju in tzaj t-xnaqʼtzaʼn Tyol Dios ex tuʼn tel tpan tibʼ kyiʼj xnaqʼtzbʼil nya ax tok (2 Cor. 10:4, 5). Jakulo txi tiʼn nim ambʼil tuʼn qonin tiʼj jun xjal tuʼn tbʼant tten tuʼn tbautisarin, noqtzun tuʼnj, nimxix jaku tzʼonin jlu tiʼj.

7. ¿Tiquʼn in qo pakbʼan ex in qo qʼon xnaqʼtzbʼil kye xjal?

⁷ ¿Tiquʼn in qo onin kyiʼj xjal tuʼn kyok te t-xnaqʼtzbʼen Jesús? Tnejel, tuʼnju kʼujlaʼn Jehová quʼn. Aj tok tilil quʼn tuʼn qpakbʼan ex tuʼn qqʼon xnaqʼtzbʼil, in kubʼ qyekʼin qkʼujlabʼil tiʼj Jehová (1 Juan  5:3). Bʼaʼn tuʼn qximen tiʼj qa ya o tzʼonin kʼujlabʼil qiʼj tuʼn qpakbʼan ttziyele kyja xjal. Bʼalo kwest ela jlu te qe ex tzajlo salin qiʼj tuʼn tokx qtokʼchaʼn tpwertil ttzi ja. Pero bʼant jlu quʼn tuʼnju otoq tzʼel qnikʼ tiʼj qa atzun jlu taj Jesús tuʼn tbʼant quʼn. Toj ambʼil jaʼlo, nyalo kwest in nela qe tuʼn qpakbʼan, pero ¿yajtzun tuʼn qqʼon xnaqʼtzbʼil? ¿In tzajpe salin qiʼj aj qximen tiʼj jlu? Qa ikju, bʼaʼn tuʼn t-xi qqanin te Jehová tuʼn tonin qiʼj tuʼn miʼn qtzaj xobʼ ex tuʼn ttzaj tqʼoʼn qipumal tuʼn t-xi qqʼamaʼn te xjal qa taj tuʼn t-xnaqʼtzan tiʼj Tyol Dios. Jaku tzʼonin Jehová qiʼj tuʼn tten qipumal tuʼn qonin kyiʼj xjal tuʼn kyok te t-xnaqʼtzbʼen Jesús.

8. Ik tzeʼn in tzaj tqʼamaʼn Marcos 6:34, ¿tiʼ juntl tiʼ in nonin qiʼj tuʼn t-xi qyekʼin axix tok kye xjal?

⁸ Tkabʼin, in xi qyekʼin axix tok kye xjal tuʼnju kʼujlaʼn qe quʼn. Jun maj, otoq sikt Jesús kyukʼil t-xnaqʼtzbʼen tuʼnju otoq tzʼex qʼij kyuʼn in che pakbʼan, tuʼntzunju, xi kyjyoʼn jun lugar jatumel tuʼn kyojlan. Noqtzun tuʼnj, ateʼtoq nim xjal in che ayon kyiʼj. ¿Tiʼtzun bʼant tuʼn Jesús? Tzaj qʼaqʼan tkʼuʼj kyiʼj xjal ex «oktzun ten [...] qʼol nimku xnaqʼtzbʼil kye» (kjawil uʼjit Marcos 6:34). ¿Tiquʼn bʼant jlu tuʼn? Tuʼnju ximen kyiʼj xjal ex tajtoq tuʼn tonin kyiʼj. Ojtzqiʼntoq tuʼn qa in che ok weʼ xjal twitz nya bʼaʼn ex qa kyajtoq qʼuqbʼil kykʼuʼj. Toj ambʼil jaʼlo, ax ikx kye xjal kyaj qʼuqbʼil kykʼuʼj maske in nok qkeʼyin qa bʼaʼn ateʼ. In che ok xjal lu ik tzeʼn qe ẍneʼl mintiʼ jun pastoril kyiʼj tuʼnju mintiʼ jun qʼuqbʼil kykʼuʼj. Tqʼama apóstol Pablo jlu kyiʼj: «Mintiʼ jatum tuʼn tok qeʼ kykʼuʼje, ex ateʼye twitz txʼotxʼ mintiʼ Dios kyukʼile» (Efes. 2:12). In che bʼet xjal lu toj bʼe «in pon tuj najen» (Mat. 7:13). Aj qximen tiʼjju in bʼaj kyiʼj xjal jatumel in qo pakbʼan ex aj ttzaj qnaʼn qa mintiʼ jun qʼuqbʼil kykʼuʼj, kʼonil kʼujlabʼil qiʼj tuʼn qonin kyiʼj. Aju onbʼil mas tbʼanel jaku txi qqʼoʼn kye, aju qa ma txi qqʼamaʼn kye qa kyaj tuʼn kyxnaqʼtzan tiʼj Tyol Dios.

9. Ik tzeʼn in tzaj tqʼamaʼn Filipenses 2:13, ¿tzeʼn jaku tzʼonin Jehová qiʼj?

⁹ Bʼalo mintiʼ in xi qqanin kye xjal qa kyaj tuʼn kyxnaqʼtzan tiʼj Tyol Dios tuʼnju in kubʼ qximen qa in xi tiʼn nim ambʼil. Qa ikju, qqʼamanx te Jehová tiʼ in kubʼ qnaʼn ex qqaninx te tuʼn tonin qiʼj tuʼn tten mas qgan tuʼn qqʼon xnaqʼtzbʼil tiʼj Tyol (kjawil uʼjit Filipenses 2:13). In tzaj tnaʼn apóstol Juan jlu qe: «Qa at jun ma txi qqanin te Dios ik tzaʼnx ju tajbʼil, in qo tzaj tbʼiʼn» (1 Juan 5:14, 15). Tuʼntzunju, jaku tzʼok qeʼ qkʼuʼj tiʼj qa kʼonil Jehová qiʼj tuʼn tten qgan tuʼn qonin kyiʼj xjal tuʼn kyok te t-xnaqʼtzbʼen Jesús.

10, 11. ¿Tiquʼn jaku kubʼ qximen qa mlayx bʼant qonin tiʼj jun xjal tuʼn tok te t-xnaqʼtzbʼen Jesús?

¹⁰ Ojtzqiʼn quʼn qa nim toklen tuʼn qonin kyiʼj xjal tuʼn kyok te t-xnaqʼtzbʼen Jesús. Noqtzun tuʼnj, at junjun tiʼchaq jaku tzʼel tiʼn ambʼil qe tuʼn tbʼant jlu quʼn. Qo xnaqʼtzan kyiʼj junjun nya bʼaʼn lu ex tzeʼn jaku qo ex twitz.

¹¹ ¿In kubʼpe qximen qa mintiʼxix in qo onin tuʼnju in bʼaj toj qanqʼibʼil? Jun techel, ateʼ junjun erman o che tijen moqa at jun yabʼil kyiʼj. Qa in bʼaj jlu qiʼj, qo ximen tiʼj tzeʼn o tzʼonin ambʼil qiʼj akux at yabʼil COVID-19. Ma tzaj tyekʼin qe qa jaku qo qʼon xnaqʼtzbʼil toj celular moqa toj Internet. A jlu in tzaj tyekʼin qe qa jaku qo qʼon xnaqʼtzbʼil maske atz atoʼ qja. Ex nya oʼkx jlu jaku bʼant quʼn. Qo ximen kyiʼj xjal kyaj tuʼn kyxnaqʼtzan tiʼj  Tyol Dios, pero mintiʼ in bʼant kyuʼn tuʼnju mintiʼ ambʼil kyiʼj aj tex qʼij. ¿Jakupe txi qqanin kye qa kyaj tuʼn kyxnaqʼtzan tiʼj Tyol Dios qukʼil toj jun ambʼil mas bʼaʼn toj kywitz, ik tzeʼn te prim moqa te qale? Xi tqʼoʼn Jesús xnaqʼtzbʼil te Nicodemo te qonikʼen tuʼnju atzun ambʼil lu mas tbʼanel ela toj twitz Nicodemo (Juan 3:1, 2).

12. ¿Alkye oxe tiʼ jaku tzʼonin qiʼj qa in kubʼ qximen qa nya bʼantni qten tuʼn qqʼon xnaqʼtzbʼil?

¹² ¿In kubʼpe qximen qa nya bʼantni qten tuʼn qqʼon xnaqʼtzbʼil? Bʼalo in kubʼ qximen qa nya nim qojtzqibʼil at tiʼj Tyol Dios moqa naʼmx qok te jun tbʼanel aj xnaqʼtzal. Qa ikju, bʼaʼn tuʼn qximen tiʼj oxe tiʼ jaku che onin qiʼj tuʼn tok qeʼ qkʼuʼj tiʼj qa jaku bʼant quʼn. Tnejel, qʼuqli tkʼuʼj Jehová tiʼj qa jaku bʼant quʼn (2 Cor. 3:5). Tkabʼin, kyaj tqʼamaʼn Jesús, aju at toklen «tiʼj tkyaqilju at tuj kyaʼj ex twitz txʼotxʼ», qa nim toklen tuʼn qqʼon xnaqʼtzbʼil (Mat. 28:18). Ex toxin, nya qjunalx atoʼ. Ik tzeʼn bʼant tuʼn Jesús, jaku tzʼok qeʼ qkʼuʼj tiʼj qa kʼonil Jehová qiʼj tuʼn tel qnikʼ tiʼj tiʼ jaku txi qqʼamaʼn (Juan 8:28; 12:49). Ex qa qaj onbʼil tzeʼn tuʼn qqʼon xnaqʼtzbʼil, jaku qo yolin tukʼil erman in nex qʼinte grupo aj qex pakbʼal, tukʼil jun precursor at nim tojtzqibʼil moqa tukʼil jun pakbʼal. Qa ma qoʼx kyukʼil qʼol xnaqʼtzbʼil, jaku tzʼel qnikʼ tiʼj tzeʼn jaku qo ok te jun tbʼanel aj xnaqʼtzal.

13. ¿Tiquʼn bʼaʼn tuʼn qnaqʼet kyiʼj akʼaj chʼixpubʼil?

¹³ ¿In kubʼpe qximen qa kwest tuʼn qnaqʼet kyiʼj akʼaj onbʼil ex kyiʼj akʼaj tumel tzeʼn tuʼn qqʼon xnaqʼtzbʼil? O chʼexpaj alkye tten in xi qqʼoʼn xnaqʼtzbʼil kye xjal. In najbʼen uʼj Tzalaja tiʼj tanqʼibʼila quʼn tuʼn qqʼon xnaqʼtzbʼil. Junxitl uʼj lu ex nim toklen tuʼn tbʼaj qbʼinchaʼn qten tiʼj naʼmxtoq qxiʼ qʼol xnaqʼtzbʼil. Ya mintiʼ in che jaw quʼjin nim párrafo ex mas in qo yolin tukʼil xjal. Mas in che ajbʼen video quʼn ex qe onbʼil ik tzeʼn JW Library^®. Qa kwest in nela te qe tuʼn kyajbʼen onbʼil lu quʼn, qqaninx onbʼil te jun erman tuʼn tonin qiʼj. At maj kwest tuʼn qnaqʼet kyiʼj chʼixpubʼil. Chʼixmi tkyaqil maj oʼkx qajbʼil tuʼn t-xi qbʼinchaʼn qe tiʼchaq ik tzeʼn otoq qo naqʼet tiʼj. Pero jaku qo naqʼet kyiʼj chʼixpubʼil ex jaku qo tzalaj aj qqʼon xnaqʼtzbʼil qa ma txi qqanin onbʼil te Jehová ex kye erman. Tqʼama jun precursor qa «jaku qo tzalaj tuʼn akʼaj tten in qo qʼon xnaqʼtzbʼil ex jaku che tzalaj xjal».

14. a) ¿Tiʼ il tiʼj tuʼn ttzaj qnaʼn qa nya kyaj xjal tuʼn kyxnaqʼtzan tiʼj Tyol Dios jatumel in qo pakbʼan? b) ¿Tzeʼn in nonin 1 Corintios 3:6 ex 7 qiʼj?

¹⁴ ¿In kubʼpe qximen qa kwest tuʼn t-xi kykʼamoʼn xjal jun xnaqʼtzbʼil tiʼj Tyol Dios? Bʼalo ateʼ junjun xjal mintiʼ in nok kybʼiʼn tbʼanel tqanil moqa nya kygan qe testigo de Jehová. ¿Tiʼ jaku tzʼonin qiʼj tuʼn tten qximbʼetz toj tumel? Bʼaʼn tuʼn ttzaj qnaʼn qa kukx in chʼexpaj kyanqʼibʼil xjal. Tnejel, bʼalo nya taj jun xjal tuʼn tok tbʼiʼn tbʼanel tqanil, pero qa ma tzikʼ jun nya bʼaʼn toj tanqʼibʼil, jakulo tzʼonin tiʼj tuʼn tjyoʼn tiʼj Dios (Mat. 5:3). Ateʼ junjun xjal nya kygantoq tuʼn tjaw kyuʼjin qe uʼj in che etz tuʼn ttnam Jehová, pero tej tikʼ ambʼil xi tzyet tuʼn kyxnaqʼtzan tiʼj Tyol Dios. Ax ikx, ojtzqiʼn quʼn qa a Jehová tajaw awal (Mat. 9:38). A Jehová in chʼiysante axix tok toj kyanmi xjal, pero taj tuʼn kukx qpakbʼan ex tuʼn qqʼon xnaqʼtzbʼil (1 Cor. 3:6, 7). In qo tzalaj tuʼnju in nok tqʼoʼn Jehová toklen qaqʼun maske mintiʼ in qo qʼon xnaqʼtzbʼil te jun xjal toj ambʼil jaʼlo. *

15. ¿Tiʼ in kubʼ tnaʼn Jehová aj t-xi tzyet tuʼn t-xnaqʼtzan jun xjal tiʼj Tyol ex aj tkubʼ tanqʼiʼn aju in nel tnikʼ tiʼj?

¹⁵ In tzalaj Jehová aj tel tnikʼ jun xjal tiʼj axix tok ex aj tyolin tiʼj kyukʼil txqantl (Prov. 23:15, 16). Ex in tzalaj tiʼj aqʼuntl in bʼant toj ambʼil jaʼlo. Jun techel, maske attoq yabʼil toj abʼqʼi 2020, xi qʼet xnaqʼtzbʼil kye 7 millón 705 mil 765 xjal ex e bautisarin 241 mil 994. Ex che onil akʼaj erman lu tuʼn t-xi qʼet xnaqʼtzbʼil kye xjal ex tuʼn kyok lepeʼ tiʼj Jesús (Luc. 6:40). Nimxix in tzalaj Jehová aj qonin kyiʼj xjal tuʼn tel kynikʼ tiʼj axix tok.

16. ¿Tiʼ bʼaʼn tuʼn tok tilil quʼn tuʼn tbʼant quʼn?

¹⁶ In xi tiʼn nim aqʼuntl tuʼn tel tnikʼ jun xjal tiʼj axix tok ex tuʼn tok tkʼujlaʼn, pero jaku qo onin tiʼj tuʼn tonbʼil Jehová. ¿Jakupe tzʼok tilil quʼn tuʼn qonin tiʼj jun xjal tuʼn tel tnikʼ tiʼj Jehová? Bʼaʼn tuʼn tok tilil quʼn tuʼn t-xi qqanin kye xjal qa kyaj tuʼn kyxnaqʼtzan tiʼj Tyol Dios. Qa ma bʼant jlu quʼn, jaku qo jaw labʼin tiʼj tzaqʼwebʼil jaku tzaj kyqʼoʼn. Tbʼanel tuʼn tok qeʼ qkʼuʼj tiʼj qa tzul tkʼiwlaʼn Jehová qaqʼun.

17. ¿Tiʼ kbʼel qnaʼn qa ma qo onin tiʼj jun xjal tuʼn tel tnikʼ tiʼj axix tok?

¹⁷ Jun tbʼanel qoklen o tzaj tqʼoʼn Jehová tuʼn qpakbʼan kye xjal ex tuʼn t-xi qqʼoʼn xnaqʼtzbʼil kye. Onin apóstol Pablo kyiʼj nim xjal te Tesalónica tuʼn tel kynikʼ tiʼj axix tok ex in nel qnikʼ tiʼj tiʼ kubʼ tnaʼn kyuʼn yol lu: «¿Alkyetzunju tuʼn tqeʼ qkʼuʼje tiʼj, ex alkye tuʼn qtzalaje tiʼj, ex alkyetzun jun yekʼbʼil kxel qyekʼune tiʼj qaqʼunbʼene twitz Qajaw Jesucrist ok tul? ¿Myapetzun aqeye? Ax tok aqeye jun yekʼbʼil kxel qyekʼune tiʼj qaqʼunbʼene, ex noq kyuʼne qo tzalajele» (1 Tes. 2:19, 20; Hech. 17:1-4). Ax tzalajbʼil lu in kubʼ kynaʼn nim erman toj ambʼil jaʼlo. O tzʼonin jun ermana Stéphanie tbʼi tukʼil tchmil kyiʼj nim xjal tuʼn kybautisarin ex tqʼama jlu: «In kubʼ qnaʼn nim tzalajbʼil aj qonin tiʼj jun xjal tuʼn tajbʼen te Jehová».