▪ Taj Jehová tuʼn kytzalaj kabʼe xjal aj kykubʼ mojeʼ ex tuʼn miʼn tel kypan kyibʼ (Mat. 19:4-6). Qa in ximen teya tuʼn tkubʼ mojeʼya, ¿tzeʼn jaku kanet jun tbʼanel tchmila moqa jun tbʼanel t-xuʼjila? Tuʼnju a Jehová kubʼ bʼinchante qe, ojtzqiʼn tuʼn tzeʼn jaku qo tzalaj akux in nok qojtzqiʼn qibʼ tukʼil jun erman ex toj qmejebʼleʼn. Qa ma chex qbʼiʼn nabʼil tkuʼx toj Tyol Dios, atzun mas tbʼanel jaku bʼant quʼn. Qo xnaqʼtzan kyiʼj junjun nabʼil lu.

Tnejel, bʼaʼn tuʼn tel qnikʼ tiʼj jun tiʼ in nikʼ qiʼj qkyaqilx. In tzaj tqʼamaʼn Tyol Dios jlu: «Puro sbʼul kyanmi xjal twitz tkyaqil tiʼxti ex jumajx mya bʼaʼn» (Jer. 17:9). Aj tok kyojtzqin kyibʼ kabʼe xjal, jun rat jaku chʼexpaj kyximbʼetz ex aju in kubʼ kynaʼn. Qa ma kubʼ kyximen tuʼn kymojeʼ noq tuʼnju in kubʼ kynaʼn, jaku tzaj kybʼis yajxitl (Prov. 28:26). Tuʼntzunju, qa tzma in xi tzyet tuʼn tyolin jun qʼa tukʼil jun txin, mintiʼ tuʼn kyyolin naj tiʼjju in kubʼ kynaʼn nix tuʼn t-xi kytziyen jun kyyol kyxolx tuʼnju naʼmx tok kyojtzqin kyibʼ.

In tzaj tqʼamaʼn Proverbios 22:3 jlu: «Aju xjal at tnabʼl, ok t-xi tkeʼyin qa kyjaʼ ttzaj xobʼajil tibʼaj, in jyon naj tumel tuʼn tex twitz; atzunju xjal mintiʼ tnabʼl, kukx in xi laqʼeʼ tuj tbʼe ex in kʼixbʼi tuʼnju mya bʼaʼn». ¿Tiʼ nya bʼaʼn jaku tzaj qa ma che ajbʼen tembʼil te Internet tuʼn jun qʼa ex tuʼn jun txin tuʼn tok kyojtzqin kyibʼ? Jaku tzaj kybʼis tuʼnju ateʼ junjun xjal oʼkx kyaj tuʼn kysbʼun kyiʼj txqantl ex nya ax tok kyaj tuʼn tok kyojtzqiʼn jun xjal. Nya oʼkxju, ax ikx ateʼ junjun xjal o bʼaj kybʼinchaʼn jun cuenta tuʼn kysbʼun kyiʼj txqantl ex tuʼn kyelqʼan pwaq kyiʼj. At maj tzaj kyqʼamaʼn xjal lu qa testigo de Jehová qe.

Qo xnaqʼtzan tiʼj juntl nya bʼaʼn jaku tzaj. Ateʼ junjun tembʼil te Internet in najbʼen jun programa kyuʼn tuʼntzun ttzaj kyqʼamaʼn alkye xjal jaku tzʼok te tbʼanel chmilbʼaj moqa xuʼjilbʼaj. Pero mintiʼ yekʼbʼil at tiʼj qa ax tok in nonin jlu kyiʼj xjal. ¿Atpe qnabʼil qa ma txi qqʼoʼn ambʼil te jun programa toj computadora tuʼn tonin qiʼj tuʼn t-xi qbʼinchaʼn jun tiʼ nim toklen ik tzeʼn tuʼn qkubʼ mojeʼ? Mintiʼ. Mlayx tzʼok mojbʼet jun programa toj computadora kyukʼil nabʼil tkuʼx toj Tyol Dios (Prov. 1:7; 3:5-7).

tzaj tqʼoʼn Proverbios 14:15 juntl tbʼanel nabʼil qe. In tzaj tqʼamaʼn jlu: «Aju xjal mintiʼ  tnabʼl in xi tniman tkyaqil aju in tzaj qʼmaʼn te; atzunju xjal at tnabʼl tok tkwent tiʼj jatum in bʼet». Tuʼn tel tnikʼ jun xjal tiʼj qa jaku tzʼok juntl te jun tbʼanel chmilbʼaj moqa te jun tbʼanel xuʼjilbʼaj, nim toklen tuʼn tok tojtzqiʼn. Pero mlay bʼant jlu qa ma tzʼajbʼen jun tembʼil te Internet tuʼn. Yajtzun qa jaku tzʼok tkeʼyin jun xjal tkyaqil tqanil tiʼj juntl ex kukx in che yolin toj Internet, ¿jakupe txi qʼamet qa ya ojtzqiʼnxix tuʼn? Ateʼ junjun xjal kubʼ kyximen qa otoq kanet jun tbʼanel kyukʼil, tzaj nim bʼis kyiʼj tej tok kykeʼyin kyibʼ.

Tqʼama jun aj tzʼibʼil tiʼj jun Salmo jlu: «Mi jun maj o chin tene junx kyukʼil qe xjal nikʼal yol ex mintiʼ o tzʼok njunin wibʼe kyukʼil qeju xmletzʼ qe» (Sal. 26:4). Nim xjal in jax kyqʼoʼn nya ax tok tqanil toj Internet noq tuʼn tok bʼaj kywitz txqantl kyiʼj. Jaku kubʼ kyewin tzeʼnxix kymod ex mlay tzʼel qnikʼ tiʼj jlu toj jun mensaje. Atlo junjun jaku tzaj kyqʼamaʼn qa testigo de Jehová qe, pero ¿axpe tok o che bautisarin? ¿Ope che chʼiy toj kyokslabʼil? ¿Atpe jun tbʼanel kyamiwbʼil tukʼil Jehová? ¿Kykyaqilpe erman in che yolin bʼaʼn kyiʼj? ¿Moqa in kubʼ kyqʼoʼn nya bʼaʼn techel kywitz txqantl ex in che ok te nya bʼaʼn amiw? (1 Cor. 15:33; 2 Tim. 2:20, 21). ¿Jakupe che kubʼ mojeʼ ik tzeʼn in tzaj tqʼamaʼn Tyol Dios? Nim toklen tuʼn tel qnikʼ tiʼj tzaqʼwebʼil kyiʼj xjel lu, pero mlay tzʼel qnikʼ kyiʼj qa mintiʼ ma qo yolin kyukʼil erman ojtzqiʼn xjal kyuʼn (Prov. 15:22). Ex ni jun tmajen Jehová o chʼiy toj tokslabʼil jaku kubʼ t-ximen tuʼn tmojeʼ tukʼil jun xjal «mya okslal», toj juntl yol, qa naʼmx tbautisarin (2 Cor. 6:14; 1 Cor. 7:39).

Tuʼnju jaku tzaj nya bʼaʼn kyuʼn tembʼil te Internet ex kyuʼn junjuntl programa, ¿atpe jun tumel tzeʼn jaku kanet jun tbʼanel tchmil moqa t-xuʼjil jun erman? Tej kukxtoq in qoʼx kyoj Ja te Chmabʼil, in ten ambʼil qiʼj tuʼn kyok qojtzqiʼn erman, ax ikx in che ok qojtzqiʼn kyoj nimaq chmabʼil moqa kyoj junjuntl chmabʼil in che ok tuʼn ttnam Jehová.

Qa mlay bʼant tuʼn tok qchmon qibʼ kyukʼil txqantl ik tzeʼn toj ambʼil akux at yabʼil COVID-19, in najbʼen Internet quʼn tuʼn tok qchmon qibʼ ex toj ambʼil lu jaku tzʼok qojtzqiʼn junjuntl erman naʼmx kykubʼ mojeʼ. ¿Tiʼ jaku bʼant quʼn tuʼn tok qojtzqiʼn qe erman? Jaku tzʼok qqʼoʼn qwitz tiʼj kyoklen in nex kyqʼoʼn ex tiʼj kyyol in xi kyqʼoʼn kyoj chmabʼil (1 Tim. 6:11, 12). Ax ikx, jaku qo yolin kyukʼil erman aj kykubʼ qʼoʼn junjun grupo mas tal chʼin aj kykubʼaj chmabʼil. Ax ikx jaku che ok qojtzqiʼn erman aj tel kypaʼn ambʼil tuʼn kyyolin jun rat toj Internet. Kyoj ambʼil lu, jaku tzʼok qkeʼyin tiʼ tmod erman in kubʼ tyekʼin kyiʼj txqantl (1 Ped. 3:4). Akux in nok kyojtzqin kyibʼ kabʼe xjal, jaku tzʼok kykeʼyin qa ax kyximbʼetz at kyiʼj junjun tiʼchaq ex qa in nel tnikʼ jun tiʼj juntl.

Qa ma tzʼok lepeʼ jun erman kyiʼj nabʼil tkuʼx toj Tyol Dios aj tjyon tiʼj jun tukʼil, kʼonil jlu tiʼj tuʼn ttzalaj toj tmejebʼleʼn. Che japunel yol lu tiʼj: «Aju xjal in knet t-xuʼjil, [moqa tchmil,] in knet ju bʼaʼn tuʼn ex in tkʼmoʼn t-xtalbʼil Dios» (Prov. 18:22).