1. ¿Tiʼ bʼant tuʼn Jehová tej tikʼ chʼin ambʼil tkubʼlen tbʼinchaʼn Adán ex Eva il? (Génesis 3:15).

 TEJ tikʼ chʼin ambʼil tkubʼlen tbʼinchaʼn Adán ex Eva il, tzaj tqʼoʼn Jehová jun qʼuqbʼil kykʼuʼj xjal tej ttzaj tqʼamaʼn jun profecía. In kanet profecía lu quʼn toj Génesis 3:15 (uʼjinktza).

2. ¿Tiquʼn nim toklen profecía tkuʼx toj Génesis 3:15?

² In kanet profecía lu quʼn toj tnejel uʼj toj Tyol Dios. Ex aju in tzaj kyqʼamaʼn txqantl uʼj at toklen tukʼil profecía lu. In che ok yol tkuʼx toj uʼj te Génesis 3:15 ik tzeʼn jun las in najbʼen tuʼn tkʼalet moqa tuʼn t-ẍpet jun manoj siʼ. ¿Tiquʼn? Tuʼnju in nonin tuʼn tten tmojbʼabʼil tibʼ tkyaqil tqanil tkuʼx toj Tyol Dios. ¿Alkyetzun tqanil lu? Aju tqanil qa tzul tsamaʼn Dios jun Kolil qiʼj ex kbʼel tnajsaʼn Tajaw il ex qeju in che onin tiʼj. * Tbʼanelxix tqanil lu kye qeju kʼujlaʼn Jehová kyuʼn.

3. ¿Tiʼ kʼelel qnikʼ tiʼj toj xnaqʼtzbʼil lu?

³ Toj xnaqʼtzbʼil lu, kxel qqʼoʼn tzaqʼwebʼil kyiʼj oxe xjel at kyoklen tukʼil Génesis 3:15. Tnejel, ¿alkyeqe xjal in yolin profecía lu tiʼj? Tkabʼin, ¿tzeʼn in japun twi profecía lu? Ex toxin, ¿tzeʼn in nonin jlu qiʼj toj ambʼil jaʼlo?

4. ¿Alkye in nok te «lobʼaj» ex tzeʼn in nel qnikʼ tiʼj?

⁴ In yolin Génesis 3:14 ex 15 tiʼj jun «lobʼaj» moqa kan ex kyiʼj tiyjil moqa tyajil. Ax ikx in yolin tiʼj jun «xuʼj» ex  kyiʼj «tiyjil». Tuʼn tonbʼil Tyol Dios jaku tzʼel qnikʼ tiʼj alqiʼj in yolin profecía lu. * Tnejel, kxel tzyet tuʼn qyolin tiʼj «lobʼaj» moqa kan. Mlay yolin jlu tiʼj jun ax tok lobʼaj tuʼnju mlaytoq tzʼel tnikʼ tiʼj kastiw tzaj tqʼamaʼn Jehová toj jardín te Edén. Sino atz yolin tiʼj jun xjal at tnabʼil. In tzaj tyekʼin Tyol Dios alkye. In tzaj tqʼamaʼn Apocalipsis 12:9 qa a Satanás moqa Tajaw il in nok te «ojtxi lobʼaj». Qa ikju, ¿alkyetzun qe in che ok te tyajil?

5. ¿Alkyeqe in che ok te tiyjil lobʼaj?

⁵ Aj tajbʼen yol «tiyjil» tuʼn Tyol Dios te jun techel, atz in yolin kyiʼj qeju in nel kykanoʼn t-ximbʼetz ex tmod jun mambʼaj in kubʼ qʼoʼn te techel. Tuʼn jlu, in nel qnikʼ tiʼj qa in che ok demonio ex qe xjal in che qʼojin tiʼj Jehová ex kyiʼj tmajen te tiyjil lobʼaj. Kyxol qe jlu, ateʼqe anjel el kypan kyibʼ tiʼj Jehová toj tqʼijlalil Noé ex qe xjal in nel kykanoʼn nya bʼaʼn tmod Tajaw il (Gén. 6:1, 2; Juan 8:44; 1 Juan 5:19; Jud. 6).

6. ¿Tiquʼn in xi qqʼamaʼn qa nya a Eva in nok te «xuʼj» in yolin Génesis 3:15 tiʼj?

⁶ Atzun jaʼlo, qo yolin tiʼj alkye in nok te «xuʼj». ¿Jakupe txi qqʼamaʼn qa a Eva? Mlay. Qo ximen tiʼj jlu, in tzaj tqʼamaʼn profecía qa kbʼel pachʼuʼn twiʼ lobʼaj tuʼn tyajil xuʼj. Ik tzeʼn ma tzʼel qnikʼ tiʼj, a Satanás in nok te lobʼaj. Tuʼntzunju, mlay kubʼ tiʼj Satanás tuʼn jun tyajil Eva tuʼnju nya tzʼaqli. Qa ikju, ¿alkye jun jaku kubʼ najsante Satanás?

7. ¿Tzeʼn in nonin Apocalipsis 12:1, 2, 5 ex 10 qiʼj tuʼn tel qnikʼ tiʼj xuʼj in tzaj qʼamaʼn toj Génesis 3:15?

⁷ In tzaj tqʼamaʼn mankbʼil uʼj tkuʼx toj Tyol Dios alkye in nok te xuʼj  in yolin Génesis 3:15 tiʼj (kjawil uʼjit Apocalipsis 12:1, 2, 5, 10). Mintiʼ in yolin jlu tiʼj jun xjal in nanqʼin tzalu twitz Txʼotxʼ. ¿Tiquʼn? Tuʼnju in tzaj tqʼamaʼn Tyol Dios qa tokx Xjaw tjaqʼ tqan ex qa tjax jun tcorona tok 12 cheʼw tiʼj. Ax ikx, in tzaj tqʼamaʼn qa in nul itzʼ jun tal ex atz in yolin jlu tiʼj Tkawbʼil Dios. Tuʼnju atz toj kyaʼj taʼ Tkawbʼil Dios, ax ikx te xuʼj il tiʼj tuʼn tten toj kyaʼj. Tuʼn jlu in nel qnikʼ tiʼj qa atz in yolin kyiʼj tmajen Jehová ateʼ toj kyaʼj, toj juntl yol, in yolin kyiʼj anjel (Gál. 4:26).

8. ¿Alkye mas nim toklen kyxol tyajil xuʼj ex toj alkye ambʼil xi qʼoʼn toklen? (Génesis 22:15-18).

⁸ Tuʼn tonbʼil Tyol Dios, ax ikx jaku tzeʼl qnikʼ tiʼj alkye mas nim toklen kyxol tyajil xuʼj. Atz tuʼn ttzaj tiʼj tiyjil Abrahán (kjawil uʼjit Génesis 22:15-18). Ex japun kywi yol lu tuʼnju atz tzajni Jesús tiʼj tyajil Abrahán (Luc. 3:23, 34). Pero iltoq tiʼj tuʼn tten nim tipumal tyajil xuʼj tuʼntzun tkubʼ tnajsaʼn Tajaw il te jumajx. Tuʼntzunju, tej tjapun Jesús twi junlo 30 abʼqʼi, jaw skʼoʼn tuʼn xewbʼaj xjan tuʼn tok te Tkʼwal Jehová. Toj ambʼil aju, a Jesús ok te mas nim toklen kyxol tyajil xuʼj (Gál. 3:16). Tej tkyim Jesús ex tej otoqxi jaw anqʼin, ok tqʼoʼn Jehová toklen ex xi tqʼoʼn tipumal tibʼaj «tkyaqilju at tuj kyaʼj ex twitz txʼotxʼ». Ax ikx o tzaj qʼoʼn tipumal tuʼn tkubʼ t-xiten «tkyaqil taqʼunbʼen tajaw il» (Heb. 2:7; Mat. 28:18; 1 Juan 3:8).

9, 10. a) ¿Alkye txqantl ateʼ kyxol tyajil xuʼj ex toj alkye ambʼil in xi qʼoʼn kyoklen? b) ¿Tiʼ qo xnaqʼtzal tiʼj kyoj junjuntl taqikʼ?

⁹ Ma tzʼel qnikʼ tiʼj qa at jun mas nim toklen kyxol tyajil xuʼj, atzun jaʼlo qo yolin kyiʼj txqantl. Tqʼama apóstol Pablo alkye kʼloj tyajil xuʼj lu tej t-xi ttzʼibʼin tuʼj kye aj Judiy skʼoʼn maj ex kye junjuntl okslal. Tqʼama jlu: «Qatzun te Crist qeye, ax tok tiyjil Abraham qeye, ex at kyoklene tiʼj etzbʼil, ik tzaʼnx tyol Dios tzaj ttziyan» (Gál. 3:28, 29). Aj tjaw tskʼoʼn Jehová jun okslal tuʼn t-xiʼ toj kyaʼj, toj ambʼil aju in xi tqʼoʼn toklen tuʼn tten kyxol tyajil xuʼj. Tuʼn jlu, in nel qnikʼ tiʼj qa in nok Jesús ex qe 144,000 skʼoʼn maj te tyajil xuʼj (Apoc. 14:1). Kykyaqilx in nok tilil kyuʼn tuʼn tten kyximbʼetz ex kymod ik tzeʼn te Jehová.

¹⁰ Ya ma tzʼel qnikʼ tiʼj alkyeqe xjal in yolin Génesis 3:15 tiʼj. Atzun jaʼlo, qo xnaqʼtzan tiʼj tiʼ o bʼant tuʼn Jehová tuʼn tjapun twi tyol ex yajxitl kʼelel qnikʼ tiʼj tzeʼn in nonin profecía lu qiʼj toj ambʼil jaʼlo.

11. ¿Alkye tten ok txʼaʼn «t-xe tqan» tyajil xuʼj?

¹¹ In tzaj tqʼamaʼn Génesis 3:15 qa kʼokel ttxʼaʼn lobʼaj «t-xe tqan» tiyjil xuʼj. Japun kywi yol lu tej tokx tqʼoʼn Satanás toj kyximbʼetz xjal judiy ex te Roma tuʼn tkubʼ kybʼyoʼn Tkʼwal Dios (Luc. 23:13, 20-24). Qa ma kʼixbʼi t-xe tqan jun xjal, bʼalo mlay bʼet toj jun ambʼil. Chʼixme ax jlu bʼaj tiʼj Jesús, tej tkyim ya mintiʼ bʼant jun tiʼ tuʼn ex ten oxe qʼij toj muqbʼil (Mat. 16:21).

12. ¿Toj alkye ambʼil kbʼel pachʼuʼn twiʼ lobʼaj ex tzeʼn kbʼajel jlu?

¹² In tzaj tqʼamaʼn profecía tkuʼx toj Génesis 3:15 qa kbʼeltoq tpachʼuʼn tiyjil xuʼj twiʼ lobʼaj. Tuʼn tjapun twi profecía lu, iltoq tiʼj tuʼn tjaw anqʼin Jesús juntl maj. Tuʼn jlu, jaku txi qqʼamaʼn qa iltoq tiʼj tuʼn tbʼanix t-xe tqan tiyjil xuʼj otoq tzʼok txʼaʼn ex atzun jlu bʼaj. Tej tikʼ oxe qʼij tkyimlen  Jesús, jaw anqʼin ik tzeʼn jun anjel ex ya mlaytoq kyim. Ex aj tpon ambʼil ik tzeʼn o kubʼ t-ximen Jehová, kbʼel tpachʼuʼn Jesús twiʼ Satanás (Heb. 2:14). Kykyaqil qeju che kawil tukʼil Jesús toj kyaʼj, che onil tuʼn tkubʼ najsaʼn tiyjil lobʼaj, toj juntl yol, kykyaqil qeju aj qʼoj tiʼj Dios (Apoc. 17:14; 20:4, 10). *

13. Tuʼnju in japun twi profecía lu, ¿tzeʼn in nonin qiʼj?

¹³ Qa in najbʼen teya te Jehová, ya in tzaj tkʼamoʼna junjun kʼiwlabʼil tuʼnju in japun twi profecía lu. Tej tul Jesús tzalu twitz Txʼotxʼ, kubʼ tyekʼin qe tbʼanel tmod Ttat (Juan 14:9). Tuʼnju o kyaj tqʼoʼn jun tbʼanel techel qwitz, o tzʼonin qiʼj tuʼn tok qojtzqiʼn Jehová ex tuʼn tok qkʼujlaʼn. Ax ikx, o tzʼonin Jesús qiʼj kyuʼn xnaqʼtzbʼil in tzaj tqʼoʼn qe ex tuʼnju alkye tten in kubʼ nej twitz kʼloj okslal. O tzaj tyekʼin qe tzeʼn tuʼn qanqʼin tuʼntzun ttzalaj Jehová qiʼj. Ex jaku tzʼonin tkyimlen Jesús qiʼj qkyaqilx. Tej tjaw anqʼin, xi tkʼamoʼn Jehová chojbʼil tzʼaqli xi tqʼoʼn ex tuʼn tchkʼel in nel «ttxʼjoʼn tkyaqilju qil» (1 Juan 1:7).

14. ¿Tzeʼn in nel qnikʼ tiʼj qa kxeltoq tiʼn ambʼil tuʼn tjapun twi profecía tzaj tqʼamaʼn Jehová toj jardín te Edén?

¹⁴ Kyuʼn yol tqʼama Jehová toj jardín te Edén, in nel qnikʼ tiʼj qa kxel tiʼn ambʼil tuʼn tjapun twi profecía. Kxeltoq tiʼn ambʼil tuʼn tten tiyjil xuʼj, tuʼn tbʼaj tchmoʼn Tajaw il qe xjal che okel lepeʼ tiʼj ex tuʼn ttzaj qʼoj t-xol tiyjil tukʼil tiyjil xuʼj. ¿Tzeʼn in nonin qiʼj aj tel qnikʼ tiʼj jlu? In nonin qiʼj tuʼn tok qxqʼuqin qibʼ. ¿Tiquʼn? Tuʼnju che elel ikʼun tmajen Jehová kyuʼn xjal ateʼ tjaqʼ tkawbʼil Satanás. Tej tikʼ ambʼil, chʼixme ax tqanil lu xi tqʼamaʼn Jesús kye t-xnaqʼtzbʼen (Mar. 13:13; Juan 17:14). Qʼuqli qkʼuʼj tiʼj qa o tzʼok qqʼoʼn qwitz tiʼj tzeʼn o japun twi profecía lu, ex mas kyoj qeju mankbʼil 100 abʼqʼi. ¿Tiquʼn in xi qqʼamaʼn jlu?

15. ¿Tiquʼn mas in che el ikʼun tmajen Jehová toj ambʼil jaʼlo ex tiquʼn mintiʼ tuʼn qtzaj xobʼ te Satanás?

¹⁵ Xi qʼoʼn toklen Jesús tuʼn tkawin toj Tkawbʼil Dios toj abʼqʼi 1914 ex tej tikʼ chʼin ambʼil, etz t-xoʼn Tajaw il toj kyaʼj. Toj ambʼil jaʼlo, oʼkx in kawin Tajaw il tzalu twitz Txʼotxʼ ex in nayon tuʼn tkubʼ najsaʼn te jumajx (Apoc. 12:9, 12). Pero nya oʼkx in nayon Satanás tuʼn tkubʼ najsaʼn, sino in nok tilil tuʼn tuʼn tok tzoqpaj tiʼj ttnam Jehová (Apoc. 12:13, 17). Tuʼn jlu, mas in qo el ikʼun kyuʼn xjal. Noqtzun tuʼnj, mintiʼ jun tiquʼn tuʼn qtzaj xobʼ twitz Satanás ex kywitz qeju in che ok lepeʼ tiʼj. Sino jaku txi qqʼamaʼn tukʼil qʼuqbʼil qkʼuʼj ik tzeʼn te apóstol Pablo tej tkubʼ ttzʼibʼin jlu: «Qa a Dios qukʼil, ¿alkyetzun bʼaʼn tqʼojl qiʼj?» (Rom. 8:31). Jaku tzʼok qeʼ qkʼuʼj tiʼj Jehová tuʼnju ma tzʼel qnikʼ tiʼj qa chʼixme tkyaqil profecía tkuʼx toj Génesis 3:15 ya o japun twiʼ.

16-18. ¿Tzeʼn o tzʼonin tiʼj Curtis, Ursula ex Jessica tej tel kynikʼ tiʼj profecía tkuʼx toj Génesis 3:15?

¹⁶ Aju yol tzaj ttziyen Jehová toj Génesis 3:15, in nonin qiʼj tuʼn qex twitz alkyexku nya bʼaʼn. In najbʼen jun ermano Curtis tbʼi te misionero atz Guam ex in tzaj tqʼamaʼn jlu: «At maj kwest tuʼn ntene tzʼaqli twitz Jehová tuʼnju in chin  ok weʼye twitz junjun nya bʼaʼn. Pero aj nximane tiʼj profecía tkuʼx toj Génesis 3:15, o tzʼonin wiʼje tuʼn kukx tok qeʼ nkʼuʼje tiʼj Jehová». Taj Curtis tuʼn tpon ambʼil tuʼn tkubʼ tnajsaʼn Jehová tkyaqil nya bʼaʼn.

¹⁷ Atzunte juntl ermana Ursula tbʼi, in nanqʼin atz Baviera te tnam Alemania ex in tzaj tqʼamaʼn qa ok qeʼ tkʼuʼj tiʼj Tyol Dios tej tel tnikʼ tiʼj Génesis 3:15. Jun tiʼ jaw labʼin Ursula tiʼj, aju tej tel tnikʼ tiʼj qa at kymojbʼabʼil kyibʼ txqantl profecía tukʼil Génesis 3:15. Tqʼamatl Ursula jlu: «Kuʼpin toj wanmiye tej tel nnikʼe tiʼj qa jun rat bʼant jun tiʼ tuʼn Jehová tuʼn ttzaj tqʼoʼn jun qʼuqbʼil kykʼuʼj xjal».

¹⁸ Atzunte ermana Jessica in tzaj tqʼamaʼn jlu, aju in nanqʼin toj tnam Micronesia: «Naʼnx wuʼne tiʼ kubʼ nnaʼne tej tel nnikʼe tiʼj axix tok. Ya in japuntoq twi profecía te Génesis 3:15. Tej tel nnikʼe tiʼj profecía lu, ok qeʼ nkʼuʼje tiʼj qa nya tajtoq Jehová tuʼn qanqʼin ik tzeʼn qanqʼibʼil at jaʼlo. Ex tuʼn profecía lu, in nok qeʼ nkʼuʼje tiʼj qa mas tbʼanel qanqʼibʼil in ten toj ambʼil jaʼlo qa ma qo ajbʼen te Jehová ex qa kʼokel te mas tbʼanel toj ambʼil tzul».

19. ¿Tiquʼn qʼuqli qkʼuʼj tiʼj qa kbʼel pachʼuʼn twiʼ Satanás?

¹⁹ Ik tzeʼn ma tzʼel qnikʼ tiʼj, ya in japun twi profecía te Génesis 3:15. Ma tzʼel qnikʼ tiʼj alkye in nok te tiyjil xuʼj ex alkye in nok te tiyjil lobʼaj. Ax ikx, ma tzeʼl qnikʼ tiʼj qa a Jesús mas nim toklen kyxol tiyjil xuʼj ex ya o bʼanix t-xe tqan ok txʼaʼn tuʼn lobʼaj. Atzun jaʼlo, ya in kawin toj kyaʼj ex mlay kyim. Nya oʼkxju, ax ikx ya chʼinx ttzʼaqet kyajlal tiyjil xuʼj. Tuʼnju ya o japun twi tnejel plaj profecía lu, jaku tzʼok qeʼ qkʼuʼj tiʼj qa ax ikx kbʼel pachʼuʼn twiʼ Satanás. Che tzalajel kykyaqil tmajen Jehová aj tkubʼ najsaʼn Satanás. Akux in pon ambʼil lu, miʼn qo kubʼ numj ex bʼaʼn tuʼn tok qeʼ qkʼuʼj tiʼj Jehová. Toj chʼintl ambʼil, kʼajbʼel tiyjil xuʼj tuʼn Jehová tuʼn ttzaj tkʼiwlaʼn «kykyaqil qe nasyon twitz txʼotxʼ» (Gén. 22:18).