1. ¿Tiʼ qximbʼetz ktel tiʼj naʼj Dios?

 O TZAJ tqʼoʼn Jehová jun tbʼanel qoklen tuʼn qyolin tukʼil toj naʼj Dios. Qo ximen tiʼj tiʼ t-xilen jlu. Jaku txi qqʼamaʼn te Jehová tkyaqilju tkuʼx toj qanmi toj alkyexku ambʼil ex toj alkyexku yol, ex nya il tiʼj tuʼn t-xi qqanin permis te. Jaku qo naʼn Dios te Jehová maske atoʼ toj spital moqa toj cárcel ex jaku tzʼok qeʼ qkʼuʼj tiʼj qa in tzaj tbʼiʼn qnaʼj Dios. Nimxix in qo tzalaj tiʼj qoklen o tzaj tqʼoʼn Jehová.

2. ¿Tzeʼn kubʼ tyekʼin David qa nimtoq toklen naʼj Dios toj twitz?

² Ok tqʼoʼn aj kawil David toklen naʼj Dios. Xi tqʼamaʼn jlu te Jehová toj jun bʼitz: «Ikwit tzʼeʼla nnaʼj Diose ik tzaʼn storak in kubʼ patit twitza» (Sal. 141:1, 2). Toj tqʼijlalil David, ajbʼen jun incienso moqa storak kyuʼn aj Israel tuʼn kykʼulin te Jehová ex ok qʼoʼn te xjan. Bʼaj bʼinchaʼn incienso lu kyuʼn pal (Éx. 30:34, 35). Tej tyolin David tiʼj incienso, tajtoq tuʼn ttzaj tqʼamaʼn qa tnejel ximen tiʼjju xi tqʼamaʼn te Jehová toj tnaʼj Dios. Ax jlu qaj tuʼn tbʼant quʼn tuʼntzun ttzalaj Jehová kyiʼj qnaʼj Dios.

3. ¿Tiʼ qmod kbʼel qyekʼin aj qnaʼn Dios te Jehová ex tiquʼn?

³ Aj qyolin tukʼil Jehová toj naʼj Dios, nim toklen tuʼn qrespetarin te. Qo ximen tiʼjju ok tkeʼyin Isaías, Ezequiel, Daniel ex Juan toj jun witzikʼ. Maske junxitl tiʼ ok kykeʼyin, at jun tiʼ chʼixme axju ok kyqʼoʼn kywitz tiʼj. Ok kykeʼyin qa in nok Jehová te jun aj Kawil nimxix toklen.  Jun techel, ok tkeʼyin Isaías «Qman qʼuql tuj tqʼuqbʼil maʼ tjaw ex maʼ toklen» (Is. 6:1-3). Ax ikx te Ezequiel, ok tkeʼyin qa qʼuqli Jehová toj tkar toj kyaʼj ex «ik keʼyin ik tzaʼn qʼaqʼ in qoptzʼaj tkyaqil tiʼjele, mer ik tzaʼn t-xmakal lobʼaj» (Ezeq. 1:26-28). Atzunte Daniel, ok tkeʼyin «Tij Xjal» saq tiʼj ex qʼuqli toj tqʼuqbʼil in julin tiʼj tuʼn qʼaqʼ (Dan. 7:9, 10). Ex ok tkeʼyin Juan qa qʼuqli Jehová toj tqʼuqbʼil ex «at jun t-xmakal lobʼaj tiʼjele ju qʼuqbʼil ik keʼyin ik tzaʼn tal abʼj esmeralda» (Apoc. 4:2-4). Aj qximen tiʼj tajwalil Jehová, in tzaj tnaʼn qe qa o tzaj tqʼoʼn jun tbʼanel qoklen tuʼn qnaʼn Dios te. Tuʼntzunju, nim toklen tuʼn qrespetarin te aj qyolin tukʼil. ¿Tiʼtzun jaku txi qqʼamaʼn toj qnaʼj Dios?

4. ¿Tiʼ xnaqʼtzbʼil in nel qiʼn kyiʼj tnejel yol tqʼama Jesús toj Mateo 6:9 ex 10?

⁴ (Kjawil uʼjit Mateo 6:9, 10). Tej tex tqʼoʼn Jesús tchikʼbʼabʼil twi jun witz, xi tyekʼin kye t-xnaqʼtzbʼen tzeʼn tuʼn kynaʼn Dios tuʼntzun ttzalaj Jehová kyiʼj. Tej otoqxi txi tqʼamaʼn kye «che naʼne Dios kyjaʼ», xi tqʼamaʼn kye alkyeqe tiʼchaq at kyoklen tukʼil tajbʼil Jehová. Xi tqanin tuʼn tok tbʼi Jehová te xjan, tuʼn tul Tkawbʼil ex tuʼn tjapun twi tyol o tzaj ttziyen tiʼj Txʼotxʼ ex kyiʼj xjal. Qa ma txi qqanin qe tiʼchaq lu toj qnaʼj Dios, in kubʼ qyekʼin qa nim toklen tajbʼil Jehová toj qwitz.

5. ¿Tiquʼn in xi qqʼamaʼn qa jaku txi qqanin junjuntl tiʼchaq te Jehová?

⁵ Toj tkabʼin plaj naʼj Dios kyaj tyekʼin Jesús, tqʼama qa jaku txi qqanin junjuntl tiʼchaq te Jehová. Jaku txi qqanin te tuʼn ttzaj tqʼoʼn qwa junjun qʼij, tuʼn tkubʼ tnajsaʼn qil, tuʼn qok t-xqʼuqin tiʼj nya bʼaʼn ex tuʼn tonin qiʼj tuʼn miʼn tkubʼ qiʼj tuʼn Satanás (Mat. 6:11-13). Aj t-xi qqanin tkyaqil jlu te Jehová, in kubʼ qyekʼin qa qʼuqli qkʼuʼj tiʼj ex qa qaj tuʼn ttzalaj qiʼj.

6. ¿Jakupe txi qqanin junjuntl tiʼchaq toj qnaʼj Dios?

⁶ Nya tajtoq Jesús tuʼn t-xi kyqanin t-xnaqʼtzbʼen oʼkx qeju tiʼchaq otoq  tqʼama. ¿Tiquʼn in xi qqʼamaʼn jlu? Tuʼnju tej tnaʼn Dios kyoj junjuntl ambʼil, ax ikx naʼn Dios kyiʼj junjun tiʼchaq in bʼajtoq tkʼuʼj tiʼj (Mat. 26:39, 42; Juan 17:1-26). Ax ikx qe, jaku qo naʼn Dios kyiʼj junjuntl tiʼchaq in bʼaj qkʼuʼj tiʼj. Jun techel, jaku txi qqanin qnabʼil ex qojtzqibʼil te Jehová aj tkubʼ qximen tuʼn tbʼant jun tiʼ quʼn (Sal. 119:33, 34). Ex aj ttzaj qʼoʼn jun qoklen kwest in nela toj qwitz, jaku txi qqanin te Jehová tuʼn tonin qiʼj (Prov. 2:6). Nya oʼkxju, ax ikx jaku che naʼn mambʼaj Dios kyiʼj kykʼwal ex jaku che naʼn kʼwalbʼaj Dios kyiʼj kyman. Ex bʼaʼn tuʼn qnaʼn Dios kyiʼj xjal in che xnaqʼtzan tiʼj Biblia qukʼil ex kyiʼj xjal in qo yolin kyukʼil toj pakbʼabʼil. Pero nya oʼkx tuʼn t-xi qqanin qe tiʼchaq te Jehová, sino ax ikx il tiʼj tuʼn kybʼant junjuntl tiʼchaq quʼn.

7. ¿Tiquʼn bʼaʼn tuʼn tjaw qnimsaʼn Jehová aj qnaʼn Dios?

⁷ Ax ikx, il tiʼj tuʼn tjaw qnimsaʼn Jehová aj qnaʼn Dios te. Mintiʼ juntl xjal at toklen tuʼn tjaw nimset ik tzeʼn te. Kyaj ttzʼibʼin jun salmista jlu: «Porke bʼaʼna Nman ex in kubʼ tnajsaʼna kyil xjal». Ex tqʼamatl jlu: «Atzun teya Nman Dios, at tkʼujlalila ex at tqʼaqʼbʼil tkʼuʼja, at tpasensa, maʼxix ju tkʼujlalila ex axix tok tyola» (Sal. 86:5, 15). At nim tiquʼn tuʼn tjaw qnimsaʼn Jehová. Jaku jaw qnimsaʼn tuʼnju ateʼ tbʼanel tmod ex tuʼnju in che bʼant nim tiʼchaq tuʼn.

8. ¿Alkye junjun tiʼchaq jaku txi qqʼoʼn chjonte kyiʼj aj qnaʼn Dios? (Salmo 104:12-15, 24).

⁸ Nim toklen tuʼn tjaw qnimsaʼn Jehová aj qnaʼn Dios, pero ax ikx nim toklen tuʼn t-xi qqʼoʼn chjonte te tiʼj tkyaqil tbʼanel tiʼchaq in tzaj tqʼoʼn qe. Jaku txi qqʼoʼn chjonte te kyiʼj tbʼanel kycolor bʼech, kyiʼj tbʼanel wabʼj ex kyiʼj tbʼanel qamiw. In tzaj tqʼoʼn Jehová tkyaqil jlu qe ex junjuntl tiʼchaq tuʼnju taj tuʼn qtzalaj (kjawil uʼjit Salmo 104:12-15, 24). Ex aju mas nim toklen, bʼaʼn tuʼn t-xi qqʼoʼn chjonte te tuʼnju in tzaj tqʼoʼn nim xnaqʼtzbʼil qe ex tuʼnju in tzaj tqʼoʼn jun qʼuqbʼil qkʼuʼj tiʼj ambʼil tzul.

9. ¿Tiʼ jaku bʼant quʼn tuʼn miʼn tikʼ tnaʼl quʼn tuʼn t-xi qqʼoʼn chjonte te Jehová? (1 Tesalonicenses 5:17, 18).

 ⁹ Jun rat jaku tzikʼ tnaʼl quʼn tuʼn t-xi qqʼoʼn chjonte te Jehová tiʼj tkyaqilju in bʼant tuʼn qiʼj. ¿Tiʼ jaku bʼant quʼn tuʼn miʼn tbʼaj jlu qiʼj? Jaku kubʼ qtzʼibʼin qe tiʼchaq in xi qqanin te Jehová toj qnaʼj Dios ex aj tikʼ chʼin ambʼil, jaku tzʼok qqʼoʼn qwitz tiʼj qa o tzaj ttzaqʼweʼn aju xi qqanin te. Yajxitl, bʼaʼn tuʼn t-xi qqʼoʼn chjonte te (kjawil uʼjit 1 Tesalonicenses 5:17, 18). In qo tzalaj aj ttzaj kyqʼoʼn txqantl chjonte qe. Ax ikx te Jehová, in tzalaj aj t-xi qqʼoʼn chjonte te tuʼnju in tzaj ttzaqʼweʼn qnaʼj Dios (Col. 3:15). Pero at juntl tiʼ nim toklen tuʼn t-xi qqʼoʼn chjonte te Jehová. Qo xnaqʼtzan tiʼj alkye.

10. ¿Tiquʼn il tiʼj tuʼn t-xi qqʼoʼn chjonte te Jehová tuʼnju tzaj tsamaʼn Tkʼwal? (1 Pedro 2:21).

¹⁰ (Kjawil uʼjit 1 Pedro 2:21). Bʼaʼn tuʼn t-xi qqʼoʼn chjonte te Jehová tuʼnju tzaj tsamaʼn Tkʼwal tuʼn ttzaj tqʼoʼn xnaqʼtzbʼil qe. Aj qxnaqʼtzan tiʼj tanqʼibʼil Jesús, in nel qnikʼ tiʼj Jehová ex tiʼjju taj tuʼn tbʼant quʼn. Qa ma tzʼok qeʼ qkʼuʼj tiʼj chojbʼil bʼant tuʼn Jesús, jaku ten jun tbʼanel qamiwbʼil tukʼil Jehová ex jaku qo tzalaj (Rom. 5:1).

11. ¿Tiquʼn in qo naʼn Dios toj tbʼi Jesús?

¹¹ In xi qqʼoʼn chjonte te Jehová tuʼnju jaku qo naʼn Dios te toj tbʼi Tkʼwal. In najbʼen Jesús tuʼn tuʼn ttzaj tqʼoʼn aju in xi qqanin te. Qa ma qo naʼn Dios toj tbʼi Jesús, in nok tqʼoʼn Jehová twiʼ qiʼj ex in qo tzaj ttzaqʼweʼn. Tqʼama Jesús jlu: «Tkyaqiljuʼ kxeʼl kqaniʼneʼ toj nbʼiyeʼ, ktzajel nqʼoʼnweʼ tuʼntzun tjaw nimsaʼn tbʼijuʼ Nmaneʼ» (Juan 14:13, 14, XT).

12. ¿Alkye juntl tiquʼn kxel qqʼoʼn chjonte te Jehová tiʼj Tkʼwal?

¹² In kubʼ tnajsaʼn Jehová qil noq tuʼn chojbʼil bʼant tuʼn Jesús. In tzaj tqʼamaʼn Tyol Dios qa a Jesús «tnejel pal» ex qa «qʼuql tuj bʼanqʼabʼaj ttxlaj tqʼuqbʼil Dios tuj kyaʼj, jatum in kawin» (Heb. 8:1). Ax ikx in tzaj tqʼamaʼn jlu: «At jun yolil qʼij tukʼil Qman Dios, ate Jesucrist aju tzʼaqlxix» (1 Juan 2:1). In xi qqʼoʼn chjonte te Jehová tuʼnju o tzaj tqʼoʼn jun Tnejel Pal in tzaj qʼaqʼin tkʼuʼj qiʼj, in nel tnikʼ tiʼjju jaku bʼant quʼn ex «in kubʼsan qiʼj» (Rom. 8:34; Heb. 4:15). Noqwit mintiʼ kyim Jesús tuʼn tchjet qil, mlaylo bʼant tuʼn qnaʼn Dios te Jehová tuʼnju aj il qoʼ. Mintiʼ in che kanet yol quʼn tuʼn t-xi qqʼoʼn chjonte te Jehová tuʼnju tzaj tsamaʼn Jehová Tkʼwal tuʼn tchjet qil.

13. ¿Tzeʼn kubʼ tyekʼin Jesús tkʼujlabʼil kyiʼj t-xnaqʼtzbʼen toj qonikʼen tej chʼixtoq tkyim?

¹³ Toj qonikʼen tej chʼixtoq tkyim Jesús, nim ambʼil naʼn Dios kyiʼj t-xnaqʼtzbʼen ex xi tqanin te Jehová tuʼn t-xqʼuqin kyiʼj tuʼn miʼn kykubʼ tuʼn Satanás (Juan 17:15). Kubʼ tyekʼin Jesús tkʼujlabʼil kyiʼj. Ex kukx ximen kyiʼj t-apóstol maske chʼixtoq tok weʼ twitz nimxix nya bʼaʼn.

14. ¿Tzeʼn in kubʼ qyekʼin qa kʼujlaʼn qe erman quʼn?

¹⁴ Nya oʼkx in qo ximen qiʼjx aj qnaʼn Dios. Sino in nok tilil quʼn tuʼn qnaʼn Dios kyiʼj erman ik tzeʼn bʼant tuʼn Jesús. Qa ma bʼant jlu quʼn, in kubʼ qyekʼin qa in xi qbʼiʼn kawbʼil kyaj tqʼamaʼn Jesús tuʼn tok qkʼujlan qibʼ qxolx ex in kubʼ  qyekʼin te Jehová qa kʼujlaʼn qe erman quʼn (Juan 13:34). Ojtzqiʼn quʼn qa nya noqx gan in qo naʼn Dios kyiʼj tmajen Jehová. ¿Tiquʼn? Tuʼnju in tzaj tqʼamaʼn Tyol Dios jlu: «Aju tnaʼj Dios ju xjal tzʼaqlxix at nim tipumal ex nim in tbʼinchaʼn» (Sant. 5:16).

15. ¿Tiquʼn bʼaʼn tuʼn qnaʼn Dios kyiʼj erman?

¹⁵ Bʼaʼn tuʼn qnaʼn Dios kyiʼj erman tuʼnju in che ok weʼ twitz nimku nya bʼaʼn. Jaku txi qqanin te Jehová tuʼn tonin kyiʼj aj kyok weʼ twitz ambʼil kwest ik tzeʼn jun yabʼil, qe xitbʼil tuʼnx twitz txʼotxʼ, ikʼbʼil ex qʼoj. Ax ikx, jaku qo naʼn Dios kyiʼj erman in che onin aj ttzaj xitbʼil. Qa ojtzqiʼn quʼn qa in bʼaj jlu tiʼj jun erman, jaku qo naʼn Dios tiʼj. Qa ma qo naʼn Dios kyiʼj erman lu, in kubʼ qyekʼin qa kʼujlaʼn qe quʼn.

16. ¿Tiquʼn bʼaʼn tuʼn qnaʼn Dios kyiʼj erman qʼil twitz aqʼuntl?

¹⁶ In che tzalaj erman qʼil twitz aqʼuntl toj kʼloj okslal aj qnaʼn Dios kyiʼj. Atzun jlu kubʼ tnaʼn apóstol Pablo. Kubʼ ttzʼibʼin jlu: «Ax ikx che naʼne Dios wiʼje tuʼn ttzaj tqʼoʼn Dios yol weye, tuʼntzun nyoline mintiʼ nxobʼile, tuʼn t-xi nchikʼbʼaʼne tqanil kolbʼil aju ewantoq nej» (Efes. 6:19). Ax ikx toj ambʼil jaʼlo, ateʼ erman in che kubʼ nej twitz aqʼuntl. Aj t-xi qqanin te Jehová tuʼn ttzaj tkʼiwlaʼn tkyaqilju in bʼant kyuʼn, in kubʼ qyekʼin qa kʼujlaʼn qe quʼn.

17, 18. ¿Toj alkye ambʼil jaku tzaj qʼamaʼn qe tuʼn qnaʼn Dios kywitz txqantl ex tiʼ bʼaʼn tuʼn ttzaj qnaʼn?

¹⁷ Atlo maj jaku tzaj qʼamaʼn qe tuʼn qnaʼn Dios kywitz txqantl. Jun techel, aj t-xiʼ jun ermana qʼol xnaqʼtzbʼil tiʼj Tyol Dios tukʼil juntl ermana, jaku txi tqanin te tuʼn tok tqʼoʼn naʼj Dios. Qa nya ojtzqiʼnxix xjal tuʼn ermana, maslo bʼaʼn qa ma naʼn Dios aj tkubʼaj xnaqʼtzbʼil. Iktzun tten jaku tzʼel tnikʼ tiʼj tiʼ jaku txi tqanin te Jehová tuʼn tonin tiʼj xjal.

¹⁸ ¿Yajtzun qa ma txi qʼamaʼn te jun ermano tuʼn tok tqʼoʼn naʼj Dios tiʼj pakbʼabʼil moqa toj chmabʼil? Aj t-xi qʼoʼn oklenj lu kye ermano, nim toklen tuʼn ttzaj kynaʼn alqiʼj che naʼl Dios. Mintiʼ tuʼn t-xi  kyqʼoʼn jun kawbʼil kye erman toj kynaʼj Dios nix tuʼn t-xi kyqʼamaʼn jun tqanil. Chʼixme kyoj kykyaqil chmabʼil, in tzaj qʼoʼn jweʼ minut tuʼn tok bʼitz ex naʼj Dios. Tuʼntzunju, mintiʼ tuʼn tajbʼen nim yol kyuʼn aj kynaʼn Dios, ex mas aj tok naʼj Dios aj t-xi tzyet chmabʼil (Mat. 6:7).

19. ¿Tiʼ kʼonil qiʼj tuʼn tbʼaj qbʼinchaʼn qten akux in nul tqʼij Jehová?

¹⁹ Tuʼnju chʼix tul tqʼij Jehová, nim toklen tuʼn kukx qnaʼn Dios. Tej tyolin Jesús tiʼj jlu, tqʼama: «Che xqʼuqine ex che naʼne Dios tkyaqil qʼij, tuʼntzun kykolpaje te tkyaqilju tzul» (Luc. 21:36). Qa kukx ma qo naʼn Dios, mlayx qo chewix toj qokslabʼil ex bʼantni qten aj tul tqʼij Jehová.

20. ¿Tiʼ jaku bʼant quʼn tuʼn kyok qnaʼj Dios ik tzeʼn tbʼanel tkʼokʼjal incienso?

²⁰ ¿Tiʼ ma tzʼel qnikʼ tiʼj toj xnaqʼtzbʼil lu? Ma tzʼel qnikʼ tiʼj qa tbʼanel tuʼn tok qqʼoʼn toklen naʼj Dios. Ax ikx, ma tzʼel qnikʼ tiʼj qa tnejel kxel qqanin qe tiʼchaq at kyoklen tukʼil tajbʼil Jehová. Nya oʼkxju, ax ikx in xi qqʼoʼn chjonte te Jehová tiʼj Tkʼwal ex tiʼj Tkawbʼil, ex in qo naʼn Dios kyiʼj erman. Ex jaku txi qqanin te Jehová tuʼn ttzaj tqʼoʼn aju at tajbʼen qe ex tuʼn tonin qiʼj tuʼn tchʼiy qamiwbʼil tukʼil. Aj qximen tiʼjju kxel qqʼamaʼn te Jehová, in kubʼ qyekʼin qa in nok qqʼoʼn toklen naʼj Dios. Qa ma bʼant jlu quʼn, che okel qyol ik tzeʼn tbʼanel tkʼokʼjal incienso toj twitz Jehová ex kxel «tkʼmoʼn [...] tukʼil tzalajbʼil» (Prov. 15:8).