XNAQʼTZBʼIL 29
Qo onin tiʼj Jesús aju nejenel qwitz
«Ma tzaj qʼoʼn woklene tiʼj tkyaqilju at tuj kyaʼj ex twitz txʼotxʼ» (MAT. 28:18).
BʼITZ 13 A Jesús techel qwitz
AJU KʼELEL QNIKʼ TIʼJ *
1. ¿Tiʼ taj Jehová tuʼn tbʼant?
TAJ Jehová tuʼn t-xi pakbʼet tbʼanel tqanil tiʼj Tkawbʼil twitz tkyaqil Txʼotxʼ (Mar. 13:10; 1 Tim. 2:3, 4). Nim toklen aqʼuntl lu ex a Jehová tajaw. Tuʼntzunju, o jaw tskʼoʼn Tkʼwal tuʼn tkubʼ nej twitz pakbʼabʼil. Tuʼnju a Jesús in kubʼ nej qwitz, jaku tzʼok qeʼ qkʼuʼj tiʼj qa kbʼantel aqʼuntl ik tzeʼn taj Jehová tzmaxi aj tul xitbʼil (Mat. 24:14).
2. ¿Tiʼ kʼelel qnikʼ tiʼj toj xnaqʼtzbʼil lu?
2 Toj xnaqʼtzbʼil lu, kʼelel qnikʼ tiʼj qa in najbʼen «majen in bʼant taqʼun [...] ex at tnabʼl» tuʼn Jesús tuʼn ttzaj tqʼoʼn xnaqʼtzbʼil qe tiʼj Tyol Dios ex tuʼn tbʼaj tnukʼuʼn aqʼuntl tiʼj pakbʼabʼil twitz tkyaqil Txʼotxʼ (Mat. 24:45). Ax ikx, kʼelel qnikʼ tiʼj tzeʼn jaku qo onin tiʼj Jesús ex tiʼj majen in bʼant taqʼun.
IN KUBʼ NEJ JESÚS TWITZ PAKBʼABʼIL
3. ¿Tiʼ oklenj o txi qʼoʼn te Jesús?
3 In kubʼ nej Jesús twitz pakbʼabʼil toj ambʼil jaʼlo. ¿Tzeʼn ojtzqiʼn jlu quʼn? Tej chʼixtoq tmeltzʼaj toj kyaʼj, ok tchmon tibʼ kyukʼil junjun t-xnaqʼtzbʼen twi jun witz toj tnam Galilea ex xi tqʼamaʼn jlu kye: «Ma tzaj qʼoʼn woklene tiʼj tkyaqilju at tuj kyaʼj ex twitz txʼotxʼ». Ex bʼaʼn tuʼn tok qqʼoʼn qwiʼ kyiʼj yol tqʼama yajxitl: «Kyjaʼtzun kyxiʼye, kymanxe kye xjal tuʼn kyok te nxnaqʼtzbʼene kyuj kykyaqil nasyon» (Mat. 28:18, 19). Kyxol qe tiʼchaq o txi qʼoʼn toklen Jesús tiʼj, ax ikx o txi qʼoʼn toklen tuʼn tkubʼ nej twitz pakbʼabʼil.
4. ¿Tiquʼn in nok qeʼ qkʼuʼj tiʼj qa kukx in kubʼ nej Jesús twitz pakbʼabʼil toj ambʼil jaʼlo?
4 Kyaj tqʼamaʼn Jesús qa kxel pakbʼet tbʼanel tqanil ex qa kxel qʼet xnaqʼtzbʼil kye xjal tuʼn kyok te t-xnaqʼtzbʼen «kyuj kykyaqil nasyon». Ax ikx tqʼama qa kteltoq kyukʼil t-xnaqʼtzbʼen akux «in japun bʼaj mankbʼil tqʼijlalil» (Mat. 28:20). In tzaj kyyekʼin yol lu qa kukx in kubʼ nej Jesús twitz pakbʼabʼil toj ambʼil jaʼlo.
5. ¿Tzeʼn in qo onin tuʼn tjapun twi profecía tkuʼx toj Salmo 110:3?
5 Ok qeʼ tkʼuʼj Jesús tiʼj qa che oniltoq nim xjal tiʼj pakbʼabʼil kyoj bʼajsbʼil tqʼijlalil. Ex ojtzqiʼntoq tuʼn qa kjapunel kywi yol lu: «Aj tkubʼ neja toj qʼoj, kyuʼnx kyibʼ xjal etzan tuʼna che onil tiʼja» (Sal. 110:3, TNM). Qa in pakbʼan teya tiʼj tbʼanel tqanil, in nonina tiʼj Jesús ex tiʼj majen in bʼant taqʼun, axpe ikx in nonina tuʼn tjapun twi profecía lu. Noqtzun tuʼnj, kukx in qo ok weʼ kywitz junjun nya bʼaʼn aj qpakbʼan.
6. ¿Alkye jun nya bʼaʼn in qo ok weʼ twitz toj pakbʼabʼil?
6 Jun kyxol nya bʼaʼn in qo ok weʼ twitz toj pakbʼabʼil, aju ikʼbʼil. In che yolin apóstata, qe aj kawil ex qe nejenel kye okslabʼil nya ax tok yol tiʼj pakbʼabʼil. Qa ma txi kynimen qfamiliar ex qe xjal ojtzqiʼn kywitz quʼn qe nya ax tok yol, jakulo tzʼok tilil kyuʼn tuʼn tkyaj qkolin tuʼn qajbʼen te Jehová ex tuʼn qpakbʼan. Kyoj junjun tnam, in nok tilil kyuʼn aj qʼoj tuʼn qtzaj xobʼ, in nok kybʼinchaʼn nya bʼaʼn qiʼj ex at maj in qox kyiʼn toj cárcel. Pero mintiʼ in qo jaw labʼin tiʼj jlu tuʼnju kyaj tqʼamaʼn Jesús jlu: «Che elel ikʼune kyuʼn kykyaqil xjal tuʼn tlaj okslal qeye wiʼje» (Mat. 24:9). Tuʼnju in qo el ikʼun, in nel nikʼbʼaj tiʼj qa in qo ok lepeʼ tiʼj Jesús ex qa in tzalaj Jehová qiʼj (Mat. 5:11, 12). In nok tbʼinchaʼn Tajaw il nya bʼaʼn qiʼj, pero mlayx kambʼan tiʼj Jesús. Tuʼnju in nonin Jesús tiʼj aqʼuntl, in pon tbʼanel tqanil kyukʼil kykyaqil xjal toj tkyaqil nasyon.
7. ¿Tzeʼn in nel tnikʼa tiʼj qa in che japun kywi yol tkuʼx toj Apocalipsis 14:6 ex 7?
7 Ax ikx, kwest tuʼn qpakbʼan kye kykyaqil xjal tuʼnju in che yolin toj nim yol. Toj jun witzikʼ, xi tqʼamaʼn Jesús te apóstol Juan qa nya tuʼn jlu mlay txi pakbʼet tbʼanel tqanil (kjawil uʼjit Apocalipsis 14:6, 7). ¿Tiʼ o bʼant tuʼn ttnam Jehová tuʼn t-xi pakbʼet tbʼanel tqanil kye kykyaqil xjal? O kubʼ tqʼoʼn nim xnaqʼtzbʼil toj tembʼil te Internet jw.org toj mas te 1,000 yol. Ax ikx, o txi tqʼoʼn Kʼloj Xjal Qʼil Twitz Aqʼuntl ambʼil tuʼn tkubʼ traducirit libro in najbʼen quʼn tuʼn qqʼon xnaqʼtzbʼil toj mas te 700 yol. ¿Alkyetzun libro lu? Aju libro Tzalaja tiʼj tanqʼibʼila. Nya oʼkxju, ax ikx o che kubʼ bʼinchaʼn nim video tuʼntzun tok kykeʼyin qeju tẍkyin kywiʼ ex o bʼaj bʼinchaʼn nim xnaqʼtzbʼil toj braille kye qeju moẍ. Tuʼn jlu, jaku tzʼel kynikʼ mas xjal tiʼj Tyol Dios. In nok qqʼoʼn qwitz tiʼj tzeʼn in che japun kywi profecía toj ambʼil jaʼlo tuʼnju ateʼ nim xjal kye txqan nasyon in nel kynikʼ tiʼj axix tok tiʼj Tyol Dios (Zac. 8:23; Sof. 3:9). In bʼaj tkyaqil jlu tuʼnju a Jesús in kubʼ nej twitz pakbʼabʼil.
8. ¿Tiʼ tbʼanel o tzaj tuʼn pakbʼabʼil?
8 Toj ambʼil jaʼlo, ateʼ mas te 8 millón xjal toj ttnam Jehová ex in che anqʼin toj 240 tnam ex tembʼil te pakbʼabʼil. Ex tkyaqil abʼqʼi in che bautisarin mas xjal. Pero nya nim toklen jniʼ kyajlal xjal in che bautisarin. Aju mas nim toklen, in kubʼ kyyekʼin tbʼanel kymod ex in nok tqʼoʼn Tyol Dios tbʼi jlu te akʼaj qten moqa qbʼinchbʼen (Col. 3:8-10). O tzʼok tilil kyuʼn nim xjal lu tuʼn tkyaj kytzaqpiʼn yaẍbʼil, ikʼbʼil, qe nya bʼaʼn kymod ex ya mintiʼ in jaw kynimsan kyibʼ tiʼj kytnam. Tuʼn jlu, in nel qnikʼ tiʼj qa in japun twi profecía tkuʼx toj Isaías 2:4 jatumel in tzaj qʼamaʼn jlu: «Mlayx kykʼam juntl maj xnaqʼtzbʼil tuʼn tbʼant kyqʼojin». Tuʼnju in nok tilil quʼn tuʼn kyten tbʼanel qmod, in kubʼ qyekʼin qa in qo ok lepeʼ tiʼj Jesús ex tuʼn jlu in qo onin kyiʼj xjal tuʼn tel kynikʼ tiʼj Jehová (Juan 13:35; 1 Ped. 2:12). Nya kukx in bʼaj jlu, sino in nonin Jesús qiʼj.
O TXI TQʼOʼN JESÚS TOKLEN JUN MAJEN
9. Ik tzeʼn in tzaj tqʼamaʼn Mateo 24:45 a 47, ¿tiʼ kyaj tqʼamaʼn Jesús tuʼn tbʼaj kyoj bʼajsbʼil tqʼijlalil?
9 (Kjawil uʼjit Mateo 24:45-47). Kyaj tqʼamaʼn Jesús qa ktel jun «majen in bʼant taqʼun [...] ex at tnabʼl» kyoj bʼajsbʼil tqʼijlalil ex tzul tqʼoʼn xnaqʼtzbʼil qe tiʼj Tyol Dios. Tuʼntzunju, in nok tilil tuʼn majen lu tuʼn taqʼunan toj ambʼil jaʼlo ex atzun jlu in bʼant tuʼn. In che ajbʼen junjun okslal skʼoʼn maj tuʼn Jesús tuʼn t-xi tqʼoʼn xnaqʼtzbʼil ok tpon or kye tmajen Dios ex kye qeju xjal kyaj tuʼn tel kynikʼ tiʼj axix tok. Mintiʼ in che ok okslal lu te tajaw kyokslabʼil txqantl (2 Cor. 1:24). Sino in nel kynikʼ tiʼj qa a Jesús «nejenel ex qʼol xnaqʼtzbʼil kye xjal» (Is. 55:4).
10. ¿Alkye jun kyxol qe libro tkubʼ toj dibujo onin tiʼja tuʼn tok tojtzqiʼna Jehová?
10 Atxix toj abʼqʼi 1919, o tzʼok tilil tuʼn majen in bʼant taqʼun tuʼn kyetz nim uʼj tuʼntzun tel kynikʼ xjal tiʼj axix tok. Toj abʼqʼi 1921, etz uʼj El Arpa de Dios toj inglés tuʼntzun tel kynikʼ xjal kyiʼj xnaqʼtzbʼil nim kyoklen tkuʼx toj Tyol Dios. Ex tej tbʼet ambʼil, ax ikx i etz junjuntl uʼj. Yajtzun teya, ¿alkye uʼj onin tiʼja tuʼn tok tojtzqiʼna Jehová ex tuʼn tok tkʼujlaʼna? Bʼalo onin jun kyxol qe libro lu tiʼja: «Sea Dios veraz», La verdad que lleva a vida eterna, Usted puede vivir para siempre en el paraíso en la Tierra, El conocimiento que lleva a vida eterna, ¿Tiʼ in tzaj t-xnaqʼtzaʼnxix Tyol Dios? moqa ¿Tiʼ in tzaj t-xnaqʼtzaʼn Tyol Dios qe? Moqa in xnaqʼtzana tukʼil akʼaj libro Tzalaja tiʼj tanqʼibʼila. E bʼaj bʼinchaʼn uʼj lu tuʼn qonin kyiʼj xjal tuʼn kyok te t-xnaqʼtzbʼen Jesús ex o che kubʼ bʼinchaʼn toj ambʼil mas tbʼanel.
11. ¿Tiquʼn qkyaqilx nim toklen tuʼn ttzaj qkʼamoʼn xnaqʼtzbʼil tiʼj Tyol Dios?
11 Nya oʼkx qe xjal in che xnaqʼtzan il tiʼj tuʼn tel kynikʼ tiʼj Jehová ex tiʼj Tyol. Sino qkyaqilx il tiʼj tuʼn tbʼant quʼn. Kubʼ ttzʼibʼin apóstol Pablo jlu: «Atzunju wabʼj in ajbʼen kye qeju ma che chʼiy». Ax ikx tqʼama qa jaku tzʼel qnikʼ «tiʼj alkyeju bʼaʼn ex alkyeju mya bʼaʼn» qa ma kubʼ qbʼinchaʼn aju in nel qnikʼ tiʼj (Heb. 5:14). Bʼalo kwest jaku tzʼela toj qwitz tuʼn t-xi qnimen qe tkawbʼil Jehová tuʼnju nim xjal in che yaẍin. Noqtzun tuʼnj, in tzaj tqʼoʼn Jesús tbʼanel xnaqʼtzbʼil qe tuʼntzun tchʼiy qamiwbʼil tukʼil Jehová ex atz in che jatz xnaqʼtzbʼil lu toj Tyol Dios. Aj tbʼaj tbʼinchaʼn majen in bʼant taqʼun tkyaqil xnaqʼtzbʼil lu, a Jesús in kubʼ nej twitz.
12. ¿Tiʼ o bʼant quʼn tuʼn tjaw qnimsaʼn tbʼi Jehová ik tzeʼn bʼant tuʼn Jesús?
12 Ik tzeʼn bʼant tuʼn Jesús, ax ikx qe in nok qqʼoʼn toklen tbʼi Jehová (Juan 17:4, 26). Jun techel, toj abʼqʼi 1931 ok qʼoʼn qbʼi te testigos de Jehová. Iktzun tten in kubʼ qyekʼin qa nim toklen tbʼi Jehová toj qwitz ex qa qaj tuʼn tel kynikʼ txqantl tiʼj qa tok tbʼi qiʼj (Is. 43:10-12). Ex toj octubre te 1931, xi tzyet tuʼn tok qʼoʼn tbʼi Jehová tiʼj t-xkʼomil uʼj lu toj yol inglés. Nya oʼkxju, ax ikx o kux qʼoʼn tbʼi toj Traducción del Nuevo Mundo ik tzeʼn in kanet kyoj ojtxe uʼj. Junxitl jlu twitzju in bʼant kyuʼn txqantl okslabʼil tuʼnju o jatz kyiʼn tbʼi Jehová kyoj Biblia o che kubʼ kytraducirin.
IN BʼAJ TNUKʼUʼN JESÚS QE T-XNAQʼTZBʼEN
13. ¿Tiquʼn in nok qeʼ tkʼuʼja tiʼj qa in najbʼen majen in bʼant taqʼun tuʼn Jesús? (Juan 6:68).
13 In najbʼen «majen in bʼant taqʼun [...] ex at tnabʼl» tuʼn Jesús tuʼntzun kyten tmajen Jehová tzalu twitz Txʼotxʼ ex in che onin tiʼj kʼulbʼil axix tok. ¿Tiʼ teya t-xim kyiʼj tmajen Dios lu? Bʼalo ax t-ximbʼetza at kyiʼj ik tzeʼn te apóstol Pedro tej t-xi tqʼamaʼn jlu te Jesús: «Tat, ¿al ukʼil qo xeʼle? Oʼkx aya at yol tukʼila in tqʼoʼn chwinqlal te jumajx» (Juan 6:68). Noqwit mintiʼ ok qojtzqiʼn ttnam Jehová, ¿tiʼwtlo bʼaj qiʼj? In najbʼen ttnam Jehová tuʼn Jesús tuʼn ttzaj tqʼoʼn xnaqʼtzbʼil qe tuʼn tchʼiy qamiwbʼil tukʼil Jehová ex in tzaj tqʼoʼn onbʼil qe tuʼn tbʼant-xix qqʼon xnaqʼtzbʼil. Nya oʼkxju, ax ikx in nonin qiʼj tuʼn tok qqʼoʼn akʼaj qten tuʼntzun ttzalaj Jehová qiʼj (Efes. 4:24).
14. Tuʼnju at teya toj ttnam Jehová, ¿tzeʼn o tzʼonin jlu tiʼja akux at pandemia?
14 Aj qok weʼ twitz ambʼil kwest, in tzaj tyekʼin Jesús qbʼe tojxix tumel. Atzun jlu ok qqʼoʼn qwitz tiʼj tej ttzaj COVID-19. Mintiʼ el kynikʼ xjal tiʼj tiʼ tuʼn tbʼant kyuʼn, atzunte Jesús kubʼ nej twitz majen in bʼant taqʼun tuʼntzun ttzaj tqʼamaʼn qe tiʼ tuʼn tbʼant quʼn tuʼn tok qxqʼuqin qibʼ. Tzaj qʼamaʼn qe tuʼn tajbʼen mascarilla quʼn jatumel ateʼ nim xjal ex tuʼn miʼn qok laqʼeʼ nqayin kytxlaj. Ax ikx, xi qʼamaʼn kye ansyan tuʼn kyyolin kyukʼil erman ex tuʼn tok kybʼiʼn qa at kywa ex qa in pon xnaqʼtzbʼil kyukʼil (Is. 32:1, 2). Ex kyoj tqanil in che etz tuʼn Kʼloj Xjal Qʼil Twitz Aqʼuntl, tzaj qʼamaʼn qe tiʼ mas tuʼn tbʼant quʼn ex tuʼn jlu in tzaj qʼuqbʼaʼn qkʼuʼj.
15. ¿Alkye junjuntl tqanil o tzaj qʼoʼn qe akux at pandemia ex tiʼ o tzaj tuʼn jlu?
15 Akux at pandemia, ax ikx tzaj qʼamaʼn qe tiʼxix tuʼn tbʼant quʼn tuʼn kyok qchmabʼil ex tuʼn qpakbʼan. Jun rat naj ok qchmon qibʼ kyoj videoconferencia ex ax jlu bʼaj tej kyok nimaq chmabʼil. Ax ikx, jun rat xi tzyet tuʼn qpakbʼan kyoj carta ex toj teléfono. O tzaj tkʼiwlaʼn Jehová tkyaqilju in bʼant quʼn. Nim sucursal o tzaj kyqʼamaʼn qa mas o chʼiy kybʼet pakbʼal. Ex ateʼ nim erman o tzaj kyqʼamaʼn tbʼanel experiencia. (Qʼonka twitza tiʼj recuadro « O tzaj tkʼiwlaʼn Jehová pakbʼabʼil»).
16. ¿Tiʼ jaku tzʼok qeʼ qkʼuʼj tiʼj?
16 Bʼalo o kubʼ kyximen junjun erman qa in nikʼ ttnam Jehová kyibʼaj tiʼchaq tuʼn tbʼant quʼn akux at pandemia. Noqtzun tuʼnj, qʼanchaʼlxix qa toj tumel tkyaqilju o tzaj tqʼamaʼn qe (Mat. 11:19). Qa ma qo ximen tiʼj tkyaqil onbʼil in tzaj tqʼoʼn Jesús qe tuʼn ttzaj tyekʼin qbʼe, jaku tzʼok qeʼ qkʼuʼj tiʼj qa kukx ktel Jehová ex Jesús qukʼil toj ambʼil tzul noq tiʼxku kbʼajel (kjawil uʼjit Hebreos 13:5, 6).
17. ¿Tiʼ teya in kubʼ tnaʼn tuʼnju a Jesús nejni qwitz?
17 In qo tzalaj tuʼnju a Jesús in xqʼuqin tiʼj tkyaqil aqʼuntl in bʼant tuʼn ttnam Jehová. Atoʼ kyxol erman jatumel at mujbʼabʼil tuʼnju mintiʼ in nok qqʼoʼn qwitz tiʼj kykostumbr txqantl, tiʼj kyyol nix tiʼj kytnam. In tzaj qʼoʼn nim xnaqʼtzbʼil qe ex bʼantni qten tuʼn qpakbʼan. Ex qkyaqilx in nok tilil quʼn tuʼn tok qqʼoʼn akʼaj qten ex tuʼn kyok qkʼujlaʼn txqantl. In kubʼ qnaʼn nim tzalajbʼil tuʼnju a Jesús nejni qwitz.
BʼITZ 16 Qnimsanktz Jehová tuʼnju toklen Tkʼwaʼl
^ Toj ambʼil jaʼlo, in che pakbʼan nim millón xinaq, xuʼj ex kʼwal tiʼj tbʼanel tqanil. ¿Atpe teya kyxol? Qa ikju, in kubʼ tyekʼina qa in nok lepeʼya tiʼj Jesús. Toj xnaqʼtzbʼil lu, kʼelel qnikʼ tiʼj qa in kubʼ nej Jesús twitz pakbʼabʼil. Aj qximen tiʼj jlu, in nonin qiʼj tuʼn kukx qajbʼen te Jehová tjaqʼ tkawbʼil Jesús.
