1. ¿Tiʼ qʼuqli qkʼuʼj tiʼj ex tiquʼn?

 ¿KWESTPE in nela teya tuʼn ttzalaja aj tok tkeʼyina tkyaqilju in bʼaj toj ambʼil jaʼlo? Ateʼ nim familia ya mintiʼ in kubʼ kyyekʼin kykʼujlabʼil kyxolx. Chʼixme kykyaqil xjal jun rat in tzaj kyqʼoj, oʼkx in che ximen kyiʼjx ex kygan tuʼn kyqʼojin. Ex ateʼ nim xjal kwest tuʼn tok qeʼ kykʼuʼj kyiʼj qeju o txi qʼoʼn jun kyoklen. Pero tkyaqilju in bʼaj, in nonin qiʼj tuʼn tel qnikʼ tiʼj qa chʼix tul jun tbʼanel ambʼil. ¿Tiquʼn in xi qqʼamaʼn jlu? Tuʼnju in kubʼ kyyekʼin xjal kymod ik tzeʼn kyaj qʼamaʼn toj jun profecía tkuʼx toj 2 Timoteo 3:1 a 5, aju in yolin kyiʼj «mankbʼil tqʼijlalil». Qa at jun tbʼanel tanmi jun xjal, mlay kubʼ tewin qa atzun jlu in bʼaj. Tuʼnju in japun twi profecía lu, qʼuqli qkʼuʼj tiʼj qa ya in kawin Jesús toj Tkawbʼil Dios. Pero ateʼ junjuntl profecía e kyaj qʼamaʼn tiʼj Kawbʼil lu. Kyoj junjuntl taqikʼ, qo xnaqʼtzal kyiʼj junjun profecía o japun kywi kyoj mankbʼil abʼqʼi ex in che onin qiʼj tuʼn tchʼiy qʼuqbʼil qkʼuʼj.

2. ¿Tiʼ kʼelel qnikʼ tiʼj toj xnaqʼtzbʼil lu ex tiquʼn? (Jaku yolina tiʼj dibujo tok tiʼj t-xkʼomil).

² ¿Tiʼ kʼelel qnikʼ tiʼj toj xnaqʼtzbʼil lu? Tnejel, qo xnaqʼtzal tiʼj jun profecía in nonin qiʼj tuʼn tel qnikʼ tiʼj toj alkye ambʼil xi tzyet tuʼn tkawin Tkawbʼil Dios. Tkabʼin, qo xnaqʼtzal kyiʼj junjun profecía che onil qiʼj tuʼn tel qnikʼ tiʼj qa ya o txi tzyet tuʼn tkawin Jesús toj Tkawbʼil Dios toj kyaʼj. Ex toxin, qo xnaqʼtzal kyiʼj junjun profecía in che yolin tiʼjju kbʼajel kyiʼj aj qʼoj tiʼj Tkawbʼil Dios. Kʼelel qnikʼ tiʼj qa at kymojbʼabʼil kyibʼ profecía tkuʼx toj Tyol Dios ex qa in che ok ik tzeʼn qe pieza te jun rompecabeza. Che onil qiʼj tuʼn tel qnikʼ tiʼj toj alkye ambʼil in qo anqʼin.

3. ¿Tiʼ in tzaj tqʼamaʼn profecía tkuʼx toj Daniel 7:13 ex 14 tiʼj aj Kawil toj Tkawbʼil Dios?

³ In kanet jun profecía quʼn toj Daniel 7:13 ex 14 jatumel in tzaj tyekʼin qa a Jesús at toklen tuʼn tkawin toj Tkawbʼil Dios. In tzaj tqʼamaʼn qa che ajbʼel xjal twitz tkyaqil Txʼotxʼ te ex qa ni jun kʼelel qʼinte toklen. ¿Toj alkye ambʼil tuʼn t-xi tzyet tuʼn tkawin Jesús? Kbʼajel jlu aj tikʼ wuq abʼqʼi ik tzeʼn kyaj qʼamaʼn toj juntl profecía toj uʼj te Daniel. Qo xnaqʼtzan tiʼj tzeʼn jaku tzʼel qnikʼ tiʼj toj alkye ambʼil bʼaj jlu.

4. ¿Tzeʼn in nonin Daniel 4:10 a 17 qiʼj tuʼn tel qnikʼ tiʼj toj alkye ambʼil xi tzyet tuʼn tkawin Jesús? (Qʼonka twitza tiʼj tqanil).

⁴ (Kjawil uʼjit Daniel 4:10-17). Aqeju «wuq abʼqʼi» in che ok te 2,520 abʼqʼi. Xi tzyet ambʼil lu toj abʼqʼi 607 tjaqʼxi ambʼil qʼiʼn quʼn jaʼlo. Bʼaj jlu tej tel kyiʼn xjal te Babilonia toklen mankbʼil xjal kawin te t-xel Jehová toj tnam Jerusalén. Ex kubʼaj tajlal ambʼil lu toj abʼqʼi 1914, tej tok qʼoʼn toklen Jesús te aj Kawil tuʼn Jehová toj Tkawbʼil. A Jesús in nok te «xinaq at toklen» tiʼj Kawbʼil lu (Ezeq. 21:25-27). *

5. ¿Tzeʼn in nonin qiʼj aj tel qnikʼ tiʼj profecía in yolin kyiʼj «wuq abʼqʼi»?

⁵ ¿Tzeʼn in nonin profecía lu qiʼj? Aj tel qnikʼ tiʼj profecía in yolin kyiʼj «wuq abʼqʼi», in nonin qiʼj tuʼn tok qeʼ qkʼuʼj tiʼj qa in japun twi tyol Jehová tojxix ambʼil bʼantni tiʼj. Kubʼ t-ximen Jehová toj alkye ambʼil tuʼn t-xi tzyet tuʼn tkawin Tkawbʼil. Ex atzun jlu bʼaj tej tpon ambʼil. Ax jlu kbʼajel kyiʼj txqantl profecía, kjapunel kywi toj ambʼil bʼantni tiʼj. Tuʼntzunju, «mlay tzikʼx tiʼj» tqʼij Jehová (Hab. 2:3).

6. a) ¿Alkyeqe yekʼbʼil at tiʼj qa ya o txi tzyet tuʼn tkawin Jesús toj kyaʼj? b) ¿Tzeʼn in nonin Apocalipsis 6:2 a 8 qiʼj tuʼn tel qnikʼ tiʼj qa ax tok kbʼajel jlu?

⁶ Tej chʼixtoq tkubʼaj ambʼil tuʼn tten Jesús tzalu twitz Txʼotxʼ, xi tqʼamaʼn kye t-xnaqʼtzbʼen qa kʼokeltoq kyqʼoʼn kywitz kyiʼj junjun tiʼchaq che onil kyiʼj tuʼn tel kynikʼ tiʼj qa otoq txi tzyet tuʼn tkawin toj kyaʼj. Jun techel, yolin kyiʼj nimaq qʼoj, tiʼj weʼyaj ex kyiʼj kyajajnabʼ. Ax ikx, kyaj tqʼamaʼn qa ktel «txʼuʼj yabʼil noq jachaq» ik tzeʼn pandemia te COVID-19. Tkyaqilju in bʼaj toj ambʼil jaʼlo, in nok tqʼoʼn Tyol Dios tbʼi te «señ» aj tul Jesús (Mat. 24:3, 7; Luc. 21:7, 10, 11). Tej tikʼ mas te 60 abʼqʼi tkyimlen Jesús ex tej otoq meltzʼaj toj kyaʼj, xi tqʼamaʼn te apóstol Juan qa iltoq tiʼj tuʼn tbʼaj tkyaqil nya bʼaʼn lu (kjawil uʼjit Apocalipsis 6:2-8). In nok qqʼoʼn qwitz tiʼj tkyaqil tiʼchaq lu atxix tej t-xi tzyet tuʼn tkawin Jesús toj Tkawbʼil Dios toj 1914.

7. ¿Tiquʼn tzaj mas nya bʼaʼn twitz Txʼotxʼ tej t-xi tzyet tuʼn tkawin Jesús?

⁷ ¿Tiquʼn tzaj mas nya bʼaʼn twitz Txʼotxʼ tej t-xi tzyet tuʼn tkawin Jesús? Jaku tzʼonin Apocalipsis 6:2 qiʼj tuʼn tel qnikʼ tiʼj. In tzaj tqʼamaʼn texto lu qa aju tnejel aqʼuntl bʼant tuʼn Jesús, aju tuʼn tqʼojin tukʼil Tajaw il ex kyukʼil demonio. In tzaj tqʼamaʼn Apocalipsis capítulo 12 qa mintiʼ kambʼan Satanás tiʼj qʼoj lu. Tuʼntzunju, kutz xoʼn tzalu twitz Txʼotxʼ kyukʼil demonio. Tej tbʼaj jlu, tzaj nim tqʼoj ex ok tbʼinchaʼn nim nya bʼaʼn  kyiʼj xjal. Tuʼn jlu, in nel qnikʼ tiʼj tiquʼn in tzaj tqʼamaʼn Tyol Dios jlu: «Bʼekʼbʼil kywitze aqeye najl twitz txʼotxʼ ex tuj mar» (Apoc. 12:7-12).

8. ¿Tzeʼn in nonin qiʼj aj tok qqʼoʼn qwitz tiʼj qa in japun kywi profecía in che yolin tiʼj Tkawbʼil Dios?

⁸ ¿Tzeʼn in che onin profecía lu qiʼj? Aj tok qqʼoʼn qwitz tiʼjju in bʼaj twitz tkyaqil Txʼotxʼ ex tzeʼn o chʼexpaj kymod xjal, in nel qnikʼ tiʼj qa ya o txi tzyet tuʼn tkawin Jesús toj kyaʼj. Tuʼntzunju, mintiʼ in tzaj bʼaj qkʼuʼj aj tok qqʼoʼn qwitz tiʼj nya bʼaʼn kymod xjal. Sino in tzaj tnaʼn qe qa in japun kywi profecía tkuʼx toj Tyol Dios. ¡Chikʼlixix taʼ qa ya in kawin Tkawbʼil Dios! (Sal. 37:1). Ex qʼuqli qkʼuʼj tiʼj qa tzul mas nya bʼaʼn akux in nul laqʼeʼ Armagedón (Mar. 13:8; 2 Tim. 3:13). Kʼujlaʼn qoʼ tuʼn Jehová ex in tzaj tqʼamaʼn qe tiquʼn in qo anqʼin toj jun ambʼil kwest. Tuʼntzunju, bʼaʼn tuʼn t-xi qqʼoʼn nimxix chjonte te.

9. ¿Tiʼ in tzaj tqʼamaʼn Daniel 2:28 ex 31 a 35 tiʼj mankbʼil nimaq kawbʼil ex toj alkye ambʼil xi tzyet tuʼn tkawin?

⁹ (Kjawil uʼjit Daniel 2:28, 31-35). Toj ambʼil jaʼlo, in nok qqʼoʼn qwitz tiʼj tzeʼn in japun twi profecía lu. Toj jun witzikʼ, ok tqʼoʼn rey Nabucodonosor twitz tiʼjju «kbʼajel» otoqxi txi tzyet tuʼn tkawin Jesús. Jun kyxol qe aj qʼoj tuʼn tten tiʼj Jesús tzalu twitz Txʼotxʼ, ktel aju mankbʼil nimaq kawbʼil. Ya in kawin toj ambʼil jaʼlo ex atzun in nok te tqan tilbʼilal bʼinchaʼn maj tuʼn kʼuxbʼil «t-smon tibʼ tukʼil xkabʼ txʼotxʼ». Xi tzyet tuʼn tkawin tej tok Tnejel Nimaq Qʼoj twitz Tkyaqil Txʼotxʼ. Bʼaj jlu tej tok tmojbʼan tibʼ tnam Reino  Unido tukʼil Estados Unidos. Aju tilbʼilal ok tkeʼyin Nabucodonosor, in tzaj tyekʼin qa junxitl kawbʼil lu kywitz txqantl. Qo xnaqʼtzan tiʼj kabʼe tqanil tiʼj kawbʼil lu.

10. a) ¿Alkye tqanil in tzaj tqʼoʼn uʼj te Daniel tiʼj nimaq kawbʼil te Reino Unido ex Estados Unidos? b) ¿Tiʼ il tiʼj tuʼn tok qxqʼuqin qibʼ tiʼj? (Qʼonka twitza tiʼj recuadro « Xqʼuqink tibʼa tiʼj xkabʼ txʼotxʼ»).

¹⁰ Qo xnaqʼtzan tiʼj tnejel tqanil in nonin qiʼj tuʼn tel qnikʼ tiʼj tiquʼn junxitl nimaq kawbʼil te Reino Unido ex Estados Unidos. Junxitl nimaq kawbʼil lu kywitz txqantl ex nya oʼkx bʼinchaʼn maj tuʼn jun kʼuxbʼil ik tzeʼn qʼan pwaq moqa saq pwaq, sino bʼinchaʼn maj tuʼn kʼuxbʼil ex smoʼn tukʼil xkabʼ txʼotxʼ. In kubʼ techlaʼn xkabʼ txʼotxʼ kykyaqil kʼloj xjal (Dan. 2:43). Mintiʼ in ten tipumal nimaq kawbʼil lu tuʼnju in xi tbʼinchaʼn aju in xi kyqʼamaʼn xjal te. ¿Tzeʼn in bʼant jlu kyuʼn xjal? In bʼant kyuʼn aj kymanifestarin, aj kyvotarin ex aj t-xi kyqanin junjuntl tiʼchaq.

11. ¿Alkye juntl tqanil in nonin qiʼj tuʼn tok qeʼ qkʼuʼj tiʼj qa in qo anqʼin kyoj bʼajsbʼil tqʼijlalil?

¹¹ Atzun jaʼlo qo xnaqʼtzan tiʼj tkabʼin tqanil. O tzʼel qnikʼ tiʼj qa in nok tqan tilbʼilal te techel nimaq kawbʼil te Reino Unido ex Estados Unidos, ex in tzaj tqʼamaʼn Tyol Dios qa atzun mankbʼil nimaq kawbʼil tuʼn tten. Tuʼn jlu, in nel qnikʼ tiʼj qa ya mlay ten juntl nimaq kawbʼil. Kbʼel najsaʼn nimaq kawbʼil lu ex qe txqantl kawbʼil tuʼn Tkawbʼil Dios toj qʼoj Armagedón (Apoc. 16:13, 14, 16; 19:19, 20). *

12. ¿Alkye junjuntl tqanil in tzaj kyqʼoʼn profecía tkuʼx toj uʼj te Daniel ex tzeʼn in tzaj kyqʼuqbʼaʼn qkʼuʼj?

¹² ¿Tzeʼn in nonin profecía lu qiʼj? Jaku txi qqʼamaʼn qa in qo anqʼin kyoj bʼajsbʼil tqʼijlalil tuʼnju in tzaj tqʼoʼn profecía tkuʼx toj uʼj te Daniel mas tqanil qe tiʼj ambʼil lu. Ma tzikʼ mas de 2,500 abʼqʼi tkyajlen tqʼamaʼn Daniel qa aj tkubʼ tiʼj tnam Babilonia, che tel juntl kyaje nimaq kawbʼil ex kʼokel kybʼinchaʼn nim nya bʼaʼn tiʼj ttnam Jehová. Ax ikx, tqʼama qa aju tkawbʼil Reino Unido ex Estados Unidos, atzun mankbʼil kawbʼil tuʼn tten. Aj tok qbʼiʼn jlu, in kubʼ qnaʼn tzalajbʼil tuʼnju toj chʼintl ambʼil kykawil Tkawbʼil Dios twitz tkyaqil Txʼotxʼ ex kbʼel tnajsaʼn kykawbʼil xjal (Dan. 2:44).

13. ¿Alkye in nok te «twajxaqin rey» ex qe «laj rey» in yolin Apocalipsis 17:9 a 12 tiʼj, ex tzeʼn o japun twi profecía lu?

¹³ (Kjawil uʼjit Apocalipsis 17:9-12). Tzaj nim xitbʼil tuʼn Tnejel Nimaq Qʼoj twitz Tkyaqil Txʼotxʼ ex tuʼn jlu japun twi juntl profecía in yolin kyiʼj bʼajsbʼil tqʼijlalil. Tuʼnju kyajtoq aj kawil tuʼn tten mujbʼabʼil twitz tkyaqil Txʼotxʼ, kubʼ kyximen tuʼn tten Sociedad de Naciones toj enero te 1920 ex tej tkubʼ bʼinchaʼn juntl maj toj octubre te 1945 ok qʼoʼn tbʼi te Naciones Unidas. In tzaj tqʼamaʼn Tyol Dios qa in nok te jun «twajxaqin rey», pero mintiʼ in nok te jun nimaq kawbʼil. In ten tipumal, oʼkx qa ma che onin aj kawil tiʼj. Ex in nok tqʼoʼn Tyol Dios kybʼi aj kawil lu te «laj rey».

14, 15. a) ¿Tiʼ in tzaj tqʼamaʼn Apocalipsis 17:3 a 5 tiʼj Nintz tnam Babilonia? b) ¿Tiʼ in bʼaj kyiʼj okslabʼil nya ax tok?

¹⁴ (Kjawil uʼjit Apocalipsis 17:3-5). Toj jun witzikʼ tzaj tyekʼin Jehová te apóstol Juan, ok tkeʼyin jun prostituta in nok qʼoʼn tbʼi te «Nintz tnam Babilonia». In kubʼ techlaʼn xuʼj lu kykyaqil  okslabʼil nya ax tok. ¿Tiʼ in tzaj tyekʼin witzikʼ lu? Atxix toj ambʼil ojtxe junx in che aqʼunan okslabʼil nya ax tok kyukʼil aj kawil ex o chex kykʼiwlaʼn. Pero toj chʼintl ambʼil, kbʼel tqʼoʼn Jehová toj kyximbʼetz aj kawil «tuʼn kybʼinchante ju tajbʼil». Aj tbʼaj jlu, che okel tzoqpaj «laj rey» moqa kykyaqil aj kawil kyiʼj nya ax tok okslabʼil ex che kbʼel najsaʼn kyuʼn (Apoc. 17:1, 2, 16, 17).

¹⁵ ¿Tzeʼn in nel qnikʼ tiʼj qa ya chʼix tkubʼ najsaʼn Nintz tnam Babilonia? Jaku tzʼel qnikʼ tiʼj tzaqʼwebʼil tiʼj xjel lu qa ma qo ximen tiʼj ojtxe tnam Babilonia. Kolin nim aʼ Éufrates tiʼj ojtxe tnam lu. In tzaj tqʼamaʼn uʼj te Apocalipsis qa in che ok xjal in che onin tiʼj Nintz tnam Babilonia ik tzeʼn «aʼ» in kolin tiʼj (Apoc. 17:15). Noqtzun tuʼnj, ax ikx in tzaj tqʼamaʼn qa kbʼel tzqij aʼ lu. A jlu in tzaj tyekʼin qa kʼelel kypan kyibʼ nim xjal kyiʼj okslabʼil nya ax tok (Apoc. 16:12). Ya in japun twi profecía lu toj ambʼil jaʼlo tuʼnju ateʼ nim xjal o kyaj kykolin nya ax tok okslabʼil ex in chex jyol onbʼil toj juntl lugar.

16. ¿Tzeʼn in nonin qiʼj aj tel qnikʼ tiʼj profecía tiʼj Naciones Unidas ex tiʼj ambʼil aj tkubʼ xiten Nintz tnam Babilonia?

 ¹⁶ ¿Tzeʼn in che onin profecía lu qiʼj? Tuʼnju at Naciones Unidas ex tuʼnju ya mintiʼxix in che onin xjal kyiʼj okslabʼil nya ax tok, in nel qnikʼ tiʼj qa in qo anqʼin kyoj bʼajsbʼil tqʼijlalil. Ax tok, ya chʼix tkubʼ tzqij aʼ in nonin tiʼj Nintz tnam Babilonia, pero nya tuʼn jlu kbʼel naj. Ik tzeʼn ma tzʼel qnikʼ tiʼj, kbʼel tqʼoʼn Jehová toj kyanmi kykyaqil aj kawil in che onin tiʼj Naciones Unidas tuʼn tjapun twi t-ximbʼetz. Noq minabʼen che kbʼel najsaʼn okslabʼil nya ax tok ex che kjawil labʼin xjal tiʼj jlu (Apoc. 18:8-10). * Che tzajel xobʼ aj tkubʼ najsaʼn Nintz tnam Babilonia. Aj tbʼaj jlu, bʼalo ktzajel tiʼn junjun nya bʼaʼn. Atzun kye tmajen Jehová jaku che tzalaj tiʼj kabʼe tiʼ. Tnejel, kbʼel qnaʼn tzalajbʼil tuʼnju kbʼel najsaʼn aj qʼoj tiʼj Jehová. Ex tkabʼin, qo tzalajel tuʼnju ya chʼix tul kanin ambʼil tuʼn qklet tiʼj tkyaqil nya bʼaʼn (Luc. 21:28).

17, 18. a) ¿Tiʼ il tiʼj tuʼn tbʼant quʼn tuʼn tchʼiy qʼuqbʼil qkʼuʼj? b) ¿Tiʼ kʼelel qnikʼ tiʼj toj juntl xnaqʼtzbʼil?

¹⁷ Kyaj ttzʼibʼin Daniel jlu: «Aju kynabʼl xjal kchʼiyil». Ex atzun jlu o bʼaj. Ya in nel qnikʼ kyiʼj profecía in japun kywi toj ambʼil jaʼlo (Dan. 12:4, 9, 10). Tuʼnju tzʼaqli qe profecía lu, in che onin qiʼj tuʼn tok qqʼoʼn toklen Jehová ex Tyol (Is. 46:10; 55:11). Tuʼntzunju, tbʼanel tuʼn tok tilil quʼn tuʼn tchʼiy qʼuqbʼil qkʼuʼj. ¿Tzeʼn jaku bʼant quʼn? Jaku bʼant quʼn aj qxnaqʼtzan tiʼj Tyol Dios ex aj qonin kyiʼj txqantl tuʼn kyok te tamiw Jehová. Kxqʼuqil Jehová kyiʼj qeju kukx in nok qeʼ kykʼuʼj tiʼj ex kʼonil kyiʼj tuʼn «kyten tuj txubʼtxaj» (Is. 26:3).

¹⁸ Toj juntl xnaqʼtzbʼil, qo yolil kyiʼj junjun profecía at kyoklen tukʼil kʼloj okslal kyoj bʼajsbʼil tqʼijlalil. Ax ikx, kʼelel qnikʼ tiʼj qa at kymojbʼabʼil kyibʼ profecía lu kyukʼil junjuntl profecía in che yolin kyiʼj bʼajsbʼil tqʼijlalil. Ex kʼelel qnikʼ tiʼj alkye yekʼbʼil at tiʼj qa a Jesús in kubʼ nej twitz ttnam Jehová.