Tqʼama Jesús qa il tiʼj tuʼn qonin tuʼn tten mujbʼabʼil. Noqtzun tuʼnj, xi tqʼamaʼn jlu kye t-apóstol: «Miʼn kubʼ kyximane qa ma chin ule tuʼn kyten xjal tuj tzalajbʼil; mintiʼ ma chin ule tuʼn kyten xjal tuj tzalajbʼil, noq oʼkx ma chin ule qʼol qʼoj kyxol xjal. Porke ma chin ule qʼol pabʼl tibʼ kyxol xjal, tuʼn tel tpaʼn tibʼ qʼa tiʼj tman, ex tuʼn tel tpaʼn tibʼ txin tiʼj ttxuʼ, ex tuʼn tel tpaʼn tibʼ txin alibʼaj tiʼj tlibʼ» (Mat. 10:34, 35). ¿Tiʼ tajtoq Jesús tuʼn ttzaj tqʼamaʼn kyukʼil yol lu?

Nya tajtoq Jesús tuʼn ttzaj nya bʼaʼn kyxol familia, pero ojtzqiʼntoq tuʼn qa atzun jlu jaku bʼaj aj tel kynikʼ xjal kyiʼj t-xnaqʼtzbʼil. Aqeju kyaj tuʼn kyok lepeʼ tiʼj Jesús ex kyaj tuʼn kybautisarin, bʼaʼn tuʼn ttzaj kynaʼn qa nyalo bʼaʼn kʼelel toj kywitz toj kyja. Maslo kwest jaku tzʼok jun xjal te t-xnaqʼtzbʼen Jesús qa ma tzʼel ikʼun tuʼn t-xuʼjil moqa tuʼn tchmil ex qa tuʼn juntl tfamiliar.

In tzaj tqʼamaʼn Tyol Dios tuʼn tbʼant jlu kyuʼn okslal: «Tzʼok tililx kyuʼne tuʼn kytene bʼaʼn kyukʼil kykyaqil xjal» (Rom. 12:18). Noqtzun tuʼnj, jaku che ok t-xnaqʼtzbʼil Jesús ik tzeʼn jun espada kye junjun familia. ¿Tiquʼn? Tuʼnju ateʼ junjun nya kyaj tuʼn tok kybʼiʼn. Aj t-xi tzyet tuʼn t-xnaqʼtzan jun xjal tiʼj Tyol Dios, jaku che ok toj tja te aj qʼoj tiʼj (Mat. 10:36).

Qa atz in che anqʼin t-xnaqʼtzbʼen Jesús kyukʼil toj kyja ex junxitl kyokslabʼil, at maj in che ok weʼ kywitz nya bʼaʼn ex tuʼn jlu kwest jaku kubʼ kyyekʼin kykʼujlabʼil tiʼj Jehová ex tiʼj Jesús. In tzajlo kyqʼamaʼn toj kyja kye tuʼn tkubʼ kyikʼsaʼn junjun ninqʼij at kyoklen kyukʼil okslabʼil nya ax tok. Qa ma bʼaj jlu, kbʼel kyximen alqe che nimel. Tqʼama Jesús jlu: «Qa at jun xjal mas in tkʼujlaʼn tman ex qa ttxuʼ, atzun weye mintiʼ in chin tkʼujlaʼn, mya bʼaʼn tuʼn tajbʼen te weye» (Mat. 10:37). Nya a kyxilen yol lu qa mintiʼ tuʼn kyok qkʼujlaʼn qman. Sino tajtoq Jesús tuʼn tel qnikʼ tiʼj alkye mas nim toklen toj qanqʼibʼil. Qa nya taj jun toj qja tuʼn qajbʼen te Jehová, kukx kʼokel qkʼujlaʼn, pero miʼn tzikʼ tnaʼl quʼn qa mas nim toklen tuʼn tok qkʼujlaʼn Jehová.

Jaku txi qqʼamaʼn qa in tzaj qbʼis aj qel ikʼun kyuʼn toj qja. Pero bʼaʼn tuʼn ttzaj qnaʼn qe yol tqʼama Jesús: «Alkye mintiʼ in xi tiʼn tcrus tuʼn tok lpeʼ wiʼje, mya bʼaʼn tuʼn tajbʼen te weye» (Mat. 10:38). Tuʼntzunju, in nel qnikʼ tiʼj qa jaku qo el ikʼun kyuʼn toj qja aj qok lepeʼ tiʼj Jesús. Pero jaku tzʼonin tbʼanel qmod tuʼn tchʼexpaj kyximbʼetz toj qja ex tuʼn tel kynikʼ tiʼj tbʼanel xnaqʼtzbʼil tkuʼx toj Tyol Dios (1 Ped. 3:1, 2).