1, 2. ¿Tiʼ xnaqʼtzbʼil jaku tzʼel qiʼn tiʼj alkye tten kubʼ bʼinchaʼn jun edificio atz Tokio? (1 Corintios 15:58).

 TOJ abʼqʼi 1978, jaw bʼinchaʼn jun matij edificio te 60 nivel atz Tokio toj tnam Japón. Tej tok kykeʼyin xjal edificio lu, kubʼ kyximen qa jakutoq kubʼ xitj aj kytzaj terremoto. Pero mintiʼ bʼaj jlu tuʼnju kubʼ kybʼinchaʼn ingeniero tuʼn tten kyuw ex jakutoq yukch qa ma tzaj jun terremoto. Qo yolin tiʼj alkye xnaqʼtzbʼil jaku tzʼel qiʼn tiʼj edificio lu.

² Nim toklen tuʼn tkubʼ qximen tuʼn qkolin kyiʼj tley Jehová ex qe tkawbʼil (kjawil uʼjit 1 Corintios 15:58). Ax ikx, il tiʼj tuʼn tkubʼ qximen tuʼn qnimen te ex tuʼn miʼn qikʼ kyibʼaj tkawbʼil. Noqtzun tuʼnj, qa jaku bʼant moqa il tiʼj, nim toklen tuʼn qximen kyiʼj txqantl ex tuʼn miʼn t-xi qqʼamaʼn kye tiʼ tuʼn t-xi kybʼinchaʼn (Sant. 3:17). Qa ma ten qximbʼetz ik tzeʼn jlu, kʼonil qiʼj tuʼn miʼn qok kyuw kyukʼil txqantl, pero ax ikx tuʼn miʼn txi qqʼoʼn ambʼil te jun nya bʼaʼn. Toj xnaqʼtzbʼil lu, qo yolil kyiʼj junjun ambʼil jatumel nim toklen tuʼn qkolin kyiʼj tley ex tkawbʼil Jehová. Ex qo yolil kyiʼj jweʼ tiʼchaq in che ajbʼen tuʼn Satanás tuʼn qel tpaʼn tiʼj Jehová ex tzeʼn jaku qo ex kywitz.

3. ¿Alkyeqe ley in che tzaj tqʼoʼn Jehová qe toj Hechos 15:28 ex 29?

³ Oʼkx Jehová at mas nim toklen tuʼn ttzaj tqʼoʼn qe ley ex chikʼlixix qe kawbʼil in che tzaj tqʼoʼn kye tmajen (Is. 33:22). Jun techel, tzaj tqʼamaʼn cuerpo gobernante te tnejel syent abʼqʼi qa nim toklen tuʼn qkolin kyiʼj oxe tley Jehová lu. Tnejel, nim toklen tuʼn miʼn qkʼulin kywitz tilbʼilal ex tuʼn qkʼulin oʼkx te Jehová. Tkabʼin, nim toklen tuʼn tok qqʼoʼn chikʼ te xjan. Ex toxin, nim toklen tuʼn kyxi qnimen tley Jehová at kyoklen tukʼil yaẍbʼil (kjawil uʼjit Hechos 15:28, 29).  ¿Tzeʼn jaku kubʼ qyekʼin qa in xi qnimen qe oxe tley Jehová lu?

4. ¿Tiʼ t-xilen tuʼn qkʼulin oʼkx te Jehová? (Apocalipsis 4:11).

⁴ Miʼn qo kʼulin kywitz tilbʼilal ex qo kʼulin oʼkx te Jehová. Xi tqʼamaʼn Jehová kye xjal te Israel tuʼn kykʼulin oʼkx te (Deut. 5:6-10). Ex ax jlu kyaj tqʼamaʼn Jesús tej tok toj prueba tuʼn Tajaw il (Mat. 4:8-10). Tuʼntzunju, mintiʼ in qo kʼulin kywitz sant. Ax ikx, mintiʼ in jaw qnimsaʼn jun xjal ex mintiʼ in nok qqʼoʼn ik tzeʼn jun dios. Jun techel, mintiʼ in che jaw qnimsaʼn qe nejenel toj okslabʼil, qe político, qe xjal in che saqchan jun deporte moqa alkyexku juntl xjal. Sino oʼkx in qo onin ex in qo kʼulin te Jehová, aju Bʼinchalte tkyaqil (kjawil uʼjit Apocalipsis 4:11).

5. ¿Tiquʼn in nok qqʼoʼn chikʼ ex qchwinqlal te xjan?

⁵ Nim toklen tuʼn tkubʼ qximen qa xjan chikʼ ex chwinqlal. ¿Tiquʼn? Tuʼnju in kubʼ techlaʼn chikʼ qchwinqlal ex o tzaj tqʼoʼn Jehová tbʼanel oyaj jlu qe (Lev. 17:14). Tej t-xi tqʼoʼn Jehová ambʼil kye xjal tuʼn t-xi kychyoʼn kychibʼjal txkup, xi tqʼamaʼn kye qa mintiʼtoq tuʼn t-xi kychyoʼn chikʼ (Gén. 9:4). Ex ax jlu xi tqʼamaʼn kye xjal te Israel tej t-xi tqʼoʼn Tley Moisés kye (Lev. 17:10). Toj tnejel syent abʼqʼi, onin Jehová tiʼj cuerpo gobernante tuʼn t-xi kyqʼamaʼn kye okslal qa mintiʼtoq tuʼn t-xi kychyoʼn chikʼ (Hech. 15:28, 29). Toj ambʼil jaʼlo, ax ikx in xi qbʼiʼn kawbʼil lu aj tkubʼ qximen alkyeqe qʼanbʼil che ajbʼel quʼn. b

6. ¿Tiʼ jaku bʼant quʼn tuʼn miʼn qikʼ kyibʼaj tkawbʼil Jehová?

⁶ In xi qnimen qe tley Jehová at kyoklen tukʼil yaẍbʼil (Heb. 13:4). Tzaj tqʼoʼn apóstol Pablo consej jlu qe: «Kytzoqpinkje tkyaqilju mya bʼaʼn in kybʼinchaʼn xjal». Kyukʼil yol lu, in tzaj tqʼoʼn txokbʼil qiʼj tuʼn kyel qikʼun nya bʼaʼn qximbʼetz. Tuʼntzunju, nim toklen tuʼn tok tilil quʼn tuʼn miʼn tok qkeʼyin moqa tuʼn miʼn tkubʼ qbʼinchaʼn alkyexku tiʼ jaku qo kubʼ tzʼaq toj yaẍbʼil tuʼn (Col. 3:5; Job 31:1). Ex aj qok weʼ twitz jun tentación, tbʼanel tuʼn kyel qikʼun nya bʼaʼn qximbʼetz ex qbʼinchbʼen jaku tzaj kyiʼn nya bʼaʼn tiʼj qamiwbʼil tukʼil Jehová.

7. ¿Tiʼ bʼaʼn tuʼn tkubʼ qximen tuʼn tbʼant quʼn ex tiquʼn?

⁷ Taj Jehová tuʼn qnimen te tuʼn tkyaqil qanmi (Rom. 6:17). In che tzaj tqʼoʼn qe tley ex tkawbʼil tuʼn qtzalaj ex mlayx che chʼexpaj (Is. 48:17, 18; 1 Cor. 6:9, 10). Tbʼanel qa ma tzʼok tilil quʼn tuʼn ttzalaj Jehová ex tuʼn tten ax qximbʼetz ik tzeʼn te jun salmista tej tqʼama jlu: «Tuʼn tkyaqil wanmiye ma kubʼ nximane tuʼn kyjapun qe tleya wuʼne te jumajx» (Sal. 119:112). Pero ojtzqiʼn quʼn qa kʼokel tilil tuʼn Satanás tuʼn miʼn t-xi qnimen qe tkawbʼil Jehová. ¿Tzeʼn in bʼant jlu tuʼn?

8. ¿Tiquʼn in najbʼen ikʼbʼil tuʼn Satanás?

⁸ Aju ikʼbʼil. In nok tilil tuʼn Satanás tuʼn qel ikʼun kyuʼn txqantl ex tuʼn tok kybʼinchaʼn nya bʼaʼn qiʼj tuʼntzun ya miʼn qnimen te Jehová. Taj tuʼn qxi «tchyoʼn», toj juntl yol, taj tuʼn tnaj qamiwbʼil tukʼil Jehová (1 Ped. 5:8). Atzun jlu bʼaj kyiʼj okslal toj tnejel syent abʼqʼi. Tuʼnju e ten tzʼaqli twitz Jehová, e ok xobʼtzaʼn, e ok kʼixbʼisaʼn ex ateʼ junjun e kubʼ bʼyoʼn (Hech. 5:27, 28, 40; 7:54-60). Toj ambʼil jaʼlo, ax ikx in che el ikʼun tmajen Jehová tuʼn Satanás. Jun techel, in che el ikʼun ex in nok bʼinchaʼn nya bʼaʼn kyiʼj erman te Rusia ex kyoj junjuntl lugar. Ex twitz tkyaqil Txʼotxʼ, in nok  kybʼinchaʼn aj qʼoj junjuntl nya bʼaʼn kyiʼj erman.

9. Qʼamantza tukʼil jun techel tiquʼn nim toklen tuʼn tok qxqʼuqin qibʼ kyiʼj junjuntl tsbʼubʼil Satanás.

⁹ In che ajbʼen junjuntl sbʼubʼil tuʼn. Nya oʼkx in najbʼen ikʼbʼil tuʼn Satanás, sino ax ikx in che ajbʼen junjuntl «sbʼubʼl tuʼn» (Efes. 6:11). Qo yolin tiʼjju bʼaj tiʼj Bob, jun ermano okx qʼoʼn toj spital tuʼnju iltoq tiʼj tuʼn tok operación tiʼj. Xi tqʼamaʼn ermano kye doctor qa mintiʼ tuʼn tok qʼoʼn chikʼ tiʼj ex bʼaʼn ela jlu toj kywitz. Pero toj qonikʼen tej naʼmxtoq tok toj operación ex tej ya otoq meltzʼaj tfamilia tja, pon jun kyxol doctor yolil tukʼil. Xi tqʼamaʼn doctor te Bob qa mlaytoq tzʼok kyqʼoʼn chikʼ tiʼj, pero qa kʼajbʼeltoq kyuʼn qa il tiʼj. Kubʼ t-ximen doctor qa kchʼexpajel t-ximbʼetz Bob tuʼnju ya otoq che meltzʼaj toj tja. Noqtzun tuʼnj, kukx kubʼ t-ximen Bob qa mlaytoq tzʼok chikʼ tiʼj noq tiʼxku jaku bʼaj.

10. ¿Tiquʼn jaku tzaj nya bʼaʼn qiʼj tuʼn kyximbʼetz xjal mintiʼ in che nimen te Jehová? (1 Corintios 3:19, 20).

¹⁰ Taj tuʼn tten qximbʼetz ik tzeʼn qeju mintiʼ in che nimen te Jehová. Qa ma ten qximbʼetz ik tzeʼn kye xjal, jaku tzʼel qiʼn kyoklen tkawbʼil Jehová ex jaku tzʼel qpan qibʼ tiʼj (kjawil uʼjit 1 Corintios 3:19, 20). Qa ma qo ok lepeʼ tiʼj «kynabʼl xjal», jaku qo ximen tiʼj qex qajbʼil. Qo ximen tiʼjju bʼaj toj congregación te Pérgamo ex Tiatira. Ateʼ junjun okslal e kubʼ tzʼaq toj yaẍbʼil ex e kʼulin kywitz tilbʼilal ik tzeʼn kye txqantl xjal. Xi tqʼoʼn Jesús consej kye kabʼe congregación lu tuʼnju xi kyqʼoʼn ambʼil te yaẍbʼil (Apoc. 2:14, 20). Toj ambʼil jaʼlo, jakulo tzʼok tilil kyuʼn xjal tuʼn tten qximbʼetz ik tzeʼn kye. Jakulo tzaj kyqʼamaʼn junjun qfamiliar moqa qamiw tuʼn qikʼ kyibʼaj tkawbʼil Jehová ex tuʼn tkubʼ qbʼinchaʼn aju qex qaj. Ex jakulo tzaj kyqʼamaʼn qe qa tbʼanel tuʼn tkubʼ qbʼinchaʼn aju in kubʼ qximen ex qa mintiʼ kyajbʼen tkawbʼil Dios.

11. ¿Tiʼ bʼaʼn tuʼn tok qxqʼuqin qibʼ tiʼj?

¹¹ Atlo maj, jaku kubʼ qximen qa nya chikʼli qe tqanil in tzaj tqʼoʼn Jehová qe. Ex tuʼn jlu jakulo kubʼ qximen tuʼn qikʼ tibʼajju «tzʼibʼan tuj Tuʼjil» (1 Cor. 4:6). Toj tqʼijlalil Jesús, atzun jlu bʼant kyuʼn nejenel kye okslabʼil. Xi kyqʼamaʼn kye xjal qa iltoq tiʼj tuʼn tbʼant junjuntl tiʼchaq kyuʼn aju mintiʼ tzaj tqʼamaʼn Ley ex kwest ela jlu toj kywitz xjal (Mat. 23:4). Atzunte Jehová, chikʼlixix qe tqanil in tzaj tqʼoʼn qe toj Tyol ex tuʼn ttnam, ex nya il tiʼj tuʼn tok qtzʼaqtzaʼn (Prov. 3:5-7). Tuʼntzunju, mintiʼ in qo ikʼ tibʼajju in tzaj tqʼamaʼn Tyol Dios ex mintiʼ in xi qqʼamaʼn kye txqantl tiʼ tuʼn tbʼant kyuʼn.

12. ¿Tzeʼn in che ajbʼen nya ax tok tqanil tuʼn Satanás?

¹² Qe nya ax tok xnaqʼtzbʼil. Tuʼn tsbʼuʼn Satanás kyiʼj txqantl ex tuʼn miʼn tten mujbʼabʼil kyxol, in najbʼen «kyxnaqʼtzbʼil xjal» tuʼn ex aju «xnaqʼtzbʼil mya tzʼaqlxix in kyqʼoʼn xjal» (Col. 2:8). Toj tnejel syent abʼqʼi, ajbʼen kyximbʼetz xjal tuʼn, qe kyxnaqʼtzbʼil judiy mintiʼ jatz toj Biblia ex tqʼama qa iltoq tiʼj tuʼn kyok lepeʼ okslal tiʼj Tley Moisés. Ok tkyaqil jlu te nya ax tok tqanil tuʼnju mintiʼ onin kyiʼj xjal tuʼn tok kyqʼoʼn kywiʼ tiʼj nabʼil axix tok in tzaj tukʼil Jehová. Toj ambʼil jaʼlo, in najbʼen redes sociales ex junjuntl tiʼchaq tuʼn Satanás tuʼn ttzaj kyqʼamaʼn político nya ax tok tqanil. Tej ttzaj pandemia te COVID-19, tzaj qʼamaʼn nim nya ax tok tqanil. c Kykyaqil qeju xi kybʼiʼn tqanil tzaj tqʼoʼn ttnam Jehová, mintiʼ tzaj nya bʼaʼn kyiʼj ex mintiʼ tzaj bʼaj kykʼuʼj ik tzeʼn qeju ok kyqʼoʼn kywiʼ kyiʼj nya ax tok tqanil (Mat. 24:45).

13. ¿Tiquʼn il tiʼj tuʼn tok qxqʼuqin qibʼ tuʼn miʼn tok qqʼoʼn qwiʼ kyiʼj junjuntl tiʼchaq?

 ¹³ Taj tuʼn tok qqʼoʼn qwiʼ kyiʼj junjuntl tiʼchaq. Tbʼanel qa ma tzʼel qnikʼ tiʼj alkyeqe tiʼchaq mas nim kyoklen (Filip. 1:9, 10). Jaku txi qnajsaʼn nim ambʼil ex qipumal qa ma tzʼok qqʼoʼn qwiʼ kyiʼj junjun tiʼchaq nyaxix nim kyoklen ik tzeʼn tuʼn qwaʼn, tuʼn qkʼaʼn, tuʼn qsaqchan ex tuʼn tok qqʼoʼn qwiʼ tiʼj aqʼuntl (Luc. 21:34, 35). Ax ikx, tkyaqil qʼij in jaw quʼjin ex in nok qbʼiʼn qa in che manifestarin xjal ex qa in nok tilil kyuʼn político tuʼn tel kynikʼ tiʼj alkye mas bʼaʼn. Qa mintiʼ ma tzʼok qxqʼuqin qibʼ, jakulo qo onin kyiʼj, axpe ikx noq oʼkx toj qanmi. In che ajbʼen jweʼ tiʼchaq lu tuʼn Satanás tuʼn miʼn tkubʼ qbʼinchaʼn aju bʼaʼn. Atzun jaʼlo, qo xnaqʼtzan tiʼj tiʼ jaku bʼant quʼn tuʼn miʼn tkubʼ qiʼj tuʼn Satanás ex tuʼn kukx qten tzʼaqli.

14. ¿Tiʼ jaku bʼant quʼn tuʼn kukx qten tzʼaqli twitz Jehová?

¹⁴ Bʼaʼn tuʼn ttzaj qnaʼn tiquʼn xi qqʼamaʼn te Jehová tuʼn qajbʼen te ex tuʼn qbautisarin. Bʼant jlu quʼn tuʼnju qajtoq tuʼn qonin tiʼj Jehová. Qnaʼntz tiquʼn ok qeʼ qkʼuʼj tiʼj qa otoq kanet axix tok quʼn. Ok qojtzqiʼn Jehová, ok ik tzeʼn Qman, ok qrespetarin ex ok qkʼujlaʼn. Tuʼnju chʼiy qʼuqbʼil qkʼuʼj, ajtz tiʼj qanmi tiʼj tkyaqil nya bʼaʼn otoq bʼant quʼn. Ax ikx, ya mintiʼ kubʼ qbʼinchaʼn nya bʼaʼn ex xi tzyet tuʼn tkubʼ qbʼinchaʼn aju in tzalaj Jehová tiʼj. Ex kubʼ qnaʼn nim tzalajbʼil tej tkubʼ tnajsaʼn qil (Sal. 32:1, 2). Nya oʼkxju, ax ikx kubʼ qximen tuʼn qxiʼ kyoj chmabʼil ex tuʼn qyolin tiʼjju otoq tzʼel qnikʼ tiʼj. Ax ikx, o txi qqʼamaʼn te Jehová tuʼn qajbʼen te ex tuʼn qbautisarin. Ex o kubʼ qximen tuʼn qbʼet toj bʼe te chwinqlal (Mat. 7:13, 14).

15. ¿Tzeʼn jaku tzʼonin qiʼj qa ma qo xnaqʼtzan tiʼj Tyol Dios ex qa ma qo ximen tiʼj?

¹⁵ Qo xnaqʼtzan tiʼj Biblia ex qo ximen tiʼjju in tzaj tqʼamaʼn. Tuʼn miʼn tikʼ tzʼaq jun tzeʼ, nim toklen tuʼn t-xi tlokʼ toj txʼotxʼ. Ax ikx qe, nim toklen tuʼn tten jun tbʼanel qʼuqbʼil qkʼuʼj tuʼntzun qten tzʼaqli twitz Jehová. Akux in chʼiy jun tzeʼ, mas in xi tlokʼ toj txʼotxʼ ex mas nya fácil tuʼn tikʼ  tzʼaq. Aj qxnaqʼtzan tiʼj Tyol Dios ex aj qximen tiʼjju in tzaj tqʼamaʼn, mas in chʼiy qʼuqbʼil qkʼuʼj ex mas in nok qeʼ qkʼuʼj tiʼj qa tbʼanel qe xnaqʼtzbʼil in tzaj tqʼoʼn Jehová qe (Col. 2:6, 7). Tbʼanel qa ma qo ximen tiʼj tzeʼn onin kyiʼj junjun tmajen Jehová tej t-xi kybʼiʼn tqanil xi tqʼoʼn kye, qe tconsej ex tej t-xqʼuqin kyiʼj. Jun techel, toj jun witzikʼ, ok tkeʼyin Ezequiel qa bʼaj tmedirin jun anjel templo. Onin witzikʼ lu tiʼj Ezequiel tuʼn tchʼiy qʼuqbʼil tkʼuʼj ex in nonin qiʼj toj ambʼil jaʼlo tuʼn tel qnikʼ tiʼj tzeʼn tuʼn tok qqʼoʼn kyoklen tkawbʼil Jehová tiʼj kʼulbʼil axix tok (Ezeq. 40:1-4; 43:10-12). d Qa ma tzʼel qpaʼn ambʼil tuʼn qxnaqʼtzan tiʼj Tyol Dios ex qa ma qo ximen tiʼj, nimxix jaku tzʼonin qiʼj.

16. ¿Tiʼ bʼant tuʼn Bob tuʼnju ok qeʼ tkʼuʼj kyiʼj tkawbʼil Jehová? (Salmo 112:7).

¹⁶ Tbʼanel qa ma ten jun qanmi mintiʼ in xobʼ. Tqʼama rey David toj jun bʼitz qa kukxtoq kʼokel tkʼujlaʼn Jehová. Tqʼama jlu: «Bʼanin tten wanmiye Nman Dios» (Sal. 57:7). Ik tzeʼn te David, jaku ten jun tbʼanel qanmi in nok qeʼ tkʼuʼj tiʼj Jehová (kjawil uʼjit Salmo 112:7). Qo yolin juntl maj tiʼj Bob, aju ma qo yolin tiʼj toj párrafo 9. ¿Tiʼ bʼant tuʼn tuʼnju ok qeʼ tkʼuʼj kyiʼj tkawbʼil Jehová? Tej t-xi kyqʼamaʼn doctor te qa kʼajbʼeltoq chikʼ kyuʼn qa il tiʼj, xi ttzaqʼweʼn kye qa kʼeletztoq oq toj spital naʼmxtoq tbʼant jlu kyuʼn. Tqʼama Bob jlu: «Mintiʼ kubʼ nximane kabʼe maj ex mintiʼ tzaj bʼaj nkʼuʼje tiʼjju jakutoq bʼaj».

17. ¿Tiʼ xnaqʼtzbʼil jaku tzʼel qiʼn tiʼjju bʼaj tiʼj Bob? (Ax ikx qʼonka twitza kyiʼj foto).

¹⁷ Mintiʼ kubʼ t-ximen Bob tuʼn tten tzʼaqli tzmaxi tej tpon toj spital, sino ya otoq kubʼ t-ximen tiʼ tuʼn tbʼant tuʼn. ¿Tiʼ onin tiʼj tuʼn tbʼant jlu tuʼn? Tnejel, tajtoq tuʼn ttzalaj Jehová tiʼj. Tkabʼin, ya otoq xnaqʼtzan tiʼj Biblia ex qe quʼj. Tuʼntzunju, ya otoq tzʼel tnikʼ tiʼj qa xjan chikʼ ex qchwinqlal. Te mankbʼil, ok qeʼ tkʼuʼj tiʼj qa tzultoq kʼiwlaʼn tuʼn Jehová qa ma chex tbʼiʼn tkawbʼil. Ik tzeʼn te Bob, ax ikx qe jaku  chex qnimen tkawbʼil Jehová aj qok weʼ twitz alkyexku nya bʼaʼn.

18. ¿Tiʼ xnaqʼtzbʼil jaku tzʼel qiʼn tiʼj Barac? (Qʼonka twitza tiʼj dibujo tok tiʼj revista).

¹⁸ Qeʼk qkʼuʼj tiʼj Jehová. Qo xnaqʼtzan tiʼj tanqʼibʼil jwes Barac ex kyiʼj kʼiwlabʼil tzaj tkʼamoʼn tuʼnju ok qeʼ tkʼuʼj kyiʼj tqanil tzaj tqʼoʼn Jehová te. Toj ambʼil aju, nyatoq bʼantni kyten xjal te Israel tuʼn kyqʼojin tuʼnju mintiʼtoq kylans ex junjuntl tiʼchaq tuʼn tajbʼen kyuʼn. Maske ikju, xi tqʼamaʼn Jehová te Barac tuʼn t-xi qʼojil tukʼil Sísara ex qe tsoldad (Juec. 5:8). Ex xi tqʼamaʼn profetisa Débora te Barac tuʼn kykuʼtz twi witz Tabor ex tuʼn kyxiʼ toj jun lugar plano tuʼntzun kyqʼojin tukʼil Sísara ex qe 900 tkar. Mastoq nya kwest tuʼn kybʼet kar ex kubʼlo t-ximen Barac qa jakutoq tzaj nya bʼaʼn kyiʼj, pero nimen te Jehová. Tej kykuʼtz twi witz Tabor, tzaj tqʼoʼn Jehová ambʼil tuʼn tkubʼ jbʼal. Tuʼn jlu, ya mintiʼ e bʼet kykar tsoldad Sísara tuʼn xoqʼil ex iktzun tten kambʼan Barac (Juec. 4:1-7, 10, 13-16). Ax ikx qe, jaku tzʼonin Jehová qiʼj qa ma tzʼok qeʼ qkʼuʼj tiʼj ex qa ma qo ok lepeʼ kyiʼj tqanil in tzaj tqʼoʼn ttnam (Deut. 31:6).

19. ¿Tiquʼn taja tuʼn kukx ttena tzʼaqli?

¹⁹ Nim toklen tuʼn kukx tok tilil quʼn tuʼn qten tzʼaqli (1 Tim. 6:11, 12; 2 Ped. 3:17). Mintiʼ tuʼn qtzaj xobʼ aj qel ikʼun ex aj tajbʼen junjuntl sbʼubʼil tuʼn Satanás. Ax ikx, il tiʼj tuʼn tok tilil quʼn tuʼn miʼn tten qximbʼetz ik tzeʼn kye xjal mintiʼ in che nimen te Jehová, tuʼn miʼn t-xi qnimen qe nya ax tok tqanil ex tuʼn miʼn tok qqʼoʼn qwiʼ kyiʼj junjuntl tiʼchaq (Efes. 4:14). Tbʼanel tuʼn tkubʼ qximen tuʼn kukx tok qkʼujlaʼn Jehová ex tuʼn kyxi qnimen qe tkawbʼil. Pero ax ikx nim toklen tuʼn tel qnikʼ tiʼj qa mlay bʼant junjun tiʼchaq quʼn ex tuʼn miʼn txi qqʼamaʼn kye txqantl tiʼ tuʼn tbʼant kyuʼn. Atzun jlu qo yolil tiʼj toj juntl xnaqʼtzbʼil. Qo xnaqʼtzal tiʼj tzeʼn in kubʼ tqʼoʼn Jehová ex Jesús jun tbʼanel techel qwitz ex tzeʼn jaku tzʼel qkanoʼn kyiʼj.