1. ¿Tiquʼn nim toklen tuʼn tbʼaj qbʼinchaʼn qten naʼmxtoq ttzaj jun xitbʼil?

 JAKU qo klet qa ma bʼaj qbʼinchaʼn qten. Jun techel, kykyaqil xjal in bʼaj kybʼinchaʼn kyten naʼmxtoq ttzaj jun xitbʼil, in che kyaj anqʼin ex jaku che onin kyiʼj txqantl. Tqʼama jun organización te Europa jlu, aju in nonin kyiʼj xjal: «Qa ma bʼaj qbʼinchaʼn qten, jaku qo klet ex jaku che klet txqantl».

2. ¿Tiquʼn nim toklen tuʼn tbʼaj qbʼinchaʼn qten naʼmxtoq tul «kʼixbʼisabʼl maʼxix»? (Mateo 24:44).

² Noq minabʼen tzul «kʼixbʼisabʼl maʼxix» (Mat. 24:21). Pero junxitl «kʼixbʼisabʼl maʼxix» kywitz txqantl xitbʼil in che tzaj tuʼnju ya ojtzqiʼn quʼn qa ya chʼix tul. Ma tzikʼ junlo 2,000 abʼqʼi, xi tqʼamaʼn Jesús kye t-xnaqʼtzbʼen qa iltoq tiʼj tuʼn tbʼaj kybʼinchaʼn kyten naʼmxtoq tul qʼij lu (kjawil uʼjit Mateo 24:44). Qa ma txi qbʼiʼn tconsej, jaku qo kyaj anqʼin ex jaku qo onin kyiʼj txqantl tuʼn kyklet (Luc. 21:36).

3. ¿Tiquʼn il tiʼj tuʼn tikʼx quʼn, tuʼn tten qkʼujlabʼil ex tuʼn tten qʼaqʼbʼil qkʼuʼj tuʼntzun tbʼaj qbʼinchaʼn qten naʼmxtoq tul kʼixbʼisabʼl maʼxix?

³ Tuʼn tbʼaj qbʼinchaʼn qten naʼmxtoq tul kʼixbʼisabʼl maʼxix moqa aju nimxix yajbʼil, nim toklen tuʼn tkubʼ qyekʼin oxe qmod. Toj chʼintl ambʼil, tzul qʼamaʼn qe tuʼn t-xi qpakbʼaʼn jun tqanil kyuw kye xjal ex nyalo bʼaʼn kʼelel toj kywitz. Aj tbʼaj jlu, ¿tiʼ qmod kbʼel qyekʼin? (Apoc. 16:21). Nim toklen tuʼn tikʼx quʼn tuʼntzun t-xi qnimen tyol Jehová ex tuʼn tok qeʼ qkʼuʼj tiʼj qa kxqʼuqil qiʼj. Yajtzun qa ma che naj qe tiʼchaq kye erman, ¿tiʼ kbʼantel quʼn? (Hab. 3:17, 18). Nim toklen tuʼn ttzaj qʼaqʼin qkʼuʼj kyiʼj ex tuʼn t-xi qqʼoʼn onbʼil kye. Ex aj tok tzoqpaj jun kʼloj tnam qiʼj, ¿alkye qmod kbʼel qyekʼin qa ma tzaj qanin qe tuʼn qanqʼin junx toj jun tal lugar kyukʼil erman? (Ezeq. 38:10-12). Toj ambʼil lu, nim toklen tuʼn tkubʼ qyekʼin qkʼujlabʼil kyiʼj erman.

4. ¿Tzeʼn in nel qnikʼ tiʼj qa il tiʼj tuʼn tikʼx quʼn, tuʼn tten mas qʼaqʼbʼil qkʼuʼj ex qkʼujlabʼil?

 ⁴ In tzaj tqʼoʼn Tyol Dios txokbʼil qiʼj tuʼn tten mas qipumal tuʼn tikʼx quʼn, tuʼn tten mas qʼaqʼbʼil qkʼuʼj ex qkʼujlabʼil. In tzaj tqʼamaʼn Lucas 21:19 jlu: «Qa ma tzikʼx kyuʼne, ok kykambʼaʼye kychwinqlale axix tok». Atzun toj Colosenses 3:12 in kanet consej jlu quʼn: «Qʼaqʼanx kykʼuʼje tiʼj juntl». Ex in che kanet yol lu quʼn toj 1 Tesalonicenses 4:9 ex 10: «Ax Dios ma xnaqʼtzan kyeye tuʼn kykʼujlante kyibʼe kyxolxe. [...] Pero qo kubʼsale kywitze, erman, kukx tuʼn tchʼiy kykʼujlalile». Aqeju yol lu, e xi qʼamaʼn kye okslal otoq kubʼ kyyekʼin qa in nikʼx kyuʼn, qa at qʼaqʼbʼil kykʼuʼj ex kykʼujlabʼil. Pero iltoq tiʼj tuʼn kukx tkubʼ kyyekʼin qe tbʼanel kymod lu. Ax jlu tuʼn tbʼant quʼn toj ambʼil jaʼlo. ¿Tiʼ jaku tzʼonin qiʼj? Toj xnaqʼtzbʼil lu, kʼelel qnikʼ tiʼj tzeʼn kubʼ kyyekʼin tnejel okslal qe mod lu ex tzeʼn jaku tzʼel qkanoʼn kyiʼj. Qa ma bʼant jlu quʼn, kʼonil qiʼj tuʼn tbʼaj qbʼinchaʼn qten naʼmxtoq tul nimxix yajbʼil.

5. ¿Tiʼ onin kyiʼj tnejel okslal tuʼn tikʼx kyuʼn?

⁵ Iltoq tiʼj tuʼn tten kyipumal tnejel okslal tuʼn tikʼx kyuʼn (Heb. 10:36). Nya oʼkx e ok weʼ kywitz nya bʼaʼn ik tzeʼn kye txqantl xjal, sino ax ikx e ok weʼ kywitz ambʼil kwest tuʼn tpaj kyokslabʼil. Ateʼ junjun i el ikʼun kyuʼn nejenel toj kyokslabʼil judiy, kyuʼn xjal tzaj qʼoʼn kyoklen tuʼn Roma ex kyuʼn toj kyja (Mat. 10:21). Ax ikx, iltoq tiʼj tuʼn tok kyxqʼuqin kyibʼ kyiʼj apóstata ok tilil kyuʼn tuʼn tnaj mujbʼabʼil toj congregación (Hech. 20:29, 30). Maske e ok weʼ okslal kywitz nya bʼaʼn, kukx ikʼx kyuʼn (Apoc. 2:3). ¿Tiʼ onin kyiʼj? Onin kyiʼj tej kyximen tiʼj kyanqʼibʼil tmajen Jehová kubʼ kyyekʼin qa ikʼx kyuʼn ik tzeʼn te Job (Sant. 5:10, 11). Nya oʼkxju, ax ikx tej t-xi kyqanin kyipumal te Jehová (Hech. 4:29-31). Ex ok qeʼ kykʼuʼj tiʼj qa che tzajel kʼiwlaʼn tuʼn Jehová qa ma tzikʼx kyuʼn (Hech. 5:41).

6. ¿Tiʼ xnaqʼtzbʼil jaku tzʼel tiʼna tiʼjju bʼant tuʼn Merita tej tok weʼ twitz ikʼbʼil?

⁶ Yajtzun qe, ¿tiʼ jaku bʼant quʼn tuʼn tikʼx quʼn? Tbʼanel qa ma tzʼel qpaʼn ambʼil tuʼn qximen tiʼj kyanqʼibʼil tmajen Jehová in yolin Biblia tiʼj ex qeju in che yolin quʼj tiʼj. Atzun jlu onin tiʼj jun ermana te Albania aju Merita tbʼi tej tel ikʼun kyuʼn toj tja. Tqʼama jlu: «Tej nxnaqʼtzane tiʼj tanqʼibʼil Job toj Biblia, onin wiʼje. Ok weʼ Job twitz nim nya bʼaʼn... ex mintiʼtoq ojtzqiʼn tuʼn alkye ok bʼinchante tiʼj. Maske ikju, tqʼama jlu: ‹¡Kukx chin tele tzʼaqli ajxi nkyime!› (Job 27:5, TNM). Tej nximane tiʼj jlu, el nnikʼe tiʼj qa mas nim nya bʼaʼn tzaj tiʼj Job kywitz nya bʼaʼn in chin ok weʼye twitz ex mintiʼtoq ojtzqiʼn tuʼn jatumel e tzaj, atzun weye ojtzqiʼntoq wuʼne».

7. ¿Tiʼ jaku bʼant quʼn jaʼlo maske mintiʼ in qo ok weʼ twitz jun nya bʼaʼn?

⁷ Ax ikx jaku ten qipumal tuʼn tikʼx quʼn qa kukx ma txi qqʼamaʼn te Jehová tkyaqilju tkuʼx toj qanmi (Filip. 4:6; 1 Tes. 5:17). Bʼalo mintiʼ in nok weʼya twitz jun nya bʼaʼn toj ambʼil jaʼlo. Pero, ¿in nokpe tilil tuʼna tuʼn tjyona onbʼil tukʼil Jehová aj ttzaj tqʼoja, aj ttzaj bʼaj tkʼuʼja ex qa mintiʼ in nel tnikʼa tiʼjju tuʼn tbʼant tuʼna? Qa naqʼliya tuʼn t-xi tqanina onbʼil te Jehová toj alkyexku ambʼil, mas nya kwest kʼelel jlu toj twitza toj ambʼil tzul aj kytzaj mas nya bʼaʼn. Ex kʼokel qeʼ tkʼuʼja tiʼj qa ojtzqiʼn tuʼn Jehová toj alkye ambʼil mas tbʼanel tuʼn tonin tiʼja (Sal. 27:1, 3).

8. ¿Tzeʼn in nonin techel kyaj tqʼoʼn Mira qiʼj tuʼn tel qnikʼ tiʼj qa jaku ten qipumal toj ambʼil tzul qa ma tzikʼx quʼn jaʼlo? (Santiago 1:2-4; ax ikx qʼonka twitza tiʼj foto).

⁸ Maslo nya kwest kʼelel toj qwitz tuʼn  tikʼx nimxix yajbʼil quʼn qa ma che ikʼx nya bʼaʼn quʼn toj ambʼil jaʼlo (Rom. 5:3). ¿Tiquʼn in xi qqʼamaʼn jlu? In tzaj kyqʼamaʼn nim erman qa aj kyex twitz jun nya bʼaʼn, mas in ten kyipumal tuʼn kyex kywitz txqantl. Aj tok kyqʼoʼn kywitz tiʼj qa in nonin Jehová kyiʼj, mas in nok qeʼ kykʼuʼj tiʼj qa kukx taj tuʼn tonin kyiʼj. Aj tel kynikʼ tiʼj jlu, in nonin kyiʼj tuʼn tten kyipumal aj kyok weʼ twitz juntl nya bʼaʼn (kjawil uʼjit Santiago 1:2-4). Atzun jlu in kubʼ t-ximen jun precursora te Albania aju Mira tbʼi. In tzaj tqʼamaʼn ermana lu qa at maj in kubʼ t-ximen qa oʼkx te in tzaj nim nya bʼaʼn tiʼj. Pero aj tbʼaj jlu, in ximen tiʼj tzeʼn o tzʼonin Jehová tiʼj kyoj qe mankbʼil 20 abʼqʼi o che ikʼ ex in kubʼ t-ximen jlu: «Kukx tena tzʼaqli twitz Jehová ex miʼn kyaj ttzaqpiʼna tuʼn tajbʼena te. O tzʼonin tiʼja tuʼn texa kywitz nim nya bʼaʼn». Ax ikx teya, tbʼanel qa ma tzʼel tpaʼna ambʼil tuʼn t-ximana tiʼj tzeʼn o tzʼonin Jehová tiʼja tuʼn tikʼx tuʼna. Ojtzqiʼn tuʼn Jehová toj alkye ambʼil in nikʼx tuʼna ex tzul kʼiwlaʼna tuʼn (Mat. 5:10-12). Ex aj t-xi tzyet nimxix yajbʼil, mas nya kwest kʼelel toj twitza tuʼn tikʼx tuʼna tuʼnju ya otoq kubʼ tyekʼina qʼuqbʼil tkʼuʼja.

9. ¿Tzeʼn kubʼ kyyekʼin erman te Antioquía te Siria qa tzaj qʼaqʼin kykʼuʼj kyiʼj txqantl?

⁹ Qo ximen tiʼjju bʼaj kyiʼj okslal te Judea tej ttzaj nim weʼyaj. Tej tok kybʼiʼn erman te Antioquía te Siria aju nya bʼaʼn e ok weʼ twitz, tzaj qʼaqʼin kykʼuʼj kyiʼj. Ex nya oʼkx kubʼ kynaʼn jlu, sino ax ikx kubʼ kyyekʼin tukʼil kybʼinchbʼen. In tzaj tqʼamaʼn Biblia qa bʼant jlu kyuʼn: «Atzun kye okslal tuj Antioquía kubʼ kyximan tuʼn t-xi kysamaʼn chʼin onbʼil kye erman najl qe tuj Judea, teyle junjun tuʼn t-xi t-samaʼn ik tzaʼnx ju at te» (Hech. 11:27-30). Maske najchaq e anqʼin okslal te Judea, kubʼ kyximen erman te Antioquía tuʼn t-xi kyqʼoʼn onbʼil kye (1 Juan 3:17, 18).

10. ¿Tzeʼn jaku kubʼ qyekʼin qʼaqʼbʼil qkʼuʼj kyiʼj erman aj ttzaj jun xitbʼil? (Ax ikx qʼonka twitza tiʼj foto).

¹⁰ Jaku kubʼ qyekʼin qʼaqʼbʼil qkʼuʼj kyiʼj txqantl aj tok qbʼiʼn qa in che ok weʼ twitz nya bʼaʼn tuʼn tpaj jun xitbʼil. ¿Tzeʼn jaku bʼant quʼn? Jaku bʼant quʼn aj t-xi qqʼamaʼn kye ansyan qa qaj tuʼn qonin, aj t-xi qqʼoʼn pwaq te oyaj ex aj qnaʼn Dios kyiʼj erman in tzaj nya bʼaʼn kyiʼj (Prov. 17:17). b Qo yolin tiʼj jun techel. Toj abʼqʼi 2020, e ten mas te 950 Kʼloj ansyan in xi kyqʼoʼn onbʼil aj ttzaj xitbʼil twitz tkyaqil Txʼotxʼ. E onin erman lu kyiʼj qeju tzaj jun nya bʼaʼn kyiʼj tuʼn COVID-19. ¡In xi qqʼoʼne nimxix chjonte kye qeju in che onin aj ttzaj jun xitbʼil! In kubʼ kyyekʼine qa in tzaj qʼaqʼin kykʼuʼje kyiʼj erman aj t-xi kyqʼoʼne onbʼil kye, aj t-xi kyqʼuqbʼaʼne kykʼuʼj ex aj kyonine tuʼn tjaw bʼinchet juntl maj kyja ex qe Ja te Chmabʼil (mojbʼankuya tukʼil 2 Corintios 8:1-4).

11. ¿Tzeʼn in jaw qnimsaʼn Jehová aj tkubʼ qyekʼin qʼaqʼbʼil qkʼuʼj?

¹¹ In nok kyqʼoʼn xjal kywitz tiʼjju in bʼant quʼn aj qonin kyiʼj erman aj ttzaj jun xitbʼil. Qo yolin tiʼj jun techel. Toj abʼqʼi 2019, kubʼ xitj jun Ja te Chmabʼil tuʼn huracán Dorian atz Bahamas. Tej tjaw bʼinchet juntl maj Ja te Chmabʼil, xi kyqanin erman te jun xjal jteʼ jakutoq tzʼel tkobrarin tuʼn kybʼinchet junjun aqʼuntl. Xi tqʼamaʼn xjal jlu kye: «Waje tuʼn wonine kyiʼje. Tuʼntzunju, miʼn tzaj bʼaj kykʼuʼje kyiʼj herramienta, tiʼj material ex tiʼj twi qkʼuʼje. In chin jaw labʼine tiʼj tzeʼn in nok kyqʼoʼne kyoklen kyamiwe».  Mintiʼ ojtzqiʼn Jehová kyuʼn nim xjal, pero in nok kyqʼoʼn kywitz tiʼjju in bʼant quʼn. In kubʼ qnaʼn nimxix tzalajbʼil tuʼnju jaku qo onin kyiʼj txqantl tuʼn kyok laqʼeʼ ttxlaj Jehová noq tuʼnju in bʼant quʼn. Jaku che ok te tamiw Dios at «nimxix tqʼaqʼbʼil tkʼuʼj» (Efes. 2:4).

12. Qa in kubʼ qyekʼin qʼaqʼbʼil qkʼuʼj toj ambʼil jaʼlo, ¿tzeʼn kʼonil qiʼj toj nimxix yajbʼil? (Apocalipsis 13:16, 17).

¹² ¿Tiquʼn nim toklen tuʼn tkubʼ qyekʼin qʼaqʼbʼil qkʼuʼj toj ambʼil te nimxix yajbʼil? Tuʼnju in tzaj tqʼamaʼn Tyol Dios qa che tzajel nya bʼaʼn qiʼj tuʼnju mintiʼ in qo onin kyiʼj gobierno (kjawil uʼjit Apocalipsis 13:16, 17). Tuʼntzunju, il-lo tiʼj tuʼn t-xi qqʼoʼn onbʼil kye erman tuʼn kyten tiʼchaq at tajbʼen kye. Chʼix tpon ambʼil tuʼn kyok xjal toj juicio tuʼn Jesús, tuʼntzunju nim toklen tuʼn kukx tkubʼ qyekʼin qʼaqʼbʼil qkʼuʼj kyiʼj txqantl tuʼntzun ttzaj tqʼamaʼn jlu qe: «Kykʼmonxe aju kawbʼil» (Mat. 25:34-40).

13. ¿Tiʼ bʼant kyuʼn tnejel okslal tuʼn tkubʼ kyyekʼin mas kʼujlabʼil kyxol? (Romanos 15:7).

¹³ Toj tnejel syent abʼqʼi, el kynikʼ xjal tiʼj qa ten kʼujlabʼil kyxol erman. Maske ikju, kwest ela toj kywitz erman tuʼn tkubʼ kyyekʼin kykʼujlabʼil kyxol. Qo ximen tiʼjju bʼaj toj congregación te Roma jatumel e ten erman te junxichaq kyyajil. E ten okslal judiy xi kynimen Tley Moisés te kyjaw chʼiy. Noqtzun tuʼnj, ax ikx e ten erman te junjuntl tnam ex kykostumbr. Ax ikx, e ajbʼenlo junjun erman te majen, atzun junjuntl e ok te patrón. Qa ikju, ¿tiʼtzun onin kyiʼj okslal lu tuʼn tkubʼ kyyekʼin mas kʼujlabʼil kyxol? Xi tqʼoʼn apóstol Pablo consej jlu kye: «Kykʼmom kyibʼe kyxolxe» (kjawil uʼjit Romanos 15:7). ¿Tiʼ tajtoq tuʼn t-xi tqʼamaʼn kye? Aju yol in kubʼ traducirin te «kykʼmom kyibʼe kyxolxe», in tzaj tyekʼin qa iltoq tiʼj tuʼn tkubʼ kyyekʼin tbʼanel kymod kyxol ex tuʼn t-xi kyqʼoʼn kyposad txqantl. In nok jlu ik tzeʼn aj t-xi tqʼoʼn jun xjal txokbʼil tiʼj juntl tuʼn tpon tja moqa tuʼn tok te tamiw. Jun techel, xi tqʼamaʼn Pablo te Filemón tzeʼn tmod tuʼn tkubʼ tyekʼin tukʼil Onésimo, jun tmajen etz oq toj tja. Xi tqʼamaʼn jlu te: «Kʼmoma Onésimo ik tzaʼn ax qine» (Filem. 17). Ax ikx, mastoq nim tojtzqibʼil Priscila ex Áquila twitz Apolos, pero kubʼ kyyekʼin tbʼanel kymod tukʼil ex xi kyiʼn kyukʼil (Hech. 18:26). Maske junxitl qe erman lu, kubʼ kyyekʼin kʼujlabʼil kyxol ex mintiʼ xi kyqʼoʼn ambʼil tuʼn ttzaj nya bʼaʼn kyxol.

14. ¿Tzeʼn kubʼ tyekʼin Anna ex tchmil qa kʼujlaʼn qe txqantl kyuʼn?

¹⁴ Jaku kubʼ qyekʼin qkʼujlabʼil kyiʼj erman aj tel qpaʼn ambʼil tuʼn qten kyukʼil ex aj kyok te qamiw. Qa ma bʼant jlu quʼn, ax ikx kye jaku kubʼ kyyekʼin kykʼujlabʼil qiʼj (2 Cor. 6:11-13). Qo yolin tiʼjju bʼaj tiʼj Anna tukʼil tchmil, jun mejebʼleʼn in che ajbʼen te misionero. E xi samaʼn toj juntl lugar te África Occidental. Pero tej tikʼ chʼin ambʼil kyponlen, xi tzyet yabʼil COVID-19 ex ya mintiʼ bʼant tuʼn kyten kyukʼil erman. ¿Tiʼ bʼant tuʼn mejebʼleʼn lu tuʼn tkubʼ kyyekʼin kykʼujlabʼil kyiʼj erman? El kypaʼn ambʼil tuʼn kyyolin kyukʼil toj videoconferencia ex xi kyqʼamaʼn kye qa kyajtoq tuʼn tok kyojtzqiʼn mas tqanil kyiʼj. Tbʼanel ela jlu toj kywitz erman, tuʼntzunju, xi kysamaʼn mensaje kye ex e xi llamarin kyiʼj. ¿Tiquʼn ok tilil kyuʼn misionero lu tuʼn kyok kyojtzqiʼn erman? Tqʼama Anna jlu: «Mintiʼ in nikʼ tnaʼl wuʼne tzeʼn kubʼ kyyekʼin erman kykʼujlabʼil wiʼje ex kyiʼj toj njaye kyoj tbʼanel ambʼil ex tej qok weʼye kywitz nya bʼaʼn. Aj nximane tiʼj jlu, in nonin wiʼje tuʼn tkubʼ nyekʼine kʼujlabʼil».

15. ¿Tiʼ xnaqʼtzbʼil jaku tzʼel qiʼn tiʼj Vanessa? (Ax ikx qʼonka twitza tiʼj foto).

 ¹⁵ Junxichaq kymod erman kyoj congregación jatumel in nok qchmon qibʼ. Pero jaku chʼiy mas qkʼujlabʼil kyiʼj qa ma tzʼok qqʼoʼn qwitz tiʼj tbʼanel kymod. Qo yolin tiʼjju bʼaj tiʼj jun ermana te Nueva Zelanda aju Vanessa tbʼi. Kwest ela toj twitz ermana tuʼn tkubʼ tyekʼin tbʼanel tmod kyukʼil junjun erman tuʼnju nyatoq bʼaʼn in nela kymod toj twitz. ¿Tiʼtzun bʼant tuʼn Vanessa? Mintiʼ el tpan tibʼ kyiʼj, sino ten mas ambʼil kyukʼil. Tuʼnju bʼant jlu tuʼn, el tnikʼ tiʼj tiquʼn kʼujlaʼn qetoq tuʼn Jehová. Tqʼama jlu: «O tzaj qʼoʼn toklen nchmile te superintendente te circuito, tuʼntzunju in qo tene mas ambʼil kyukʼil erman ex o tzʼel qnikʼe tiʼj qa junxichaq kymod. Ex mas nya kwest o tzʼela toj nwitze tuʼn tkubʼ nyekʼine tbʼanel nmode kyukʼil txqantl. Jaʼlo, in che ok nkʼujlaʼne kykyaqil erman tuʼnju a Jehová in xi qʼonte txokbʼil kyiʼj tuʼn kyoktz toj ttnam». Yajtzun qe, ¿tzeʼn jaku kubʼ qyekʼin qa kʼujlaʼn qe erman quʼn? Jaku bʼant quʼn aj tten qximbʼetz kyiʼj ik tzeʼn te Jehová (2 Cor. 8:24).

16. ¿Tiquʼn nim toklen tuʼn tkubʼ qyekʼin qkʼujlabʼil kyiʼj erman toj nimxix yajbʼil? (Ax ikx qʼonka twitza tiʼj foto).

¹⁶ Nim toklen tuʼn tkubʼ qyekʼin qkʼujlabʼil kyiʼj erman toj nimxix yajbʼil. ¿Tzeʼn kkolil Jehová qiʼj aj t-xi tzyet nimxix yajbʼil? Qo ximen tiʼj tqanil xi tqʼoʼn kye tmajen tej tkubʼ tiʼj tnam Babilonia. Xi tqʼamaʼn Jehová jlu kye: «Aqeye xjal etzan wuʼne, kyxiʼye, kyokxe tuj kyjaye ex kylamoʼn etze qe tlamel ja kywitze. Kyewanx chʼin kyibʼe, akux nnikʼ ttxʼuʼjil Qman» (Is. 26:20). Axlo ikx qe kxel qbʼiʼn tqanil lu aj tul nimxix yajbʼil. Aj ttzaj qʼamaʼn yol ja toj texto lu, bʼalo atz in yolin kyiʼj congregación. Qa kukx ma qo ten kyukʼil erman, kkolil Jehová qiʼj ik tzeʼn o tzaj ttziyen. Tuʼntzunju, nim toklen tuʼn kyok qkʼujlaʼn erman. Qa mintiʼ ma bʼant jlu quʼn, mlaylo qo kyaj anqʼin.

17. Qa ma bʼaj qbʼinchaʼn qten jaʼlo, ¿tiʼ jaku bʼant quʼn aj tul nimxix yajbʼil?

¹⁷ Tzul kybʼis xjal aj tul «tqʼijlalil jwisi tuʼn Qman» (Sof. 1:14, 15). Ax ikx kye tmajen Jehová che okel weʼ kywitz nya bʼaʼn. Pero qa ma bʼaj qbʼinchaʼn qten jaʼlo, mlay qo tzaj xobʼ ex jaku qo onin kyiʼj txqantl. Qa ma tzikʼx quʼn, jaku qo ex twitz alkyexku nya bʼaʼn. Atzun qa ma ten qʼaqʼbʼil qkʼuʼj, kʼokel tilil quʼn tuʼn qonin kyiʼj erman. Ex qa ma kubʼ qyekʼin qkʼujlabʼil kyiʼj erman toj ambʼil jaʼlo, kukx kbʼantel jlu quʼn toj ambʼil tzul. Qa ma bʼant jlu quʼn, tzul tqʼoʼn Jehová qchwinqlal te jumajx toj jun lugar jatumel mlay che tzajtl xitbʼil (Is. 65:17).