In najbʼentoq nmane te ansyan toj Iglesia Unida te Canadá. Tuʼntzunju, tzaj tsamaʼn tkyaqil domingo te prim junjun tqanil tuʼn qxnaqʼtzane tiʼj tukʼil wanabʼe. Tej tpon las 11, o xi qʼiʼne toj iglesia tuʼn nmane. Atzun te qale, in qoʼxtoqe tukʼil ntxuʼye toj Ja te Chmabʼil. Ok qqʼoʼne qwitze tiʼj qa junxitl qe kabʼe okslabʼil lu.

Otoq tzʼok tamiwen tibʼ ntxuʼye tukʼil Bob Hutcheson ex tukʼil Marion, aju t-xuʼjil. Tuʼntzunju, xi tqʼamaʼn kye aju otoq tzʼel tnikʼ tiʼj. Ex tej tikʼ ambʼil ax ikx kye e ok te testigo de Jehová. Toj 1958, in xi qʼiʼne tuʼn Bob ex Marion junx kyukʼil oxe kykʼwal toj Asamblea Internacional «Voluntad Divina», aju kubʼ ikʼset toj wajxaq qʼij atz Nueva York. Toj ambʼil jaʼlo, in nel nnikʼe tiʼj qa kwest ela toj kywitz tuʼn tbʼant jlu kyuʼn, pero in xi nqʼoʼne chjonte kye tuʼnju atzun jun kyxol qe tbʼanel ambʼil o che ikʼ toj wanqʼibʼile.

Tej kuʼxun qine, in qo anqʼintoqe toj jun finca ex ngantoqe tuʼn nxqʼuqine kyiʼj alumaj. Wajtoqe tuʼn nxnaqʼtzane tiʼj Veterinaria. Xi tqʼamaʼn ntxuʼye te jun ansyan aju otoq kubʼ nximane, tuʼntzunju, el tpaʼn ambʼil tuʼn tyolin wukʼile. Tukʼil kʼujlabʼil tzaj tqʼamaʼn weye qa in qo anqʼin kyoj mankbʼil tqʼijlalil ex onin wiʼje tuʼn tel nnikʼe tiʼj tiʼ jakutoq tzaj tiʼj wamiwbʼile tukʼil Jehová qa ma chinxtoqe xnaqʼtzal  nim ambʼil toj universidad (2 Tim. 3:1). In ximane tiʼjju tzaj tqʼamaʼn weye ex kubʼ nximane tuʼn miʼn nxiʼye.

Pero mintiʼtoq ojtzqiʼn wuʼne tiʼ tuʼn t-xi nbʼinchaʼne aj tetz bʼaj weye ncarrera. In chin extoqe pakbʼal tkyaqil fin de semana, pero nyaxix ngane tuʼn npakbʼane ex nyatoq waje tuʼn woke te precursor. Nyatoq testigo de Jehová nmane ex jun ntiyoye ex kyajtoq tuʼn waqʼunane toj jun empresa de seguros atz Toronto. Otoq tzaj qʼoʼn jun tbʼanel taqʼun weye ntío toj empresa lu ex kubʼ nkʼuʼje kyuʼn tuʼn ttzaj nkʼamoʼne aqʼuntl.

Tej in nanqʼine atz Toronto, in naqʼunane nim ambʼil ex ok wamiwen wibʼe kyukʼil xjal nya testigo de Jehová. Tuʼn jlu, noq junjun maj in xiʼye kyoj chmabʼil ex in nexe pakbʼal. Toj ambʼil aju, atztoq in chin anqʼine tukʼil nchmane ex nyatoq testigo de Jehová. Pero tej kyim, xi njyoʼne juntl lugar jatumel tuʼn wanqʼine.

Ok Bob ex Marion ik tzeʼn qe nmane, aqeju kabʼe erman xi qʼinte weye toj asamblea toj 1958. Tzaj kyqʼoʼn txokbʼil wiʼje tuʼn nxiʼye anqʼil kyukʼil ex e onin wiʼje tuʼn nchʼiye toj wokslabʼile. Toj 1960, junx in bautisarine tukʼil John jun kyxol qe kykʼwal. Ex tuʼnju ok John te precursor, onin wiʼje tuʼn npakbʼane mas ambʼil. Ok kyqʼoʼn erman kywitz tiʼj tzeʼn otoq chin chʼiye toj wokslabʼile, tuʼntzunju tzaj kyqʼoʼn woklene te siervo te Escuela del Ministerio Teocrático. a

Toj 1966, in kubʼ mojeʼye tukʼil Randi Berge, jun ermana tzalaj tej tajbʼen te precursora ex tajtoq tuʼn t-xiʼ ajbʼel toj juntl lugar. Onin superintendente te circuito qiʼje ex tzaj tqʼamaʼn qeye tuʼn qxiʼye ajbʼel toj congregación te Orillia atz Ontario. Tuʼntzunju, o xiʼye toj lugar aju.

Wajtoqe tuʼn ntzalaje ik tzeʼn te Randi. Tuʼntzunju, tej qpone atz Orillia in noke te precursor ex ok tilil wuʼne tuʼn tbʼant-xix nqʼone xnaqʼtzbʼil. Kubʼ nnaʼne nim tzalajbʼil tej tajbʼen Biblia wuʼne tuʼn wonine kyiʼj txqantl tuʼn tel kynikʼ tiʼj axix tok. Ax  ikx, tej qonine tiʼj jun mejebʼleʼn te Orillia tuʼn tbʼant chʼixpubʼil kyuʼn toj kyanqʼibʼil ex tuʼn t-xi kyqʼamaʼn te Jehová qa kyaj tuʼn kyajbʼen te.

Tej in xiʼye jun maj atz Toronto, ok wojtzqiʼne Arnold MacNamara, jun erman nim toklen toj Betel. Tzaj tqanin weye qa qajtoqe tuʼn qajbʼene te precursor especial. Tej tok nbʼiʼne jlu, xi ntzaqʼweʼne te: «Tbʼanel, pero nya qaje tuʼn qxiʼye atz Quebec». Ik tzeʼn kye txqantl xjal te Canadá in che yolin toj inglés, otoq ten nya bʼaʼn nximbʼetze kyiʼj qeju in che yolin toj francés e anqʼin atz Quebec. Kyoj abʼqʼi aju, ok tilil kyuʼn xjal tuʼn tel tpan tibʼ Quebec tiʼj Canadá.

Tzaj tqʼamaʼn Arnold jlu weye: «Oʼkx in chex samaʼn precursor especial atz Quebec tuʼn sucursal». Xi nkʼamoʼne txokbʼil tuʼnju ojtzqiʼntoq wuʼne qa tajtoq Randi tuʼn t-xi ajbʼel atz. Tej tikʼ ambʼil, el qnikʼe tiʼj qa atzun mas tbʼanel bʼant quʼne toj qanqʼibʼile.

Tzaj qʼoʼn xnaqʼtzbʼil qeye toj yol francés toj junlo jweʼ seman. Yajxitl, o xi samaʼne atz Rimouski junx tukʼil juntl mejebʼleʼn. Tok tnam lu junlo 540 kilómetro tiʼj noreste te Montreal. Naʼmxtoq tbʼant nyoline tiʼj yol francés ex el nikʼbʼaj tiʼj jlu tej tjaw wuʼjine junjun tqanil toj jun chmabʼil. Wajtoqe tuʼn t-xi nqʼamaʼne qa che pol nim qe «erman te Austria», pero etz nqʼamaʼne qa che pol nim qe «erman avestruz».

Nya oʼkx o anqʼine tukʼil juntl mejebʼleʼn atz Rimouski. Toj ja jatumel o anqʼine, ax ikx e anqʼin juntl kyaje precursora, aju familia Huberdeau junx kyukʼil kabʼe kykʼwal. Tzaj tmajen familia lu jun ja te 7 kwart ex qkyaqile xi qchjoʼne. Ok qqʼoʼne tbʼi te «Ja Saq» tuʼnju saq tcolor ex qe tcolumna. Toj ja lu, e anqʼin junlo 12 moqa 14 xjal. Tuʼnju precursor especial qoʼye tukʼil Randi, o pakbʼane enter qʼij. Xi qqʼoʼne chjonte te Jehová tuʼnju kukx ten jun erman tuʼn tex pakbʼal qukʼile, axpe ikx tej tkubʼ cheʼw te qale.

Ten jun tbʼanel qamiwbʼile kyukʼil precursor lu ex o oke ik tzeʼn jun familia. At maj, kubʼ qkʼansaʼne qʼaqʼ tuʼn qtene jun rat junx ex kubʼ qbʼinchaʼne junjun empanadilla ok qqʼoʼne tbʼi te pierogis. Tej kykubʼ qbʼinchaʼne, okx qqʼoʼne alkyexku tiʼ kyoj. Kyoj nim sábado te qonikʼen, jun kyxol qe erman tokarin música, atzun qeye o bʼitzine ex o bʼixine.

Kyajtoq xjal te Rimouski tuʼn tel mas kynikʼ tiʼj Tyol Dios. Toj jweʼ abʼqʼi, e bautisarin nim xjal, chʼiy congregación ex e ten junlo 35 pakbʼal. Tej tok qkeʼyine jlu, kubʼ qnaʼne nimxix tzalajbʼil.

Tej qtene atz Quebec, onin qiʼje tuʼn tbʼant-xix qqʼone xnaqʼtzbʼil. Ok qkeʼyine tzeʼn onin Jehová qiʼje toj pakbʼabʼil ex tzeʼn tzaj tqʼoʼn aju at tajbʼen qeye. Ax ikx, e ok qojtzqiʼne mas qe xjal in che yolin toj francés ex ok qkʼujlaʼne kyyol ex kykostumbr. Onin jlu qiʼje tuʼn kyok qkʼujlaʼne mas xjal te junxichaq kyyajil (2 Cor. 6:13).

Tej tikʼ ambʼil, tzaj tqanin sucursal qeye qa jakutoq qoxe Tracadie, jun tnam tok atz costa este te Nueva Brunswick. Mintiʼtoq ximen quʼne tuʼn ttzaj qʼamaʼn jlu qeye. Tzmatoq in nikʼ chʼin ambʼil tkubʼlen qfirmarine jun contrato tuʼn ttzaj majen jun ja qeye ex in chin aqʼunantoqe mij ambʼil te maestro toj jun escuela. Ax ikx, tzmatoq in che ok junjun xjal in che xnaqʼtzan qukʼile te pakbʼal ex tzmatoq in jaw bʼinchet jun akʼaj Ja te Chmabʼil. Tuʼntzunju, kwest ela toj qwitze tuʼn tkubʼ qximane tiʼ tuʼn tbʼant quʼne.

 Tkyaqil fin de semana o naʼne Dios tiʼj jlu. O xiʼye atz Tracadie ex ok qqʼoʼne qwitze tiʼj qa junxitl twitz Rimouski. Pero kubʼ qximane tuʼn qxiʼye tuʼnju atzun tajtoq Jehová tuʼn tbʼant quʼne. Xi qqanine te Jehová tuʼn tonin qiʼje tuʼn tel qnikʼe kyiʼj junjun tiʼchaq ex atzun jlu bʼant tuʼn (Mal. 3:10). Nya kwest ela toj qwitze tuʼn qxiʼye atz Rimouski tuʼnju attoq jun tbʼanel tamiwbʼil Randi tukʼil Jehová ex in tzalaj.

Oʼkxtoq jun ansyan at toj tnam Tracadie ex Robert Ross tbʼi. Kubʼ t-ximen Robert tukʼil Linda aju t-xuʼjil, tuʼn kyxiʼ ajbʼel toj tnam lu te precursor ex atz e kyaj ten toj lugar lu tej tul itzʼj tnejel kykʼwal. Maske iltoq tiʼj tuʼn kyxqʼuqin tiʼj kykʼwal, e onin qiʼje tuʼnju kubʼ kyyekʼin tbʼanel kymod qukʼile, ok tilil kyuʼn tuʼn kypakbʼan ex bʼant jlu kyuʼn tukʼil tzalajbʼil.

Qʼiʼntoq kabʼe abʼqʼi quʼne te precursor toj Tracadie, tej ttzaj qʼoʼn txokbʼil qiʼje tuʼn qajbʼene toj circuito. Toj wuq abʼqʼi, o visitarine kyiʼj erman in che yolin toj inglés ex yajxitl o xi samaʼne toj juntl circuito atz Quebec jatumel in che yolin erman toj yol francés. Toj circuito lu, in tzaj nnaʼne qa kukx in tzaj felicitarine tuʼn jun superintendente de distrito tej tex junjun nchikʼbʼabʼile. Léonce Crépeault tbʼi erman ex in tzajtoq tqanin jlu weye:  b «¿Tiʼ jaku bʼant tuʼna tuʼn kyonin mas tchikʼbʼabʼila kyiʼj erman?». Tuʼnju onin erman wiʼje, mas nya kwest ela toj kywitz txqantl tuʼn tel kynikʼ kyiʼj nchikʼbʼabʼile ex onin kyiʼj.

Kukx in tzaj nnaʼne Asamblea Internacional «Fe Victoriosa», aju ok atz Montreal toj 1978. In naqʼunane toj Departamento de Alimentos ex in qo ayontoqe tuʼn kypon junlo 80,000 xjal. Toj asamblea lu, xi tzyet juntl akʼaj tumel tzeʼn tuʼn t-xi qʼet wabʼj kye xjal. Ya otoq che kubʼ chʼexpuʼn máquina, aju wabʼj ex tzeʼn in bʼaj bʼinchaʼn. E ajbʼen junlo 20 remolque tuʼn miʼn tnaj wabʼj, pero attoq maj mintiʼ in che aqʼunan. Nya oʼkxju, nya nim ambʼil tzaj qʼoʼn qeye tuʼn qtene toj estadio tuʼn tbʼaj qbʼinchaʼne wabʼj. Jun qʼij tej naʼmxtoq tok asamblea, ajbʼen estadio kyuʼn xjal tuʼn kykeʼyin tiʼj deporte. Tej ttzaj qʼoʼn ambʼil tuʼn qokxe, ya otoq pon tmij aqʼbʼil. Ex iltoq tiʼj tuʼn kymeqʼt horno tuʼn tbʼinchet wabʼj te prim naʼmxtoq qsqix. Otoq qo sikte, pero ok tilil kyuʼn erman tuʼn kyaqʼunan. El nnikʼe tiʼj qa kubʼ kyyekʼin tbʼanel kymod, qa in che tzalaj ex qa attoq jun tbʼanel kyamiwbʼil tukʼil Jehová. Ax ikx,  onin jlu qiʼje tuʼn tten mujbʼabʼil qxole ex kukx at jun tbʼanel qamiwbʼile kyukʼil junjun kye. Tbʼanelxix tej tok asamblea lu atz Quebec jatumel i el ikʼun erman kyuʼn aj qʼoj kyoj abʼqʼi 1940 a 1960.

El nnikʼe kyiʼj junjuntl xnaqʼtzbʼil tej ntene kyukʼil junjuntl superintendente kyoj matij asamblea e ok atz Montreal. In najbʼen ermano David Splane toj Cuerpo Gobernante jaʼlo, pero in tzaj nnaʼne jun ambʼil tej tajbʼen te superintendente de asamblea. Tzaj qʼoʼn oklenj jlu weye toj juntl asamblea ex naʼnx wuʼne qa onin David wiʼje.

O ajbʼene 36 abʼqʼi toj circuito ex toj 2011 tzaj qʼoʼn txokbʼil wiʼje tuʼn t-xi nqʼoʼne Xnaqʼtzbʼil kye ansyan ateʼ kyxol kʼloj okslal. Kyoj kabʼe abʼqʼi, o jtane kywi 75 watbʼil. Kwest ela jlu toj qwitze, pero tbʼanel tuʼnju xi qbʼinchaʼne. Tej tkubʼaj seman, e tzalaj ansyan tuʼnju ok kyqʼoʼn kywitz tiʼj qa xqʼuqin Cuerpo Gobernante tiʼj kyamiwbʼil tukʼil Jehová.

Yajxitl, tzaj qʼoʼn woklene tuʼn t-xi nqʼoʼne Xnaqʼtzbʼil kye Pakbʼal tiʼj Tkawbʼil Dios. Nimku maj ok nqʼoʼne nwitze tiʼj qa tzaj bʼaj kykʼuʼj erman ex qa otoq che sikt tuʼnju iltoq tiʼj tuʼn t-xi kykʼamoʼn xnaqʼtzbʼil toj junlo 7 or, tuʼn t-xi kybʼinchaʼn kydeber toj junlo oxe or ex tuʼn tkubʼ kybʼinchaʼn kyaje moqa jweʼ kyoklen junjun seman. Xi qqʼamaʼne kye erman tukʼil juntl wukʼile qa oʼkx jakutoq bʼant tkyaqil kyuʼn tuʼn tonbʼil Jehová. Tej tok qeʼ kykʼuʼj erman tiʼj Jehová, mas bʼant nim tiʼchaq kyuʼn twitzju otoq kubʼ kyximen. Mlayx tzikʼ tnaʼl wuʼne tej kyjaw labʼin tiʼj jlu.

Tuʼnju kubʼ tyekʼin ntxuʼye qa ximen kyiʼj txqantl, onin kyiʼj xjal e xnaqʼtzan tukʼil tuʼn kychʼiy toj kyokslabʼil ex onin tiʼj nmane tuʼn tchʼexpaj t-ximbʼetz tiʼj axix tok. Tej tikʼ oxe qʼij tkyimlen ntxuʼye, o jaw labʼine tuʼnju pon nmane toj Ja te Chmabʼil bʼilte chikʼbʼabʼil kye kykyaqil xjal. Atxix toj qʼij aju, kukx bʼet kyoj chmabʼil kyoj juntl 26 abʼqʼi. Mintiʼ bautisarin, pero tzaj kyqʼamaʼn ansyan weye qa atoq in pon tnejel toj Ja te Chmabʼil.

Kubʼ tqʼoʼn ntxuʼye jun tbʼanel techel qwitze kyukʼil oxe wanabʼe. Kukx in che ajbʼen wanabʼe te Jehová junx kyukʼil kychmil. Jun kye in najbʼen toj Betel te Portugal, atzun juntl toj Betel te Haití.

Toj ambʼil jaʼlo, in qo ajbʼene te precursor especial tukʼil Randi atz Hamilton toj tnam Ontario. Tej qajbʼene toj circuito, o tzalaje tej qxiʼye bʼinchal revisita ex qʼol xnaqʼtzbʼil kyukʼil erman. Pero jaʼlo in qo tzalaje aj qqʼone xnaqʼtzbʼil kye xjal ex aj tok qkeʼyine qa in che chʼiy toj kyokslabʼil. Ax ikx, mas jaku che ok qojtzqiʼne erman toj congregación ex in nok qkeʼyine tzeʼn in nonin Jehová kyiʼj kyoj tbʼanel ambʼil ex kyoj ambʼil kwest.

In xi qqʼoʼne chjonte kye erman kubʼ kyyekʼin qa e ximen qiʼje. Atzun qeye, o tzʼok tilil quʼne tuʼn t-xi qqʼuqbʼaʼne kykʼuʼj txqantl ex tuʼn qonine kyiʼj tuʼn tbʼant mas kyuʼn toj kyajbʼebʼil te Jehová (2 Cor. 7:6, 7). Toj jun familia, in najbʼentoq txubʼaj te precursor junx kyukʼil kabʼe tal. Oʼkxtoq mambʼaj mintiʼ in najbʼen te precursor, tuʼntzunju, xi nqanine tiquʼn naʼmxtoq tbʼant jlu tuʼn. Tzaj tqʼamaʼn weye qa in nonintoq tiʼj tfamilia, pero xi nqʼamaʼne jlu te: «¿Mintiʼpe in nok qeʼ tkʼuʼja tiʼj qa mas tbʼanel jaku che ok xqʼuqine tuʼn Jehová?». Xi nqʼamaʼne te qa jakutoq tzalaj ik tzeʼn te tfamilia ex tej tikʼ qaq xjaw ya otoq tzʼok te precursor.

Kukx kʼokel tilil quʼne tukʼil Randi tuʼn qyoline kyukʼil kuʼxun kyiʼj tbʼanel tbʼinchbʼen Jehová. Qaje tuʼn kytzalaj tiʼj kyajbʼebʼil te Jehová ik tzeʼn qeye (Sal. 71:17, 18).