1. ¿Tiʼ el tnikʼa tiʼj tej t-xnaqʼtzana tiʼj Tyol Dios?

 ¿NAʼNX tuʼna aju el tnikʼa tiʼj tej t-xnaqʼtzana tiʼj Tyol Dios? Bʼalo jaw labʼina tej tok tbʼiʼna qa at tbʼi Dios. Axlo ikx, chewix tanmiya tej tel tnikʼa tiʼj qa mintiʼ jun infierno jatumel in kubʼ tqʼoʼn Dios kykastiw xjal. Ex kubʼlo tnaʼna nimxix tzalajbʼil tej tok tbʼiʼna qa che kjawil anqʼin xjal kʼujlaʼn tuʼna ex qa jaku tena junx kyukʼil toj Paraíso.

2. Otoqxi tzʼel tnikʼa kyiʼj xnaqʼtzbʼil tkuʼx toj Biblia, ¿tiʼ mas bʼant tuʼna tuʼn tchʼiya toj tokslabʼila? (Efesios 5:1, 2).

² Tej t-xnaqʼtzana tiʼj Biblia, mas chʼiy tkʼujlabʼila tiʼj Jehová. Ex tuʼnju ok tkʼujlaʼna, kubʼ t-ximana tuʼn tkubʼ tbʼinchaʼna aju el tnikʼa tiʼj. Noq tuʼn kyonbʼil nabʼil toj Tyol Dios, el tnikʼa tiʼj tzeʼn tuʼn tjaw tjyoʼna aju mas tbʼanel. Ax ikx, e bʼant junjun chʼixpubʼil tuʼna tuʼntzun ttzalaj Dios tiʼja. Ex ok tilil tuʼna tuʼn tel tkanoʼna qe tbʼanel tmod Jehová ik tzeʼn in nel tkanoʼn jun kʼwal tiʼj tman (kjawil uʼjit Efesios 5:1, 2).

3. ¿Alkyeqe xjel tbʼanel tuʼn qximen tiʼj?

³ Tbʼanel qa ma kubʼ qxjelin jlu: «¿Maspe kʼujlaʼn Jehová wuʼne jaʼlo twitzju tej nbautisarine? ¿In kubʼpe nyekʼine qa in nel nkanoʼne tiʼj t-ximbʼetz ex tmod Jehová ex mas aj tkubʼ nyekʼine nkʼujlabʼile kyiʼj erman toj congregación?». Qa in nel tnikʼa tiʼj qa o chewix tkʼujlabʼila tiʼj Jehová ex kyiʼj erman, miʼn tzaj bʼaj tkʼuʼja. Nya oʼkx tiʼja in bʼaj jlu, sino ax ikx o bʼaj kyiʼj okslal toj tnejel syent abʼqʼi. Maske ikju, mintiʼ kubʼ t-ximen Jesús qa mlaytoq ten kykʼujlabʼil juntl maj ex ax t-ximbʼetz qiʼj toj ambʼil jaʼlo (Apoc. 2:4, 7).  Ojtzqiʼn tuʼn qa jaku ten juntl maj qkʼujlabʼil ik tzeʼn tej tok qojtzqiʼn axix tok.

4. ¿Tiʼ kʼelel qnikʼ tiʼj toj xnaqʼtzbʼil lu?

⁴ Toj xnaqʼtzbʼil lu, qo yolil tnejel tiʼj tzeʼn jaku chʼiy qkʼujlabʼil tiʼj Jehová ex kyiʼj txqantl. Yajxitl, qo xnaqʼtzal kyiʼj junjun tbʼanel tiʼchaq jaku che bʼaj aj tok qkʼujlaʼn mas Jehová ex qe erman.

5, 6. a) ¿Alkyeqe nya bʼaʼn ok weʼ apóstol Pablo twitz toj tajbʼebʼil te Jehová? b) ¿Tiʼ onin tiʼj tuʼn miʼn tkubʼ numj?

⁵ Tzalaj apóstol Pablo tej tajbʼen te Jehová, pero ax ikx ok weʼ kywitz junjun nya bʼaʼn. Iltoq tiʼj tuʼn t-xi bʼet nim ambʼil ex nyatoq fácil jlu. Ex tqʼama qa bʼaj jlu tiʼj: «Nimku maj eljeʼ wiʼje tuj nima» ex «nimku maj eljeʼ wiʼje kyuʼn eleqʼ». Nya oʼkxju, ax ikx ok kybʼinchaʼn aj qʼoj nya bʼaʼn tiʼj (2 Cor. 11:23-27). Ex at maj mintiʼ ok kyqʼoʼn erman toklen tkyaqilju bʼant tuʼn tuʼn tonin kyiʼj (2 Cor. 10:10; Filip. 4:15).

⁶ ¿Tiʼ onin tiʼj Pablo tuʼn kukx tajbʼen te Jehová? Tuʼnju otoq tzʼel tnikʼ kyiʼj tmod tej t-xnaqʼtzan tiʼj Biblia ex tiʼjju otoq tzikʼ toj tanqʼibʼil, ok qeʼ tkʼuʼj tiʼj qa kʼujlaʼntoq tuʼn Jehová (Rom. 8:38, 39; Efes. 2:4, 5). Ex kubʼ tyekʼin Pablo tkʼujlabʼil tiʼj Jehová tej kukx tajbʼen kye erman (Heb. 6:10).

7. ¿Tiʼ kʼonil qiʼj tuʼn tchʼiy qkʼujlabʼil tiʼj Jehová?

⁷ Tuʼn tchʼiy qkʼujlabʼil tiʼj Jehová, nim toklen tuʼn qxnaqʼtzan tiʼj Biblia. Aj tbʼant jlu quʼn, nim toklen tuʼn qximen tiʼj alkyeqe tmod Jehová jaku tzʼel qnikʼ tiʼj kyoj txʼolbʼabʼil in che jaw quʼjin. Tuʼntzunju, il tiʼj tuʼn tkubʼ qxjelin: «¿Tzeʼn in tzaj kyyekʼin versículo lu qa kʼujlaʼn qine tuʼn Jehová? ¿Ex tzeʼn jaku tzʼonin wiʼje tuʼn tok nkʼujlaʼne?».

8. ¿Tzeʼn in nonin naʼj Dios qiʼj tuʼn tchʼiy qkʼujlabʼil tiʼj Jehová?

⁸ Ax ikx jaku chʼiy qkʼujlabʼil tiʼj Jehová aj qnaʼn Dios tkyaqil qʼij ex aj t-xi qqʼamaʼn te tkyaqilju tkuʼx toj qanmi (Sal. 25:4, 5). Jaku tzʼok qeʼ qkʼuʼj tiʼj qa tzul ttzaqʼweʼn Jehová qe qnaʼj Dios (1 Juan 3:21, 22). Tqʼama jun erman jlu aju Khanh tbʼi ex in nanqʼin atz Asia: b «Kʼujlaʼntoq Jehová wuʼne tuʼnju otoq tzʼel nnikʼe tiʼj. Pero chʼiy nkʼujlabʼile tiʼj tej tok nkeʼyine tzeʼn tzaj ttzaqʼweʼn qe nnaʼj Diose. Tuʼntzunju, kubʼ nximane tuʼn t-xi nbʼinchaʼne qe tiʼchaq in tzalaj tiʼj».

9. ¿Tzeʼn kubʼ tyekʼin Timoteo qa otoq chʼiy tkʼujlabʼil?

⁹ Tej tikʼ junjun abʼqʼi toklen Pablo te okslal, ok tojtzqiʼn jun kuʼxun Timoteo tbʼi. Kubʼ tyekʼin Timoteo qa kʼujlaʼn Jehová tuʼn ex qe xjal. Tej tikʼ ambʼil, tqʼama Pablo qe yol lu tiʼj Timoteo kye okslal te Filipos: «Mintiʼ juntl at wukʼile ik tzaʼn te Timoteo, at tkʼuʼj kyiʼje tuʼn tonin kyukʼile» (Filip. 2:20). Mintiʼ tqʼama Pablo qa tbʼanel qʼon Timoteo chikʼbʼabʼil moqa tbʼanel tzeʼn bʼaj tnukʼuʼn qe aqʼuntl. Sino mas ok tqʼoʼn toklen tkʼujlabʼil kubʼ tyekʼin kyiʼj erman. Tuʼntzunju, jaku tzʼok qeʼ qkʼuʼj tiʼj qa kyajtoq erman tuʼn tpon Timoteo visitaril kye (1 Cor. 4:17).

10. ¿Tzeʼn kubʼ tyekʼin Anna tukʼil tchmil tkʼujlabʼil kyiʼj erman?

¹⁰ Tbʼanel tuʼn t-xi qjyoʼn tumel tzeʼn tuʼn qonin kyiʼj erman (Heb. 13:16). Qo yolin juntl maj tiʼj Anna, aju o yolin tiʼj toj  xnaqʼtzbʼil kyaj. Tej otoqxi tzikʼ jun huracán, xiʼ Anna tukʼil tchmil visitaril jun familia ex ok kykeʼyin qa otoq kubʼ xitj twiʼ kyja. Ax ikx, ok kykeʼyin qa mintiʼtoq kyxbʼalun erman saq tuʼn tajbʼen kyuʼn. Tqʼama Anna tiʼ xi kybʼinchaʼn: «Xi qiʼne kyxbʼalun, jatz qtxʼajoʼne ex xi qqʼoʼne kye tej otoq bʼaj qplancharine. Noq chʼin bʼant quʼne, pero onin qiʼje tuʼn tten jun tbʼanel qamiwbʼile». Tuʼnju kʼujlaʼn qe erman tuʼn Anna ex tchmil kubʼ kyximen tuʼn kyonin kyiʼj (1 Juan 3:17, 18).

11. a) ¿Tiʼ in kubʼ kynaʼn txqantl aj tkubʼ qyekʼin qkʼujlabʼil kyiʼj? b) Ik tzeʼn in tzaj tqʼamaʼn Proverbios 19:17, ¿tiʼ in kubʼ t-ximen Jehová aj tkubʼ qyekʼin qkʼujlabʼil kyiʼj txqantl?

¹¹ Aj tkubʼ qyekʼin qkʼujlabʼil ex tbʼanel qmod kyiʼj txqantl, in nok tilil quʼn tuʼn tel qkanoʼn tiʼj tmod ex t-ximbʼetz Jehová. Ex miʼn tzikʼ tnaʼl quʼn qa nim toklen tkyaqilju in bʼant quʼn kyiʼj txqantl. Tqʼama Khanh, aju ermana ma qo yolin tiʼj toj párrafo 8, qa mintiʼ in che ikʼ tnaʼl tuʼn alkyeqe e onin tiʼj. Tqʼama jlu: «In xi nqʼoʼne chjonte kye kykyaqil erman e onin wiʼje tuʼn wexe pakbʼal. Tbʼaneltoq kymod wukʼile. E pon qʼil weye, tzaj kyqʼoʼn jun tiʼ tuʼn t-xi nwane, tzaj kyqʼoʼn txokbʼil wiʼje tuʼn nxiʼye wal kyja ex yajxitl in xi qʼiʼne njaye kyuʼn. In nel nnikʼe tiʼj qa kwest tuʼn tbʼant jlu, pero e onin wiʼje tuʼnju kʼujlaʼn qine kyuʼn». Nyalo kykyaqil erman ktzajel kyqʼoʼn t-xel tkyaqilju in bʼant quʼn kyiʼj. Tqʼamatl Khanh jlu: «Waje tuʼn wonine kyiʼj qeju e onin wiʼje, pero ateʼ junjun mintiʼ ojtzqiʼn wuʼne jatumel in che anqʼin jaʼlo. Noqtzun tuʼnj, ojtzqiʼn tkyaqil tuʼn Jehová ex in chin kubʼsane twitz tuʼn kytzaj tkʼiwlaʼn». Chikʼlixix taʼ, in nok tqʼoʼn Jehová twitz tiʼj aj tkubʼ qyekʼin tbʼanel qmod kyukʼil txqantl. In nok tqʼoʼn toklen qbʼinchbʼen ex in kubʼ t-ximen qa in  xi qqʼoʼn jun tchʼex aju ktzajel tqʼoʼn t-xel (kjawil uʼjit Proverbios 19:17).

12. ¿Tzeʼn jaku kubʼ kyyekʼin erman o che bautisarin kykʼujlabʼil kyiʼj txqantl toj congregación? (Ax ikx qʼonka twitza kyiʼj foto).

¹² Qa jun ermano teya, ¿tzeʼn jaku kubʼ tyekʼina tkʼujlabʼila kyiʼj txqantl toj congregación? Jaku bʼant tuʼna aj tonina kyiʼj. Jun kuʼxun Jordan tbʼi, xi tqanin te jun ansyan tiʼ mas jakutoq bʼant tuʼn tuʼn tonin kyiʼj erman. Xi tqʼamaʼn ansyan te qa in bʼanttoq jun tbʼanel aqʼuntl tuʼn ex xi tqʼoʼn junjun nabʼil te. Jun techel, xi tqʼamaʼn te tuʼn tpon lwey toj Ja te Chmabʼil tuʼntzun kyok tqʼolbʼeʼn qe erman, tuʼn tcomentarin, tuʼn tpakbʼan junx tukʼil tgrupo ex tuʼn t-xi tjyoʼn junjuntl tumel tzeʼn tuʼn tonin kyiʼj erman. Tej t-xi tbʼiʼn Jordan qe consej jlu, nya oʼkx onin tiʼj tuʼn ttzaj qʼoʼn mas toklen, sino ax ikx tuʼn tchʼiy mas tkʼujlabʼil kyiʼj erman. Nya oʼkxju, ax ikx el tnikʼ tiʼj qa mintiʼ in xi tzyet tuʼn tonin jun erman kyiʼj txqantl tzmaxi aj ttzaj qʼoʼn toklen te siervo ministerial, sino ya otoq kubʼ tyekʼin qa in bʼant jlu tuʼn ex kukx il tiʼj tuʼn t-xi tbʼinchaʼn (1 Tim. 3:8-10, 13, TNM).

13. ¿Tiʼ onin tiʼj Christian tuʼn ttzaj qʼoʼn juntl maj toklen te ansyan?

¹³ ¿Ajbʼen teya te ansyan moqa te siervo ministerial toj ambʼil ojtxe? Qa ikju, mintiʼ o tzikʼ tnaʼl tuʼn Jehová tkyaqilju bʼant tuʼna ex aju tkʼujlabʼila kubʼ tyekʼina (1 Cor. 15:58). Ex kukx in nok tqʼoʼn twitz tiʼj tkʼujlabʼila in kubʼ tyekʼina. Tzaj tbʼis jun ermano Christian tbʼi tej t-xi qʼamaʼn te qa ya mlaytoq tzʼajbʼen te ansyan. Pero mintiʼ tzaj bʼaj tkʼuʼj ex tqʼama jlu: «Maske otoq tzʼel qʼiʼn woklene te ansyan, kubʼ nximane tuʼn t-xi nbʼinchaʼne tkyaqilju jakutoq bʼant wuʼne tuʼnju kʼujlaʼn Jehová wuʼne». Tej tikʼ ambʼil, tzaj  qʼoʼn juntl maj toklen te ansyan. Tqʼamatl Christian jlu: «Tzaj nxobʼile tuʼn wajbʼene juntl maj te ansyan. Pero el nnikʼe tiʼj qa kubʼ tyekʼin Jehová t-xtalbʼil wiʼje tej ttzaj tqʼoʼn juntl maj woklene. Tuʼntzunju, xi nkʼamoʼne tuʼnju kʼujlaʼn wuʼne ex qe erman».

14. ¿Tiʼ xnaqʼtzbʼil jaku tzʼel qiʼn tiʼjju tqʼama jun ermana te Georgia?

¹⁴ Ax ikx in kubʼ qyekʼin tmajen Jehová kykʼujlabʼil kyiʼj xjal (Mat. 22:37-39). Jun techel, in tzaj tqʼamaʼn Elena jlu, jun ermana te república de Georgia: «Tnejel, oʼkx in nexe pakbʼal tuʼnju kʼujlaʼntoq Jehová wuʼne. Pero tej tchʼiy nkʼujlabʼile tiʼj, ax ikx chʼiy nkʼujlabʼile kyiʼj xjal. Ok tilil wuʼne tuʼn tel nnikʼe tiʼj alkyeqe nya bʼaʼn in che ok weʼ twitz ex tiʼ kyajtoq tuʼn tok kybʼiʼn. Tuʼnju bʼant jlu wuʼne, mas wajtoqe tuʼn wonine kyiʼj» (Rom. 10:13-15).

15, 16. Ik tzeʼn in nok qkeʼyin kyoj foto, ¿tiʼ jaku bʼaj aj tkubʼ qyekʼin qkʼujlabʼil kyiʼj txqantl?

¹⁵ Aj tkubʼ qyekʼin qkʼujlabʼil kyiʼj erman, ax ikx in nonin kyiʼj txqantl xjal. Toj pandemia te COVID-19, onin jun ermano Paolo tbʼi tukʼil t-xuʼjil kyiʼj junjun ermana otoq che tijen tuʼn tajbʼen kycelular kyuʼn tuʼn kypakbʼan. Jun kyxol qe ermana lu, kwesttoq in nela toj twitz tuʼn tajbʼen tcelular tuʼn. Pero chebʼe chebʼe bʼant tuʼn ex xi tqʼoʼn txokbʼil kyiʼj tfamiliar tuʼn kypon toj Conmemoración. Ex ok kyconectarin kyibʼ junlo 60 tfamiliar toj videoconferencia.  Tuʼn jlu in nel qnikʼ tiʼj qa nya oʼkx onin Paolo tukʼil t-xuʼjil tiʼj ermana, sino ax ikx kyiʼj tfamiliar. Xi ttzʼibʼin ermana jlu te Paolo: «Chjonte tuʼnju o qo tzaj t-xnaqʼtzana. Mlayx tzikʼ tnaʼl quʼne tzeʼn kubʼ tyekʼin Jehová qa in ximen qiʼje ex aju kypasense kubʼ kyyekʼine qiʼje».

¹⁶ Tej tbʼaj jlu tiʼj Paolo, el tnikʼ tiʼj jun xnaqʼtzbʼil nim toklen. El tnikʼ tiʼj qa mas nim toklen tuʼn tkubʼ qyekʼin qkʼujlabʼil twitzju tuʼn tten nim qnabʼil ex qojtzqibʼil. Tqʼama jlu: «Toj jun ambʼil in najbʼene te superintendente te circuito. Bʼalo ya o che ikʼ tnaʼl nchikʼbʼabʼile kyuʼn erman, pero mintiʼ in nikʼ tnaʼl kyuʼn aju onbʼil xi nqʼoʼne kye».

17. ¿Jakupe tzaj qkʼamoʼn kʼiwlabʼil aj tkubʼ qyekʼin qkʼujlabʼil kyiʼj txqantl?

¹⁷ Aj tkubʼ qyekʼin qkʼujlabʼil, ax ikx qe in tzaj qkʼamoʼn kʼiwlabʼil. Atzun jlu in nel qnikʼ tiʼj aj qxnaqʼtzan tiʼjju bʼaj tiʼj Jonathan, jun ermano te Nueva Zelanda. Toj jun sábado, ok tkeʼyin qa in pakbʼantoq jun precursor tjunalx toj tmij qʼij ex attoq nim kyaq. Tej tok tkeʼyin jlu, kubʼ t-ximen tuʼn tex pakbʼal tkyaqil sábado te qale tukʼil erman. Mintiʼtoq ximen tuʼn Jonathan qa tzultoq tkʼamoʼn nim kʼiwlabʼil tuʼnju kubʼ tyekʼin tbʼanel tmod tukʼil erman. Tqʼama Jonathan jlu: «Toj ambʼil aju nyatoq ngane tuʼn npakbʼane. Pero mas chʼiy nkʼujlabʼile tiʼj pakbʼabʼil tej tok nkeʼyine tzeʼn qʼon erman xnaqʼtzbʼil ex tej tok nkeʼyine qa in noktoq bʼiʼn kyuʼn xjal. Ax ikx, kanet jun wamiwe o tzʼonin wiʼje tuʼn nchʼiye toj wokslabʼile, tuʼn tok nkʼujlaʼne pakbʼabʼil ex tuʼn tchʼiy wamiwbʼile tukʼil Jehová».

18. ¿Tiʼ taj Jehová tuʼn tbʼant quʼn?

¹⁸ Taj Jehová tuʼn tok qkʼujlaʼn ex tuʼn kyok qkʼujlaʼn txqantl. Ik tzeʼn ma tzʼel qnikʼ tiʼj, nim toklen tuʼn qxnaqʼtzan tiʼj Biblia, tuʼn qximen tiʼjju in jaw quʼjin ex tuʼn qnaʼn Dios tuʼntzun tchʼiy qkʼujlabʼil tiʼj Jehová. Ax ikx, nim toklen tuʼn qonin kyiʼj erman tuʼntzun tkubʼ qyekʼin qkʼujlabʼil kyiʼj. Qa ma tzʼok tilil quʼn tuʼn tchʼiy qkʼujlabʼil, mas qo okel laqʼeʼ ttxlaj Jehová ex ktel jun tbʼanel qamiwbʼil kyukʼil erman. Ex jaku ten jun tbʼanel qamiwbʼil kyukʼil te jumajx.