¿O tzʼok tbʼiʼna?
¿Tzeʼn e bʼaj bʼinchaʼn ladriy e kanet toj Babilonia ex tzeʼn in tzaj kyyekʼin qa ax tok aju in tzaj tqʼamaʼn Tyol Dios?
O CHE kanet nim millón ladriy kyuʼn arqueólogo toj ojtxe tnam Babilonia aqeju e ajbʼen tuʼn tjaw bʼinchet tnam. In tzaj tqʼamaʼn arqueólogo Robert Koldewey qa e kubʼ bʼinchaʼn ladriy kyoj horno «tiʼjxi tnam tuʼnju jakutoq kanet tbʼanel barro kyuʼn xjal atz ex kʼul tuʼn tkubʼ patin».
In tzaj kyqʼamaʼn junjuntl uʼj qa ax ikx e ajbʼen horno kyuʼn xjal nim kyoklen te Babilonia, pero tuʼn tok kybʼinchaʼn nya bʼaʼn kyiʼj txqantl. Tqʼama Paul-Alain Beaulieu jlu, jun profesor in qʼon xnaqʼtzbʼil tiʼj ojtxe tnam Asiria toj Universidad te Toronto: «In tzaj kyqʼamaʼn nim uʼj te Babilonia [...] qa xi tqʼamaʼn rey tuʼn kykubʼ patin xjal tuʼnju e ok meltzʼaj tiʼj ex tuʼnju mintiʼ ok kyqʼoʼn kyoklen dios te Babilonia». Jun uʼj kubʼ tzʼibʼin toj tqʼijlalil rey Nabucodonosor te Babilonia, in tzaj tqʼoʼn orden jlu: «Che kynajsaʼn kubʼe, che kypatin kubʼe ex tuʼn kytzʼeʼy [...] toj horno te cocin [...], bʼaʼn tuʼn kyok te sibʼ. Bʼiʼx tuʼn kykubʼ naj tuʼn qʼaqʼ».
Kyuʼn yol ma tzʼok qbʼiʼn, in tzaj qnaʼn aju in tzaj tqʼamaʼn capítulo 3 te Daniel. In tzaj tqʼamaʼn capítulo lu qa jaw tbʼinchaʼn rey Nabucodonosor jun matij tilbʼilal te oro tiʼjxi tnam te Babilonia toj jun lugar Dura tbʼi. Ax ikx, qa mintiʼ e kubʼ ẍmejeʼ oxe kuʼxun te Israel twitz tilbʼilal aju ex in tzaj qʼamaʼn qa Sadrac, Mesac ex Abednego kybʼi. Tuʼn jlu, tzaj nim tqʼoj rey Nabucodonosor ex xi tqʼamaʼn «tuʼn tmeqʼt-xix wuq maj jorni mas ik tzaʼn in tenbʼa nej». Ax ikx, xi tqʼamaʼn tuʼn kykux xoʼn oxe kuʼxun lu «tuj jorni in kʼant tuʼn qʼaqʼ». Noqtzun tuʼnj, mintiʼ e kyim tuʼnju kolin jun anjel kyiʼj (Dan. 3:1-6, 19-28).
© The Trustees of the British Museum. Licensed under CC BY-NC-SA 4.0. Source
Tok tbʼi Nabucodonosor tiʼj jun ladriy.
In tzaj kyyekʼin ladriy e kanet toj Babilonia qa jaku tzʼok qeʼ qkʼuʼj tiʼjju in tzaj tqʼamaʼn Tyol Dios. Ax ikx, tzʼibʼin kyiʼj ladriy junjun tqanil in jaw kynimsaʼn rey. In tzaj tqʼamaʼn jun kyxol tqanil jlu: «Aqine Nabucodonosor, rey te Babilonia. [...]. Aqine kubʼ bʼinchante palacio, aju ja jatumel in chin anqʼine [...]. Che kawil nkʼwale toj te jumajx». Aju in tzaj tqʼamaʼn tqanil lu in tzaj tnaʼn qe aʼyeju yol tkuʼx toj Daniel 4:30. Toj texto lu, in jaw tnimsan tibʼ Nabucodonosor kyukʼil yol lu: «Kykeʼyinxe aju nintz tnam Babilonia tbʼanilxix. Tuʼn wipumale ma jaw nbʼinchaʼne jlu tuʼn nnajane tuj ex tuʼntzun kykeʼyinte xjal aju woklene maʼxix».
Bʼalo ax ikx tgana jlu
QE XJEL TIʼJ TYOL DIOS
¿Tiʼ in tzaj tqʼamaʼn Tyol Dios tiʼj Daniel?
Tzaj tyekʼin Dios junjun visión te Daniel kyiʼj tiʼchaq in che bʼaj toj ambʼil jaʼlo.
