1. ¿Tiʼ xnaqʼtzbʼil jaku tzʼel qiʼn kyiʼj junjun tzeʼ? (Ax ikx qʼonka twitza tiʼj dibujo).

 «QA IN kubʼ tdoblarin tibʼ jun tzeʼ aj ttzaj kyqʼiqʼ, mlay kubʼ toqj». Aʼyeju yol lu in tzaj kyyekʼin qe qa ateʼ junjun tzeʼ mintiʼ in che kubʼ toqj maske at nim kyqʼiqʼ. ¿Tiʼ xnaqʼtzbʼil jaku tzʼel qiʼn tiʼj jlu? Qa nim toklen tuʼn tten jun tbʼanel qmod aj qok weʼ kywitz nya bʼaʼn qa qaj tuʼn kukx qajbʼen te Jehová tukʼil tzalajbʼil. Qo xnaqʼtzan tiʼj kabʼe tumel tzeʼn jaku bʼant jlu quʼn. Tnejel, aj tul jun chʼixpubʼil toj qanqʼibʼil ex tkabʼin aj tok qqʼoʼn toklen kyximbʼetz txqantl.

2. ¿Alkyeqe mod jaku che onin qiʼj aj tchʼexpaj qanqʼibʼil ex tiʼ kʼelel qnikʼ tiʼj toj xnaqʼtzbʼil lu?

² Qkyaqilx qaj tuʼn tten jun tbʼanel qmod. Ex qaj tuʼn miʼn tjaw qnimsan qibʼ ex tuʼn tkubʼ qyekʼin qʼaqʼbʼil qkʼuʼj. Toj xnaqʼtzbʼil lu, kʼelel qnikʼ tiʼj tzeʼn e onin kabʼe mod lu kyiʼj junjun erman tej tchʼexpaj kyanqʼibʼil ex qo yolil tiʼj tzeʼn jaku tzʼel qkanoʼn kyiʼj. Pero tnejel qo xnaqʼtzal tiʼj tzeʼn in kubʼ tyekʼin Jehová ex Jesús tbʼanel kymod qukʼil.

3. ¿Tiʼ in bʼant tuʼn Jehová aj kychʼexpaj tiʼchaq twitz Txʼotxʼ?

³ In tzaj tqʼamaʼn Tyol Dios qa in nok Jehová «ik tzaʼn jun pik» tuʼnju mintiʼ in chʼexpaj (Deut. 32:4). Noqtzun tuʼnj, in xi tjyoʼn junjuntl tumel tuʼn tjapun twi t-ximbʼetz aj kychʼexpaj tiʼchaq twitz Txʼotxʼ. Tuʼnju o qo kubʼ tbʼinchaʼn Jehová tuʼn tel qkanoʼn tmod, jaku tzʼel qnikʼ tiʼj tiʼ jaku bʼant quʼn aj tul jun chʼixpubʼil toj qanqʼibʼil. Tuʼntzunju, o che kyaj tqʼoʼn junjun nabʼil toj Tyol jaku che onin qiʼj tuʼn tjaw qjyoʼn alkye mas tbʼanel aj qok weʼ twitz alkyexku nya bʼaʼn. Tuʼn tmod Jehová in  kubʼ tyekʼin ex kyuʼn nabʼil in che tzaj tqʼoʼn qe, in nel qnikʼ tiʼj qa mintiʼ in chʼexpaj, pero in kubʼ tyekʼin qa in ximen kyiʼj txqantl.

4. Qʼamantza jun techel tzeʼn in kubʼ tyekʼin Jehová qa in ximen kyiʼj txqantl (Levítico 5:7, 11).

⁴ Tzʼaqli qe tkawbʼil Jehová ex in tzaj kyyekʼin qa in ximen kyiʼj txqantl. Qo xnaqʼtzan tiʼj jun techel tzeʼn kubʼ tyekʼin Jehová qa ximen kyiʼj xjal te Israel. Mintiʼ xi tqanin kye xjal prow tuʼn t-xi kyqʼoʼn ax chojbʼil ik tzeʼn kye qʼinun. Tuʼntzunju, at maj xi tqʼoʼn Ley ambʼil kye xjal tuʼn t-xi kyqʼoʼn junjun chojbʼil ik tzeʼn jakutoq bʼant kyuʼn (kjawil uʼjit Levítico 5:7, 11).

5. Qʼamantza jun techel tzeʼn kubʼ tyekʼin Jehová qʼaqʼbʼil tkʼuʼj ex qa kubʼ tin tibʼ.

⁵ In ximen Jehová kyiʼj txqantl tuʼnju in kubʼ tin tibʼ ex in kubʼ tyekʼin qʼaqʼbʼil tkʼuʼj. Jun techel, kubʼ tyekʼin qa kubʼ tin tibʼ tej chʼixtoq tkubʼ t-xiten tnam te Sodoma. E ajbʼen junjun anjel tuʼn tuʼn t-xi tqʼamaʼn te Lot tuʼn kyxi oq kywi witz. Noqtzun tuʼnj, tzaj xobʼ Lot ex xi tqʼamaʼn kye anjel tuʼn t-xi qʼoʼn ambʼil kye tuʼn kyxi Zóar, juntl tal tnam otoq kubʼ t-ximen Dios tuʼn tkubʼ t-xiten. Jakutoq txi tqʼamaʼn Jehová te Lot tuʼn t-xi tbʼinchaʼn aju xi tqʼamaʼn te, pero mintiʼ bʼant jlu tuʼn. Sino xi tqʼoʼn ambʼil te Lot tuʼn t-xiʼ Zóar ex mintiʼ kubʼ t-xiten (Gén. 19:18-22). Tej tikʼ ambʼil, ax ikx kubʼ tyekʼin Jehová qʼaqʼbʼil tkʼuʼj kyiʼj xjal te Nínive. Tuʼnju kubʼ kybʼinchaʼn xjal nim nya bʼaʼn, xi tqʼamaʼn Jehová te profeta Jonás tuʼn t-xi tqʼamaʼn kye qa oktoq kbʼel xiten tnam. Pero tuʼnju ajtz tiʼj kyanmi xjal, tzaj qʼaqʼin tkʼuʼj Jehová kyiʼj ex ya mintiʼ kubʼ tbʼinchaʼn aju otoq tqʼama (Jon. 3:1, 10; 4:10, 11).

6. ¿Alkyeqe techel in tzaj kyyekʼin qa ximen Jesús kyiʼj txqantl ik tzeʼn te Jehová?

⁶ Ximen Jesús kyiʼj txqantl ik tzeʼn te Jehová ex atzun jlu el nikʼbʼaj tiʼj tej tten twitz Txʼotxʼ. Tzaj samaʼn tuʼn tpakbʼan kye xjal te «Israel, aqeju ik kyten ik tzaʼn ẍneʼl tzpetni qe». Maske ikju, ax ikx kubʼ tqʼanin Jesús tal jun xuʼj te juntl tnam. Tzaj qʼaqʼin tkʼuʼj tiʼj tej tkubʼsan twitz tuʼn tkubʼ tqʼanin tal, aju «nimxix in yajlanjtz tuʼn juʼẍ» (Mat. 15:21-28). Qo ximen tiʼj juntl techel. Tej tikʼ jun ambʼil t-xilen tzyet tuʼn tpakbʼan Jesús, tqʼama jlu: «Qa at jun xjal in kubʼ tewan [...] qa mintiʼ ojtzqiʼn qine tuʼn, ax ikx weye kbʼel wewane» (Mat. 10:33). Pero mintiʼ kubʼ tewin Jesús moqa mintiʼ el tikʼun Pedro noq tuʼnju kubʼ tewin oxe maj. El tnikʼ tiʼj qa otoq tzaj tbʼis Pedro tiʼjju otoq bʼant tuʼn ex qa attoq jun tbʼanel qʼuqbʼil tkʼuʼj. Tuʼntzunju, tej tjaw anqʼin, kubʼ tyekʼin tibʼ twitz Pedro ex bʼalo xi tqʼamaʼn te qa kʼujlaʼn tuʼn ex qa otoq kubʼ tnajsaʼn til (Luc. 24:33, 34).

7. Ik tzeʼn in tzaj tqʼamaʼn Filipenses 4:5, ¿tiʼ kyximbʼetz txqantl qaj tuʼn tten qiʼj?

⁷ Ma tzʼel qnikʼ tiʼj qa in ximen Jehová ex Jesús kyiʼj txqantl. Ex taj Jehová tuʼn tel qkanoʼn kyiʼj (kjawil uʼjit Filipenses 4:5). Jaku kubʼ qxjelin jlu: «¿In kubʼpe kyximen txqantl qa in chin ximane kyiʼj ex qa in nok nqʼoʼne toklen kyximbʼetz? ¿Moqa  ojtzqiʼnpe qine kyuʼn noq tuʼnju il tiʼj tuʼn t-xi bʼinchet aju in xi nqʼamaʼne? ¿In nokpe tilil wuʼne tuʼn kyxi bʼinchet qe tiʼchaq ik tzeʼn weye waj? ¿Moqa in nok nqʼoʼne toklen kyyol txqantl ex in xi nbʼinchaʼne qa jaku bʼant?». Qa mas ma qo ximen kyiʼj txqantl, mas kʼelel qkanoʼn kyiʼj tbʼanel tmod Jehová ex Jesús. Atzun jaʼlo, qo yolin tiʼj kabʼe ambʼil jatumel il tiʼj tuʼn kybʼant chʼixpubʼil quʼn ex il tiʼj tuʼn qximen kyiʼj txqantl. Tnejel, aj kychʼexpaj tiʼchaq toj qanqʼibʼil. Ex tkabʼin aj tok qkeʼyin qa junxitl kyximbʼetz txqantl twitz qe qximbʼetz.

8. ¿Tiʼ jaku tzʼonin qiʼj aj kychʼexpaj tiʼchaq toj qanqʼibʼil? (Ax ikx qʼonka twitza tiʼj tqanil).

⁸ Il tiʼj tuʼn tel qnikʼ tiʼjju in bʼaj qiʼj aj kychʼexpaj tiʼchaq toj qanqʼibʼil. Mintiʼ ojtzqiʼn quʼn toj alkye ambʼil jaku tzaj jun yabʼil qiʼj, jaku qo kyaj mintiʼ qpwaq moqa jaku tzaj nya bʼaʼn kyxol gobierno. Jaku chʼexpaj qanqʼibʼil kyuʼn tiʼchaq lu ex noq minabʼen jaku tzaj kyiʼn nya bʼaʼn qiʼj (Ecl. 9:12; 1 Cor. 7:31). Ax ikx, jaku chʼexpaj qanqʼibʼil aj tchʼexpaj jun qoklen toj ttnam Jehová. Noq tiʼxku jaku bʼaj, jaku qo naqʼet tiʼj akʼaj tten qanqʼibʼil qa ma che bʼant kyaje tiʼ lu quʼn. Tnejel, tuʼn tel qnikʼ tiʼj qa o chʼexpaj qanqʼibʼil. Tkabʼin, tuʼn qximen tiʼjju kbʼantel quʼn. Toxin, qqʼonk qwiʼ kyiʼj tbʼanel tiʼchaq. Ex tkyajin, qo onin kyiʼj txqantl. b Qo xnaqʼtzan tiʼj tzeʼn o che onin kyaje tiʼchaq lu kyiʼj junjun erman.

9. ¿Tiʼ bʼant kyuʼn kabʼe misionero tuʼn kyex twitz nya bʼaʼn e ok weʼ twitz?

⁹ Tuʼn tel qnikʼ tiʼj qa o chʼexpaj qanqʼibʼil. In najbʼen Emanuele ex Francesca te misionero ex i eʼx samaʼn toj juntl tnam. Tej kypon, ok tilil kyuʼn tuʼn kyxnaqʼtzan tiʼj kyyol xjal ex tuʼn tok kyojtzqiʼn qe erman toj congregación. Pero tej tikʼ chʼin ambʼil, xi tzyet pandemia te COVID-19 ex ya mintiʼ bʼant tuʼn kyten kyukʼil erman. Ax ikx, noq minabʼen kyim ttxuʼ Francesca. Tajtoq Francesca tuʼn tten kyukʼil toj tja, pero mlaytoq bʼant tuʼn tviajarin tuʼn tpaj pandemia. ¿Tiʼ onin tiʼj Emanuele ex Francesca toj ambʼil lu? Tnejel, e naʼn Dios junx te Jehová ex xi kyqanin te tuʼn ttzaj tqʼoʼn kynabʼil tuʼntzun miʼn ttzaj bʼajxix kykʼuʼj. Tzaj ttzaqʼweʼn Jehová kynaʼj Dios toj ambʼil mas tbʼanel tej tajbʼen ttnam tuʼn. Jun techel, onin tyol jun ermano kyiʼj aju etz toj jun video. Tqʼama ermano jlu: «Qa jun rat ma tzʼel qnikʼ tiʼj qa otoq chʼexpaj qanqʼibʼil, mlay txi tiʼn ambʼil tuʼn qtzalaj juntl maj ex tuʼn qnaqʼet tiʼj akʼaj tten qanqʼibʼil». c Tkabʼin, ok tilil kyuʼn tuʼn tbʼant-xix kypakbʼan toj teléfono ex xi tzyet tuʼn t-xnaqʼtzan jun xjal kyukʼil. Ex toxin, xi kyqʼoʼn chjonte kye erman tuʼnju e onin kyiʼj ex tuʼnju kubʼ kyyekʼin kykʼujlabʼil kyiʼj. Toj jun abʼqʼi, kubʼ tyekʼin jun ermana tbʼanel tmod kyukʼil tej t-xi tsamaʼn jun mensaje kye tkyaqil qʼij tukʼil jun texto. ¿Tiʼ xnaqʼtzbʼil jaku tzʼel qnikʼ tiʼj? Qa ma tzʼel qnikʼ tiʼj qa otoq chʼexpaj qanqʼibʼil, mas qo tzalajel tiʼjju jaku bʼant quʼn.

10. ¿Tiʼ bʼant tuʼn jun ermana tej kychʼexpaj tiʼchaq toj tanqʼibʼil?

¹⁰ Ximana tiʼjju kbʼantel tuʼna ex qʼonka twiʼya kyiʼj tbʼanel tiʼchaq. Atz ul itzʼj jun ermana Christina tbʼi atz Rumania, pero in nanqʼin atz Japón. Tzaj tbʼis ermana lu tej tkubʼ naj congregación toj yol inglés jatumel ok tchmon tibʼ. Pero mintiʼ ok tqʼoʼn ermana twiʼ tiʼjju otoq bʼaj ex kubʼ t-ximen tuʼn tonin tiʼj jun congregación toj yol japonés ex pakbʼan tukʼil tzalajbʼil toj yol lu. Xi tqanin  te jun xuʼj otoq tzʼaqʼunan junx tukʼil tuʼn t-xi tqʼoʼn xnaqʼtzbʼil te toj yol japonés tukʼil folleto Tzalaja tiʼj tanqʼibʼila ex tukʼil Biblia. Bʼaʼn ela jlu toj twitz xuʼj ex xi tqʼoʼn xnaqʼtzbʼil te Christina. Ex tej tikʼ ambʼil, tajtoq xuʼj tuʼn tel mas tnikʼ tiʼj Tyol Dios. ¿Tiʼ xnaqʼtzbʼil jaku tzʼel qiʼn tiʼj jlu? Qa jaku che tzaj qkʼamoʼn mas kʼiwlabʼil aj kychʼexpaj tiʼchaq toj qanqʼibʼil qa ma qo ximen tiʼjju kbʼantel quʼn ex qa ma tzʼok qqʼoʼn qwiʼ kyiʼj tbʼanel tiʼchaq.

11. ¿Tiʼ onin tiʼj jun mejebʼleʼn tej kyok weʼ twitz nya bʼaʼn?

¹¹ Tzʼonina kyiʼj txqantl. Toj jun lugar jatumel o tzʼel qʼiʼn ambʼil kye erman tuʼn kyajbʼen te Jehová, kwest ok tanqʼibʼil jun mejebʼleʼn tuʼnju ya mintiʼxix ten pwaq toj tnam. ¿Tiʼ onin tiʼj mejebʼleʼn lu tej kyok weʼ twitz nya bʼaʼn? Tnejel, ok tilil kyuʼn tuʼn kyanqʼin kyukʼil nya nim tiʼchaq. Ex tkabʼin, mintiʼ ok kyqʼoʼn kywiʼ tiʼj nya bʼaʼn ex ok tilil kyuʼn tuʼn kyonin kyiʼj txqantl tej kypakbʼan (Hech. 20:35). Tqʼama chmilbʼaj jlu: «Tuʼnju ok qqʼoʼne qwiʼye tiʼj pakbʼabʼil, mas o ximane tiʼj qajbʼebʼile te Jehová ex ya mintiʼ ten ambʼil qiʼje tuʼn qximane kyiʼj nya bʼaʼn tzaj qiʼje». ¿Tiʼ xnaqʼtzbʼil jaku tzʼel qiʼn tiʼj jlu? Qa ma tzul jun chʼixpubʼil toj qanqʼibʼil, miʼn tzikʼ tnaʼl quʼn qa nim toklen tuʼn qonin kyiʼj txqantl ex mas toj pakbʼabʼil.

12. ¿Tzeʼn jaku tzʼonin techel kyaj tqʼoʼn Pablo qiʼj toj pakbʼabʼil?

¹² Nim toklen tuʼn qximen kyiʼj txqantl toj pakbʼabʼil tuʼnju in qo yolin kyukʼil xjal te junxichaq kyyajil, kymod ex junxichaq tiʼchaq nimen kyuʼn. Atzun jlu bʼant tuʼn apóstol Pablo ex jaku tzʼel qkanoʼn tiʼj tbʼanel techel kyaj tqʼoʼn qwitz. Kubʼ tyekʼin Pablo qa ximen kyiʼj txqantl ex yolin tiʼjju kyajtoq xjal tuʼn tok kybʼiʼn. Ex xi tqʼoʼn Jesús toklen te apóstol «kye xjal mya judiy» (Rom. 11:13). Tuʼn tjapun twi toklen Pablo xi tqʼoʼn Jesús, pakbʼan kye xjal judiy, kye xjal te Grecia, kye xjal ten nim kynabʼil, kye xjal in che aqʼunan tiʼj txʼotxʼ, kye xjal nim kyoklen ex kye rey. Tuʼn tpon xnaqʼtzbʼil toj kyanmi xjal, tqʼama Pablo qa bʼant jlu tuʼn: «Te tkyaqil ma tzʼok nqʼon wibʼe kyxol kykyaqil xjal» (1 Cor. 9:19-23). Tej naʼmxtoq tpakbʼan Pablo kye xjal, ximen tnejel tiʼj kykostumbr ex tiʼjju nimen kyuʼn. ¿Tiʼ xnaqʼtzbʼil jaku tzʼel qnikʼ tiʼj? Qa mas jaku qo ok bʼiʼn kyuʼn xjal toj pakbʼabʼil qa ma qo ximen tiʼjju in nikʼ toj kyanqʼibʼil ex qa ma txi qjyoʼn jun tbʼanel tumel tzeʼn tuʼn qyolin kyukʼil.

13. ¿Tiʼ nya bʼaʼn jaku tzaj qa mintiʼ ma tzʼok qqʼoʼn toklen kyximbʼetz txqantl? (1 Corintios 8:9).

¹³ Qa in kubʼ qyekʼin tbʼanel qmod, mas nya kwest kʼelel toj qwitz tuʼn tok qqʼoʼn toklen kyximbʼetz txqantl. Jun techel, ateʼ junjun ermana in najbʼen maquillaje kyuʼn, atzun junjuntl mintiʼ. Ax ikx, ateʼ junjun erman bʼaʼn in nela toj kywitz tuʼn t-xi kykʼaʼn chʼin qʼeʼn, atzun junjuntl in kubʼ kyximen qa mas bʼaʼn tuʼn miʼn t-xi kynikʼbʼeʼn. Ex qkyaqilx qaj tuʼn miʼn ttzaj yabʼil qiʼj, pero teyele junjun qe in kubʼ qximen tzeʼn tuʼn tok qxqʼuqin qibʼ. Qa in kubʼ qximen qa tbʼanel tkyaqilju in bʼant quʼn ex qaj tuʼn t-xi kybʼinchaʼn txqantl, jaku qo ok te jun tolsabʼil te jun erman ex jaku naj mujbʼabʼil quʼn toj congregación. ¡Ex nya qaj tuʼn tbʼaj jlu! (Kjawil uʼjit 1 Corintios 8:9; 10:23, 24). Qa ma qo ok lepeʼ kyiʼj nabʼil tkuʼx toj Tyol Dios, mlay txi qqʼamaʼn kye txqantl tiʼ tuʼn t-xi kybʼinchaʼn ex qo onil tuʼn tten mujbʼabʼil. Qo xnaqʼtzan tiʼj kabʼe tumel tzeʼn jaku bʼant quʼn.

14. ¿Alkyeqe nabʼil il tiʼj tuʼn qok lepeʼ kyiʼj aj tjaw qjyoʼn qxbʼalun ex tzeʼn tuʼn tbʼaj qbʼinchaʼn qten?

¹⁴ Aj tkubʼ qximen alkye qxbʼalun tuʼn tajbʼen ex tzeʼn tuʼn tbʼaj qbʼinchaʼn qibʼ. Mintiʼ in tzaj tqʼamaʼn Jehová alkyeqe qxbʼalun tuʼn tajbʼen, pero in tzaj tqʼoʼn junjun  nabʼil qe. In tzaj tqʼamaʼn Jehová qa il tiʼj tuʼn tjaw qnimsaʼn tukʼilju alkye tten in bʼaj qxbʼalumin qibʼ ex tuʼn tkubʼ qyekʼin qa at qnabʼil (1 Tim. 2:9, 10; 1 Ped. 3:3). Tuʼntzunju, nya qaj tuʼn tok bʼaj kywitz txqantl qiʼj noq kyuʼn qxbʼalun in che ajbʼen. Ax ikx jaku che onin nabʼil tkuʼx toj Tyol Dios kyiʼj ansyan tuʼn miʼn t-xi kyqʼamaʼn kye txqantl alkyeqe xbʼalun il tiʼj tuʼn tajbʼen kyuʼn ex tzeʼn tuʼn tbʼaj kyxyebʼin kywiʼ. Jun techel, toj jun congregación, e ok lepeʼ junjun kuʼxun tiʼj moda tuʼnju el kyiʼn nim t-xeyele kywiʼ ex mintiʼ bʼaj kyxyebʼin. Kyajtoq ansyan tuʼn kyonin kyiʼj kuʼxun lu. ¿Pero tzeʼn jakutoq bʼant kyuʼn ex mintiʼ tuʼn t-xi kyqʼamaʼn kye tiʼ tuʼn t-xi kybʼinchaʼn? Xi tqʼamaʼn superintendente te circuito kye ansyan tuʼn t-xi kyqʼamaʼn jlu kye kuʼxun: «Qa ma jaxa twitz plataforma ex qa mas ma tzʼok kyqʼoʼn txqantl kywitz tiʼj t-xbʼaluna ex tiʼj alkye tten in bʼaj tbʼinchaʼn ttena twitzju in netz tqʼamaʼna, ¿nyapetzun il tiʼj tuʼn tbʼant jun chʼixpubʼil tuʼna?». Onin jlu kyiʼj ansyan tuʼn tkyaj nya bʼaʼn toj ttxolil ex mintiʼ xi kyqʼamaʼn kye kuʼxun tiʼ tuʼn tbʼant kyuʼn. d

15. ¿Alkyeqe ley ex nabʼil jaku che onin qiʼj aj tkubʼ qximen tzeʼn tuʼn tok qxqʼuqin qibʼ? (Romanos 14:5).

¹⁵ Aj tok qxqʼuqin qibʼ. Teyele junjun qe il tiʼj tuʼn tkubʼ t-ximen tzeʼn kʼokel t-xqʼuqin tibʼ tuʼn miʼn ttzaj jun yabʼil tiʼj (Gál. 6:5). Aj tkubʼ qximen alkyeqe qʼanbʼil che ajbʼel quʼn, il tiʼj tuʼn t-xi qnimen kawbʼil in tzaj tqʼoʼn Tyol Dios tiʼj chikʼ ex tiʼj kyaqʼun chman (Hech. 15:20; Gál. 5:19, 20). Nim toklen tuʼn t-xi qnimen qe kawbʼil lu, atzun junjuntl qʼanbʼil teyele junjun qe kbʼel t-ximen alkye kʼajbʼel tuʼn. Ateʼ junjun xjal in kubʼ kyximen tuʼn kyxiʼ kyukʼil doctor aj ttzaj jun yabʼil kyiʼj, atzun junjuntl in  xi kykʼaʼn junjun qʼanbʼil ya ojtzqiʼn kyuʼn. Jakulo kubʼ qximen qa tbʼanel junjun qʼanbʼil moqa jaku tzaj nya bʼaʼn qiʼj tuʼn, pero tbʼanel tuʼn t-xi qqʼoʼn ambʼil kye erman tuʼn tkubʼ kyximen tiʼ tuʼn tbʼant kyuʼn. Tuʼntzunju, tbʼanel qa ma che tzaj qnaʼn qe xnaqʼtzbʼil lu. Tnejel, oʼkx che kbʼel naj yabʼil aj t-xi tzyet tuʼn tkawin Tkawbʼil Dios (Is. 33:24). Tkabʼin, teyele junjun erman kbʼel t-ximen «alkye bʼaʼn tuj twitz» (kjawil uʼjit Romanos 14:5). Toxin, mintiʼ in qo yolin tiʼjju in kubʼ kyximen txqantl ex mintiʼ in kubʼ qqʼoʼn tolsabʼil toj kybʼe (Rom. 14:13). Ex tkyajin, tuʼnju kʼujlaʼn qe txqantl quʼn in kubʼ qximen qa mas nim toklen mujbʼabʼil toj congregación twitzju qex qximbʼetz (Rom. 14:15, 19, 20). Qa mintiʼ ma che ikʼ tnaʼl tiʼchaq lu quʼn, ktel jun tbʼanel qamiwbʼil kyukʼil erman ex qo onil tuʼn tten mujbʼabʼil toj congregación.

16. ¿Tzeʼn jaku kubʼ kyyekʼin ansyan tbʼanel kymod kyxolx? (Ax ikx qʼonka twitza kyiʼj foto).

¹⁶ Il tiʼj tuʼn tkubʼ kyqʼoʼn ansyan jun tbʼanel techel kywitz txqantl ex tuʼn tkubʼ kyyekʼin tbʼanel kymod kyukʼil (1 Tim. 3:2, 3). Jun techel, mintiʼ tuʼn tkubʼ t-ximen jun ansyan qa tkyaqil maj il tiʼj tuʼn t-xi kynimen txqantl tyol noq tuʼnju ya ma tijen. Sino in nel tnikʼ tiʼj qa jaku tzʼonin xewbʼaj xjan tiʼj alkyexku ansyan tuʼn ttzaj tqʼamaʼn jun tbʼanel tyol tuʼntzun tjaw kyjyoʼn aju mas tbʼanel. Ex qa mintiʼ in che ikʼ tibʼajju in tzaj tqʼamaʼn Tyol Dios, in kubʼ kyyekʼin ansyan jun tbʼanel kymod aj kyonin tiʼjju otoq kubʼ kyximen txqantl maske junxitl kyximbʼetz.

17. ¿Alkyeqe kʼiwlabʼil in che tzaj qkʼamoʼn qa ma ten jun tbʼanel qmod?

¹⁷ In tzaj qkʼamoʼn nim kʼiwlabʼil aj tkubʼ qyekʼin tbʼanel qmod. Jun techel, mas in qo tzalaj aj qten kyukʼil erman ex in ten mujbʼabʼil toj congregación. Ax ikx, in qo tzalaj aj qajbʼen te Jehová junx kyukʼil erman at junxichaq kymod ex kykostumbr. Ex aju mas nim toklen, in kubʼ qnaʼn nim tzalajbʼil aj kyel qkanoʼn tbʼanel tmod Jehová.