1. ¿Tiʼ in kubʼ tnaʼna tiʼjju axix tok?

 KʼUJLAʼN axix tok kyuʼn tmajen Jehová, tuʼnju o chʼiy qʼuqbʼil kykʼuʼj tuʼn (Rom. 10:17). Kyaj tqʼoʼn Jehová congregación tuʼn ttenju «yol axix tok» ex tuʼn tkwentin tiʼj (1 Tim. 3:15). In qo nimen kye qeju nejni qwitz, tuʼnju in tzaj kychikʼbʼaʼn axix tok tiʼj Tyol Dios qe ex in tzaj kyqʼoʼn junjun tqanil qe tuʼntzun tbʼant tajbʼil Jehová quʼn (Heb. 13:17).

2. Ik tzeʼn in tqʼamaʼn Santiago 5:​19, ¿tiʼ nya bʼaʼn in che ok weʼ tmajen Jehová twitz?

² Maske o tzʼel qnikʼ tiʼj axix tok ex ojtzqiʼn quʼn qa il tiʼj tuʼn t-xi qbʼiʼn aju in tzaj tqʼamaʼn ttnam Jehová qe, jakulo qo kubʼ sbʼuʼn ex jakulo qo el paʼn tiʼj axix tok (kjawil uʼjit Santiago 5:19). Taj Satanás tuʼn miʼn tok qeʼ qkʼuʼj tiʼj Biblia ex kyiʼj tqanil in tzaj tqʼoʼn ttnam Jehová qe (Efes. 4:14).

3. ¿Tiquʼn nim toklen tuʼn kukx qten toj axix tok? (Efesios 6:​13, 14).

³ (Kjawil uʼjit Efesios 6:​13, 14). Toj chʼintl ambʼil, tzul tqʼamaʼn Satanás nim nya ax tok yol noq tuʼn kyok meltzʼaj xjal tiʼj ttnam Jehová (Apoc. 16:​13, 14). Ax ikx ojtzqiʼn quʼn qa kʼokel tilil tuʼn Satanás tuʼn tsbʼun kyiʼj tmajen Jehová (Apoc. 12:9). Tuʼntzunju, nim toklen tuʼn tel qnikʼ tiʼj alkye ax tok yol ex alkye nya ax tok. Ax ikx nim toklen tuʼn t-xi qbʼiʼn aju axix tok yol (Rom. 6:17;  1 Ped. 1:22). Nim toklen tuʼn tbʼant jlu quʼn tuʼntzun qkyaj anqʼin aj tul ambʼil te nimxix kʼixbʼisabʼil.

4. ¿Tiʼ kʼelel qnikʼ tiʼj toj xnaqʼtzbʼil lu?

⁴ Toj xnaqʼtzbʼil lu, qo yolil tiʼj kabʼe mod kʼonil qiʼj tuʼn tel qnikʼ tiʼj axix tok in jatz toj Biblia ex tuʼn t-xi qbʼiʼn qe tqanil in tzaj tqʼoʼn ttnam Jehová qe. Ax ikx kʼelel qnikʼ tiʼj oxe tiʼ kʼonil qiʼj tuʼn kukx tok qeʼ qkʼuʼj tiʼj axix tok.

JUNJUN MOD CHE ONIL QIʼJ TUʼN TEL QNIKʼ TIʼJ AXIX TOK

5. ¿Tiʼ toklen aju tuʼn qxobʼ twitz Jehová tukʼilju tuʼn tel qnikʼ tiʼj axix tok?

⁵ Tuʼn qxobʼ twitz Jehová. A t-xilen jlu qa kʼujlaʼnxix Jehová quʼn ex nya qaj tuʼn tkubʼ qbʼinchaʼn jun nya bʼaʼn. Ktzalajel tanmi Jehová quʼn, qa ma tzʼel qnikʼ tiʼj alkye bʼaʼn ex alkye nya bʼaʼn. Ax ikx alkye ax tok yol ex alkye nya ax tok yol (Prov. 2:​3-6; Heb. 5:14). Tuʼnju kʼujlaʼnxix Jehová quʼn mlay txi qqʼoʼn ambʼil tuʼn qtzaj xobʼ kywitz xjal. Ex chʼixme tkyaqil maj aju in kubʼ kybʼinchaʼn xjal nya bʼaʼn in nela toj twitz Jehová.

6. ¿Tiʼ tzaj tuʼnju e tzaj xobʼ qeju 10 xjal i ex samaʼn keʼyil Txʼotxʼ Tziyen maj?

⁶ Qa ma qo xobʼ kywitz xjal ex nya twitz Jehová, jakulo jawje qkʼuʼj tiʼj qa jaku qo klet tuʼn Jehová. Qo ximen tiʼjju bʼaj kyiʼj qeju 12 xjal i ex samaʼn keʼyil txʼotxʼ xi ttziyen Jehová tuʼn t-xi tqʼoʼn kye israelita. 10 kyxol jlu mintiʼ ok kykʼujlaʼn Jehová ex tuʼntzunju e tzaj xobʼxix kywitz xjal te Canaán. Kyqʼama jlu: «Mlay qo xkyeʼ kyiʼj xjal lu, porque mas at kyipun qwitz» (Núm. 13:​27-31). Ax tok, toj kywitz xjal, mas nim kyipun xjal te Canaán kywitz xjal te Israel. Pero ikʼ tnaʼl Jehová kyuʼn tej kyqʼama qa mlay kubʼ kyiʼj aj qʼoj kyuʼn. Maswitlo bʼaʼn noqwit ok kyqʼoʼn kywiʼ tiʼjju  tajtoq Jehová tuʼn tbʼant kyuʼn israelita. Ax ikx, tzajwitlo kynaʼn aju otoq bʼant tuʼn Jehová kyiʼj. Oninwitlo jlu kyiʼj tuʼn tel kynikʼ tiʼj qa at mas tipumal Jehová kywitz xjal te Canaán. Atzunte Josué ex Caleb ten qʼuqbʼil kykʼuʼj ex kyajtoq tuʼn ttzalaj Jehová kyuʼn. Tuʼntzunju, kyqʼama jlu kye israelita: «Qa ma tzalaj Qman qiʼj, ax te kʼonil qe tuʼn qkanun tuj txʼotxʼ ex ktzajel tqʼoʼn qe» (Núm. 14:​6-9).

7. ¿Tiʼ jaku tzʼonin qiʼj tuʼn kukx qnimen te Jehová? (Ax ikx qʼonka twitza tiʼj tilbʼilal).

⁷ Jun tiʼ kʼonil qiʼj tuʼn qnimen te Jehová, aju tuʼn ttzaj qnaʼn alkye bʼaʼn in nela toj twitz naʼmxtoq tkubʼ qximen tuʼn tbʼant jun tiʼ quʼn (Sal. 16:8). Aj tjaw tuʼjina jun relato toj Biblia, bʼaʼn tuʼn tkubʼ t-xjelina jlu: «Noqwit atine atz, ¿tiʼwtlo bʼant wuʼne?». Jun techel, noqwit in bʼina tiʼj nya ax tok tqanil in tzaj kyqʼoʼn qeju 10 espía. ¿Kxelpe tnimana aju tzul kyqʼama ex tzul xobʼa kywitz xjal? ¿Moqa kʼokel qeʼ tkʼuʼja tiʼj Jehová ex kxel tbʼinchaʼna aju tajbʼil? Nimku israelita mintiʼ ok qeʼ kykʼuʼj tiʼj qa ax tok tqanil xi tqʼamaʼn Josué ex Caleb kye. ¿Tiʼ tzaj kyiʼj tuʼn jlu? Mintiʼ e okx toj Txʼotxʼ Tziyen maj (Núm. 14:​10, 22, 23).

8. ¿Alkye qmod il tiʼj tuʼn kukx qaqʼunan tiʼj ex tiquʼn?

⁸ Tuʼn tkubʼ qin qibʼ. In xi tqʼamaʼn Jehová axix tok kye xjal in kubʼ kyin kyibʼ (Mat. 11:25). Tej tel qnikʼ tiʼj axix tok, kubʼ qin qibʼ ex xi qqʼoʼn ambʼil tuʼn kyonin txqantl qiʼj (Hech. 8:​30, 31). Maske ikju, il tiʼj tuʼn kukx tok qxqʼuqin qibʼ tuʼntzun miʼn tjaw qnimsan qibʼ. Qa ma bʼaj jlu qiʼj, jakulo kubʼ qximen qa mas nim toklen qximbʼetz kywitz nabʼil in che kanet quʼn toj Biblia ex kywitz qe tqanil in tzaj tqʼoʼn ttnam Jehová qe.

9. ¿Tiʼ jaku tzʼonin qiʼj tuʼn kukx tkubʼ qin qibʼ?

⁹ ¿Tiʼ kʼonil qiʼj tuʼn miʼn tjaw qnimsan qibʼ? Bʼaʼn tuʼn ttzaj qnaʼn qa nya nim qoklen aj tok qmojbʼan qibʼ tukʼil Jehová (Sal. 8:​3, 4). Ax ikx bʼaʼn tuʼn t-xi qqʼamaʼn te Jehová tuʼn tonin qiʼj tuʼn miʼn tjaw qnimsan qibʼ ex tuʼn t-xi qqʼoʼn ambʼil tuʼn qtzaj t-xnaqʼtzaʼn. Kʼonil Jehová qiʼj tuʼn miʼn t-xi qbʼiʼn qex qximbʼetz, sino tuʼn t-xi qbʼiʼn tnejel aju in tzaj tqʼamaʼn Tyol ex ttnam qe. Aj tuʼjina tiʼj Biblia, jyona kyiʼj tqanil in tzaj kyyekʼin qa tgan Jehová qe xjal in kubʼ kyin kyibʼ ex qa in nel tikʼun qeju in jaw kynimsan kyibʼ ex mintiʼ in che nimen. Tuʼntzunju, tbʼanel tuʼn tkubʼ tin tibʼa aj ttzaj qʼoʼn jun toklena, mas qa ktel toklena kyibʼaj txqantl ex kʼokel kyqʼoʼn kywitz tiʼja.

¿TIʼ JAKU BʼANT QUʼN TUʼN KUKX QNIMEN?

10. ¿Alkyeqe o che ajbʼen tuʼn Jehová tuʼn tonin kyiʼj tmajen ex tuʼn ttzaj tqʼamaʼn tiʼ il tiʼj tuʼn tbʼant kyuʼn?

¹⁰ Bʼaʼn tuʼn tok qeʼ qkʼuʼj tiʼjju in tzaj tqʼamaʼn Jehová qe. Tej kyok aj Israel te ttnam Jehová, ajbʼen Moisés ex Josué tuʼn tuʼntzun ttzaj tqʼamaʼn kye xjal tiʼ iltoq tiʼj tuʼn tbʼant kyuʼn (Jos. 1:​16, 17). E tzaj kʼiwlaʼn qe aj Israel tej kynimen kye xjal e jaw tskʼoʼn Jehová. Tej tikʼ nim syent abʼqʼi, e ajbʼen 12 apóstol tuʼn tuʼn ttzaj tqʼamaʼn tiʼ tuʼn tbʼant kyuʼn okslal (Hech. 8:​14, 15). Tej tikʼ ambʼil, e onin junjuntl ansyan te Jerusalén kyiʼj. Tuʼnju xi kynimen erman tqanil tzaj kyqʼoʼn qe apóstol ex qe ansyan, «e kyuwsanjtz qe okslal tuj kyokslabʼl tuj junjun tnam, ex in chmet-xi kybʼet junjun qʼij» (Hech. 16:​4, 5). Ax ikx toj ambʼil jaʼlo, in qo tzaj  tkʼiwlaʼn Jehová aj t-xi qnimen qe tqanil in tzaj tqʼoʼn ttnam qe. Pero, ¿tiʼ jaku kubʼ tnaʼn Jehová qa mintiʼ ẍex qnimen qeju erman o txi qʼoʼn kyoklen toj ambʼil jaʼlo? Tuʼn tel qnikʼ tiʼj jlu, qo xnaqʼtzan tiʼj tiʼ bʼaj kyiʼj aj Israel tej in che bʼettoq tuʼn kypon toj Txʼotxʼ Tziyen maj.

11. ¿Tiʼ tzaj kyiʼj qeju mintiʼ xi kynimen tyol Moisés aju otoq jaw t-skʼoʼn Jehová tuʼn tkubʼ nej twitz ttnam? (Ax ikx qʼonka twitza tiʼj tilbʼilal).

¹¹ Tej in che bʼettoq aj Israel tuʼn kypon toj Txʼotxʼ Tziyen maj, ateʼ junjun xjal nim kyoklen nya kyajtoq tuʼn t-xi kynimen qa otoq tzaj tqʼoʼn Jehová toklen Moisés. Kyqʼama jlu: «Kykyaqil tnam xjal xjan qe ex at Qman qukʼil qkyaqil» (Núm. 16:​1-3). Ax tok «kykyaqil tnam xjal xjan qe», pero otoq jaw tskʼoʼn Jehová Moisés tuʼn tkubʼ nej kywitz (Núm. 16:28). Tej kyyolin nya bʼaʼn tiʼj Moisés atz e yolin nya bʼaʼn tiʼj Jehová. Mintiʼ e ximen tiʼjju tajbʼil Dios, sino atz e ximen tiʼjju kyex kyajbʼil ik tzeʼn tuʼn tten mas kyoklen. Kubʼ tnajsaʼn Jehová qeju nejenel lu ex nim mil aj Israel otoq che ok lepeʼ kyiʼj (Núm. 16:​30-35, 41, 49). Ax ikx toj ambʼil jaʼlo, nya bʼaʼn in nel toj twitz Jehová qa mintiʼ in chex qnimen qe qʼil twitz aqʼuntl toj ttnam.

12. ¿Tiquʼn bʼaʼn tuʼn kukx tok qeʼ qkʼuʼj tiʼj ttnam Jehová?

¹² At nim tiquʼn tuʼn tok qeʼ qkʼuʼj tiʼj ttnam Jehová. Aj tel kynikʼ qeju qʼil twitz aqʼuntl toj ttnam Jehová tiʼj qa at jun chʼixpubʼil il tiʼj tuʼn tbʼant tiʼj jun xnaqʼtzbʼil in jatz toj Tyol Dios moqa tiʼj jun tten tuʼn tbʼant aqʼuntl, in bʼant kyuʼn (Prov. 4:18). In bʼant jlu kyuʼn tuʼnju kyaj tuʼn ttzalaj Jehová kyiʼj. In nok tilil kyuʼn tuʼn tkubʼ kybʼinchaʼn ik tzeʼnxix in tzaj tqʼamaʼn Tyol Dios. Ax ikx qe il tiʼj tuʼn tbʼant jlu quʼn.

13. ¿Tiʼ aju «yol mintiʼ tpaltil», ex tiʼ jaku bʼant quʼn tukʼil?

¹³ «Tzyuma ju yol mintiʼ tpaltil» (2 Tim. 1:13). Aju «yol mintiʼ tpaltil», atz in yolin  kyiʼj xnaqʼtzbʼil kyaj t-xnaqʼtzaʼn Jesús ex kyiʼj kykyaqil xnaqʼtzbʼil ateʼ toj Biblia (Juan 17:17). O tzʼok tilil tuʼn ttnam Jehová tuʼn ttzaj t-xnaqʼtzaʼn qe xnaqʼtzbʼil lu qe, tuʼntzunju, tkyaqilju o tzʼel qnikʼ tiʼj atz o jatz kyoj xnaqʼtzbʼil lu. Qa kukx ma chex qnimen tzul tbʼanel qe.

14. ¿Tiquʼn kyaj tzaqpiʼn «yol mintiʼ tpaltil» kyuʼn junjun okslal?

¹⁴ ¿Tiʼ jaku tzaj qa mintiʼ sok qeʼ qkʼuʼj tiʼj «ju yol mintiʼ tpaltil»? Qqʼonk qwitz tiʼjju bʼaj toj tnejel syent abʼqʼi. At junjun okslal e ok ten qʼamalte qa otoq tzul tqʼij Jehová. Kyqʼama jlu tuʼnju ok kybʼiʼn qa at jun tcarta apóstol Pablo in yolin tiʼj jlu. Xi kynimen junjun okslal te Tesalónica qe yol lu, axpe ikx xi kyqʼamaʼn kye txqantl, maske mintiʼ xi kyjyoʼn tqanil qa ax tok jlu. Noqwit tzaj kynaʼn qe yol xi tqʼamaʼn Pablo kye tej tten kyukʼil, mintiʼwtlo e kubʼ sbʼuʼn (2 Tes. 2:​1-5). Xi tqʼamaʼn apóstol Pablo kye tuʼn miʼn t-xi kynimen tkyaqil aju in nok kybʼiʼn. Tuʼn miʼn tbʼaj juntl maj jlu kyiʼj, xi tqʼamaʼn apóstol Pablo jlu kye toj tkabʼ tcarta: «Aju qʼolbʼebʼl lu tuʼnx nqʼabʼe ma txi ntzʼibʼane, aqine Pablo; atzun techal jlu tiʼj tkyaqil uʼj in xi ntzʼibʼane; kyjaʼtzun tten chin tzʼibʼane» (2 Tes. 3:17).

15. ¿Alkye tten jaku tzʼok qkwentin qibʼ kyiʼj qe tqanil nya axix tok? Qʼamantza jun techel. (Ax ikx qʼonka twitza kyiʼj tilbʼilal).

¹⁵ ¿Tiʼ in tzaj t-xnaqʼtzaʼn qe aju xi ttzʼibʼin apóstol Pablo kye okslal te Tesalónica? Qa ma tzʼok qbʼiʼn jun tqanil aju junxitl twitzju ojtzqiʼn quʼn, tenx qnabʼil. Jun techel, toj ojtxe tnam te Unión Soviética, kubʼ kytzʼibʼin aj qʼoj tiʼj ttnam Jehová jun carta toj kybʼi qeju qʼil twitz aqʼuntl aju in tzaj tqʼamaʼn qa jaku bʼant juntl organización kyuʼn aparte tiʼj ttnam Jehová. Mintiʼ e kubʼ tzʼaq qe erman waʼl toj kyokslabʼil toj tramp lu, maske mer axix tok aju ok kybʼiʼn. El kynikʼ tiʼj qa nya ax tok aju tzaj qʼamaʼn toj carta. Ax ikx toj ambʼil jaʼlo, at maj in najbʼen internet ex qe redes sociales kyuʼn aj qʼoj tuʼn qel tzpet ex tuʼn miʼn  tten mujbʼabʼil qxol. Tuʼntzunju, tbʼanel tuʼn t-xi qjyoʼn tqanil tiʼjju in nok qbʼiʼn ex tiʼjju in jaw quʼjin qa ik tten ik tzeʼn o tzʼel qnikʼ tiʼj toj Biblia tuʼntzun «miʼn tchʼexpet naj» qnabʼil (2 Tes. 2:2; 1 Juan 4:1).

16. Ik tzeʼn in tzaj tqʼamaʼn Romanos 16:17 ex 18, ¿tiʼ mintiʼ tuʼn tbʼant quʼn kyukʼil qeju o tzʼel kypan kyibʼ tiʼj axix tok?

¹⁶ Miʼn tzʼel qpan qibʼ kyiʼj qeju tzʼaqli twitz Jehová. Taj Dios tuʼn tten mujbʼabʼil qxol kyukʼil kykyaqil erman aj qajbʼen junx te ex jaku bʼant jlu quʼn qa kukx ma qo ten toj axix tok. Aqeju in nel kypan kyibʼ tiʼj axix tok mintiʼ in che onin tuʼn tten mujbʼabʼil kyxol erman. Tuʼntzunju, in tzaj tqʼamaʼn Dios qe tuʼn miʼn tok qmojbʼan qibʼ kyukʼil tuʼntzun miʼn qel kypaʼn tiʼj axix tok (kjawil uʼjit Romanos 16:​17, 18).

17. ¿Tiʼ jaku bʼaj qa ma tzʼel qnikʼ tiʼj axix tok ex qa kukx ma qo ten toj?

¹⁷ Qa ma tzʼel qnikʼ tiʼj axix tok ex qa kukx ma qo ten toj, kukx qo tel ttxlaj Jehová ex kukx qo tel kyuw toj qokslabʼil (Efes. 4:​15, 16). Nya oʼkxju, ax ikx mlay qo kubʼ tzʼaq toj t-sbʼubʼil Satanás kyukʼil nya axix tok t-xnaqʼtzbʼil ex qo okel tkwentin Jehová toj nimxix yajbʼil. Qa kukx ma qo ten toj axix tok, ktel Dios qukʼil «aju qʼuqbʼalte» qkʼuʼj (Filip. 4:​8, 9).