XNAQʼTZBʼIL 29
BʼITZ 121 Il tiʼj tuʼn qjakʼunte qibʼ
Kukx qxqʼuqink qibʼ tuʼn miʼn qkubʼ tzaj toj jun nya bʼaʼn
«Che xqʼuqine ex che naʼne Dios tuʼn miʼn kyoke tuj joybʼil» (MAT. 26:41).
¿TIʼ KʼELEL QNIKʼ TIʼJ?
Kyolil xnaqʼtzbʼil lu tiʼj alkye junjuntl tiʼ mintiʼ tuʼn tbʼant quʼn tuʼn miʼn qkubʼ tzʼaq toj jun il.
1, 2. a) ¿Tiʼ tzaj tqʼamaʼn Jesús? b) ¿Tiquʼn e kubʼ tzʼaq qe t-xnaqʼtzbʼen Jesús toj nya bʼaʼn? (Ax ikx qʼonka twitza kyiʼj tilbʼilal).
«TAJ kyanmiye tuʼn kyxqʼuqine, atzun kyximlale mintiʼ tipun» (Mat. 26:41b). a El tnikʼ Jesús tiʼj qa aj il xjal qoʼ ex qa jaku qo el txalpaj, pero ax ikx tzaj tqʼamaʼn qa il tiʼj tuʼn tok qxqʼuqin qibʼ tuʼn miʼn tok qeʼ qkʼuʼj qiʼjx. Tej naʼmxtoq ttzaj tqʼamaʼn Jesús qe yol lu, otoq tzaj kyqʼamaʼn t-xnaqʼtzbʼen qa mlaytoq kyaj kytzaqpiʼn (Mat. 26:35). Bʼaʼn aju kyqʼama, pero mintiʼ tzaj kynaʼn qa kwest jakutoq bʼant jlu kyuʼn aj kyok weʼ twitz nya bʼaʼn. Tuʼntzunju, xi tqʼamaʼn Jesús jlu kye: «Che xqʼuqine ex che naʼne Dios tuʼn miʼn kyoke tuj joybʼil kyiʼje» (Mat. 26:41a).
2 Tej ttzyet Jesús kyuʼn aj qʼoj, ¿tiʼ bʼant kyuʼn t-xnaqʼtzbʼen? E ikʼ jtan ex kyaj kytzaqpiʼn. Bʼisbʼajilxix tuʼnju mintiʼ japun twiʼ kyyol ex mintiʼ e ximen tiʼj tiʼtoq che okel weʼ twitz (Mat. 26:56).
Xi tqʼamaʼn Jesús kye t-xnaqʼtzbʼen tuʼn miʼn kyikʼ jtan ex tuʼn kyxqʼuqin tuʼntzun miʼn kykubʼ tzʼaq toj jun nya bʼaʼn, pero kyaj kykolin te. (Qʼonka twitza tiʼj párrafo 1 ex 2).
3. a) ¿Tiquʼn mintiʼ tuʼn tok qeʼ qkʼuʼj qiʼjx qa qaj tuʼn kukx qten tzʼaqli twitz Jehová? b) ¿Tiʼ kʼelel qnikʼ tiʼj toj xnaqʼtzbʼil lu?
3 Ax ikx qe, mintiʼ tuʼn tok qeʼ qkʼuʼj qiʼjx. Olo bʼaj qximen tuʼn miʼn tel qpan qibʼ tiʼj Jehová, pero ax ikx bʼaʼn tuʼn ttzaj qnaʼn qa aj il xjal qoʼ ex jaku qo kubʼ tzʼaq toj jun nya bʼaʼn (Rom. 5:12; 7:21-23). Maske mintiʼ ximen quʼn, jaku qo ok weʼ twitz junjun nya bʼaʼn ex kwest jaku tzʼela toj qwitz tuʼn tkubʼ kyiʼj quʼn. Qa qaj tuʼn kukx qten tzʼaqli twitz Jehová ex Jesús, il tiʼj tuʼn t-xi qbʼiʼn consej tqʼama Jesús tuʼn tok qxqʼuqin qibʼ. Atzun jlu kʼelel qnikʼ tiʼj toj xnaqʼtzbʼil lu. Tnejel, qo xnaqʼtzal tiʼj alkye junjun nya bʼaʼn jaku qo ok weʼ twitz. Yajxitl, qo xnaqʼtzal tiʼj tzeʼn jaku tzʼok qxqʼuqin qibʼ kyiʼj nya bʼaʼn lu. Te bʼajsbʼil, qo xnaqʼtzal tiʼj tiʼ jaku bʼant quʼn tuʼn kukx tok qxqʼuqin qibʼ.
¿ALKYE JUNJUN NYA BʼAʼN KʼOKEL QXQʼUQIN QIBʼ TIʼJ?
4, 5. ¿Tiquʼn nim toklen tuʼn kukx tok qxqʼuqin qibʼ kyiʼj junjun il?
4 Ateʼ junjun il mas jaku tzaj kyiʼn nya bʼaʼn tiʼj qamiwbʼil tukʼil Jehová. Ex qa mintiʼ ma tzʼok qxqʼuqin qibʼ, jaku qox tiʼn tuʼn tkubʼ qbʼinchaʼn junjun matij il.
5 Qkyaqilx jaku qo ok weʼ twitz jun nya bʼaʼn. Pero teyele te junjun qe jaku tzʼok tojtzqiʼn alkye jun nya bʼaʼn jaku kubʼ tzʼaq toj. Ateʼ junjun in nok tilil kyuʼn tuʼn miʼn kykubʼ tzʼaq toj yaẍbʼil. Ex ateʼ junjuntl in nok tilil kyuʼn tuʼn miʼn tkubʼ kybʼinchaʼn junjun ttzʼilil, ik tzeʼn tuʼn miʼn kysaqchan tiʼj kytzʼalbʼil moqa tuʼn miʼn tok kyqʼoʼn kywitz tiʼj pornografía. Ax ikx ateʼ junjuntl kukx in nok tilil kyuʼn tuʼn tbʼant kynimen, tuʼn miʼn kyjaw kyaqpaj ex tuʼn miʼn kytzaj xobʼ kywitz xjal aj tkubʼ kybʼinchaʼn bʼaʼn. Tuʼntzunju, tqʼama Santiago jlu: «Teyle junjun nnoʼk tuj joybʼil tiʼj, ax tnabʼl in xmoxin te tuʼn tpon tkʼuʼj tiʼj ju mya bʼaʼn, ax tnabʼl in sbʼunte te» (Sant. 1:14).
6. ¿Tiʼ bʼaʼn tuʼn tel qnikʼ tiʼj?
6 ¿O tzʼel tnikʼa tiʼj alkye jun nya bʼaʼn kwest tuʼn tkubʼ tiʼj tuʼna? Nya bʼaʼn tuʼn tkubʼ qximen qa mintiʼ jun nya bʼaʼn in qo ok weʼ twitz moqa mlayx qo kubʼ tzʼaq toj (1 Juan 1:8). Tqʼama apóstol Pablo qa ax ikx qeju kyuw ateʼ toj kyokslabʼil il tiʼj tuʼn tok kyxqʼuqin kyibʼ tiʼj nya bʼaʼn (Gál. 6:1). Mintiʼ tuʼn tkubʼ qsbʼun qibʼ ex bʼaʼn tuʼn tel qnikʼ tiʼj alkye jun nya bʼaʼn jaku qo kubʼ tzʼaq toj (2 Cor. 13:5).
7. ¿Alkye mas il tiʼj tuʼn tok qxqʼuqin? Qʼamantza jun techel.
7 ¿Tiʼ jaku bʼant quʼn qa o tzʼel qnikʼ tiʼj alkye jun nya bʼaʼn jaku qo kubʼ tzʼaq toj? Bʼaʼn tuʼn tok tilil quʼn tuʼn kukx tok qxqʼuqin qibʼ tiʼj. Jun techel, toj ambʼil ojtxe jaw bʼinchaʼn muro kyiʼj junjun tnam, pero mas fácil jakutoq che okx nya bʼaʼn xjal kyoj pwert. Tuʼntzunju, iltoq tiʼj tuʼn kyok xqʼuqit qe pwert. Ax ikx qe, mas il tiʼj tuʼn tok qxqʼuqin qibʼ kyiʼj qe nya bʼaʼn ojtzqiʼn quʼn qa jaku qo kubʼ tzʼaq kyoj (1 Cor. 9:27).
¿TZEʼN JAKU TZʼOK QXQʼUQIN QIBʼ?
8, 9. ¿Tiʼwtlo bʼant tuʼn kuʼxun in yolin capítulo 7 te Proverbios tiʼj tuʼn miʼn tkubʼ tzʼaq toj il? (Proverbios 7:8, 9, 13, 14, 21).
8 ¿Tiʼ jaku bʼant quʼn tuʼn tok qxqʼuqin qibʼ tiʼj nya bʼaʼn? Qo xnaqʼtzan tiʼjju in tzaj tqʼamaʼn Proverbios capítulo 7. Toj capítulo lu in tzaj qʼamaʼn qa kubʼ tzʼaq jun kuʼxun toj yaẍbʼil tukʼil jun xuʼj nya bʼaʼn. In tzaj tqʼamaʼn versículo 22 qa noq «minabʼenku ok lpeʼ naj kuʼxun tiʼj ju xuʼj». Pero in tzaj kyyekʼin versículo ateʼ antes qa at junjun tiʼ bʼant tuʼn kuʼxun ex chʼinaq kubʼ tzʼaq toj il tuʼn.
9 ¿Alkye junjun tiʼchaq bʼant tuʼn kuʼxun? Tnejel, «tej tpon tuj skyin, ikʼx tuj cay tuʼn tpon tja ju xuʼj aj pajil, otoq tzʼok qax ex kyjaʼtoq tok yupj» (kjawil uʼjit Proverbios 7:8, 9). Yajxitl tej tlonte kuʼxun xuʼj mintiʼ el oq twitz, sino xi tqʼoʼn ambʼil tuʼn tel ttzʼubʼin twitz ex tuʼn t-xi tqʼamaʼn xuʼj te qa otoq txi tqʼoʼn oyaj te mujbʼabʼil. Toj juntl yol, oklo tilil tuʼn xuʼj tuʼn t-xi tqʼamaʼn qa bʼaʼn xjal te (kjawil uʼjit Proverbios 7:13, 14, 21). Noqwit mintiʼ e bʼant qe tiʼchaq lu tuʼn kuʼxun, mintiʼwtlo kubʼ tzʼaq toj il.
10. Ik tzeʼn bʼaj tiʼj kuʼxun in tzaj qʼamaʼn toj Proverbios, ¿tiquʼn jaku kubʼ tzʼaq jun tmajen Jehová toj jun il?
10 Jaku bʼaj jlu tiʼj alkyexku tmajen Jehová. Qa ma kubʼ tzʼaq toj jun il, jaku kubʼ t-ximen qa noq minabʼen xkubʼ tzʼaq toj. Jakulo tqʼama: «Saber tzeʼnlo xbʼaj lu wiʼje». Pero qa ma tzaj tnaʼn, atlo junjun tiʼchaq xbʼant tuʼn naʼmxtoq tkubʼ tzʼaq toj il. Oklo tjunin tibʼ kyukʼil nya bʼaʼn amiw, xiʼlo kyoj junjun lugar nya bʼaʼn, okxlo toj junjun tembʼil te internet nya bʼaʼn moqa bʼant junjuntl tiʼ tuʼn. Nya oʼkxju, ax ikx ya mintiʼlo naʼn Dios, ya mintiʼlo jaw tuʼjin Biblia, ya mintiʼlo bʼet kyoj chmabʼil moqa ya mintiʼlo ex pakbʼal. Ik tzeʼn bʼaj tiʼj kuʼxun, bʼalo nya noq minabʼen kubʼ tbʼinchaʼn il.
11. Qa nya qaj tuʼn tkubʼ qbʼinchaʼn jun il, ¿tiʼ il tiʼj tuʼn tbʼant quʼn?
11 ¿Tiʼ xnaqʼtzbʼil jaku tzʼel qiʼn tiʼj jlu? Nya oʼkx il tuʼn tel qpan qibʼ tiʼj il, sino ax ikx mintiʼ tuʼn tkubʼ qbʼinchaʼn junjun tiʼchaq tuʼn miʼn qkubʼ tzʼaq toj il. Atzun jlu tqʼama Salomón otoqxi bʼaj yolin tiʼj kuʼxun tukʼil xuʼj nya bʼaʼn. Xi tqʼamaʼn jlu te kuʼxun: «Miʼn tzʼok lpeʼya tiʼj» (Prov. 7:25). Ex xi tqʼoʼn consej lu te: «Tel laqʼeya tiʼj xuʼj aj pajil; ex miʼnlpe txi laqʼeya ttzi tja» (Prov. 5:3, 8). Toj juntl yol, qa qajbʼil tuʼn miʼn tkubʼ qbʼinchaʼn il, mintiʼ tuʼn tkubʼ qbʼinchaʼn junjun tiʼchaq aju jaku qo kubʼ tzʼaq toj il tuʼn. b Ateʼ junjun tiʼchaq in bʼant kyuʼn junjun erman ex mintiʼ in tzaj tiʼn nya bʼaʼn kyiʼj, pero jaku che kubʼ tzʼaq junjuntl toj il tuʼn. Tuʼntzunju, ax ikx il tiʼj tuʼn tok qxqʼuqin qibʼ kyiʼj tiʼchaq lu (Mat. 5:29, 30).
12. ¿Tiʼ kubʼ t-ximen Job tuʼn tbʼant tuʼn ex alkye tten jakutoq tzʼonin tiʼj tuʼn tok t-xqʼuqin tibʼ? (Job 31:1).
12 Qa nya qajbʼil tuʼn qkubʼ tzʼaq toj il kyuʼn junjun tiʼchaq, bʼaʼn tuʼn tel qkanoʼn tiʼjju bʼant tuʼn Job. Tuʼn miʼn tpon tkʼuʼj tiʼj juntl xuʼj, kubʼ t-ximen tuʼn tbʼant jun tiʼ tuʼn. Tqʼama jlu: «O kubʼ nqʼoʼne jun nleye ax wiʼje» (kjawil uʼjit Job 31:1). Mlaytoq kubʼ tzʼaq toj il qa ma bʼant jlu tuʼn. Ax ikx qe, jaku kubʼ qximen tuʼn tbʼant junjun tiʼchaq quʼn tuʼntzun miʼn qkubʼ tzʼaq toj il.
13. ¿Tiquʼn nim toklen tuʼn tok qxqʼuqin aju in kubʼ qximen? (Ax ikx qʼonka twitza kyiʼj tilbʼilal).
13 Ax ikx il tiʼj tuʼn tok qxqʼuqin tiʼ in kubʼ qximen (Éx. 20:17). Ateʼ junjun in kyqʼamaʼn qa bʼaʼn tuʼn tkubʼ kyximen junjun nya bʼaʼn ex qa oʼkx tuʼn tok kyxqʼuqin kyibʼ tuʼn miʼn tkubʼ kybʼinchaʼn. Pero nya bʼaʼn jlu, tuʼnju qa mas in qo ximen tiʼj jun nya bʼaʼn, mas jaku kubʼ qbʼinchaʼn ex mas kwest kʼelel toj qwitz tuʼn tkubʼ tiʼj quʼn. Ax tok, atlo maj noq minabʼen jaku che ul nya bʼaʼn ximbʼetz toj qwiʼ. Tuʼntzunju, ¿tiʼ jaku bʼant quʼn qa ma bʼaj jlu qiʼj? Il tiʼj tuʼn kyetz qiʼn toj qwiʼ ex tuʼn tok tilil quʼn tuʼn qximen kyiʼj tiʼchaq bʼaʼn. Qa ma bʼant jlu quʼn, mlay txi qqʼoʼn ambʼil tuʼn kychʼiy nya bʼaʼn ximbʼetz toj qwiʼ, kbʼel tiʼj nya bʼaʼn quʼn ex mlay kubʼ qbʼinchaʼn il (Filip. 4:8; Col. 3:2; Sant. 1:13-15).
Mintiʼ tuʼn tkubʼ qbʼinchaʼn junjun tiʼchaq aju jaku qo kubʼ tzʼaq toj il tuʼn. (Qʼonka twitza tiʼj párrafo 13).
14. ¿Tiʼ mas jaku tzʼonin qiʼj tuʼn kukx tok qxqʼuqin qibʼ ex tuʼn miʼn qkubʼ tzʼaq toj jun nya bʼaʼn?
14 ¿Tiʼ mas jaku tzʼonin qiʼj tuʼn tok qxqʼuqin qibʼ tiʼj il? Aju tuʼn tok qeʼ qkʼuʼj tiʼj qa mas bʼaʼn tuʼn t-xi qnimen qe tkawbʼil Jehová. Atlo maj kwest jaku ten qximbʼetz ik tzeʼn te Jehová, pero qo tzalajel qa ma bʼant jlu quʼn.
15. ¿Tiquʼn nim toklen tuʼn tel qikʼun nya bʼaʼn?
15 Nim toklen tuʼn tel qikʼun nya bʼaʼn ex tuʼn tok qkʼujlaʼn aju bʼaʼn (Amós 5:15). Qa ma bʼant jlu quʼn, kʼokel tilil quʼn tuʼn tkubʼ qbʼinchaʼn aju bʼaʼn ex tuʼn tok qxqʼuqin qibʼ kyiʼj junjun tiʼchaq jaku qo kubʼ tzʼaq toj il kyuʼn. Nya oʼkxju, ax ikx kʼonil qiʼj tuʼn miʼn tkubʼ qiʼj kyuʼn junjun nya bʼaʼn noq minabʼen jaku qo ok weʼ twitz.
16. Qa ma chʼiy qkʼujlabʼil tiʼj Jehová, ¿tzeʼn jaku tzʼonin tuʼn tok qxqʼuqin qibʼ? (Ax ikx qʼonka twitza kyiʼj tilbʼilal).
16 ¿Tiʼ jaku bʼant quʼn tuʼn kyten tbʼanel qximbʼetz? Nim toklen tuʼn qbʼet kyoj chmabʼil ex tuʼn qpakbʼaʼn tuʼntzun tchʼiy qkʼujlabʼil tiʼj Jehová. Qa ma bʼant jlu quʼn kbʼel qyekʼin qa qaj tuʼn ttzalaj Jehová qiʼj. Ex kʼonil qiʼj tuʼn miʼn qkubʼ tzʼaq toj il (Mat. 28:19, 20; Heb. 10:24, 25). Ax ikx qa ma qo uʼjin tiʼj Tyol Dios ex qa ma qo ximen tiʼjju in jaw quʼjin, kʼonil qiʼj tuʼn tok qkʼujlan aju bʼaʼn ex tuʼn tel qikʼun aju nya bʼaʼn (Jos. 1:8; Sal. 1:2, 3; 119:97, 101). Nya oʼkxju, ax ikx bʼaʼn tuʼn tzaj qnaʼn consej tqʼama Jesús: «Che naʼne Dios tuʼn miʼn kyoke tuj joybʼil kyiʼje» (Mat. 26:41). Qa ma tzʼel qpaʼn ambʼil tuʼn qnaʼn Dios te Jehová, tzul tqʼoʼn onbʼil qe ex kukx ok ktzalajel quʼn (Sant. 4:8).
Qa ma tzʼok tilil quʼn tuʼn tchʼiy qkʼujlabʼil tiʼj Jehová, ok kʼonil qiʼj tuʼn miʼn qkubʼ tzʼaq toj il. (Qʼonka twitza tiʼj párrafo 16). c
KUKX TZʼOK TILIL QUʼN TUʼN TOK QXQʼUQIN QIBʼ
17. ¿Alkye nya bʼaʼn ok tilil tuʼn Pedro tuʼn miʼn tkubʼ tzʼaq toj?
17 Chʼixme qkyaqilx o kubʼ tiʼj jun nya bʼaʼn quʼn. Pero at maj at jun nya bʼaʼn kukx in nok tilil quʼn tuʼn tkubʼ tiʼj. Atzun jlu bʼaj tiʼj apóstol Pedro tej ttzaj xobʼ kywitz xjal. Toj oxe maj xi tqʼamaʼn qa mintiʼ ojtzqiʼn Jesús tuʼn (Mat. 26:69-75). Yajxitl, ten tipumal tej tyolin kywitz xjal te Sanedrín. Tuʼn jlu jakulo kubʼ qximen qa ya mintiʼ tzaj xobʼ Pedro (Hech. 5:27-29). Pero tej tikʼ chʼintl ambʼil, tzaj «xobʼ kywitz qe xjal nimanx ju sircunsisyón kyuʼn» ex mintiʼ waʼn toj jun ambʼil kyukʼil okslal nya judiy qe (Gál. 2:11, 12). Ik tzeʼn ma tzʼok qqʼoʼn qwitz tiʼj, tzaj xobʼ juntl maj Pedro. Ex mintiʼ ojtzqiʼn quʼn qa pon jun ambʼil jatumel ya mintiʼ tzaj xobʼ moqa kukx kubʼ tnaʼn jlu.
18. ¿Tiʼ il tiʼj tuʼn tbʼant quʼn tuʼn tkubʼ tiʼj jun nya bʼaʼn quʼn?
18 Axlo jlu jaku bʼaj qiʼj, jakulo kubʼ qximen qa ya otoq kyaj qtzaqpiʼn jun nya bʼaʼn. In tzaj tqʼamaʼn jun ermano jlu: «Kubʼ nximane qa ya otoq kubʼ tiʼj lu wuʼne tuʼnju ya otoq tzikʼ 10 abʼqʼi ya mintiʼ in nok nqʼoʼne nwitze tiʼj pornografía, pero nya ik ttenju, kukx attoq nya bʼaʼn lu ex iktoq tten ik tzeʼn jun txkup in nayon tiʼj jun ambʼil tuʼn tok lipen wiʼje». ¡Tbʼanel tuʼnju ok tilil tuʼn ermano tkubʼ tiʼj nya bʼaʼn tuʼn! El tnikʼ tiʼj qa iltoq tiʼj tuʼn tok tilil tuʼn tkyaqil qʼij ex toj tkyaqil ambʼil tuʼn tkubʼ tiʼj nya bʼaʼn lu tuʼn. Ex o che onin qe ansyan ex t-xuʼjil tiʼj tuʼn tel tpan tibʼ tiʼj pornografía.
19. ¿Tiʼ jaku bʼant quʼn qa at jun nya bʼaʼn kwest tuʼn tkubʼ tiʼj quʼn?
19 Qa at jun nya bʼaʼn kwest tuʼn tkubʼ tiʼj quʼn, ¿tiʼ jaku bʼant quʼn tuʼn miʼn qxi tiʼn toj il? Bʼaʼn tuʼn t-xi qbʼin consej kyaj tqʼamaʼn Jesús: «Che xqʼuqine». Axpe ikx qa in kubʼ t-ximana qa mlay kubʼ tzʼaqa toj il, mas bʼaʼn qa ma tzʼok tilil tuʼna tuʼn miʼn tkubʼ tbʼinchaʼna junjun tiʼchaq jaku kubʼ tzʼaqa toj il tuʼn (1 Cor. 10:12). Kukx bʼinchanxa aju o tzʼonin tiʼja tuʼn miʼn tkubʼ tzʼaqa toj il. In tzaj tqʼamaʼn 1 Tesalonicenses 5:6 jlu: «Miʼn qo tan ik tzaʼn qe txqantl xjal, noq oʼkx tuʼn qxqʼuqin ex tuʼn tten qnabʼl» (2 Ped. 3:14).
¿TIʼ KʼIWLABʼIL IN TZAJ QE QA MA TZOK QXQʼUQIN QIBʼ?
20, 21. a) ¿Alkye junjun kʼiwlabʼil jaku tzaj qe qa kukx sok qxqʼuqin qibʼ? b) Qa ma tzʼok tilil quʼn tkyaqil qʼij tuʼn miʼn qkubʼ tzʼaq toj il, ¿tiʼ kbʼantel tuʼn Jehová? (2 Corintios 4:7).
20 Qa ma tzʼok t-xqʼuqin tibʼ jun xjal tuʼn miʼn tkubʼ tbʼinchaʼn jun nya bʼaʼn, tzul tiʼn nim kʼiwlabʼil te. Ex mas nim tzalajbʼil kbʼel tnaʼn qa ma txi tnimen qe tkawbʼil Jehová twitzju «tuʼn ttzalaj tiʼj ju achbʼil in tqʼoʼn il aju noq te kabʼ qʼij» (Heb. 11:25; Sal. 19:8). Ex oʼkx jaku qo tzalaj qa ma kubʼ qbʼinchaʼn tajbʼil Jehová (Gén. 1:27). Qa ma bʼant jlu quʼn, kbʼel qnaʼn bʼaʼn ex qo anqʼil te jumajx (1 Tim. 6:12; 2 Tim. 1:3; Jud. 20, 21).
21 Ojtzqiʼn quʼn qa aju qxmilal «mintiʼ tipun», pero nya t-xi len jlu qa mlay bʼant jun tiʼ quʼn. ¿Tiquʼn? Tuʼnju jaku tzʼonin Jehová qiʼj (kjawil uʼjit 2 Corintios 4:7). Ax tok, «ate Dios in tzaj qʼonte nimxix qipumal, mya quʼnxqe». Pero ax ikx qe il tiʼj tuʼn tok tilil quʼn tuʼn tten qipumal, toj juntl yol, tuʼn tok tilil quʼn tkyaqil qʼij tuʼn miʼn qkubʼ tzʼaq toj il. Qa ma bʼant jlu quʼn, ktzajel tqʼoʼn Jehová qipumal in xi qqanin te toj naʼj Dios (1 Cor. 10:13). Tuʼn onbʼil in tzaj tqʼoʼn Jehová kʼokel qxqʼuqin qibʼ ex mlay kubʼ qbʼinchaʼn jun nya bʼaʼn.
BʼITZ 47 Qo naʼn Dios junjun qʼij te Jehová
a QE YOL NIM TOKLEN: Aj tyolin Mateo 26:41 tiʼj «taj kyanmiye», atz in yolin tiʼj tuʼn tkubʼ qnaʼn jun tiʼ moqa tuʼn t-xi qbʼinchaʼn junjun tiʼchaq toj junxitl tten. Ex aj tyolin tiʼj «kyximlale mintiʼ tipun», atz in yolin tiʼj qximbʼetz ex tiʼj nya bʼaʼn qbʼinchbʼen in bʼant tuʼnju aj il qoʼ. Tuʼntzunju, at maj in kubʼ qximen ex qaj tuʼn tkubʼ qbʼinchaʼn aju bʼaʼn, pero qa mintiʼ ma tzʼok qxqʼuqin qibʼ jaku qo kubʼ tzʼaq toj il ex jaku kubʼ qbʼinchaʼn jun tiʼ aju in tzaj tqʼamaʼn Biblia qa nya bʼaʼn.
b Qa o bʼant jun il tuʼn jun xjal jaku kanet onbʼil tuʼn toj libro Tzalaja tiʼj tanqʼibʼila, xnaqʼtzbʼil 57, punto 1 a 3 ex toj xnaqʼtzbʼil «Qo ximen tiʼj ambʼil tzul», toj uʼj Aju Xqʼuqil te noviembre te 2020, página 27 a 29, párrafo 12 a 17.
c TQANIL KYIʼJ TILBʼILAL: Te prim in jaw tuʼjin ermano texto te qʼij, in jaw tuʼjin Biblia akux in waʼn te tmij qʼij ex te qale in xiʼ toj chmabʼil txolekxi seman.
