1, 2. ¿Tiʼ in tzaj tqʼamaʼn Biblia kyiʼj junjun rey te Israel?

 IN YOLIN Biblia tiʼj 40 xjal e kawin kyibʼaj aj Israel ex in tzaj tqʼamaʼn alkyeqe tiʼchaq bʼant kyuʼn junjun. a Jun techel, in tzaj tqʼamaʼn Biblia qa e ten junjun tbʼanel rey, pero ax ikx kubʼ kybʼinchaʼn nim nya bʼaʼn, ik tzeʼn rey David. Ok te tbʼanel rey, tuʼntzunju tqʼama Jehová jlu tiʼj: «Ok lpeʼ wiʼje tuʼn tkyaqil tanmi, ex tzʼaqlxix e ela qe tbʼinchbʼen tuj nwitze» (1 Rey. 14:8). Pero kubʼ ten David tukʼil jun xuʼj attoq tchmil, ex bʼant jun tiʼ tuʼn tuʼn tkubʼ bʼyoʼn tchmil toj jun qʼoj (2 Sam. 11:​4, 14, 15).

² Ax ikx e ten junjun nya bʼaʼn rey, pero kubʼ kybʼinchaʼn junjun tiʼchaq bʼaʼn, ik tzeʼn Rehoboam. Ojtzqiʼn quʼn qa mintiʼ ten rey lu tzʼaqli twitz Jehová tuʼnju in tzaj tqʼamaʼn Biblia qa kubʼ tbʼinchaʼn nya bʼaʼn (2 Crón. 12:14). Pero nimen te Jehová tej t-xi tqʼamaʼn te tuʼn miʼn tqʼojin kyiʼj qeju 10 tribu te Israel ex tuʼn t-xi tqʼoʼn ambʼil kye tuʼn tjaw kyskʼoʼn kyex kyrey. Ax ikx, jaw tbʼinchaʼn muro kyiʼj junjun tnam tuʼn miʼn tok bʼinchaʼn nya bʼaʼn kyiʼj kyuʼn aj qʼoj (1 Rey. 12:​21-24; 2 Crón. 11:​5-12).

3. ¿Tiʼ jaku kubʼ qxjelin ex tiʼ kʼelel qnikʼ tiʼj toj xnaqʼtzbʼil lu?

³ Maske kykyaqil rey kubʼ kybʼinchaʼn junjun tiʼchaq bʼaʼn ex nya bʼaʼn, ¿tiquʼn in tzaj tqʼamaʼn Jehová qa e ten junjun tzʼaqli twitz atzun junjuntl mintiʼ? Aj tel qnikʼ tiʼj tzaqʼwebʼil tiʼj xjel lu, kʼonil qiʼj tuʼn tel qnikʼ tiʼj tiʼ tuʼn tbʼant quʼn tuʼntzun ttzalaj Jehová qiʼj. Toj xnaqʼtzbʼil lu kʼelel qnikʼ tiʼj qa ok tqʼoʼn Jehová twitz tiʼj oxe tiʼ bʼant kyuʼn rey te  Israel. Tnejel, qa ok kykʼujlaʼn tuʼn tkyaqil kyanmi; tkabʼin, qa ajtz tiʼj kyanmi tiʼj jun il; ex toxin, qa e ajbʼen oʼkx te Jehová.

OK KYKʼUJLAʼN JEHOVÁ TUʼN TKYAQIL KYANMI

4. ¿Tzeʼn in nel nikʼbʼaj tiʼj jun rey bʼaʼn ex tiʼj jun rey nya bʼaʼn?

⁴ Aqeju rey e ten tzʼaqli twitz Jehová, ok kykʼujlaʼn tuʼn tkyaqil kyanmi. b Ik tzeʼn bʼant tuʼn rey Jehosafat «jyon tiʼj Dios tuʼn tkyaqil tanmi» (2 Crón. 22:9). Ex aj tyolin Biblia tiʼj Josías in tzaj qʼamaʼn jlu tiʼj: «Mi aʼl juntl rey o pon ik tzaʼn te Josías, mi tej naʼnxtoq tok te rey, mi te tibʼajxi, porque ate rey lu ok lpeʼ tiʼj Qman tuʼn tkyaqil tanmi» (2 Rey. 23:25). Atzunte Salomón tej chʼixtoq tkubʼaj tuʼn tkawin, kubʼ tbʼinchaʼn nya bʼaʼn ex «mintiʼ o niman te Qman aju Tdios tuʼn tkyaqil tanmi» (1 Rey. 11:4). Ax jlu in tzaj tqʼamaʼn Biblia tiʼj juntl rey nya bʼaʼn, aju Abiyam tbʼi: «Mintiʼ ajbʼen te Qman aju Tdios tuʼn tkyaqil tanmi» (1 Rey. 15:3).

5. ¿Tiʼ t-xilen aju tuʼn qajbʼen te Jehová tuʼn tkyaqil qanmi?

⁵ ¿Tiʼ t-xilen tuʼn qajbʼen te Jehová tuʼn tkyaqil qanmi? A t-xilen tuʼn qajbʼen te tuʼnju kʼujlaʼn quʼn ex tuʼnju qaj tuʼn qkʼulin oʼkx te, ex nya tuʼnju in qo ok obligarin moqa tuʼnju atzun mas bʼaʼn tuʼn tbʼant quʼn. Ax ikx a t-xilen tuʼn kukx tok qkʼujlaʼn Jehová toj tkyaqil qanqʼibʼil.

6. ¿Tiʼ jaku bʼant quʼn tuʼn tok qkʼujlaʼn Jehová tuʼn tkyaqil qanmi? (Proverbios 4:23; Mateo 5:​29, 30).

⁶ ¿Tiʼ jaku bʼant quʼn tuʼn qok ik tzeʼn qe rey e ten tzʼaqli twitz Jehová ex ok kykʼujlaʼn tuʼn tkyaqil kyanmi? Nim toklen tuʼn tel qikʼun alkyexku tiʼ jaku kubʼ tchewsaʼn qkʼujlabʼil tiʼj Jehová. Ik tzeʼn alkye tten in najbʼen ambʼil quʼn, tiʼ in nok qqʼoʼn qwitz tiʼj, alkyeqe qamiw ex qa mas in nok qkʼujlaʼn qe qʼinumabʼil. Qa ma tzʼel qnikʼ tiʼj qa in bʼaj jlu qiʼj, il tiʼj tuʼn kybʼant naj chʼixpubʼil quʼn (kjawil uʼjit Proverbios 4:23; Mateo 5:​29, 30).

7. ¿Tiquʼn il tiʼj tuʼn tok qxqʼuqin qibʼ tiʼj nya bʼaʼn?

⁷ Miʼn txi qqʼoʼn ambʼil tuʼn tel qanmi te kabʼe. Qa mintiʼ sok qxqʼuqin qibʼ, jaku kubʼ qximen qa tuʼnju at nim tiʼchaq in bʼant quʼn toj qajbʼebʼil te Jehová mlay naj qamiwbʼil tukʼil. Tuʼn tel qnikʼ tiʼj jlu, bʼaʼn tuʼn qximen tiʼj jun techel. Bʼalo mintiʼ xkubʼ tena tjaya tej sex qʼij ex at nim cheʼw ex kyqʼiqʼ. Aj tokxa toj tjaya in nok tqʼoʼna jun t-suetera moqa jun tchumpa. ¿Pero tiʼ jaku bʼaj qa mintiʼ sex tjupuʼna qe pwert? Kukx kbʼel tnaʼna cheʼw tuʼnju kʼokex kyqʼiqʼ toj tjaya. In tzaj tyekʼin jlu qe qa tuʼn qten nqayin ttxlaj Jehová, nya oʼkx tuʼn kybʼant nim tiʼchaq quʼn toj qajbʼebʼil te. Sino nim toklen tuʼn kyetz qjupuʼn qe pwert kywitz qe tiʼchaq nya bʼaʼn. Tuʼntzunju, miʼn t-xi qqʼoʼn ambʼil te kymod xjal tuʼn tkubʼ kychewsaʼn qamiwbʼil tukʼil Jehová ex tuʼn tkubʼ kypaʼn qanmi (Efes. 2:2).

AJTZ TIʼJ KYANMI

8, 9. ¿Alkye tmod rey David ex Ezequías kubʼ kyyekʼin tej kyxi kawin? (Qʼonka twitza tiʼj tilbʼilal revista).

⁸ Ik tzeʼn ma tzʼel qnikʼ tiʼj, kubʼ tbʼinchaʼn rey David junjun il. Pero tej tyolin Natán tukʼil tiʼjju il otoq bʼant tuʼn, kubʼ tin tibʼ ex ajtz tiʼj tanmi (2 Sam. 12:13). Aqeju yol e kubʼ ttzʼibʼin toj Salmo 51 in tzaj tyekʼin qa ax tok otoq tzʼajtz tiʼj tanmi. Nya noq tten tuʼn David twitz  Natán, tuʼn miʼn ttzaj tqʼoj tiʼj nix tuʼn miʼn tkubʼ qʼoʼn tkastiw (Sal. 51:​3, 4, 17, aj ttzaj tzyet capítulo).

⁹ Ax ikx te rey Ezequías kubʼ tbʼinchaʼn il twitz Jehová. In tzaj tqʼamaʼn Biblia qa «oʼkx jaw tniman tibʼ, mintiʼ xi tqʼoʼn chjonte tiʼj ju bʼaʼn otoq tkʼam, ex tuʼntzun jlu tzaj tqʼoj Qman tiʼj, ax ikx kyiʼj aj Judá ex kyiʼj aj Jerusalén» (2 Crón. 32:25). ¿Tiquʼn jaw tnimsan tibʼ? Bʼalo tuʼnju otoq chʼiy tqʼinumabʼil tuʼn Jehová, tuʼnju otoq tzʼonin tiʼj tuʼn tkubʼ kyiʼj aj Asiria tuʼn moqa tuʼnju otoq kubʼ tqʼanin jun yabʼil tiʼj, aju mintiʼ qʼanbʼil te. Tuʼntzunju, xiʼ Isaías qʼamalte te qa nya bʼaʼn otoq bʼant tuʼn (2 Rey. 20:​12-18). Pero kubʼ tin tibʼ Ezequías ex ajtz tiʼj tanmi, ik tzeʼn bʼant tuʼn David (2 Crón. 32:26). Tuʼntzunju, tqʼama Jehová qa jun tbʼanel rey te Ezequías ex in tzaj tqʼamaʼn toj Biblia qa «bʼaʼn e ela qe tbʼinchbʼen [ . . . ] tuj twitz» (2 Rey. 18:3).

10. ¿Tiʼ bʼant tuʼn rey Amasías tej t-xi kawin?

¹⁰ Atzunte rey Amasías te Judá kubʼ tbʼinchaʼn aju bʼaʼn, «pero mintiʼ o tbʼincha tuʼn tkyaqil tanmi» (2 Crón. 25:2). ¿Tiʼ el txalpaj tiʼj? Tej tonin Jehová tiʼj tuʼn tkubʼ kyiʼj aj Edom tuʼn, tzyet tuʼn tkʼulin kywitz kydios xjal te tnam lu. c Ex tej t-xiʼ jun tprofeta Jehová qʼamalte te qa nya bʼaʼn otoq bʼant tuʼn, jaw tin tibʼ ex mintiʼ xi tnimen (2 Crón. 25:​14-16).

11. Ik tzeʼn in tzaj tqʼamaʼn 2 Corintios 7:9 ex 11, ¿tiʼ il tiʼj tuʼn tbʼant quʼn tuʼn tkubʼ tnajsaʼn Jehová qil? (Ax ikx qʼonka twitza kyiʼj tilbʼilal).

¹¹ ¿Tiʼ xnaqʼtzbʼil jaku tzʼel qiʼn kyiʼj techel lu? Qa il tiʼj tuʼn tajtz tiʼj qanmi ex tuʼn tok tilil quʼn tuʼn miʼn tkubʼ qbʼinchaʼn juntl maj il. ¿Yajtzun qa in tzaj kyqʼoʼn ansyan jun consej qe tiʼj jun tiʼ nyaxix nim toklen toj qwitz? Mintiʼ tuʼn tkubʼ qximen qa ya nya kʼujlaʼn qoʼ tuʼn Jehová moqa at jun kyqʼoj ansyan qiʼj. Ax ikx qe tbʼanel rey te Israel iltoq tiʼj tuʼn t-xi qʼoʼn consej kye ex tuʼn t-xi qʼamaʼn kye alkye jun nya bʼaʼn in bʼant kyuʼn (Heb. 12:6). Tuʼntzunju, ¿tiʼ kbʼantel quʼn qa ma tzaj qʼoʼn jun qconsej? Tnejel, il tiʼj tuʼn tkubʼ qin qibʼ. Tkabʼin, il tiʼj tuʼn kybʼant junjun chʼixpubʼil quʼn. Ex toxin, il tiʼj tuʼn kukx qajbʼen te Jehová tuʼn tkyaqil qkʼuʼj. Qa ma tzʼajtz tiʼj qanmi, kbʼel tnajsaʼn Jehová qil (kjawil uʼjit 2 Corintios 7:​9, 11).

E AJBʼEN OʼKX TE JEHOVÁ

12. ¿Tiʼ bʼant kyuʼn rey bʼaʼn ex tiʼ bʼant kyuʼn rey nya bʼaʼn?

¹² Aqeju rey i el bʼaʼn toj twitz Jehová, oʼkx e kʼulin te ex e onin kyiʼj txqantl tuʼn tbʼant axju kyuʼn. Ik tzeʼn ma tzʼel qnikʼ tiʼj, at maj i el txalpaj. Pero e ajbʼen oʼkx te Jehová ex ok tilil kyuʼn tuʼn tkubʼ kynajsaʼn qe tilbʼilal in che kʼulin xjal twitz. d

13. ¿Tiquʼn ok rey Acab te jun nya bʼaʼn rey toj twitz Jehová?

¹³ ¿Tiquʼn nya bʼaʼn i ela junjun rey toj twitz Jehová? Ax tok, at maj kubʼ kybʼinchaʼn rey lu junjun tiʼchaq bʼaʼn, ik tzeʼn nya bʼaʼn rey Acab. Tej t-xi tbʼiʼn qa kubʼ bʼyoʼn Nabot tuʼn tpaj, kubʼ tiʼn chʼin tibʼ (1 Rey. 21:​27-29). Ax ikx e jaw tbʼinchaʼn junjun tnam kye aj Israel ex onin kyiʼj tuʼn kykambʼan kyiʼj aj qʼoj (1 Rey. 20:​21, 29; 22:39). Pero at jun il kukx kubʼ tbʼinchaʼn  ex mintiʼ ajtz tiʼj tanmi tiʼj. Ok tilil tuʼn t-xuʼjil tuʼn tkʼulin kywitz txqantl dios ex ax jlu bʼant tuʼn Acab (1 Rey. 21:​25, 26).

14. a) ¿Tiquʼn tqʼama Jehová qa ok Rehoboam te jun nya bʼaʼn rey? b) ¿Tiʼ bʼant kyuʼn chʼixmi kykyaqil nya bʼaʼn rey?

¹⁴ Qo yolin tiʼj juntl rey nya bʼaʼn, aju Rehoboam. Ik tzeʼn ma tzʼel qnikʼ tiʼj, at maj kubʼ tbʼinchaʼn aju bʼaʼn. Pero tej tkyuwix tkawbʼil, kyaj ttzaqpiʼn qe tley Jehová ex ok ten kʼulil kywitz nya ax tok dios (2 Crón. 12:1). Tej tbʼaj jlu, at maj kʼulin twitz Jehová ex at maj kywitz dios nya ax tok (1 Rey. 14:​21-24). Nya oʼkx rey Rehoboam ex rey Acab el kypan kyibʼ tiʼj Jehová, sino chʼixmi kykyaqil nya bʼaʼn rey e onin tiʼj nya ax tok okslabʼil. Tuʼntzunju, oʼkx qa ajbʼen jun rey te Jehová, ok tqʼoʼn Jehová te bʼaʼn.

15. ¿Tiquʼn nim toklen toj twitz Jehová tuʼn kykʼulin tmajen oʼkx te?

¹⁵ ¿Tiquʼn xi tqʼamaʼn Jehová kye rey qa nim toklen toj twitz tuʼn kykʼulin tmajen oʼkx te? Tnejel, tuʼnju atz kye rey xi qʼoʼn oklenj tuʼn kyonin kyiʼj xjal tuʼn kykʼulin toj tumel te Dios. Ex aj kyok ten rey kʼulil kywitz txqantl dios, in kubʼ kybʼinchaʼn nim nya bʼaʼn ex junjuntl matij il (Os. 4:​1, 2). Nya oʼkxju, ax ikx otoq txi kytziyen qe aj Israel ex qe rey tuʼn kyajbʼen oʼkx te Jehová. Tuʼntzunju, in tzaj tqʼamaʼn Biblia qa tej kykʼulin kywitz tilbʼilal, ok ik tzeʼn kubʼ kybʼinchaʼn aj pajil (Jer. 3:​8, 9). In tzaj nimxix tbʼis jun chmilbʼaj moqa jun xuʼjilbʼaj aj tkubʼ tbʼinchaʼn tukʼil aj pajil. Ax jlu in bʼant tuʼn xjal otoq txi tqʼamaʼn te Jehová tuʼn tajbʼen oʼkx te, pero qa ma tzʼok ten kʼulin kywitz txqantl  dios, in tzaj nimxix tbʼis Jehová (Deut. 4:​23, 24). e

16. ¿Tiʼ in bʼant tuʼn jun xjal bʼaʼn toj twitz Jehová?

¹⁶ ¿Tiʼ xnaqʼtzbʼil jaku tzʼel qiʼn tiʼj jlu? Qa mintiʼ tuʼn qkʼulin kywitz txqantl dios. Nya oʼkxju, sino ax ikx nim toklen tuʼn qajbʼen te Jehová ik tzeʼn taj ex tuʼn kukx qaqʼunan toj ttnam. Tzaj tqʼamaʼn profeta Malaquías alkye jun xjal bʼaʼn ex alkye jun xjal nya bʼaʼn toj twitz Jehová. Tqʼama jlu: «Atzun kʼelel kynikʼe tiʼj qa mya junx taʼ ju xjal bʼaʼn tukʼil ju xjal mya bʼaʼn, ex mya junx taʼ ju xjal in kʼulun te Dios tukʼil ju xjal mintiʼ in kʼulun te» (Mal. 3:18). Tuʼntzunju, kukx qo ajbʼen te ex miʼn t-xi qqʼoʼn ambʼil te nijun tiʼ tuʼn qel tpaʼn tiʼj, ik tzeʼn qpaltil ex kypaltil txqantl. Jun il aju qa ya mintiʼ xqo ajbʼen te Jehová.

17. ¿Tiquʼn il tiʼj tuʼn qximen tiʼj alqukʼil qo kbʼel mojeʼ?

¹⁷ Qa in ximana tuʼn tkubʼ mojeʼya, aqeju yol tqʼama Malaquías jaku che onin tiʼja tuʼn tel tnikʼa tiʼj alkye jun xjal mas bʼaʼn teya. Ximana tiʼj jlu: maske ateʼ tbʼanel tmod jun xjal, pero qa mintiʼ in najbʼen te Jehová, ¿bʼaʼnpe xjal lu toj twitz Jehová? (2 Cor. 6:14). Qa ma kubʼ mojeʼya tukʼil, ¿kʼonilpe tiʼja tuʼn kukx tajbʼena te Jehová? Bʼaʼn tuʼn ttzaj tnaʼna qa aqeju t-xuʼjil Salomón e kanet te junjuntl tnam, e tenlo tbʼanel kymod pero mintiʼ e ajbʼen te Jehová. Ex chʼinaq el kypaʼn tanmi Salomón tiʼj Jehová tuʼn tajbʼen kywitz txqantl dios (1 Rey. 11:​1, 4).

18. ¿Tiʼ il tiʼj tuʼn t-xi kyxnaqʼtzaʼn mambʼaj kye kykʼwal?

¹⁸ Aqeye mambʼaj, jaku tzʼajbʼen techel kyiʼj rey te Israel kyuʼne tuʼn kyonine  kyiʼj kykʼwale tuʼn kyajbʼen te Jehová tuʼn tkyaqil kyanmi. Nim toklen tuʼn tel kynikʼ tiʼj qa bʼaʼn ela jun rey toj twitz Jehová tuʼnju kʼulin oʼkx te ex onin kyiʼj txqantl tuʼn tbʼant ax jlu kyuʼn. Nim toklen tuʼn t-xi kyyekʼine kye kʼwal tukʼil kyyole ex tukʼil kybʼinchbʼene qa aju mas nim toklen aju qajbʼebʼil te Dios; ik tzeʼn tuʼn tjaw quʼjin Biblia, tuʼn qxiʼ kyoj chmabʼil ex tuʼn qex pakbʼal (Mat. 6:33). Qa mintiʼ xbʼant jlu kyuʼne, jaku kubʼ kyximen kykʼwale qa oʼkx che okel te testigo de Jehová tuʼnju atzun kyeye kyokslabʼil. Ex aj tbʼet ambʼil, jaku kubʼ kyximen qa nyaxix nim toklen tuʼn kyajbʼen te Jehová moqa jaku kyaj kytzaqpiʼn tuʼn kyajbʼen te.

19. ¿Tiʼ il tiʼj tuʼn tbʼant tuʼn jun xjal qa taj tuʼn tok juntl maj te tamiw Jehová? (Ax ikx qʼonka twitza tiʼj recuadro « Jaku meltzʼaja tukʼil Jehová»).

¹⁹ Qa at jun xjal ya mintiʼ in najbʼen te Jehová, jaku tzʼok juntl maj te tamiw qa ma tzʼajtz tiʼj tanmi. Pero tuʼn tbʼant jlu tuʼn, il tiʼj tuʼn tkubʼ tin tibʼ ex tuʼn t-xi tkʼamoʼn onbʼil kxel kyqʼoʼn ansyan te (Sant. 5:14). Pero tbʼanel qa ma che bʼant chʼixpubʼil lu tuʼn noq tuʼn tok te tamiw Jehová juntl maj.

20. ¿Tiʼ t-ximbʼetz Jehová ktel qiʼj qa ma tzʼel qkanoʼn kyiʼj tbʼanel rey?

²⁰ ¿Tiʼ xnaqʼtzbʼil ma tzʼel qiʼn kyiʼj rey te Israel? Jaku tzʼel qkanoʼn kyiʼj tbʼanel rey qa ma tzʼok qkʼujlaʼn Jehová tuʼn tkyaqil qanmi. Qa ma qo el txalpaj, qqʼonk tilil tuʼn miʼn tkubʼ qbʼinchaʼn juntl maj il, tuʼn tajtz tiʼj qanmi ex tuʼn kybʼant chʼixpubʼil quʼn. Ax ikx, bʼaʼn tuʼn ttzaj qnaʼn qa nimxix toklen tuʼn qkʼulin oʼkx te Jehová. Qa kukx ma tzʼajbʼena te Jehová, tzul tqʼamaʼn qa tbʼanel xjal teya.