1, 2. ¿Alkyetzun Sadoc? (1 Crónicas 12:​22, 26-28).

 QO XIMEN tiʼj jlu: Ma tzʼok kychmon kyibʼ mas te 340 mil xjal ex kyaj tuʼn tok kyqʼoʼn David te rey kyibʼaj kykyaqil aj Israel. Toj oxe qʼij in che qʼajt xjal in che yolin, in che bʼitzin ex in che tzeʼn tuʼn tzalajbʼil kyibʼaj witz ateʼ nqayin tiʼj tnam Hebrón (1 Crón. 12:39). Kyxol xjal lu ten jun kuʼxun Sadoc tbʼi ex nimlo xjal mintiʼ ok kyqʼoʼn kywitz tiʼj. Atzunte Jehová ok tqʼoʼn twitz tiʼj, ex kyaj tzʼibʼin tbʼi toj Tyol tuʼn tok qojtzqiʼn qa ten kyxol xjal lu (kjawil uʼjit 1 Crónicas 12:​22, 26-28). ¿Alkyetzun kuʼxun Sadoc?

² Jun pal te Sadoc ex aqʼunan junx tukʼil Abiatar, aju nejenel kye pal. Ax ikx jakutoq tzʼok tkeʼyin Sadoc tiʼtoq tuʼn tbʼaj, toj juntl yol, xi tqʼoʼn Jehová nimxix tnabʼil tuʼn tel tnikʼ tiʼj alkye tajbʼil Jehová (2 Sam. 15:27). Ten nim tnabʼil Sadoc ex tipumal, ex in che pontoq xjal qanil kyconsej te. Pero toj xnaqʼtzbʼil lu qo yolil tiʼj tipumal.

3. a) ¿Tiquʼn il tiʼj tuʼn tten qipumal? b) ¿Tiʼ kʼelel qnikʼ tiʼj toj xnaqʼtzbʼil lu?

³ Kyoj qeju mankbʼil tqʼijlalil, mas in nok tilil tuʼn Satanás tuʼn tok tbʼinchaʼn nya bʼaʼn tiʼj ttnam Jehová (1 Ped. 5:8). Akux in qo ayon tuʼn tkubʼ tnajsaʼn Jehová Satanás ex tkyaqilju tokx tjaqʼ tkawbʼil, nim toklen tuʼn tten qipumal (Sal. 31:24). Qo xnaqʼtzan tiʼj oxe tumel tzeʼn jaku tzʼel qkanoʼn tiʼj Sadoc tej tten tipumal.

BʼAʼN TUʼN QONIN TIʼJ TKAWBʼIL DIOS

4. ¿Tiquʼn il tiʼj tuʼn tten qipumal tuʼn qonin tiʼj Tkawbʼil Dios? (Ax ikx qʼonka twitza tiʼj tilbʼilal).

⁴ In che onin tmajen Jehová tiʼj Tkawbʼil tuʼn tkyaqil kyanmi ex il tiʼj tuʼn tten kyipumal tuʼn tbʼant jlu kyuʼn (Mat. 6:33). Jun techel, toj ambʼil jaʼlo nim toklen tuʼn miʼn qtzaj xobʼ tuʼn t-xi qnimen qe tkawbʼil Jehová ex tuʼn qpakbʼan  tiʼj tbʼanel tqanil (1 Tes. 2:2). Ex mas at pabʼil toj kykawbʼil xjal ex kwest jaku tzʼela toj qwitz tuʼn miʼn qonin kyiʼj (Juan 18:36). Ax ikx, ateʼ nim testigo de Jehová in che ok weʼ twitz nimku nya bʼaʼn. At maj in che kyaj mintiʼ kypwaq, in che ok bʼyoʼn, axpe ikx in che okx qʼoʼn toj cárcel tuʼnju mintiʼ in nokx kyqʼoʼn kyibʼ toj política moqa tuʼnju mintiʼ in cheʼx toj qʼoj.

5. ¿Tiquʼn iltoq tiʼj tuʼn tten tipumal Sadoc tuʼn tonin tiʼj David?

⁵ Nya oʼkx pon Sadoc toj fiesta atz Hebrón tuʼnju ok qʼoʼn David te rey, sino qʼiʼntoq qe tiʼchaq tuʼn tuʼn tqʼojin (1 Crón. 12:38). Bʼantnitoq tten tuʼn t-xiʼ tukʼil David toj qʼoj ex tuʼn tkolin kyiʼj aj Israel kyiʼj aj qʼoj. Maske mintiʼxixlo tojtzqibʼil tiʼj qʼoj, pero ten tipumal.

6. ¿Alkye tten onin David tiʼj Sadoc tuʼn tten tipumal? (Salmo 138:3).

⁶ ¿Tiʼ onin tiʼj Sadoc tuʼn tten tipumal? Onin aju techel kubʼ kyqʼoʼn junjuntl xjal ten kyipumal ex mintiʼ e tzaj xobʼ, ik tzeʼn David. Kykyaqil aj Israel kyajtoq tuʼn tok David te rey tuʼnju mintiʼ tzaj xobʼ tuʼn tkubʼ nej kywitz «aj Israel tuj qʼoj» (1 Crón. 11:​1, 2). Ok qe tkʼuʼj David tiʼj Jehová ex xi tqanin onbʼil te tej kyok lepeʼ aj qʼoj tiʼj (Sal. 28:7; kjawil uʼjit Salmo 138:3). Ax ikx el tkanoʼn Sadoc techel kyiʼj junjun xjal e anqʼin toj ambʼil aju. Ik tzeʼn Jehoiadá ex Benaya, aju tkʼwal, at tnabʼl tuʼn tqʼojin. Nya oʼkxju, ax ikx ok lepeʼ Sadoc tiʼj techel kubʼ kyqʼoʼn 22 nejenel kye tribu e onin tiʼj David (1 Crón. 11:​22-25; 12:​26-28). Kykyaqil qe xjal lu kyajtoq tuʼn tok David te kyrey ex tuʼn kyxqʼuqin tiʼj.

7. a) ¿Alkyeqe in ten kyipumal toj ambʼil jaʼlo? b) ¿Tiʼ jaku tzʼel qkanoʼn tiʼj ermano Nsilu, aju in netz yekʼin toj video?

⁷ Qa ma qo xnaqʼtzan tiʼj techel kyaj  kyqʼoʼn tmajen Jehová o che onin tiʼj Tkawbʼil, in nonin tuʼn tten qipumal ex tuʼn miʼn qtzaj xobʼ. Mintiʼ okx tqʼoʼn tibʼ Jesucristo, aju Qrey, toj kykawbʼil xjal tuʼnju a Satanás in kawin kyibʼaj (Mat. 4:​8-11; Juan 6:​14, 15). Toj tkyaqil ambʼil ok qe tkʼuʼj Jesús tiʼj Jehová tuʼn kukx tten tipumal. Ax ikx toj ambʼil jaʼlo, jaku tzʼel qkanoʼn techel in kubʼ kyqʼoʼn junjun kuʼxun mintiʼ in nokx kyqʼoʼn kyibʼ kyxol soldad nix toj política. Tuʼn tel mas tnikʼa tiʼj tiʼ o bʼant kyuʼn junjun tmajen Jehová, bʼaʼn tuʼn tokxa toj jw.org. a

QO ONIN KYIʼJ ERMAN

8. ¿Alkye ambʼil il tiʼj tuʼn tten kyipumal ansyan tuʼn kyonin kyiʼj erman?

⁸ Kygan qe tmajen Jehová tuʼn tbʼaj kyonin kyibʼ kyxolx (2 Cor. 8:4). Pero at maj tuʼn tbʼant jlu kyuʼn il tiʼj tuʼn tten kyipumal. Jun techel, qa ma tzʼok jun qʼoj, in nel kynikʼ ansyan tiʼj qa il tiʼj tuʼn kyxiʼ onil kye erman, tuʼn t-xi kyqʼuqbʼaʼn kykʼuʼj tukʼil Tyol Dios moqa tuʼn t-xi kyiʼn kywa. In nok tilil kyuʼn tuʼn t-xi kyqʼon aju at tajbʼen kye erman tuʼnju at kykʼujlabʼil kyiʼj, maske ojtzqiʼn kyuʼn qa jaku tzaj jun nya bʼaʼn kyiʼj (Juan 15:​12, 13). Iktzun tten in kubʼ kyyekʼin kyipumal ik tzeʼn te Sadoc.

9. Ik tzeʼn in tzaj qʼamaʼn toj 2 Samuel 15:27 a 29, ¿tiʼ xi tqʼamaʼn David te Sadoc tuʼn tbʼant tuʼn? (Ax ikx qʼonka twitza tiʼj tilbʼilal).

⁹ Jakutoq kubʼ bʼyoʼn David tuʼnju tajtoq Absalón, aju tkʼwal, tuʼn tel tiʼn toklen te rey (2 Sam. 15:​12, 13). Tuʼn jlu, iltoq tiʼj tuʼn tex oq David toj Jerusalén. Ex xi tqʼamaʼn jlu kye tmajen: «Qo el oq bʼiʼx jaʼlo, ex qa miʼn xqo el oq, mlay qo tzoqpaj twitz Absalón» (2 Sam. 15:14). Tej otoq che ex David toj tnam, el tnikʼ  tiʼj qa iltoq tiʼj tuʼn tkyaj jun xjal toj Jerusalén ex tuʼn t-xi tqʼamaʼn te tiʼjju in bʼant tuʼn Absalón. Tuʼntzunju, xi tqʼamaʼn te Sadoc ex kye junjuntl pal tuʼn kymeltzʼaj toj tnam tuʼn t-xi kyqʼoʼn tqanil te (kjawil uʼjit 2 Samuel 15:​27-29). Iltoq tiʼj tuʼn tok kyxqʼuqin kyibʼ tuʼnju kwest aqʼuntl xi qʼoʼn kye tuʼn David. Jakutoq che kubʼ bʼyoʼn tuʼn jlu. Oʼkxtoq in ximen Absalón tiʼjx, in noktoq tbʼinchaʼn nya bʼaʼn kyiʼj txqantl ex in sbʼuntoq kyiʼj. ¡Noqpe ximana tiʼj tiʼwtlo bʼant tuʼn Absalón noqwit ok tbʼiʼn qa in che onin Sadoc ex junjuntl pal tiʼj David!

10. ¿Tzeʼn xqʼuqin Sadoc ex qe tukʼil tiʼj David?

¹⁰ Xi tqʼamaʼn David te Sadoc ex te Husái, aju juntl tamiw, tuʼn kyonin tiʼj (2 Sam. 15:​32-37). Tuʼnju xi tbʼiʼn Husái aju xi tqʼamaʼn David te, ok qe tkʼuʼj Absalón tiʼj ex xi tqʼoʼn Husái tconsej tzeʼn tuʼn kyxiʼ qʼojil tiʼj David. Tuʼn jlu, ten ambʼil te David tuʼn tbʼaj tbʼinchaʼn tten ajxi kypon xjal qʼojil tiʼj. Yajxitl, xi tqʼamaʼn Husái tqanil tiʼjju otoq txi tqʼamaʼn te Sadoc ex te Abiatar (2 Sam. 17:​8-16). Tuʼntzunju, xi kyqʼoʼn Sadoc ex Abiatar tqanil te David (2 Sam. 17:17). Onin Jehová tiʼj Sadoc ex kyiʼj junjuntl pal tuʼn miʼn tkubʼ bʼyoʼn David (2 Sam. 17:​21, 22).

11. ¿Tzeʼn jaku ten qipumal ik tzeʼn te Sadoc qa ma tzaj qʼamaʼn qe tuʼn qonin kyiʼj erman?

¹¹ Qa ma tzaj qʼamaʼn qe tuʼn qonin kyiʼj erman toj jun ambʼil kwest, ¿tzeʼn jaku ten qipumal ik tzeʼn te Sadoc? Tnejel, bʼaʼn tuʼn t-xi qbʼin aju tzul qʼamaʼn qe. Nim toklen tuʼn qnimen tuʼn tten mujbʼabʼil qxol. Tuʼntzunju, aj ttzaj tqʼoʼn sucursal jun tqanil qe, bʼaʼn tuʼn t-xi qbʼiʼn (Heb. 13:17). Ex nim toklen tuʼn kukx kyxnaqʼtzaʼn ansyan tiʼj tqanil in yolin tiʼj tiʼ jaku bʼant aj ttzaj jun xitbʼil ex tiʼ jaku bʼant otoqxi tzikʼ jun xitbʼil (1 Cor. 14:​33, 40). Tkabʼin, bʼaʼn tuʼn tten qipumal ex tuʼn tten qnabʼil (Prov. 22:3). Tenx qnabʼil aj tbʼant  jun tiʼ quʼn ex miʼn txi qbʼinchaʼn jun tiʼ jaku tzaj tiʼn jun nya bʼaʼn qiʼj. Toxin, qeʼk qkʼuʼj tiʼj Jehová. In ximen Jehová qiʼj qkyaqilx ex taj tuʼn qten bʼaʼn. Jaku tzʼonin tuʼn miʼn ttzaj jun nya bʼaʼn qiʼj aj qonin kyiʼj erman.

12, 13. ¿Tiʼ in tzaj tyekʼin qe aju ikʼ tiʼj Víktor ex Vitali? (Ax ikx qʼonka twitza tiʼj tilbʼilal).

¹² Qo xnaqʼtzaʼn tiʼjju bʼant kyuʼn kabʼe ansyan te Ucrania aju Víktor ex Vitali kybʼi. Xi kyiʼn kywa ex kykʼaʼ erman. Tqʼama Víktor jlu: «O qo jyone tiʼj wabʼj jaxku tumel». Ex tqʼamatl jlu: «Toj nim maj xi qbʼiʼne qe disparos nqayin jatumel atoʼye. Kʼuʼn wabʼj tuʼn jun ermano ex tzaj tqʼoʼn tuʼn t-xi qʼet kye erman. Iktzun tten, ten kywa erman toj jun ambʼil. Tej in jax qqʼoʼne wabʼj toj kar, toj junlo 20 metro jatumel atoʼye kubʼ tzʼaq jun misil, pero mintiʼ el explotarin. In nnaʼne Dios toj enter qʼij tuʼn ttzaj tqʼoʼn Jehová wipumale tuʼn kukx wonine kyiʼj erman».

¹³ Tqʼama Vitali jlu: «Iltoq tiʼj tuʼn tten qipumale». Ex tqʼamatl jlu: «Tej nxiʼye tnejel maj, xi tiʼn 12 hora nbʼeye. In nnaʼne Dios toj enter qʼij». Nya oʼkx ten tipumal Vitali, sino ax ikx ten tnabʼil. Tqʼama jlu: «Kukx xi nqanine nnabʼile te Jehová ex tuʼn tkubʼ win wibʼe. Oʼkx in bʼete kyoj lugar jatumel in tzaj qʼoʼn ambʼil kyuʼn gobierno. Pero chʼiy qʼuqbʼil nkʼuʼje tej tok nqʼoʼne nwitze kyiʼj erman in che aqʼunan junx. El kyiʼn qe tiʼchaq toj bʼe, jaw kychmoʼn wabʼj ex jax kyqʼoʼn toj kar. Tzaj kyqʼoʼn qwaye ex jun lugar jatumel tuʼn qkyaj tene tukʼil Víktor».

KUKX TENA TZʼAQLI TWITZ JEHOVÁ

14. ¿Tiʼ in kubʼ qnaʼn aj tel tpan tibʼ jun xjal kʼujlaʼn quʼn tiʼj Jehová?

¹⁴ Kwest aj tel laqʼeʼ jun qfamiliar moqa jun qamiw tiʼj Jehová (Sal. 78:40; Prov. 24:10). Maslo kwest tuʼn tikʼx bʼis quʼn qa kʼujlaʼn xjal lu quʼn. Qa a jlu in bʼaj tiʼja, jaku tzʼonin tiʼja aju techel kubʼ tqʼoʼn Sadoc.

15. ¿Tiquʼn iltoq tiʼj tuʼn tten tipumal Sadoc tuʼn kukx tten tzʼaqli twitz Jehová? (1 Reyes 1:​5-8).

¹⁵ Toj ambʼil tej otoq tijen David, chʼixtoq tkubʼaj tuʼn tkawin ex chʼixtoq tkyim, tajtoq Adonías, aju tkʼwal, tuʼn tel tiʼn kawbʼil te, pero a Salomón tajtoq Jehová tuʼn tok te rey (1 Crón. 22:​9, 10). Ten Sadoc tzʼaqli twitz Jehová, atzunte Abiatar kubʼ t-ximen tuʼn tonin tiʼj Adonías (kjawil uʼjit 1 Reyes 1:​5-8). Tej tbʼant jlu tuʼn Abiatar, ya mintiʼ ten tzʼaqli twitz David ex twitz Jehová. Nimxixlo tbʼis Sadoc tzaj tuʼnju otoq che aqʼunan 40 abʼqʼi junx tukʼil te pal (2 Sam. 8:17). Junx otoq t-xi «kyiʼn ju kax kʼubʼl tley Dios» (2 Sam. 15:29). Otoq tzikʼ nim tiʼchaq kyiʼj toj kyajbʼebʼil te Jehová ex otoq che onin tiʼj David (2 Sam. 19:​11-14).

16. ¿Tiʼ onin tiʼj Sadoc tuʼn kukx tten tzʼaqli twitz Jehová?

¹⁶ Mintiʼ ten Abiatar tzʼaqli twitz Jehová tej ya mintiʼ onin tiʼj David, atzunte Sadoc, kukx ten tzʼaqli twitz Jehová. Tej tok tbʼiʼn David aju tajtoq Adonías tuʼn tbʼant tuʼn, xi tqʼamaʼn te Sadoc, te Natán ex te Benaya tuʼn tok kyqʼoʼn toklen Salomón te rey (1 Rey. 1:​32-34). ¿Tiʼ onin tiʼj Sadoc? Alo techel kubʼ kyqʼoʼn junjuntl tmajen Jehová, ik tzeʼn Natán, aju kukx ten tzʼaqli twitz Dios ex onin tiʼj rey David (1 Rey. 1:​38, 39). Tej tok Salomón te rey, «aju pal Sadoc ok qʼoʼn tuʼn te t-xel Abiatar» (1 Rey. 2:35).

17. Qa at jun xjal kʼujlaʼn tuʼna ma tzʼel tpan tibʼ tiʼj Jehová, ¿tzeʼn jaku tzʼel tkanoʼna tiʼj Sadoc?

¹⁷ ¿Tiʼ xnaqʼtzbʼil jaku tzʼel qiʼn tiʼj Sadoc?  Qa at jun xjal kʼujlaʼn tuʼna ma tzʼel tpan tibʼ tiʼj Jehová, yekʼinxa qa ktela tzʼaqli twitz Jehová (Jos. 24:15). Tzul tqʼoʼn Jehová tipumala tuʼn tkubʼ tbʼinchaʼna aju bʼaʼn. Kukx naʼna Dios ex miʼn tzʼel tpan tibʼa kyiʼj erman. Tzul kʼiwlaʼna tuʼn Jehová qa kukx ma tena tzʼaqli twitz (2 Sam. 22:26).

18. ¿Tiʼ xnaqʼtzbʼil jaku tzʼel qiʼn tiʼjju bʼant kyuʼn Marco ex Sidse?

¹⁸ Qo yolin tiʼj Marco ex Sidse. El kypan kyibʼ kabʼe kymeʼjel tiʼj Jehová tej kychʼiy. Tqʼama Marco jlu: «In che ok qkʼujlaʼn kʼwal aj kyul itzʼj. In nok tilil quʼn tuʼn kyok qxqʼuqin. Tuʼntzunju, aj tel kypan kyibʼ tiʼj Jehová, in kubʼ qnaʼn nimxix bʼis». Ex tqʼamatl jlu: «Pero kukx o tzʼonin Jehová qiʼje. Aj tkubʼ nnaʼne bʼis, in nonin nxuʼjile wiʼje, ax ikx weye in chin onine tiʼj aj ttzaj tbʼis». In tzaj tqʼamaʼn Sidse jlu: «O tzikʼx bʼis quʼne oʼkx tuʼn qipumale in tzaj tqʼoʼn Jehová. Kubʼ nximane qa tuʼn npaje el kypan kyibʼ wale tiʼj Jehová. Xi nqʼamaʼne te Jehová aju kubʼ nnaʼne. Yajxitl, pon jun ermana wukʼile aju otoq tzikʼ ambʼil naʼmxtoq qyoline tukʼil. Kubʼ tqʼoʼn tqʼabʼ tibʼaj nqule ex tzaj tqʼamaʼn: ‹Naʼntza Sidse, nya teya tpaj›. Iktzun tten, kukx o chin ajbʼene te Jehová tukʼil tzalajbʼil tuʼn onbʼil in tzaj tqʼoʼn weye».

19. ¿Tiʼ ma kubʼ t-ximana tuʼn tbʼant tuʼna?

¹⁹ Taj Jehová tuʼn tten kyipumal tmajen ik tzeʼn te Sadoc (2 Tim. 1:7). Tuʼntzunju, taj tuʼn tok qeʼ qkʼuʼj tiʼj ex nya tiʼj qex qipumal. Qa ma tzʼok weʼya twitz jun ambʼil jatumel il tiʼj tuʼn tten tipumala, qaninxa tipumala te Jehová. Kʼonil tiʼja tuʼn tten tipumala ik tzeʼn te Sadoc (1 Ped. 5:10).