Atzunte Nicolas ex Céline, aju t-xuʼjil, junxitl chʼin bʼaj kyiʼj tuʼnju a sucursal te Francia xi qʼamante kye tuʼn kyxiʼ ajbʼel toj juntl congregación. Kyqʼama jlu: «O qo tzalaje tnejel, pero yajxitl, kwest ela qe tiʼchaq toj qwitze tuʼnju o qo bʼisune kyiʼj qamiwe. Ex naʼmxtoq tok qamiwenxix qibʼe kyukʼil erman toj akʼaj congregación». a Tuʼntzunju, qa a jlu in bʼaj tiʼja, ¿tiʼ jaku tzʼonin tiʼja tuʼn tkubʼ kyiʼj nya bʼaʼn lu tuʼna ex tuʼn tnaqʼeta tiʼj congregación jatumel ma pona? ¿Tzeʼn jaku che onin qe txqantl erman? ¿Tiʼ jaku bʼant tuʼna tuʼn tonina kyiʼj erman jatumel ma pona ex tuʼn ttzaj qʼoʼn onbʼil teya kyuʼn?

JAKU CHE ONIN KYAJE NABʼIL TIʼJA

1. Qeʼk tkʼuʼja tiʼj Jehová (Sal. 37:5). Qʼiʼntoq 20 abʼqʼi tuʼn Kazumi toj jun congregación tej t-xi qʼamaʼn te tchmil tuʼn t-xiʼ aqʼunal toj juntl lugar. ¿Tiʼ bʼant tuʼn Kazumi tuʼn t-xi toqxenan tibʼ «tuj tqʼabʼ Qman» Jehová? In tzaj tqʼamaʼn jlu: «Xi nqʼamaʼne te Jehová aju tkuʼx toj wanmiye. Xi nqʼamaʼne te qa in kubʼ nnaʼne qa njunalxe atine, qa in chin tzaj xobʼe ex qa in tzaj bʼaj nkʼuʼje. Ex kukx tzaj tqʼoʼn wipumale».

¿Tiʼ kʼonil tiʼja tuʼn tok qeʼ mas tkʼuʼja tiʼj Jehová? Ik tten qʼuqbʼil qkʼuʼj ik tzeʼn jun awal. Il tiʼj tuʼn tkuʼx aʼ ex junjuntl tiʼchaq tiʼj tuʼntzun tchʼiy ex tuʼn miʼn ttzqij. Chʼiy qʼuqbʼil tkʼuʼj Nicolas tej t-ximen kyiʼj junjun tmajen Dios ik tzeʼn Abrahán, Jesús ex Pablo tuʼnju ok tilil kyuʼn tuʼn tbʼant tajbʼil Dios kyuʼn. Ax ikx te ermano el tnikʼ tiʼj qa kukx kʼonil Jehová tiʼj. Tuʼntzunju, qa kukx ma xnaqʼtzana tiʼj Biblia, kʼonil tiʼja tuʼn texa twitz alkyexku chʼixpubʼil  in nok weʼya twitz. Ax ikx, kʼonil tiʼja tuʼn tonina kyiʼj erman toj akʼaj congregación.

2. Miʼn tzʼok tmojbʼaʼna ojtxe congregación tukʼilju akʼaj (Ecl. 7:10). Ok tqʼoʼn Jules twitz tiʼj qa junxitl kykostumbr xjal te Benín twitzju te Estados Unidos. Tqʼama jlu: «Kubʼ nnaʼne qa iltoq tiʼj tuʼn t-xi nqʼamaʼne tkyaqilju o tzikʼ toj wanqʼibʼile kye kykyaqil qeju in che ok wojtzqiʼne». Kubʼ tnaʼn ermano nya bʼaʼn tuʼn jlu, tuʼntzunju, el tpaʼn chʼin tibʼ kyiʼj erman, pero chʼexpaj t-ximbʼetz tej kyok tojtzqiʼn chʼintl qe erman. Tqʼama jlu: «O tzʼel nnikʼe tiʼj qa oʼkx in chʼexpaj tzeʼn qo yolin ex tzeʼn qmod twitz tkyaqil Txʼotxʼ. Ex nya il tiʼj tuʼn tchʼexpaj jlu quʼn». Tuʼntzunju, miʼn kubʼ t-ximana qa mas bʼaʼn aju congregación jatumel xtena twitzju jatumel ma pona. Tzaj tqʼamaʼn jun precursora jlu, aju Anne-Lise tbʼi: «Ma chin ule toj congregación lu tuʼn tel nnikʼe kyiʼj junjuntl tiʼchaq ex nya tuʼn kykanet aʼyex tiʼchaq wuʼne ik tzeʼn toj ojtxe congregación».

Ax ikx qe ansyan mintiʼ tuʼn tkubʼ kyximen qa mas bʼaʼn congregación jatumel otoq che ten twitzju jatumel ma che pon. Qa junxitl chʼin qe tiʼchaq in che bʼant kyuʼn erman toj akʼaj congregación, nya t-xilen jlu qa nya bʼaʼn aju in bʼant kyuʼn. Naʼmxtoq t-xi tqʼamaʼna jun tyola, mas bʼaʼn tuʼn tok tbʼiʼna tiquʼn in che bʼant junjun tiʼchaq kyuʼn (Ecl. 3:​1, 7b). Ex mas bʼaʼn tuʼn tkubʼ qqʼoʼn jun tbʼanel techel kywitz erman twitzju tuʼn qok ten obligaril kye (2 Cor. 1:24).

3. Qʼonka tilil tuʼn tonina tiʼj akʼaj congregación (Filip. 1:27). Maske in xi tiʼn nim aqʼuntl ex ambʼil tuʼn t-xiʼya toj juntl congregación, bʼaʼn tuʼn tok tilil tuʼna tuʼn t-xiʼya kyoj chmabʼil. Kyaj erman tuʼn ttena kyukʼil tuʼntzun kyonin tiʼja. Tzaj tqʼamaʼn Lucinda tiʼ bʼant kyuʼn kyukʼil kabʼe tal tej kyxiʼ anqʼil toj jun tnam te Sudáfrica: «Ok tilil quʼne tuʼn t-xi qbʼiʼne consej tzaj qʼoʼn qeye tuʼn qonine tiʼj akʼaj congregación. Ik tzeʼn tuʼn qexe pakbʼal kyukʼil junxichaq erman ex tuʼn t-xi qqʼoʼne qyole kyoj chmabʼil. Ax ikx xi qqʼamaʼne kye erman qa jakutoq tzʼajbʼen qjaye tuʼn tok kychmon kyibʼ erman aj kyex pakbʼal».

Qa ma tzʼok tilil tuʼna tuʼn tonina kyiʼj erman toj akʼaj congregación, kʼokel tilil tuʼna tuʼn tonina kyiʼj ex tiʼj tqanil kolbʼil. Xi kyqʼamaʼn ansyan te Anne-Lise tuʼn tok tilil tuʼn tuʼn tex pakbʼal kyukʼil kykyaqil erman. Tqʼama Anne-Lise jlu: «Jun rat el nnikʼe tiʼj qa atzun jun tten tuʼn kyok qojtzqiʼn erman ex tuʼn qtzalaj kyukʼil». Ax ikx, qa ma tzʼonina tiʼj limpieza ex tiʼj mantenimiento te Ja te Chmabʼil, kxel tyekʼina kye erman qa ya ma naqʼeta kyukʼil. Ex qa ma bʼant jlu tuʼna, kbʼel tnaʼna qa ata kyukʼil toj tjaya.

4. Qʼonka tilil tuʼn kyok erman te tamiwa (2 Cor. 6:​11-13). Mas jun rat jaku che ok erman te qamiw qa ma tzʼel kynikʼ tiʼj qa in  qo ximen kyiʼj. Tuʼntzunju, bʼaʼn tuʼn tel tpaʼna ambʼil tuʼn tyolina kyukʼil erman naʼmxtoq t-xi tzyet chmabʼil ex otoqxi tzʼel bʼaj. Qʼonka tilil tuʼn tkyaj kybʼi toj twiʼya. Qa ma kubʼ tyekʼina tbʼanel tmoda kyukʼil erman ex qa ma kyaj kybʼi toj twiʼya, kbʼel kynaʼn bʼaʼn ex che okel te tamiwa.

Miʼn kubʼ tyekʼina junxitl tmoda kywitz txqantl noq tuʼn tela bʼaʼn toj kywitz, sino qʼonka tilil tuʼn tok ojtzqiʼna kyuʼn. Bʼaʼn tuʼn t-xi tbʼinchaʼna aju bʼant tuʼn Lucinda. Tqʼama jlu: «Ok tilil quʼne tuʼn kytzaj qtxkoʼne qe erman qjaye ex tuʼntzunju ateʼ tbʼanel qamiwe jaʼlo».

«KYKʼMOM KYIBʼE KYXOLXE»

Ateʼ junjun erman kwest in nela toj kywitz aj kypon tnejel maj toj jun Ja te Chmabʼil tuʼnju mintiʼ ojtzqiʼn jun erman kyuʼn. Tuʼntzunju, qa at jun erman tzma in pon toj Ja te Chmabʼil kyukʼile, ¿tiʼ jaku bʼant tuʼna tuʼn tonina tiʼj? Tzaj tqʼamaʼn apóstol Pablo jlu: «Kykʼmom kyibʼe kyxolxe ik tzaʼn te Crist ma qo tkʼam» (Rom. 15:7). Jaku tzʼel kykanoʼn ansyan tiʼj Jesucristo aj kyonin kyiʼj erman tzma in che pon toj congregación (qʼonka twitza tiʼj recuadro « Aju in bʼant aj t-xiʼya toj juntl congregación»). Kykyaqilx erman jaku che onin, axpe ikx qe kʼwal, tuʼn tkubʼ tnaʼn erman bʼaʼn.

Ax ikx jaku chex qtxkoʼn erman qja ex jaku qo onin kyiʼj. Jun techel, xi tyekʼin jun ermana tnam te juntl ermana tzmatoq in pon ex xi tqʼamaʼn te alkye tten in che bʼet xjal kyoj bus ex kyoj tren. Tzaj tqʼamaʼn ermana tzmatoq in pon, qa tbʼanel ela jlu toj twitz ex qa onin tiʼj tuʼn tnaqʼet tiʼj lugar.

JAKU CHʼIYA TOJ TOKSLABʼILA

Jaku tzaj xobʼa qa ma kubʼ t-ximana tuʼn t-xiʼya toj juntl congregación. Pero bʼaʼn tuʼn t-ximana tiʼj jlu: Ateʼ junjun txkup il tiʼj tuʼn tchʼexpaj kyxmilal tuʼntzun tbʼant kylipen. Ax  ikx teya, miʼn tzaj bʼaj tkʼuʼja kyiʼj junjun tiʼchaq tuʼntzun tchʼiya toj tokslabʼila ex tuʼn kybʼant junjuntl tiʼchaq tuʼna toj tajbʼebʼila te Jehová. Tzaj kyqʼamaʼn Nicolas ex Céline jlu: «In nel qnikʼ kyiʼj nim tiʼchaq aj qxiʼ toj juntl congregación. Ik tzeʼn qeye, iltoq tiʼj tuʼn kyten junjuntl tbʼanel qmode tuʼn qnaqʼete kyiʼj xjal ex kyiʼj junjuntl lugar». Ax ikx tqʼama Jean-Charles tzeʼn onin jlu kyiʼj toj tja: «Tej qxiʼye toj juntl congregación onin kyiʼj qkʼwale tuʼn kychʼiy toj kyokslabʼil. Tej tikʼ junjun xjaw, xi qʼoʼn toklen qmeʼjele tuʼn kyex t-asignación kyoj chmabʼil txolekxi seman. Atzun juntl qkʼwale xi qʼoʼn toklen te pakbʼal».

¿Yajtzun qa mlay bʼant tuʼn t-xiʼya onil toj juntl congregación? Maske ikju, kukx jaku che ajbʼen nabʼil ma qo xnaqʼtzaʼn tiʼj tuʼn tonina toj congregación jatumel taʼya jaʼlo. Qeʼk tkʼuʼja tiʼj Jehová, tzʼonina tiʼj congregación, qʼonka tilil tuʼn tpakbʼaʼna kyukʼil kykyaqil erman, jyonxa tumel tuʼn kyten mastl tamiwa moqa tuʼn ttena mas ambʼil kyukʼil tamiwa ateʼ jaʼlo. Ax ikx, qa at jun erman in pon toj congregación jatumel taʼya moqa at jun taj onbʼil, bʼaʼn tuʼn tonina tiʼj. Qa ma bʼant tkyaqil jlu tuʼna, ok kʼonil tiʼja tuʼn tchʼiya toj tokslabʼila tuʼnju in nel nikʼbʼaj kyiʼj ax tok okslal tuʼn kʼujlabʼil in kubʼ kyyekʼin kyxolx (Juan 13:35). Bʼaʼn tuʼn tok qeʼ tkʼuʼja tiʼj qa in tzalaj Dios tiʼj tkyaqilju in bʼant quʼn (Heb. 13:16).

Aqeju erman o cheʼx toj juntl congregación, in che tzalaj jaʼlo maske o che ok weʼ twitz nim nya bʼaʼn. Ax ikx teya jaku naqʼeta. Tqʼama Anne-Lise qa «o tzʼonin tiʼj tuʼn kykanet mas tamiw». In tzaj tqʼamaʼn Kazumi qa o tzʼok tqʼoʼn twitz tiʼj qa aj qxiʼ toj juntl congregación mas in nonin Jehová qiʼj. Atzunte ermano Jules in tzaj tqʼamaʼn jlu: «In kubʼ nnaʼne bʼaʼn tuʼnju o che kanet mas wamiwe jaʼlo. O chin naqʼete tiʼj akʼaj congregación ex nya waje tuʼn tkyaj ntzaqpiʼne».