In tzaj tqʼamaʼn Isaías 60:1 jlu: «Weʼktza tnam Jerusalén, qoptzʼajxa, porke ma tzul kanun spikʼun teya ex in qoptzʼaj t-spikʼumal Qman tibʼaja». In yolin texto lu tiʼj Jerusalén moqa Sion, aju capital te Judá toj ambʼil aju (Is. 60:14; 62:​1, 2). Aj tyolin Tyol Dios tiʼj Jerusalén in nok te techel tkyaqil tnam Israel. Pero, ¿tzeʼn ex toj alkye ambʼil jaw weʼ Jerusalén ex xi tzyet tuʼn tqoptzʼaj? ¿In japunpe twiʼ profecía toj ambʼil jaʼlo? Qo xnaqʼtzaʼn tiʼj tzaqʼwebʼil kyiʼj kabʼe xjel lu.

¿Tzeʼn ex toj alkye ambʼil jaw weʼ Jerusalén ex xi tzyet tuʼn tqoptzʼaj? I ex qʼiʼn aj Israel toj tnam Babilonia toj 70 abʼqʼi. Toj tkyaqil ambʼil aju, nijun anqʼin toj tnam Jerusalén tuʼnju otoq kubʼ xiten. Tej tkubʼ tiʼj tnam Babilonia kyuʼn xjal te Media ex te Persia xi qʼoʼn ambʼil kye kykyaqil aj Israel ateʼ tjaqʼ Kykawbʼil tuʼn kymeltzʼaj toj Jerusalén ex tuʼn tten kʼulbʼil axix tok juntl maj (Esd. 1:​1-4). Toj abʼqʼi 537 tjaqʼxi ambʼil qʼiʼn quʼn jaʼlo, xi tzyet tuʼn kymeltzʼaj junjun aj judiy kyiʼj 12 tribu (Is. 60:4). Tej kymeltzʼaj e ok ten juntl maj qʼol chojbʼil te Jehová, e ok juntl maj ninqʼij kyuʼn ex jaw kybʼinchaʼn juntl maj tja Dios (Esd. 3:​1-4, 7-11; 6:​16-22). Iktzun tten kubʼ qoptzʼaj tspikʼumal Dios juntl maj tibʼaj tnam Jerusalén, toj juntl yol, kyibʼaj tmajen Jehová. E ok te jun spikʼun kye tnam mintiʼ ojtzqiʼn Dios kyuʼn.

Aju yol tqʼama Isaías mintiʼ japun twi tkyaqil tiʼj ojtxe Jerusalén, tuʼnju ya mintiʼ e nimen aj Israel te Jehová (Neh. 13:27; Mal. 1:​6-8; 2:​13, 14; Mat. 15:​7-9). Ax ikx el ikʼun Jesucristo kyuʼn, aju Mesías (Mat. 27:​1, 2). Tuʼntzunju, toj abʼqʼi 70 kubʼ xiten Jerusalén tukʼix tja Dios juntl maj.

Otoq tzaj tqʼamaʼn Jehová qa kbʼajeltoq jlu (Dan. 9:​24-27). Tuʼn jlu in nel qnikʼ tiʼj qa mintiʼ kubʼ t-ximen Jehová tuʼn tjapun tiʼj ojtxe tnam Jerusalén tkyaqilju in tzaj qʼamaʼn toj capítulo 60 te Isaías.

¿In japunpe twiʼ profecía tqʼama Isaías toj ambʼil jaʼlo? In japun, pero tiʼj «tnam Jerusalén aju at tuj kyaʼj». ¿Alkyetzun Jerusalén at toj kyaʼj? Atz in yolin kyiʼj qeju in che anqʼin toj kyaʼj, toj juntl yol, aju juntl plaj tnam Dios at toj kyaʼj. Tej tyolin apóstol Pablo tiʼj, tqʼama jlu: «Atzun qtxuʼ qkyaqil» (Gál. 4:26). In nok Jesús ex qeju 144,000 te tal txubʼaj lu, aʼyeju che anqʼil toj kyaʼj, ik tzeʼn te apóstol Pablo. In che ok okslal skʼoʼn maj te «jun tnam oʼkx te Dios» tuʼn kyajbʼen ex «etzan qe tuʼn Dios» (1 Ped. 2:9; Gál. 6:16).

¿Tzeʼn jaw weʼ Jerusalén at toj kyaʼj ex qoptzʼaj? Bʼant jlu tej tbʼaj junjun tiʼchaq kyiʼj skʼoʼn maj tzalu twitz Txʼotxʼ. Qo xnaqʼtzan tiʼjju ikʼ kyiʼj, ik tzeʼn in tzaj tqʼamaʼn Isaías capítulo 60.

Atxix toj tkabʼ syent abʼqʼi, tej kykyim apóstol, e ten okslal skʼoʼn maj toj qlolj tuʼnju chʼiy nya ax tok xnaqʼtzbʼil, tuʼntzunju, iltoq tiʼj tuʼn kyjaw weʼ (Mat. 13:​37-43). Toj ambʼil aju e ten tjaqʼ tipumal Nintz tnam Babilonia, aju kytxuylal okslabʼil nya ax tok. E ten tjaqʼ tipumal tejxi t-xi tzyet «mankbʼil tqʼijlalil», aju xi tzyet toj 1914 (Mat. 13:​39, 40). Tej tikʼ chʼintl ambʼil, toj 1919 e tzoqpaj okslal skʼoʼn maj ex xi tzyet tuʼn kyqoptzʼaj toj qlolj. ¿Alkye tten bʼaj jlu? Tej  tok tilil kyuʼn tuʼn kypakbʼan. a Atxix toj ambʼil aju o che oktz mas xjal toj spikʼun, axpe ikx junjuntl kyxol aj Israel etzan tuʼn Dios. Aʼyeju ax ikx in xi qʼamaʼn «rey» kyiʼj, ik tzeʼn in tzaj qʼamaʼn toj Isaías 60:3 (Apoc. 5:​9, 10).

Toj ambʼil tzul, mas kbʼel kyyekʼin okslal skʼoʼn maj tspikʼumal Jehová. Aj tkubʼaj kychwinqlal qeju 144,000 twitz Txʼotxʼ, che okel te rey ex te pal toj «Akʼaj Jerusalén», toj juntl yol, che okel te tnovia Cristo (Apoc. 14:1; 21:​1, 2, 24; 22:​3-5).

Ok kʼonil Akʼaj Jerusalén tuʼn tjapun twiʼ Isaías 60:1 (mojbʼankuya tukʼil Isaías 60:​1, 3, 5, 11, 19, 20 ex tukʼil Apocalipsis 21:​2, 9-11, 22-26). Ik tzeʼn toj ambʼil ojtxe atz e Kawin qe rey te Israel toj tnam Jerusalén, ax ikx toj ambʼil tzul kʼokel Akʼaj Jerusalén ex Cristo te Akʼaj kawbʼil. ¿Tiquʼn in tzaj tqʼamaʼn Apocalipsis qa «aju akʼaj Jerusalén kyjaʼ tkuʼtz tuj kyaʼj, tzaj tukʼil Dios»? A t-xilen jlu qa che onil okslal skʼoʼn maj kyiʼj xjal che tel tzalu twitz Txʼotxʼ. In tzaj tqʼamaʼn Biblia qa «ok che bʼetel [xjal tzʼaqli] tuj t-spikʼumal tnam» Jerusalén ex qa che kletel tiʼj il ex kamik (Apoc. 21:​3, 4, 24). Ex tuʼn jlu tzul «tqʼijlalil tuʼn tbʼinchet tkyaqil juntl maj te akʼaj», ik tzeʼn tqʼama Isaías ex junjuntl profeta (Hech. 3:21). Xi tzyet tuʼn tbʼinchet jlu tej tok Jesús te Rey ex kbʼel bʼaj aj tkubʼaj Tkawbʼil Jesús toj Mil Abʼqʼi.