TOJ abʼqʼi 1970, kanet jun ojtxe uʼj kyuʼn xjal in che xnaqʼtzan tiʼjju ikʼ ojtxe, otoq bʼaj tzʼeʼy uʼj tej tkanet. Atz kanet uʼj lu toj tnam Ein Gedi toj Israel nqayin tiʼj costa toj telex Qʼij te mar Muerto. Kanet uʼj lu kyuʼn xjal akux in che lukun toj jun ja te kʼulbʼil aju bʼaj xiten tojlo abʼqʼi 500 moqa 550 tiʼj ambʼil qʼiʼn quʼn jaʼlo. Otoq bʼaj yaj uʼj lu ex tuʼn jlu mlaytoq bʼant tuʼn tjaw uʼjit, tuʼnju qa ma tzʼel kotpiʼn jakutoq kubʼ xitj. Qa ikju, ¿alkye tten o tzʼel nikʼbʼaj tiʼj tqanil tkuʼx toj ojtxe uʼj? Bʼant jlu noq tuʼn kyonbʼil kʼuxbʼil tej tetz yekʼin tilbʼilal uʼj toj 3-D ex tuʼnju ajbʼen junjuntl programa tuʼn tel nikʼbʼaj tiʼj toj computadora.

Kyuʼn qeju tilbʼilal etz yekʼin toj kʼuxbʼil el nikʼbʼaj tiʼj qa in yolin uʼj lu tiʼj Tyol Dios. Toj jun piẍ, tkuʼx junjun versículo kyiʼj qeju tnejel yol tiʼj uʼj te Levítico. Kyxol jlu at aju Tetragrámaton, aʼyeju kyaje letra in che ajbʼen tuʼn tkubʼ tzʼibʼit tbʼi Dios toj yol hebreo. In kubʼ ximet qa kubʼ tzʼibʼin uʼj lu toj abʼqʼi 50 ex qa toj abʼqʼi 400 tiʼj ambʼil qʼiʼn quʼn jaʼlo. Tuʼn jlu, in nok uʼj lu te mas ojtxe uʼj kyxol qeju uʼj o che kanet tiʼj Tyol Dios toj yol hebreo, atxix tej kykanet qeju Rollo del mar Muerto atz Qumrán. Kubʼ ttzʼibʼin Gil Zohar jlu toj periódico The Jerusalem Post: «Tej tel nikʼbʼaj tiʼj piẍ uʼj in yolin tiʼj Levítico aju kanet atz Ein Gedi noq tuʼn kyonbʼil kʼuxbʼil, attoq jun mil abʼqʼi kyxol qeju Rollo del mar Muerto (aju ma tzikʼ kabʼe mil abʼqʼi tkubʼlen tzʼibʼin, tuʼnju kubʼ tzʼibʼin tej chʼixtoq tkubʼ bʼaj ambʼil tej tten tkabʼin tja Dios) tukʼilju Códice de Alepo (aju kubʼ tzʼibʼin tojlo abʼqʼi 930 tiʼj ambʼil qʼiʼn quʼn jaʼlo). In tzaj kyqʼamaʼn xjal at kyojtzqibʼil qa in tzaj tyekʼin uʼj el nikʼbʼaj tiʼj qa kukx o che ten yol tkuʼx toj Torá «kyoj nim mil abʼqʼi ex mintiʼ o che bʼaj chʼexpuʼn qe yol nya toj tumel kux kytzʼibʼin qeju xjal e bʼaj copiarinte».