1. ¿Tiʼ jaku bʼant quʼn tuʼn tel qkanoʼn tiʼj Jehová, aju Qtat at tkʼujlabʼil?

NIMXIX kʼujlaʼn qoʼ tuʼn Qtat Jehová (Juan 3:16). Tuʼnju qaj tuʼn tel qkanoʼn tiʼj, in nok tilil quʼn tuʼn tel qnikʼ tiʼjju in bʼaj kyiʼj kykyaqil, tuʼn tkubʼ qyekʼin qʼaqʼbʼil qkʼuʼj ex qkʼujlabʼil kyiʼj, ex mas kyiʼj erman (Gál. 6:10; 1 Ped. 3:8). Qaj tuʼn qonin kyiʼj kykyaqil erman in che ajbʼen te Jehová aj kyok weʼ twitz nya bʼaʼn.

2. ¿Tiʼ qo xnaqʼtzal tiʼj toj xnaqʼtzbʼil lu?

² Kykyaqil qeju kyaj tuʼn kyajbʼen te Jehová, che okel weʼ twitz nya bʼaʼn ex jaku tzaj bʼaj kykʼuʼj tuʼn (Mar. 10:29, 30). Bʼalo qo okel weʼ twitz mas nya bʼaʼn akux in laqʼeʼ ttzaj xitbʼil tiʼj tkyaqil nya bʼaʼn. ¿Tzeʼn jaku bʼaj qonin qibʼ qxolx? Tnejel, qo xnaqʼtzan tiʼj tiʼ in tzaj tqʼamaʼn Tyol Dios tiʼjju ikʼ tiʼj Lot, Job ex Noemí. Yajxitl, kʼelel qnikʼ kyiʼj junjun nya bʼaʼn in che tzaj kyiʼj erman ex tzeʼn jaku qo onin kyiʼj tuʼn kyex twitz.

3. Ik tzeʼn in tzaj tqʼamaʼn 2 Pedro 2:7 ex 8, ¿tiʼ bʼant tuʼn Lot ex tiʼ tzaj tiʼj tuʼn jlu?

³ Nya toj tumel tej tkubʼ t-ximen Lot tuʼn t-xiʼ anqʼil atz Sodoma tuʼnju attoq nim yaẍbʼil toj (kjawil uʼjit 2 Pedro 2:7, 8). Ax tok, attoq nim tbʼanel tiʼchaq toj tnam lu, pero tzaj nim nya bʼaʼn tiʼj tuʼnju xiʼ anqʼil atz (Gén. 13:8-13; 14:12). Bʼalo kʼujlaʼntoq tnam tuʼn t-xuʼjil moqa attoq nim tkʼujlabʼil kyiʼj junjun xjal in che anqʼintoq atz, ex tuʼn jlu mintiʼ bʼin te Jehová. Tej ttzaj nim qʼaqʼ toj kyaʼj tibʼaj lugar lu, bʼiʼx kyim. Ax ikx qo ximen kyiʼj qeju kabʼe tmeʼjel  Lot, otoq txi kytziyen kye junjun xjal tuʼn kykubʼ mojeʼ kyukʼil, pero e kyim xjal lu toj tnam Sodoma. Tuʼntzunju, naj tja Lot, qe tiʼchaq attoq te, ex aju mas bʼisbʼajil, kyim t-xuʼjil (Gén. 19:12-14, 17, 26). Noqtzun tuʼnj, toj ambʼil aju, kukx kubʼ tyekʼin Jehová tpasens tiʼj.

4. ¿Alkye junjun tten kubʼ tyekʼin Jehová tpasens tiʼj Lot? (Qʼonka twitza tiʼj tilbʼilal tok tiʼj t-xkʼomil).

⁴ Maske ax Lot kubʼ ximente tuʼn t-xiʼ anqʼil atz Sodoma, kubʼ tyekʼin Jehová qʼaqʼbʼil tkʼuʼj tiʼj ex tzaj tsamaʼn junjun t-anjel tuʼntzun tklet junx kyukʼil toj tja. Noqtzun tuʼnj, mintiʼ ok tilil tuʼn Lot tuʼn tetz toj tnam, tuʼntzunju etz jukʼuʼn kyuʼn anjel junx tukʼil t-xuʼjil ex qe tmeʼjel tuʼntzun miʼn kykyim (Gén. 19:15, 16). Xitzun kyqʼamaʼn anjel kye tuʼn kyxi oq atz twi witz. Pero mintiʼ e bʼin. Aju bʼant tuʼn Lot, xi tqanin te Dios tuʼn t-xi oq toj juntl lugar tok nqayin tiʼj tnam (Gén. 19:17-20). Ten tpasens Jehová tiʼj Lot ex xi tqʼoʼn ambʼil te tuʼn t-xiʼ atz. Yajxitl, tzaj xobʼ Lot toj lugar lu ex xiʼ twi witz jatumel otoq txi tqʼamaʼn Jehová te tnejel (Gén. 19:30). Tuʼn jlu in nel qnikʼ tiʼj qa kubʼ tyekʼin Jehová nimxix tpasens tiʼj Lot. Qo xnaqʼtzan tiʼj tzeʼn jaku tzʼel qkanoʼn tiʼj.

5, 6. ¿Tzeʼn jaku che onin yol tkuʼx toj 1 Tesalonicenses 5:14 qiʼj tuʼn tel qkanoʼn tiʼj Jehová?

⁵ Ik tzeʼn bʼaj tiʼj Lot, bʼalo at jun erman otoq jaw tjyoʼn jun tbʼe nya toj tumel ex tuʼn jlu jaku tzaj nim nya bʼaʼn tiʼj. Qa ma bʼaj jlu, ¿tiʼ kbʼantel quʼn? Bʼalo jaku kubʼ qximen tuʼn t-xi qqʼamaʼn te qa in jaw tchmoʼn aju in kux tawaʼn, ex ax tok jlu (Gál. 6:7). Noqtzun tuʼnj, jaku bʼant juntl tiʼ mas tbʼanel quʼn: bʼaʼn tuʼn tel qkanoʼn tiʼjju alkye tten onin Jehová tiʼj Lot. ¿Tzeʼn jaku bʼant quʼn?

⁶ Nya oʼkx e tzaj tsamaʼn Jehová qe t-anjel tuʼn t-xi kyqʼamaʼn te Lot qa kbʼel xiten tnam Sodoma, sino ax ikx e onin kyiʼj tuʼn kyklet. Chʼixmi axju jaku bʼant quʼn, bʼalo jaku txi qqʼoʼn tnabʼil jun erman aj tel qnikʼ tiʼj qa in kubʼ tbʼinchaʼn jun tiʼ nya toj tumel ex jaku tzaj nya bʼaʼn tiʼj. Ax ikx, il-lo tiʼj tuʼn qonin tiʼj. Maske jaku txi tiʼn ambʼil tuʼn t-xi tbʼiʼn consej tkuʼx toj Tyol Dios, bʼaʼn tuʼn tten qpasens tiʼj. Qkanoʼmil kyiʼj qeju anjel e onin tiʼj Lot. Miʼn kubʼ qximen tuʼn tel qpan qibʼ tiʼj erman, sino qo jyon tumel tuʼn qonin tiʼj (1 Juan 3:18). Bʼalo il tiʼj tuʼn t-xi qjukʼuʼn tqʼobʼ, toj juntl yol, tuʼn qonin tiʼj tuʼn t-xi tbʼiʼn consej in tzaj tqʼamaʼn Tyol Dios (kjawil uʼjit 1 Tesalonicenses 5:14).

7. Ik tzeʼn bʼant tuʼn Jehová tukʼil Lot, ¿alqiʼj tuʼn tok qqʼoʼn qwiʼ?

⁷ Jakutoq tzʼok tqʼoʼn Jehová twitz kyiʼj nya bʼaʼn tmod Lot, pero mintiʼ bʼant tuʼn. Yajxitl, ajbʼen apóstol Pedro tuʼn tuʼn ttzaj tqʼamaʼn qa ok Lot te jun xjal tzʼaqli. Nimxix in qo tzalaj tuʼnju mintiʼ in nok tqʼoʼn Jehová twitz kyiʼj qeju tiʼchaq in qo el txalpaj tiʼj (Sal. 130:3). Qkanoʼmil tiʼj Jehová ex qqʼonk qwiʼ kyiʼj tbʼanel kymod erman. Qa ma bʼant jlu quʼn, ktel mas qpasens kyukʼil, ex jaku tzʼonin kyiʼj tuʼn t-xi kykʼamoʼn onbʼil in xi qqʼoʼn kye.

8. Qa at qʼaqʼbʼil qkʼuʼj, ¿tiʼ kxel qbʼinchaʼn?

⁸ Ax ikx te Job tzaj nim nya bʼaʼn tiʼj, pero nya tuʼnju kubʼ t-ximen jun tiʼ nya toj tumel ik tzeʼn bʼant tuʼn Lot. Ik tzeʼn ojtzqiʼn quʼn, naj qe tiʼchaq te, el qʼiʼn toklen toj tnam ex ok jun yabʼil tiʼj. Ex aju mas bʼisbʼajil e kyim kykyaqil tkʼwaʼl. Nya oʼkxju, aʼyeju oxe xjal ok kyqʼon kyibʼ te  tamiw, mintiʼ xi kyqʼuqbʼaʼn tkʼuʼj, sino xi kyqʼamaʼn te qa ax at tpaj tiʼj jlu. ¿Tiquʼn mintiʼ xi kyqʼuqbʼaʼn tkʼuʼj? Tuʼnju mintiʼ ok tilil kyuʼn tuʼn telxix kynikʼ tiʼjju in bʼajtoq tiʼj Job. Tuʼn jlu, junxitl ikʼ toj kywiʼ ex xi kyqʼamaʼn yol nya toj tumel te. ¿Tiʼ jaku tzʼonin qiʼj tuʼn miʼn tbʼaj jlu qiʼj? Tnejel bʼaʼn tuʼn ttzaj qnaʼn qa oʼkx Jehová ojtzqilte tkyaqilju in bʼaj tiʼj jun xjal. Ax ikx, bʼaʼn tuʼn tel qnikʼ tiʼjju in tzaj tqʼamaʼn jun erman in bʼisun. Qqʼonk tilil tuʼn tkubʼ qnaʼn kʼixkʼoj in nikʼx tuʼn ex nya oʼkx tuʼn tok qbʼiʼn. Iktzun tten jaku kubʼ qyekʼin qʼaqʼbʼil qkʼuʼj tiʼj.

9. Qa at qʼaqʼbʼil qkʼuʼj, ¿tiʼ mlay kubʼ qbʼinchaʼn ex tiquʼn?

⁹ Qa at qʼaqʼbʼil qkʼuʼj, mlay qo ok ten yolil tiʼjju nya bʼaʼn in tzaj tiʼj jun erman kyukʼil txqantl. Aju xjal in bʼant jlu tuʼn, mintiʼ in nonin tuʼn tten mujbʼabʼil toj kʼloj okslal sino oʼkx in tzaj tiʼn xitbʼil toj (Prov. 20:19; Rom. 14:19). Ax ikx in kubʼ tyekʼin qa mintiʼ in ximen kyiʼj txqantl ex kyuʼn tyol jaku kux choʼn mas toj tanmi xjal in bʼisun (Prov. 12:18; Efes. 4:31, 32). Tuʼntzunju, mas bʼaʼn qa ma tzʼok qqʼoʼn qwitz tiʼjju tbʼanel tmod erman ex tuʼn qonin tiʼj tzeʼn jaku tzʼex twitz nya bʼaʼn.

10. ¿Tiʼ xnaqʼtzbʼil jaku tzʼel qiʼn kyiʼj yol tkuʼx toj Job 6:2 ex 3?

¹⁰ (Kjawil uʼjit Job 6:2, 3). At maj tqʼama Job junjun tiʼ nya toj tumel. Pero yajxitl tqʼama qa otoq tzʼel tzpet (Job 42:6). Ik tzeʼn te Job, qa at jun xjal in tzaj nya bʼaʼn tiʼj, jakulo tzaj tqʼamaʼn junjun tiʼchaq nya toj tumel ex yajxitl jaku tzaj tbʼis tuʼn jlu. ¿Tzeʼn qmod ktel tukʼil? Bʼaʼn tuʼn tkubʼ qyekʼin qʼaqʼbʼil qkʼuʼj tiʼj ex nya tuʼn qyolin nya bʼaʼn. Bʼaʼn tuʼn ttzaj qnaʼn qa nyatoq taj Jehová tuʼn ttzaj  nya bʼaʼn tiʼj jun xjal nix aju kʼixkʼoj in nikʼx quʼn jaʼlo. Tuʼntzunju, jaku tzaj tqʼamaʼn jun tmajen Dios jun tiʼ nya toj tumel aj ttzaj jun nya bʼaʼn tiʼj. Qa ma tzaj tqʼamaʼn jun tiʼ nya ax tok qiʼj ex tiʼj Jehová, miʼn tzaj naj qqʼoj ex miʼn qo yolin nya bʼaʼn tiʼj (Prov. 19:11).

11. ¿Tzeʼn jaku tzʼel kykanoʼn ansyan tiʼj techel kyaj tqʼoʼn Elihú aj t-xi kyqʼoʼn consej te jun erman?

¹¹ Ax ikx, at maj il tiʼj tuʼn t-xi qʼet jun consej moqa jun kawbʼil te jun erman in nikʼ toj jun nya bʼaʼn (Gál. 6:1). ¿Tzeʼn jaku che onin ansyan tiʼj? Jaku che onin aj tel kykanoʼn techel kyaj tqʼoʼn Elihú tuʼnju ok tqʼoʼn twiʼ tiʼj Job ex kubʼ tyekʼin qʼaqʼbʼil tkʼuʼj tiʼj (Job 33:6, 7). Tej naʼmxtoq txi tqʼoʼn Elihú consej te Job, tnejel el tnikʼ tiʼjju in kubʼtoq t-ximen. Jaku tzʼel kykanoʼn ansyan techel kyaj tqʼoʼn aj tok kyqʼoʼn kywiʼ tiʼj jun erman in bʼisun ex aj tel kynikʼ tiʼjju in bʼaj tiʼj. Iktzun tten, aj t-xi qʼet jun consej te kpol toj tanmi.

12. ¿Tiʼ kubʼ tnaʼn Noemí tej tkyim tchmil ex qe kabʼe tal?

¹² Ok Noemí te jun tbʼanel xuʼj ex kʼujlaʼntoq Jehová tuʼn. Pero tej tkyim tchmil ex qeju kabʼe tal, kubʼ t-ximen tuʼn tok qʼoʼn tbʼi te Mará, tuʼnju bʼis t-xilen bʼibʼaj lu (Rut 1:3, 5, 20, 21). Onin Rut tiʼj Noemí toj tkyaqil yajbʼil te, aju tlibʼ. Nya oʼkx onin tiʼj tukʼilju attoq tajbʼen te, sino ax ikx xi tqʼuqbʼaʼn tkʼuʼj kyukʼil tyol. Kubʼ tyekʼin tkʼujlabʼil tiʼj tej t-xi tqʼamaʼn qe yol bʼunin te ex axix tok qe (Rut 1:16, 17).

13. ¿Tiquʼn kyajbʼil qeju o kyim kyukʼil tuʼn qonin kyiʼj?

¹³ Aj tkyim tchmil jun ermana moqa t-xuʼjil jun ermano, kyajbʼil tuʼn qonin kyiʼj. Jaku tzʼok mojbʼet jun mejebʼleʼn ik tzeʼn kabʼe tzeʼ in che jaw chʼiy junx. Aj tbʼet ambʼil, in nok kymojbʼan kyibʼ qeju kylokʼ. Qa ma jatz xbʼoqin jun kyxol qeju tzeʼ ex qa ma kyim, jaku tzaj nim nya bʼaʼn tiʼj juntl. Chʼixme axju in bʼaj aj tkyim tukʼil jun erman, jaku kyaj tqʼoʼn nim bʼis tiʼj toj nimku ambʼil. Qo xnaqʼtzan tiʼjju bʼaj tiʼj Paula, * aju mintiʼtoq ximen tuʼn tej tkyim tchmil. In tzaj tchikʼbʼaʼn jlu: «Chʼexpaj wanqʼibʼile, ex kubʼ nximane qa otoq chin kyaje njunalxe. Kyim aju tbʼanelxix wamiwe. In chin yolintoqe tukʼil tiʼj tkyaqil. Junxtoq in qo tzalaje ex in nonintoq wiʼje aj ttzaj nya bʼaʼn. Oʼkx te jakutoq txi nqʼamaʼne qe nbʼise. Kubʼ nnaʼne ik tzeʼn otoq tzʼel qʼiʼn jun piẍ tiʼj nxmilale».

14, 15. ¿Alkye tten jaku txi qqʼuqbʼaʼn tkʼuʼj jun xjal o kyim tukʼil?

¹⁴ ¿Alkye tten jaku txi qqʼuqbʼaʼn tkʼuʼj jun xjal o kyim tukʼil? Tnejel, bʼaʼn tuʼn qyolin tukʼil xjal lu, maske nya qajbʼil tuʼn qyolin tiʼj jlu moqa nya bʼiʼn quʼn tiʼ kxel qqʼamaʼn. In tzaj tqʼamaʼn Paula jlu: «In nel nnikʼe tiʼj qa nya kyajxix xjal tuʼn kyyolin tiʼjju kyimen. Ex nya kyajbʼil tuʼn ttzaj kyqʼamaʼn jun tiʼ nya toj tumel. Pero mas bʼisbʼajil qa mintiʼ ma tzaj kyqʼamaʼn tiʼ twitzju tuʼn ttzaj kyqʼamaʼn jun kyyol nyaxix toj tumel». Bʼalo mintiʼ in nayon xjal at bʼis tiʼj tuʼn t-xi qqʼamaʼn jun tbʼanel nabʼil te. Tqʼamatl Paula jlu: «Nimtoq in chin tzalaje aj ttzaj kyqʼamaʼn wamiwe qa in che bʼisun tiʼjju in bʼajtoq wiʼje».

¹⁵ In tzaj tqʼamaʼn William jlu, aju ma tzikʼ junjun abʼqʼi tkyimlen t-xuʼjil: «Bʼaʼn in nela toj nwitze aj ttzaj kyqʼamaʼn txqantl aʼyeju tbʼanel tiʼchaq bʼant tuʼn  nxuʼjile kyiʼj. A jlu in tzaj tyekʼin qa kʼujlaʼntoq kyuʼn ex qa nimtoq toklen toj kywitz. Nimxix in nonin jlu wiʼje. Ax ikx in tzaj qʼuqbʼaʼn nkʼuʼje tuʼn kyyol, tuʼnju kʼujlaʼntoq nxuʼjile wuʼne ex tuʼnju nimtoq toklen toj nwitze». Atzunte Blanca in tzaj tchikʼbʼaʼn jlu: «Nimxix in tzaj qʼuqbʼaʼn nkʼuʼje kyuʼn txqantl aj tjaw kyuʼjin junjun taqikʼ Tyol Dios weye ex aj kynaʼn Dios wukʼile. Ax ikx nim in nonin wiʼje aj kyyolin tiʼj nchmile ex aj in chin ok bʼiʼne kyuʼn aj nyoline tiʼj».

16. a) ¿Tiʼ kukx kbʼantel quʼn kyiʼj qeju o kyim kyukʼil? b) Ik tzeʼn in tzaj tqʼamaʼn Santiago 1:27, ¿alkye qoklen at?

¹⁶ Kukx qo onin kyiʼj qeju o kyim kyukʼil, ik tzeʼn te Rut kukx ten ttxlaj Noemí. In tzaj tqʼamaʼn Paula jlu, aju ma qo yolin tiʼj: «Tej tkyim nchmile, nim xjal e onin wiʼje. Pero tej tbʼet ambʼil, e meltzʼaj juntl maj tiʼj kyaqʼun in bʼant junjun qʼij. Atzun weye otoq chʼexpaj tkyaqil wanqʼibʼile. Nim jaku tzʼonin kyiʼj qeju o kyim kyukʼil qa ma tzʼel kynikʼ txqantl tiʼj qa kyaj onbʼil toj nim xjaw, axpe ikx toj nim abʼqʼi». Ik tzeʼn in nel qnikʼ tiʼj, junxitl teyele junjun xjal ex nya ax ambʼil in xi tiʼn tuʼn tel bʼis tiʼj teyele junjun. Atlo junjun jun rat in che naqʼet kyiʼj chʼixpubʼil. Atzun junjuntl, kukx in tzaj kybʼis aj tbʼant junjun tiʼ kyuʼn aju in bʼanttoq kyuʼn tukʼil kychmil moqa kyxuʼjil. Miʼn tzʼel naj tiʼj qkʼuʼj qa aju tuʼn qxqʼuqin kyiʼj qeju ya mintiʼ kyukʼil, jun tbʼanel qoklen in tzaj tqʼoʼn Jehová (kjawil uʼjit Santiago 1:27).

17. ¿Tiquʼn kyaj qeju o che kyaj kolin tuʼn kyukʼil tuʼn qonin kyiʼj?

 ¹⁷ Ax ikx, jaku tzaj bʼaj tkʼuʼj jun xjal ex jaku sikt aj tkyaj kolin tuʼn tukʼil. Jun techel, kyaj kolin Julia tuʼn tchmil tej t-xiʼ tukʼil juntl xuʼj. In tzaj tqʼamaʼn jlu: «Tej tkubʼ naj qmejebʼleʼne, mas kux choʼn toj wanmiye tuʼn jlu twitzju noqwit kyim nchmile. Tuʼnju noqwit kyim toj jun aksident moqa tuʼn jun yabʼil, mlay txi nqʼamaʼne qa a kubʼ ximente tuʼn tbʼaj jlu. Pero tej tkubʼ naj qmejebʼleʼne, a kubʼ ximente. Kubʼ nnaʼne qa mintiʼ ok tqʼoʼn woklene».

18. ¿Tzeʼn jaku qo onin kyiʼj qeju ya mintiʼ kyukʼil?

¹⁸ Kyaj qeju ya mintiʼ kyukʼil tuʼn tten tbʼanelxix kyamiw (Prov. 17:17). ¿Tzeʼn jaku kubʼ qyekʼin qa qaj tuʼn qok te kyamiw? Jaku bʼant jlu quʼn aj tkubʼ qyekʼin qkʼujlabʼil kyiʼj, ik tzeʼn aj t-xi qqʼoʼn txokbʼil kyiʼj tuʼn kytzaj waʼl qja, aj qten jun rat kyukʼil moqa aj qex pakbʼal kyukʼil. Ex aj tok ambʼil in xi qqʼoʼn kyukʼil toj qja te Jehová, jaku che tzaj qtxkoʼn junjun maj qukʼil. Ktzalajel Jehová aj tbʼant jlu quʼn, tuʼnju nqayin taʼ kyiʼj qeju in tzaj bʼaj kykʼuʼj ex in xqʼuqin kyiʼj qeju ya mintiʼ kychmil (Sal. 34:18; 68:5).

19. Ik tzeʼn in tzaj tqʼamaʼn 1 Pedro 3:8, ¿tiʼ qaj tuʼn tbʼant quʼn?

¹⁹ Toj chʼintl ambʼil aj tkawin Tkawbʼil Dios, ya mlay che ul bʼis tiʼj qkʼuʼj. Qajxix tuʼn tpon ambʼil jatumel «mi aʼl jun ktzajel» naʼnte bʼis (Is. 65:16, 17). Akux in pon ambʼil lu, bʼaʼn tuʼn kukx tbʼaj qonin qibʼ qxolx ex qyekʼinx tukʼil qyol ex qbʼinchbʼen qa kʼujlaʼn kykyaqil qe tmajen Jehová quʼn (kjawil uʼjit 1 Pedro 3:8).