XNAQʼTZBʼIL 26
«Kyajtz meltzʼaje wukʼile»
«Kyajtz meltzʼaje wukʼile ex jakutzun chin aj meltzʼaje kyukʼile» (MAL. 3:7).
BʼITZ 102 Qo onin kyiʼj qeju in che kubʼ numj
AJU KʼELEL QNIKʼ TIʼJ *
1. ¿Tiʼ in kubʼ tnaʼn Jehová aj tmeltzʼaj jun tal ẍneʼl?
IK TZEʼN el qnikʼ tiʼj toj xnaqʼtzbʼil kyaj, in nok tmojbʼan tibʼ Jehová tukʼil jun xjal in xqʼuqin kyiʼj t-ẍneʼl tukʼil kʼujlabʼil ex in nok tilil tuʼn tuʼn tkanet aju in nel tzpet. Jun maj, xi tqʼamaʼn Jehová jlu kye aj Israel otoq tzʼel kypan kyibʼ tiʼj: «Kyajtz meltzʼaje wukʼile ex jakutzun chin aj meltzʼaje kyukʼile». Ex ojtzqiʼn quʼn qa ax t-ximbʼetz at toj ambʼil jaʼlo tuʼnju in tzaj tqʼamaʼn jlu: «Mintiʼ in chin chʼexpaje» (Mal. 3:6, 7). Ax ikx, tqʼama Jesús qa in jaw tzalaj Jehová ex qe anjel aj tmeltzʼaj jun tal ẍneʼl (Luc. 15:10, 32).
2. ¿Tiʼ kʼelel qnikʼ tiʼj toj xnaqʼtzbʼil lu?
2 Toj xnaqʼtzbʼil lu, kʼelel qnikʼ tiʼj oxe techel yolin Jesús tiʼj, aju tzul tyekʼin qe tzeʼn jaku qo onin kyiʼj qeju o tzʼel kypan kyibʼ tiʼj Jehová. Ax ikx kʼelel qnikʼ tiʼj alkye qmod kbʼel qyekʼin tuʼntzun qonin kyiʼj tuʼn kymeltzʼaj tukʼil Jehová ex tiquʼn tbʼanel qa ma qo onin kyiʼj.
QO JYON TIʼJ PWAQ O TXI TZʼAQ
3, 4. ¿Tiquʼn ok tilil tuʼn xuʼj in tzaj qʼamaʼn toj Lucas 15:8 a 10 tuʼn tkanet tpwaq otoq txi tzʼaq?
3 Il tiʼj tuʼn tok tilil quʼn tuʼn kykanet qeju kyaj tuʼn kymeltzʼaj tukʼil Jehová. Toj uʼj te Lucas yolin Jesús tiʼj jun techel jatumel tqʼama qa xi tzʼaq jun tiʼ nim toklen tuʼn jun xuʼj, jun saq pwaq dracma tbʼi. Aju xnaqʼtzbʼil mas nim toklen toj txʼolbʼabʼil lu, aju aqʼuntl in xi tiʼn tuʼn tkanet pwaq (kjawil uʼjit Lucas 15:8-10).
4 Toj tqʼijlalil Jesús, ateʼlo junjun txubʼaj in xitoq kyqʼoʼn lajaj saq pwaq dracma tbʼi kye kyal aj kykubʼ mojeʼ. Bʼalo atzun jun kyxol qe pwaq lu xi tzʼaq tuʼn xuʼj yolin Jesús tiʼj. Kubʼ t-ximen xuʼj qa atz kubʼ tzʼaq tpwaq twitz txʼotxʼ, tuʼntzunju ok ttxqoʼn jun kandil ex ok ten jyolte. Bʼalo nya nim tqan kandil ex nyaxix qʼanchaʼl toj ja tuʼn. Tuʼn jlu, in kubʼ t-ximen xuʼj tuʼn tjaw tiʼn tzʼis toj tkyaqil tja. Ex aj tjaw tchmoʼn tkyaqil tzʼis, in nok tkeʼyin jun tiʼ in qoptzʼaj, ¡atzun tal tpwaq ma kanet! Tzaj tchikʼbʼaʼn Jesús qa chewix tanmi xuʼj tej tkanet tpwaq ex nimxix jaw tzalaj. Tuʼntzunju e tzaj ttxkoʼn qe tvesin ex qe tamiw tuʼntzun t-xi tqʼoʼn tbʼanel tqanil kye.
5. ¿Tiquʼn in xi tiʼn nim aqʼuntl tuʼn kykanet qeju o che chewix toj kyokslabʼil?
5 Tukʼilju txʼolbʼabʼil tqʼama Jesús, tajtoq tuʼn ttzaj tqʼamaʼn qa in xi tiʼn nim aqʼuntl tuʼn tkanet jun tiʼ otoq txi tzʼaq quʼn. Ax jlu in bʼaj aj qjyon kyiʼj qeju o che chewix toj kyokslabʼil. Bʼalo ma tzikʼ nim abʼqʼi mintiʼ in nok kychmon kyibʼ kyukʼil erman. Olo cheʼx anqʼil toj juntl lugar ex nya ojtzqiʼn qe kyuʼn erman te atz. Pero qʼuqli qkʼuʼj tiʼj qa ateʼ junjun kyaj tuʼn kymeltzʼaj tukʼil Jehová ex kyaj tuʼn kyajbʼen te junx qukʼil, noqtzun tuʼnj, il tiʼj tuʼn qonin kyiʼj.
6. ¿Tzeʼn jaku qo onin qkyaqilx tuʼn kykanet qeju o che chewix toj kyokslabʼil?
6 ¿Alkyeqe jaku che jyon kyiʼj qeju o che chewix toj kyokslabʼil? Kykyaqil erman, ik tzeʼn qe toj kyja, qe ansyan, qe precursor ex qe pakbʼal. ¿Atpe jun qamiw moqa jun toj qja o chewix toj tokslabʼil? Aj qpakbʼan ttziyele ja moqa jatumel in che ikʼ nim xjal, ¿ope kanet jun erman quʼn aju o chewix toj tokslabʼil? Bʼaʼn tuʼn t-xi qqanin te qa taj tuʼn tpon jun erman visitarilte ex qchikʼbʼanx te qa jaku txi qqʼoʼn qe tqanil tiʼj kye ansyan toj kʼloj okslal. Pero bʼaʼn tuʼn tbʼant quʼn ik tzeʼn in tzaj tqʼamaʼn ley tiʼj jlu jatumel in qo anqʼin.
7. ¿Tiʼ xnaqʼtzbʼil jaku tzʼel tiʼna tiʼjju tqʼama jun ansyan Thomas tbʼi?
7 ¿Tiʼ jaku bʼant kyuʼn ansyan tuʼn kykanet qeju kyaj tuʼn kymeltzʼaj tukʼil Jehová? Qbʼinx aju in bʼant tuʼn jun ermano te España aju Thomas tbʼi. * O tzʼonin kyiʼj mas te 40 erman tuʼn kymeltzʼaj toj ttnam Jehová. Tqʼama jlu: «Tnejel, in xi nqanine kye ermano ex ermana qa bʼiʼn kyuʼn jatumel in nanqʼin jun erman o chewix toj tokslabʼil. Moqa in xi nqanine kye qa ojtzqiʼn jun erman kyuʼn aju ya mintiʼ in pon kyoj chmabʼil. Chʼixme kykyaqilx erman kyaj tuʼn kyonin tuʼn kykanet erman lu. Ajtzun tkanet jun erman o chewix toj tokslabʼil wuʼne, in xi nqanine te tzeʼn ateʼ toj tja ex qe tkʼwal moqa tal. Tej naʼmxtoq kychewix erman lu toj kyokslabʼil, in chextoq kyiʼn kykʼwal toj chmabʼil, axpe ikx e ok te pakbʼal. Ax ikx jaku qo onin kyiʼj kykʼwal tuʼn kymeltzʼaj tukʼil Jehová».
QO ONIN TIʼJ KʼWALBʼAJ O TZʼEL TZPET TUʼN TMELTZʼAJ TUKʼIL JEHOVÁ
8. Ik tzeʼn in tzaj tqʼamaʼn Lucas 15:17 a 24, ¿tiʼ tmod mambʼaj kubʼ tyekʼin tiʼj tkʼwal tej tmeltzʼaj?
8 ¿Tiʼ qmod kbʼel qyekʼin qa qaj tuʼn qonin kyiʼj qeju kyaj tuʼn kymeltzʼaj tukʼil Jehová? Qo xnaqʼtzan tiʼj tiʼ xnaqʼtzbʼil jaku tzʼel qiʼn tiʼj txʼolbʼabʼil tiʼj kʼwal otoq tzʼel tzpet (kjawil uʼjit Lucas 15:17-24). Tqʼama Jesús qa ok tnabʼil kʼwalbʼaj juntl maj ex tajtoq tuʼn tmeltzʼaj juntl maj. Etz karrelin mambʼaj kʼlelte tkʼwal, tzaj tchleʼn ex xi tqʼamaʼn te qa kʼujlaʼn tuʼn. Tzaj nim tbʼis kʼwal tuʼn nya bʼaʼn tbʼinchbʼen ex kubʼ t-ximen qa ya mintiʼ toklen tuʼn tok te tkʼwal ttat. Tzaj qʼaqʼin tkʼuʼj mambʼaj tiʼj tkʼwal tej t-xi tqʼamaʼn tbʼis te ex otoq tzʼajtz tiʼj tanmi. Tuʼntzunju, kubʼ t-ximen tuʼn tok jun ninqʼij ex xi tqʼamaʼn kye tmajen tuʼn tok kyqʼoʼn t-xbʼalun mas tbʼanel. Iktzun tten kubʼ tyekʼin qa kʼujlaʼntoq tkʼwal tuʼn ex mintiʼ ok tqʼoʼn ik tzeʼn jun majen.
9. ¿Tiʼ qmod kbʼel qyekʼin tuʼn qonin kyiʼj qeju o che chewix toj kyokslabʼil tuʼn kymeltzʼaj tukʼil Jehová? (Qʼonka twitza tiʼj recuadro « ¿Tzeʼn jaku qo onin kyiʼj qeju kyaj tuʼn kymeltzʼaj tukʼil Jehová?»).
9 Ik tmod Jehová ik tzeʼn mambʼaj yolin Jesús tiʼj toj txʼolbʼabʼil. Kʼujlaʼn qe erman o che chewix toj kyokslabʼil tuʼn ex taj tuʼn kymeltzʼaj tukʼil. Qa ma tzʼel qkanoʼn tiʼj, jaku qo onin kyiʼj tuʼn kymeltzʼaj tukʼil Jehová. Tuʼn tbʼant jlu quʼn, il tiʼj tuʼn tten qpasens, tuʼn tel qnikʼ kyiʼj ex tuʼn tkubʼ qyekʼin qkʼujlabʼil kyiʼj. ¿Tiquʼn nim toklen tuʼn kyten qmod lu ex tzeʼn jaku kubʼ qyekʼin?
10. ¿Tiquʼn il tiʼj tuʼn tten qpasens tuʼn qonin tiʼj jun erman o chewix toj tokslabʼil?
10 Il tiʼj tuʼn tten qpasens tuʼnju kxel tiʼn ambʼil tuʼn tchʼiy tamiwbʼil erman juntl maj tukʼil Jehová. Nim erman e chewix toj kyokslabʼil o tzʼel kynikʼ tiʼj qa e pon ansyan ex qe erman visitaril kye jun ex juntl maj tuʼntzun kymeltzʼaj tukʼil Jehová. Kubʼ ttzʼibʼin ermana Nancy jlu, aju in nanqʼin sureste te Asia: «Nim onin jun tbʼanel wamiwe wiʼje. Ok ik tzeʼn ntzike tuʼnju in nok kʼujlaʼne tuʼn. Tzaj tnaʼn qe tbʼanel ambʼil weye jatumel o tene junx. Tej nyoline tukʼil kyiʼj nbʼise, ten tpasens wiʼje, in nok bʼiʼne tuʼn ex tzaj tqʼoʼn nnabʼile. Ok te jun axix tok wamiwe ex kukx onin wiʼje».
11. ¿Tiquʼn il tiʼj tuʼn tel qnikʼ tiʼj jun erman ok bʼinchaʼn nya bʼaʼn tiʼj tuʼn juntl tuʼntzun qonin tiʼj?
11 Aj tel qnikʼ tiʼjju in bʼaj tiʼj jun erman o chewix toj tokslabʼil, in nok jlu ik tzeʼn jun pomada tuʼn tqʼanit. Ateʼ junjun o che el laqʼeʼ tiʼj ttnam Jehová tuʼnju ok bʼinchaʼn nya bʼaʼn kyiʼj tuʼn jun erman ex mintiʼ in nikʼ tnaʼl jlu kyuʼn. Tuʼntzunju nya kyaj tuʼn kymeltzʼaj tukʼil Jehová. Atzun junjuntl in kubʼ kyximen qa ok bʼinchaʼn jun matij nya bʼaʼn kyiʼj. Tuʼntzunju kyajlo tuʼn kyok bʼiʼn tuʼn jun erman ex tuʼn tel tnikʼ tiʼjju in kubʼ kynaʼn (Sant. 1:19). Tqʼama ermana María jlu, aju chewix toj tokslabʼil toj jun ambʼil: «Wajtoqe tuʼn t-xi nqʼamaʼne qe nbʼise te jun erman, tuʼn tonin wiʼje ex tuʼn woqʼe tukʼil».
12. ¿Alkye tten in nok tkʼujlabʼil Jehová ik tzeʼn jun las?
12 In tzaj tqʼamaʼn Xjan Uʼj qa in qo tzaj tiʼn moqa in qo tzaj tjakʼuʼn Jehová toj ttnam tuʼn tkʼujlabʼil at qiʼj. ¿Alkye tten in bʼant jlu tuʼn? Qo ximen tiʼj jun techel. Ximana tiʼj qa ma kux tzʼaqa toj jun matij xoch. Nim t-xeʼ xoch lu ex mlay bʼant tuʼn tjatza toj tjunalxa. Oʼkx jaku jatza toj xoch lu qa ma kux xoʼn jun las teya tuʼn jun xjal ex qa ma jatz jukʼuʼna tuʼn. Tqʼama Jehová jlu kyiʼj aj Israel otoq tzʼel kypan kyibʼ tiʼj: «Tuʼn nkʼujlalile e tzaj wiʼne tuʼn kyul wukʼile» (Os. 11:4). Ax jlu taj Jehová tuʼn tbʼant tuʼn kyukʼil qeju o che chewix toj kyokslabʼil ex in che bʼisun tuʼnju in che ok weʼ twitz nim nya bʼaʼn. In nok jlu ik tzeʼn ateʼkux toj jun matij xoch. Pero taj Jehová tuʼn tok kybʼiʼn erman lu qa kʼujlaʼn qe tuʼn ex taj tuʼn tonin kyiʼj tuʼn kymeltzʼaj tukʼil. Ex jaku tzʼajbʼena tuʼn Jehová tuʼn tkubʼ tyekʼin tkʼujlabʼil kyiʼj.
13. Ik tzeʼn bʼaj tiʼj ermano Pablo, ¿tzeʼn in nonin qkʼujlabʼil kyiʼj qeju o che chewix toj kyokslabʼil tuʼn kymeltzʼaj tukʼil Jehová?
13 Nim toklen tuʼn t-xi qqʼamaʼn kye qeju o che chewix toj kyokslabʼil qa kʼujlaʼn qe tuʼn Jehová ex kyuʼn erman. Chewix ermano Pablo toj mas te 30 abʼqʼi toj tokslabʼil, aju o yolin tiʼj toj xnaqʼtzbʼil kyaj. Tqʼama jlu: «Tej wetze toj njaye toj jun prim, tzaj qʼolbʼen jun ermana ma tijen weye ex tukʼil kʼujlabʼil tzaj yolin wukʼile. In nok tene oqʼel ik tzeʼn jun tal kʼwal. Xi nqʼamaʼne te qa alo Jehová tzaj samante te tuʼn tyolin wukʼile. Iktzun tten kubʼ nximane tuʼn nmeltzʼaje tukʼil Jehová».
QO ONIN TUKʼIL KʼUJLABʼIL KYIʼJ QEJU O CHE KUBʼ NUMJ
14. Ik tzeʼn in tzaj tqʼamaʼn Lucas 15:4 ex 5, ¿tiʼ in bʼant tuʼn jun pastor aj tkanet jun tal t-ẍneʼl otoq tzʼel tzpet?
14 Aj kymeltzʼaj qeju o che chewix toj kyokslabʼil tukʼil Jehová, il tiʼj tuʼn qonin kyiʼj ex tuʼn t-xi qqʼuqbʼaʼn kykʼuʼj. Bʼalo at nim bʼis toj kyanmi ik tzeʼn te kʼwalbʼaj yolin Jesús tiʼj toj txʼolbʼabʼil. Ex tuʼnju ateʼtoq kyxol xjal mintiʼ in che ajbʼen te Jehová, jaku txi qqʼamaʼn qa nya kyuw ateʼ toj kyokslabʼil. Tuʼntzunju, il tiʼj tuʼn qonin kyiʼj tuʼn tchʼiy kyamiwbʼil tukʼil Jehová. Toj txʼolbʼabʼil tiʼj tal ẍneʼl otoq tzʼel tzpet, tqʼama Jesús qa in jax tqʼoʼn pastor tal ẍneʼl tibʼaj tqul ex in nokx tqʼoʼn kyxol txqantl. Ok tilil tuʼn pastor tuʼn tkanet tal t-ẍneʼl ex ok tqʼoʼn nim ambʼil tiʼj. Pero ojtzqiʼn tuʼn qa il tiʼj tuʼn tonin tiʼj ẍneʼl tuʼn tmeltzʼaj kyxol txqantl tuʼnju mintiʼ tipumal tuʼn tbʼet tjunalx (kjawil uʼjit Lucas 15:4, 5).
15. ¿Tzeʼn jaku qo onin kyiʼj qeju o che chewix toj kyokslabʼil tuʼn kymeltzʼaj tukʼil Jehová? (Qʼonka twitza tiʼj recuadro « Jun tbʼanelxix onbʼil»).
15 Il-lo tiʼj tuʼn tel qpaʼn ambʼil ex tuʼn tok tilil quʼn tuʼn qonin kyiʼj qeju o che chewix toj kyokslabʼil tuʼn tchʼiy kyamiwbʼil tukʼil Jehová (Rom. 15:1). Tuʼn tbʼant jlu quʼn, in nonin xewbʼaj xjan qiʼj, Tyol Dios ex qe uʼj in che etz tuʼn ttnam Jehová. ¿Tzeʼn jaku qo onin kyiʼj? Jun ansyan o tzikʼ nim ambʼil in najbʼen te Jehová, tqʼama jlu: «Aj tkubʼ kyximen erman o che chewix toj kyokslabʼil tuʼn kymeltzʼaj tukʼil Jehová, chʼixme kykyaqilx kyaj onbʼil tuʼn kyxnaqʼtzan tiʼj Xjan Uʼj tukʼil jun erman». * Tuʼntzunju, qa ma tzaj kyqanin ansyan qe tuʼn qonin tiʼj jun erman o chewix toj tokslabʼil, bʼaʼn tuʼn tbʼant quʼn tukʼil tzalajbʼil. Tqʼamatl ansyan jlu: «Kyaj qeju o che chewix toj kyokslabʼil tuʼn tok jun erman te kyamiw ex jaku tzʼok qeʼ kykʼuʼj tiʼj».
AT TZALAJBʼIL TOJ KYAʼJ EX TWITZ TXʼOTXʼ
16. ¿Tzeʼn ojtzqiʼn quʼn qa in che onin anjel qiʼj?
16 At nim techel in tzaj tyekʼin qa in che onin anjel tuʼn kykanet qeju o che chewix toj kyokslabʼil ex kyaj tuʼn kymeltzʼaj tukʼil Jehová (Apoc. 14:6). Jun techel, in nanqʼin Silvio atz Ecuador ex kubʼsan twitz Jehová tuʼn tonin tiʼj tuʼn tmeltzʼaj tukʼil. Akux in naʼn Dios, jaw qʼajt timbre. Otoq che pon kabʼe ansyan tja. Toj ambʼil aju, xi tzyet tuʼn kyonin ansyan tiʼj.
17. ¿Tiʼ kʼiwlabʼil in tzaj qkʼamoʼn aj qonin kyiʼj qeju o che chewix toj kyokslabʼil?
17 Nim qo tzalajel aj qonin kyiʼj qeju o che chewix toj kyokslabʼil tuʼn kymeltzʼaj tukʼil Jehová. Qqʼonk qwiʼ tiʼjju tqʼama Salvador, jun precursor in nok tilil tuʼn tuʼn tonin kyiʼj qeju o che chewix toj kyokslabʼil. Tqʼama: «Aj tmeltzʼaj jun erman tukʼil Jehová, in netz taʼl nwitze tuʼn tzalajbʼil. Nim in chin tzalaje aj nximane tiʼj tzeʼn o tzʼonin Jehová tiʼj tal t-ẍneʼl tuʼn tetz kyxol xjal ateʼ tjaqʼ tkawbʼil Satanás ex tuʼnju in chin onine tukʼil» (Hech. 20:35).
18. Qa o chewixa toj tokslabʼila, ¿tiʼ jaku tzʼok qeʼ tkʼuʼja tiʼj?
18 Qa o tzʼel tpan tibʼa kyiʼj erman, jaku tzʼok qeʼ tkʼuʼja tiʼj qa kʼujlaʼna tuʼn Jehová ex taj tuʼn tmeltzʼaja tukʼil. Ax tok, il tiʼj tuʼn tbʼant junjun tiʼchaq tuʼna. Pero bʼaʼn tuʼn ttzaj tnaʼna aju mambʼaj yolin Jesús tiʼj toj jun txʼolbʼabʼil. Taj Jehová tuʼn tmeltzʼaja kyukʼil tmajen ex ktzalajel tiʼja aj tmeltzʼaja.
BʼITZ 103 Jun oyaj qe ansyan tuʼn Jehová
^ taqik' 5 In xi tqʼamaʼn Jehová jlu kye qeju ya mintiʼ in che bʼet kyoj chmabʼil ex ya mintiʼ in che ex pakbʼal: «Kyajtz meltzʼaje wukʼile». Qkyaqilx jaku qo onin kyiʼj qeju o che chewix toj kyokslabʼil ex kyaj tuʼn t-xi kykʼamoʼn txokbʼil lu. Toj xnaqʼtzbʼil lu, kʼelel qnikʼ tiʼj tzeʼn jaku qo onin kyiʼj tuʼn kymeltzʼaj.
^ taqik' 7 Ma che kubʼ chʼixpet junjun bʼibʼaj.
^ taqik' 15 Nim jaku tzʼonin kyiʼj junjun erman o che chewix toj kyokslabʼil qa ma che xnaqʼtzan kyiʼj junjun xnaqʼtzbʼil tkuʼx toj uʼj «Ax che tenkje tuj tkʼujlalil Dios». Atzun junjuntl, jaku tzʼonin kyiʼj qa ma che xnaqʼtzan kyiʼj junjun xnaqʼtzbʼil tkuʼx toj uʼj Acerquémonos a Jehová. Kbʼel t-ximen Kʼloj Ansyan te Pakbʼabʼil toj Kʼloj Okslal alkye erman jaku txi qʼonte xnaqʼtzbʼil te teyele junjun erman o chewix toj tokslabʼil.
^ taqik' 68 TQANIL TIʼJ TILBʼILAL: In che onin oxe erman tiʼj jun erman o chewix toj tokslabʼil ex taj tuʼn tmeltzʼaj. In bʼant jlu kyuʼn aj kyyolin tukʼil, aj t-xi kyqʼamaʼn te qa kʼujlaʼn kyuʼn ex aj tel kynikʼ tiʼjju in tnaʼn.
