Kyoj qeju taqikʼ lu in tzaj qʼamaʼn bʼeljaj kymod okslal tuʼn tten. In tzaj tqʼamaʼn texto jlu: «Atzunju in tqʼoʼn Xewbʼaj Xjan atzun jlu: Tuʼn tten qkʼujlalil, tuʼn qtzalaj, tuʼn tten qmojbʼabʼl qibʼ, tuʼn tten qpasens, tuʼn qbʼinchante xtalbʼil te juntl, tuʼn tten qbʼanil, tuʼn qweʼxix tuj qokslabʼl, tuʼn qok mans, ex tuʼn qjakʼunte qibʼ». Pero nya oʼkx qe mod lu in nonin xewbʼaj xjan qiʼj tuʼn tkubʼ qyekʼin.

Tej naʼmxtoq tyolin apóstol Pablo kyiʼj mod in tqʼoʼn xewbʼaj xjan, tqʼama jlu: «[Atzun tajbʼil kychibʼjal xjal jlu]: In kybʼinchaʼn aj pajil, in che yaẍin, in kybʼinchaʼn aju ttzʼilil, in che achin, in che kʼulun kywitz qe tilbʼilal, aj kyʼaʼ qe, kyajqʼoj kyibʼ, in che qʼojin, nnoʼk txʼaʼl tiʼj kykʼuʼj tiʼj juntl, in che jaw kyaqpaj, in bʼaj kyikʼlen kyibʼ, in kubʼ ten pabʼl tibʼ kyxol, ex in che ok lpeʼ tiʼj jun xnaqʼtzbʼil mya bʼaʼn. In tzaj tloʼch kykʼuʼj, bʼyol xjal qe, kʼal qʼeʼn qe, in che achin tuj ninqʼij, ex at mastl in kybʼinchaʼn ik tzaʼn jlu» (Gál. 5:19-21). Jakutoq yolin Pablo kyiʼj junjuntl tajbʼil kychibʼjal xjal ik tzeʼn qeju in tzaj qʼamaʼn toj Colosenses 3:5. Chʼixme ax jlu in bʼaj kyukʼil qeju bʼeljaj mod tqʼama Pablo toj Gálatas 5:22 ex 23. Tej ttzaj tqʼamaʼn qe mod lu, mintiʼ tzaj tqʼamaʼn tkyaqil tbʼanel mod jaku kubʼ qyekʼin tuʼn tonbʼil xewbʼaj xjan.

Jaku tzʼel qnikʼ tiʼj jlu aj tok qmojbʼaʼn qe mod in tzaj qʼamaʼn toj uʼj te Gálatas tukʼilju xi ttzʼibʼin apóstol Pablo kye okslal te Éfeso: «Porke aju in tzaj tqʼoʼn spikʼun qe, atzun tuʼn qbʼinchante bʼaʼn, ex tuʼn qbʼet tuj tumelxix, ex tuʼn qyolin axix tok» (Efes. 5:8, 9). Ik tzeʼn in nel qnikʼ tiʼj, aju tuʼn «qbʼinchante bʼaʼn» tukʼilju «tuʼn qbʼet tuj tumelxix, ex tuʼn qyolin axix tok», ax ikx at toklen tukʼilju «in tzaj tqʼoʼn spikʼun» ex tukʼilju in tqʼoʼn xewbʼaj xjan. Ax tok, mintiʼ tqʼama Pablo aju «tuʼn qbʼet tuj tumelxix, ex tuʼn qyolin axix tok» toj Gálatas 5:22 ex 23, pero jakutoq yolin tiʼj.

Ax ikx xi tqʼamaʼn apóstol Pablo te Timoteo tuʼn tten qaq tbʼanel tmod: «Tzʼok tililx tuʼna tuʼn tbʼinchanteya aju tzʼaqlxix, ex tuʼn tnimana te Dios, ex tuʼn tten tokslabʼla, ex tuʼn tten tkʼujlalila, ex tuʼn tten tpasensa, ex tuʼn toka mans» (1 Tim. 6:11). Kyxol qe jlu, tqʼama apóstol Pablo kyaje mod in tqʼoʼn xewbʼaj xjan ik tzeʼn tuʼn tten qokslabʼil, tuʼn tten qkʼujlabʼil, tuʼn tten qpasens ex tuʼn qok te mans. Pero iltoq tiʼj tuʼn tonin xewbʼaj xjan tiʼj Timoteo tuʼn tkubʼ tyekʼin junjuntl tbʼanel mod yolin Pablo tiʼj, ik tzeʼn tuʼn tok te tzʼaqli ex tuʼn tniman te Dios (mojbʼankuya tukʼil Colosenses 3:12 ex 2 Pedro 1:5-7).

Tuʼntzunju, mintiʼ in tzaj tqʼamaʼn Gálatas 5:22 ex 23 kykyaqil kymod okslal tuʼn tten, aju in tqʼoʼn xewbʼaj xjan. Jaku tzʼonin xewbʼaj xjan qiʼj tuʼn tkubʼ qyekʼin qeju bʼeljaj mod in tzaj qʼamaʼn toj uʼj te Gálatas. Pero ateʼ junjuntl qmod il tiʼj tuʼn tkubʼ qyekʼin tuʼntzun qchʼiy toj qokslabʼil ex tuʼn tok qqʼoʼn akʼaj qten, aju o bʼinchanjtz ik tzeʼn tajbʼil Dios tuʼntzun qok te tzʼaqlixix ex te «xjan tuʼnju yol axix tok» (Efes. 4:24).