«Tej ttzaj qqʼoje tukʼil nprimoye, tzaj ntzyuʼne tqul ex kubʼ nyaqʼoʼne. Wajtoqe tuʼn tkubʼ nbʼyoʼne» (Paul).

«Jun rattoq in tzaj nqʼoje tuʼn alkyexku tiʼ atz njaye. In bʼajtoq nxitene qe mueble, qe saqchbʼil ex noq tiʼxku tok ntxlaje» (Marco).

Bʼalo mlay kubʼ qbʼinchaʼn jlu. Pero at maj kwest tuʼn qjakʼunte qibʼ moqa tuʼn qtzyunte qibʼ. ¿Tiquʼn? Mas tuʼnju qkyaqilx o tzʼel qiqen il kyaj tqʼoʼn Adán (Rom. 5:12). Ateʼ junjun ik tzeʼn te Paul ex Marco, kwest in nela toj kywitz tuʼn tok kyxqʼuqin kymod. Atzun junjuntl, in nok tilil kyuʼn tuʼn miʼn kytzaj xobʼ ex tuʼn miʼn tten nya bʼaʼn kyximbʼetz kyiʼjx. Ateʼ txqantl, in nok tilil kyuʼn tuʼn miʼn kykubʼ tzʼaq toj yaẍbʼil, tuʼn miʼn t-xi kykʼaʼn nim qʼeʼn ex tuʼn miʼn tajbʼen droga kyuʼn.

Jaku tzaj nya bʼaʼn toj kychwinqlal qeju mintiʼ in nok kyxqʼuqin kyximbʼetz, nya bʼaʼn kyajbʼil ex kybʼinchbʼen. ¿Tiʼ jaku bʼant quʼn tuʼn miʼn tbʼaj jlu qiʼj? Qxnaqʼtzanx qibʼ tuʼn tbʼant qjakʼunte qibʼ. Tuʼn tbʼant jlu quʼn, qo xnaqʼtzan kyiʼj oxe xjel. Tnejel, ¿tiʼ t-xilen aju tuʼn qjakʼunte qibʼ? Tkabʼin, ¿tiquʼn nim toklen? Ex toxin, ¿tzeʼn jaku ten qmod lu aju in tzaj tqʼoʼn xewbʼaj xjan? (Gál. 5:22, 23). Yajxitl kʼelel qnikʼ tiʼj tiʼ jaku bʼant quʼn qa at maj kwest tuʼn qjakʼunte qibʼ.

Aju xjal in bʼant tjakʼun tibʼ, mintiʼ in kubʼ tbʼinchaʼn aju in kubʼ tnaʼn. Sino in nok tilil tuʼn tuʼn miʼn t-xi tqʼamaʼn moqa tuʼn miʼn tkubʼ tbʼinchaʼn jun nya bʼaʼn twitz Dios.

Kyaj tqʼoʼn Jesús jun tbʼanel techel qwitz tiʼjju tuʼn qjakʼunte qibʼ. In tzaj tqʼamaʼn Tyol Dios jlu: «Tej tok yasoʼn Crist kyuʼn xjal, mintiʼ aj tmojtzaʼn yasbʼil. Tej tyajlanjtz kyuʼn, mintiʼ xi tmaʼn yol te xobʼtzabʼl kye, noq oʼkx xi tqʼon tibʼ tuj tkwent Dios aju bʼinchalte tiʼj xtis tuj tumelxix» (1 Ped. 2:23). Kubʼ tyekʼin Jesús tmod lu tej kyxmayin aj qʼoj tiʼj tej tjaw qʼoʼn twitz tzeʼ (Mat. 27:39-44). Ax ikx, otoq kubʼ tyekʼin Jesús qa bʼant tjakʼunte tibʼ tej t-xi kyqanin nejenel kye okslabʼil junjun xjel te noq «tuʼn tkubʼ tzʼaq [...] kyuʼn tiʼj jun tyol» (Mat. 22:15-22). Ex kubʼ tqʼoʼn jun tbʼanel techel qwitz tej ttzaj kyqʼoj junjun aj Judiy tiʼj ex kyajtoq tuʼn tok kyxoʼn abʼj tiʼj. Mintiʼ aj tqʼoʼn t-xel nya bʼaʼn sino «xi tewan tibʼ Jesús ex etz tuj tja Dios» (Juan 8:57-59).

¿Jakupe tzʼel qkanoʼn techel kyaj tqʼoʼn Jesús? Jaku. Kubʼ ttzʼibʼin apóstol Pedro jlu: «Porke ikx te Crist ikʼx tuʼn tuʼn kylaje, kyaj tyekʼun kyeye tuʼn kyok lpeʼye tiʼj» (1 Ped. 2:21). Maske aj il qoʼ, jaku tzʼok tilil quʼn tuʼn tel qkanoʼn techel kyaj tqʼoʼn Jesús. ¿Tiquʼn nim toklen tuʼn tbʼant quʼn?

Qa qaj tuʼn ttzalaj Jehová qiʼj, il tiʼj tuʼn tbʼant qjakʼunte qibʼ. Maske o tzikʼ nim ambʼil in qo ajbʼen te Jehová, jaku naj qamiwbʼil tukʼil  qa mintiʼ ma tzʼok qxqʼuqin aju in xi qqʼamaʼn ex aju in bʼant quʼn.

Qo xnaqʼtzan tiʼjju bʼaj tiʼj Moisés, otoq tzʼok te xjal «mas mans kywitz mastl xjal twitz txʼotxʼ» toj ambʼil tej tanqʼin (Núm. 12:3). Toj nimku abʼqʼi, ten tpasens Moisés tiʼj nya bʼaʼn kymod aj Israel. Pero jun qʼij, mintiʼ bʼant tjakʼunte tibʼ ex tzaj tqʼoj kyiʼj aj Israel tuʼnju xi kyqʼamaʼn juntl maj te qa mintiʼ aʼ. Xi tqʼamaʼn jlu kye tukʼil qʼoj: «Kybʼinxe, aqeye xjal mibʼan che bʼin: ¿Kʼeletzpe aʼ quʼne tuj pik lu te kykʼaye?» (Núm. 20:2-11).

Mintiʼ bʼant tjakʼunte tibʼ Moisés ex mintiʼ jaw tnimsaʼn Jehová tej tetz aʼ tuʼn toj pik (Sal. 106:32, 33). Tuʼntzunju, mintiʼ xi tqʼoʼn Jehová ambʼil te tuʼn tokx toj Txʼotxʼ Tziyen maj (Núm. 20:12). Bʼalo kukx tzaj tbʼis Moisés tiʼjju bʼant tuʼn tejxi tkyim (Deut. 3:23-27).

¿Tiʼ xnaqʼtzbʼil jaku tzʼel qiʼn tiʼj jlu? Maske ma tzikʼ nim abʼqʼi toklen qojtzqiʼn axix tok, mintiʼ tuʼn tel qiʼn kyoklen qeju in tzaj qqʼoj kyuʼn nix qeju kyaj jun kyconsej (Efes. 4:32; Col. 3:12). Ax tok, kwest tuʼn tten qpasens aj qtijen, pero bʼaʼn tuʼn ttzaj qnaʼn aju bʼaj tiʼj Moisés. Nya qaj tuʼn t-xi naj tkyaqilju o bʼant quʼn toj qajbʼebʼil te Jehová noq tuʼnju mintiʼ in bʼant qjakʼunte qibʼ. Tuʼntzunju, ¿tiʼ jaku bʼant quʼn tuʼn tten qmod lu?

Qqaninx xewbʼaj xjan toj qnaʼj Dios. ¿Tiquʼn nim toklen tuʼn tbʼant quʼn? Tuʼnju aju tuʼn qjakʼunte qibʼ, atzun jun mod in tzaj tqʼoʼn xewbʼaj xjan, ex in xi tqʼoʼn Jehová xewbʼaj xjan kye qeju in xi kyqanin te (Luc. 11:13). Tuʼn onbʼil in tzaj tqʼoʼn xewbʼaj xjan, in tzaj tqʼoʼn Jehová qipumal tuʼntzun tkubʼ qyekʼin mod lu (Filip. 4:13, TNM). Ax ikx jaku tzʼonin qiʼj tuʼn kyten junjuntl qmod ik tzeʼn kʼujlabʼil, ex kʼonil kʼujlabʼil qiʼj tuʼn tbʼant qjakʼunte qibʼ (1 Cor. 13:5).

Qikʼumel tkyaqilju mintiʼ in nonin qiʼj tuʼn tbʼant qjakʼunte qibʼ. Kyxol qe tiʼchaq bʼaʼn tuʼn tel qikʼun, ateʼ junjun tembʼil te Internet ex junjuntl saqchbʼil in netz yekʼin nya bʼaʼn kymod xjal toj (Efes. 5:3, 4). Ex nim toklen tuʼn tel qpan qibʼ tiʼj tkyaqilju jaku qo kubʼ tzʼaq tuʼn toj il (Prov. 22:3; 1 Cor. 6:12). Jun techel, qa o naqʼet jun xjal tuʼn tkubʼ tbʼinchaʼn jun nya bʼaʼn, il-lo tiʼj tuʼn tkyaj ttzaqpiʼn tuʼn tuʼjin kyiʼj libro ex tuʼn miʼn tok tkeʼyin qe película in che yolin tiʼj kʼujlabʼil.

 Bʼalo kwest jaku tzʼela toj qwitz tuʼn t-xi qbʼiʼn qe nabʼil lu. Pero qa ma tzʼok tilil quʼn, ktzajel tqʼoʼn Jehová qipumal tuʼn tbʼant qjakʼunte qibʼ (2 Ped. 1:5-8). Ax ikx kʼonil qiʼj tuʼn tok qxqʼuqin aju in kubʼ qnaʼn, aju in xi qqʼamaʼn ex aju in bʼant quʼn. Jun techel tiʼj jlu, bʼant tuʼn tjakʼunte tibʼ Paul ex Marco tuʼnju ok tilil kyuʼn tuʼn ya miʼn ttzaj kyqʼoj. Qo ximen tiʼj jun ermano jun rattoq in tzaj tqʼoj aj tmanejarin. Axpe ikx ok ten wulil kyukʼil junjuntl xjal in che manejarin. ¿Tiʼ bʼant tuʼn tuʼn tchʼexpaj tmod? In tzaj tqʼamaʼn jlu: «In chin naʼntoqe Dios tkyaqil qʼij tuʼntzun tten wipumale. E kubʼ nxnaqʼtzaʼne xnaqʼtzbʼil in che yolin tiʼjju tuʼn qjakʼunte qibʼ ex e kyaj qe texto toj nwiʼye aqeju jaku che onin wiʼje. Maske o tzʼok tilil wuʼne toj nimku abʼqʼi tuʼn njakʼunte wibʼe, kukx in tzaj nnaʼne junjun prim tuʼn miʼn ttzaj nqʼoje ex in nonin jlu wiʼje. Ex qa at jun tiʼ tuʼn t-xi nbʼinchaʼne, lwey in chin exe tuʼntzun miʼn wojqelane».

At maj kwest jaku tzʼela toj qwitz tuʼn qjakʼunte qibʼ ex in qo el txalpaj. Aj tbʼaj jlu, jakulo kubʼ qximen qa mintiʼ qoklen tuʼn qnaʼn Dios te Jehová. Pero toj ambʼil lu mas nim toklen tuʼn qnaʼn Dios. Ex bʼaʼn tuʼn tbʼant naj quʼn. Qqaninx te tuʼn tkubʼ tnajsaʼn qil, tuʼn tonin qiʼj ex qximinku tuʼn miʼn tkubʼ qbʼinchaʼn juntl maj (Sal. 51:9-11). Mlay tzʼel tikʼun qnaʼj Dios qa ma txi qqanin te tuʼn tkubʼ tyekʼin qʼaqʼbʼil tkʼuʼj qiʼj (Sal. 102:17). In tzaj tnaʼn apóstol Juan qe qa «nneʼl ttxʼjoʼn tkyaqilju qil» tuʼn tchkʼel Jesús (1 Juan 1:7; 2:1; Sal. 86:5). Ex bʼaʼn tuʼn ttzaj qnaʼn qa in tzaj tqʼamaʼn Jehová qe tuʼn kukx tkubʼ qnajsaʼn kyil txqantl. Tuʼntzunju, jaku tzʼok qeʼ qkʼuʼj tiʼj qa ax jlu kbʼantel tuʼn qukʼil (Mat. 18:21, 22; Col. 3:13, TNM).

Nya bʼaʼn ela toj twitz Jehová tuʼnju mintiʼ bʼant tjakʼunte tibʼ Moisés toj tzqij txʼotxʼ, pero kubʼ tnajsaʼn til. Ex in tzaj tqʼamaʼn Xjan Uʼj qa kyaj tqʼoʼn Moisés jun tbʼanel techel tuʼnju ten nim qʼuqbʼil tkʼuʼj (Deut. 34:10; Heb. 11:24-28). Ax tok, mintiʼ xi tqʼoʼn Jehová ambʼil te Moisés tuʼn tokx toj Txʼotxʼ Tziyen maj, pero kxel tqʼoʼn ambʼil te tuʼn tanqʼin toj Tbʼanel Najbʼil ex tuʼn tanqʼin te jumajx toj ambʼil tzul. Ax ikx qe, jaku tzaj qʼoʼn ambʼil qe tuʼn qanqʼin te jumajx qa ma tzʼok tilil quʼn tuʼn qjakʼunte qibʼ (1 Cor. 9:25).