Kubʼ ttzʼibʼin apóstol Pablo jlu: «Tuʼnxju ley ma chin kyime tuʼn miʼn ntentle tjaqʼ ley, tuʼntzun wanqʼine tukʼil Dios ex tuʼn wajbʼene te» (Gál. 2:19).

Aju kubʼ ttzʼibʼin Pablo, attoq toklen tukʼil jun tiʼ nim toklen xi tchikʼbʼaʼn kye kʼloj okslal te Galacia te tnam Roma. Ateʼ junjun okslal otoq txi kybʼiʼn xnaqʼtzbʼil nya ax tok in kyqʼoʼntoq junjun aj xnaqʼtzal. Xi qʼamaʼn kye okslal qa iltoq tiʼj tuʼn tjapun tkyaqil Tley Moisés kyuʼn tuʼntzun kyklet. Mas aju xnaqʼtzbʼil tiʼj circuncisión. Pero ojtzqiʼntoq tuʼn Pablo qa ya mintiʼtoq in tzaj tqanin Jehová tuʼn tbʼaj kycircuncidarin kyibʼ tmajen. Xi tjyoʼn jun tumel tuʼn t-xi tyekʼin qa nya ax tok qe xnaqʼtzbʼil lu ex onin kyiʼj okslal tuʼn tchʼiy qʼuqbʼil kykʼuʼj tiʼj chojbʼil bʼant tuʼn Jesús (Gál. 2:4; 5:2).

Klarxix in tzaj tqʼamaʼn Tyol Dios qa aj tkyim jun xjal, ya mintiʼ jun tiʼ in tnaʼn (Ecl. 9:5). Tej tqʼama Pablo qa «tuʼnxju ley» otoq kyim, tuʼn jlu tzaj tqʼamaʼn qa ya mintiʼtoq tipumal Tley Moisés tibʼaj. Noqtzun tuʼnj, ojtzqiʼntoq tuʼn qa noq tuʼnju qʼuqbʼil tkʼuʼj at tiʼj chojbʼil, otoq txi tzyet tuʼn tanqʼin te Dios.

Aju bʼaj tiʼj Pablo, bʼant noq tuʼnju Ley. ¿Toj alkye tten? Otoq txi tchikʼbʼaʼn qa mlaytoq «tzʼok jun xjal te tzʼaqlxix twitz Dios tuʼnju in tbʼinchaʼn aju in tmaʼn tley Moisés, noq oʼkx kʼokel te tzʼaqlxix twitz Dios noq tuʼn tokslabʼl tiʼj Jesucrist» (Gál. 2:16). Ax tok, otoq bʼant jun tiʼ nim toklen tuʼn Ley. Tqʼama Pablo jlu kye okslal te Galacia tiʼj Ley: «Tzaj qʼoʼn te [...] yekʼulte kyil xjal, pero mya tuʼn tten te jumajx, noq oʼkx tuʼn tajbʼen naʼnxtoq tul [...] tiyjil Abraham tzaj ttziyan Dios» (Gál. 3:19). Ikju, mlaytoq japun Ley kyuʼn xjal tuʼnju aj il qe, tuʼntzunju, iltoq tiʼj tuʼn ttzaj qʼoʼn jun chojbʼil tzʼaqli ex te jumajx. Ex onin Ley kyiʼj xjal tuʼn tel kynikʼ tiʼj qa a Jesús ok te tyajil Abrahán otoq tzaj ttziyen Dios. Qa at jun xjal in nok qeʼ tkʼuʼj tiʼj chojbʼil bʼant tuʼn Jesús, jaku tzʼok tqʼoʼn Jehová te tzʼaqli (Gál. 3:24). Ok qʼoʼn Pablo te tzʼaqli tuʼnju onin Ley tiʼj tuʼn t-xi tokslaʼn Jesús ex tuʼn tok qeʼ tkʼuʼj tiʼj. Iktzun tten kyim «tuʼnxju ley» ex anqʼin te Dios. Ya mintiʼtoq tipumal Ley tibʼaj, atzunte Dios attoq tipumal tibʼaj.

Chʼixme ax jlu xi tqʼamaʼn Pablo toj tuʼj xi ttzʼibʼin kye okslal te Roma. Tqʼama jlu: «Ax ikxtzun kyeye erman, mintiʼtl toklen ley kyiʼje, porke o kyim Crist tuʼn kytzoqpete [...]. Atzun jaʼlo tzoqpiʼntl qoʼ, mintiʼ toklen ley qiʼj, ik tzaʼn kyimni ma qo ok twitz ley jatum tzyuʼntoq qoʼ nej» (Rom. 7:4, 6). In tzaj tyekʼin versículo lu ex Gálatas 2:19 qa mintiʼ tqʼama Pablo qa tuʼn tkyim ik tzeʼn jun xjal aj il tjaqʼ Ley. Sino tqʼama qa otoq tzaqpaj tjaqʼ Ley. Ya mintiʼtoq toklen Ley tibʼaj nix kyibʼaj txqantl okslal. Kykyaqilx otoq che tzaqpaj tuʼnju ok qeʼ kykʼuʼj tiʼj chojbʼil bʼant tuʼn Jesús.