1. ¿Tiʼ xi kyqanin xjal te apóstol Pedro ex tiʼ xi ttzaqʼweʼn kye?

OTOQ che pon nim xjal toj tnam Jerusalén. Tzajni qe kyoj junxichaq tnam ex junxichaq kyyol. Bʼaj jun tiʼ nim toklen toj qʼij aju, noq minabʼen e ok ten junjun aj Judiy yolil toj kyyol xjal otoq che pon toj tnam. Tej tbʼant kyyolin toj kyyol xjal, nya a jlu ok te mas tbʼanel, sino aju xi kyqʼamaʼn kye xjal ex aju xi tqʼamaʼn apóstol Pedro kye kykyaqil. Yolin Pedro kyiʼj nim xnaqʼtzbʼil kyukʼil xjal, kyxol qe jlu, xi tqʼamaʼn kye qa jaku che klet qa ma tzʼok qeʼ kykʼuʼj tiʼj Jesús. Kuʼpin qe yol lu toj kyanmi xjal, tuʼntzunju xi kyqanin jlu: «¿Alkye ok qbʼinchaʼye? Atzunte Pedro xi tmaʼn kye: Tajtz tiʼj kyanmiye ex tuʼn tbʼyan teyle junjun kyeye» (Hech. 2:37, 38).

2. ¿Tiʼ kʼelel qnikʼ tiʼj toj xnaqʼtzbʼil lu? (Qʼonka twitza tiʼj tilbʼilal tok tiʼj t-xkʼomil).

² ¡Tbʼanelxix aju bʼaj toj qʼij aju! Jaw aʼ kywiʼ junlo 3 mil xjal ex e ok te t-xnaqʼtzbʼen Jesús. Iktzun tten xi tzyet aqʼuntl kyaj tqʼamaʼn Jesús kye t-xnaqʼtzbʼen tuʼn tbʼant kyuʼn. Ex kukx in bʼant aqʼuntl lu toj ambʼil jaʼlo. Noqtzun tuʼnj, nya jun rat in jaw aʼ kywiʼ xjal ik tzeʼn bʼaj ojtxe. At maj in xi tiʼn junjun xjaw moqa at maj in xi tiʼn mas te jun abʼqʼi. In xi tiʼn nim aqʼuntl tuʼn kyok xjal te t-xnaqʼtzbʼen Jesús ex ojtzqiʼn jlu kyuʼn erman in che qʼon xnaqʼtzbʼil. Tuʼntzunju, toj xnaqʼtzbʼil lu kʼelel qnikʼ tiʼj tzeʼn jaku qo onin kyiʼj xjal tuʼn tjaw aʼ kywiʼ.

3. Ik tzeʼn in tzaj tqʼamaʼn Mateo 28:19 ex 20, ¿tiʼ kbʼantel tuʼn jun xjal tuʼn tjaw aʼ twiʼ?

³ Naʼmxtoq tjaw aʼ twiʼ jun xjal, nim toklen tuʼn tkubʼ tanqʼin aju in nel tnikʼ tiʼj toj Tyol Dios (kjawil uʼjit Mateo 28:19, 20). Qa ma bʼant jlu tuʼn, in nok ik tzeʼn «xjal at tnabʼl jaw tbʼinchaʼn tja tibʼaj» abʼj moqa pik (Mat. 7:24, 25; Luc. 6:47, 48). Atzun jaʼlo, qo xnaqʼtzan tiʼj oxe tiʼ jaku bʼant quʼn tuʼn qonin tiʼj xjal tuʼn tkubʼ tanqʼin aju in nel tnikʼ tiʼj.

4. ¿Tzeʼn jaku qo onin tiʼj xjal tuʼn tkubʼ t-ximen tuʼn tjaw aʼ twiʼ? (Qʼonka twitza tiʼj recuadro « Qo onin tiʼj xjal tuʼn tkubʼ t-ximen tiʼ tuʼn tbʼant tuʼn ex tuʼn tkubʼ tbʼinchaʼn»).

⁴ Qo onin tiʼj xjal tuʼn tkubʼ t-ximen tiʼ tuʼn tbʼant tuʼn. ¿Tiquʼn nim toklen? Qo ximen tiʼj jun techel. Qa ma qoʼx toj jun qbʼe najchaq, jaku qo ojlan jun rat toj bʼe tuʼntzun miʼn qsikt. Chʼixme ax jlu jaku bʼaj tiʼj jun xjal in xnaqʼtzan tiʼj Tyol Dios, qa ma kubʼ t-ximen tuʼn tbʼant junjun tiʼchaq tuʼn, jaku tzʼonin tiʼj tuʼn tel tnikʼ tiʼj qa jaku jaw aʼ twiʼ. Tuʼn tchʼiy xjal toj tokslabʼil, jaku tzʼajbʼen recuadro quʼn «Bʼinchankuya jlu» aju tkuʼx toj libro Tzalaja tiʼj tanqʼibʼila. Aj tkubʼaj jun xnaqʼtzbʼil quʼn tukʼil, qqʼamanx te tiʼ toklen aju kxel tbʼinchaʼn tukʼil xnaqʼtzbʼil otoq tzʼel tnikʼ tiʼj. Qa qaj tuʼn t-xi tbʼinchaʼn xjal junjuntl tiʼ, jaku kux qtzʼibʼin jatumel in tzaj qʼamaʼn «¿Tiʼ mas jaku bʼant tuʼna?». Jaku tzʼajbʼen ambʼil lu quʼn tuʼn qyolin tukʼil xjal tiʼjju taj tuʼn tbʼant tuʼn toj chʼin ambʼil ex tiʼjju taj tuʼn tbʼant tuʼn aj tikʼ ambʼil.

5. Ik tzeʼn in tzaj tqʼamaʼn Marcos 10:17 a 22, ¿tiʼ xi tqʼamaʼn Jesús te jun xjal qʼinun ex tiquʼn?

⁵ Qo onin tiʼj xjal tuʼn tbʼant junjun chʼixpubʼil tuʼn (kjawil uʼjit Marcos 10:17-22). Xi tqʼamaʼn Jesús te jun xjal qʼinun tuʼn t-xi tkʼayin tkyaqil tiʼchaq at te. Ojtzqiʼntoq tuʼn Jesús qa kwest tuʼn tbʼant jlu tuʼn xjal  (Mar. 10:23). ¿Tiquʼn xi tqʼamaʼn jlu te? Tuʼnju kʼujlaʼn xjal tuʼn. Bʼalo at maj mintiʼ in xi qqʼamaʼn te xjal tuʼn tkubʼ tbʼinchaʼn aju in nel tnikʼ tiʼj tuʼnju in kubʼ qximen qa naʼmx tbʼant tten. Toj tumel aj tkubʼ qximen jlu, tuʼnju in xi tiʼn ambʼil tuʼn kybʼant junjun chʼixpubʼil tuʼn xjal (Col. 3:9, 10). Pero qa mintiʼ ma qo ayon nim ambʼil tuʼn t-xi qqʼamaʼn jun tiʼ te xjal, mas jun rat kyxel tbʼinchaʼn. Aj tbʼant jlu quʼn, in kubʼ qyekʼin qa kʼujlaʼn xjal quʼn (Sal. 141:5; Prov. 27:17).

6. ¿Tiquʼn nim toklen tuʼn t-xi qqanin te xjal tiʼ in kubʼ t-ximen?

⁶ Nim toklen tuʼn t-xi qqanin te xjal tiʼ t-ximbʼetz at kyiʼj junjun tiʼchaq. Qa ma bʼant jlu quʼn, kʼelel qnikʼ tiʼj tiʼ ojtzqiʼn tuʼn ex tiʼ nimen tuʼn. Ax ikx, kʼonil qiʼj tuʼn miʼn qtzaj xobʼ tuʼn qyolin tukʼil kyiʼj junjun tiʼchaq kwest tuʼn tbʼant tuʼn. Toj libro Tzalaja tiʼj tanqʼibʼila, at nim xjel jaku tzʼonin tiʼj xjal tuʼn ttzaj tqʼamaʼn tiʼ in kubʼ tnaʼn. Jun techel, toj xnaqʼtzbʼil kyaje tkuʼx xjel lu: «¿Tiʼtzulo in kubʼ tnaʼn Jehová aj tajbʼen tbʼi tuʼna?». Ex in kanet juntl xjel quʼn toj xnaqʼtzbʼil bʼeljaj: «¿Tiʼ taja tuʼn t-xi tqanina toj tnaʼj Diosa?». Aj t-xi qqanin xjel lu te jun xjal, jakulo txi tiʼn ambʼil tuʼn ttzaj ttzaqʼweʼn. ¿Tzeʼn jaku qo onin tiʼj? Jaku bʼant quʼn aj t-xi qqʼamaʼn te tuʼn t-ximen kyiʼj taqikʼ Tyol Dios ex kyiʼj tilbʼilal tkuʼx toj xnaqʼtzbʼil.

7. ¿Tzeʼn jaku che ajbʼen ky-experiencia erman quʼn tuʼn qonin kyiʼj xjal?

⁷ Aj tel tnikʼ xjal tiʼj tiʼ tuʼn t-xi tbʼinchaʼn, qyekʼinx te tzeʼn bʼant jlu kyuʼn junjuntl xjal tuʼntzun tonin tiʼj. Jun techel, qa kwest tuʼn t-xiʼ xjal kyoj chmabʼil, jaku txi qyekʼin video lu te, In kwentin Jehová wiʼje. In kanet tbʼi video lu quʼn toj xnaqʼtzbʼil 14 jatumel in tzaj tqʼamaʼn «Ojtzqinka chʼintl». Chʼixmi kykyaqil xnaqʼtzbʼil tkuʼx toj libro Tzalaja tiʼj tanqʼibʼila, in yolin kyiʼj junjun ky-experiencia erman ex atz in tzaj qʼamaʼn toj plaj «Qo jyon mas tqanil» moqa «Ojtzqinka chʼintl». * Miʼn tzʼok qmojbʼaʼn xjal tukʼil juntl ex miʼn txi qqʼamaʼn jlu te: «Qa ma bʼant te jlu tuʼn, ax ikx teya jaku bʼant tuʼna». Mas bʼaʼn tuʼn t-xi qqʼoʼn ambʼil te xjal tuʼn tel tnikʼ tiʼj tjunalx. Qqʼamanx te tiʼ onin tiʼj erman setz yekʼin toj video tuʼn t-xi tbʼinchaʼn aju in tzaj tqʼamaʼn Tyol Dios, ik tzeʼn jun texto moqa juntl tiʼ. Ex qa jaku bʼant, qqʼamanx te xjal tzeʼn onin Jehová tiʼj erman.

8. ¿Tzeʼn jaku qo onin tiʼj jun xjal tuʼn tok tkʼujlaʼn Jehová?

⁸ Qo onin tiʼj xjal tuʼn tok tkʼujlaʼn Jehová. Qpaʼmil ambʼil tuʼn qyolin kyiʼj tbʼanel tmod Jehová. Qo onin tiʼj xjal tuʼn tel tnikʼ tiʼj qa in tzalaj te Jehová ex qa in nonin kyiʼj qeju at kykʼujlabʼil tiʼj (1 Tim. 1:11; Heb. 11:6). Qyekʼinx te tzeʼn jaku tzʼonin tiʼj qa ma kubʼ tanqʼin aju in nel tnikʼ tiʼj ex qa tuʼn jlu in tzaj tyekʼin Jehová tkʼujlabʼil tiʼj (Is. 48:17, 18). Aj tchʼiy tkʼujlabʼil tiʼj Jehová, kʼonil tiʼj tuʼn kybʼant chʼixpubʼil tuʼn (1 Juan 5:3).

9. Ik tzeʼn in tzaj tqʼamaʼn Marcos 10:29 ex 30, ¿tiʼ kʼonil tiʼj jun xjal tuʼn tbʼant junjun tiʼchaq tuʼn tuʼntzun tjaw aʼ twiʼ?

⁹ Nim toklen tuʼn t-xi tbʼinchaʼn jun xjal junjun tiʼchaq tuʼntzun tjaw aʼ twiʼ. Bʼalo il tiʼj tuʼn tkyaj ttzaqpiʼn junjun tiʼchaq ik tzeʼn te xjal qʼinun ma qo yolin tiʼj toj taqikʼ jweʼ. Moqa il tiʼj tuʼn tkyaj ttzaqpiʼn jun  aqʼuntl nya bʼaʼn in nela toj twitz Jehová. Ax ikx, bʼalo il tiʼj tuʼn tel tpan tibʼ kyiʼj junjun tamiw tuʼnju mintiʼ in che ajbʼen te Jehová. Ex ateʼ junjuntl in che el ikʼun kyuʼn toj kyja tuʼnju nya kygan qe testigos de Jehová. Tqʼama Jesús qa kwest kʼelel jlu toj kywitz junjun xjal. Noqtzun tuʼnj, kyaj ttziyen qa tzul tqʼoʼn Jehová qe toj tja ex qe tamiw kyxol erman (kjawil uʼjit Marcos 10:29, 30). ¿Tzeʼn jaku qo onin tiʼj xjal tuʼn ttzalaj tiʼjju in tzaj ttziyen Jehová te?

10. ¿Tiʼ xnaqʼtzbʼil jaku tzʼel qiʼn tiʼjju tqʼama Manuel?

¹⁰ Qo ok te tamiw xjal. Nim toklen tuʼn t-xi qyekʼin te xjal qa in qo ximen tiʼj. ¿Tiquʼn? Qbʼinx tiʼ bʼaj tiʼj jun ermano te México, aju Manuel tbʼi tej t-xnaqʼtzan tiʼj Tyol Dios. Tqʼama jlu: «Naʼmxtoq txi tzyet tuʼn qxnaqʼtzane tiʼj Tyol Dios tukʼil erman, tkyaqil maj tzaj tqanin weye tzeʼn atine. Onin jlu wiʼje tuʼn tkubʼ nnaʼne bʼaʼn ex tuʼn t-xi nqʼamaʼne alkyexku tiʼ te. El nnikʼe tiʼj qa ax tok in ximen wiʼje».

11. ¿Tiquʼn bʼaʼn tuʼn tel qpaʼn ambʼil tuʼn qten kyukʼil xjal in che xnaqʼtzan qukʼil?

¹¹ Bʼaʼn tuʼn tel qpaʼn ambʼil tuʼn qten kyukʼil xjal ik tzeʼn bʼant tuʼn Jesús (Juan 3:22). Qa in nok qqʼoʼn qwitz tiʼj qa in chʼiy xjal toj tokslabʼil ex qa jaku bʼant, jaku txi qqʼoʼn txokbʼil tiʼj tuʼn tpon kʼal jun tcafé qja, tuʼn qwaʼn tukʼil moqa tuʼn tok qkeʼyin programa JW Broadcasting. Maslo jaku tzʼonin tiʼj qa ma txi qqʼoʼn txokbʼil tiʼj aj tok kyninqʼij xjal tuʼntzun miʼn tkubʼ tnaʼn qa tjunalx at. In tzaj tqʼamaʼn jun ermano te Uganda jlu, aju Kazibwe tbʼi: «El nnikʼe kyiʼj junjuntl xnaqʼtzbʼil tiʼj Jehová tej ntene tukʼil erman tzaj qʼonte xnaqʼtzbʼil weye ex nya oʼkx tej qxnaqʼtzane tiʼj Tyol Dios. Ax ikx, el nnikʼe tiʼj qa in che tzalaj tmajen Jehová ex qa in ximen kyiʼj. Atzun jlu wajtoqe tuʼn tkubʼ nnaʼne».

12. ¿Tiquʼn bʼaʼn tuʼn t-xi qqʼoʼn txokbʼil kyiʼj erman tuʼn kyxiʼ qʼol xnaqʼtzbʼil qukʼil?

¹² Qqʼonx txokbʼil kyiʼj junjuntl erman tuʼn kyxiʼ qʼol xnaqʼtzbʼil qukʼil. Bʼalo jaku kubʼ  qximen qa mas nya kwest tuʼn qxiʼ qʼol xnaqʼtzbʼil qjunalx moqa oʼkx tukʼil jun erman ya ojtzqiʼn quʼn. Ax tok, maslo nya kwest tuʼn tbʼant jlu quʼn, pero nim jaku tzʼonin tiʼj xjal qa ma cheʼx junjuntl erman qʼol xnaqʼtzbʼil qukʼil. In tzaj tqʼamaʼn ermano Dimitri jlu, jun ermano in nanqʼin atz Moldavia: «Junxichaq tten tzeʼn in tzaj tchikʼbʼaʼn teyele junjun erman xnaqʼtzbʼil. Nim onin jlu wiʼje tuʼntzun telxix nnikʼe tiʼj xnaqʼtzbʼil. Axpe ikx, onin wiʼje tuʼn miʼn ttzaj nchʼixwiye tuʼn nxiʼye toj chmabʼil tuʼnju ya ojtzqiʼntoq junjun erman wuʼne».

13. ¿Tiquʼn nim toklen tuʼn qonin tiʼj xjal tuʼn tpon kyoj chmabʼil?

¹³ Qo onin tiʼj xjal tuʼn tpon kyoj chmabʼil. ¿Tiquʼn nim toklen jlu? Tuʼnju in tzaj tqʼamaʼn Jehová qe tuʼn tok qchmon qibʼ ex atzun jun tumel tuʼn qkʼulin te (Heb. 10:24, 25). Ax ikx in che ok erman toj kʼloj okslal ik tzeʼn qe toj qja. Aj in qo ten kyukʼil kyoj chmabʼil, in nok jlu ik tzeʼn in qo waʼn junx tiʼj jun tbʼanel wabʼj. Aj qonin tiʼj jun xjal tuʼn tpon kyoj chmabʼil, in qo onin tiʼj tuʼn tbʼaj tbʼinchaʼn tten tuʼn tjaw aʼ twiʼ. Noqtzun tuʼnj, atlo maj jaku tzʼel tiʼn jun tiʼ ambʼil te tuʼn tbʼant jlu tuʼn. Qa ikju, ¿tzeʼn jaku tzʼajbʼen libro Tzalaja tiʼj tanqʼibʼila quʼn tuʼn qonin tiʼj?

14. ¿Tzeʼn jaku qo onin kyiʼj xjal tuʼn kypon kyoj chmabʼil?

¹⁴ Tuʼn qonin tiʼj jun xjal tuʼn tpon kyoj chmabʼil, jaku tzʼajbʼen xnaqʼtzbʼil lajaj quʼn toj libro Tzalaja tiʼj tanqʼibʼila. Akux in bʼant libro lu, xi qanin kye junjun erman at nim kyojtzqibʼil tuʼn kyyolin tiʼj xnaqʼtzbʼil lu kyukʼil xjal in che xnaqʼtzan kyukʼil. Ex ok kyqʼoʼn kywitz tiʼj qa onin kyiʼj xjal. Noqtzun tuʼnj, mintiʼ tuʼn qayon tuʼn qpon toj xnaqʼtzbʼil lajaj tuʼntzun t-xi qqʼoʼn txokbʼil tiʼj xjal tuʼn tpon kyoj chmabʼil. Jaku txi qqʼoʼn txokbʼil tiʼj aj tikʼ chʼin ambʼil t-xilen tzyet tuʼn qxnaqʼtzan ex kukx jaku bʼant jlu quʼn. Junxichaq tiʼchaq in nikʼ toj kyanqʼibʼil junjun xjal. Tuʼntzunju, bʼaʼn tuʼn qximen tiʼj teyele junjun kye ex tzeʼn jaku qo onin kyiʼj. Miʼn tzaj bʼaj qkʼuʼj qa mintiʼ in cheʼx naj kyoj chmabʼil. Tenx qpasens kyiʼj, pero kukx qqʼonx txokbʼil kyiʼj.

15. ¿Tiʼ jaku che tzaj xobʼ xjal tuʼn?

¹⁵ Qa ma qo ximen tiʼj ambʼil tej qxnaqʼtzan tiʼj Tyol Dios, jakulo tzaj qnaʼn qa o tzaj xobʼ tuʼn qok te testigo de Jehová. Bʼalo kubʼ qximen qa mlayx qo ex pakbʼal ttzi kyja xjal moqa o tzaj xobʼ tej tkubʼ qximen qa qo elel ikʼun kyuʼn toj qja ex kyuʼn qamiw. Qa bʼaj jlu qiʼj, jaku tzʼel qnikʼ tiʼjju in bʼaj tiʼj xjal. Kyaj tqʼamaʼn Jesús qa atzun jlu tuʼn tbʼaj kyiʼj junjun xjal. Pero xi tqʼamaʼn kye t-xnaqʼtzbʼen tuʼn miʼn kytzaj xobʼ ex tuʼn kukx kyajbʼen te Jehová (Mat. 10:16, 17, 27, 28). ¿Tzeʼn onin kyiʼj tuʼn miʼn kytzaj xobʼ? Ex, ¿tzeʼn jaku tzʼel qkanoʼn tiʼj?

16. ¿Tzeʼn jaku txi qyekʼin te xjal tuʼn tyolin tiʼjju in nel tnikʼ tiʼj?

¹⁶ Qyekʼinx te xjal tzeʼn jaku yolin kyukʼil txqantl tiʼjju in nel tnikʼ tiʼj. Bʼalo e tzaj xobʼ t-xnaqʼtzbʼen Jesús tej kyxi samaʼn pakbʼal. Noqtzun tuʼnj, onin Jesús kyiʼj tej t-xi tqʼamaʼn kye tiʼ tuʼn t-xi kyqʼamaʼn ex alqe tuʼn kypakbʼan (Mat. 10:5-7). ¿Tzeʼn jaku tzʼel qkanoʼn tiʼj Jesús? Jaku tzʼel qkanoʼn tiʼj aj t-xi qqʼamaʼn te xjal jatumel jaku txi tzyet tuʼn tpakbʼan. Jun techel, jaku txi qqanin te qa ojtzqiʼn jun xjal tuʼn, aju taj tuʼn tel tnikʼ tiʼj jun xnaqʼtzbʼil toj Tyol Dios. Yajxitl, jaku qo onin tiʼj tuʼn tbʼaj tbʼinchaʼn junjun tyol tiʼj xnaqʼtzbʼil lu. Ex aj tkanet jun tbʼanel ambʼil quʼn, jaku kubʼ qxnaqʼtzaʼn tukʼil xjal tzeʼn jaku  bʼant tuʼn ex jaku tzʼajbʼen plaj quʼn «Aju in tzaj kyqʼamaʼn junjun xjal», ex «Aju in kubʼ kyxjelin junjun xjal», aju tkuʼx toj libro Tzalaja tiʼj tanqʼibʼila. Aj tbʼant jlu quʼn, qo onin tiʼj xjal tuʼn tyolin toj tumel ex tuʼn tajbʼen Tyol Dios tuʼn.

17. ¿Tzeʼn jaku tzʼajbʼen Mateo 10:19, 20, ex 29 a 31 quʼn tuʼn qonin tiʼj xjal tuʼn tok qeʼ tkʼuʼj tiʼj Jehová?

¹⁷ Qo onin tiʼj xjal tuʼn tok qeʼ tkʼuʼj tiʼj Jehová. Xi tqʼamaʼn Jesús kye t-xnaqʼtzbʼen qa kʼoniltoq Jehová kyiʼj tuʼnju kʼujlaʼn qe tuʼn (kjawil uʼjit Mateo 10:19, 20, 29-31). Qqʼamanx te xjal qa ax ikx kʼonil Jehová tiʼj. Jaku qo onin tiʼj tuʼn tok qeʼ tkʼuʼj tiʼj Jehová aj qnaʼn Dios tukʼil kyiʼj tiʼchaq taj tuʼn tbʼant tuʼn. In tzaj tqʼamaʼn ermano Franciszek jlu te Polonia: «Aju erman qʼon xnaqʼtzbʼil weye, kukx naʼn Dios kyiʼj tiʼchaq wajtoqe tuʼn tbʼant wuʼne. Tej tok nkeʼyine qa tzaj tzaqʼweʼn tnaʼj Dios tuʼn Jehová, ax ikx weye xi tzyet tuʼn nnaʼne Dios. Kubʼ nnaʼne qa onin Jehová wiʼje tej t-xi nqanine npermise toj waqʼune tuʼn nxiʼye kyoj chmabʼil ex kyoj nimaq chmabʼil».

18. ¿Tiʼ in kubʼ tnaʼn Jehová tiʼj tkyaqil aqʼuntl in bʼant kyuʼn qeju in che qʼon xnaqʼtzbʼil?

¹⁸ ¿Yajtzun qa mintiʼ jun xjal in qo qʼon xnaqʼtzbʼil te? ¿Jakupe qo onin tiʼj jun tuʼn tjaw aʼ twiʼ? Jaku. ¿Tzeʼn jaku bʼant quʼn? In bʼant quʼn aj qxiʼ qʼol xnaqʼtzbʼil kyukʼil junjuntl erman. Tuʼn jlu in nel qnikʼ tiʼj qa in ximen Jehová kyiʼj xjal in che xnaqʼtzan tiʼj Tyol Dios. Ax ikx, in nok tqʼoʼn toklen tkyaqil aqʼuntl in bʼant quʼn tuʼn qonin kyiʼj xjal tuʼn kyok laqʼeʼ ttxlaj ex tuʼn jlu kʼujlaʼn qoʼ tuʼn (Is. 52:7).