XNAQʼTZBʼIL 26
In nonin tkʼujlabʼil Jehová qiʼj tuʼn miʼn qtzaj xobʼ
«Ate Qman at wukʼile, mlay chin xobʼe» (SAL. 118:6).
BʼITZ 105 At tkʼujlabʼil Dios
AJU KʼELEL QNIKʼ TIʼJ *
1. ¿Alkyeqe tiʼchaq jaku qo tzaj xobʼ kyuʼn?
QO XIMEN tiʼjju o bʼaj kyiʼj junjun erman. Tajtoq Néstor ex María aju t-xuʼjil, tuʼn kyxiʼ pakbʼal jatumel kyajtoq erman onbʼil. * Pero tuʼn tbʼant jlu kyuʼn, iltoq tiʼj tuʼn kyanqʼin tukʼil nya nim tiʼchaq kye. Ex e tzaj xobʼ tej kyximen tiʼj jlu. Kubʼ kyximen qa mlaytoq che tzalaj aj kyanqʼin tukʼil nya nim tiʼchaq. Atzunte Biniam, in nanqʼin toj jun tnam jatumel mintiʼ qʼoʼn ambʼil qe tuʼn qajbʼen te Jehová. Tej tok te testigo de Jehová, el tnikʼ tiʼj qa ax ikx te kʼelel ikʼun. In tzajtoq xobʼ tuʼn jlu, pero at juntl tiʼ mas tzaj xobʼ tuʼn. Tzaj xobʼ tej t-ximen tiʼj tiʼ kymod toj tja kbʼel kyyekʼin aj tok kybʼiʼn alkye tokslabʼil at. Ex te mankbʼil, qo yolil tiʼjju bʼaj tiʼj Valeria. Tzaj qʼamaʼn te qa attoq cáncer tiʼj ex kwesttoq tuʼn tqʼanit. Tajtoq Valeria tuʼn t-xi tnimen aju in tzaj tqʼamaʼn Tyol Dios tiʼj chikʼ. Tuʼntzunju, kwest kanet jun doctor tuʼn, aju jaku tzʼel tnikʼ tiʼj tiquʼn nya taj tuʼn tok chikʼ tiʼj. Tuʼn jlu tzaj xobʼ.
2. ¿Tiquʼn nim toklen tuʼn tok qxqʼuqin qibʼ tuʼn miʼn qtzaj xobʼ?
2 ¿Ope tzaj xobʼ teya kyuʼn junjun tiʼchaq ik tzeʼn kye erman ma qo yolin kyiʼj? Nim qe o bʼaj jlu qiʼj. Jaku tzaj nim qxobʼil qa mintiʼ ma tzʼok qxqʼuqin qibʼ ex tuʼn jlu jaku kubʼ qbʼinchaʼn jun tiʼ jaku tzaj tiʼn nya bʼaʼn tiʼj qamiwbʼil tukʼil Jehová. Atzun jlu taj Satanás tuʼn tbʼant quʼn. Taj tuʼn qtzaj xobʼ tuʼntzun miʼn txi qbʼiʼn qe tkawbʼil Jehová, ik tzeʼn tuʼn qpakbʼan tiʼj tbʼanel tqanil (Apoc. 12:17). At tipumal Satanás ex puro nya bʼaʼn tmod, pero at jun tiʼ jaku tzʼonin qiʼj tuʼn miʼn tkubʼ qiʼj tuʼn. ¿Tiʼ jaku tzʼonin qiʼj?
3. ¿Tiʼ jaku tzʼonin qiʼj tuʼn miʼn tkubʼ qiʼj tuʼn xobʼajil?
3 Mlay qo tzaj xobʼ tuʼn Satanás qa in nok qeʼ qkʼuʼj tiʼj qa at Jehová qukʼil ex qa kʼujlaʼn qoʼ tuʼn (Sal. 118:6). Jun techel, ikʼ aj tzʼibʼil tiʼj Salmo 118 kyoj nim nya bʼaʼn. Attoq nim aj qʼoj tiʼj, kyxol qe jlu ateʼ junjun ten nim kyipumal (versículo 9 ex 10). At maj ok tilil tuʼn tuʼn miʼn tkubʼ tiʼj kyuʼn txqantl (versículo 13). Ax ikx, tzaj kawin tuʼn Jehová (versículo 18). Maske bʼaj jlu tiʼj, tqʼama jlu toj jun bʼitz: «Mlay chin xobʼe». ¿Tiquʼn mintiʼ tzaj xobʼ? Tuʼnju ojtzqiʼntoq tuʼn qa kukx kʼujlaʼn tuʼn Jehová maske otoq tzaj kawin tuʼn. Ok qeʼ tkʼuʼj salmista tiʼj qa kukx kʼonil Jehová tiʼj noq tiʼxku jakutoq tzʼok weʼ twitz (Sal. 118:29).
4. ¿Alkyeqe xobʼajil jaku kubʼ kyiʼj quʼn qa ma tzʼok qeʼ qkʼuʼj tiʼj qa kʼujlaʼn qoʼ tuʼn Jehová?
4 Teyele junjun qe il tiʼj tuʼn tok qeʼ qkʼuʼj tiʼj qa kʼujlaʼn qoʼ tuʼn Jehová. Qa ma bʼant jlu quʼn, kʼonil qiʼj tuʼn miʼn qtzaj xobʼ te oxe tiʼ. Tnejel, aj qtzaj xobʼ tuʼnju kwest tuʼn kykʼaʼchit toj qja. Tkabʼin, aj qtzaj xobʼ kywitz xjal. Ex toxin, aj qtzaj xobʼ te kamik. Aqeju erman ma qo yolin kyiʼj toj tnejel taqikʼ, mintiʼ kubʼ kyiʼj tuʼn xobʼajil tuʼnju ok qeʼ kykʼuʼj tiʼj qa kʼujlaʼn qe tuʼn Jehová.
AJ QTZAJ XOBʼ TUʼN KYKʼAʼCHIT TOJ QJA
In naqʼunan jun ermano tukʼil tkʼwal tuʼn kytzyet pescad tuʼntzun tkanet twi kywa. (Qʼonka twitza tiʼj taqikʼ 5).
5. ¿Alkye junjun tiʼ jaku tzaj bʼaj kykʼuʼj wibʼaj toj ja tiʼj? (Qʼonka twitza tiʼj tilbʼilal tok tiʼj t-xkʼomil).
5 In nok tilil kyuʼn wibʼaj toj ja tuʼn t-xi kyqʼoʼn aju at tajbʼen kye kyfamilia (1 Tim. 5:8). Qa a jlu in bʼaj tiʼja, bʼalo in tzaj bʼaj tkʼuʼja aj t-ximana tiʼj qa jaku tzʼel qʼiʼn taqʼuna akux at pandemia. Bʼalo in tzaj tbʼisa aj t-ximana tiʼj qa mlay che kʼaʼchet toj tjaya ex qa mlay chjet alquiler tuʼna. Ex in kubʼlo t-ximana qa aj tel qʼiʼn taqʼuna, mlay kanet juntl tuʼna. Ax ikx, bʼalo in kubʼ tnaʼna qa mlay tzʼanqʼina tukʼil nya nim tiʼchaq ik tzeʼn bʼaj tiʼj Néstor ex María. Tuʼnju in najbʼen jlu tuʼn Satanás, ateʼ nim tmajen Jehová o kyaj kytzaqpiʼn tuʼn kyajbʼen te.
6. ¿Tiʼ taj Satanás tuʼn t-xi qnimen?
6 Taj Satanás tuʼn t-xi qnimen qa mintiʼ in ximen Jehová qiʼj ex qa mlay tzʼok tqʼoʼn twiʼ qiʼj aj t-xi qqanin onbʼil te tuʼn kykʼaʼchit toj qja. Qa ma txi qnimen jlu, kbʼel qximen qa mas bʼaʼn tuʼn tok qqʼoʼn qwiʼ tiʼj qaqʼun maske ya mlay txi qbʼiʼn qe tkawbʼil Jehová.
7. ¿Tiʼ in tzaj tqʼamaʼn Jesús qe?
7 Ni jun xjal jaku pon tojtzqibʼil tiʼj Jehová ik tzeʼn te Jesús. Tuʼntzunju, in tzaj tqʼamaʼn jlu qe: «Porke ate Kymane ojtzqiʼmajtl tuʼn alkyeju at tajbʼenxix kyeye, naʼnxtoq t-xi kyqanine te» (Mat. 6:8). Ex ojtzqiʼn tuʼn Jesús qa bʼantni tten Jehová tuʼn ttzaj tqʼoʼn aju at tajbʼen qe. Qkyaqilx atoʼ kyxol toj tja Jehová. Tuʼnju a Jehová Mambʼaj, jaku tzʼok qeʼ qkʼuʼj tiʼj qa tzul tqʼoʼn aju at tajbʼen qe ik tzeʼn in tzaj tqanin kye mambʼaj toj 1 Timoteo 5:8.
Ktzajel tqʼoʼn Jehová aju at tajbʼen qe ex jaku che ajbʼen erman tuʼn. (Qʼonka twitza tiʼj taqikʼ 8). *
8. a) ¿Tiʼ jaku tzʼonin qiʼj tuʼn miʼn qtzaj xobʼ tuʼn kykʼaʼchit toj qja? (Mateo 6:31-33). b) ¿Tzeʼn jaku tzʼel qkanoʼn techel in kubʼ tqʼoʼn mejebʼleʼn in netz yekʼin toj foto?
8 Qa qʼuqli qkʼuʼj tiʼj qa kʼujlaʼn qoʼ tuʼn Jehová ex qe toj qja, ax ikx kʼokel qeʼ qkʼuʼj tiʼj qa ktzajel tqʼoʼn aju at tajbʼen qe (kjawil uʼjit Mateo 6:31-33). In tzaj tqʼoʼn Jehová aju at tajbʼen qe tukʼil kʼujlabʼil ex at maj mas in tzaj tqʼoʼn twitzju at tajbʼen qe. Tej tkubʼ tbʼinchaʼn Txʼotxʼ, nya oʼkx tzaj tqʼoʼn aju at tajbʼen qe noq tuʼn qanqʼin. Sino kubʼ tbʼinchaʼn nim tiʼchaq tukʼil kʼujlabʼil tuʼntzun qtzalaj tiʼj (Gén. 2:9). Qatzun oʼkx in kanet aju at tajbʼen qe toj jun qʼij, bʼaʼn tuʼn t-xi qqʼoʼn chjonte te Jehová tuʼnju in kanet aju at tajbʼen qe. Kukx in qo ok t-xqʼuqin Jehová tuʼnju in tzaj tqʼoʼn qe «aju in ajbʼen tkyaqil qʼij» (Mat. 6:11). Ax ikx, bʼaʼn tuʼn qximen tiʼj qa mas nim kʼiwlabʼil in tzaj tqʼoʼn Jehová qe toj ambʼil jaʼlo kywitz qe tiʼchaq mintiʼ in che kanet quʼn. Ex toj ambʼil tzul ktzajel tqʼoʼn qchwinqlal te jumajx. Atzun jlu ok tkeʼyin Néstor ex María (Is. 65:21, 22).
9. ¿Tiʼ xnaqʼtzbʼil jaku tzʼel qiʼn tiʼj techel in kubʼ tqʼoʼn Néstor ex María?
9 In che tzalajtoq Néstor ex María tiʼj jun tbʼanel kyanqʼibʼil toj tnam te Colombia. In tzaj kyqʼamaʼn jlu: «Qajtoqe tuʼn qanqʼine tukʼil nya nim tiʼchaq qeye tuʼntzun qonine mas tiʼj pakbʼabʼil, pero in qo tzajtoq xobʼe tuʼn tbʼant jlu quʼne. Ex kubʼ qximane qa mlaytoq qo tzalaje». ¿Tiʼ bʼant kyuʼn tuʼn miʼn kytzaj xobʼ? E ximen kyiʼj kʼiwlabʼil otoq tzaj tqʼoʼn Jehová kye. Tuʼnju ok qeʼ kykʼuʼj tiʼj qa kxqʼuqil Jehová kyiʼj, kyaj kytzaqpiʼn kyaqʼun, xi kykʼayin kyja ex i eʼx ajbʼel toj juntl lugar jatumel kyaj erman onbʼil toj pakbʼabʼil. ¿Tiʼ kubʼ kynaʼn tuʼnju bʼant jlu kyuʼn? Tqʼamatl Néstor jlu: «O tzʼok qqʼoʼne qwitze tiʼj qa ax tok in japun kywi qe yol tkuʼx toj Mateo 6:33. Kukx o ten aju at tajbʼen qeye ex mas in qo tzalaje».
AJ QTZAJ XOBʼ KYWITZ XJAL
10. ¿Tiquʼn mintiʼ tuʼn qjaw labʼin tiʼj qa ateʼ xjal in che tzaj xobʼ kywitz txqantl xjal?
10 Atxix toj ambʼil ojtxe, kyuʼnx xjal in nok kybʼinchaʼn nya bʼaʼn kyiʼj juntl (Ecl. 8:9). Jun techel, ateʼ junjun nya toj tumel in najbʼen kyoklen kyuʼn, in che bʼiyen, in che xmayin ex in nok kybʼinchaʼn nya bʼaʼn kyiʼj kyukʼil toj escuela moqa kyiʼj toj kyja. Tuʼntzunju, in tzaj xobʼ jun xjal twitz juntl. ¿Tzeʼn in najbʼen jlu tuʼn Satanás?
11, 12. Aj qtzaj xobʼ kywitz xjal, ¿tzeʼn in najbʼen jlu tuʼn Satanás?
11 In nok tilil tuʼn Satanás tuʼn qtzaj xobʼ kywitz xjal tuʼntzun miʼn qpakbʼan ex tuʼn miʼn kyjapun junjuntl tkawbʼil Jehová quʼn. O tzʼok tilil tuʼn Satanás tuʼn tel kyiʼn aj kawil ambʼil qe tuʼn qpakbʼan ex tuʼn qel ikʼun kyuʼn (Luc. 21:12; Apoc. 2:10). Tuʼnju ateʼ xjal tjaqʼ tkawbʼil Satanás, in xi kyqʼamaʼn nya ax tok tqanil kyiʼj testigo de Jehová moqa in bʼaj kytzpetsaʼn junjun tqanil kyiʼj. Aj t-xi kynimen xjal jlu, in che ok ten xmayil qiʼj, in qo el kyikʼun, axpe ikx jaku tzʼok kybʼinchaʼn nya bʼaʼn qiʼj (Mat. 10:36). Mintiʼ in qo jaw labʼin aj tbʼant jlu tuʼn Satanás, tuʼnju ax jlu bʼant tuʼn toj tnejel syent abʼqʼi (Hech. 5:27, 28, 40).
Kukx qo okel kʼujlaʼn tuʼn Jehová, axpe ikx qa ma qo el ikʼun kyuʼn toj qja. (Qʼonka twitza kyiʼj taqikʼ 12 a 14). *
12 Pero nya oʼkx in najbʼen ikʼbʼil kyuʼn aj kawil tuʼn Satanás tuʼn qtzaj xobʼ. Ax ikx, in nok tilil tuʼn tuʼn kytzaj xobʼ junjun xjal aj kyximen tiʼj tiʼ kymod toj kyja kbʼel kyyekʼin qa ma che ok te testigo de Jehová. Ateʼ junjun mas in che tzaj xobʼ tuʼn jlu twitzju qa ma che ok bʼyoʼn. Kykyaqilx erman in nok kykʼujlaʼn qe toj kyja ex kyaj tuʼn tok kyojtzqiʼn Jehová ex tuʼn tok kykʼujlaʼn. Tuʼntzunju, in tzaj kybʼis aj kyyolin toj kyja nya bʼaʼn tiʼj Jehová ex kyiʼj tmajen. Noqtzun tuʼnj, at maj in chʼexpaj kyximbʼetz toj qja aj tbʼet ambʼil. ¿Yajtzun qa at jun toj qja nya taj tuʼn tok tbʼiʼn axix tok? ¿Tiʼ jaku bʼant quʼn toj ambʼil lu?
13. ¿Tiquʼn nim toklen tuʼn tok qeʼ qkʼuʼj tiʼj qa kʼujlaʼn qoʼ tuʼn Jehová aj qel ikʼun kyuʼn toj qja? (Salmo 27:10).
13 Aj tjaw quʼjin qe yol tkuʼx toj Salmo 27:10 (uʼjinktza), in chewix qanmi kyuʼn. Aj qximen tiʼj qa kʼujlaʼn qoʼ tuʼn Jehová, kʼokel qeʼ qkʼuʼj tiʼj qa kʼonil qiʼj maske in qo el ikʼun kyuʼn txqantl. Ax ikx, jaku tzʼok qeʼ qkʼuʼj tiʼj qa ktzajel tkʼiwlaʼn qoʼ qa kukx ma tzikʼx quʼn. Ktzajel tqʼoʼn Jehová aju at tajbʼen qe, kʼonil qiʼj tuʼn qtzalaj ex tuʼn kukx tten qamiwbʼil tukʼil, ex mas tbʼanel kbʼantel tuʼn twitz alkyexku xjal. Atzun jlu el tnikʼ Biniam tiʼj, aju ma qo yolin tiʼj toj taqikʼ jun.
14. ¿Tiʼ xnaqʼtzbʼil jaku tzʼel qiʼn tiʼjju bʼaj tiʼj Biniam?
14 Kubʼ t-ximen Biniam tuʼn tok te testigo de Jehová maske ojtzqiʼn tuʼn qa jaku tzʼel ikʼun kyuʼn aj kawil. Tzaj tqʼamaʼn jlu: «Mas nim ikʼbʼil in nok weʼye twitz kyuʼn aj kawil twitzju otoq kubʼ nximane. Pero mastoq in chin xobʼe tuʼn wel ikʼune kyuʼn toj njaye. Tzaj bʼaj nkʼuʼje tej tkubʼ nximane qa ktzajel tbʼis nmane ex qa ya mlay tzʼok qʼoʼn woklene kyuʼn toj njaye aj woke te testigo de Jehová». ¿Tiʼ onin tiʼj Biniam tuʼn tkubʼ tiʼj xobʼajil tuʼn? Onin tiʼj tej t-ximen tiʼj qa kʼujlaʼn tuʼn Jehová ex qa in xqʼuqin kyiʼj qeju in nok kykʼujlaʼn te. Tqʼamatl Biniam jlu: «In ximane tiʼj tzeʼn o tzʼonin Jehová kyiʼj erman in che el ikʼun kyuʼn txqantl, kyiʼj qeju mintiʼ in kanin kypwaq ex aj tok qʼoj kyuʼn xjal. Ojtzqiʼntoq wuʼne qa chin tzajeltoq kʼiwlaʼne tuʼn Jehová qa ma tzʼok qeʼ nkʼuʼje tiʼj. Nim maj in tzyete kyuʼn polisiy ex in nok bʼyoʼne kyuʼn. Kyoj ambʼil lu, ok nqʼoʼne nwitze tiʼj qa in nonin Jehová qiʼj qa kukx ma qo ten tzʼaqli twitz». Ok tqʼoʼn Biniam Jehová te Tman, atzun qe erman e ok tqʼoʼn ik tzeʼn qe toj tja.
AJ QTZAJ XOBʼ TE KAMIK
15. ¿Tiquʼn in qo tzaj xobʼ aj qximen tiʼj kamik?
15 In tzaj tqʼamaʼn Tyol Dios qa in nok kamik te jun aj qʼoj qiʼj (1 Cor. 15:25, 26). In tzaj bʼaj qkʼuʼj aj qximen tiʼj kamik, mas qa at jun yabʼil qiʼj moqa tiʼj jun toj qja. ¿Tiquʼn in qo tzaj xobʼ aj qximen tiʼj kamik? Tuʼnju o qo kubʼ tbʼinchaʼn Jehová tuʼn qanqʼin te jumajx (Ecl. 3:11, TNM). Noqtzun tuʼnj, aj qtzaj xobʼ chʼin te kamik, jaku tzʼonin qiʼj. Jun techel, jaku tzʼonin qiʼj tuʼn tok qxqʼuqin qwa, tuʼn qbʼinchan ejercicio, tuʼn miʼn ttzaj qiʼn nya bʼaʼn qiʼj ex tuʼn qxiʼ tukʼil doctor moqa tuʼn t-xi qkʼaʼn qʼanbʼil qa il tiʼj.
16. ¿Tzeʼn in najbʼen kamik tuʼn Satanás tuʼn qtzaj xobʼ?
16 Ojtzqiʼn tuʼn Satanás qa in nok qqʼoʼn toklen qchwinqlal. Tuʼntzunju, in tzaj tqʼamaʼn qa jaku txi qbʼinchaʼn noq alkyexku tiʼ noq tuʼn qanqʼin, axpe ikx tuʼn tkyaj qkolin qamiwbʼil tukʼil Jehová (Job 2:4, 5). Pero nya ax tok aju in tzaj tqʼamaʼn. Tuʼnju a «tajaw kamik», in nok tilil tuʼn tuʼn qtzaj xobʼ tuʼntzun tel qpan qibʼ tiʼj Jehová (Heb. 2:14, 15). At maj in che ajbʼen xjal tuʼn tuʼn ttzaj kyqʼamaʼn qe qa jaku qo kubʼ bʼyoʼn qa mintiʼ ma kyaj qtzaqpiʼn qokslabʼil. Moqa aj ttzaj jun yabʼil qiʼj, jakulo tzʼok tilil tuʼn tuʼn qel tpaʼn tiʼj Jehová. Ax ikx, jaku tzaj kyqʼamaʼn doctor moqa qe toj qja tuʼn tok qqʼoʼn chikʼ qiʼj, pero in tzaj tqʼamaʼn Tyol Dios qa nya bʼaʼn jlu. Ex jaku tzʼok tilil tuʼn jun xjal tuʼn tajbʼen jun qʼanbʼil quʼn maske nya bʼaʼn in nela toj twitz Dios.
17. Ik tzeʼn in tzaj tqʼamaʼn Romanos 8:37 a 39, ¿tiquʼn mintiʼ tuʼn qtzaj xobʼ te kamik?
17 Ni jun qe taj tuʼn tkyim, pero qa ma bʼaj jlu qiʼj, kukx qo okel kʼujlaʼn tuʼn Jehová (kjawil uʼjit Romanos 8:37-39). Kukx naʼn qe tamiw Jehová tuʼn maske o che kyim (Luc. 20:37, 38). Ex taj tuʼn t-xi tqʼoʼn juntl maj kychwinqlal (Job 14:15). O tzaj tqʼoʼn Jehová jun tbʼanel chojbʼil tuʼntzun ttzaj tqʼoʼn qchwinqlal te jumajx (Juan 3:16). Ojtzqiʼn quʼn qa kʼujlaʼnxix qoʼ tuʼn ex qa in xqʼuqin qiʼj. Tuʼntzunju, mintiʼ in nel qpan qibʼ tiʼj maske in tzaj yabʼil qiʼj moqa in tzaj qʼamaʼn qe qa jaku qo kubʼ bʼyoʼn. Sino in nok tilil quʼn tuʼn qjyon onbʼil tukʼil, tuʼn ttzaj tqʼoʼn qnabʼil ex qipumal. Atzun jlu bʼant tuʼn Valeria ex tchmil (Sal. 41:3).
18. ¿Tiʼ xnaqʼtzbʼil jaku tzʼel qiʼn tiʼj techel kyaj tqʼoʼn Valeria?
18 Tej qʼiʼntoq 35 abʼqʼi tuʼn Valeria, el kynikʼ doctor tiʼj qa attoq cáncer tiʼj ex mintiʼxix ojtzqiʼn yabʼil lu kyuʼn txqantl. Qo yolin tiʼj tzeʼn onin tkʼujlabʼil Jehová tiʼj tuʼn miʼn ttzaj xobʼ twitz kamik. Tqʼama Valeria jlu: «Jun rat chʼexpaj qanqʼibʼile tej ttzaj qʼamaʼn qa attoq cáncer wiʼje. Jakutoq chin kyaj anqʼine qa ma tzʼok jun operación wiʼje. In xiʼye kyukʼil nim doctor, pero nya kyajtoq tuʼn wok operarine qa mintiʼ ma tzʼajbʼen chikʼ kyuʼn. In tzaj xobʼe, pero tuʼnju waje tuʼn nnimane te Dios, mintiʼ kubʼ nximane tuʼn tok chikʼ wiʼje. Toj tkyaqil wanqʼibʼile otoq kubʼ tyekʼin Jehová tkʼujlabʼil wiʼje. Toj ambʼil lu..., aʼyine tuʼn tkubʼ nyekʼine nkʼujlabʼile tiʼj. Tej ttzaj qʼamaʼn nya bʼaʼn tqanil weye, kubʼ nnaʼne qa ten mas wipumale tuʼntzun miʼn tkubʼ wiʼje tuʼn Satanás. Wajtoqe tuʼn ttzalaj Jehová wiʼje. Tej tikʼ ambʼil, ok operación wiʼje ex mintiʼ ajbʼen chikʼ kyuʼn doctor. Kukx in tzaj yabʼil wiʼje, pero kukx in tzaj tqʼoʼn Jehová aju at tajbʼen qeye. Jun techel, toj seman tej naʼmxtoq ttzaj qʼamaʼn weye qa attoq cáncer wiʼje, otoq kubʼ qxnaqʼtzaʼne toj chmabʼil aju xnaqʼtzbʼil ‹Afrontemos con valentía los golpes de la vida›. * Tzaj qʼuqbʼaʼn qkʼuʼje tuʼn xnaqʼtzbʼil lu ex nimku maj jaw quʼjine. Tuʼnju e onin xnaqʼtzbʼil ik tzeʼn jlu qiʼje ex tuʼnju e bʼant junjun tiʼchaq quʼne toj qajbʼebʼile te Jehová, onin qiʼje tuʼn miʼn ttzaj bʼaj qkʼuʼje ex tuʼn tel qnikʼe tiʼj tiʼ kbʼantel quʼne».
QQʼONK TILIL TUʼN MIʼN QTZAJ XOBʼ
19. ¿Tiʼ kbʼajel toj chʼintl ambʼil?
19 Twitz tkyaqil Txʼotxʼ, ateʼ nim erman o che ex kywitz nim nya bʼaʼn ex o kubʼ tiʼj Tajaw il kyuʼn noq tuʼn tonbʼil Jehová (1 Ped. 5:8, 9). Ax ikx teya jaku bʼant jlu tuʼna. Toj chʼintl ambʼil, kxel tqʼamaʼn Jehová te Jesús ex kye qeju che kawil tukʼil tuʼn tkubʼ kyxiten «tkyaqil taqʼunbʼen tajaw il» (1 Juan 3:8). Aj tbʼaj jlu, kʼokel kyqʼoʼn tmajen Jehová kywitz tiʼj tzeʼn kjapunel kywi yol lu: «Mlay xobʼa, ex mlay tzaj juntl maj xobʼajil tiʼja» (Is. 54:14; Miq. 4:4). Akux in pon qʼij lu, bʼaʼn tuʼn tok tilil quʼn tuʼn miʼn qtzaj xobʼ.
20. ¿Tiʼ jaku tzʼonin qiʼj tuʼn miʼn qtzaj xobʼ?
20 Nim toklen tuʼn tok qeʼ qkʼuʼj tiʼj qa kʼujlaʼn qoʼ tuʼn Jehová ex qa in xqʼuqin qiʼj. ¿Tiʼ jaku tzʼonin qiʼj tuʼn tbʼant jlu quʼn? Jaku tzʼonin qiʼj aj qximen tiʼj tzeʼn o xqʼuqin Jehová kyiʼj tmajen ex aj qyolin tiʼj jlu kyukʼil txqantl. Ax ikx, bʼaʼn tuʼn ttzaj qnaʼn tzeʼn o tzʼonin Jehová qiʼj tej qikʼ kyoj ambʼil kwest. Tuʼn tonbʼil Jehová, mlay qo tzaj xobʼ (Sal. 34:4).
BʼITZ 129 Kukx tuʼn tikʼx quʼn
^ Toj tumel aj qtzaj xobʼ tuʼnju jaku tzʼonin qiʼj tuʼn tok qxqʼuqin qibʼ kyiʼj nya bʼaʼn. Pero qa ma tzaj nimxix qxobʼil, jaku tzaj tiʼn nim nya bʼaʼn qiʼj. ¿Tiquʼn? Tuʼnju jaku tzʼajbʼen jlu tuʼn Satanás tuʼn tjaw qjyoʼn jun nya bʼaʼn qbʼe. Tuʼntzunju, nim toklen tuʼn tok tilil quʼn tuʼn miʼn qtzaj xobʼ. Toj xnaqʼtzbʼil lu, kʼelel qnikʼ tiʼj qa mlay qo tzaj xobʼ qa ma tzʼok qeʼ qkʼuʼj tiʼj qa at Jehová qukʼil ex qa kʼujlaʼn qoʼ tuʼn.
^ Ma che kubʼ chʼixpet junjun bʼibʼaj.
^ Qʼonka twitza tiʼj La Atalaya te 15 te octubre te 2012, t-xaq 7 a 11.
