1. ¿Tiʼ in tzaj ttziyen Jehová kye qeju in najtz tiʼj kyanmi?

 A JEHOVÁ Bʼinchal qe, in nok te Qjwes ex in che tzaj tqʼoʼn qe ley qe. Pero ax ikx, in nok te Qtat ex kʼujlaʼn qoʼ tuʼn (Sal. 100:3; Is. 33:22). Tuʼntzunju, qa ma kubʼ qbʼinchaʼn il twitz ex qa ma tzʼajtz tiʼj qanmi, nya oʼkx jaku kubʼ tnajsaʼn qil, sino taj tuʼn tbʼant tuʼn (Sal. 86:5). Ajbʼen profeta Isaías tuʼn Jehová tuʼn ttzaj ttziyen jlu qe: «Maske kyaqxix keʼyin kyile wen, jaku tzʼok wuʼne te saq ik tzaʼn ttxa cheʼw» (Is. 1:18).

2. ¿Tiʼ il tiʼj tuʼn tbʼant quʼn qa qaj tuʼn tten mujbʼabʼil qxolx?

² Tuʼnju qkyaqilx aj il qoʼ, jaku tzʼok qbʼinchaʼn jun nya bʼaʼn tiʼj juntl moqa jaku txi qqʼamaʼn jun tiʼ nya toj tumel te (Sant. 3:2). Pero nya tuʼn jlu mlay che kanet tbʼanel qamiw. Jaku che kanet tbʼanel qamiw qa ma kubʼ qnajsaʼn qil qxolx (Prov. 17:9; 19:11; Mat. 18:21, 22). Taj Jehová tuʼn t-xi qbʼinchaʼn kyiʼj nya bʼaʼn in che tzaj qxolx (Col. 3:13, TNM). At nim tiquʼn tuʼn tbʼant jlu quʼn tuʼnju nimku maj in kubʼ tnajsaʼn Jehová qil (Is. 55:7).

3. ¿Tiʼ kʼelel qnikʼ tiʼj toj xnaqʼtzbʼil lu?

³ Toj xnaqʼtzbʼil lu, kʼelel qnikʼ tiʼj tzeʼn jaku kubʼ qnajsaʼn kyil txqantl ik tzeʼn in bʼant tuʼn Jehová maske aj il qoʼ. ¿Alkyeqe il nim toklen tuʼn t-xi qqʼamaʼn kye ansyan?  ¿Tiquʼn taj Jehová tuʼn tkubʼ qnajsaʼn qil qxolx? ¿Ex tiʼ xnaqʼtzbʼil jaku tzʼel qiʼn kyiʼj erman tzaj nya bʼaʼn kyiʼj tuʼn il bʼant kyuʼn junjuntl?

4. a) ¿Tiʼ il tiʼj tuʼn tbʼant tuʼn jun okslal o kubʼ tbʼinchaʼn jun matij il? b) ¿Tiʼ kyoklen ansyan o txi qʼoʼn?

⁴ Aj tkubʼ tbʼinchaʼn jun okslal jun matij il, il tiʼj tuʼn t-xi qʼamet kye ansyan. In che kanet junjun techel kyiʼj matij il quʼn toj 1 Corintios 6:9 ex 10. Aj tkubʼ tbʼinchaʼn jun okslal jun matij il ik tzeʼn jlu, in nikʼ kyibʼaj tkawbʼil Dios. Qa ma bʼant jlu tuʼn, il tiʼj tuʼn tnaʼn Dios tuʼn t-xi tqanin najsam te Jehová ex il tiʼj tuʼn tyolin kyukʼil ansyan (Sal. 32:5; Sant. 5:14). ¿Tiʼ kyoklen ansyan o txi qʼoʼn? Oʼkx Jehová at toklen tuʼn tkubʼ tnajsaʼn til jun xjal te jumajx ex in bʼant jlu tuʼn noq tuʼn chojbʼil xi tqʼoʼn Tkʼwal. * Noqtzun tuʼnj, o txi tqʼoʼn Jehová kyoklen ansyan tuʼn tel kynikʼ tiʼj qa kʼelex expulsarin jun okslal moqa miʼn (1 Cor. 5:12). Tuʼn tel kynikʼ tiʼj jlu, in najbʼen Tyol Dios kyuʼn ex in che ximen kyiʼj xjel ik tzeʼn jlu: ¿Kubʼpe t-ximen erman tuʼn tkubʼ tbʼinchaʼn il? ¿Okpe tilil tuʼn tuʼn tkubʼ tewin? ¿Kubʼpe tbʼinchaʼn il toj nim ambʼil? Ex aju mas nim toklen, ¿in kubʼpe tyekʼin qa ax tok o tzʼajtz tiʼj tanmi? ¿Atpe yekʼbʼil tiʼj qa o kubʼ tnajsaʼn Jehová til? (Hech. 3:19).

5. ¿Tzeʼn in nonin tiʼj kʼloj okslal aju in bʼant kyuʼn ansyan?

⁵ Aj tok kychmon kyibʼ ansyan tukʼil jun okslal otoq bʼinchan il, in nok tilil kyuʼn tuʼn t-xi bʼinchet tiʼj il ik tzeʼn otoq kubʼ t-ximen Jehová toj kyaʼj (Mat. 18:18). ¿Tzeʼn in nonin jlu tiʼj kʼloj okslal? Qa mintiʼ in najtz tiʼj tanmi okslal otoq bʼinchan il, in nex expulsarin ex tuʼn jlu in che ok xqʼuqit t-ẍneʼl Jehová (1 Cor. 5:6, 7, 11-13; Tito 3:10, 11). Ax ikx, jaku tzʼonin jlu tiʼj okslal otoq bʼinchan il tuʼn tajtz tiʼj tanmi ex tuʼn tkubʼ najsaʼn til tuʼn Jehová (Luc. 5:32). Qa in najtz tiʼj tanmi okslal, in che naʼn ansyan Dios tiʼj ex in xi kyqanin te Jehová tuʼn tten juntl maj tamiwbʼil tukʼil (Sant. 5:15).

6. Chikʼbʼantza qa jaku kubʼ tnajsaʼn Jehová til jun xjal otoq tzʼex expulsarin.

⁶ Qo ximen tiʼj qa mintiʼ in najtz tiʼj tanmi jun okslal aj tok tchmon tibʼ kyukʼil ansyan. Qa ikju, kʼelex expulsarin. Ex qa otoq tzikʼ kyibʼaj ley in che kubʼ qʼoʼn toj tnam, mlay che kolin ansyan tiʼj. O txi tqʼoʼn Jehová ambʼil kye aj kawil tuʼn tkubʼ kyqʼoʼn tkastiw alkyexku xjal in nikʼ tibʼaj ley maske otoq tzʼajtz tiʼj tanmi moqa miʼn (Rom. 13:4). Qa ma tzʼajtz tiʼj tanmi xjal ex in bʼaj tchʼexpuʼn t-ximbʼetz ex tmod, jaku kubʼ najsaʼn til tuʼn Jehová (Luc. 15:17-24). Ax ikx, jaku kubʼ tnajsaʼn Jehová til maske otoq kubʼ tbʼinchaʼn jun matij il (2 Crón. 33:9, 12, 13; 1 Tim. 1:15).

7. ¿Tiʼ t-xilen tuʼn tkubʼ qnajsaʼn kyil txqantl?

⁷ In chewix qanmi aj tel qnikʼ tiʼj qa nya aqoʼ qo kbʼel ximente qa kbʼel tnajsaʼn Jehová til jun xjal moqa miʼn. Pero at jun tiʼ jaku bʼant quʼn. ¿Tiʼ? Jaku kubʼ qximen qa kbʼel qnajsaʼn til jun xjal, toj juntl yol, tuʼn miʼn t-xi qkʼuʼn qʼoj toj qanmi tiʼj maske ma tzʼok tbʼinchaʼn nya bʼaʼn qiʼj. Bʼalo kwest jaku bʼant jlu quʼn maske in tzaj tqanin xjal najsam qe. Etz qʼamaʼn jlu toj uʼj Aju Xqʼuqil etz toj kastiy te 15 te  septiembre te 1994: «Aj tkubʼ qnajsaʼn til jun xjal, nya a t-xilen jlu qa bʼaʼn in nela toj qwitz aju otoq bʼant tuʼn. Sino a t-xilen te qe tuʼn tkyaj qqʼoʼn nya bʼaʼn toj tqʼabʼ Jehová. In nok Jehová te jun Jwes tzʼaqli tibʼaj tkyaqil tbʼinchbʼen ex kxel tbʼinchaʼn tiʼj nya bʼaʼn toj ambʼil mas bʼaʼn toj twitz». ¿Tiquʼn taj Jehová tuʼn tkubʼ qnajsaʼn kyil txqantl ex tuʼn tkyaj qqʼoʼn nya bʼaʼn toj tqʼabʼ, toj juntl yol tuʼn tok qeʼ qkʼuʼj tiʼj qa kxel tbʼinchaʼn aju tzʼaqli?

8. ¿Tzeʼn in kubʼ qyekʼin qa in xi qqʼoʼn chjonte tiʼj qʼaqʼbʼil tkʼuʼj Jehová?

⁸ Aj tkubʼ qnajsaʼn kyil txqantl, in kubʼ qyekʼin qa in xi qqʼoʼn chjonte tiʼj qʼaqʼbʼil tkʼuʼj Jehová. Toj jun txʼolbʼabʼil, ok tmojbʼaʼn Jesús Jehová tukʼil jun patrón kubʼ tnajsaʼn nim tkʼas jun majen. Atzun te majen lu, attoq tkʼas jun xjal tukʼil ex nya nim, pero mintiʼ tzaj qʼaqʼin tkʼuʼj tiʼj (Mat. 18:23-35). ¿Tiʼ tajtoq Jesús tuʼn tel qnikʼ tiʼj? Tajtoq tuʼn tel qnikʼ tiʼj qa jaku kubʼ qnajsaʼn kyil txqantl qa ax tok in xi qqʼoʼn chjonte tiʼj qʼaqʼbʼil tkʼuʼj Jehová in kubʼ tyekʼin qiʼj (Sal. 103:9). Ma tzikʼ nim abʼqʼi, yolin jun uʼj Xqʼuqil etz toj kastiy tiʼj xnaqʼtzbʼil lu. Tqʼama uʼj qa maske jaku kubʼ qnajsaʼn nim maj kyil txqantl, mlayx tzʼok qmojbʼaʼn jlu tukʼilju «qʼaqʼbʼil tkʼuʼj Jehová in kubʼ tyekʼin qiʼj aj tkubʼ tnajsaʼn qil noq tuʼn chojbʼil bʼant tuʼn Jesús».

9. ¿Alqiʼj in kubʼ tyekʼin Jehová qʼaqʼbʼil tkʼuʼj? (Mateo 6:14, 15).

⁹ Qa ma kubʼ qnajsaʼn kyil txqantl, kbʼel tnajsaʼn Jehová qil. In tzaj qʼaqʼin tkʼuʼj Jehová kyiʼj qeju in tzaj qʼaqʼin kykʼuʼj kyiʼj txqantl (Mat. 5:7; Sant. 2:13). Atzun jlu tajtoq Jesús tuʼn tel kynikʼ t-xnaqʼtzbʼen tiʼj tej t-xi tyekʼin kye tzeʼn tuʼn kynaʼn Dios (kjawil uʼjit Mateo 6:14, 15). Otoq yolin Jehová tiʼj jlu toj tqʼijlalil Job. Ikʼx nim nya bʼaʼn tuʼn Job tuʼnju nya toj tumel xi yolin Elifaz, Bildad ex Zofar te. Tuʼntzunju, xi tqʼamaʼn Jehová te Job tuʼn tnaʼn Dios kyiʼj. Tej tbʼant jlu tuʼn Job, tzaj kʼiwlaʼn tuʼn Jehová (Job 42:8-10).

10. ¿Tiquʼn jaku tzaj nya bʼaʼn qiʼj qa ma txi qkʼuʼn qʼoj? (Efesios 4:31, 32).

¹⁰ In tzaj nya bʼaʼn qiʼj aj t-xi qkʼuʼn qʼoj. In nok qʼoj ik tzeʼn jun iqtz ex taj Jehová tuʼn tel qin qibʼaj (kjawil uʼjit Efesios 4:31, 32). In tzaj tqʼamaʼn jlu qe: «Kolinxa qʼoj ex kolinxa tuʼn ttzaj tloʼch tkʼuʼja» (Sal. 37:8). Tbʼanel qa ma txi qbʼiʼn consej lu tuʼnju jaku tzaj yabʼil qiʼj qa ma txi qkʼuʼn qʼoj (Prov. 14:30). Qa ma txi qkʼuʼn qʼoj tiʼj jun xjal, in nok jlu ik tzeʼn aj t-xi qkʼaʼn veneno tuʼnju qiʼjx in tzaj nya bʼaʼn. Tuʼntzunju, aj tkubʼ qnajsaʼn kyil txqantl, qiʼjx kʼonil jlu (Prov. 11:17). Qa ma bʼant jlu quʼn, kbʼel qnaʼn tzalajbʼil ex kukx jaku qo ajbʼen te Jehová.

11. ¿Tiʼ in tzaj tqʼamaʼn Tyol Dios tiʼjju tuʼn taj qqʼoʼn t-xel nya bʼaʼn? (Romanos 12:19-21).

¹¹ Miʼn tzʼaj qqʼoʼn t-xel nya bʼaʼn, bʼaʼn tuʼn tkyaj qqʼoʼn toj tqʼabʼ Jehová. Mintiʼ in tzaj tqʼoʼn Jehová ambʼil qe tuʼn taj qqʼoʼn t-xel nya bʼaʼn in nok bʼinchaʼn qiʼj (kjawil uʼjit Romanos 12:19-21). Tuʼnju aj il qoʼ ex mintiʼ in nel qnikʼ tiʼj tkyaqil tiʼchaq, mlay txi qbʼinchaʼn kyiʼj nya bʼaʼn toj tumel ik tzeʼn in bʼant tuʼn Jehová (Heb. 4:13). At maj, mintiʼ in xi qbʼinchaʼn qe tiʼchaq toj tumel noq tuʼnju in kubʼ qnaʼn. Tuʼn tonbʼil Jehová kyaj  ttzʼibʼin Santiago jlu: «Aju xjal jurat in jaw qʼojl, mintiʼ in tbʼinchaʼn aju tzʼaqlxix tuj twitz Dios» (Sant. 1:20). Jaku tzʼok qeʼ qkʼuʼj tiʼj qa kxel tbʼinchaʼn Jehová aju tzʼaqli ex qa kxel tbʼinchaʼn kyiʼj nya bʼaʼn.

12. ¿Tzeʼn in kubʼ qyekʼin qa in nok qeʼ qkʼuʼj tiʼj qa kxel tbʼinchaʼn Jehová aju tzʼaqli?

¹² Aj tkubʼ qnajsaʼn qil qxolx, in nok qeʼ qkʼuʼj tiʼj qa tzʼaqli te Jehová. Qa ma kyaj qqʼoʼn nya bʼaʼn toj tqʼabʼ Jehová, in kubʼ qyekʼin qa in nok qeʼ qkʼuʼj tiʼj qa kʼelel tiʼn tkyaqil nya bʼaʼn o tzaj tuʼn il. O tzaj ttziyen Jehová qa toj akʼaj twitz Txʼotxʼ «kʼikʼel tnaʼl [tkyaqil bʼis quʼn] ex mi aʼl jun ktzajel naʼntl te» (Is. 65:17). Pero ¿axpe tok jaku jatz qiʼn qʼoj toj qanmi tiʼj jun xjal o tzʼok tbʼinchaʼn nya bʼaʼn qiʼj? Qo xnaqʼtzan tiʼj tzeʼn o bʼant jlu kyuʼn junjun erman.

13, 14. ¿Tiʼ xnaqʼtzbʼil jaku tzʼel qiʼn tiʼjju bʼaj tiʼj Tony ex José?

¹³ Ateʼ nim erman o kubʼ kyximen tuʼn tkubʼ kynajsaʼn kyil xjal, maske o tzʼok kybʼinchaʼn nim nya bʼaʼn kyiʼj. ¿Tzeʼn o tzʼonin jlu kyiʼj?

¹⁴ Qo yolin tiʼjju bʼaj tiʼj Tony, aju in nanqʼin atz Filipinas. * Tej naʼmxtoq tok te testigo de Jehová, kubʼ bʼyoʼn jun ttzik. Ok tbʼiʼn qa kubʼ bʼyoʼn ttzik tuʼn jun xjal José tbʼi. Tuʼnju txʼuʼj twiʼ Tony ex nim qʼojin, tajtoq tuʼn taj tqʼoʼn t-xel nya bʼaʼn. Okx qʼoʼn José toj cárcel tuʼnju nya bʼaʼn otoq bʼant tuʼn. Tej tok tbʼiʼn Tony qa otoq tzʼetz José toj cárcel, kubʼ t-ximen tuʼn tjyon tiʼj ex tuʼn tkubʼ tbʼyoʼn. Tuʼntzunju, tzaj tlaqʼoʼn jun tpistola. Pero xi tzyet tuʼn t-xnaqʼtzan Tony tiʼj Tyol Dios kyukʼil testigo de Jehová. Tqʼama jlu: «Akux in chin xnaqʼtzane, el nnikʼe tiʼj qa iltoq tiʼj tuʼn tbʼaj nchʼexpuʼne nximbʼetze. Iltoq tiʼj tuʼn tjatz wiʼne qʼoj toj wanmiye». Bautisarin Tony ex tej tikʼ ambʼil, ok te ansyan toj kʼloj okslal. Jaw labʼin tej tok tbʼiʼn qa ax ikx otoq tzʼok José te testigo de Jehová. Tej tok kykeʼyin kywitz, tzaj kychlen kyibʼ ex xi tqʼamaʼn Tony te José qa otoq kubʼ tnajsaʼn til. Tqʼama Tony qa mintiʼ  in che kanet yol tuʼn tuʼn ttzaj tqʼamaʼn aju tzalajbʼil kubʼ tnaʼn tej tkubʼ tnajsaʼn til José. Tuʼn jlu, tzaj kʼiwlaʼn tuʼn Jehová.

15, 16. ¿Tiʼ xnaqʼtzbʼil jaku tzʼel qiʼn tiʼjju bʼaj tiʼj Peter ex Sue?

¹⁵ Toj 1985, noq e jaw labʼin Peter ex Sue tej tel poqʼch jun bomba akux ateʼ toj chmabʼil. Otoq kyaj qʼoʼn bomba tuʼn jun xjal toj Ja te Chmabʼil. Tuʼnju kʼixbʼi Sue, ya mintiʼ tnaʼ tkʼokʼjal jun tiʼ, kʼixbʼi twitz ex t-ẍkyin. * Nim maj, kubʼ kyxjelin jlu: «¿Alkyetzun xjal bʼinchante jlu?». Tej tikʼ mas ambʼil, el nikʼbʼaj tiʼj alkye xjal otoq bʼinchante nya bʼaʼn ex nya testigo de Jehová. Tzyet kyuʼn polisiy ex okx qʼoʼn toj cárcel te jumajx. Xitzun qanin te Peter ex Sue qa otoq kubʼ kynajsaʼn til xjal, ex kyqʼama jlu: «In tzaj t-xnaqʼtzaʼn Jehová qe qa jaku tzaj yabʼil qiʼj qa ma txi qkʼuʼn qʼoj toj qanmi. Tuʼntzunju, atxix tej ttzaj nya bʼaʼn, xi qqanine onbʼil te Jehová tuʼn tjatz qiʼne qʼoj toj qanmiye ex tuʼn kukx tok tilil quʼne».

¹⁶ ¿Nyape kwest ela toj twitz mejebʼleʼn lu tuʼn tkubʼ tnajsaʼn til xjal? At maj kwest ela toj kywitz. Qbʼinx aju kyqʼama: «At maj in tzaj qqʼoje aj ttzaj nya bʼaʼn tiʼj Sue tuʼnju bʼaj. Pero jun rat in nikʼ tnaʼl quʼne tuʼnju nya kukx in qo ximane tiʼj. Axpe ikx, qa ma tzʼok xjal lu te tmajen Jehová, tuʼn tkyaqil qkʼuʼje jaku txi qqʼoʼne jun bʼaʼn tulen. Tuʼnju o bʼaj qiʼje, in nel qnikʼe tiʼj qa ax tok in che onin consej tkuʼx toj Tyol Dios qiʼj tuʼn tel qiʼn jun iqtz qibʼaj. Mas nim in che onin qiʼj twitzju in kubʼ qximen. Ax ikx, in qeʼ qkʼuʼje aj qximane tiʼj qa kxel tbʼinchaʼn Jehová kyiʼj nya bʼaʼn toj chʼintl ambʼil».

17. ¿Tiʼ xnaqʼtzbʼil jaku tzʼel qiʼn tiʼjju bʼaj tiʼj Myra?

¹⁷ Ok tojtzqiʼn Myra Jehová tej otoqxi  kubʼ mojeʼ ex ya otoq tzul kabʼe tal. Nya tajtoq tchmil tuʼn tel tnikʼ tiʼj axix tok. Tej tbʼet ambʼil, xi tjyoʼn tchmil Myra juntl t-xuʼjil ex kyaj tkolin qe toj tja. Tqʼama Myra jlu: «Noq in jaw sekʼpaje tej nkyaj koline tuʼn nchmile. Kubʼ nnaʼne nim tiʼchaq. Nya wajtoqe tuʼn tok qeʼ nkʼuʼje tiʼj jun xjal, tzaj nbʼise, tzaj nqʼoje ex kubʼ nximane qa wuʼne otoq bʼaj tkyaqil». Maske el tpan tibʼ tchmil tiʼj, kukx kubʼ tnaʼn nya bʼaʼn. Tqʼamatl Myra jlu: «Kukx kubʼ nnaʼne jlu toj nimku xjaw. Pero el nnikʼe tiʼj qa in tzajtoq tiʼn nya bʼaʼn tiʼj wamiwbʼile tukʼil Jehová ex kyukʼil txqantl». Atzun jaʼlo, jaku txi qqʼamaʼn qa ya mintiʼ in tzaj tqʼoj Myra ex qa mintiʼ in kubʼ t-ximen jun nya bʼaʼn tiʼj xjal ok te tchmil. Sino taj tuʼn tok tojtzqiʼn Jehová. In ximen Myra tiʼj ambʼil tzul ex nya tiʼjju o bʼaj. Tjunalx Myra xi tyekʼin axix tok kye tal, pero in tzalaj toj ambʼil jaʼlo tuʼnju in che ajbʼen junx te Jehová.

18. Tuʼnju a Jehová in nok te Jwes mas nim toklen, ¿tiʼ jaku tzʼok qeʼ qkʼuʼj tiʼj?

¹⁸ Tuʼnju a Jehová in nok te Jwes mas nim toklen, mintiʼ tuʼn ttzaj bʼaj qkʼuʼj tiʼj tzeʼn kxel bʼinchet tiʼj kyil xjal. A kxel bʼinchante kyiʼj ex tuʼn jlu in chewix qkʼuʼj (Rom. 14:10-12). Jaku tzʼok qeʼ qkʼuʼj tiʼj qa kxel tbʼinchaʼn Jehová kyiʼj nya bʼaʼn ik tzeʼn in tzaj kyqʼamaʼn tley tzʼaqli (Gén. 18:25; 1 Rey. 8:32). Mlay kubʼ tbʼinchaʼn jun tiʼ nya toj tumel.

19. Tuʼnju tzʼaqli te Jehová, ¿tiʼ kbʼantel tuʼn toj ambʼil tzul?

¹⁹ Kxel tbʼinchaʼn Jehová tiʼj tkyaqil nya bʼaʼn o tzaj tuʼn il ex kyuʼn xjal. Qajxix tuʼn tpon qʼij lu. Kʼelel tiʼn Jehová tkyaqil nya bʼaʼn o tzʼok bʼinchaʼn qiʼj ex tkyaqil bʼis (Sal. 72:12-14; Apoc. 21:3, 4). Ex ya mlay tzaj qnaʼn tkyaqil jlu. Akux in pon ambʼil lu, bʼaʼn tuʼn t-xi qqʼoʼn chjonte te Jehová tuʼnju in tzaj tqʼoʼn ambʼil qe tuʼn tel qkanoʼn tiʼj ex tuʼn tkubʼ qnajsaʼn kyil txqantl.