1. ¿Alkyeqe yol tqʼama rey Salomón toj Eclesiastés 7:20?

 TQʼAMA rey Salomón jlu: «Mi aʼl jun xjal at twitz txʼotxʼ tzʼaqlxix wen in tbʼinchaʼn aju bʼaʼn ex bʼajx bʼinchan il» (Ecl. 7:20). Ax tok qe yol lu, qkyaqilx aj il qoʼ (1 Juan 1:8). Tuʼntzunju, qkyaqilx qaj tuʼn tkubʼ najsaʼn qil tuʼn Jehová ex kyuʼn txqantl.

2. ¿Tiʼ in kubʼ qnaʼn aj in kubʼ najsaʼn qil tuʼn jun qamiw?

² ¿Ope tzʼok qbʼinchaʼn jun nya bʼaʼn tiʼj jun qamiw? Qkyaqilx o bʼaj jlu qiʼj. Tuʼn miʼn tnaj qamiwbʼil, in xi qqanin najsam tuʼn tkyaqil qkʼuʼj. ¿Tiʼ in kubʼ qnaʼn aj tkubʼ tnajsaʼn qamiw qil? Jaku txi qqʼamaʼn qa in chewix qanmi ex in kubʼ qnaʼn nim tzalajbʼil.

3. ¿Tiʼ kʼelel qnikʼ tiʼj toj xnaqʼtzbʼil lu?

³ Qkyaqilx qaj tuʼn tok Jehová te tbʼanel qamiw, noqtzun tuʼnj, at maj in kubʼ qbʼinchaʼn moqa in xi qqʼamaʼn jun tiʼ nya tgan. Qa ikju, ¿tiquʼn jaku tzʼok qeʼ qkʼuʼj tiʼj qa taj Jehová tuʼn tkubʼ tnajsaʼn qil? ¿Tiquʼn in xi qqʼamaʼn qa junxitl te Jehová kywitz xjal aj tkubʼ tnajsaʼn qil? Ex ¿alkyeqe in kubʼ tnajsaʼn Jehová kyil? Atzun jlu kʼelel qnikʼ tiʼj toj xnaqʼtzbʼil lu.

4. ¿Tiquʼn jaku tzʼok qeʼ qkʼuʼj tiʼj qa taj Jehová tuʼn tkubʼ tnajsaʼn qil?

⁴ In tzaj tqʼamaʼn Biblia qa taj Jehová tuʼn tkubʼ tnajsaʼn qil. Jun techel, tzaj tqʼamaʼn Jehová te Moisés twi witz Sinaí alkyeqe tmod at. Ajbʼen jun anjel tuʼn tuʼn ttzaj tqʼamaʼn jlu: «Aqine Jehová, aqine Jehová, aqine Dios at nim tqʼaqʼbʼil nkʼuʼje, aqine nim in tzʼeʼy nkʼuʼje, yaj in tzaj ntxʼuʼjile, nim nkʼujlalile, ex axix tok chin yoline. At tqʼaqʼbʼil nkʼuʼje kyiʼj nimku kyiyjil xjal, ex in kubʼ nnajsaʼne  kyil qeju in che bʼinchan mya bʼaʼn, qeju kykʼiʼ che niman, ex qeju in che bʼinchan il» (Éx. 34:6, 7). At nim tkʼujlabʼil Jehová ex in tzaj qʼaqʼin tkʼuʼj kyiʼj xjal, tuʼntzunju, taj tuʼn tkubʼ tnajsaʼn kyil qeju in najtz tiʼj kyanmi (Neh. 9:17; Sal. 86:15).

5. Ik tzeʼn in tzaj tyekʼin Salmo 103:13 ex 14, ¿tiʼ tmod Jehová in kubʼ tyekʼin qiʼj tuʼnju ojtzqiʼnxix qoʼ tuʼn?

⁵ Tuʼnju a Jehová Bʼinchal qe, ojtzqiʼn tuʼn tzeʼnxix qoʼ. ¿Mintiʼpe in qo jaw labʼin tiʼj aj tel qnikʼ tiʼj qa ojtzqiʼn tkyaqil tqanil tuʼn Jehová tiʼj teyele junjun xjal? (Sal. 139:15-17). Tuʼn jlu, jaku txi qqʼamaʼn qa ojtzqiʼn tuʼn Jehová tkyaqil il o tzʼel qiqen kyiʼj qman. Nya oʼkxju, ax ikx tok twitz Jehová tiʼj tkyaqilju o bʼaj qiʼj ex tiquʼn in bʼant junjun tiʼchaq quʼn. ¿Tiʼ in bʼant tuʼn Jehová aj tok tojtzqiʼn tkyaqil tqanil lu? Aj tel tnikʼ qiʼj, in nonin jlu tiʼj tuʼn ttzaj qʼaqʼin tkʼuʼj qiʼj (Sal. 78:39; kjawil uʼjit Salmo 103:13, 14).

6. ¿Tzeʼn o kubʼ tyekʼin Jehová qa taj tuʼn tkubʼ tnajsaʼn qil?

⁶ O kubʼ tyekʼin Jehová qa taj tuʼn tkubʼ tnajsaʼn qil. Ojtzqiʼnxix tuʼn qa tuʼnju mintiʼ nimen Adán, oktz il twitz Txʼotxʼ ex tzaj kamik kyiʼj kykyaqil xjal (Rom. 5:12). Ex mintiʼ jun tiʼ jaku bʼant quʼn tuʼn qetz tjaqʼ il ex mlay bʼant jun tiʼ quʼn tuʼn qkolin tiʼj juntl xjal (Sal. 49:7-9). Pero tzaj qʼaqʼin tkʼuʼj Jehová qiʼj ex xi tjyoʼn tumel tzeʼn tuʼn qklet. Ik tzeʼn in tzaj tqʼamaʼn Juan 3:16, tuʼnju at nim tkʼujlabʼil Jehová, tzaj tsamaʼn Tkʼwal tuʼn tkyim tuʼn qpaj (Mat. 20:28; Rom. 5:19). Kyim Jesús te kyxel kykyaqil qeju in nok qeʼ kykʼuʼj tiʼj chojbʼil bʼant tuʼn (Heb. 2:9). ¿Jakupe qo ximen tiʼj bʼis kubʼ tnaʼn Jehová tej tikʼ Tkʼwal toj kʼixkʼoj ex tej tkubʼ bʼyoʼn ik tzeʼn jun eleqʼ? Noqwit nya taj Jehová tuʼn tkubʼ tnajsaʼn qil, ¿tiquʼntzun xi tqʼoʼn ambʼil tuʼn tkyim Tkʼwal?

7. ¿Alkye junjun xjal kubʼ tnajsaʼn Jehová kyil toj ambʼil ojtxe?

⁷ In yolin Tyol Dios kyiʼj xjal tzaj qʼaqʼin tkʼuʼj Jehová kyiʼj ex kubʼ tnajsaʼn kyil (Efes. 4:32). ¿Atpe jun in tzaj tnaʼna? Bʼalo in nul toj twiʼya aju bʼaj tiʼj rey Manasés. Ok Manasés te nya bʼaʼn xjal ex kubʼ tbʼinchaʼn nim il twitz Jehová. Xi tqʼamaʼn kye xjal tuʼn kykʼulin kywitz nya ax  tok dios ex kubʼ tpatin qe tkʼwal te chojbʼil kywitz. Axpe ikx, okx tqʼoʼn jun sant toj tja Jehová, aju lugar xjan. Tuʼntzunju, in tzaj tqʼamaʼn Tyol Dios jlu tiʼj: «Jumajx mya bʼaʼn ela qe tbʼinchbʼen tuj twitz Qman, kyjaʼtzun tzaj nim tqʼoj Qman tiʼj tuʼn jlu» (2 Crón. 33:2-7). Pero tej tkubʼ tyekʼin Manasés qa ax tok otoq tzʼajtz tiʼj tanmi, tzaj qʼaqʼin tkʼuʼj Jehová tiʼj ex kubʼ tnajsaʼn til, axpe ikx, xi tqʼoʼn ambʼil te tuʼn tok te rey juntl maj (2 Crón. 33:12, 13). Ax ikx, jaku qo ximen tiʼjju bʼaj tiʼj aj kawil David. Kubʼ tbʼinchaʼn qe matij il ik tzeʼn yaẍbʼil ex ok te bʼyol xjal. Pero tej tel tnikʼ tiʼj qa nya bʼaʼn aju otoq bʼant tuʼn, ajtz tiʼj tanmi ex kubʼ tnajsaʼn Jehová til (2 Sam. 12:9, 10, 13, 14). Tuʼntzunju, jaku tzʼok qeʼ qkʼuʼj tiʼj qa ax tok taj Jehová tuʼn tkubʼ tnajsaʼn qil. Kyoj junjuntl taqikʼ, kʼelel qnikʼ tiʼj tiquʼn junxitl te Jehová kywitz xjal aj tkubʼ tnajsaʼn qil.

8. ¿Tiquʼn oʼkx Jehová in nok te tbʼanel Jwes ex tzeʼn in nonin jlu tiʼj aj tkubʼ tnajsaʼn qil?

⁸ A Jehová in nok te «jwes kyibʼaj kykyaqil xjal twitz txʼotxʼ» (Gén. 18:25). Il tiʼj tuʼn tel tnikʼ jun tbʼanel jwes kyiʼj ley. Ex atzun jlu in bʼant tuʼn Jehová tuʼnju nya oʼkx in nok te Jwes qibʼaj, sino ax ikx in tzaj tqʼoʼn qe ley qe (Is. 33:22). Ni jun xjal jaku tzʼel tnikʼ tiʼj alkye bʼaʼn ex alkye nya bʼaʼn ik tzeʼn in bʼant tuʼn Jehová. ¿Alkye junjuntl tiʼchaq il tiʼj tuʼn tbʼant tuʼn jun tbʼanel jwes? Naʼmxtoq tkubʼ tqʼoʼn jun jwes tsentens jun xjal, il tiʼj tuʼn t-ximen tiʼj tkyaqilju otoq bʼaj. Ni jun jwes jaku bʼant jlu tuʼn, sino oʼkx te Jehová.

9. ¿Alkyeqe tqanil ojtzqiʼn tuʼn Jehová aj tkubʼ t-ximen qa kbʼel tnajsaʼn til jun xjal moqa miʼn?

⁹ Nya ik te Jehová ik tzeʼn qe jwes te twitz txʼotxʼ. ¿Tiquʼn? Tuʼnju ojtzqiʼn tkyaqil tqanil tuʼn tiʼjju otoq bʼaj (Gén. 18:20, 21; Sal. 90:8). Aj tkubʼ tnajsaʼn Jehová kyil xjal, nya oʼkx in ximen tiʼjju in nok kykeʼyin ex in nok kybʼiʼn txqantl. Sino ojtzqiʼnxix tuʼn tzeʼn o jaw chʼiysaʼn jun xjal, alkyeqe tmod o tzʼel tkanoʼn tiʼj tman, aju in nikʼ toj tanqʼibʼil, qe t-ximbʼetz ex aju in kubʼ tnaʼn. Ex tuʼn jlu in nel tnikʼ tiʼj tiquʼn in bʼant junjun tiʼchaq tuʼn. Ax ikx, ojtzqiʼn tuʼn Jehová tiʼ tkuʼx toj qanmi, toj juntl yol, in nel tnikʼ tiʼjju qaj tuʼn tbʼant quʼn ex tiʼj qximbʼetz. Tok twitz tiʼj tkyaqil ex mlay kubʼ qewin jun tiʼ twitz (Heb. 4:13). Tuʼntzunju, aj tkubʼ tnajsaʼn Jehová qil, in ximen tiʼj tkyaqilju otoq bʼaj.

10. ¿Tiquʼn jaku txi qqʼamaʼn qa toj tumel tkyaqilju in kubʼ t-ximen Jehová? (Deuteronomio 32:4).

¹⁰ Toj tumel tkyaqilju in kubʼ t-ximen Jehová. Mintiʼ in nok tqʼoʼn twitz tiʼj kyyajil xjal. Ex mintiʼ in kubʼ tnajsaʼn til jun xjal noq tuʼnju tzeʼn keʼyin, qa at toklen, qa at tpwaq moqa at tojtzqibʼil (1 Sam. 16:7; Sant. 2:1-4). Ax ikx, mlay qo sbʼun tiʼj Jehová ex mlay tzʼok q-obligarin (2 Crón. 19:7). Ex mintiʼ in kubʼ tnajsaʼn qil tukʼil qʼoj moqa noq tuʼnju in kubʼ tnaʼn (Éx. 34:7). Jaku txi qqʼamaʼn qa in nok Jehová te mas tbʼanel Jwes tuʼnju ojtzqiʼnxix qoʼ tuʼn ex in nel tnikʼ qiʼj (kjawil uʼjit Deuteronomio 32:4).

11. ¿Tiquʼn junxitl Jehová twitz jun xjal aj tkubʼ tnajsaʼn qil?

¹¹ Ojtzqiʼn kyuʼn qeju e kubʼ tzʼibʼinte Tyol Dios qa mlay tzʼok qmojbʼaʼn Jehová tukʼil jun xjal aj tkubʼ tnajsaʼn qil.  At maj ajbʼen jun yol hebreo kyuʼn ex «oʼkx ajbʼen tuʼn t-xi qʼamet aj tkubʼ najsaʼn til jun xjal tuʼn Dios», atzun jlu in tzaj tqʼamaʼn jun uʼj. In tzaj tqʼamaʼntl uʼj jlu: «Mintiʼ in najbʼen yol lu kyuʼn tuʼn t-xi kyqʼamaʼn qa in kubʼ tnajsaʼn jun xjal til juntl», (Sinónimos del Antiguo Testamento, traducción y adaptación de Santiago Escuain). Oʼkx Jehová at tipumal tuʼn tkubʼ tnajsaʼn til jun xjal qa ax tok otoq tzʼajtz tiʼj tanmi. ¿Tiʼtzun in kubʼ qnaʼn aj tkubʼ tnajsaʼn Jehová qil?

12, 13. a) ¿Tiʼ in kubʼ tnaʼn jun xjal aj tkubʼ tnajsaʼn Jehová til? b) ¿Oʼkxpe jun ambʼil in kubʼ tnajsaʼn Jehová qil?

¹² Aj tel qnikʼ tiʼj qa in kubʼ tnajsaʼn Jehová qil, in nul «tqʼijlalil chewsabʼl» toj qanmi ex in kubʼ qnaʼn tzalajbʼil. Mlay kubʼ qnaʼn jlu aj tkubʼ tnajsaʼn jun xjal qil, sino oʼkx jaku kubʼ qnaʼn aj tkubʼ tnajsaʼn Jehová qil (Hech. 3:19). Aj in kubʼ tnajsaʼn Jehová qil, in tzaj tqʼoʼn ambʼil qe tuʼn qok te tamiw juntl maj. Ex in nok jlu ik tzeʼn mintiʼ otoq qo bʼinchan il.

¹³ Aj tkubʼ tnajsaʼn Jehová til jun xjal, ya mintiʼ in tzaj tnaʼn ex ya mintiʼ in kubʼ t-ximen tuʼn tkubʼ tqʼoʼn tkastiw tuʼnju otoq bʼant tuʼn (Is. 43:25; Jer. 31:34). Najchaq in kubʼ tqʼoʼn Jehová til jun xjal «ik tzaʼn tjawitz qʼij ex telex qʼij najchaq kyxol» (Sal. 103:12). * Aj qximen tiʼj tzeʼn in kubʼ tnajsaʼn Jehová qil, bʼaʼn tuʼn t-xi qqʼoʼn chjonte te ex bʼaʼn tuʼn tok qqʼoʼn toklen (Sal. 130:4). Pero ¿alkyeqe in kubʼ tnajsaʼn Jehová kyil ik tzeʼn jlu?

14. ¿Tiʼ ma tzʼel qnikʼ tiʼj aj tkubʼ tnajsaʼn Jehová til jun xjal?

¹⁴ Ik tzeʼn ma tzʼel qnikʼ tiʼj, aj tkubʼ tnajsaʼn Jehová til jun xjal mintiʼ in ximen tiʼj jniʼ il otoq bʼant tuʼn. Ax ikx, ma tzʼel qnikʼ tiʼj qa a Jehová Bʼinchal qe, qa in che tzaj tqʼoʼn ley qe ex qa in nok te Jwes. Ex in najbʼen tkyaqil jlu tuʼn aj t-ximen tiʼj qa kbʼel tnajsaʼn til jun xjal moqa miʼn. Qa ikju, ¿tiʼtzun in nok tqʼoʼn Jehová twitz tiʼj?

15. Ik tzeʼn in tzaj tyekʼin Lucas 12:47 ex 48, ¿tiʼ in ximen Jehová tiʼj aj tkubʼ tnajsaʼn til jun xjal?

 ¹⁵ Aj tkubʼ tnajsaʼn Jehová til jun xjal, in ximen tiʼj qa ojtzqiʼn tuʼn xjal qa nya bʼaʼn aju otoq bʼant tuʼn. Atzun jlu in nel qnikʼ tiʼj kyuʼn yol kyaj tqʼamaʼn Jesús toj Lucas 12:47 ex 48 (uʼjinktza). Qa ojtzqiʼn tuʼn jun xjal qa nya bʼaʼn aju in bʼant tuʼn, in bʼinchan il twitz Dios. Aj tbʼant jlu tuʼn jun xjal, mlaylo kubʼ tnajsaʼn Jehová til (Mar. 3:29; Juan 9:41). Noqtzun tuʼnj, at maj in nel qnikʼ tiʼj qa otoq bʼant jun tiʼ nya toj tumel quʼn. Qa ma bʼaj jlu, ¿jakupe kubʼ tnajsaʼn Jehová qil? Jaku. Tuʼn jlu, jaku qo yolin tiʼj juntl tiʼ in ximen Jehová tiʼj.

16. ¿Tiʼ t-xilen tuʼn tajtz tiʼj tanmi jun xjal ex tiquʼn nim toklen tuʼn tbʼant tuʼn?

¹⁶ Ax ikx in nok tqʼoʼn Jehová twitz tiʼj qa ax tok otoq tzʼajtz tiʼj tanmi jun xjal. ¿Tiʼ t-xilen tuʼn tajtz tiʼj tanmi jun xjal? Atz in yolin jlu tiʼj tuʼn tkubʼ tchʼexpuʼn jun xjal t-ximbʼetz, tmod ex tbʼinchbʼen. Nya oʼkxju, ax ikx in yolin jlu tiʼj bʼis in kubʼ tnaʼn xjal tuʼnju otoq bʼant nya bʼaʼn tuʼn. Nya oʼkx in tzaj tbʼis tiʼj il otoq bʼant tuʼn, sino ax ikx in tzaj tbʼis tuʼnju otoq chewix tamiwbʼil tukʼil Jehová. Qo yolin juntl maj tiʼj aj kawil Manasés ex David. Maske kubʼ kybʼinchaʼn matij il, kubʼ tnajsaʼn Jehová kyil tuʼnju ax tok ajtz tiʼj kyanmi (1 Rey. 14:8). Tuʼntzunju, oʼkx in kubʼ tnajsaʼn Jehová til jun xjal aj tkubʼ tyekʼin qa ax tok in najtz tiʼj tanmi. Nya oʼkx tuʼn ttzaj tbʼis xjal tiʼj nya bʼaʼn otoq bʼant tuʼn, sino ax ikx kbʼel tyekʼin qa taj tuʼn tbʼant chʼixpubʼil tuʼn. * Aj tbʼaj jlu, in nok tqʼoʼn Jehová twitz tiʼj juntl tiʼ.

17. ¿Tiʼ juntl tiʼ il tiʼj tuʼn tbʼant tuʼn jun xjal tuʼn tkubʼ najsaʼn til ex tzeʼn in nonin tiʼj tuʼn ya miʼn tkubʼ tbʼinchaʼn aʼyex il? (Isaías 55:7).

¹⁷ ¿Alkye juntl tiʼ in nok tqʼoʼn Jehová twitz tiʼj? Ax ikx in nok tqʼoʼn twitz tiʼj qa in kyaj ttzaqpiʼn xjal nya bʼaʼn tbʼe ex qa in xi tzyet tuʼn tanqʼin ik tzeʼn in tzaj tqʼamaʼn Xjan Uʼj (kjawil uʼjit Isaías 55:7). Aj in kyaj ttzaqpiʼn jun xjal nya bʼaʼn tbʼe, in xi tqʼoʼn ambʼil tuʼn tten t-ximbʼetz  ik tzeʼn te Jehová (Rom. 12:2; Efes. 4:23). Nim toklen tuʼn tkyaj ttzaqpiʼn qe nya bʼaʼn t-ximbʼetz ex tbʼinchbʼen (Col. 3:7-10). Noqtzun tuʼnj, nim toklen tuʼn ttzaj qnaʼn qa il tiʼj tuʼn tok qeʼ qkʼuʼj tiʼj chojbʼil bʼant tuʼn Jesús tuʼntzun tkubʼ tnajsaʼn Jehová qil. Aj tok tkeʼyin Jehová qa in nok tilil quʼn tuʼn tbʼaj qchʼexpuʼn qmod, in najbʼen chojbʼil tuʼn tuʼn tkubʼ tnajsaʼn qil (1 Juan 1:7).

18. ¿Tiʼ ma tzʼel qnikʼ tiʼj aj tkubʼ tnajsaʼn Jehová qil?

¹⁸ Qo yolin kyiʼj junjun xnaqʼtzbʼil nim kyoklen ma tzʼel qnikʼ tiʼj. Jaku txi qqʼamaʼn qa ni jun xjal in kubʼ tnajsaʼn qil ik tzeʼn te Jehová. ¿Tiquʼn in xi qqʼamaʼn jlu? Tnejel, tuʼnju taj tuʼn tkubʼ tnajsaʼn qil. Tkabʼin, tuʼnju ojtzqiʼnxix qoʼ tuʼn. Ojtzqiʼn tkyaqil tqanil tuʼn qiʼj ex in nel tnikʼ tiʼj qa ax tok in najtz tiʼj qanmi. Ex toxin, aj tkubʼ tnajsaʼn Jehová qil, ya mintiʼ in tzaj tnaʼn. Noq tuʼn jlu, jaku qo tzalaj ex jaku tzalaj Jehová qiʼj.

19. ¿Tiquʼn jaku qo tzalaj maske at maj jaku kubʼ qbʼinchaʼn jun il?

¹⁹ Tuʼnju nya tzʼaqli qoʼ, atlo maj jaku kubʼ qbʼinchaʼn jun il. Noqtzun tuʼnj, in chewix qanmi aj tjaw quʼjin aju in tzaj tqʼamaʼn Perspicacia para comprender las Escrituras, volumen 1, t-xaq 209. In tzaj tqʼamaʼn jlu: «Tuʼnju at qʼaqʼbʼil tkʼuʼj Jehová, in nel tnikʼ tiʼj qa aj il qe tmajen. Tuʼntzunju, nya il tiʼj tuʼn kukx kybʼisun tiʼj nya bʼaʼn otoq bʼant kyuʼn (Sl 103:8-14; 130:3). Qa ma tzʼok tilil kyuʼn tuʼn kybʼet toj tbʼe Jehová, jaku che tzalaj (Flp 4:4-6; 1Jn 3:19-22)». In chewix qanmi kyuʼn yol lu.

20. ¿Tiʼ kʼelel qnikʼ tiʼj toj juntl xnaqʼtzbʼil?

²⁰ In xi qqʼoʼn chjonte te Jehová tuʼnju in kubʼ tnajsaʼn qil qa ax tok in najtz tiʼj qanmi. Pero, ¿tzeʼn jaku tzʼel qkanoʼn tiʼj? ¿Alkyeqe tiʼchaq mlay bʼant quʼn ik tzeʼn te Jehová aj tkubʼ qnajsaʼn kyil txqantl? ¿Ex tiquʼn nim toklen tuʼn tel qnikʼ tiʼj jlu? Toj juntl xnaqʼtzbʼil, tzul qʼoʼn tzaqʼwebʼil kyiʼj xjel lu.