TQʼAMA jun ermana jlu, aju Lisa tbʼi: * «Tbʼanel ela toj nwitze tej tkubʼ kyyekʼin erman kʼujlabʼil ex tej kybʼinchan xtalbʼil wiʼje». Atzun jlu mas tbʼanel ela toj twitz ermana tej t-xi tzyet tuʼn t-xnaqʼtzan tiʼj Tyol Dios. Chʼixme ax jlu bʼaj tiʼj Anne. Tqʼama jlu: «Tej kyok wojtzqiʼne testigo de Jehová, mas tbʼanel ela kymod te weye twitzju kyxnaqʼtzbʼil». Toj ambʼil jaʼlo, in che tzalaj ermana lu tuʼn kyuʼjin tiʼj Tyol Dios ex tuʼn kyximen tiʼj, pero aju mas onin kyiʼj tuʼn tel kynikʼ tiʼj axix tok, aju kʼujlabʼil ex xtalbʼil kubʼ kyyekʼin erman kyiʼj.

¿Tiʼ jaku bʼant quʼn tuʼn tkubʼ qyekʼin tbʼanel qmod kyiʼj txqantl tuʼntzun qonin kyiʼj? Qo xnaqʼtzan tiʼj kabʼe tumel. Jun, tuʼn qyol ex tkabʼin, tuʼn qbʼinchbʼen. Ex kʼelel qnikʼ tiʼj alqiʼj kbʼel qyekʼin tbʼanel qmod.

In yolin capítulo 31 te Proverbios tiʼj jun tbʼanel xuʼjilbʼaj ex in tzaj tqʼamaʼn qa in xi «tqʼoʼn xnaqʼtzbʼil tukʼil tkʼujlalil» (Prov. 31:26). In xi tqʼoʼn ambʼil tuʼn tonin kʼujlabʼil tiʼj aj tyolin ex tuʼn t-ximen tiʼjju in xi tqʼamaʼn. Ax ikx, nim toklen tuʼn tonin kʼujlabʼil kyiʼj mambʼaj tuʼn t-xi kyqʼamaʼn tbʼanel kyyol. Chʼixme kykyaqil mambʼaj ojtzqiʼnxix kyuʼn qa jaku tzʼok kybʼinchaʼn nya bʼaʼn kyiʼj kykʼwal qa ma che yolin kyukʼil tukʼil qʼoj. Qa mintiʼ ma tzʼok kyqʼoʼn kywiʼ tiʼj kyyol, jaku tzaj kyqʼoj. Pero qa ma che yolin tukʼil kʼujlabʼil kyukʼil kykʼwal, mas jaku chex nimen kyuʼn.

Qa mambʼaj qoʼ moqa nya, ¿tiʼ jaku bʼant quʼn tuʼn tonin kʼujlabʼil qiʼj aj qyolin? Jaku tzʼonin tnejel plaj te Proverbios 31:26 qiʼj tuʼn tel qnikʼ tiʼj jlu. In tzaj tqʼamaʼn jlu: «At tnabʼl tuʼn tyolin». Atz in yolin jlu tiʼj tuʼn kyjaw qjyoʼn qyol ex alkye tqʼajqʼajel qwiʼ in najbʼen quʼn. Qa ma tzaj jun nya bʼaʼn, bʼaʼn tuʼn qximen tiʼj xjel lu: «¿Kʼonilpe nyole kxel nqʼamaʼne tuʼn tweʼ qʼoj moqa mas kxeʼl toj il?» (Prov. 15:1). Jaku txi qqʼamaʼn qa at qnabʼil qa in qo ximen kyiʼj qyol naʼmxtoq t-xi qqʼamaʼn.

In tzaj tqʼamaʼn juntl proverbio jlu: «At xjal in kʼixbʼisan tiʼj juntl kyuʼn qe tyol» (Prov. 12:18). Qa ma qo ximen tiʼjju jaku kubʼ kynaʼn txqantl tuʼn qyol ex tuʼn tqʼajqʼajel qwiʼ, mas kʼokel tilil quʼn tuʼn qximen tiʼjju kxel qqʼamaʼn. Qa ma txi qqʼoʼn ambʼil te kʼujlabʼil tuʼn tonin qiʼj, mlay txi qqʼamaʼn qe yol jaku che kʼixbʼi txqantl tuʼn (Efes. 4:31, 32). In che kubʼ qchʼexpuʼn nya bʼaʼn ximbʼetz ex nya bʼaʼn yol kyukʼil tbʼanel ximbʼetz ex tbʼanel yol. In kubʼ tqʼoʼn Jehová jun tbʼanel techel qwitz tiʼj tkyaqil jlu. Jun techel, tej otoq tzaj xobʼ Elías, ajbʼen jun anjel tuʼn Jehová tuʼn t-xi tqʼuqbʼaʼn tkʼuʼj. Ex xi tbʼiʼn Elías «jun tqʼajqʼajel [...] myaxix kyuw» (1 Rey. 19:12). Noqtzun tuʼnj, nya oʼkx tuʼn qyol jaku kubʼ qyekʼin kʼujlabʼil, sino ax ikx tuʼn qbʼinchbʼen. Qo xnaqʼtzan tiʼj alkye tten jaku bʼant jlu quʼn.

In nel qkanoʼn tiʼj Jehová aj qyolin toj tumel ex aj qbʼinchan xtalbʼil (Efes. 4:32;  5:1, 2). Xi kybʼinchaʼn testigos de Jehová xtalbʼil tiʼj Lisa, aju ma qo yolin tiʼj toj tnejel taqikʼ. Tqʼama jlu: «Tej qxiʼye anqʼil toj juntl lugar ex nyatoq ximen quʼne, xi kyqanin kabʼe mejebʼleʼn testigo de Jehová kypermis toj kyaqʼun tuʼntzun kyul onil qiʼje. Toj ambʼil aju, naʼmxtoq wok tene xnaqʼtzal tiʼj Tyol Dios». Aju bʼant kyuʼn erman, onin tiʼj Lisa tuʼn tel mas tnikʼ tiʼj axix tok.

Ax ikx te Anne aju ma qo yolin tiʼj toj tnejel taqikʼ, ok tqʼoʼn twiʼ tiʼj tbʼanel kymod testigos de Jehová. Tqʼama jlu: «Tuʼnju at nim nya bʼaʼn, kwesttoq tuʼn tok qeʼ nkʼuʼje kyiʼj xjal». Ex tqʼamatl jlu: «Tej kyok wojtzqiʼne testigo de Jehová, mintiʼ ok qeʼ nkʼuʼje tiʼj qa ax tok kyajtoq tuʼn kyonin wiʼje. Wajtoqe tuʼn tel nnikʼe tiʼj tiquʼn kubʼ kyyekʼin tbʼanel kymod wukʼile. Pero ok qeʼ nkʼuʼje tiʼj ermana tzaj qʼonte xnaqʼtzbʼil weye tuʼnju ok nkeʼyine qa ax tok tajtoq tuʼn tonin wiʼje». ¿Alkye tten onin jlu tiʼj Anne? Tqʼamatl jlu: «Tej tbʼet ambʼil, mas ok nqʼoʼn nwiʼye tiʼj xnaqʼtzbʼil in tzajtoq qʼoʼn weʼye».

Bʼaʼn tuʼn tok qqʼoʼn qwiʼ tiʼj qa tbʼanel ela toj kywitz kabʼe ermana lu tej  tkubʼ kyyekʼin testigos de Jehová tbʼanel kymod kyiʼj. Ex onin kyiʼj tuʼn tok kyojtzqiʼn axix tok. Aju xtalbʼil ex kʼujlabʼil kubʼ kyyekʼin erman kyiʼj, kuʼpin toj kyanmi.

Ateʼ junjun xjal nya kwest tuʼn t-xi kybʼinchaʼn xtalbʼil kyiʼj txqantl tuʼnju ikx kymod ex kykostumbr. Tbʼanel jlu, pero qa oʼkx in qo bʼinchan xtalbʼil tuʼnju naqʼli qoʼ tuʼn tbʼant quʼn, mintiʼlo in nel qkanoʼn tiʼj tkʼujlabʼil Jehová (jaku tzʼok tmojbʼaʼna tukʼil Hechos 28:2).

Aju axix tok xtalbʼil, atzun jun kyxol qe mod in tqʼoʼn xewbʼaj xjan (Gál. 5:22, 23). Tuʼntzunju, tuʼn tten tbʼanel qmod lu ex tuʼn tel qkanoʼn tiʼj Jehová ex tiʼj Jesús, nim toklen tuʼn t-xi qqʼoʼn ambʼil te xewbʼaj xjan tuʼn tonin tiʼj qnabʼil ex qbʼinchbʼen. Tuʼnju in qo ok lepeʼ tiʼj Jesús ex kʼujlaʼn Jehová ex qe xjal quʼn, in nok tilil quʼn tuʼn qximen kyiʼj txqantl. Qa in xi qbʼinchaʼn xtalbʼil tukʼil kʼujlabʼil, tbʼanel in nela toj twitz Jehová ex at tipumal mod lu.

Chʼixmi tkyaqil maj, nya kwest tuʼn tkubʼ qyekʼin qkʼujlabʼil kyiʼj qeju o kubʼ kyyekʼin tbʼanel kymod qukʼil moqa kyiʼj xjal ojtzqiʼn kywitz quʼn (2 Sam. 2:6). Ex chʼixmi tkyaqil maj in bʼant jlu quʼn aj t-xi qqʼoʼn chjonte kye (Col. 3:15). ¿Yajtzun qa at jun xjal nya qaj tuʼn tkubʼ qyekʼin kʼujlabʼil tiʼj?

Qo ximen tiʼj jlu: in kubʼ tyekʼin Jehová tkʼujlabʼil kyiʼj kykyaqil, axpe ikx kyiʼj qeju mintiʼ kyoklen tiʼj. Ex ni jun xjal in bʼant tuʼn ik tzeʼn te Jehová. In tzaj tqʼoʼn Tyol Dios jun tbʼanel xnaqʼtzbʼil qe tiʼj jlu. Toj plaj Tyol Dios kubʼ tzʼibʼin toj yol griego, in tzaj qʼamaʼn qa in kubʼ tyekʼin Jehová nimxix t-xtalbʼil. ¿Alkye tten in bʼant jlu tuʼn?

Qo ximen kyiʼj nim millón xjal in kubʼ tyekʼin Jehová t-xtalbʼil kyiʼj aj ttzaj tqʼoʼn aju at tajbʼen kye tuʼn kyanqʼin (Mat. 5:45). Ex tej naʼmxtoq tok qojtzqiʼn, ya otoq kubʼ tyekʼin tkʼujlabʼil qiʼj (Efes. 2:4, 5, 8). Tzaj tqʼoʼn ambʼil tuʼn tkyim oʼkxku jun Tkʼwal kyiʼj kykyaqil xjal. Kubʼ ttzʼibʼin apóstol Pablo qa noq «tuʼnju t-xtalbʼil» Jehová jaku tzʼonin chojbʼil qiʼj (Efes. 1:7). Maske at maj in qo el txalpaj ex in tzaj tbʼis Jehová quʼn, kukx in tzaj tyekʼin qbʼe. In che ok t-xnaqʼtzbʼil ex qe tyol «ik tzaʼn xmuʼs» (Deut. 32:2). Mlayx chjet quʼn tkyaqilju t-xtalbʼil Jehová in kubʼ tyekʼin qiʼj. Ojtzqiʼn quʼn qa noq tuʼn t-xtalbʼil, at jun qʼuqbʼil qkʼuʼj toj ambʼil tzul (jaku tzʼok tmojbʼaʼna tukʼil 1 Pedro 1:13).

In nonin tkʼujlabʼil ex t-xtalbʼil Jehová qiʼj tuʼn qok laqʼeʼ ttxlaj ex in nonin qiʼj tuʼn tkubʼ qyekʼin kyiʼj txqantl. Tuʼntzunju, bʼaʼn tuʼn tok tilil quʼn tuʼn tkubʼ qyekʼin tbʼanel qmod kyiʼj kykyaqil xjal ik tzeʼn in bʼant tuʼn Jehová ex nya oʼkx kyiʼj junjun (1 Tes. 5:15). Qa ma qo ok te tbʼanel xjal toj tkyaqil ambʼil, qo okel ik tzeʼn qʼaqʼ toj jun qʼij jatumel at nim cheʼw. Atzun jlu kbʼel kynaʼn qeju toj qja, qe erman, qe qukʼil toj aqʼuntl ex toj escuela, ex qe qvecin aj qten kyukʼil.

¿Jakupe tzʼonin tbʼanel tyola ex tmoda tiʼj jun toj tjaya moqa tiʼj jun erman toj congregación? Bʼalo at jun erman taj onbʼil tuʼn tjaw tzʼis toj tja, tuʼn ttzaj laqʼet qe tiʼchaq at tajbʼen te moqa tuʼn t-xi qʼet junjuntl onbʼil te. Ex ¿tiʼ jaku bʼant quʼn tuʼn tkubʼ qyekʼin qkʼujlabʼil toj pakbʼabʼil? Jaku qo onin tiʼj jun xjal taj onbʼil.

Qkanoʼmil tiʼj Jehová ex bʼaʼn tuʼn tkubʼ qyekʼin kʼujlabʼil tukʼil qyol ex qbʼinchbʼen.