1. a) ¿Alkye qʼuqbʼil qkʼuʼj o tzaj tqʼoʼn Jehová? b) ¿Tiʼ t-xilen tuʼn tok qeʼ qkʼuʼj tiʼj Jehová? (Qʼonka twitza tiʼj tqanil).

 O TZAJ tqʼoʼn Jehová jun qʼuqbʼil kykʼuʼj tmajen. Toj chʼintl ambʼil, kʼelel tiʼn yabʼil, bʼis ex kyimen (Apoc. 21:3, 4). Ex kʼonil kyiʼj xjal mans tuʼn tok qeʼ kykʼuʼj tiʼj qa kʼokel Txʼotxʼ kyuʼn te jun tbʼanel najbʼil (Sal. 37:9-11). Ax ikx, ktzajel tqʼoʼn ambʼil qe tuʼn tten jun tbʼanel qamiwbʼil tukʼil ex mas tbʼanel kʼokel ik tzeʼn qamiwbʼil at tukʼil toj ambʼil jaʼlo. Tbʼanel qʼuqbʼil qkʼuʼj in tzaj tqʼoʼn Jehová. Pero, ¿tiquʼn qʼuqli qkʼuʼj tiʼj qa ax tok kjapunel kywi ttziybʼil Dios? Qʼuqli qkʼuʼj tiʼj tuʼnju in japun twi tyol. Ex at nim tiquʼn tuʼn tok qeʼ qkʼuʼj tiʼj Jehová (Sal. 27:14). * ¿Tzeʼn in kubʼ qyekʼin qa in nok qeʼ qkʼuʼj tiʼj? In kubʼ qyekʼin aj qayon tukʼil pasens ex tzalajbʼil ajxi tjapun kywi ttziybʼil (Is. 55:10, 11).

2. ¿Tiʼ tzaj ttziyen Jehová ex ope japun twiʼ?

² O kubʼ tyekʼin Jehová qa in japun twi tyol. Qo yolin tiʼj jun techel. Tzaj ttziyen Jehová toj uʼj te Apocalipsis qa kʼokel tchmoʼn jun kʼloj xjal te junxichaq nasyon, kyyajil ex kyyol tuʼntzun kykʼulin junx te. Tqʼama qa tuʼn tbʼaj jlu toj qqʼijlalil. Toj ambʼil jaʼlo, in nok qʼet tbʼi kʼloj xjal lu te «nimxix kyajlal xjal» (Apoc. 7:9, 10). Kyxol qe jlu, ateʼ xinaq, xuʼj ex qe kʼwal te junxichaq kykostumbr, kyyol  ex kytnam. Maske ikju, at mujbʼabʼil ex tzalajbʼil kyxol twitz tkyaqil Txʼotxʼ (Sal. 133:1; Juan 10:16). Ax ikx, in che pakbʼan ex bʼantni kyten tuʼn kyyolin tiʼj qʼuqbʼil kykʼuʼj kye xjal kyaj tuʼn tok kybʼiʼn (Mat. 28:19, 20; Apoc. 14:6, 7; 22:17). Qa at teya kyxol xjal lu, jaku txi qqʼamaʼn qa in nok tqʼoʼna toklen qʼuqbʼil tkʼuʼja.

3. ¿Tiʼ taj Satanás tuʼn tbʼant tuʼn?

³ Taj Satanás tuʼn miʼn tten qʼuqbʼil qkʼuʼj. In nok tilil tuʼn tuʼn tkubʼ qximen qa nya kʼujlaʼn qoʼ tuʼn Jehová ex qa mlay japun twi tyol. Qa ma naj qʼuqbʼil qkʼuʼj tuʼn Satanás, ya mlay ten qipumal, axpe ikx, jaku kyaj qtzaqpiʼn tuʼn qajbʼen te Jehová. Ik tzeʼn kʼelel qnikʼ tiʼj, ok tilil tuʼn Satanás tuʼn tnaj qʼuqbʼil tkʼuʼj Job tuʼntzun tkyaj tkolin tajbʼebʼil te Jehová.

4. ¿Tiʼ kʼelel qnikʼ tiʼj toj xnaqʼtzbʼil lu? (Job 1:9-12).

⁴ Toj xnaqʼtzbʼil lu, kʼelel qnikʼ kyiʼj junjun tiʼchaq bʼant tuʼn Satanás tuʼn tkyaj ttzaqpiʼn Job tajbʼebʼil te Jehová (kjawil uʼjit Job 1:9-12). Ax ikx, kʼelel qnikʼ tiʼj tiʼ jaku tzʼel qkanoʼn tiʼj Job ex tiquʼn nim toklen tuʼn ttzaj qnaʼn qa kʼujlaʼn qoʼ tuʼn Jehová ex qa che japunel twi tyol.

5, 6. ¿Tzeʼn chʼexpaj tanqʼibʼil Job toj chʼin ambʼil?

⁵ Attoq jun tbʼanel tanqʼibʼil Job tuʼnju otoq tzʼok te jun tbʼanel tamiw Jehová, ateʼtoq toj tja, attoq mujbʼabʼil kyxol, axpe ikx attoq nim tqʼinumabʼil (Job 1:1-5). Pero toj junx qʼij naj tkyaqil tiʼchaq te. Tnejel, naj tkyaqil tqʼinumabʼil (Job 1:13-17). Yajxitl, e kyim qe tkʼwal. Qo ximen jun rat tiʼj qa qiʼj in bʼaj jlu. In tzaj nimxix bʼis kyiʼj mambʼaj aj tkyim jun kykʼwal. Qa ikju, qo ximen tiʼj jniʼ bʼis kubʼ tnaʼn Job ex t-xuʼjil tej tok kybʼiʼn qa otoq che kyim qe lajaj kykʼwal. Tuʼntzunju, el tlaqin Job t-xbʼalun ex pon take twitz twitz txʼotxʼ tuʼnju otoq tzaj nimxix tbʼis (Job 1:18-20).

⁶ Tibʼajxi jlu, ok tqʼoʼn Satanás jun yabʼil tiʼj Job tuʼntzun tkubʼ tqʼoʼn tchʼixwi (Job 2:6-8; 7:5). Nimtoq toklen Job toj kywitz xjal, axpe ikx, in che pontoq jyol te tuʼntzun t-xi kyqanin kyconsej te (Job 31:18). Tejtzun ttzaj yabʼil tiʼj, el kypan kyibʼ xjal tiʼj ex e xmayin tiʼj. El ikʼun kyuʼn terman, kyuʼn tamiw, axpe ikx kyuʼn tmajen (Job 19:13, 14, 16).

7. a) ¿Tiʼ kubʼ t-ximen Job tej ttzaj nya bʼaʼn tiʼj ex tiʼ mintiʼ bʼant tuʼn? b) ¿Alkyeqe tiʼchaq jaku tzʼok weʼ jun okslal twitz ik tzeʼn bʼaj tiʼj Job? (Qʼonka twitza tiʼj dibujo tiʼj taqikʼ 7).

⁷ Tajtoq Satanás tuʼn tkubʼ t-ximen Job qa mintiʼtoq in tzalaj Jehová tiʼj ex qa tuʼn jlu otoq tzaj nim nya bʼaʼn tiʼj. Tuʼntzunju, tzaj tiʼn nimxix kyqʼiqʼ tibʼaj ja jatumel in che wantoq qe lajaj tkʼwal Job (Job 1:18, 19). Ax ikx, kutz t-xoʼn qʼaqʼ toj kyaʼj tuʼntzun kykyim qe t-ẍneʼl Job junx kyukʼil qeju in che xqʼuqin kyiʼj (Job 1:16). Tuʼnju kuʼtz kyqʼiqʼ ex qʼaqʼ toj kyaʼj, kubʼ t-ximen Job qa atz tzajni tukʼil Jehová ex qa otoq kubʼ tbʼinchaʼn jun il twitz. Maske kubʼ t-ximen jlu, mintiʼ yolin nya bʼaʼn tiʼj Ttat at toj kyaʼj. El tnikʼ Job tiʼj qa toj nim ambʼil otoq tzaj tqʼoʼn Jehová nim tbʼanel tiʼchaq te ex otoq tzalaj kyiʼj. Ex kubʼ t-ximen qa ax ikx iltoq tiʼj tuʼn t-xi tkʼamoʼn qe tiʼchaq nya bʼaʼn. Tuʼntzunju, tqʼama jlu: «Nimanxwit tbʼi Qman» (Job 1:20, 21; 2:10). Kukx ten Job tzʼaqli twitz Jehová maske naj tqʼinumabʼil, tzaj tbʼis ex tzaj yabʼil tiʼj. Noqtzun tuʼnj, kukx ok tilil tuʼn Satanás tuʼn tkubʼ tiʼj Job.

8. ¿Alkye juntl tramp ajbʼen tuʼn Satanás tuʼn tkubʼ tiʼj Job?

 ⁸ Ajbʼen juntl tramp tuʼn Satanás tuʼn tkubʼ tiʼj Job. E ajbʼen oxe nya bʼaʼn tamiw Job tuʼn tuʼntzun tkubʼ tnaʼn qa mintiʼtoq tajbʼen. Xi kyqʼamaʼn xjal lu te Job qa otoq tzaj nim yajbʼil tiʼj tuʼnju otoq tbʼincha nim nya bʼaʼn (Job 22:5-9). Ax ikx, ok tilil kyuʼn tuʼn tkubʼ t-ximen Job qa mlayx tzalaj Jehová tiʼj maske otoq tzʼok tilil tuʼn tok te tbʼanel xjal ex maske mintiʼ otoq che bʼant nya bʼaʼn tuʼn (Job 4:18; 22:2, 3; 25:4). Kyajtoq xjal tuʼn tkubʼ t-ximen Job qa nyatoq kʼujlaʼn tuʼn Jehová, qa mlaytoq xqʼuqin tiʼj ex qa noqx gan in najbʼen te. Kyuʼn yol lu, kubʼlo t-ximen Job qa mlayx ten jun qʼuqbʼil tkʼuʼj.

9. ¿Tiquʼn kukx ten tipumal Job kyoj ambʼil kwest?

⁹ Qo ximen tiʼjju bʼaj tiʼj Job. Qʼuqli toj tzaʼj ex in tnaʼn kʼixkʼoj qʼijl ex qonikʼen (Job 2:8). Kukx xi kyqʼamaʼn tamiw nya bʼaʼn yol te ex ok tilil kyuʼn tuʼn miʼn tok qʼoʼn toklen. Kubʼ tnaʼn Job nim bʼis toj tanmi kyuʼn nim nya bʼaʼn otoq tzaj tiʼj ex tuʼnju otoq che kyim qe tkʼwal. Tnejel, mintiʼ jun yol tqʼama (Job 2:13–3:1). Qa kubʼ kyximen tamiw Job qa jakutoq tzʼel tpan tibʼ tiʼj Jehová tuʼnju mintiʼ tqʼama jun yol, i el tzpet. ¿Tiquʼn? Tuʼnju pon ambʼil jatumel jaw tiʼn Job chʼin twiʼ ex tqʼama jlu kye: «¡Kukx chin tele tzʼaqli ajxi nkyime!» (Job 27:5, TNM). ¿Tiquʼn kukx ten tipumal Job kyoj ambʼil kwest? Tuʼnju kukx ok qeʼ tkʼuʼj tiʼj qa kʼonil Jehová tiʼj aj tok weʼ kywitz nya bʼaʼn. Ojtzqiʼntoq tuʼn qa maske ma kyim, jakutoq jaw anqʼin juntl maj tuʼn Jehová (Job 14:13-15).

10. ¿Tiʼ in tzaj tyekʼin qe aju bʼaj tiʼj Job?

¹⁰ Aju bʼaj tiʼj Job in tzaj tyekʼin qe qa  mlayx qo kyaj tkolin Jehová ex qa mlayx tzʼok t-obligarin Satanás qoʼ tuʼn tel qpan qibʼ tiʼj. Aju ikʼ tiʼj Job, ax ikx in tzaj tyekʼin junjuntl tbʼanel xnaqʼtzbʼil qe. Qo xnaqʼtzan kyiʼj junjun.

11. ¿Tiʼ kbʼajel qa kukx ma tzʼok qeʼ qkʼuʼj tiʼj Jehová? (Santiago 4:7).

¹¹ Kubʼ tyekʼin Job qa jaku kubʼ tiʼj Satanás quʼn ex qa jaku tzikʼx alkyexku nya bʼaʼn quʼn qa ma tzʼok qeʼ qkʼuʼj tiʼj Jehová. ¿Ex tiʼ kbʼajel qa ma bʼant jlu quʼn? In tzaj tqʼamaʼn Tyol Dios qa kʼelel oq Satanás qiʼj (kjawil uʼjit Santiago 4:7).

12. ¿Tzeʼn onin tiʼj Job tej tok qeʼ tkʼuʼj tiʼj qa che kjawil anqʼin kyimni?

¹² Bʼaʼn tuʼn tok qeʼ qkʼuʼj tiʼj qa che kjawil anqʼin kyimni. Ik tzeʼn el qnikʼ tiʼj toj xnaqʼtzbʼil ma kyaj, in nok tilil tuʼn Satanás tuʼn qtzaj xobʼ te kamik tuʼntzun miʼn qten tzʼaqli twitz Jehová. Qo ximen tiʼjju bʼant tuʼn tiʼj Job. Tqʼama Satanás qa jaku bʼant alkyexku tiʼ tuʼn Job noq tuʼn kukx tanqʼin, axpe ikx qa jaku tzʼel tpan tibʼ tiʼj Jehová. Pero el tzpet Satanás tej tkubʼ t-ximen jlu. ¿Tiquʼn? Tuʼnju kukx ten Job tzʼaqli twitz Jehová kyoj ambʼil kwest, axpe ikx tej tkubʼ t-ximen qa tuʼn tkyim. ¿Tiquʼn ikʼx nim nya bʼaʼn tuʼn? Tuʼnju ok qeʼ tkʼuʼj tiʼj qa tbʼanel te Jehová ex qa aj tikʼ ambʼil, kxel tbʼinchaʼn kyiʼj nya bʼaʼn. Ax ikx, ok qeʼ tkʼuʼj tiʼj qa jakutoq jaw anqʼin tuʼn Jehová toj ambʼil tzul qa mlaytoq bʼant tuʼn t-xi tbʼinchaʼn kyiʼj nya bʼaʼn toj ambʼil aju. Ok qeʼ tkʼuʼj Job tiʼj qa ax tok che kjawil anqʼin kyimni. Ax ikx qe, qa ma tzʼok qeʼ qkʼuʼj tiʼj qa che kjawil anqʼin kyimni, mlay qo tzaj xobʼ te kamik ex kukx qo tel tzʼaqli twitz Jehová.

13. ¿Tiquʼn bʼaʼn tuʼn tok qqʼoʼn qwiʼ kyiʼj tramp e ajbʼen tuʼn Satanás tiʼj Job?

¹³ Bʼaʼn tuʼn tok qqʼoʼn qwiʼ kyiʼj tramp e ajbʼen tuʼn Satanás tiʼj Job tuʼnju chʼixmi aʼyex jlu in che ajbʼen tuʼn toj ambʼil jaʼlo. Qqʼonk qwiʼ tiʼj nya bʼaʼn yol tqʼama kyiʼj kykyaqil xjal ex nya oʼkx tiʼj Job. Tqʼama jlu: «Jaku txi tqʼoʼn [xjal] tkyaqilju at te noq tuʼn kukx tanqʼin» (Job 2:4, 5). Kyuʼn yol lu, tqʼama Satanás qa nya ax tok kʼujlaʼn Jehová quʼn ex qa jaku tzʼel qpan qibʼ tiʼj qa ma qo ok weʼ twitz kamik. Ax ikx tqʼama qa nya kʼujlaʼn qoʼ tuʼn Jehová ex qa mintiʼ in tzalaj tiʼjju in bʼant quʼn. Tuʼnju qʼuqli qkʼuʼj tiʼj Jehová ex tuʼnju ojtzqiʼn quʼn alkyeqe tramp in che ajbʼen tuʼn Satanás, mintiʼ in xi qqʼoʼn ambʼil te tuʼn tsbʼun qiʼj.

14. ¿Tiʼ jaku tzʼel qnikʼ tiʼj aj qikʼ toj jun nya bʼaʼn ex alkye techel in nonin qiʼj tuʼn tel qnikʼ tiʼj?

¹⁴ Aj qok weʼ kywitz nya bʼaʼn, bʼaʼn tuʼn tajbʼen ambʼil lu quʼn tuʼn tok qojtzqiʼn alkyeqe qmod ateʼ. Tej kytzaj nya bʼaʼn tiʼj Job, el tnikʼ tiʼj qa iltoq tiʼj tuʼn taqʼunan tuʼn kyten junjuntl tbʼanel tmod. Jun techel, el tnikʼ tiʼj qa iltoq tiʼj tuʼn tkubʼ tiʼn mas tibʼ (Job 42:3). Ax ikx qe, jaku tzʼel qnikʼ tiʼj alkyeqe qmod il tiʼj tuʼn kyten aj qikʼ kyoj nya bʼaʼn. Atzun jlu bʼaj tiʼj Nikolái tej tokx qʼoʼn toj cárcel maske attoq yabʼil tiʼj. * Tqʼama jlu: «Aj qxiʼ toj cárcel, in nok jlu ik tzeʼn aj tetz jun radiografía qiʼj tuʼnju in nonin qiʼj tuʼn tel qnikʼ tiʼj alkyeqe qmod at». Aj tel qnikʼ tiʼj alkyeqe qmod il tiʼj tuʼn kyten, jaku tzʼok tilil quʼn tuʼn qaqʼunan kyiʼj.

15. ¿Alqiʼj kʼokel qqʼoʼn qwiʼ ex tiquʼn?

¹⁵ Il tiʼj tuʼn tok qqʼoʼn qwiʼ tiʼjju in tzaj tqʼamaʼn Jehová qe ex nya tiʼjju in tzaj kyqʼamaʼn aj qʼoj qiʼj. Atzun jlu bʼant tuʼn Job tej ttzaj yolin Jehová te. Tuʼn t-ximen Job, xi tqʼamaʼn Jehová mas  o menos qe yol lu te: «¿Ope tzʼok tkeʼyina wipumale tiʼj tkyaqilju o kubʼ nbʼinchaʼne? Ojtzqiʼn wuʼne tkyaqilju o bʼaj tiʼja. ¿In kubʼpe t-ximana qa mlay chin xqʼuqine tiʼja?». Kubʼ tin tibʼ Job ex xi tqʼoʼn chjonte tuʼnju tbʼanel te Jehová tmod ex tqʼama jlu: «Nej noq jun tqanil o nbʼiye tiʼja, atzun jaʼlo aku qine in chin keʼyin teya» (Job 42:5). Tej tqʼama Job qe yol lu, bʼalo kukx qʼuqli toj tzaʼj, nojni tiʼj t-xmilal tuʼn txʼaʼk ex in bʼisintoq tuʼnju otoq che kyim tkʼwal. Tojtzun ambʼil lu xi tqʼamaʼn Jehová te qa kʼujlaʼntoq  uʼn ex qa in tzalajtoq tiʼj (Job 42:7, 8).

16. Ik tzeʼn in tzaj tqʼamaʼn Isaías 49:15 ex 16, ¿tiʼ il tiʼj tuʼn ttzaj qnaʼn aj qikʼ kyoj nya bʼaʼn?

¹⁶ Toj ambʼil jaʼlo, atlo maj in che ok ten xjal xmayil qiʼj ex kyaj tuʼn tkubʼ qximen qa mintiʼ qajbʼen. In noklo tilil kyuʼn tuʼn tkubʼ kyximen txqantl qa nya bʼaʼn xjal qoʼ moqa jaku che yolin nya bʼaʼn tiʼj ttnam Jehová (Mat. 5:11). Aju txʼolbʼabʼil tiʼj Job, in tzaj tyekʼin qe qa qʼuqli tkʼuʼj Jehová tiʼj qa jaku qo ten tzʼaqli twitz aj qikʼ toj nya bʼaʼn. Kʼujlaʼn qoʼ tuʼn Jehová ex kukx tzul tnaʼn qeju in nok qeʼ kykʼuʼj tiʼj (kjawil uʼjit Isaías 49:15, 16). Tuʼntzunju, miʼn tzʼok qqʼoʼn qwiʼ kyiʼj nya ax tok yol in tzaj kyqʼamaʼn aj qʼoj tiʼj Dios. Qbʼinx aju tqʼama James, jun ermano te Turquía aju o tzikʼ toj nim nya bʼaʼn junx kyukʼil toj tja. Tqʼama jlu: «El qnikʼe tiʼj qa jakutoq tzaj bʼaj qkʼuʼje qa ma tzʼok qqʼoʼn qwiʼye kyiʼj nya ax tok yol in tzaj kyqʼamaʼn xjal tiʼj ttnam Jehová. Tuʼntzunju,  o ximane tiʼj qʼuqbʼil qkʼuʼj in tzaj tqʼoʼn Tkawbʼil Dios ex ok tilil quʼne tuʼn qajbʼene te Jehová, ex tuʼn jlu kubʼ qnaʼne nim tzalajbʼil». Qkanoʼmil aju bʼant tuʼn Job ex qbʼinx aju in tzaj tqʼamaʼn Jehová. Miʼn txi qqʼoʼn ambʼil tuʼn tnaj qʼuqbʼil qkʼuʼj kyuʼn nya ax tok yol in tzaj kyqʼamaʼn aj qʼoj qe.

17. ¿Tiʼ xnaqʼtzbʼil jaku tzʼel qiʼn kyiʼj tmajen Jehová in yolin capítulo 11 te Hebreos tiʼj?

¹⁷ Nya oʼkx Job ten tipumal tuʼn tajbʼen te Jehová tej tok weʼ kywitz nya bʼaʼn. Toj carta xi ttzʼibʼin apóstol Pablo kye okslal aj Hebreo, yolin kyiʼj nim tmajen Jehová ex tqʼama qa at «nim kyajlal testiw ateʼ» qwitz (Heb. 12:1). Maske tzaj nim nya bʼaʼn kyiʼj, kykyaqil e ten tzʼaqli twitz Jehová toj nim ambʼil (Heb. 11:36-40). ¿Noqxpe gan ok tilil kyuʼn ex tej tikʼx kyuʼn? Miʼn. Maske mintiʼ ok kyqʼoʼn kywitz tiʼj tkyaqil ttziybʼil Jehová, kukx o qeʼ kykʼuʼj tiʼj. Ex tuʼnju ok qeʼ kykʼuʼj tiʼj qa in tzalajtoq Jehová kyiʼj, ax ikx ok qeʼ kykʼuʼj tiʼj qa kpol ambʼil tuʼn tok kykeʼyin aj tjapun kywi ttziybʼil Jehová (Heb. 11:4, 5). Qa ma qo ximen tiʼj techel kyaj kyqʼoʼn, jaku ten qipumal tuʼn kukx tok qeʼ qkʼuʼj tiʼj Jehová.

18. ¿Tiʼ kbʼantel quʼn noq tiʼxku kbʼajel toj ambʼil tzul? (Hebreos 11:6).

¹⁸ Mas in chʼiy nya bʼaʼn toj ambʼil jaʼlo (2 Tim. 3:13). Ex kukx in nok tqʼoʼn Satanás qe tmajen Jehová toj joybʼil. Noq tiʼxku kbʼajel toj ambʼil tzul, kukx qo ajbʼen te Jehová ex bʼaʼn tuʼn qximen tiʼj qa «qʼuql qkʼuʼj tiʼj ju Dios itzʼ» (1 Tim. 4:10). Aju bʼaj tiʼj Job te mankbʼil, in tzaj tyekʼin qe qa «ate Qman nim in qʼaqʼan tkʼuʼj ex in tzʼeʼy tkʼuʼj qiʼj» (Sant. 5:11). Kukx qo ten tzʼaqli twitz Jehová ik tzeʼn bʼant tuʼn Job ex qeʼk qkʼuʼj tiʼj qa in che tzaj tkʼiwlaʼn «qeju in che jyon tiʼj» (kjawil uʼjit Hebreos 11:6).