1. Ik tzeʼn in tzaj tqʼamaʼn 1 Pedro 5:2, ¿tiʼ kyoklen ansyan o txi qʼoʼn?

 KʼUJLAʼN qe t-ẍneʼl Jehová tuʼn ex o txi tqʼoʼn kyoklen ansyan tuʼn kyxqʼuqin kyiʼj. In che tzalaj ansyan tuʼnju o tzaj qʼoʼn kyoklen tuʼn kyonin kyiʼj txqantl ex in nok tilil kyuʼn tuʼn tjapun twi kyoklen (Jer. 23:4; kjawil uʼjit 1 Pedro 5:2). In qo tzalaj tuʼnju in nok tilil kyuʼn ansyan tuʼn kyxqʼuqin qiʼj.

2. ¿Alkye junjun nya bʼaʼn in che ok weʼ ansyan twitz?

² In che ok weʼ ansyan kywitz ambʼil kwest aj tok tilil kyuʼn tuʼn tjapun twi kyoklen. Jun techel, il tiʼj tuʼn tbʼant nim aqʼuntl kyuʼn tuʼn kyxqʼuqin tiʼj congregación. Qo yolin tiʼjju bʼaj tiʼj Tony, jun ansyan te Estados Unidos. El tnikʼ tiʼj qa nya toj tumel tuʼn ttzaj tkʼamoʼn mas oklenj twitzju jakutoq bʼant tuʼn. Tqʼama Tony jlu: «Tej t-xi tzyet pandemia te COVID-19, ok tilil wuʼne tuʼn t-xi nbʼinchaʼne tkyaqil aqʼuntl tuʼn tbʼaj nukʼet chmabʼil ex pakbʼabʼil. Maske ok tilil wuʼne, attoq nim aqʼuntl tuʼn t-xi bʼinchet. Tuʼn jlu, ya mintiʼ el npaʼne nim ambʼil tuʼn nxnaqʼtzane tiʼj Biblia, tuʼn nxnaqʼtzane njunalxe ex tuʼn nnaʼne Dios». Atzunte Ilir, jun ansyan in nanqʼin toj tnam Kosovo junxitl nya bʼaʼn ok weʼ twitz. Otoq tzaj qʼoj jatumel in nanqʼin ex kwest ela toj twitz tuʼn t-xi tbʼiʼn tqanil tzaj tqʼoʼn ttnam Jehová. Tqʼama jlu: «In tzaj xobʼe tej ttzaj tqʼamaʼn sucursal weye tuʼn wonine kyiʼj erman jatumel at nim nya bʼaʼn. Kwest ela toj nwitze tuʼn miʼn ntzaj xobʼe ex kubʼ nximane qa nya toj tumel qe tqanil». Atzunte Tim, jun misionero te Asia, tzaj tqʼamaʼn qa kwest ela toj twitz tuʼn tjapun twi tkyaqil toklen tuʼn. Tqʼama jlu: «At maj, kwest ela toj nwitze tuʼn wonine kyiʼj erman tuʼnju otoq chin sikte». ¿Tiʼ jaku bʼant kyuʼn ansyan aj tbʼaj jlu kyiʼj?

3. ¿Tiquʼn bʼaʼn tuʼn qxnaqʼtzan tiʼj techel kyaj tqʼoʼn Gedeón?

 ³ Jaku tzʼel kykanoʼn ansyan tiʼj tbʼanel techel kyaj tqʼoʼn jwes Gedeón (Heb. 6:12; 11:32). Onin kyiʼj tmajen Dios ex xqʼuqin kyiʼj (Juec. 2:16; 1 Crón. 17:6). Chʼixme ax aqʼuntl in bʼant kyuʼn ansyan toj ambʼil jaʼlo ik tzeʼn te Gedeón. Il tiʼj tuʼn kyxqʼuqin kyiʼj tmajen Dios kyoj ambʼil kwest in qo anqʼin kyoj (Hech. 20:28; 2 Tim. 3:1). Jaku tzʼel kyiʼn tbʼanel xnaqʼtzbʼil tiʼj Gedeón qa ma che ximen kyiʼj tbʼanel tmod ik tzeʼn tej tkubʼ tin tibʼ ex tej tnimen. Ax ikx, kʼonil techel kyaj tqʼoʼn Gedeón kyiʼj txqantl erman toj congregación tuʼn tok kyqʼoʼn toklen kyaqʼun ansyan ex tuʼn kyonin kyiʼj (Heb. 13:17).

4. ¿Tzeʼn kubʼ tyekʼin Gedeón qa mintiʼ jaw tnimsan tibʼ?

⁴ Mintiʼ jaw tnimsan tibʼ Gedeón ex el tnikʼ tiʼj qa mlaytoq bʼant tkyaqil tuʼn. b Toj jun ambʼil, e kawin xjal te Madián kyibʼaj xjal te Israel. Tuʼntzunju, xi tqʼamaʼn jun anjel te Gedeón qa otoq jaw skʼoʼn tuʼn Jehová tuʼn tkolin tiʼj ttnam. Pero tqʼama jlu: «Qe xjal at nxilene kyukʼil atzun qe mas tal yaj qe kyxol tiyjil Manasés, ex aqine mas chʼin woklene kywitz qe txqantl wermaniye» (Juec. 6:15). Kubʼ t-ximen Gedeón qa mlaytoq bʼant aqʼuntl tuʼn, pero el tnikʼ Jehová tiʼj qa jakutoq bʼant tuʼn ex onin tiʼj.

5. ¿Toj alkye ambʼil kwest jaku tzʼela toj twitz jun ansyan tuʼn tkubʼ tin tibʼ?

⁵ In nok tilil kyuʼn ansyan tuʼn tten kyximbʼetz toj tumel kyiʼjx (Miq. 6:8; Hech. 20:18, 19). Mintiʼ in jaw kynimsan kyibʼ tiʼjju jaku bʼant kyuʼn ex mintiʼ in kubʼ kyximen qa mintiʼ kyajbʼen noq tuʼnju in che el txalpaj. Pero atlo maj kwest jaku tzʼela toj twitz jun ansyan tuʼn tkubʼ tin tibʼ. Qo ximen kyiʼj junjun techel. Jakulo txi tqʼamaʼn jun ansyan qa kxel tbʼinchaʼn junjun oklenj, pero yajxitl in nel tnikʼ tiʼj qa mlay bʼant tuʼn. Ax ikx, jakulo txi qʼamaʼn tbʼanel yol te kyuʼn txqantl moqa jaku che yolin nya bʼaʼn tiʼj tuʼnju alkye tten in che bʼant junjun tiʼchaq tuʼn. Aj tbʼaj jlu, ¿tzeʼn jaku tzʼel tkanoʼn tiʼj techel kyaj tqʼoʼn Gedeón?

6. ¿Tzeʼn jaku kubʼ kyyekʼin ansyan qa in kubʼ kyin kyibʼ ik tzeʼn te Gedeón? (Ax ikx qʼonka twitza tiʼj foto).

⁶ Kyqaninxe onbʼil. Qa in kubʼ tiʼn tibʼ jun  xjal, in nel tnikʼ tiʼj qa mlay bʼant tkyaqil tuʼn. Atzun jlu bʼant tuʼn Gedeón, tuʼntzunju xi tqanin onbʼil kye txqantl (Juec. 6:27, 35; 7:24). Qa at tnabʼil jun ansyan, ax jlu in bʼant tuʼn. In tzaj tqʼamaʼn Tony jlu, aju ma qo yolin tiʼj toj párrafo 2: «Tuʼnju alkye tten in jaw chʼiye, in xitoq nkʼamoʼne mas aqʼuntl twitzju jakutoq bʼant wuʼne. Tuʼntzunju, o yoline toj adoración en familia tiʼjju jakutoq bʼant quʼne ex xi nqanine te nxuʼjile tiʼ t-ximbʼetz tiʼj. Ax ikx, in nokxe toj jw.org ex ok nkeʼyine juntl maj video tok tbʼi: Qxnaqʼtzanx qe txqantl ex qeʼk qkʼuʼj kyiʼj ik tzeʼn bʼant tuʼn Jesús». Xi tqanin Tony onbʼil kye txqantl ex in tzaj tqʼamaʼn tiʼ bʼaj yajxitl: «In xi bʼinchet qe aqʼuntl toj congregación ex at mas ambʼil wiʼje tuʼn tok nxqʼuqine wamiwbʼile tukʼil Jehová».

7. ¿Tzeʼn jaku tzʼel kykanoʼn ansyan tiʼj Gedeón aj kyyolin txqantl nya bʼaʼn kyiʼj? (Santiago 3:13).

⁷ Miʼn tzaj kyqʼoje aj kyyolin txqantl kyiʼje. Jakulo tzaj kyqʼoj ansyan aj kyyolin txqantl kyiʼj. Aj tbʼaj jlu, ax ikx jaku tzʼonin techel kyaj tqʼoʼn Gedeón kyiʼj. El tnikʼ Gedeón tiʼj qa nya tzʼaqli ex mintiʼ tzaj tqʼoj tej kyyolin xjal te Efraín nya bʼaʼn tiʼj (Juec. 8:1-3). Kubʼ tyekʼin qa kubʼ tin tibʼ tej kyok tbʼiʼn ex tukʼil tbʼanel tmod jyon tiʼj mujbʼabʼil. Qa at kynabʼil ansyan in nel kykanoʼn tiʼj Gedeón. Aj kyok ten txqantl yolil nya bʼaʼn kyiʼj, in che ok kybʼiʼn ex in xi kyqʼoʼn jun tzaqʼwebʼil toj tumel kye (kjawil uʼjit Santiago 3:13). Aj tbʼant jlu kyuʼn, in che onin tuʼn tten mujbʼabʼil toj congregación.

8. ¿Tiʼ jaku bʼant kyuʼn ansyan aj t-xi qʼamaʼn tbʼanel yol kye? Qʼamantza jun techel.

⁸ Bʼaʼn tuʼn tjaw kynimsaʼne Jehová. Jaw nimsaʼn Gedeón kyuʼn txqantl tej tkubʼ kyiʼj xjal te Madián tuʼn, pero onin kyiʼj tuʼn tjaw kynimsaʼn Jehová (Juec. 8:22, 23). ¿Tzeʼn jaku tzʼel kykanoʼn ansyan tiʼj techel kyaj tqʼoʼn Gedeón? Jaku tzʼel kykanoʼn tiʼj aj tjaw kynimsaʼn Jehová aj tbʼant jun tiʼ kyuʼn (1 Cor. 4:6, 7). Jun techel, qa ma txi qʼamaʼn te jun ansyan qa tbʼanel qʼon xnaqʼtzbʼil, jaku txi tqʼamaʼn qa atz in jatz tkyaqil toj Biblia ex kyoj uʼj in che etz tuʼn ttnam Jehová. Tbʼanel qa ma che ximen ansyan tiʼj qa in jaw kynimsaʼn Jehová aj kyqʼon xnaqʼtzbʼil moqa oʼkx kyaj tuʼn tok kyqʼoʼn txqantl kywitz kyiʼj. Qo ximen tiʼjju bʼaj tiʼj jun erman Timothy tbʼi. Tej t-xi qʼoʼn toklen te ansyan, tgantoq tuʼn tex tqʼoʼn chikʼbʼabʼil kye xjal. Tqʼama jlu: «In ximane tiʼj alkyeqe techel tuʼn kyajbʼen wuʼne ex in yoline nim ambʼil kyiʼj toj chikʼbʼabʼil. Tuʼntzunju, tzaj kyqʼamaʼn erman tbʼanel yol weye. Bʼisbʼajil, tuʼnju jaw kynimsaʼn erman qine ex nya a Jehová ex Tyol». Tej tikʼ ambʼil, el tnikʼ Timothy tiʼj qa iltoq tiʼj tuʼn kybʼant junjun chʼixpubʼil tuʼn tuʼntzun miʼn tok kyqʼoʼn txqantl kywitz tiʼj (Prov. 27:21). ¿Tiʼ bʼaj tej tbʼant jlu tuʼn? Tqʼama jlu: «Jaʼlo, in tzaj kyqʼamaʼn erman weye tzeʼn in che onin nchikʼbʼabʼile kyiʼj tuʼn kyex twitz jun nya bʼaʼn, tuʼn tikʼx jun prueba kyuʼn moqa tuʼn kyok laqʼeʼ mas ttxlaj Jehová. Mas in chin tzalaje tiʼj kyyol erman in tzaj kyqʼamaʼn weye jaʼlo twitz ojtxe».

9. ¿Toj alkye ambʼil iltoq tiʼj tuʼn tkubʼ tyekʼin Gedeón qa bʼaʼn nimen ex qa at tipumal? (Qʼonka twitza tiʼj dibujo tok tiʼj revista).

⁹ Tej otoq txi qʼoʼn toklen Gedeón te jwes, iltoq tiʼj tuʼn tkubʼ tyekʼin qa bʼaʼn nimen ex qa at tipumal. ¿Tiquʼn? Tuʼnju xi qʼamaʼn te tuʼn tkubʼ t-xiten t-altar Baal otoq kubʼ tbʼinchaʼn tman ex jakutoq tzaj nya bʼaʼn tiʼj (Juec. 6:25, 26). Yajxitl, xi tqʼamaʼn Jehová kabʼe maj te Gedeón tuʼn miʼn tten nim tsoldad (Juec. 7:2-7). Ex te bʼajsbʼil, xi tqʼamaʼn Jehová te tuʼn kyok tzoqpaj kyiʼj aj qʼoj toj tmij aqʼbʼil (Juec. 7:9-11).

10. ¿Toj alkye ambʼil kwest jaku tzʼela toj twitz jun ansyan tuʼn tnimen?

 ¹⁰ Tbʼanel qa ma tzʼok tilil kyuʼn ansyan tuʼn kynimen (Sant. 3:17). Qa bʼaʼn nimen jun ansyan, in xi tbʼiʼn aju in tzaj tqʼamaʼn Biblia ex ttnam Jehová. Iktzun tten in kubʼ tqʼoʼn jun tbʼanel techel kywitz txqantl. Pero atlo maj kwest jaku tzʼela toj twitz tuʼn t-xnaqʼtzan kyiʼj kykyaqil tqanil ex tuʼn t-xi tnimen. Ex jakulo kubʼ t-xjelin qa bʼaʼn tuʼn t-xi tnimen jun tqanil moqa nya. Ax ikx, jakulo txi qanin te tuʼn tbʼant jun tiʼ tuʼn maske jaku tzʼokx qʼoʼn toj cárcel. Aj kyok weʼ ansyan kywitz ambʼil kwest ik tzeʼn jlu, ¿tzeʼn jaku che nimen ik tzeʼn te Gedeón?

11. ¿Tiʼ jaku tzʼonin kyiʼj ansyan tuʼn kynimen?

¹¹ Kyqʼonke kywiʼye kyiʼj tqanil ex che lepeke tiʼj. Xi tqʼamaʼn Jehová te Gedeón tzeʼn tuʼn tkubʼ t-xiten t-altar tman, jatumel tuʼn tjaw tbʼinchaʼn juntl ex alkyeqe alumaj tuʼn t-xi tqʼoʼn te oyaj. Mintiʼ yolin Gedeón nya bʼaʼn kyiʼj tqanil tzaj tqʼoʼn Jehová te, sino jun rat xi tbʼiʼn. Toj ambʼil jaʼlo, in tzaj samaʼn tqanil kye ansyan tuʼn ttnam Jehová kyoj carta, qe anuncio ex kyoj junjuntl tumel. In che tzaj qʼoʼn tqanil lu tuʼn tten jun tbʼanel qamiwbʼil tukʼil Jehová ex tuʼn qten bʼaʼn. Kʼujlaʼn qe ansyan quʼn tuʼnju in xi kybʼiʼn aju in tzaj tqʼamaʼn ttnam Jehová. Aj tbʼant jlu kyuʼn, in tzaj tkʼamoʼn congregación nim kʼiwlabʼil (Sal. 119:112).

12. ¿Tzeʼn jaku txi kybʼiʼn ansyan aju in tzaj tqʼamaʼn Hebreos 13:17 aj ttzaj tqʼamaʼn ttnam Jehová jun chʼixpubʼil?

¹² Bʼaʼn tuʼn kynaqʼete kyiʼj chʼixpubʼil. Bʼaʼn tuʼn ttzaj qnaʼn qa xi tqʼamaʼn Jehová te Gedeón tuʼn kymeltzʼaj chʼixme kykyaqil tsoldad kyja (Juec. 7:8). Kubʼlo t-ximen Gedeón jlu: «¿Ilpe tiʼj tuʼn tbʼant jlu wuʼne? ¿Bʼaʼnpe kʼelel tkyaqil?». Maske ikju, xi tbʼiʼn Gedeón tyol Jehová. ¿Tzeʼn jaku tzʼel kykanoʼn ansyan tiʼj techel kyaj tqʼoʼn? Jaku bʼant kyuʼn aj kyok lepeʼ kyiʼj chʼixpubʼil in bʼant tuʼn ttnam Jehová (kjawil uʼjit Hebreos 13:17). Jun techel, toj 2014 tzaj tqʼamaʼn cuerpo gobernante juntl tumel tzeʼn tuʼn tajbʼen pwaq tuʼn kyjaw bʼinchet Ja te Chmabʼil ex te nimaq chmabʼil (2 Cor. 8:12-14). Tnejel, xi qʼoʼn pwaq te majen kye congregación tuʼn tjaw kybʼinchaʼn Ja te Chmabʼil. Pero toj ambʼil jaʼlo, in najbʼen pwaq in tzaj kyqʼoʼn kykyaqil congregación tuʼn kyjaw bʼinchet Ja te Chmabʼil ex te nimaq chmabʼil toj alkyexku lugar, axpe ikx qa noq chʼin pwaq jaku tzaj kyqʼoʼn junjun congregación. In tzaj tqʼamaʼn jun ansyan José tbʼi qa tej tok tbʼiʼn chʼixpubʼil lu mintiʼ ok qeʼ tkʼuʼj tiʼj. Kubʼ t-ximen jlu: «Tbʼanel chʼixpubʼil jlu kyoj junjuntl tnam, pero tzalu mlay bʼant. Mlayx bʼant jun Ja te Chmabʼil». Noqtzun tuʼnj, onin tiʼj akʼaj chʼixpubʼil. ¿Tiquʼn? Tqʼama jlu: «Tzaj nnaʼne qa il tiʼj tuʼn tok qeʼ nkʼuʼje tiʼj Jehová ik tzeʼn in tzaj tqʼamaʼn Proverbios 3:5 ex 6. Ex tbʼanelxix o tzʼok jlu. Nya oʼkx o che bʼant mas Ja te Chmabʼil, sino ax ikx jaku che bʼant kyok  kykyaqil lugar maske nya nim kypwaq erman at».

13. a) ¿Tiʼ ok qeʼ tkʼuʼj Gedeón tiʼj? b) ¿Tiʼ jaku bʼant kyuʼn ansyan tuʼn tel kykanoʼn tiʼj? (Ax ikx qʼonka twitza tiʼj foto).

¹³ Tenx kyipune tuʼn t-xi kybʼinchaʼne tajbʼil Jehová. Xi tbʼiʼn Gedeón tyol Jehová maske tzaj xobʼ ex ok weʼ twitz nya bʼaʼn (Juec. 9:17). Noqtzun tuʼnj, onin Jehová tiʼj Gedeón tuʼn tok qeʼ tkʼuʼj tiʼj qa kʼoniltoq tiʼj tuʼn t-xqʼuqin tiʼj ttnam. Aqeju ansyan in che anqʼin kyoj lugar jatumel mintiʼ in tzaj qʼoʼn ambʼil qe tuʼn qajbʼen te Jehová, in kubʼ kyyekʼin tbʼanel kymod ik tzeʼn te Gedeón. In kubʼ kyyekʼin qa mintiʼ in che tzaj xobʼ aj kyok chmabʼil kyuʼn, aj kypakbʼan maske jaku chex qʼiʼn toj cárcel, aj kyok toj xjel kyuʼn polisiy, aj tok bʼinchaʼn nya bʼaʼn kyiʼj moqa aj tel qʼiʼn kyaqʼun. c Toj ambʼil te nimxix yajbʼil, nim toklen tuʼn miʼn kytzaj xobʼ ansyan tuʼntzun t-xi kybʼiʼn tqanil tzul qʼoʼn kye maske jaku tzaj nya bʼaʼn kyiʼj. Aʼyeju tqanil che ul samaʼn kye, atlo kyoklen tukʼil pakbʼabʼil in nok ik tzeʼn saqbʼaqin moqa tukʼilju jaku bʼant quʼn aj tok tzoqpaj Gog te Magog qiʼj (Ezeq. 38:18; Apoc. 16:21).

14. ¿Tzeʼn kubʼ tyekʼin Gedeón qa kukx ikʼx tuʼn?

¹⁴ Bʼant nim aqʼuntl tuʼn Gedeón tej tajbʼen te jwes toj Israel. Tej tqʼojin kyukʼil xjal te Madián toj qonikʼen, xi lepeʼ kyiʼj toj chqʼajlaj te Jezreel tuʼn tpon tzmax ttzi río Jordán. Ex bʼalo attoq nim kʼul ex chʼix ttzi río lu (Juec. 7:22). Noqtzun tuʼnj, kukx ok lepeʼ kyiʼj soldad te Madián kyukʼil 300 xjal e xiʼ tukʼil ex bʼant jlu kyuʼn maske otoq che sikt. Te mankbʼil, kubʼ kyiʼj kyuʼn ex e kambʼan kyiʼj (Juec. 8:4-12).

15. ¿Tiquʼn at maj kwest jaku tzʼela toj twitz jun ansyan tuʼn tikʼx tuʼn?

¹⁵ Jaku kubʼ tnaʼn jun ansyan nim siktleʼn tuʼnju il tiʼj tuʼn t-xqʼuqin kyiʼj toj tja ex tiʼj congregación. Qa a jlu in bʼaj tiʼja, ¿tzeʼn jaku tzʼel tkanoʼna tiʼj techel kyaj tqʼoʼn Gedeón?

16, 17. a) ¿Tiʼ onin tiʼj Gedeón tuʼn tikʼx tuʼn? b) ¿Tiʼ jaku tzʼok qeʼ kykʼuʼj ansyan tiʼj? (Isaías 40:28-31; ax ikx qʼonka twitza tiʼj foto).

 ¹⁶ Qeʼk kykʼuʼje tiʼj qa tzul qʼoʼn kyipumale tuʼn Jehová. Atzun jlu bʼant tuʼn Gedeón ex mintiʼ tzaj tbʼis tuʼn Jehová (Juec. 6:14, 34). Toj jun ambʼil, bʼalo kyjax kabʼe rey te Madián kyibʼaj kamey ex i el oq twitz Gedeón ex qe tsoldad, pero e xi lepeʼ kyiʼj tuʼn kyqan (Juec. 8:12, 21). Ex tuʼn tonbʼil Jehová, kubʼ kyiʼj kyuʼn ex e kambʼan kyiʼj. Toj ambʼil jaʼlo, ax ikx jaku tzʼok qeʼ kykʼuʼj ansyan tiʼj Jehová aju Dios «mintiʼ in sikt». Jaku tzʼok qeʼ kykʼuʼj tiʼj qa tzul tqʼoʼn kyipumal (kjawil uʼjit Isaías 40:28-31).

¹⁷ Qo yolin tiʼj Matthew, jun erman at kyxol Kʼloj Yolil kyukʼil aj Qʼanil. ¿Tiʼ in nonin tiʼj tuʼn tikʼx tuʼn? Tqʼama jlu: «O tzʼok nqʼoʼne nwitze tiʼj qa ax tok in japun kywi yol tkuʼx toj Filipenses 4:13. Aj tkubʼ nnaʼne nim siktleʼn, in chin kubʼsane twitz Jehová tuʼn ttzaj tqʼoʼn wipumale tuʼntzun wonine kyiʼj erman. Aj tbʼant jlu wuʼne, in nel nnikʼe tiʼj tzeʼn in tzaj tqʼoʼn Jehová wipumale tuʼn tikʼx wuʼne». Ik tzeʼn te Gedeón, in bʼant nim aqʼuntl kyuʼn ansyan tuʼn kyxqʼuqin kyiʼj tmajen Jehová ex at maj kwest tuʼn tbʼant jlu kyuʼn. Noqtzun tuʼnj, il tiʼj tuʼn tel kynikʼ ansyan tiʼj qa atlo maj mlay bʼant tkyaqilju in kubʼ kyximen tuʼn tbʼant kyuʼn. Pero noq tiʼxku jaku bʼaj, jaku tzʼok qeʼ kykʼuʼj ansyan tiʼj qa tzul ttzaqʼweʼn Jehová kynaʼj Dios ex qa tzul tqʼoʼn kyipumal (Sal. 116:1; Filip. 2:13).

18. Ik tzeʼn ma tzʼel qnikʼ tiʼj, ¿tzeʼn jaku tzʼel kykanoʼn ansyan tiʼj techel kyaj tqʼoʼn Gedeón?

¹⁸ Ik tzeʼn ma tzʼel qnikʼ tiʼj, jaku tzʼel kyiʼn ansyan tbʼanel xnaqʼtzbʼil tiʼj techel kyaj tqʼoʼn Gedeón. Nim toklen tuʼn miʼn tjaw kynimsan kyibʼ ex tuʼn tel kynikʼ tiʼj alkyeqe oklenj jaku tzaj kykʼamoʼn ex tiʼ tzaqʼwebʼil kyxel kyqʼoʼn aj t-xi qʼamaʼn tbʼanel yol kye kyuʼn txqantl moqa aj kyyolin nya bʼaʼn kyiʼj. Ax ikx, nim toklen tuʼn kynimen ex tuʼn miʼn kytzaj xobʼ, mas tuʼnju ya chʼix tul xitbʼil. Ex noq tiʼxku jaku bʼaj, tbʼanel qa ma tzʼok qeʼ kykʼuʼj tiʼj qa tzul qʼoʼn kyipumal tuʼn Jehová tuʼn tikʼx kyuʼn. Tuʼntzunju, tbʼanel qa ma che ok qkʼujlaʼn ansyan tuʼnju in bʼant nim aqʼuntl kyuʼn tuʼn kyxqʼuqin qiʼj (Filip. 2:29).