1, 2. ¿Tzeʼn kymod xjal ten toj tqʼijlalil Lot ex tzeʼn kymod at toj ambʼil jaʼlo?

 AJ TOK qkeʼyin kybʼinchbʼen xjal nya bʼaʼn toj ambʼil jaʼlo, jakulo tzaj qbʼis. Atzun jlu kubʼ tnaʼn jun xjal anqʼin toj ambʼil ojtxe ex in yolin Biblia tiʼj. ¿Alqiʼj in qo yolin? Tiʼj Lot. In tzaj tqʼamaʼn Biblia qa «tzaj nimxix tbʼis tuʼn tlaj kybʼinchbʼen xjal mya bʼaʼn» tuʼnju ojtzqiʼntoq tuʼn qa in che el tikʼun Jehová qe xjal in che bʼinchan il (2 Ped. 2:7, 8). Nya oʼkxju, ax ikx el tikʼun Lot nya bʼaʼn kymod xjal tuʼnju kʼujlaʼntoq Jehová tuʼn ex ok tqʼoʼn toklen. Toj ambʼil jaʼlo, ax ikx ya mintiʼ in nok kyqʼoʼn xjal kyoklen tkawbʼil Dios. Maske ikju, jaku qo ten tzʼaqli twitz Jehová qa ma tzʼok qkʼujlaʼn ex qa ma ten tchiylal qiʼj (Prov. 14:2).

² Tuʼn tonin Jehová qiʼj, in tzaj tqʼuqbʼaʼn qkʼuʼj ex in tzaj tqʼoʼn qnabʼil toj uʼj te Proverbios. Ex qkyaqilx jaku tzʼel qiʼn tbʼanel xnaqʼtzbʼil kyiʼj consej tkuʼx toj ik tzeʼn qe xinaq, qe xuʼj, qe kuʼxun ex qeju ma che tijen.

3. Ik tzeʼn in tzaj tqʼamaʼn Proverbios 17:3, ¿tiquʼn nim toklen tuʼn tok qxqʼuqin qximbʼetz? (Ax ikx qʼonka twitza kyiʼj foto).

³ Nim toklen tuʼn tok qxqʼuqin qanmi moqa qximbʼetz tuʼnju in nel tnikʼ Jehová tiʼj. Mlaylo tzʼel kynikʼ txqantl qiʼj, atzunte Jehová ojtzqiʼn tuʼn alkyeqe qximbʼetz ex alkyeqe tiʼchaq qajbʼil (kjawil uʼjit Proverbios 17:3). Aj tok tqʼoʼn Jehová twitz tiʼj qa in nok qqʼoʼn kyoklen tconsej, mas in qo ok tkʼujlaʼn. Qa ma tzʼok qqʼoʼn toklen nabʼil axix tok, mlay txi qqʼoʼn ambʼil tuʼn qkubʼ sbʼuʼn tuʼn Satanás ex qe tiʼchaq ateʼ tjaqʼ tkawbʼil (Juan 4:14; 1 Juan 5:18, 19). Qa mas ma qo ok laqʼeʼ ttxlaj Jehová, mas kchʼiyel qkʼujlabʼil tiʼj ex mas qo respetaril te. Ax ikx, mlay kubʼ qbʼinchaʼn jun tiʼ jaku tzaj tbʼis tuʼn ex mlay kubʼ qximen tuʼn tkubʼ qbʼinchaʼn jun nya bʼaʼn toj twitz. Tuʼntzunju, bʼaʼn tuʼn  tkubʼ qxjelin jlu aj qok weʼ twitz jun tentación: «¿Tiquʼn kʼokel nbʼinchaʼne nya bʼaʼn tiʼj jun xjal kʼujlaʼn qine tuʼn ex o bʼant nim tiʼchaq tuʼn wiʼje?» (1 Juan 4:9, 10).

4. ¿Tiʼ bʼant tuʼn jun ermana tuʼnju ten tchiylal Jehová tiʼj?

⁴ In tzaj tqʼamaʼn jun ermana te Croacia aju Marta tbʼi qa pon jun ambʼil jatumel tajtoq tuʼn tyaẍin. b Kubʼ ttzʼibʼin jlu: «Kwest ela toj nwitze tuʼn kyten nximbʼetze toj tumel ex tuʼn ya miʼn nximane tiʼj yaẍbʼil. Pero mintiʼ in bʼinchane il tuʼnju ten tchiylal Dios wiʼje». Tzaj tqʼamaʼn Marta qa tuʼnju ten tchiylal Jehová tiʼj, kubʼ ten ximel kyiʼj nya bʼaʼn jakutoq che tzaj tiʼj qa ma bʼinchaʼn il. Ax jlu jaku bʼant quʼn aj qok weʼ twitz jun tentación. Tbʼanel qa ma txi qbʼinchaʼn aju bʼaʼn tuʼntzun miʼn ttzaj tbʼis Jehová quʼn ex tuʼn miʼn txi qnajsaʼn ambʼil tuʼn qkʼulin te te jumajx (Gén. 6:5, 6).

5. ¿Tiʼ xnaqʼtzbʼil jaku tzʼel tiʼna tiʼjju bʼaj tiʼj Leo?

⁵ Qa at tchiylal Jehová tiʼj jun xjal, mintiʼ in nok tamiwen tibʼ kyukʼil xjal in che bʼinchaʼn nya bʼaʼn. Atzun jlu el tnikʼ Leo tiʼj, jun ermano in nanqʼin atz Congo. Tej tikʼ kyaje abʼqʼi tbautisarin, xi tzyet tuʼn tok tamiwen tibʼ kyukʼil xjal in che bʼinchaʼn nya bʼaʼn. Kubʼ t-ximen qa mlaytoq tzaj tbʼis Jehová tuʼn qa mintiʼ ma kubʼ tbʼinchaʼn jun nya bʼaʼn. Pero tej tikʼ ambʼil, xi tzyet tuʼn t-xi tkʼaʼn nim qʼeʼn ex tuʼn tyaẍin ik tzeʼn kye tamiw. Testigo de Jehová qe tman Leo, tuʼntzunju tzaj tnaʼn tkyaqilju xi kyxnaqʼtzaʼn te ex aju tzalajbʼil kubʼ tnaʼn toj ambʼil aju. Kubʼ t-ximen Leo tuʼn tmeltzʼaj juntl maj tukʼil Jehová ex e onin ansyan tiʼj. Toj ambʼil jaʼlo, in najbʼen te ansyan ex in tzalaj tuʼnju in najbʼen te precursor especial.

6. ¿Alkyeqe kabʼe xuʼj qo yolil tiʼj toj xnaqʼtzbʼil lu?

⁶ Atzun jaʼlo, qo xnaqʼtzal tiʼj capítulo 9 te Proverbios jatumel in yolin tiʼj jun xuʼj  mintiʼ tnabʼil ex tiʼj jun xuʼj at tnabʼil. c Qkyaqilx jaku tzʼel qiʼn jun tbʼanel xnaqʼtzbʼil tiʼj capítulo lu. Akux in qo xnaqʼtzan kyiʼj junjuntl párrafo, miʼn tzikʼ tnaʼl quʼn qa oʼkx in che ximen xjal tuʼn kyyaẍin ex tuʼn tok kykeʼyin pornografía (Efes. 4:19). Tuʼntzunju, nim toklen tuʼn tten tchiylal Jehová qiʼj ex tuʼn tel qpan qibʼ tiʼj nya bʼaʼn (Prov. 16:6). Aʼyeju kabʼe xuʼj qo yolil tiʼj in xi kyqʼoʼn txokbʼil kyiʼj «xjal mintiʼ kynabʼl». In xi kyqʼamaʼn kye tuʼn kypon kyja ex tuʼn kywan (Prov. 9:1, 5, 6, 13, 16, 17). Pero junxichaq tiʼ in tzaj kyiʼj xjal in xi kykʼamoʼn txokbʼil in xi tqʼoʼn teyele junjun xuʼj kyiʼj. Qo xnaqʼtzan tiʼj.

7. Ik tzeʼn in tzaj tqʼamaʼn Proverbios 9:13 a 18, ¿tiʼ in bʼaj kyiʼj xjal in xi kykʼamoʼn txokbʼil in xi tqʼoʼn xuʼj mintiʼ tnabʼil? (Ax ikx qʼonka twitza tiʼj dibujo).

⁷ Qo yolin tiʼj txokbʼil in tzaj tqʼoʼn «xuʼj mintiʼ tnabʼl» (kjawil uʼjit Proverbios 9:13-18). Mintiʼ in tzaj tchʼixwi aj t-xi tqʼoʼn txokbʼil lu: «Kytzaje aqeye [...] naʼnx tok kynabʼle». Qa ma txi tbʼiʼn jun xjal txokbʼil lu, ¿tiʼ kbʼajel tiʼj? In tzaj tqʼamaʼn Tyol Dios jlu: «Mintiʼ bʼaʼn kyuʼn xjal qa atzun taʼ kamik tuj tja xuʼj lu». Tej naʼmxtoq ttzaj tqʼamaʼn uʼj te Proverbios techel lu, otoq yolin tiʼj «xuʼj aj pajil» ex tiʼj jun xuʼj «mejor xmoxin» kyoj capítulo otoq che kyaj. In tzaj tqʼamaʼn Biblia jlu: «Aju bʼe in pon tja ju xuʼj lu, atzun bʼe te kamik» (Prov. 2:11-19). Ex in tzaj tqʼamaʼn Proverbios 5:3 a 10 qa nim toklen tuʼn tok qxqʼuqin qibʼ tiʼj juntl xuʼj tuʼnju «in xiʼ tuj kamik».

8. ¿Tiʼ il tiʼj tuʼn tkubʼ kyximen qeju in xi kybʼiʼn txokbʼil in tzaj tqʼoʼn «xuʼj mintiʼ tnabʼl»?

⁸ Kykyaqil qeju in xi kybʼiʼn txokbʼil in tzaj tqʼoʼn «xuʼj mintiʼ tnabʼl», il tiʼj tuʼn tkubʼ kyximen qa kxel kykʼamoʼn moqa miʼn. ¿Toj alkye ambʼil jaku tzaj tqʼoʼn txokbʼil qiʼj? Jaku bʼant jlu tuʼn aj qok weʼ twitz yaẍbʼil moqa aj tetz yekʼin pornografía toj internet. ¿Tiʼtzun kbʼantel quʼn toj ambʼil lu?

9, 10. ¿Tiquʼn il tiʼj tuʼn tel qikʼun yaẍbʼil?

⁹ Tbʼanel qa ma tzʼel qikʼun yaẍbʼil tuʼntzun miʼn ttzaj nim nya bʼaʼn qiʼj. In tzaj tqʼamaʼn uʼj te Proverbios qa in tzaj tqʼamaʼn «xuʼj mintiʼ tnabʼl» lu: «Aju aʼ elqʼaʼn in tzaj mas chiʼ tkʼanjtz». In tzaj tqʼamaʼn Tyol Dios qa aj tkubʼ kuẍe jun mejebʼleʼn in nok ik tzeʼn jun aʼ in che tzalaj tuʼn (Prov. 5:15-18). Qa o kubʼ mojeʼ jun xinaq tukʼil jun xuʼj, jaku che tzalaj tiʼj ambʼil aj kykubʼ ten junx. Qa ikju, ¿tiʼtzun in kubʼ techlaʼn «aʼ elqʼan»? In kubʼ techlaʼn yaẍbʼil ex in nikʼ jlu kyibʼaj tkawbʼil Dios. Chʼixme tkyaqil maj, toj ewaj in xi kyiʼn eleqʼ qe tiʼchaq, atzun kye xjal in che  yaẍin nya kyaj tuʼn tok kybʼiʼn txqantl. Jakulo tzʼok aʼ lu te chi kye qeju in kubʼ kyximen qa in kubʼ kyewin nya bʼaʼn kybʼinchbʼen. Pero in kubʼ kysbʼuʼn kyibʼ. ¿Tiquʼn? Tuʼnju in nok tqʼoʼn Jehová twitz tiʼj tkyaqil ex mlay kubʼ kysbʼuʼn. Jaku tzaj nimxix kybʼis qa ya mintiʼ in tzalaj Jehová kyiʼj. Ya mlay kubʼ kynaʼn qa in nok aʼ lu te chiʼ, sino te kʼa (1 Cor. 6:9, 10). Pero nya oʼkx jlu.

¹⁰ Kykyaqil qeju in che yaẍin, jakulo tzul jun kykʼwal ex mintiʼ ximen kyuʼn, jakulo tzaj kychʼixwi, kybʼis ex jaku tzaj problem toj kyja. Tuʼn jlu, in nel qnikʼ tiʼj qa mas tbʼanel tuʼn miʼn txi qkʼamoʼn txokbʼil in tzaj tqʼoʼn «xuʼj mintiʼ tnabʼl». Aj tyaẍin jun xjal, nya oʼkx in xi tnajsaʼn tamiwbʼil tukʼil Jehová, sino ax ikx jaku tzʼel tiqin jun yabʼil jaku kyim tuʼn (Prov. 7:23, 26). In kubʼaj capítulo 9 te Proverbios kyukʼil yol lu toj versículo 18: «Qeju in che txkonjtz tuʼn, max kykuʼx qe t-xeʼpun kynajbʼil kyimni». Qa ikju, ¿tiquʼntzun in xi kykʼamoʼn nim xjal txokbʼil in tqʼoʼn xuʼj lu? (Prov. 9:13-18).

11. ¿Tiquʼn nya bʼaʼn tuʼn tok qqʼoʼn qwitz tiʼj pornografía?

¹¹ Jaku tzʼok kykeʼyin xjal pornografía toj alkyexku lugar. In kubʼ kyximen junjun xjal qa bʼaʼn tuʼn tok kykeʼyin, pero nya ax tok jlu. Tuʼnju aj tikʼ ambʼil, in che naqʼet tiʼj, ya mintiʼ in nok kyqʼoʼn kyoklen ex jaku tzaj nya bʼaʼn kyiʼj tuʼn. Nya oʼkxju, ax ikx kwest tuʼn tikʼ tnaʼl kyuʼn aju otoq tzʼok kykeʼyin. Mintiʼ in nonin pornografía kyiʼj xjal tuʼn tel kyikʼun nya bʼaʼn kyajbʼil, sino mas jaku txiʼ toj il tuʼn (Col. 3:5; Sant. 1:14, 15). Ex chʼixme kykyaqil qeju in che keʼyin tiʼj pornografía, in che kubʼ tzʼaq toj yaẍbʼil.

12. ¿Tiʼ il tiʼj tuʼn tbʼant quʼn qa noq minabʼen in che etz yekʼin tilbʼilal jaku ten nya bʼaʼn qximbʼetz tuʼn?

¹² ¿Tiʼ jaku bʼant tuʼn jun erman qa noq minabʼen in jatz yekʼin pornografía toj tcelular? Tbʼanel qa mintiʼ ma tzʼok tqʼoʼn twitz tiʼj. Tuʼn tten qipumal tuʼn tbʼant jlu quʼn, bʼaʼn tuʼn ttzaj qnaʼn qa mas nim toklen qamiwbʼil tukʼil Jehová. Ax ikx, ateʼ junjun tilbʼilal in tzaj kyqʼamaʼn xjal qa nya pornografía, pero jaku ten nya bʼaʼn qximbʼetz tuʼn. Tuʼntzunju, mintiʼ tuʼn tok qqʼoʼn qwitz kyiʼj tilbʼilal lu. ¿Tiquʼn? Tuʼnju nya qaj tuʼn qbʼinchaʼn aj pajil toj qanmi (Mat. 5:28, 29). In tzaj tqʼamaʼn jun ansyan te Tailandia jlu, aju David tbʼi: «Ngane tuʼn tkubʼ nxjeline jlu: ‹¿Bʼaʼnpe in nela toj twitz Jehová tuʼn tok nqʼoʼn nwitze kyiʼj tilbʼilal lu maske nya pornografía?›. Aj nximane tiʼj jlu, in nonin wiʼje tuʼn tjaw nskʼoʼne aju mas bʼaʼn».

13. ¿Tiʼ jaku tzʼonin qiʼj tuʼn tjaw qskʼoʼn aju mas bʼaʼn?

¹³ Qa nya qaj tuʼn ttzaj tbʼis Jehová, mas nya kwest kʼelel toj qwitz tuʼn tjaw qskʼoʼn aju mas bʼaʼn. Tuʼn jlu, in nel qnikʼ tiʼj tiquʼn in tzaj tqʼamaʼn Proverbios 9:10 jlu: «Qa ma qo niman te Qman, atzun in xeʼt tuʼn tten qnabʼl». Atzun jlu jaku tzʼel qnikʼ tiʼj kyoj tnejel versículo te capítulo 9 toj Proverbios jatumel in yolin tiʼj nabʼil axix tok. Kyoj tnejel uʼj e kubʼ tzʼibʼin tiʼj Biblia, in tzaj qʼamaʼn qa in nok nabʼil axix tok ik tzeʼn jun xuʼj.

14. ¿Alkye juntl txokbʼil in yolin Proverbios 9:1 a 6 tiʼj?

¹⁴ (Kjawil uʼjit Proverbios 9:1-6). Kyoj versículo lu in tzaj tqʼoʼn Jehová jun txokbʼil qiʼj, aju Dios Bʼinchal qe ex tajaw nabʼil (Prov. 2:6; Rom. 16:27). Aj tjaw quʼjin, in yolin tiʼj jun ja at wuq tcolumna. A jlu in tzaj tyekʼin qe qa in kubʼ tyekʼin Jehová tbʼanel tmod kyukʼil kykyaqil qeju kyaj tuʼn t-xi kybʼiʼn tconsej.

15. ¿Tiʼ txokbʼil in tzaj tqʼoʼn Dios qiʼj?

¹⁵ In kubʼ tyekʼin Jehová tbʼanel tmod qukʼil aj ttzaj tqʼoʼn nim tbʼanel tiʼchaq qe. Atzun jlu in nel qnikʼ tiʼj aj qxnaqʼtzan tiʼj xuʼj in yolin capítulo 9 te Proverbios  tiʼj, aju in kubʼ techlaʼn nabʼil axix tok. In tzaj kyqʼamaʼn versículo lu qa in xi tqʼoʼn xuʼj txokbʼil kyiʼj junjun xjal ex qa o bʼaj tbʼinchaʼn chibʼj ex vin (Prov. 9:2). Ex in tzaj tqʼamaʼn versículo 4 ex 5 qa in xi tqʼoʼn xuʼj txokbʼil lu kyiʼj qeju kyaj tuʼn tok kynabʼil: «Kytzaje waʼl tiʼj wabʼj ma bʼant wuʼne». ¿Tiquʼn bʼaʼn tuʼn t-xi qkʼamoʼn txokbʼil in tzaj tqʼoʼn xuʼj jlu? Tuʼnju taj Jehová tuʼn t-xqʼuqin kyiʼj tkʼwal ex tuʼn t-xi tqʼoʼn kynabʼil. Nya taj tuʼn ttzaj qbʼis kyiʼj il bʼant quʼn ojtxe ex tuʼn qikʼ toj jun nya bʼaʼn tuʼntzun tok qnabʼil. Tuʼntzunju, «in onin Qman kyiʼj xjal in che anqʼin tuj tumelxix ex mintiʼ kypaltil» (Prov. 2:7). Qa ma ten tchiylal Jehová qiʼj, kʼokel tilil quʼn tuʼn ttzalaj ex che kxel qbʼiʼn tconsej. Qa ma bʼant jlu quʼn, qo tzalajel (Sant. 1:25).

16. ¿Tiʼ bʼant tuʼn Alain tuʼnju at tchiylal Jehová tiʼj ex tiʼ tzaj tuʼn jlu?

¹⁶ Qa ma ten tchiylal Jehová qiʼj, in nonin qiʼj tuʼn tjaw qskʼoʼn aju mas bʼaʼn. Atzun jlu bʼaj tiʼj Alain, jun erman in najbʼen te ansyan toj congregación ex in naqʼunan te profesor. Tqʼama jlu: «In kubʼ kyximen nim wukʼile toj aqʼuntl qa tbʼanel qe película in netz yekʼin pornografía kyoj tuʼntzun t-xi qʼet xnaqʼtzbʼil kye kʼwal tiʼjju tuʼn tkubʼ ten jun xinaq tukʼil jun xuʼj». In tzaj tqʼamaʼntl ermano tiʼ bʼant tuʼn: «Tuʼnju at tchiylal Jehová wiʼje, mintiʼ ok nqʼoʼne nwitze kyiʼj película lu. Ax ikx xi nqʼamaʼne kye txqantl profesor tiquʼn mintiʼ bʼant jlu wuʼne». Tej tbʼant jlu tuʼn, xi tbʼiʼn consej lu in tzaj tqʼoʼn nabʼil axix tok: «Che bʼete ik tzaʼn jun xjal at tnabʼl» (Prov. 9:6). Tuʼnju bʼant jlu tuʼn erman, xi tzyet tuʼn kyxnaqʼtzan junjun tukʼil toj aqʼuntl tiʼj Biblia ex tuʼn kyxiʼ kyoj chmabʼil.

17, 18. ¿Alkyeqe kʼiwlabʼil in tzaj kykʼamoʼn xjal in che ok lepeʼ tiʼj nabʼil axix tok ex tiʼ kʼiwlabʼil tzul kykʼamoʼn toj ambʼil tzul? (Ax ikx qʼonka twitza tiʼj dibujo).

¹⁷ In yolin Jehová kyiʼj kabʼe xuʼj lu tuʼntzun ttzaj tyekʼin qe tiʼ tuʼn tbʼant quʼn tuʼntzun qtzalaj toj ambʼil tzul. Kykyaqil qeju in xi kykʼamoʼn txokbʼil in tqʼoʼn «xuʼj mintiʼ tnabʼl», kyaj tuʼn kytzalaj tiʼj yaẍbʼil. Oʼkx in che ximen tuʼn kytzalaj toj ambʼil jaʼlo ex mintiʼ in che ximen tiʼjju kbʼajel toj ambʼil tzul. Tuʼnju in bʼant jlu kyuʼn, che xeʼl toj «kynajbʼil kyimni» (Prov. 9:13, 17, 18).

¹⁸ Yajtzun kye xjal in xi kykʼamoʼn txokbʼil in tzaj tqʼoʼn xuʼj in kubʼ techlaʼn nabʼil axix tok, ¿tiʼ kbʼajel kyiʼj? In kubʼ kynaʼn nimxix tzalajbʼil tuʼnju at tkyaqil tiʼchaq jaku tzʼonin kyiʼj tuʼn tten jun tbʼanel kyamiwbʼil tukʼil Jehová (Is. 65:13). Ajbʼen profeta Isaías tuʼn Jehová tuʼn ttzaj tqʼamaʼn jlu: «Kyqʼontz kywiʼye tiʼj nyole ex che waʼle tbʼanil wabʼj ex che nikʼbʼele kyiʼj qe tiʼxti nim tkʼokʼjal» (Is. 55:1, 2). In nok tilil quʼn tuʼn tok qkʼujlaʼn qe  tiʼchaq kʼujlaʼn tuʼn Jehová ex tuʼn tel qikʼun qe tiʼchaq nya bʼaʼn in che ela toj twitz (Sal. 97:10). Ax ikx, in qo tzalaj aj t-xi qqʼoʼn txokbʼil kyiʼj txqantl tuʼn tel kynikʼ tiʼj nabʼil axix tok. In qo ok ik tzeʼn kye majen xuʼj in yolin capítulo 9 te Proverbios tiʼj ex in che ok ten «qʼmalte tqanil kyuj qe lugar maʼ kyjaw tibʼaj tnam». In xi qqʼamaʼn qe yol lu ik tzeʼn kye: «Kytzaje, aqeye [...] naʼnx tok kynabʼle». Kykyaqilx qeju in xi kykʼamoʼn txokbʼil lu, in tzaj kykʼamoʼn nim kʼiwlabʼil toj ambʼil jaʼlo. Nya oʼkxju, ax ikx qo anqʼil te jumajx toj ambʼil tzul qa ma qo bʼet «ik tzaʼn jun xjal at tnabʼl» (Prov. 9:3, 4, 6).

19. Ik tzeʼn in tzaj tqʼamaʼn Eclesiastés 12:13 ex 14, ¿tiʼ il tiʼj tuʼn tbʼant quʼn? (Ax ikx qʼonka twitza tiʼj recuadro « Qe kʼiwlabʼil tzul qkʼamoʼn qa ma ten tchiylal Jehová qiʼj»).

¹⁹ (Kjawil uʼjit Eclesiastés 12:13, 14). Maske in qo anqʼin kyoj mankbʼil tqʼijlalil ex at nim nya bʼaʼn, nim toklen tuʼn tten tchiylal Dios qiʼj. Qa ma bʼant jlu quʼn, kʼokel qxqʼuqin qanmi, mlay kubʼ qbʼinchaʼn nya bʼaʼn ex qo tel nqayin ttxlaj Jehová. Ex tuʼnju kʼujlaʼn quʼn ex in nok qqʼoʼn toklen, kxel qqʼoʼn txokbʼil kyiʼj kykyaqil xjal tuʼn kyjyon tiʼj nabʼil axix tok ex tuʼn kytzalaj tiʼj.