Mintiʼ in tzaj tqʼoʼn Tyol Dios tzaqʼwebʼil tiʼj xjel lu, pero in tzaj tqʼoʼn junjun tqanil jaku che onin qiʼj.

Tej t-xi tqʼamaʼn jun anjel te María qa tzultoq itzʼj jun tal, atztoq in nanqʼin tukʼil José toj Nazaret jun tnam te Galilea (Luc. 1:26-31; 2:4). Ex tej kymeltzʼaj toj Egipto, atz e xi anqʼil toj Nazaret. Tuʼnju atz jaw chʼiy Jesús toj lugar lu ok ojtzqiʼn kyuʼn xjal qa te Nazaret te (Mat. 2:19-23). Tuʼntzunju, aj tok qbʼiʼn yol Nazaret in tzaj qnaʼn José, María ex Jesús.

Nya oʼkxju, ax ikx ojtzqintoq txʼotxʼ te Judea tuʼn María. ¿Tiquʼn in xi qqʼamaʼn jlu? Tuʼnju ateʼtoq tfamiliar toj Judea. Toj lugar lu, anqʼin Elisabet aju t-xuʼjil pal Zacarías ex ttxuʼ Juan el Bautista (Luc. 1:5, 9, 13, 36). Xiʼ María visitarilte Elisabet ex bʼalo ax kyaj ten junlo oxe xjaw ex yajxitl meltzʼaj toj tnam Nazaret (Luc. 1:39, 40, 56).

Tej tikʼ ambʼil, etz jun ley jatumel tzaj qʼamaʼn qa iltoq tiʼj tuʼn kyxiʼ xjal tzʼibʼil kybʼi. Tuʼn t-xi tbʼiʼn José ley lu, viajarin toj tnam Nazaret tuʼn tpon toj Belén, «aju ttanmi David» ex jatumel tzaj qʼamaʼn qa tuʼn tul itzʼj Mesías (Luc. 2:3, 4; 1 Sam. 17:15; 20:6; Miq. 5:2). Toj lugar lu ul itzʼj Jesús, tuʼntzunju mlaytoq txi tqanin José te María tuʼn tbʼet nim ambʼil tuʼn kymeltzʼaj. Sino atz e kyaj ten toj Belén, jun lugar tok nqayin tiʼj Jerusalén ex bʼalo junlo 9 kilómetro kyxol. Ex tbʼanel ok jlu tuʼnju nqayin tuʼn kyxiʼ toj templo tuʼn t-xi kyqʼoʼn chojbʼil tzaj tqʼamaʼn Ley (Lev. 12:2, 6-8; Luc. 2:22-24).

Ax ikx bʼaʼn tuʼn ttzaj qnaʼn qa xi tqʼamaʼn anjel te María qa kxeltoq qʼoʼn toklen tal «tuʼn tok te rey ik tzaʼn te David». Bʼalo kubʼ t-ximen José ex María qa tbʼanel tqanil tzaj qʼamaʼn kye qa atztoq tzul itzʼj Jesús toj ttnam David (Luc. 1:32, 33; 2:11, 17). Tuʼntzunju, kubʼlo kyximen tuʼn kykyaj ten toj tnam Belén ex tuʼn kyyon tzmaxi aj ttzaj tqʼoʼn Dios mas tqanil kye.

Bʼalo e ten nim ambʼil toj tnam Belén. Mintiʼ ojtzqiʼn quʼn jniʼ ambʼil qʼiʼntoq kyuʼn atz tej kypon junjun astrólogo visitaril kye. Noqtzun tuʼnj, ya otoq chʼiy Jesús ex nya jun neʼẍ. Ax ikx, ya otoq kanet jun kyja toj Belén (Mat. 2:11). Tuʼn jlu, in nel qnikʼ tiʼj qa mintiʼ e meltzʼaj toj Nazaret ex qa atz e kyaj ten anqʼil toj jun ambʼil toj Belén.

In tzaj tqʼamaʼn Biblia qa bʼant jlu tuʼn Herodes: «Etz jun orden tuʼn, tuʼn kybʼyet kykyaqil tal qʼa naʼnx tjapun kabʼe abʼqʼi kyuʼn ateʼ tuj Belén» (Mat. 2:16). Xi tqʼamaʼn ju anjel te José ex María tiʼ nya bʼaʼn chʼixtoq ttzaj, tuʼntzunju i etz oq toj tnam ex e xi anqʼil toj Egipto tzmaxi tej tkyim Herodes. Yajxitl kubʼ kyximen tuʼn kyxiʼ Nazaret. ¿Tiquʼn mintiʼ e xiʼ Belén? Tuʼnju in kawintoq Arquelao toj Judea, jun tkʼwal Herodes ex nyatoq tbʼanel tmod. Ex xi qʼamaʼn te José tuʼn jun anjel qa jakutoq tzaj nya bʼaʼn kyiʼj. Tuʼntzunju, xi tiʼn José tfamilia toj Nazaret. Toj lugar lu, mlaytoq tzaj nya bʼaʼn tiʼj Jesús ex jakutoq ten jun tbʼanel tamiwbʼil tukʼil Jehová (Mat. 2:19-22; 13:55; Luc. 2:39, 52).

Bʼalo kyim José tej naʼmxtoq tkyim Jesús. Qa ikju, jaku txi qqʼamaʼn qa mlay txi José toj kyaʼj. Sino qa atz kjawil anqʼin tzalu twitz Txʼotxʼ. Tuʼntzunju, kʼokel qojtzqiʼn José ex jaku tzaj tqʼamaʼn qe tiquʼn kubʼ t-ximen tuʼn kykyaj ten atz Belén tej tul itzʼj Jesús.